رواية على صراط امي الفصل الثالث 3 - بقلم Shaqraa

على صراط امي
الجزء الثالث

تمنيت اطلعلي عذر حتى مااروح
مااريد اشوف علاء استحي يتصورلي عرف بيه
وهسه ينظرلي نظرة محلوة
بس هيهات اخلص من امي واسالتها اذا كلت ماروح ...

صار يوم ثاني ورحنا للدوام ومن رجعنا
بابا كال لماما نروح اني وياج وحسين
لبيت اهل سفانا نتفاهم ونحدد موعد زواجهم
امي كالت من نرجع نروح لبيت خالو سلام
يعني ورا الغروب
فرحت لان تاجلت وتمنيت تنلغي الروحه كلش

راحو هم تقريبا بالاربعة العصر
ويمامة بس اجت صبيتلها اكل
انقهر عليها لان قوقعت نفسها بسبب تجربة فاشلة
وشخص قليل وفاء
مادري ليش اليحبون يكرسون حياتهم لشخص واحد
يعني هو حاله حال غيره المن اضوج عليه لو راح
الله لا يبلينا بالحب وسوالفه..
اروح اسوي شامية واجيبلي ماعون فاكهة احسنلي

وانة بالمطبخ اسوي الشامية هي بس تاكل وساكتة
ماردت احجي شي وتفشلني
لان كل مرة تكلي بعدج طفلة ماتفهمين شنو احس
خلصت اكلها وراحت
وانة اخذت الاكل ودخلت للصالة صحت على مختار
وعابد واجت يمامة يمنا
طبعا مرتجى اغلب وقته موبالبيت
خلص كلية علوم ويشتغل بمختبر بمجمع طبي
شاغول وملتزم وهادئ احنا نغيضه نسمي المعقد
لان من يشوفنا نسمع اغاني لو نطربك
يبقى ينصحنا ومايبقى يمنا يكوم

بقينا نسولف اني وناكل الى ان اذن ورحنا صلينا
بس عابد مايلتزم بصلاته
ياخدله فترة يصلي وفترة يقطعها واكثر من مرة بابا يرزله
بس مايترك نهائي يعني
ورا الصلاة تحضرنا اني ويمامة وكعدناننتظر
ستة ونص اجو بس وجوههم ماتتفسر
حسين كبل صعد فوك
وبابا كال امشو اوصلكم بدون ماينطق غير هالجملة
احنا وحدة تباوع بوجه الثانية

صعدنا بس نخاف نسال وامي ساكتة وقافلة كلششش
امي شكد هادئة وساكنة بس عصبيتها نار تسعر
اذا تعصبت امي تضرب بشكو شي يمها
بابا الي هو رجال وعصبي من تتعصب يسكت
وهو يهدي الجو ويسكت
من حبه الها واحترامه ودائما ادعي واتمنى الكى
رجال يحبني مثل ما بابا يحبها...

ساد السكون بالسيارة لحد ما وصلنا
نزلنا وكال بابا استعجلو لا تطولون لان تعبان..
دخلنا واستقبلتنا مرت خالو وبعدين اجو كلهم يمنا
شوية حسيت وجه امي لان وخصوصا من خالو سلام يشاقيها
ويذكرها باشياء قبل
اني اخاف اباوع لعلاء رغم هو عادي يسولف ويانا
بس مثل مايكولون _يكاد المريب يقول خذوني_
من توتري احس الكل يعرف بجية حر والهدية ..

ردنا نطلع وماقبلو ابد كالو ابقو تعشو ورغم الرفض
بس ماقبل خالو ومرته كلش خوش انسانة
تعشينا وماكدرنا نطول بابا تعذر منهم وعزمهم
عدنا الجمعة التجي وترخصنا وطلعنا..
بطلعتنا بعدنا بالباب وخالو والولد ويانا يسولفون
بعد العراقي معروف من يطلع لازم ربع ساعة باباب يودع
انتبهت لنفسها السيارة الطيحت حظي
اي نفسها الكمارو !

مشيت خطوتين سمعت واحد سلم والكل رد السلام
التوت رجلي وطحت
مارفعت راسي ولا اريد اباوع اصلا اصلا ماريد
من فشلتي !من خوفي هذا حر !من غبائي ماااعرف...
بسرعة فقار ويمامة كوموني والكل التم عليه
واني مسوية نفسي بيه زهايمر من فشلتي
بس ابجي ومتوجعة لان الم رجلي قوي
سندوني وكعدوني بالطارمة واني اون من رجلي
امي تسمي عليه وخايفة خطية وبابا يكلي بس نفهم شبيها
حتى ناخذج مستشفى
وانة اصيح لا تلزموووها توجعني لحد يلزمها

سمعت صوت مااريد اسمعه ..
عمة الاحسن تاخذوها للمستشفى لان احتمال صار عدها فطر لو كسر...
جاوبت مرت خالو
اي اي صح مثل ماكلت عمة وابوي والكل ايد الكلام
واني دخت بي ليش يكول لمرت خالو عمة!
كوموني بابا وعلاء للسيارة والكل قلق وامي جابت ماي وذبت بمكاني الطحت بي
رحنا للمستشفى بابا وماما وفقار ويانا
ويمامة بقت يم بيت خالو

وصلنا واني الالم كوة متحملته كلش قوي والجو بي برودة
بعد الفحص تبين كسر كلش واضح
جبسوها بعد مافرفحت من البجي عبالك طفل ومكتول
مو مرة شكدني وشكبرني
انطوني مسكن يلا ارتاحيت شوية ورحعنا للبيت
لكينا يمامة جايبها علاء وينتظرنا
اجه تطمن عليه بس نظراته قلقتني
ابد نظراته مو خالية احس بيها معنى وحجي

بعدها راحو هو وفقار وانة نمت ع الجرباية
وامي عدلتلي رجلي وعيونها حمر خطية
والولد داير مدايري كلهم يمي الى ان غفيت

الصبح كعدت وسندوني الولد وامي رحت للحمام
بكلشي امي وياي
لان يمامة راحت دوام وانة عابد كال راح اخذلج مرضية
تريكت وكعدت بالصالة بعد ما الكل طلع لدوامه
ترددت اسال امي شبيهم امس
طبعا جان بوقتها النت بس ع الحاسبة وبرامج تواصل قليلة
احنا جان عدنا حاسبة ولابتوب وبيهن نت
ومانستخدمهن بكثرة اكثر شي للدراسة
يعني اغلب الوقت جان نشوف افلام مسلسلات

جان طالع فلم اجنبي مال روبن هود اتذكره
وامي بالمطبخ
ورا سوية اجت يمي وجهها تعبان واحسها ضايجة
تشجعت وسالتها شبيج ماما؟
لا ماما ماكو شلونها رجلج سودة عليه توجعج مو...
شوية احسن بس اليوجعني قلبي
من اشوفج حزينة وماتكولين شبيج ..
اخ يا ماما غير اهل سفانا امس رفعو ضغطي ..
اسم الله عليج ليش؟؟

بعد رحنا نحدد الموعد خاف يكولون مااجو وماقدرو بتنا
اتفقنا على القاعة والفندق
كالو ما نريد فندق ..يابه الولد هو يريد وحسين كال
هذا شي يخصني
وابوها عاند فندق ماكو
مشينا السالفة وشفايفي راحت من كد ماعضيتها لحسين
الصالون رادو واحد يعرفو بخمسة ميل
كنالهم براحتكم بعد هذا شي يخصها واليعجبها تروحله حقها
رادو ٨٠٠ يابه مجاب وتدللون

البدلة صاحب خالج كلهم ابوج صاحب خال الولد
وانة اعرفه ويطلعلكم اليعجبكم
وهو زامطلي بيها وكلي بس تعال
هنا ابوها انزعج وشنو قابل ندور البلاش لو الرخص
حسين ضايج منه كلش كله
قيمة الهدمة مو مهمة مثل قيمة اخلاق البشر..
وهو طفر ..شنو قصدك وشنو شنو تكول متحلفين بينا
ابوج ضاج بس ماراد مشاكل وهم كالو
نطلع للمحلات ونشوف وننطيكم خبر

وطول الطريق من رحعنا حسين متخبل
كال بس يحجون حجاية زايدة اطلكها
انهد بي ابوج بس انة كتله حقه يمعود
اذا بالخطوبة هيج طلعو روحه وناس تدور الفلس بكلشي...
ايي صح ماما هم ماديين كلش
وهو الله يهدي مو كناله من شفنا سفانا وابد مو حلوة معشر
يعني من خطبها لهسه يوم فون يوم ذهب يوم
ملابس صح هذا كله حقها ومو عيب ولا حرام
بس واحد يحطله عزة نفس مو يطلب اوي احسها عيب
بعد شنسوي يا ماما مو كل واحد عينه شبعانة ..

اكوم اشوف التشريب سويتلج مال كسور حتى ترم عظمج ...
راحت للمطبخ وبقيت ع نفس كعدتي
لحد الظهر ساعدتني صليت كعدة وصبتلي اكل
خلصت ونمت
بعدين كعدت على حركة بابا يمي يلزم راسي يقيس حرارتي
ابتسمتله الله يساعدك ..
يساعدج بعد ابوج شلونج هسه ؟
لا احسن الحمدلله ..
جبتلج حليب مال جاموس هسه امج تصبلج وشربي..
ايييع بابا مااحبه فدوة..
لا لا بنيتي كل الفايدة بي اعتبري دوا وجرعي...

صدك ورا شوية اجت عابد كومني لكيتهم بالصالة
جاي يشربون جاي
جابتلي امي الحليب وتريد تشربني كوة
وانة اصارع ماريد ماريد اخر شي قطرات شربت
تلعب نفسي منه
جره عابد كله ونسفه بسرعة كال
تتدلعين واوي وايع انطيني رجال رياضي ادور شي صحي..
وطبعا غير جو الكعدة وحسن المود
وحتى حسين شوية فك حسيته لان جان كلش ضايج

ورا شوية اجو خالو هو ومرته وعلاء ومرته
تحمدولي السلامة وكعدو يسولفون وهذا كله
مااجت عيني بعين علاء اخاف حس بشي لان نظراته موخالية...
مرت خالو تسولف وكالت خطية ام حر جيرانة اجتلي اليوم ..
رفعت راسي عليها وتسمعت باهتمام
ونفس اللحظة باوعلي علاء مثل الينتظر رد فعل
درت وجهي وسويت نفسي طبيعية ..

كملت كلامها كالت
خطية تسال عن وطن لان البارحة حر كايللها طايحة
وهم اكثر من اهل ويانا حتى ولدها يصيحولي عمة
لان خالتهم ماخذة ابن عم ابوي ...
جاوبها بابا ..الله يستر عليه خوش ولد شفته البارحة صاحب نخوة
وكال امشو اخذكم بس تشكرناه ...
امي كالت..الله يجزيهم خير ..

اني تحنطت لا ووجهي مادرته بعد بس ابلع ريكي
هذا حر شنو ارتباطة بريكي من ينذكر لو اشوفه تصير
عدي صعوبة بلع ..
بقت سالفة تجر سالفة وراها راحو
امي ودتني لغرفتي ارتاح
ومر اليوم بالكوة لان لا اكدر امشي لا اعين نفسي

يوم ثاني اجو خوالي وجدي وبيبي وكلساع واحد جاي
ماكدرت ارتاح لحد الليل يلا تمددت بفراشي
خطية عابد كلي اسويلج تمرين شوية ترتاحين
ماقبلت خفت لان كلش جبانة وبسرعة اتوجع
غفيت وماحسيت من تعبي ...

ومرت ثلث اسابيع يلا فتحت رجلي
وشوية شوية امشي من خوفي
رجعت للدوام وشكد مشتاقة لدوامي
الطلاب والطالبات وحتى الاساتذة سلمو عليه
وكلساع واحد جايني الحمدلله ع سلامة
والطلاب كالو للاستاذ لخاطر وطن انطينا ساعة ريست
اعتبرها سلف وخلو الاستاذ يضحك
يكلهم كلشي سامع بس واحد يسلف ريست جديدة هاي...
وصدك اخذنا ريست وطلعنا كعدنا برا
كالت الاء اليوم كعدي وانة اجيبلج الاكل ادللج ..

صدك راحت وكعدت اباوع كدامي كبل
البنية طويلة حيل والولد قصير
مصفنة بيهم اكول شلون يبوسها من يتزوجون هذا
يصعدلها بدرج
وضحكت على سفاهتي وتفكيري المو نظيف ..

انقطعت ضحكتي بصوت خافت ومتزن
الحمدلله على السلامة ست وطن
خطاج السوء...

للحكاية بقية
بقلم شقراء(قمر كانون)