رواية على صراط امي الفصل الثاني 2 - بقلم Shaqraa

السلام عليكم جميعاً
رجعنا بقصة جديدة انشالله
كان المفروض انزل فراشات تخشى الاحتراق بس اجلتها
وانشالله راح ابدي بقصة على صراط امي..
طبعا للتوضيح لغوياً كلمة سراط =صراط يعني ثنينهم صح
بس لعيونكم وكثرة الاسئلة سويتها صراط هذي اول نقطة..

ثاني شي تهموني هواي بالاباحية وتمادو بالتعليقات ومن اجاوبهم او اناقشهم يمسحون التعليق
وايضا اكو نماذج بالقصة تعلق وتمدح وتشجع ومن وراي تنافق وتتهمني بالاباحية ...

لاحظو حبايبي بصورة عامة نمط كتابتي مابي اي اشكال
واني مو طفلة ولا قليلة ثقافة حتى اكتب شي مااعرفه
واسلوبي اسلوب ادبي ماخارج عن المألوف
والحمدلله دارسة ادب انكليزي وادب عربي وثنينهم ميتعارضون وي نمط كتابتي

الاكتبه كله بأطار الزوجية ومامشجعة على حرام او مشجعة وحدة تتمارس الرذيلة وي عشيقها حتى اتذبذب من احد يتهجم عليه
ونصيحة صغيرة يعني الي ماقاري روايات عالمية
او ملم باصول الكتابة لا يكثر كلام
لان من يرجع ويبحث يلكى نفسه غلطان

وطبعا اني ميهمني اللغوة الي تصير من وراي
لان شي طبيعي بكل مكان اكو المنافق واكو الزين
والحمدلله من احد يحجي علي اشوف اغلب المتابعات يدافعون عني
رغم اكو جديدات حتى بعدني ماحافظتهم بس ميقبلون احد يحجي عني بسوء

وكلمة اخيرة احجيها (للبعض) وكلمن يعرف نفسه
عدكم انتقاد انتقدو بداخل القصة
ومن حق كل شخص ينتقد طبعا (ينتقد )مو (يتهجم)
ماحاجة البس عشر اقنعة وبكل مكان البس واحد
وبالتالي اضيع وجهي الحقيقي

وتنويه زغنون لحبيباتي متابعاتي المتحمسات
اعرفكم من تتحمسون حتى اني يلوحني منكم طشار
راعو اصحاب القصة بالتعليقات خطية
مو تخجلوني وياهم عيب
وكلنا نعرف البطل من اصحاب البشرة السوداء
ماريد وحدة تكون عنصرية بتعليقها من يغلط
وتنسى نفسها وتحجي اعرفكم من تتحمسون زيادة
😂😂😂محد يسلم منكم
وبالنسبة للنشر راح يكون بين يوم ويوم ثابت هالشي

⭐️⭐️⭐️⭐️⭐️⭐️⭐️⭐️⭐️⭐️⭐️⭐️⭐️⭐️⭐️

على صراط امي

الجزء الثاني

انطاني الهدية وعبر من يمي بسرعة حجه بصوت ناصي
الج مو لعلاء!!
اهتز جسمي وقشعر من قرب صوته من اذني
بقيت متوترة وماعرفت اتصرف
بصراحة ممتعرضة لهيج موقف سابقا
صح اكو اليصارحني
بس ما يحجي بصوت ناصي هيج
ونفس الوقت متمكن وواثق بنفسه
ابد مصايرة وياي...

ازمتني الاء من ايدي وهزتها..
ولج وطن منو هذا وعلاء منو؟؟
مباوعت بوجهها من ارتباكي..بس حجيت بنبرة مو ثابتة..
هذا صديق ابن خالي العرس الخميس
جايبله هدية
مدت ايدها ودارت وجهي عليها..
لج باوعيلي شوية
شبيج هيجي متغيرة ومصفنة
احس ارتباكج مو طبيعي!!
ولج وطن امداج اذا صدك!!!
معقولة منعجبة بهذا العبد؟؟

غثتني حجايتها نترت ايدها وحجيت بخزرة
حرام عليج عبد شنو عود انت الدارسة ولازم تكونين مثقفة
تتلفظين هيجي وتصيرين عنصرية...
ولج مو عنصرية بس باوعيله يعني هو اسود
شنو اسمي مثلا؟
ماحاجة تسمي شي ومامعجبة بي هو صديق علاءوبس...
ههه اي مو اعرفج مايعجبج عجب استغربت..
حاجيتها ببرود لا لتستغربين ..

ضميت العلاكة بجنطتي ورحنا للمحاضرة
الاستاذة تشرح وبالي شارد
متفاجئة بتصرف حر والهدية ليش يجيبلي
وبكل ثقة ينطيها الي
هذا لان شافني باوعتله عباله بيه مجال
ولو السبب مني غبية شلون هيج اتصرف
شكد عيب هسه يكول بت عمة علاء خفيفة وتنطي مجال
بس هو هم عيب عليه ماراعى حرمة بيت صديقه
لازم اثكل شوية حتى يكف عني

خلص الدوام واجه علي عابد
طول الطريق يسولف مثل كل مرة
يفتح اغاني ونتعارك اني ويا كل واحد بختار اغنية
ونشبع وناسة بالطريق
بس اليوم ماكدرت لا اسولف ولا اضحك بالي شارد
حتى من سالني عابد كتله مصدعة يمكن بدت بيه نشلة
وصلت للبيت لكيت امي وابوي كاعدين بالصالة
سلمت ورحت لغرفتي بدلت
واجيت ساعدت ماما صبينا الغدا
سالتني من لاحظت شرودي كتلها مصدعة
وفعلا اني من التفكير او التوتر صار عندي صداع...

كملنا الغدا ووصبيت الجاي ورحت يمهم كاعدين يباوعون
اخبار
بس شربته ترخصت ورحت للغرفة
متعودة يومية اخذلي غفوة بسيطة من ارجع
طفيت الضوا وتمددت وببالي الهدية وشنو بيها
ماعرف اكوم افتحها لو اذبها بلا ماعرف شنو داخلها
بقيت مترددة الى ان كمت جبت الجنطة وطلعتها
فتحت العلاكة وبلشت افتح غلاف الهدية
شفت علبة خضرا فتحتها بيها سوار فضي
سلسلة ثخينة ومعباية شذر ازرق مثل السبحة

حطيته ع ايدي شكله حلو يشع
بس لا يولي شنو اخذه شنو يربطني بي اني
انتبهت اكو بطاقة مرسوم عليها اشجار وثلج
فتحتها مكتوب بخط كلش حلوو مثل كتابة الخطاطين
الاشوفها باللوحات المخطوطة
*انة اسف لتصرفي بس...حاب اتعرف عليج اكثر
هذا رقمي اتمنى نتواصل * حر ...

يا مصيبة عليك سريع التفاعل هذا كلش
حطيت البطاقة وي العلبة بالعلاكة وضميتها
بالجرار مال الملابس الداخلية حتى محد يشوفها
حاولت اتناسى الموضوع واشيله من بالي..
غفيت شوية وكعدت على صوت يمامة راجعة من الدوام...

كومي تنبل صبيلي غدا ميتة جوع علو ماابدل..
اممم نعسانة ولج ..
دكومي كومي صبيلي غدا وجيبي هنا ..
كمنا كمنا مدام حجيتها بضحكة وتذكرت نفسي شنو كلت
باوعتلها ..
دنكت كالت لتصبين مااريد
رحت يمها خليت ايدي على حلكي..
اسفة ماقصدي اكولها ومااقصد تدرين بيه..
كافي وطن نعسانة راح انام مااريد..
ولج شبيج قابل متقصدة انة؟؟؟
عاطت بوجهي ..
كاااافي كتلج ماريد زحر مر لزكتي...

طفت الضوا وبقت تبدل كملت ونامت بفراشها
حاولت احاجيها ماخلتني حتى احجي
هي هيج كل مينذكر كدامها هذا الموضوع
صح مو قصدي بس هي تتحسس..

طلعت من الغرفة لان اعرف من تصير هيج تربد تبقى
وحدها
شفت حسين متمدد بالصالة يباوع لعبة
اول ماشافني كال
زين اجيتي فدوة لعينج اكويلي قميصي الرصاصي ..
هااا شعندك اليوم ..
ههه فد شوية واروح لبيت سفانا ..
اي تدلل راح اكويلك وعود سلمنا من تروح ..
يوصل بس خفي ايدج حبوبة ..

صعدت لغرفة حسين طبعا
صارله شهرين من خطب
وناوي يتزوج بالعطلة الصيفية
لان هو مدرس وخطيبته طالبة خامس اعدادي
كويتله ملابسه وحضرتها ونزلت
هو صعد واني رتبت الصالة وشلت النفاضات
وكوب الجاي ومسحت الطبلات

وانة بالمطبخ اجت امي يمي
ها ماما اختج تغدت ؟
اخ يا ماما غير زعلت ونامت بلا غدا ...
خير انشالله منين زعلت؟
حاجيتها بلا مااقصد وهي عبالها قاصدة وضاجت
بعد تعرفيها من تقفل محد يكدر يحاجيها..
تنهدت امي كالت ..خليها لوحدها هي ترتاح وبعدين نحاجيها

طبع امي كلش حنونة وتحس بينا الى درجة
ومانضم عليها اي شي
بس الصار وياي اليوم خفت احجي واول مرة
اضم عليها شي
يمكن لان اني غلطانة ماردت احصل لوم منها
هذا المبررالوحيد الي بررت لنفسي بي...

ورا الاذان بعد ماصلينا امي راحت للغرفة تحاجي يمامة
شوية وطلعن سوا ثنينهن
انة بالصالةيم بابا واخواني نباوع الدوري الاسباني
امي كالت تعاي ساعدينا بالعشا
ويمامة شوي شكلها احسن مامطنكرة
من كالت امي تعاي ساعدينها طفرت يم بابا
صرت بظهره كلت لامي..
اريد اباوع اليوم اللعبة حامية ما مااكوم...
ضحك بابا كلها خليها خليها  خطية جاي تباوع..
باوعتلي امي بنص ابتسامة وهزت راسها
وراحت ...

بعدها تعشينا وكملنا وكعدنا كلنا
متعودين كل يوم نكعد سوا امي ماتقبل احد ينعزل
وكعدتنا تخبل ماكو بحلاتها
ماتخلى من قصص حسين وتعقيد مرتجى ومثالية مختار
وتحشيش عابد
واحنا كاعدين اجه حسين من بيت خطيبته
وكعد يمنا بس شكله ضايج
منسالته ماما كال ...

اهل سفانا يردون نقدم الزواج هو مابقى بس ٣ اشهر
وتخلص السنة
بس يكولون ماعدنا خطوبة تطول والناس تحجي ...
ساله بابا..واذا شكو بيها ليش ضايج
اغلب الاهل هيج ترى وهي مرتك اول وتالي تتزوجون..
ما مضوجني موضوع الزواج
بس الضوجني ابوها معتبرني ماموجود
ويقرر بكيفه عباله هو العريس
لا بابا شنو هالحجي انت متوهم وتتحسس عبالك فرض عليك
بس عادي مابيها شي
وعرسك اعتبره صاير مانقصر عليك

كام باس راس بابا وكله بابا
الله يوفقك وليدي يوم الهنا وافرح بينكم واشوفكم مستقرين ..
امي ايدت كلام ابوي واحنا تونسنا
لان راح يصير عدنا عرس وبقينا نتناقش والمود كله تغير
امي كالت
باجر اروح لبيت سلام نبارك لعلاء
تحضري بس ترجع يمامة نروح
انة من جابت سيرة علاء فلت وجهي

للحكاية بقية
بقلم شقراء(قمر كانون)