رواية على صراط امي الفصل الثالث عشر 13 - بقلم Shaqraa

مساء الورد

على صراط امي
الجزء الثالث عشر

اسمع عياط يمي وهوسة والاصوات مامفهومة
فتحت عيوني بطيء
شفت ماما كدامي ووجهها مخطوف وام خالد تسمي
وتكلها حسدوها عين نكسة صوبتها..
حاجيتهم بصوت مرتجف..مابيه شي بس دخت شوية
لا تخافون
وامي وعماتي والنسوان كلهم فوكي عبالك ميته
صاحت ام خالد وخرو حبايب اختنكت البنية..
وفرقتهم وكعدت
ويمامة بيدها كلاص عصير شربتني شوية

الكل مستغرب شبية وليش طحت ..بس يمامة
كلتلهم مماكلة صار يومين وهي ماتتحمل
ولو نظرات الكل واضحة واعرفها شتقصد ..
بس سندت نفسي وحاولت اتقوى وعدلت كعدتي
كتلهم لا يوصل الخبر لبابا لا ينهبط
كالت ماما لا ماحجينا بس عيونها حمر
وكلساع ومسحت وجهها ..

ورا مارتاحيت شوية حضروني للعقد وحاجاني
الشيخ من ورا الباب
يمامة وكفت يمي ولزمت ايدي وماما كاعده كدامي
لحظات الفقدت بيها وكعدت
احس ماما متصرفاتها كلها تغيرت ومثل الشخص
المصدوم
عيونها مدمعه وصافنة وتباوع بترقب..

كمل الشيخ كلامه ومن تم العقد احس جسمي سرت
بي رجفة ..
عصرت يمامة ايدي وحضنتني وبوستني وام خالد واهله
بقى يهلهلون وكعدوني بالصالة وبدت الناس
تسولف وي بعض وتلتهي
وانة اباوع بالوجوه بنظرات يائسة..مااصدك
الي سويته ..قررت ارتبط بشخص
ابد مامقتنعة بي واصلا قرار الارتباط هسه غلط..

شهد يمي تسولف وتكلي عن معجبات خالد من العشيرة
اليوم يتخبلن وكلهن اجن يريد يشوفنج
لان خالد ابن خالة شهد يصير ..
بس عبالك تحجي عن ابن الجيران ولا اهتميت
وبالي مو يمها..
يمامه انشغلت بالضيافة واعتمدت عليها ماما
لان ماتكدر تتحرك بسرعة
هيج مناسبة يرادلها وحدة نشطة وماتكعد ..

اجتلي ام خالد كالت ..ها يمه خو مابعدج تعبانة؟
انةكلت شوي ونفضها وارتاحي..
لا خالة شوي تعب وراح لان ماماكله شي ومنا الشقيقة
اي اعرفلها لا هلا بيها انت ورجلج ثنينكم عدكم
شلون بلة تالي نكعد نعصر روس ههه..
ضحكتني حجايتها وشوي معالم وجهي تغيرت
غمزتلي بت خالو وسوتلي اوكي..

كالت ام خالد راح يدخل تحضري وصاحت
ع البنات يتسترن
انة صحت ع يمامة اجتلي تركض..
ها عروستنا عذريني التهيت بالناس وعفتج..
حجيت بصوت يرجف..عادي بس بس ابقي يمي
راح يدخل...
غمضت عيونها بالم وتقربت مني وابتسمت..خل نعدلج شعرج منا ..
بقت تعدل بيه وترتب
وسمعت صوت هلاهل عالي كلش وكلهن فد هلهوله
يعني مثل النغمة صارت عااالية..

دنكت راسي واباوعله اجه كعد بصفي
مد راسه يم اذني وكال..مبروك وطونة ..
بقيت اكل باظافري وانة مدنكة ..كتله شكرا...
قرب راسه اكثر وبقى يحجي لان هوسة نسوان
وكلشي مانسمع ..
كال..ليش هالخوف والتوتر اعصابج يمعودة وطلعي
صبعج من حلكج فشلتينا هههه..
نزلت ايدي هو جرها ولزمها ..بس قشعرت بحيث
هو من ردة فعلي بقى يمسح عليها..

حجيت بتوتر..عفية عوفها عوف ايدي ..
شلون اعوف غير مرتي ..فدوة شلون ايد جنها
نستلة..
بقى يمسح باصابعة ع ظفري الكارطته
رفعها راد يبوسها وجريتها..
خليتها بحضني وكتله عفية عيب عيب لا تلمسني..
ههههه امبين ورانا معاناة حتى نقنعج تونا..
سميتج تونا ترى حلو وخفيف..
ابتسمت بلا مااحجي..

قاطعتنا امه كلتله يلا يمه لبسها الذهب..
فتحتله العلبة ويمامة من جهتي الثانية تصور
والبنات بعدن خالة ويضحكن وياها
كللها خل نصور عدل ووحدة منهم تصور بكاميرا
جبيرة ...

فتح العلبة وطلع الحلقة رفيعه ومرصعة بشذر شكلها حلو..
ومد ايده اخذ ايدي يلبسني الحلقة
بس ادعي كون يتركها لان كلش مامتقبلة يلمسني
احس روحي متقززة وماريد ابد يقرب مني خطوة
بس كمل اللبس ردت اجرها
بس ماخلاني وجرها وباسها..بقيت ارجف وهو باوعلي
من جوا عيونه وابتسم وعض شفة

وع حركته بقن يهلهلن اكثر ويصفكن..
اخذ سوار وراد يلبسني انطيته اليسرى
كال لا فوك السبحة اللابستها يطلع حلوو
صدك سبحتمن بس لا مال بابا حجي ههه...
هنا احس الدمعة وصلت كلش واقل رمشة تطيح
ثكل جفني بحملها من كد ماطالعة بقهر
هزيت راسي حتى يتشتت نظره
بس طفرت من عيني وشافها ..

باوعت بوجهه من خوفي وهو نظراته تغيرت
وعقد حاجبه بس بسرعة رجع طبيعي
ولبسني السوار بالايد اليسرى..
وبعدها امه صارت ع جهة ووخرت البنات
حتى تفسحله الجو...
والصوت صار انصى لان التهو ياكلون

وهو قريب مني ويحجي كال..
بدلتج ناقصها حجاب وتصير احرام مال صلاة..
تفاجئت من سمعته وباوعتله باستغراب
هو من باوعتله ابتسم كال..اي مستورة كلش
وفوكها جايبة شعرج كله منا
ترى لا تستحرمين انة رجلج حلال اشوفج..

حجيت بضجر..لا بس عجبني موديلها..
قرب حلكه من ذاني كلش كال..
بس لايكتلج طالعة تشعين..
هزيت راسي وابتسمت ..
ادري محلفينح ماتحجين بس تهزين براسج
انطيني رقمج حتى نتخابر اليوم
لان امبينه انت ماتحجين مباشر الا تسجيل هههه...

صحت على يمامة انطتني فوني
جابتله الي وهو شافه بيدي..
كال اخ ان ثمانية مدللة عمي..
هدية بابا مالت التخرج ..
اكدر اشوفه؟مد ايده يريدني انطيه اله..
خليته بيده ..اي تفضل..
شنو رمزج؟
مواليد بابا..ومديت ايدي كتبته وانفتح..

بقى يكلب بي شوي ورجعه الي..
عندج فيسبوك؟
شنو هذا؟
برنامج اسمه فيسبوك بي مراسلة وبي تصفح صور
ومنشىورات..
ماعندي لا مااحب هيج اشياء..
اي احسن يولي لا تسوي..ورقمي حفظته الج بجهازج..
اها اي اوكي..

هسه راح نروح ومن ارجع بس افرغ اخابرج
خلي جهازج يمج مو تنسين؟
لا بس ابدل وارتاح يعني..
اي هو هيج..
يلا انة اروح هسه...
حسيته متحكم كلش رغم يخفي هذا الشي بس
واضح بتصرفاته..

كام وسولة زفة اخواته واقاربه وطلعو
وبدت الهوسة تخف
ماصدكت بسرعة كمت وصحت ع يمامة وياي
احس كاعدة ع اعصابي
كمت للغرفة نزعت ولبست الروب ورحت للحمام
بنات عمامي وخوالي بعدهم
بيت خالو سلام بس هو خالو ومرته وفقار اجو
ع مارحت للحمام سبحت وطلعت
جانو جدي وعمامي ثنين وخوالي

كالت يمامة يلا لبسي وتعاي ينتظروج حتى يتعشون..
بدلت ومشطت ورحت
اول مادخلت كام بابا من الباب وفتحلي ايديه
اجيتله ركض وحضنته
ماكدرت اسيطر ع دموعي وهو يبوس بيه ويكلي
مبروك يابزر كلبي

بابا حجي كاعد كال شيطانة جلبتي بابوج تعاي
لجدج ..
حضنته وباسني وطلعلي من جيب السترة علبة
جبيرة
فتحها وطلع كردالة ضخمة سلسال خشن ومن كدام
من النسيج يغطي الصدر
وفرحان مامصدك من فرحته ..
كمت منه واجو اخواني بوسوني وباركولي وولد عمامي
البقية وخوالي ..

هذا كله ادور عن امي بنظراتي ..شفتها كاعدة
يم بيبي
بس تصرف امي تغير كلش يعني ولا نفسها
امس
صاحتلي ورحت يمها بوستني وكالت امشي
تعشي واكلي زين
ماجاوبتها بس ابتسم..
ورحنا كلنا تعشينا والبقية ترخصو وراحو

انة كتلهم نعسانة وتعبانة اروح انام
بقى هم كاعدين ويمامة تعزل وي شهد لان بقت يمنا
وانة رحت للغرفة تمددت
ونسيت سالفة الاتصال مال خالد ولا اجه ببالي
جبته من الشحن لكيت مكالمات ٥
اوف هسه هذا هم تعال حاجي كلش مالي خلك ..

وحر مخابر مرتين..اه ياحر بعد شتريد؟تريد تباركلي؟
نزلت دموعي وانة اتذكر
خلاص مالي حق احجي بي انة هسه بذمة غيره
وحرام عليه الخيانة

فززني صوت الفون باوعت حر..اي احسن خابر
لازم اجاوبه واكله بعد لا يتعرضلي ..
مسحت دموعي وجريت نفس قوية حتى اجاوبه..
فتحت خط بس شهكتي سبقتني..
سمعت صوت اغاني ركزت بيها ..
تخيل بعد هالعشرة الطويلة..يجي غيري وياخذك بسهولة..
مدامك بعت الايام الجميلة..وش الي من حكي اكوله..

بقيت ابجي واشهك اول مرة اطلق سراح دمعاتي هيج
صار هواي اكتم ..
بقيت اشهك وابجي من كل اعماقي بحيث ارتاح
من تطلع الشهكة من بلعومي ارتاح..
سمعت صوته بس هالمرة مو الصوت الهادئ الرزن
ولا اليبدي بكيف الحال..
هالمرة كلشي بي مختلف..

جان صوته متذبذب ويجر بي جر ونفس الوقت غاضب
وحاجاني بمفردة قذرة
هاا***** ارتاحيتي هسه؟؟****** ..******
انة انكطعت بجيتي وبقيت صافنة
معقولة حر هذا؟
هذا الماسمعني كلمة مو حلوة !
حتى نبرته غريبة والفاظة تلعب النفس
بس هذا كله واضح ..وعرفته هسه شارب واول مرة يسويها!
مااعرف انقهر منه لو انقهر عليه..؟
ليش تسوي هيجي بنفسك؟لان تحبني؟

رجع يغلط عليه ويصيح بصوت متقطع ..
جاوبته بعبرة،.
حر ليش تأذي نفسك لخاطري لا تمشي بهالطريق
انت عمرك مامسويها..
علاء وين عنك ليش عايفك؟؟؟
صرخ بصوت عالي..
ولج ***** علاء يصبرني لان ابجي على عرضه؟؟
قابل هو ك...مثل ابوج وجدج؟؟

لانعل .... وبقى يسب وسمعت رنة مالت اتصال ثاني..
باوعت خالد يتصل..
شسوي هسه اكطع من حر واعوفه بهالحالة السيئة
مااكدر..
رجعت حاجيته حر انت شارب ومو بوعيك
وين انت هسه؟
بجهنم شعليك بية؟؟عوفيني وتكسحي يلاااا ولي....
سدة بوجهي ...

واباوع خالد يخابر شلون راح اجاوبة حتى مااكدر
اجر نفس من البجي...
مسحت دموعي وحاولت اسيطر على اعصابي
وفتحت خط...
اول مافتحت كال..

ويامن جنتي تحجين؟
ها وي مرت ابن خالي ..طبعا مااحه ببالي غير سبأ..
يعني هاي اهم مني؟
مو كتلج خلي جهازج يمج؟
ماكدرت لان جانو اهلنا يمي وانشغلت..
اي ومن فرغتي ماانطيتي حتى مسكول شدعوة؟
وطن ليش هالكد قافلة؟
ها لا يتصورلك بس تعبانة كلش ونعسانة...

حجه بشبه اقتناع اي امبين صوتج
روحي نامي وباجر نحجي...
اي اي باجر نكمل..طبعا ماعرف شجاوبه بس فرحت
من كال روحي...

سديته منه وبقيت محتارة بحر
ليش هيجي شارب وفاقد مايحس بروحه
اخاف يطلع يسوق لو يندعم لو يصير بي شي.؟
بقيت محتارة الى ان نمت..

وكعدت الصبح على صوت شهد ويمامة يسولفن
ساعة تسعة ونص..
كمت من الفراش وتمطيت ..شهد ابتسمتلي
صح النوم عروستنا..
يمامة هم ابتسمت..
كالن يلا ننتظرك نريد نتريك ..
اي يلا كمت...

رحت غسلت ورحت يمهم بالمطبخ
جاي يسون ريوك
ماكو صوت هدوء..كالو ماما وبابا رايحين
عدهم مراجعة بالمستشفى..
كعدت وافرك براسي ..اجت شهد جابت ماعون
البيض..
اكلي تغذي اليوم عندج زيارة هههه...
زيارة المن منو؟
باوعتلها بطرف عيني واسال...
اليوم خطيبج معزوم ع العشا عدكم وغمزتلي..

للحكاية بقية
بقلم شقراء(قمر كانون)