رواية على صراط امي الفصل الرابع عشر 14 - بقلم Shaqraa

مساء الخير
على صراط امي
الجزء الرابع عشر

فتحت عيوني من حجايتها..شبسرعة قصدي
منو عزمه؟
بابا حجي خابر الصبح كال اليوم اتغدى يمكم
وخابرو خالد هم خل يجي حتى ياخذ على مرته
ويتعودون ..
بس امج كالت عدهم مراجعة اليوم دكتورتها تكعد
بالمستشفى ولازم تروح
كال خلوها للعشا وانة امرلكم ورا الظهر...
اهاا ..

اي يحلوة خلصي ريوك وتعاي نحضرج نشوف شتلبسين
شتسوين
ترى وناسة وحدة يجي خطيبها اوي اريد اعرس
تعاي كرصيني ولج..
ههه ثكل ثكل حطيلج حصوات بجيبوج صايرة
كلش خفيفة ..
كالت يمامة ..لا هي شهودة ثكيلة بي يمنا تسرسح
وغمزتلها
وشهد ضربتها وخلت ايدها ع حلك يمامة وهي
تضحك وتدفع بيها تريد تحجي
وانة اتلفت بينهم مثل اطرش بالزفة ..

شبيكم ماتحجولي شنو صايرة الغاز؟
لا معليج بيها اختج خبلة ..تحجي وتضحك ..
دفعتها يمامة ورفعت ايديها باستسلام ..ماجبت شي
من جيبي انة احجي الشفته هههه..
غطت وجهها بيديها شهد وضحكت ..
كالت يمامة ..عيني مختار الخانس طايح بحب شهودة..
ابتسمتلها بفرح ..ياخطير طلع مختار ههه فديتكم
تستاهلون بعض
ولو انت وكيحة واخوي فقير هسه تطلعين عينه..
اكو احلى من الوكاحة يلا تعاي اعلمج وكاحة..

جرتني من ايدي وكلت ليمامة خلصي ولحكينا..
رحنا للغرفة وبقت تطلع بالملابس ..جرت بدلة قصيرة بيضة
منقطة باحمر ..
بلة لبسي هاي تطلع عليج تخبلل وشعرج نسويله فيكه
اي عيني اي يستاهل ابن خالتو..
هه كل عقلج؟؟البس بدلة للركبة كدامه؟الحجاب
ماانزعه اصلا..
انجبيي شنو كاعدة يم جارج عوبة نزعي وتدلعي
وتموعي وغمزتلي..
لا تعرفيني شكد اخجل الخطوبة كوة تحملت
مااكدر عفية خليني براحتي
حجيتها واختنكت ...

يلا ولا يهمج تالي تتعودين عليه تالي ويشوف
المستور هههه..
اش عابت تعرفيني استحي..
ودخلت يمامة يمنا واختارولي بدلة غجرية بنفسجي
وبيها ورد رصاصي
جانت مرتبة وتوها موديلها تصير ربع ردن وينلبس وياها
بالطلعة بدي
او تنلبس فوكها بوليرا حتى اسمها ماجان دارج بكثرة
جانو يسموها يلك ..

ومن بعد ماساعدوني بالملابس رحنا للمطبخ
طبخنا الغدا وخلصنا
شهد راحت تصلي وانة لزمت يمامة..
حبوبة بس خابري حر البارحة سكران واخاف عليه..
خزرتني وكالت..انسي شي اسمه حر فاهمة؟
انت ع ذمة رجال ليش تخوني،؟؟اكثر شي اكرهه اكثر
شي شخص مرتبط ويخووون..

حسيتها تنرفزت واقل شي يذكرها بالماضي
رغم الوقت المر
بس مانست ..معقولة راح اصير مثلها؟
اوف مني ومن قرارتي الطايشة ..لو رافضة هالزواج
وماخذة فترة ارتاح بيها
بس انة غبية وكل الحواليه شجعوني حتى اقبل بسهولة
وينتهي حر..

ورا شوية اجو ماما وبابا وكالو وضعها زين ووضع
الطفل هم زين الحمدلله
وبابا بمناسبة هالشي جايب حلويات ومواعين
سفري
كال قسموها بالمواعين حتى نوزعها..
وكعدنا انة وشهد ويمامة نقسم بس احتارينا منو
يوزع والولد محد هنا..
كال بابا روحي وزعي وانة اوكفلج لان ظهر الدنيا..

لبست وطلعت بابا شايل الصينية وبقيت افتر
واوزع للجيران
وصلت لباب واحد منهم دكيته وطلعلي ابنهم صغير
جاي انطي الماعون
وصار صريخ بالبيت كلش قوي هذا ذب الماعون
ودخل يصرخ وياهم
وانة من رعبتي بقيت اصرخ مدري شبيه كنكت وياهم
عبالك مو صرخة عدوى
اجاني بابا يركض ومخترع ويريد يفتهم مني ماكو
والناس فزغت ع صوت الصريخ مالهم
ودخلو عليهم للبيت
وخطية طلعت امهم منتولة وماتت ..انوب بقيت
مخروعة ومقهورة عليهم

ونفس الوقت حاصرتني الضحكة لان صرخت
وياهم بلا مااعرف شكو
بحيث بابا شكد ضايج ع المرة بس ضل يضحك
عليه
وتوسلت بي مايحجي لان اخواني ينصوب عليه
بس احنا بس دخلنا للبيت
جان عابد توة جاي ..وحجالهم بابا وكعدو يصنفون
عليه ..

بس امي من سمعت انقهرت كالت ..
توج عاقدة مو زين تنخرعين..روحي يمامة جيبي
طاسة الخلاص خل تشرب بيها ماي..
جابتلي الطاسة وشربتني وبقت توسوس ومو زين
وتوج ماهرة وتتأذين...

وكملها بابا حجي من اجه العصر وسمع
بالسالفة ..كال تعاي كعدي اقرا عليج...
وكعدني يمه ويفر بايده فوك راسي ويقرا وعابد يكله
جاي ترشلها ملح
وطرده كله اطلع برا الد...لان عابد الوحيد اليداهره
كلهم يهابو ويحترمو ومايتشاقون
بس هو لا يشاقي وينرفزه بس هو جدو
يتونس عليه صح يشبعه مسبة
بس يحب سوالفه...

ومن صارت الساعة ٤ ونص وكلنا كاعدين
بالصالة ..
اندك الباب وراح مختار ورجع كال اجه خالد...
انة فترت اطرافي واحسها ثكلت
ماريد اشوفه وماريد امثل كدامه واصير طبيعية
كلش مااكدر ..

كام جدو كال شعجب تاخر كتله عود تعال هرفي ..
وكام وراه بابا حتى يستقبله..
اجن شهد ويمامة وكومني ويغنن ..وامي راحت
تسلم عليه...
رحت للغرفة وطردتهم لحد مابدلت بلة يمامة عادي
بس شهد لا استحي منها
خلصت وحطيت مكياج شوية وحاولن وياي البنات
ماالبس شال بس ماقبلت
وكالو ذبي منا ومنا مو عاد تحطين دنبوس
وفعلا بس لفيته ع الخفيف..

بقيت كاعدة واكل باظافري وشهد تكلي هيج
سوي وهيج احجي
ويمامة تكلها شكم مرة متزوجة سبع مرات منيلج
هالخبرات..

اندك الباب ودخلت ماما كالت ..اذا خلصتي
روحي يم رجلج هو جدج بالاستقبال..
كمت واخط برجليه كوا احس الخطوة ثكيلة
دخلت بلا مااباوعله وسلمت وكعدت..
كام بابا حجي كال ..
يلا مريتج واجت بعد انة اكوم..هلا هلا وياها مو تزعلها
ترى بالخيزران اجلدك..
ضحكت خال كله بالحفظ والصون جدي...

طلع وسد وراه الباب وانة كاعدة ع القنفة بنهاية الاستقبال
وخالد بالطرف الثاني كدام
بس بينا كلش هواي مسافة لان اصلا استقبالنا طويل..
بقيت مدنكة وساكته وهو حجه...

شلون صرتي؟ليش البارحة ماكلتي متخربطة جان
اخذتج للطبيب؟
يو هذا هسه يلا عرف شكد قديم بداخلي احجي..
لا شكرا بس دخت شوية
يمكن ضغطي هبط لان ماماكلة...
خو ماتشكين من شي او يوجعج شي؟
لا الحمدلله كلشي تمام..احجي وانة اباوع للكاع ...
زين هسه كعدتنا هيج جنا متزاعلين..تجين يمي لو
اقترب يمج؟؟
فزيت من كال هيج وباوعتله بس صارت عيني
بعينه بسرعة وخرتها بس مادنكت...

ها شبيج فزيتي ؟ولا يهمج لا تكومين انة اكوم ..
وكام واجه كعد بصفي ع القنفة
انة جريت الكوشاية وحطيتها ببينا..
هو تحمحم وكال..وطن انت هواي مرتبكة على شنو؟
انة رجلج وكلشي جاي يصير صح وشرعي
بعد ليش الارتباك الزايد؟
كوة جمعت الكلمات ونطقت..مو بعدني
مامتعودة عليك...
اي تتعودين شوية شوية بس انطي نفسج مجال وعوفي
هالارتباك الزايد عن حده....

وهذا الحجاب شنو دوره؟ترى امس شايف شعر
ذهبي
وركبة تلمع و.. قاطعته قبل لا يكمل..خالد عفية شبيك..
اي زين طلعتي تعرفين اسمي ههه
بس شنو شبيه فير اوصف الشفته ..مو هسه جايتلي
بحجاب وردانات طوال ..
سكتت عنه ودنكت ماعرف شجاوب..

بس فاجئني من جر الشال من راسي خطفه خطف
فزيت واريد الزمه
اخذه وحطه جوا رجله..وهو كاعد..
تضايقت من تصرفه وضجت وخجلت اصلا متوترة
ماعرف شلون اتصرف ويا...
احس حرارة تطلع من ذاناتي وراسي ..

بقى يضحك بصوت ناصي ويحجي ...اخرب على
الخجلانة ..شوف شلون صرتي حمرة اوف
حجاها وتقرب من رقبتي وجرني عليه
ادفعه مايندفع مااكدر وجسمي كزبر منه
كتفه صار كدامي وعضيته بي كل قوتي يعني ماعبالك
جاي اعض بشر
القوة العضيته بيها مثل الجاي يعسل بلكمة جبيرة سلطت
كل قوتي عليه...
نفس اللحظه عضني من ركبتي ودفعني حيل...

انة بقيت ابجي ومصدومة وارجف وهو فتح الدكم
وانة شفته
كمت اريد اطلع من الخوف عثرت وطحت بالكاع
وهو كام وكف بطريقي..
بس يحجي بغضب وهو صاك سنونه وصار وجهه احمر ..
اذا تطلعين اكسر رجلج سمعتي؟؟؟؟
خلي اشوف عضتج شلعتي زندي..
دنكت عنه وهو شاف العضه وبقى يسوي
جأ جأ جأ شمسوية بزندي ولج
اروح اضرب ابرة خاف يصير بيه داء الكلب...

وكعد كدامي بالكاع وانة ارجف وشعري ع عيوني
مد ايده لزم رجلي صرخت
بس بصوت ناصي..عووفني...
تنهد وكال..مااسويلج شي شبيج خل احاجيج ..
رفع وجهي بيده ومسح عيوني
بقى صافن عليه وانة عيوني مدري وين اوديها ..
دفعت ايده ع كيف وعدلت كعدتي..

هو جر ايدني وكومني وكعدنا ع القنفة..
سكت شوية وجسر حسرة وبعدها كال...
اسف فاجئتج بس..ماكدرت اشوفج كدامي وهذا الجمال
ومااضوك..
اي مو ماعون دولمة وتضوك يانذل ..حجيت بداخلي ...
بس حتى تتعودين عليه وبالزواج ما نتعب ونستحي من بعض..

من جاب سيرة الزواج رفعت راسي كتله..بس
بعده زواجنا مو هسه!
اي اعرف مو هسه واحنا المن خلينا فترة خطوبة
غير حتى نلغي الحاجز البيناتنا
وعيونج ذني الحلوات اشوفهن من احاجيج ماتدنكين مني...
هزيتله راسي وماحجيت شي...

ع فكرة صوتج حلو بالتفلون وينعس..
ابتسمتله ببرود ..
صدك البارحة شكد انتظرت وانت ملتهية وي كرايبج تاخذن
غيبة مو..
ها لا مو غيبة بس هي ماكدرت تجي..مريضة وطفلها تعبان
وجانت تسولف وياي ع الخطوبة..
شبي خطية ابنها؟
ماعرف بعد هي مشاكل الحوامل ماعرفلها انة ..

اهاا حامل ..تكوم بالسلامة ويوم الالج وطونتي...
شسالفة هه...
ليش متفاجئة يابة غير اموت ع الجهال انة وحسبي حسابج
ماريد تاجيل بهالموضوع..
اي ..بس..بعده وكت على هالموضوع كلش..
لا هاي الامور اساسية ونتفق عليها من الاول
والاوله شرط اخره شنو؟
اخره نور ..يعني اكو امور مابيها نقاش لان انة مقررها..
الله كريم لوقتها ..يصير خير...
ً
والنعم بالله اكيد..
وبعدها سكتت وهو سكت .. وشوية ورجع حجه عن
الدوام وشلون جنت اروح
يعني يفتح مواضيع وينعش الجو المتوتر ..
لحد ماصار الاذان وكام يصلي..
احس انعتقت ..ماصدكت طلعت اركض ولو اطيح
بالمؤذن الا ابوسه براسه ..

ومن بعدها راحو كعدو يمه الولد وجدي وبابا
وانة رحت للمطبخ
واجن البنات وراي ..شهد بيدها ماي تشرب
غصت وبقت تكح واجتلي تدور براسي منا ومنا بيدها..
اجت يمامة تدور بعيونها بترقب وتباوع الشهد التضحك
وتكح بنفس الوقت..
وانة افربراسي واكلهم شبيكم يا عوفني..يا وتالي
تخبلتو.؟

سكتت شهد عن الكحة وكالت ..ولج رقبتج بيها
عضة اسددد...
يمامة ماعلقت بس شبح ابتسامة بوجهها..
رحت للمر باوع بالمراية ..جهة رقبتي اليسرى بيها اثر
بس جبير كللش ولونه طوخ...
مديت ايدي تلمسته وطاحت دموعي..
غمضت عيوني بوجع..ورحت جبت الشال رجعته فوك
رقبتي...
وبقيت يمهم وشهد تداهرني وتكول طلعت انة الاستحي
وكلساع تذبلها كلمة...
بس يمامة ماحجت...

وكملنا الاكل ومدينا السفرة ورتبنا كلشي
وراحت ماما صاحتهم..
اجو الكل كعد ..بس خالد مارفع نظره عليه
وطول الاكل سوالف وحجي
لحد ماخلص هو اول واحد وارتجى بمكانه ..
بعدها جدي كام وهو كام من بعده
وخلصو ولميتنا المطبخ ورتبنا ونظفنا..
الجاي اخذته ماما صبتلهم ..
وانة اتفادى اروح اكعد ويمامة شفتها تراسل..
بس شهد راحت جوا..
ورا شوية اجت كالت ..خالد يصيحج لان راح يروح
وانة هم يذبني بطريقه..

دخلت جوا مالكيته..كال بابا حجي ..رجلج
يتانيج روحيله..
رحت للاستقبال هو جان واكف..
من دخلت تقدم عليه..
ليش طالعة اليوم بلا ماتكليلي؟؟؟
ها وين طالعة؟
نسيت روحي طلعت لان شي ماله
داعي احجي...
طالعة موزعة الثواب وي ابوج؟
باوعي وطن انة هالشي مايصرفلي كلش..
وكتلج اقل مكان تاخذين اذني يلا تطلعين...

بس انت كلتها ..طالعة وي بابا؟
بابا مسؤول عنج قبل لا اخطبج..هسه مدامج خطيبتي
ماتتحركين بلا اذني..
سكتت وماريد اناقشه شي لان طبعه مو حلو...بعدها كتله
اوكي...
اي عفية..وخو ماخفتي من الصريخ؟
لا بعد سالفة بوقتها وراحت حتى نسيت...
ماشي..
يلا هسه انة اروح واليوم اخابرج..
خلي التلفون يمج واليوم مااقبل اعتذار..
اي...

وبعدها اخذ شهد يوصلها وراح ..انة تحججت بالنعس
ورحت لغرفتي لان اخاف يشوفون رقبتي...
دخلت وراي يمامة..تباوعلي بشفقة..
تمددت بفراشها وانة هم..ورا شوية كالت..
وطن لا تضيعين المشيتين ..يااما تعيشين الحاضر
يااما ترجعين للماضي..
السفر بين زمن هذا وهم وماوراه بس التعب..
لا تبقين تراوحين بمكانج...
وحتى تختمين الماضي خلاص..
حر زين ومابي شي وعلاء وياه ..
لا يبقى بالج...
شكرتها وابتسمت بوجع....

وبقيت متمددة حطيت السماعات وكعدت اسمع اغاني
صار هواي مامنزلة جدد
مالي خلك وماافتح الحاسبة هواي...
انقطعت الاغنية ..باوعت خالد يتصل...
جاوبته ..ضحك ضحكة ممزوجة بقصد ..
نايمة وتحجين مو؟
اي ليش؟
هيج بس شيلي السماعات لان ماحب الصوت بي صدى يصير..
اي اوكي...

شلت السماعات ونمت ع بطني وكتله هسه؟
اي هسه احسن ..
منو يمج؟
اختي بس نايمة..
لا ماتفيدنا اختج نريد ناخذ راحتنا..
روحي لغير غرفة ..
لا عادي قابل شكو؟
لا مو عادي اليوم اريد انطيج اول درس بالزواج
لان مصفرة وبعدين تشلعين كلبي...
يلا كومي بسرعة..

كمت وانة اسب بي بداخلي ومستهزأة بطلبه..
رحت للاستقبال دخلت وسديت الباب
وتمددت ع القنفة..
ها رحتي؟
اي اجيت للاستقبال..
ايي عشتي..
ونبدي اول درس ونكول....

للحكاية بقية
بقلم شقراء(قمر كانون)

طبعا اكو شي حبيت اسوي..كل يوم اخذ صور لكم تعليق قوي ..مو شرط كوميدي او مؤثر او اله صدى ..وانزل صورته..
هم فكرة حلوة وهم احب كلكم تشوفوه ..
والبوم نبدي وي هالتعليقات