رواية على صراط امي الفصل الثاني والثلاثون 32 - بقلم Shaqraa

مساء الخير

على صراط امي
الجزء التاسع والعشرون

باوعت لامه باستغراب..عن منو تحجون خالة؟
جاوبت خالته الثانية..معليج بيهن خالة
هن يحبن يتشاقن..
بس انت كلتي هي ساقطة يعني كلكم تعرفوها
شنو حر متزوج قبلي؟
لا يمه انوب متزوج..
وباوعت لخالتي وحجت..اذا بعدين حر
وسكت شيفكج من فخري...
جاوبت خالته فضيلة الخبيثة..دكعدي واحنا
نسولف شبيج وجهج صوفر
بعد هو رجال والرجال كلشي يجرب..

كعدت كدامها وحاجيتها ..بس الكل سكتو
ومن ضمنهم امه بقت
تباوع لاختها بقلق ..
سولفيلي خالة عن منو تحجون عفية..
ها..ترى..احنا ماندري عبالنا حر ..مسولفلج ..
لا مامسولف منية هاية فلانة ع كولتج..

وحدة هنا جانت كاعدة جيرانهم
مطلگة مرتين وجانت هي اصلا اي هي رايدته..
يعني بينهم علاقة؟
اي بس كبل لا يخطبج بعني بس..
هي ذابة روحها عليه قابل يردها
وتعرفينه بعد رجلج حروري ههه..
يعني شنو مثلا متقربلها؟حجيتها واحس الدم يفور براسي..
ع كيفج ولج صرتي حمرة دم
عادي هاي رجالنا كلها هيج مايتحملون ههه...

زين شنو تحجيلكم ؟اليصير بينهم؟
اي من نجي هنا مرات تجي وتسولف فد وحدة تخبل وكشكولية..
تكول يشبعني كفخ ويطلع روحي من الوناسة..
هههه حتى انة من كالو نمتي مستشفى بيوم عرسج
كلت اكيد هاي ماتحملت وكاحة حر ..

من كلامها اختنكت بعبرتي وماردت ابجي كدامهم
كتلها ها مشكورة خالة..
ومن كد ما ركزت وياها فقدت الاحساس بالحوالي
انتبهت امه وخالته ماكو ..
وكمت دخلت للغرفة بسرعة
كوة لازمة نفسي..
بس دخلت بقيت ابجي بحرگة
حطيت المخدة فوك وجهي وبقيت اشهك
تقززت منه ومن كلشي
حتى لمساته كرهتها ومااتمنى بعد يلمسني...

بقيت منتظرة قبل جيته بشوية
بدلت ولبست حجابي وكلت بس يجي اروح لاهلي..
تحضرت وكعدت انتظر..
شوية وسمعت صوته بالبيت يحجي ..رجفت وانغثيت واحساسي
كله معقد ماعرف شنو احس هسه..

اول مادخل باوعلي بتفاجأ..
الله يساعدك..ويساعدج سلامات؟خو ماصاير شي ..
لا..قبل لا تبدل اريد اروح لاهلي ارتاح..
تقرب وهو عاقد حواجبه..شصاير وطن شبيج؟عفتج كلشي
مابيج..

ماتحملت بعد بجيت وعطت بوجهه حيل ..معلييييك
معليك بيه...
خزرني وحجه بصوت ناصي..صوتج لا تعلي
ماريد احد يسمع اليصير بيناا..
مايهمني اليسمع ..شهكت بالبجي وكعدت بالكاع يم
السرير..
كابلني ولزم ايدي دفعته..وخرر لا تلزمني انت قذر..
وي كلمتي ضربني بطرف ايده ع خدي..
نمت بالكاع وبقيت ابجي..
جرني ويسال شبيج وطن اسف مو قصدي
بس تجاوزنتي..
ودفعته بسرعة وكمت ..

طلع وجهك الحقيقي طلع اي امبين جنت تمثل عليه
امبين ..
بقى يستغفر ويفتر بمكانه..وج فهميني شنو الصار
الصيح كلشي مابيج وطن؟؟
تريد تعرف الصار؟هي صاحبتك المطلكة الضامها عني
روحلها روح احسن مني..

استغفر الله يارب..شعرفج بيها خرب بيها وباهلها
تروح فدوة لترابج..
الكل يعرفها بس انة نايمة ورجليه بالشمس
بعد ماريد ابقى اخذني
اخذني لا اخابر بابا هسه..

كعد ع الطابورية وحط ايده ع كصته ومدنك..
يلا ميخالف امشي وانة اخلي سبأ تجمع اغراضج
حتى اخذهن لبيتنا..
ماروح وياك لبيتك وحتى الغراض ماريدها ..
مسحي عيونج يلا امشي اوديج..

كمت عدلت نفسي ومسحت وجهي يخزي من البجي
جني مكتولة
طلع كدامي وانة وراه شافنا عمو تفاجأ كل خير بنيتي
خو ماكو شي ..
لا عمو بس رايحة لاهلي..
خير انشالله سلمي عليهم هواي...
ترخصت منه وطلعت ..
وطول الطريق حر بس يباوعلي بالجامة ماحجه شي
وانة مغلسة ومقهورة منه...

وصلنا للبيت نزلت قبله ودكيت الباب
شوية وفتحه حسين..
بهت وباوعلي بقلق بس انة سلمت عليه وماحسسته بيه
شي..
وسلم عليه حر وفتنا بالاستقبال
حسين كعد يم حر وانة دخلت ع البيت..
لاكاني بابا وجه بوجه ..هلا بنور عيني ..
وحضني وبوسني..
ماكدرت اسكت بحضنه وانة مقهورة بجيت..

رفع راسي وسالني شبيج كتله مشتاقتلك..
ضحك واخذني ويا للاستقبال حاضني..
دخل وسلم ع حر وكعدنا
كله حر اعذرنا عمي الدنيا ظهر
بس جنا بالبيت مالنا بعد باجر ننتقل وكالت
ذبني عليهم اشوفهم ..
اباوعله بنص عين وهو يحجي بثقة ومصدك نفسه..

بقى بابا يسولف وياه ع البيت ودخلت ماما كام
حسين اخذ منها الصينية ورضا مجلب بجبتها..
كمت جريته وابوس بي وهو يريد يعضني
وكعدت الاعب بي
حر كال لازم اروح وترخص وطلع
وهم طلعو وراه..

اخذت رضا ورحت لغرفتي القديمة
ذبيت ملابسي وكعدت الاعبه
انفتح الباب ودخلت ماما.. باوعتلي وحركت عيونها يعني
شصاير..
تنهدت وكعدت عدل..حجيتلها الصار كله
وهي صافنة عليه..
من خلصت كلام كالت..تقبلين يحاسبج عن الصار
وي خالد؟
بس هذا خطيبي..
اي بس جنتي تحبي وانخطبتي اله وقبلتي تلبسين
كدامه صلوخ وقبلتي يلمسج..
بس حر علاقتة بيها قبل لا تدخلين حياته..شنو عبالج
مادري بيها؟

تعرفين؟؟؟؟
اي اختج حجتلي من اول ماتزوجت فقار وعرفت بس العلاقة
قبل لا تدخلين حياته
وهي خفيفة وهو شاب ولعب بيها
بس من حبج تاركها نهائي..
واصلا البنية تزوجت وراحت
فماله داعي تدورين ملفات قديمة تخرب صفو ايامج
الحلوة..

باجر تنتقلين لبيتج المفروض اليوم تجمعين اغراضج
وتتحضرين وتروحين بتفاؤل
مو اقل كلمة اخذني لاهلي وتعودينه ع غيابج
لا تزعلين بسرعة ويصير زعلج ممل
زعلي ع الاشياء الثكيلة حتى يصير
زعلج ثكيل ويحتار شلون برضيج...

ماما انت وياه لو وياي..
هههه لا يابعد امج وياج بس اريد مركبج يمشي
بعدج باول الطريق ترى..
كومي وياي لا تخلين يبين عليج شي كومي..

وكمنا هي سوت كيكة وانة خلطت عصير فاكهة
ومرت مرتجى اجت يمنا
وتجمعنا بالصالة نسولف وشكد حنيت لجمعتنا قبل
تخبل وماتنمل..

ورا المغرب خابرني كال راح اجيج
حاولت افلت منه واكله ابات
بس حتى ماخلاني احجي بسرعة كال جاي..
كالت ماما ديربالج عليه وهذا قلبه ابيض ونظيف
مدام حبج تطمني مايلعب من وراج
ابتسمتلها وكتلها الله كريم..

اجه وجايب وياه مشويات ومقبلات وبيتزا
كال لماما عزمت روحي عدكم
وهي تضحك وياه ويسولفون وانة انتظره يفوت جوا
حتى اكل بيتزا ريحتها ماتتقاوم..
صدك دخل جوا ورحت كابلت الكارتون وكعدت اكل
وامي ومرت مرتجى يحضرون بالعشا
وامي تزمخ بيه ولج كومي كافي راح تشبعين
وماتشتهين عشا..
اي احسن حتى ابين كدامه ضايجة ومااكلت ..
ههههه شوف سوالفها...

وصدك وكت العشا بس كعدت اكلت قطعتين
معلاك وكمت
وهو عيونه متابعتني..وماما تباوعلي وتضحك...
ورا العشا والجاي سلمنا عليهم وطلعنا
واخواني كلوله باجر نجيك نساعدك
وماما كالت اجيج هم فرحت حيل..

طلعنا منهم وانة كالبة وجهي وضايجة
سالني شلونج بعدج ضايجة
جاوبته نعسانة اريد اوصل وانام..
سكت ماحاجاني ..
لحد ماوصلنا ودخلنا اهله كاعدين بالصالة..
سسلمت عليهم وترخصت كتلهم نعسانة..

وبسرعة اخذتلي ملابس ورحت للحمام بدلت
ورجعت..
هو متمدد ع السرير ويلعب بالفون
باوعلي من ذبيت الروب جنت لابسة جوا ثوب اسود
طويل وفتحة للفخذ
وتمددت بالفراش وتغطيت واشوفه يحوم ولا اهتمتيت...

بداية غفوتي حسيته يحشك نفسه بيه..سويت روحي
نايمة ورفسته برجلي..
ضحك كال حتى وهي نايمة تصارع..
بعدها غفيت كلش
كعدت الصبح بالسبعة صوت حركة بالغرفة
شفته جاي يلبس قميصه..
باوعلي وكال صباح الخير يلا استعجلي راح يجون
يمامة وسبا وخالة ام علاء
حتى تلمين كلشي ونروح..
امممم..حجيتها وكمت سبحت وطلعت لكيتهم
جايات يم خالتي بالصالة..

خالتي قافلة وبس تصفن ماعرف حر محاجيها
او لان راح يطلع منها
بس اعرفه مايحجي مهما تغلط وياي وانة هم اكله
حرام عليك ابد لا تحسسها انت تحاسبها..

كامو وياي وبلشنا بالتعزيل وكل ساع ويمامة
تذب بسمار
لان عرفت السالفة مالت امس ومخلية سبأ تتلفت
لحد ماحجتلها وكامو يضحكون
وخلوني اطفر..
كملنا كلشي وودعتهم كلهم ..عمو فخري حضني
وباسني براسي
كتله تعال النا كل يوم ..ابتسملي كال اكيد بعد مااصبر
بدون بنيتي الا اشوفها...
بست راسه وكتله هلا بيك...

امه بوستني من ورا خاطرها وانة كذلك..
طلعنا وودعت هذا البيت ..صح حلو وبي اول زواجي
بس ابد ماحسيت استقرار
او راحة بي...
انطينا خبر لاهلياول ما طلعنا وبس وصلنا لكيناهم
كدامنا..
انطه حر المفتاح لبابا وكله انت افتح الباب ..
فتح بابا الباب وعابد كال
اروح اجيب ذبيحة واجي شتكولين وطن
كمزت بسرعة ..
اذبحك بدالها عابد اموتك..
اشرلي ع راسه بمعنى مخبلة..

دخلنا وماما بقت تصلي على محمد وال محمد
وانعجبو بالديكور والاثاث..
وبلشنا انة وماما نرتب والولد يساعدون حر
بعدين اجو علاء ويمامة جابونا غدا
وبقو يمنا للمغرب خلصنا كلشي وراحو
ورا ماطلعو وسد حر الباب..
رحت ركض للغرفة تمددت تعباااانة وظهري
بقى يصل عليه..

دخل وحط الفون مالته ع الشحن..ذب ملابسه كالعادة
وطفى الضوا واجه للفراش..
انطيته ظهر وتغطيت..
جر الغطا وجرني لحضنه..حط شفته يم اذني وهمس..
اسف وطونتي بس كافي زعل مشتاقلج كلش..
انداريت عليه وحجيت..
ليش ماحجيتلي؟
شحجيلج عن طياح حظي يا وطن..قابل شي
واحد يفتخر بي؟

هي علاقة وولت ومشت بعد المن تدكريها..
وحقج وحق المحنة المرينا بيها ماتستهويني مرة
غيرج من اول يوم شفتج لهسه
انت مجمعة صفات الانس وحور العين
يعني انت دنيتي وجنتي...
حطيت راسي ع صدره وحضنته حيل ..بقى يبوس بشعري
وشوية حسيته عنده نية..
ابتعدت منه..
باوعلي بتوسل..ليش وخرتي ولج مشتاقلج..
مصالحني لهذا السب؟؟
غمض عيونة وتنهد..لا ابد..يولي مو شرط بس
رجعي لحضني نامي...

رجعت حطيت راسي ع صدره وبقينا نسولف شوية
وكام
انة كلش طافية وتعبانة بسرعة نمت يمكن ساعة
تسعة او اقل هالحجي...
لحد  الفجر يلا كعدت..شبعانة نوم كلش..
كمت اخذت الروب ودخلت للحمام..مصحصحة
ونشيطة احس
فتحت الدوش ووكفت واتحرك جوا براحتي..
سمعت صوت من وراي..
صباح الجبن اويلي...

للحكاية بقية
بقلم شقراء(قمر كانون)