علمني كيف الحب يداوي الفصل الرابع عشر 14 - بقلم Chrakirkuki

#علمني_كيف_الحب_يداوي 14

لمحات من الماضي 13

أمجد:شامل راح اسافر اسبوع يم ابويه ديربالك على المحل

شامل : واني منين عندي مجال متعرف ارتب البيت باقيلي شهرين واتزوج ولحد الان ممسوي شي وحضرتك بدل ماتساعدني رايح تتونس

امجد : لو كايل لأمل مو احسن بالله كفرت طلبت شي منك والله أرجل منك

شامل : هههههه لو تسمعك هسة ياويلك منها اليوم زوجتي طابخة ألكم بالسم عليك زين مادام تسافر . علاقتي بغسق كلش زينة حبي ألها يزيد يوم عن يوم بدت تفهمني مثل مااريد وتقبلت امل وامجد بحياتي صرنا بالاسبوع نجتمع 3 مرات ناكل ونضحك ونلعب ورق لو دومينو ونسولف لحد الليل صارت تحب هالشي بس اهلها طلباتهم اهواية متخلص هاي سبب تأخر زواجنا

أمل : شلون رياجيل انتو نجي مواصلات ونتبهدل وحضرتكم كاعدين تضحكون روحي غسق للمطبخ جاية وراج ناكل اهناك ونقفل الباب خليهم يحسون

غسق : لا ههههه اني مو وياج ماكل بدون شامل ماكدر أعذريني

امل : ضلي هيجي انتي وامثالج لحد ماياكلون الرياجيل حقوقنا حقهم مو اكو خرفان يدللهم

امجد : هسة صرتي ممرضة وبلعناها بالكوة مال تصيرين مناصرة للمراة ضد الرجال هاي واكفة كعدي راحة

امل : ادري شنو تقصد حمار غصبا ماعليك أصير اللي اريده اصلا مفكرة ارشح نفسي للأنتخابات البرلمانية حتى أكسر راسكم من تفكرون تتزوجون مرة ثانية

غسق : اي عفية واني راح اصوتلج اني ضد هالشي باوعت على شامل لاتفكر تسويها اذبحك

شامل : ههههه هو اني مزوجج هسة حتى اتزوج غيرج

امل : اكلت بسرعة حتى مشبعت اتفقت ويا غسق أخليهم وحدهم هي وشامل امجد كوم بسرعة لازم اروح للمستشفى راح اتاخر وصلني

أمجد : شنو ابتليت بيج مو هذا اخوج كاعد شعليه بيج

أمل : أسويله اشارات ميفهم الغبي وغسق ميته ضحك وشامل ميعرف شنو الموضوع جريته وأخذته طلعنا وركبنا السيارة بعده يحجي ويدردم

امجد : الله ياخذج واخلص منج والله ميت من الجوع حرام عليج

امل : ياغبي اثنين خاطبين يريدون ياخذون راحتهم مو اسويلك اشارات ليش متفهم واني هم جوعانة امشي ناكل بهذاك المطعم

امجد : شنو ياخذون راحتهم قابل شيسوون ومو كل مرة احنا وياهم وبعدين تحلمين اعزمج على حسابي فوك مانزلتيني بسرعة كذابة

امل : من اكولك غبي تعصب يعني شلون تريدني افهمك بالشارع الزمك ابوسك حتى تفهم شيسوون

امجد : عرفت شنو تقصد حسيت بخجل من غبائي جاوبتها يع بوسة منج انتي ماريده خليني على طهارتي احسن .

حامد : اليوم زواجنا شايل هم شلون راح يكون شلون اتصرف وياها من اتذكر قبل يومين وهي بحضني احس بأحساس حلو نزار يضحك عليه من جهة وعفرا تداهر من جهة ثانية امي عبالك صبية ولا بيها مرض صايرة مثل الغزال تروح وتجي تصفك تهلل بكيفها اكثر وحدة فرحانة هي

جبار : فرح تطلعين من هالبيت مترجعين زعلانة حتى لو ذبحج حامد وحقوقه قبل كلشي لاتسوين مثل زواجتج الاولانية اموتج بيدي افتهمتي زوجج قبل الكل تخلي بعيونج واذا احتاجيتي فلوس بيتي مفتوح الج وهاي اوراق العمارة خليتها بأسمج مراح تحتاجين شي

فرح : أبويه يحجي واني متت من مكاني من كال على حقوق جان يكوله طبيعي بس اني خجلت اهواية لو امي عايشة جانت هي تكولي وتنصحني لافرحت بصغري ولا لحكت افرح بأمي ولا باي شي هالمرة الله يستر شنو يصير بيه بست ايده وحضنته رحت أحضر نفسي اباوع على ميرا ومرمر يتعاركون منو بيهم طالعة أحلى ضحكت عليهم رغم كلشي همه يحاولون يفرحون نفسهم

ميرا : عمة مو اني احلى شوفي حتى الفراشات بشعري عمو حامد عجبه وكالي طالعة حلوة وتخبلين بس هاي اشرت على مرمر تضحك عليه تكول مال صغار

مرمر : طبعا شوفي الحمرا اللي خلتلي ياه عفرا تخبل مو عمي كال حلوة وطالعة عروسة مو مثلج يضحكون عليج طالعة مثل الاطفال يكرصون خدج

عفرا : ها فروحة جاهزة المصورة جتي اصعدها لغرفتج لو تاخذين صورة بغرفتكم انتي وغمزتلها الحبيب

فرح : لا شنو وياه أخذه اهنا وحدي احسن عندي كاميرا فورية ماحتاج مصورة

مرمر : اني اروح اصور ويا حامد ونزار وعمو

عفرا : روحي حبيبتي انتي فاهمة الدنيا صح عمتج عقلها ضارب الله ميرا شنو هالجمال تخبلين ياحظه اللي ياخذج بالمستقبل فرح تأشر واني اغلس ارفع ضغطها شوية مثل ماتسوي بيه

غسق : بدلت على السريع خليت حمرة وباودر رشيت عطر شامل كاعد يشرب جاي على الكرسي رحت شبكته وبسته أحبك يااحلى رجال بالكون

شامل : واني هم أحبج اريد اوخرها من حضني متقبل غسق شنو هالحركات

غسق : شبيك حبيبي مو انت زوجي غير نتونس شوية اول مرة نكون وحدنا

شامل : وخرتها بهدوء عرفت شتريد واني اكثر منها اريد بس ميصير غسق اني من اجيبج اهنا مو قصدي اختلي بيج واسوي اشياء وياج بعيد عن اهلج اذا ردت اسويها كدامهم مااستغلج زين عمري اذا انتي تحبيني اني اموت عليج

غسق : شامل وين اكو مثلك شلون تفكر مادري احسك لغز كل ماافتحه يطلعلي شي جديد هنيالي بيك حبيبي

شامل :أني من اختاريتج للموت اريدج ويايه مو يوم يومين اشبع منج واذلج لحد مانتزوج هانت صبرنا ومباقي شي ونتزوج وبعدين اطلع عينج عضيتها من اذنها احبج

غسق : شامل ميصير نتزوج هالاسبوع ماتحمل اريد عمري ينتهي وياك من الله يخليك كمل الصبغ والتشطيب بسرعة اريد اكون بحضنك انام واصحى على صوتك ونجيب 15 طفل يخبلون مثلك

شامل : لا والله 15 واني انتهي بعدهم ماريد روحي عرفت نواياج نزلنا من الشقة وهي بحضني نمشي لحد مانوصل يم سيارتي وهي تضحك

حسن : عفرا ياريتني مكان اخوج هسة يمتى يوصلونا للفندق واسد الباب عليج وماخلي احد يشوفج شهر بس تكونين بحضني اطلع قهر السنين اللي مرت بدونج

عفرا : هم زين عرفت نواياك مو زينة شهر ياظالم واني عبالي شهرين ههههه

حسن : مادام هيجي خلي نبدي من هسة لحد مانتزوج يصيرون شهرين اوف مادري شلون انزل باجر وماشوفج غير بعد اسابيع

عفرا : وخر متشبع طول الحفلة لو تبوس لو تكرصني لو انزع فستاني هسة جسمي كله صاير الوان الا اشكيك يم ابوك

حسن : نزعي خلي اشوف الالوان كلشي الا ابويه والله يأجل زواجنا سنة ثالثة واني اموت

سمر : حبي ليش منرجع باجر لبيتنا مو احسن ماعرف شلون جانت هالزواج ابد مو حلو وفرح كلش جانت ضايجة وباردة اول مرة اشوف عروسة هيجي والله حامد حباب يستاهل وحدة احسن من فرح البومة

نزار : شنو هالجمال ناوية تجلطبني هالليلة يمتى اشتريتي هاللبس ماعلينه منهم اني هم عريس هسة اريد عروستي تدللني

سمر : مو اكولك نرجع وين اركصلك هسة اهلك يسمعونا وننفضح خلي نرجع وتشوف الدلال اللي مشايفه من قبل حسيته بدى يلين مخليته يتقرب مني خبلته بنص الليل رجعنا وحتى مودع اهله هههه.

فرح : بدلت ومسحت مكياجي أحس بخوف مو طبيعي اريد يخلص هالموضوع بسرعة لو ماخايفة من ابويه ماخلي ينام يمي اصلا سمعت صوته يصيحني تشجعت وكفت كدامه اريد احجي ماكدر

حامد : اخليج اروح للحمام اذا تحبين تعشي براحتج واذا تنتظريني بعد احسن ناكل سوية اريد ألطف الجو واسوي نفسي مسيطر على الوضع ماريد تحس اني ماريدها لو انجبرت عليها متستاهل غسلت وطلعت مماكله شي حاولت متريد فرح ماريدج تخافين مني واذا متردين مو لازم الليلة الايام كدامنا

فرح : لا اني جاهزة صارت الشغلة لا اني ردتها ولا هو ردت بس الليل يخلص وارجع لبيتنا مجان يطلع الصبح كمت قبله حضرت نفسي واني مأحس باي احساس

حامد : انتظرت فرح تكوم متصورت ليلتنا تمر هيجي لو جنت متزوج حبيبتي متأكد مجانت تكون بهالشكل استغفرت ربي وكمت اريد اسوي نفسي طبيعي شلون ماجان .

مدينة : يارب سترك حلمت حلم موزين ببنتي عفرا كمت اسوي فطور شفت فرح راجعة من بيت ابوها خطية متبهدلة بين حامد وبين أبوها المريض ها حبيبتي شلون صار ابوج

فرح : صباح الخير خالتي عفته ويا عمي جيت احضر فطور وملابس حامد وبعدين ارجعله صعدت لغرفتي صار شهر متزوجين احاول اتهرب منه دايما ماكو بيناتنا اي شي غير الواجب مرض ابويه منطيني حرية ابقى اهناك اكثر شفته صاحي صبحت عليه

حامد : حضنتها وبديت ابوس بيها مشتاقلج فرح
حرام عليج مو بارحة كلتلج ابقي يمي

فرح : جمدت مكاني من باسني ويكولي مشتاق اول مرة اسمعها منه رغم هو ممقصر بشي اني مقصرة اهواية بحقه أستحيت أتجاوب وياه نزلت راسي ودموعي من فشلي تنزل اعرف نفسي ماستاهل

حامد : شبيج فرح عمي بيه شي نروح للمستشفى

فرح : اني اللي بيه حامد ماكدر استمر بهالحالة اني تعبانة كلش تعبانة كل حياتي عبارة عن كسر وجروح لاتعودني على شي اني مشايفته ماتحمل

حامد : حضنتها وهي تمنعني من تحجي وتبجي اول مرة اشوف فرح بهالانكسار وهي تحجيلي بشكل عشوائي عن حياتها السابقة خليتها بالفراش وخابرت الدوام طلبت اجازة ردت اتقرب منها اكثر

عفرا : رحت للمطبخ اريد استأذن من امي اروح لبيت حسن تأخر هالمرة اسبوع انتظره ينزل حتى اقيس فستان الزواج شفتها واكفة جامدة والتليفون بيدها واكع ماما اني رايحة لبيت حسن

مدينة : شكولج يابنتي فرحتج انتهت فستانج الابيض صار اسود وكعت من طولي واني ماكدر انطق بشي خابروني جوارين بيت حسن جايبنه شهيد

عفرا : صيحت ماما شكو شبيج اكيد سمر غاثتج مو جاوبيني ليش تباوعيلي وساكته

حامد : خليت فرح تنام نزلت على صياح عفرا
شكو شبيكم امي تلطم واكعة عفرا تبجي وتصيح ابويه دخل من الباب بسرعة لونه مخطوف اكيد صاير مصيبة سالته عمي مات مجاوبني باوع على عفرا وحضنها

فرح : كمت فزيت حامد ماكو لبست حجابي على السريع اخاف ابويه يصير بيه شي نزلت البيت مقلوب عفرا تكمز وتصيح من شافتني تهسترت

عفرا : مصدكت من كالولي حسن راح متت واني عايشة بعد اسبوع نتزوج شلون يعوفني جنت اركض بداخل بيتنا من غرفة لغرفة فرح شوفيهم يكذبون عليه حسن ينتظرني جيبلي فستاني اروحله امي متقبل اروح الله يخليج ساعديني اروح انتي تعرفين هو يحبني مو اكمز اضرب راسي بالحايط عوفوني اروح اشوفه الله يخليكم

فرح : مرت الاشهر وعفرا نص انسانة ميته عايشة على المغذي والبيت صار كئيب واني ضايعة بينهم وبين البنات وابوية نمت من التعب حتى محسيت بحامد راجع للبيت لو لا

حامد : رجعت الفجر من المستشفى اخذنا عفرا حالتها بوم عن يوم تتدهور ميفيد وياها شي تريد تموت متريد تعيش باوعت فرح نايمة بربطتها ضحكت عليها يمكن التعب محاسة على نفسها تعودت عليها وعلى حركاتها نمت بصفها واني احضنها ماعرف شكد نمت سمعت صوتها تتمتم باسم امها فتحت عيني وجهها اصفر وحرارتها مرتفعة اصيحها متجاوب فرح كومي رفعت الفراش كله دم صاير منين جتي فرح صحت امي واخذناها للمستشفى فقدنا اول طفلنا بدون منعرف هي حامل كرهت روحي حسيت نفسي مقصر وهي نفس الشي ماعرف اصبر نفسي لو أصبرها .