علمني كيف الحب يداوي الفصل الثالث عشر 13 - بقلم Chrakirkuki

#علمني_كيف_الحب_يداوي 13

لمحات من الماضي 12

أمل : بديت أتدرب بالمستشفى أستفاديت كلش من فتحت العيادة وصرت ادور على معلومات طموحي كثرت والله رزقني بكم فلس سكتت بيها امي ورضا خلوني على راحتي اروح واجي مرات من يخلص فلوسهم يبدون سوالفهم التعبانة اطلع محفظتي وانطيهم المقسوم واشتري راحتي بيها صرت اتجنب شامل بعد ماسوتلي ام غسق فضيحة بيتنا وحتى بيتهم اروح اوقات هو مو موجود بس امجد اشوفه بالاسبوع مرتين نتغدا بمطعم لو اروحله للدوام اهواية طلب مني اكول لشامل مقبلت كلبي مثل النار عليه مو متعودة ابتعد عن شامل بس علمود مصلحته لازم ادوس على نفسي .

حامد : كلما اريد افتح موضوع زواجي تصير شي أمي ضايجة لان نزار راح وعايش بمدينة ثانية وابويه حاير بعمي وشغله صحته يوم عن يوم تسوء واني مالحك بين دوامي وشغل المكتب ارجع للبيت يادوب اوصل للفراش من التعب شفت امي كاعدة وضايجة كالعادة والتليفون بيدها يمكن تريد تحجي ويا نزار أحجي وياها متجاوبني بس تبجي

مدينة : صارلي يومين ماحصل أخوك التليفون ميشتغل باجر راح اروحله كلبي مو مطمن عليه خاف مريض بيه شي

عفرا : ماما ماكو شي هاي الخطوط الارضية يوم اكو عشرة ماكو تعودنا واذا تردين باجر اجي وياج بس كافي البجي هسة ضغطج يرتفع

حامد : حبيبتي اخذج بنفسي وتطمنين عليه لو بي شي لا سامح الله سمر تبلغنا

عفرا : اكص ايدي اذا مو هي معطلة الخط كل ماتروحين يمهم تضوجج بتصرفاتها وانتي متحجين شي علمود لايضوج نزار بس هالمرة أني راح احجيله تصرفات زوجته وياج مراح اسكت لو تحترم حالها لو

مدينة : سكتي كافي ماعليج بيها متهمني ابني أهم من عدها اياني واياج تحجين شي لاخوج والله ازعل منج مسحت دموعي كل مااروحلهم اشوف تصرفاتها متقبل اطبخ لنزار ومتخلينه نكعد وحدنا حتى من نريد نطلع اني وياه تسوي نفسها مريضة وتخرب الطلعة ومن يجونا متعجبها اي شي اني اسوي ودايما تكولي لو امه مو ميته يعني تذكرني انتي مو امه ومن اخذلهم اكل ماشوفها تنطي لنزار اشوفها ثاني يوم بالزبالة وماحب احجي لو اتدخل علمود ابني ساكته ومتحملة

حامد : ماما قررت اتزوج

عفرا : صدك حبيبي منو هي نعرفها لو لا ها حامد لايكون عندك منا ومنا ترى أبويه يذبحك

مدينة : خسرت نزار وراح اخسر حامد جاوبته وقسيت كلبي عليه عروستك يمي ماكو غيرها لاتناقشني ولاتحجي شي اذا تعارض لاانت ابني ولا اني امك ولا تحاول تحجي ويا ابوك لأن هو موافقني.

حامد : ماما شدكولين منو هاي تردين تكسرين كلبي علمودها ماما حافظت على اخلاقي وعمري مسويت شي تخجلون مني دوم رافع راسكم حتى البنية اللي حبيتها من سنين خفت اوعدها بشي ومااوفي بعد ماكتلها أريد اتزوجج تكسريني هالكسرة ومتفقين عليه هم مخلصين كلشي لعد اني شنو دوري

مدينة : ويا كل كلمة جنت اتمنى ميتة ولا اسمعها بس لازم أصير انانية راح يجي يوم ويشكرني مكدرت احجي شي عفته وطلعت لغرفتي أدعي الله يسامحني كسرت كلب ابني.

عفرا : الموقف كلش صعب حتى أني مومستوعبة اباوع على حامد لون مباقي بوجهه اي شي اكوله مراح يصبره لو اني بمكانه يمكن أموت ردت اواسي عافني ومشى

شامل : ها أمل خاتون متكولين عندي اخ اسال عليه شبيه مابيه لو مجاي من وكت للبيت مجنت اشوفج كالعادة تنهزمين مو ليش هيجي

أمل : لا ح ردت اكوله حبيبي وسكتت اريد اسوي نفسي طبيعية وماكدر راح يعرف اكذب عليه مشغولة ومنا العيادة ومنا تطبيق وامي وخواتي واني مثل مخبلة ويا كل كلمة اضحك

شامل : ماشالله صايرة كذابة همينة هاي منين تعلمتيها لاتكونين متأثرة برضا غسق مو

أمل : غسق شعليها ههههه منين طلعت بهالموضوع واني دايما اجيكم بس انت مموجود مو ماما

ام شامل : لا مو صحيح تجين اوقات هو مو موجود ليش هيجي أمل احجي حبيبتي اني امج وهو اخوج تخبين علينا راح اعوفكم تحجون سويه اريد اشوف امل بنتي تجي تطبخ وتنظف وتنام يمي وتسولفلي مثل قبل دعاء راحت انتي بمكانها

أمل : شامل عيش حياتك واني هم يجي يوم واعيش حياتي ولازم اتركك وانساك

شامل : هههههه ولج عوبة انتي اختي لو عشيقتي منين تصطرين هالخرابيط على العموم ياكذابة هسة تجي غسق ونعرف شنو الموضوع

امل : مكدرت احجي اكثر شنو احجي يطلع غلط فعلا لحظات وجتي غسق باستني وتضحك ومشتاقتلج ومن هالسوالف كأنما مو هي وحدة ثانية

غسق : شامل عرف بسالفة امل جنت راح اخسره بسبب غبائي لو لا منار اختي نبهتني صديقاتي جانو يحشون براسي بس عرفت غلطتي وعلاقة امجد وامل وشامل لا اني ولا غيري يكدر يخربها اعتذرت لشامل وحجيتله كلشي بنفسي جوابه مصدمني بالعكس كبرني كلي حطي نفسج بمكاني اني شلون اتعامل ويا اهلج وشوفي نفسج شفت الفرق بين السما والارض قررت اصير احسن منه اعتذرت لأمل من بقينا وحدنا محبيت أحجي اي شي كدام شامل ماريد استصغر نفسي أكثر.

نزار : اكول حبي شنو كالتلج الدكتورة اذا تردين تحليلاتج اسويها الج بمختبري

سمر : وكع الماعون من ايدي راح يصير سنة على زواجنا وماكو حمل ونزار يموت على الجهال واني عندي مشاكل واتعالج وماكو نتيجة رتبت شعري جاوبته تكول عادي بعدكم صغار

نزار : اكيد روحي بس شسوي مو بيدي منتظر اشيل طفلي منج وكون يشبهج وخصوصا عيونج الحلوة

سمر : ليش هيجي حب حب تضحك على عيوني لأن صغار مو

نزار : احلى شي بيج عيونج الدكم اموت عليها خصوصا بالليل من تباوعيلي بيها بكل شوق وحب تاخذيني لغير عالم

سمر : احبك اعشقك نزار الله لايحرمني منك كل لحظة وياك يمر مثل النسمة الله يطول بعمرك يومي قبل يومك انشالله

نزار : لاتغيرين السالفة مشتاقلج ولا تهتمين حتى لو ماكو طفل اني اصير طفلج .

مدينة : عفرا تعالي احجي وياج كلمتين مثل ماحافظنا عليج كل هالسنوت حافظي على نفسج هالاشهر ميحتاج افهمج اكثر بديت اضوج من طلعاتكم هاي شفتي ابو حسن من انخطبت هنا مقبل تطول فترة خطوبتها اسبوعين وتزوجت وانتي كملتي سنة وداخلة على الثانية ماكو شي

عفرا : ماما مو بيده شنسوي ابوه مو راضي بكلبي لو ما حجيتي ويايه جنت ألين هالمرة حتى ميزعل مني ماما راح ندور على الاثاث وعدني هالمرة من يرجع نتزوج حتى لو ابوه مو راضي .

مدينة : صيحيلي حامد اني راح اروح ويا ابوج يم نزار وانتي لاتتأخرين

ميرا : اشكد نصابة ذبيتي الشغل عليه وكاعدة تتفرجين على التلفزيون متستحين كومي كملي فرح مو راضية تنزل

مرمر : لو اني منها أركص للصبح تعرفين يعني شنو زواج حرية وراحة وسعادة بعيدة عن حياتج ويا جبار

ميرا : ردت اجاوبها واسكتها جدي واكف يم الباب وسمع كل الكلام لحظات ونزع الحزم يركض ورا مرمر وهي تصيح واني رحت اصيح فرح كالعادة

أبو حامد : حامد انت تشك بحبنا الك اني وامك لو مقصرين بشي وياك اشوفك منهار

حامد : اكيد لا بابا بس اللي صار صدمني كلام عمي خلاني على امر الواقع لو بالبيت كلتولي العروسة فرح لا انحط بهيج موقف صعب مكدرت احجي شي وهو يحجي عليه يكولي متستحي عينك على بنتي لو رجال جنت تتزوجها قبل ولا ازوجها لواحد غريب عبالك اني سبب اغلاطه

أم حامد : هسة اللي صار صار المهم حضر نفسك هالايام نسويلكم خطوبة ويمتى تقررون تتزوجون بكيفكم

حامد : هههه شر البليه ميضحك شلون زواج والعروسة مشايفها وحتى سلام كوة تجاوبني وعمي يكول عينك عليها وحضرتج تحجين على اتفاق اكوم انخمد وانام احسنلي اني ماعندي اي شي اللي تردونه سوه بكيفكم

فرح : بابا كافي ابوس ايدك لاتضربها مو قصدها متعرفها لسانها طويل واني اصلا ماعرف شنو السالفة جنت اصلي بغرفتي أدعي الله يوفقني راح يرميني للمرة الثانية بالنار جتي ميرا تبجي تريدني اخلص مرمر من بين ايدين ابويه

جبار : ولج هاي الحقيرة ادبسز لو تعرفين شنو جانت تحجي مدافعين عليها روحي لغرفتج الله ياخذج راح تنزلين راسي تالي عمري والله لو جلب يجي يدك الباب انطيج اله حيوانة

ميرا : مادري اضحك لو ابجي من اللي صار كومة انضربت ولا كانه دخلت للغرفة ضلت تحجي على جبار متوب اريد اعرف هالعين القوية منين جايبتها ولج شوية اسويها على روحي

مرمر : دروحي خايبة عبالج اني مثلج باردة مادري شلون احنا توأم فرق بين السما والارض
سمعتي راح يزوجني ههههههه عباله بكيفه

ميرا : عبالج يتشاقى وياج متخافين يزوجج مثل مايسوي بفرح هاي ثاني مرة يجبرها والله الموت اهونلي من اتزوج واحد لا اعرفه ولا احبه

مرمر : انتي تحبين وتتزوجين من حبيبج وجبار جدج اكص ايدي اذا مخللتي لو يزوجج لواحد تافه على مزاجه روحي نامي وديربالج تسويها على روحج وانتي تتخيلين حبيبج

حامد : شسوي شكول لحبيبتي اتزوج غيرج واني واحد جذاب ومو كد كلمتي يارب اللي بيها الخير يصير مكدرت انام ظليت للصبح اجي واروح بغرفتي لحد ما صار الفجر رحت على الجامع اصلي كعدت ويا الشيخ واحد جبير بس انسان مثقف كلش دايما ابقى واحجي وياه حجيتله سالفتي مع حذف تفاصيل

ابني الانسان المؤمن الله يمتحنه مرات يصير شغلات احنا منريده بس الله يخلي بطريقنا نضوج ونزعل بعدين من نشوف خيرها نندم على اعتراضنا والعكس صحيح صلي استخارة وتوكل ومادام البنية اللي أهلك مختاريها صايمة ومصلية وتخاف الله توكل وارضي أبوك وامك

فرح : سوينا خطوبة واني مشفت حامد اصلا مرفعت راسي اكيد مجبور عليه واحد مثقف وموظف بالوزارة شيريد من مطلقة وجاهلة اتصور ابويه طلب منه يتزوجني مستحيل هو يريدني

حامد : أخذت إجازة من الدوام ماكدر احط عيني بعين حبيبتي أحس نفسي مو رجال كملت الأسبوع وصلت للدوام ردت انزل من سيارتي شفت الحلقة بيدي ردت أنزعه بس مكدرت عيب وحرام ميصير لازم اتعود طلعت للقسم اللي اداوم بيه كلهم جانو يعرفون ويباركون كوة أمشي ماريد اوصل للكرسي واشوفها ردت هاليوم بالذات تختفي من كدامي بس حظي جابها بالعكس شفتها تقدمتلي وباركتلي بستهزاء .

عفرا : كملت كلشي هالشهر راح نتزوج واخيرا راح نكون بنفس البيت أحسب الايام يمتى تخلص نحضر حفلة زواج اخويه مخبوصين كلنا لان عمي صحته مو زينة راح يكون بيناتنا كومي نروح للصالون نسوي تنظيفات وحف وشوية رتبي شعرج

فرح : دروحي فاضية اني يومين منايمة من ورا ابويه عبالج مثلج مشفوحة على الزواج

عفرا : أخ شلون حظ زواجج بعد ايام ولا يمج واني باقيتلي شهر ومحتركة من هسة بس اوصل لحسن ماريد شي بعد يمه من حضنه وبوساته وريحته اوف قلبتي عليه المواجيع

فرح : تفو عليج حيوانة استحي شوية أني من يمي خجلت

عفرا : يارب يطلع عينج حامد وينسيج اسمج اشوف بيج يوم يافرح تحجلي على بطولات اخويه

فرح : بجيت من كل كلبي حسيت بخوف هالمرة الزواجة مو مثل الاولى اكيد يريد حقوقه

عفرا : هههه والله مو قصدي شي نسيت حضرتج ممجربه لا تخافين والله حامد حباب وطيب مو مثل نزار دخل للغرفة بعد نص ساعة خابر امي بس متاكدة سمر هي المغتصبة اخويه المسكين .

حامد : جنت نايم سمعت صوت تليفوني جاوبت صوت فرح الحكني حامد ابويه تعبان جنت وحدي بالبيت اهلي رايحين يم نزار متاكد مجانت تخابرني رحت على السريع ميرا فتحتلي الباب وهي تبجي عمي بحضن فرح بس شنو ملاك مو بنية شنو هالجمال وشعرها نسيت عمي بقيت اباوعلها اول مرة اشوفها بدون نقاب وحجاب ولابسة سيت حرير

فرح : الله يخليك بابا جاوبني بابا حامد خلي ناخذه للمستشفى من خوفي نسيت منو حامد واني شنو لابسة ردت اركض البس عباية وكعت بحضن حامد لحظات حسيتها دهر كلش استحيت من فشلتي جنت احجي على ميرا ومرمر يسكتون وميبجون .

حامد : طول الطريق عيني عليها مكعدت يمي مرمر كعدت بقت حاضنه ابوها وتقرا ايات عليه اشكد كبرت بعيني رغم ابوها مو زين وياهم وقاسي اشوفها شلون تهتم بيه وصلنا بقينا ننتظر الدكتور يطمنا مرمر بحضن فرح وميرا بحضني تبجي حسيت اني مسؤول عليهم وهمه عائلتي ولازم أحميهم .