علمني كيف الحب يداوي الفصل الثالث 3 - بقلم Chrakirkuki

#علمني_كيف_الحب_يداوي 4

فرح : رغم أني بعدني طفلة ومحسيت بحنان ابويه جنت مرات أحسد طلعت اخويه من كثر حب أبويه والهدايا والفلوس اللي جان ينطيه أله واني امي مقصرت لا هي ولا طلعت جنت اباوع على بنت عمي عفرا نجحت أبوها اشترالها بايسكل واخوانها يلعبون وياها ويعلموها بالشارع واني هم نجحت وجنت الاولى أمي انطتني كومة فلوس بس مفرحت بيها لأن اعرفها متكدر تشتريلي هدية تخاف من جبار وطلعت نجح كتب عمارة بأسمه واني حتى كلمة مبروك اللي وكفت ساعات وانتظرته ينطقها مسمعته منه جنت أحسد اولاد عمي وأحسد عيشتهم رغم احنا حالتنا المادية أحسن منهم أمهم وابوهم يحبون بعض وعايشين بهدوء اشوفهم يطلعون سفرات وطلعات واني وامي محبوسين داخل البيت اللي صاير سجن جنت اتمنى عدنا بيت صغير وماعندي غرفة وحدي اضطر انام بين امي وابويه وهمه يحضنوني واتعارك ويا طلعت علمود الاكل واشوف ابويه من يرجع من الشغل تعبان من يشوفني يمسح على راسي ويحضني ويكولي فرحة بيتي مو جبار اللي يجي وجايب وياه نص السوك بس يغلط ويحجي على أمي ومن يشوفني يصيح عليه تعالي ياعار بنت العار وأتقرب منه بخوف يباوع بعيوني بغضب ويجرني من ايدي ويهز بيه يسألني شمسوية اليوم بغيابي أحجي ومن ابدي ارجف يلزمني من شعري ويوديني يم امي واني ابجي واتوسل بيه ممسوية شي ولا طالعة من البيت لحد ماتخلصني امي من ايده ويكمل عليها واني اركض لغرفتي واقفل الباب وأبجي طفلة وتتمنى الموت وبس رغم متعرف شنو الموت غير انه بس متبقى بهذا البيت يودوها بغير مكان بعيد عن جبار وعيشته.

شامل : نجحنا اني وامجد قدمت لكلية القانون جان حلمي خليت أمجد يقدم ويايه رغم أعتراض والدته أبويه من فرحته مجان يعرف شلون يعبر سوالي حفلة وعزم كل اقاربنا كلش جنت فرحان اشوفهم مفتخرين بيه كدام الناس شفت امل كاعدة وتمسح دموعها ويادعاء خفت عليها عبالي أحد حاجي عليها لو صاير بيها شي شبيج ليش تبجين أحس أمل مسؤولة مني

دعاء : ماكو شي لاتهتم بيها دلع بنات راح أفتخر بيك كدام صديقاتي واكوللهم هذا الحلو أخو الحلوة دعاء محامي

أمل : مابيه شي من فرحتي أبجي شفت ماما تبجي بجيت وياها شامل راح تعوفني وتنساني من تدخل للكلية مو

دعاء : اللي يسمعج يكول شامل مو اخوها صديقها عابت غبية مو اني وياج راح نروح للمدرسة سويه بعد شتريدين من شامل

شامل : شنو هالحجي دعاء عيب بعدج صغيرة منين تتعلمون هالسوالف لخاطر الله جيل فاسد من البيضة

دعاء : عيني كبرنا ونسمع غير من البنات اول ماتجي اول متوسطة تكبل وتتباهى كدام صديقاتها بيه وهو يشبه الطلي والله لعبت نفسي من سوالفهم لاتخاف على اختك جبل مايهزها ريح اما هاي اللي بصفي أشرت على امل يكولولها المسترجلة لايغرك الشكل ترى تعجبك خوش ولد هي

أمل : الله ياخذج هذا مدح لو فضيحة شنو مسترجلة

شامل : باوعت عليهم واني اضحك كبرو وسوالفهم تغيرت باوعت على امل لاتخافين مراح أنساج وأعوفج أني حزام ظهرج لحد ماأموت

امل : اسم الله عليك المفروض تكولها من زمان وتريحني ترى متت من الجوع مااكلت شي من العزومة يالله توكل يم جماعتك تعالي دعاء نروح يم ماما ونخلص الباقي من الأكل.

حامد : رجعت للبيت تعبت من المشاوير أشتغل ويا ابويه عدنا مكتب عقارات منا شغل ومنا دراستي طلبت منه يشتريلي سيارة مقبل يكول تطلع رخصة يالله واني اشوف طلعت من زمان يسوق وعنده بالسنة مرتين ابوه يبدل سيارته أحس طلعت كلش محظوظ جيبه متروس فلوس اكثر من ابويه وعنده سيارة وعنده عمارة بأسمه كلشي متوفرله ملك زمانه كل اللي يعرفون طلعت من أصدقاءنا واقاربنا يحسدون طلعت على عيشته بس أني مااشوفه فرحان دايم مهموم دخلت للبيت كالعادة نزار بحضن أمي يسولفون مادري سوالفهم متخلص صحت بأعلى صوتي ياربي شنو هالظلم الأخ متمدد كدام التكيف واني من الصبح اكرف كرف كدام الشمس

نزار : بست ايد امي على عناد حامد وحضنتها أحس نفسي بدونها مااسوى شي احبها وكلش متعلق بيها مااعرف أضم عليها شي حتى لو حاولت مجرد ماتباوع بعيوني لساني اوتوماتيكيا يشتغل ويحجي جاوبته ماما متقبل اطلع كدام الشمس تخاف أموع ماتحمل الحرارة

حامد : مبين من كعدتكم موناويين تغدونا واني اشم انواع الروايح اللي يحبها كلبي

مدينة : ضحكت عليهم سوالفهم متخلص رجعت نزار لحضني واني العب بشعره حبيبي كلشي حاضر بس ننتظر بيت عمك هسة يجون وناكل سويه مسويتلكم كومة اكلات

عفرا : اي الاكلات اللي يحبها نزار واني طلبت منج شوربة مسويتيلي ماما أكدر اخذ فرح لغرفتي حتى نلعب سوية اخاف ميبقون مثل كل مرة ياكلون ويروحون بسرعة

نزار : اي ماما خليها تبقى خطية دايما عمي يحجي عليها وهي تبجي

مدينة : عيب حبيبي ميصير تتجسس على بيت عمك كل واحد حر بحياته ماعلينه بيه ابوك اذا يعرف راح يزعل منك وهالكلام موجهه لثلاثتكم أفتهمتو

حامد : هزيت راسي بحاضر الله وكيلج أي شي يخص عمي ماريد اتدخل بيه بس يشوفني يحجي عليه انت هيجي وابني هيجي

نزار : نفس الشي يكولي ماكو براسك خير مادام 24 ساعة مكابل امك بالبيت

مدينة : انقهرت من سوالفه دايما يكسر بنزار وحامد ويحجي عليهم بس ماحب أكبر السالفة واسوي مشاكل بين الاخوان لا اخلاقي ولاتربيتي تسمحلي جنت اخاف بالبداية ياخذ نزار مني بحجة عمه الاكبر بس الله أستجاب لدعواتي ومجان يهتم بيه اصلا ميحبه ودايما يكولي خربتي ولد أخويه بدلالج التربية مو هيجي عالأساس هو كلش اب ناجح وزين وياعائلته.

نوجان : جنت كاعدة ويا جبار بغرفتنا وهو بيده اوراق يرتبها العطلة كلها فرح حياتها عبارة عن نوم وحابسة نفسها بغرفتها متشاركنا
شي اتوسل بيها كوة اخذها واطلعها ويايه خفت لاتصير مخبلة بعدين أشوف نظراتها على غراض طلعت وتتحسر بداخلها ومن ابوها يحضن ويبوس طلعت كدامنا هي تكوم بسكوت وتروح لغرفتها تقربت منه سئلته طول عمري سكتت على معاملتك اليه وتحملت اهاناتك وضربك تدري ليش باوعلي مصدوم اول مرة احجيله اللي بداخلي لأن حبيتك جبار رغم كلشي جنت انطيك اعذار بتصرفاتك ويايه من حبي ألك بس حرام عليك اللي تسويه ببنتك شنو ذنبها خف عليها جبار اتوسل بيك البنت راح يصير بيها شي من تعاملك وياها

جبار : لا والله يازبالة متفضلة عليه بحبج نسيتي نفسج هربتي من أهلج وانتي شبرين ومجان اهلج مقصرين وياج بس انتي فاسدة من نفسج مو صوج اهلج وبنتي اني حر بتربيتي الها اياني واياج تحجين بهالموضوع مرة ثانية راح أخلي جهالج ميتفلون بوجهج راح افضحج واكوللهم امكم هربت من اهلها وتزوجتها خوفا من الله لأن اني رجال ماحب الحرام وعمري ماقربت منه الحمدلله جنت أكدر اخذج بدون زواج وجنتي راح ترضين أني المفروض من زمان مطلكج بس عززتج وعيشتج احسن عيشة بيتج احسن من كل بيوت المنطقة والفلوس جوا ايدج بدون حساب طلعة وطبه ويا ابنج ساكتلج وتريدين هسة تطلعيني اني الغلطان شفتي بيت اخويه وغراضهم وشلون يصرفون وياكلون كله بحساب شوفي نفسج فرق بين السما والأرض

نورجان : كلما يحجي واني ابجي واقرر بداخلي راح اتمرد راح اتغير بعد ماسكت كتله من هالليلة راح ابات بغير غرفة مراح يجمعنا فراش طلعت وغسلت وجهي أباوع على المراية بعدني شابة بقمة جمالي ونضوجي اشكد سلب مني روحي ومشاعري مكدر ياخذ جمالي رحت نمت لأول مرة بعيدة عن جبار وكلامه اللي مثل السم حضنت فرح وأمسح على راسها وهي نايمة واني اكوللها اسفة مكدرت أحميج من ابوج اسفة جنت أم مو مناسبة ألج.

أمل : جنت نايمة أحلم بأبويه واني بس شايفته بالصور يحضني ويريد يحميني من شي غير السواد مااشوف لحظات حسيت بلمسات على رجليه فزيت جانت الدنيا ليل عبالي احلم فتحت عيني رضا بغرفتي شلون دخل مااعرف ردت أصيح خله ايده على حلكي

رضا : أشششش لاتطلعين صوت أمج نايمة تعبانة واخوانج نايمين صيري عاقلة دقايق وينتهي اوعدج مراح تحسين بشي

أمل : ياربي ساعدني الليلة راح انتهي شسوي كل فكري يم الباب شلون فتحه اريد اوخر ايده ماكدر من الصدمة أحس نفسي مشلولة وهو ينفث سمومه وكلماته على وجهي بس أردد بداخلي يارب سترك أسمعها دايما من أم شامل

رضا : شامل مراح يفيدج بس يدخل الكلية راح يعوفج ويشوف غيرج اللي تنطيه يروح بلاش سمعي كلامي وشوفي شسويلج راح اخليج ملكة واخلي امج خدامة يم رجلج شتردين بعد واني ألمس وجهها وشعرها مكيف ساكته يمكن تفكر مصدكت راح ترضى زودت على كلامي شامل يلعب بيج وبغيرج شفته ويا غير وحدة مشهور بسوالفه ومكسراته ويا بنات الناس حرام تضيعين نفسج ويا هيجي واحد

امل : وخر الله يرضى عليك شنو هالحجي بعدني صغيرة شامل اخوية والله اخوية مو مثلك يانجس الله يخليك لخاطر جهالك اللي همه اخواني لاتسوي بيه شي لاتلمسني أحس نفسي كلش ضعيفة واني اتوسل بيه وابوس ايده أني يتيمة وانت مثل ابوية

رضا : اني مو ابوج احبج احب جسمج وشعرج وعيونج اكرهه هالعجوزة أللي تنام يمي انتي حلوة وتناسبيني اني استحقج واستحمل امج العجوز لخاطرج

أمل : عرفت توسولاتي وياعديم الضمير مراح تنفع بعدني اردد سترك يارب بداخلي لحظات وسمعنا صوت الباب أمي كامت تعجن حتى الصبح تكوم تخبز للناس وتجيب فلوس لزوجها العار حتى يشرب بيه ويتحرش ببنتها جانت تصيح رضا وينك دخلت علينا

ام امل : هاي وينك يامعود صارلي اشكد ادور عليك شتسوي منايم شبيها امل

رضا : الله ياخذج وارتاح منج شكومج هسة شوية وجنت اخلص من هالموضوع ماكو شي سمعتها تصيح وهي نايمة يمكن جانت تحلم بكابوس

امل :أخذي هذا اشرت على رضا وعوفوني بحالي ماريد أشوفكم يمي طلعو برا من غرفتي الكابوس اللي اشوفه دايما بحياتي هو انت ياعديم الرجولة مكملت كلامي امي ورضا هجمو عليه يضربوني من كل مكان طلعت اني الغلطانة وهو الله يكثر خيره ساترنا ويعيشنا .