علمني كيف الحب يداوي الفصل الثاني 2 - بقلم Chrakirkuki

#علمني_كيف_الحب_يداوي 3

نورجان : كبر طلعت وكبرت فرح وزادت معاناتها ويا أبوها اما اني صرت بفضل أبني اطلع وازور ناس مرات وأروح للسوق وياه من يصير الليل يضربني جبار بغرفتنا اكتم صوتي وألمي حتى جهالي ميسمعون صوتي بس الصبح من يشوفون الكدمات على وجهي يعرفون يظلون طول اليوم مياكلون ينعزلون بغرفهم اتوسل بيهم يالله يقبلون ياكلون شي اشوف نظرات الأنكسار بعيون فرح وهي اللي بعمرها تلعب ويا صديقاتها لو بالشارع اللي هي محرومة منها لو العاب البنات اللي مستحيل جبار يخليها تلعب بيه اتذكر مرة جبتلها عروسة ضربني ضرب جان يكولي تردين تفتحين عين البنية على سوالفج الوصخة نسيتي نفسج جنت اتوسل بيه يسكت حتى الجهال ميعرفون سالفة هروبي وأخسرهم

شامل : رايح على المدرسة فرحان اني وصاحبي أمجد دايما نحاول نطول بطريق الرجعة ندخل بفروع ونطلع بغيره نتونس بهالشي مرات نوكف نلعب ويا الجهال طوبة شفت هوسة وصياح جهال متكومين رحنا اني وامجد نشوف شنو الموضوع

أمجد : خلي نروح ماعلينه هاي امل ام لسان متأكد هي السبب

شلون نروح ونعوفها همه اهواية وهي وحدها

وكفت كدامه شامل لاتسويها شغلة غيرة وانت رجال ترى هي متستاهل

وخر اشوف طلعتها بعد مضاربات لزمتها متسكت راحو البقية بقت ويانا وبعدها تسب وتشتم بيهم صيحت عليها عدلي نفسج وسكتي كافي

انداريت عليه ردت اطلع حركت اعصابي بيه مجنت اعرفه منو باوعت على اللي بصفه هذا انت أمجد أخو البنات

ألج عين تحجين بعد ماساعدناج اني وصاحبي

والله مشفتك سويت شي منو انت باوعت على اللي ساعدني

شامل

امجد : شامل هاي بنت فلان مو دايما امك تسولف عنها وتكول عندك اخت من الرضاعة هي هاي

شامل: تذكرتج أمل بس انتي متذكريني أني أخو دعاء أختج من الرضاعة شتسوين بهالمنطقة مو بيتكم جانت بغير مكان

ههههههه شلون صدفه جمعتني بيكم لا صارلنا مدة ساكنين اهنا ترخصت منهم واني احس بفشلة مو طبيعية.

شامل : ماصدك شلون لكيتها كبرانة بعدني اتخيلها باللفة وامي ترضعها ويا دعاء شلون عرفتها امجد وليش محجيتلي

امجد : اشكد بطران اخلص من سوالف امي لو من دراسة السادس لو أحجيلك سوالف المسترجلة امل شفتها مرتين أمها تخبز للناس وامي وصتها ورحت جبته وتعرفت عليها ساعة سودة شفتها

بس ليش تتعارك ويالجهال بالشارع مو المفروض هي بالمدرسة لو لأن اليوم اول يوم ممداومة لحد ماوصلت لبيتنا واني احجي لأهلي طلعت امي تعرف بيهم ساكنين بفروع قريبة علينا كومة اسئلة براسي اريدها تجاوبني قررت أشوفها من جديد .

أمل : رجعت لبيتنا رحت لغرفتي وقفلت الباب عليه واني ابجي داخلي كومة اهات مكتومة بس منو يسمع قضيت طفولتي ويا أوسخ البشر رضا الحقير امي المفروض تعوض غياب ابويه خلتني احس بغيابه بحياتي اكثر مشفت ابويه امي تزوجت المفروض أهل ابويه ياخذوني يمهم بس هي مقبلت تنطيهم من ورث بابا وفلوسه شي سوت تنازل ملكية عن البيت والسيارة بالتزوير بمساعدة حبيبها رضا فهمه تبرو مني بسببها من عرفو مراح يحصلون شي من ورايا جنت طفلة أشوف رضا ويا امي عايشين حياتهم لاغين وجودي بيناتهم ويتمتعون بفلوسي اللي الناس يجيبوها اليه بدافع الشفقة واليتم وهو يستمتع بيها وبسيارة وغراض ابويه وفوكها يحجون عليه شفت شغلات ميصير اللي بعمري تشوفها جان دايما يبوسني بطريقة وسخة ويتحسس جسمي واني صغيرة ماافهم من دخلت للمدرسة وبديت اتعلم جنت اقفل الباب على روحي من انام لو من اغير مرات جنت انسى جان يتحرش بيه لو يتغزل بجمالي واني مجرد طفله ومن احجي لامي متجاوبني لو تكولي هاي لان متحبيه تطلعين عيه اشاعات وهو يحبني وانتي ولاشي بالنسبة اله مرت السنين جنت اشتغل واساعد بمصروف البيت اكعد كدام باب بيتنا ابيع غراض للجهال حتى اطلع مصروفنا اليومي وأمي شغلتها تخلف سنة بعد سنة لحد ماسوته 6 جهال ويايه 7 وهو نايم لو شارب لو فوك السطح كل فترة نغير بيتنا من ورا افعاله وشكاوي الجوارين عليه اني هالسنة بأول متوسطة مقبلت امي اروح للمدرسة بحجة المصروف جبت مسواك للبيت شفت شوية جهال يضربون اخواني ركضت اطلعهم بيناتهم حسيت بأيدين تجرني ولد اول مرة اشوفه من راحو الجهال شفت أمجد المكروه اللي امه شايفة نفسها على الناس وياه واحد حسيت بداخلي اعرفه لحد ماعرفنا امجد وعرفته شامل اخويه بالرضاعة جنت دايما اتمنى اشوف امه واخته دعاء بس أمنيتي جتي بوقت غلط ياترى راح ارجع اشوفه لو لا.

طلعت : شفت فرح كاعدة وحدها ويا امي كالعادةقبل مايجي ابوية وتروح لغرفتها تحبس نفسها حبيت افرحهاشوية كتلها فروحتي شنو رايج أسويلج عيد ميلاد ونعزم بيت عمو

فرح : كلش فرحت اول مرة اسمع بعيد ميلاد اليه دايما زوجة عمي تسوي لحامد ونزار وعفرا وتعزمنا بس أحنا مستحيل جبار يقبل أي لما ميكون موجود اكوله جبار لأن ميستحق اكوله بابا دايما يلزمني يضربني ويكولي ياعار ماعرف شنو معناته بس مبينة مو حلوة لان هو يكوله صدك تسوولي عيد ميلاد وراح البس فستاني الجديد ماما لزمت ايدها عيونها بيها خوف وتردد رغم عمري صغيرة بس حسيت بيها خايفة من رد فعل جبار انمسحت سعادتي بلحظات جاوبته ماريد طلعت واصلا مو اليوم عيد ميلادي رحت لغرفتي طلعت كتبي وبديت اقرا نفس الموضوع للمرة 20

نورجان : كرهت روحي بعد ماخذلتها بترددي وخوفي كسرت فرحتها هاي حوبت أهلي عمري ماارتاح ولا اشوف الفرحة بعيون جهالي لبست عبايتي وحجابي طلعت على بيت مدينة صارلها مدة تكولي على دروس دينية بالجامع خاص بالنساء مجنت اروح ماعندي ثقة بنفسي اختلط بالناس اليوم تشجعت اغير نفسيتي طلعتلي حجيت وياها انتظرج جيبي عباتج نروح

مدينة : ماصدك وافقتي صدكيني راح ترتاحين وتحسين وتتغير نفسيتج أدعي من كل كلبج بلكي الله يفرجها عليج كلش انقهر عليها اللي يشوفها ميصدك متزوجة وابنها بطولها وجبار عبالك ابوها مو زوجها شلون صار جبار بعد العلاج

نورجان : ضحكتيني واني ماعندي نفس اضحك صارله اشكد يتعالج ومافاد ومن يتقربلي وميصير شي يضربني ويذبه براسي يكولي صوجج شسويله ماعرف أخ لو يرجع بيه الزمن وأشوف اهلي اخاف اموت واني ماعرف شي عنهم

لا انشالله بعدج بأول العمر راح تشوفيهم وتشبعين منهم ليش مكلتيله يدور عليهم

جبار مستحيل يسويها لأن ميردني اعرف شي عنهم يخاف اعوفه ومنو راح يخدمه ويتحمل طبعه غيري عبالج حبا بيا متزوج عليه لا والله بس هو يعرف نفسه كلش زين لاينجرع ولاينبلع محد ترضى تتزوجه

لعد راح اوصي ابو حامد بلكي يعرف ناس من نفس منطقتج

وكف بيا الزمن وسكتت من الصدمة لو من الفرحة ماعرف اول مرة بعد سنين احد يساعدني راح يسامحوني اهلي يمكن أي كلبهم طيب عندي اخوان جدد لو لا كومة خيالات براسي اتمنى تتحقق جزء منها .

طلعت : رحت لبيت عمي حجيت وياحامد ونزار قررنا نسوي لفرح مفاجأة بس ببيتهم لأن عفرا اقترحت هي تزيين المكان وخفنا لا ابويه يشوف شي ويكسر فرحتنا رحنا على السريع جبنا الكيك والغراض واشترينا هدايا بسيطة من المكتبة خلال ساعات جهزنا كلشي رجعت لبيتنا طلبت من امي تلبسها ونروح لبيت عمي

نورجان :تعال طلعت شوف واني ابجي أشرت على فرح وهي نايمة على كتبها وبقايا دموعها على خدها

ماما انتي طلعي غراضها هسة اني اصحيها مستحيل اخليها تنام شلتها وبستها فرح كومي خلي ماما تبدلج معزومين ببيت عمي

صدك هسة راح ابدل وصلت لبيتهم شفتهم واكفين ويصفكون ويباركون اليه بعدني مو مصدكة لحد ماحضني عمي ابو حامد وباس راسي يباركلي كلش فرحت وتونست بس رجعنا لبيتنا شفت جبار كاعد اني وماما صرنا كدامه طلعت بقى يم حامد ونزار محسيت الا صوت ضربة على وجهه امي ردت أتقرب منهم امي صاحت روحي لغرفتج بسرعة وهو يهددني ويتوعد بنظراته النارية ركضت وقفلت الباب واني اسمع انواع الغلط على امي من كال تردين بنتج تصير مثلج تجيبلي العار فكرت امي شمسوية حتى يكوللها عار بقت هالكلمة يتردد براسي اكثر من اسمي .

شامل : ماما يمتى نروح لبيت خالة ام امل مو وعدتيني نزورهم ونشوف احوالهم سمعت من امجد حالتهم مو زينة

ماعرف حبيبي خلي يجي ابوك واخذ رأيه لأن تعرف هسة عايش وياهم رضا صعب نروح عليهم مثل قبل الناس يحجون عليه اهواية

زين ماما اني راح اطلع ويا امجد من نرجع بلغيني بقراركم اترخص رحت اتمشى واجيب ملازم من المكتبة رجليه ودتني يم بيت امل شفتها واكفة كدام الباب ويا اخوانها تقربت وسلمت عليها خفت تضوج مني بس شفتها فرحانة سلمت عليها وكتلها امل ممكن نحجي بمكان جان اكو حديقة ملاعيب صغيرة قريبة علينا مردت اوكف وياها كدام الباب خفت لاتنحرج مني ماعرف شلون حجيت هيجي شي

أمل : جنت واكفة يم اخواني من يطلعون لازم اوكف انتبه عليهم متكول امي هاي كبرت وميصير توكف شفت شامل تقرب عليه كلش فرحت متخيلت راح اشوفه مرة ثانية طلب مني اروح وياه للحديقة اخذت أخواني ورحت بدون تردد شفته مرتبك عادي شامل اشبيك خايف ترى انت اخوية

مو قصدي شي امل لاتفهميني غلط ماحب الناس يحجون حجي مو زين عليج أكثريتهم ميعرفون اني شنو بالنسبة الج كعدنا وهي صعدت اخوانها على الملاعيب احجيلي ليش مو بالمدرسة

صدمني بالسؤال أستحيت اكوله علمود المصاريف غلست وسألته ياصف هسة انت

هههههه غيرتيه ميخالف اني ويا امجد بالسادس

شلون تتحمل أمجد ترى كلش غثيث مو هو يعيد السنة

اي هاي ثاني سنة وبعدين أمجد مو بس صديقي اخويه وروحي من وعيت على الدنيا اني وياه سوية تكدرين باجر تجين على بيتنا امي ودعاء مشتاقيلج اهواية

ماعرف شكولك اتمنى اشوفهم بس خلي اشوف ظروفي

لزمت ايدها باوعت عليها احجيلي الصراحة شلون عايشة حياتج لاتحذفين شي كعدي ولاتغيرين السالفة

بديت احجي نبذة عن حياتي التعيسة مع حذف تفاصيل رضا محبيت اشتكي منه خفت لايسوي شي لو رضا يسويله شي واخسره مصدكت لكيتلي ظهر رجعت للبيت بعد ماوعدته باجر ازورهم اغني وفرحانة شافني رضا سألني

وين جنتي هيجي فرحانة منو الولد اللي رحتي وياه شنو سوالج فرحج هيجي

عيب عليك هذا شامل اخويه عبالك الناس مثلك وخر اريد افوت لغرفتي

واذا موخرت اريدج تنطيني مثل ماتنطين لشامل مادري اخوج ابن عمج هالكلاوات متمشي يمي ترى أعجبج اكثر منهم

صحت ماما تعالي جان يباوعلي ويضحك الحقير يعرف مراح تجي وتدافع عني دفعته ودخلت لغرفتي واني اتذكر حجيه وألفاظه القذرة كتبت على الحايط بأيدي شامل ملاكي الحارس

شامل: مرت الايام وصارت أمل وحدة من العائلة عرفنا تركت المدرسة من ورا المصاريف ابويه تكفل بدراستها بعد ماتوسلت بيه يساعدها جنا نروح ونجي اني وامجد وياها نوصلها للمدرسة على طريقنا ونرجعها ويانا لأن دعاء اختي بغير مدرسة حياتي صارت أمل وأمجد غير عائلتي ايام العطل تجي تبات يمنه واني دايما اخذلهم غراض ومساعدات لبيتهم أمها تتونس من تشوفني لأن ماروحلهم وأيدي خالي مجنت أحس أمل غريبة عني لو هي تختلف اني ولد وهي بنية كلش جنت مرتاح بصداقتها بس هي وامجد دائما يتعاركون ويتجادلون على ابسط الأمور يحركون دمي ويعصبوني لحظات اشوفهم منسجمين ويحجون كأنه مصاير شي راح انجلط من وراهم يوم

أمجد : شبيك صاير نار عادي أصلا اذا محجيت على أمل احس نفسي مخنوك وضايج

أمل : الله ياخذك مكروه متعرف تعبر ابد طالع على امك المتكبرة حقه ابوك اتزوج عليها اني لو منه يوميه اتزوج تستاهل 😝

أمجد: شامل لو تسكتها هسة لو أموتها اليوم ترى زودتيه ولسانج مال كص 😠😠😠😠😠

شامل : الله ياخذكم أثتيناتكم راح أرجع للبيت وحدي مشيت وعفتهم لحظات وايديهم على كتافي يضحكون كأنما مصاير شي 👬👧