علمني كيف الحب يداوي الفصل السادس عشر 16 - بقلم Chrakirkuki

#علمني_كيف_الحب_يداوي 16

لمحات من الماضي 15

فرح :كلش خايفة حامد خلي نرجع ماريد أعرف شي .حياتي كلش تغيرت حتى نفسيتي غير بفضل حامد اول هدية جابها اليه جان كتاب انقهرت عبالي يقصد أني جاهلة مقريته تكررت الهدية ضجت جان يسألني واسوي نفسي قاريته ومعجبني كرهت روحي من السالفة لحد مايوم بالليل جنت كاعدة فتح وحدة بيهم كعد يمي بد يقرا وياشرلي على المواضيع شفت عن المرأة وحقوقها اندمجت وياه رحت فتحت البقية عن الثقة والحقوق واجبات المرأة بشكل عام راد يغير من شخصيتي باسلوب ميجرحني بيه بس اني جنت غبية ومافهم بديت كلما يصير عندي مجال حتى بنص الليل اكعد اقرا بيها اليوم جابني للدكتورة صار عندي اسقاط للمرة الثانية

حامد : حتى لو اكو شي اني راضي والله مجبتج علمود طفل علمودج وعلمود صحتج لان كلش تعبتي ثاني مرة حتى لو ميصير عادي بعدين شنو تخافين وانتي مؤمنة ميصير خلي ندخل ونشوف مو تأخرت عليج هالشهر

فرح : حامد طوختها تحجي باشياء مو حلوة متقصد تحرجني الليلة وعدتني انام يم عفرا زين
دخلنا طمنتنا ماكو شي سويت تحاليل واني اتأفف تعبت من الانتظار بس النتيجة صدمتني طول ماأحنا بالطريق أبجي وهو يضحك عليه

حامد : فرح حامل مرتين صار عدها اسقاط مجنا نعرف اصلا هي حامل راح اطير من السعادة اشتريت عشا لاول مرة جمعت بيتنا وبيت عمي سوية كعدنا على نفس السفرة جانت خايفة من ابوها مكعدت يمي رغم تهديدي مفاد وياها كعدت ويا بنات طلعت

مرمر : يارب يوميا تحملين وتعزمونا اول مرة ناكل مثل العالم والناس اشكد حلوة جمعة الاهل اباوع على جبار واني من كل كلبي اضحك يخزر بيه واني ولا يهمني ميرا شوفي جدج جلطه ميكدر ياكل من ورايه بس يسمع صوتي يرفع راسه

ميرا : كوة لازمة نفسي حتى مااضحك عمي ابو حامد ومرمر يحجون ويضحكون واني اخاف اضحك بعدين اتعاقب اصلا مو متعودين نكعد وياهم ناكل دايما نسوان وحدهم بس حامد يريد يكسر هالحاجز عوفيني لخاطر الله عدنا امتحانات ماريد اروح متكسرة

عفرا : من بعد مافقدت حسن اول مرة اطلع اكعد واشاركهم فرحة أعز مخلوقين عندي حامد وفرح والله عبالي اني حامل لاهي قصرت ويايه ولا حامد اللي متبهدل يوميه ياخذني لو للمقبرة لو للمستشفى ولا فرح اللي طول الليل تطمن عليه هي وامي خايفين اسوي شي بنفسي .

غسق : حبيت أسوي مفاجاة لشامل واروحله للمحكمة زواجنا تأجل بسبب وفاة جدي أشتريت فستان زفافي وكلت لامي ومنار يرجعون للبيت اروح يم شامل وصلت يم المحكمة جان هوسة سمعت صوت طلقات نارية وناس تركض وناس مجروحين وصياح نسوان وجهال أريد اوصل لشامل الناس تصيح روحو مجنت اسمع شي صحت باعلى صوتي شامل حسيت شي دخل بصدري حار وكعت بعدني اشوف الناس اللي تباوع واللي يحجي واللي يريد يساعد

أمجد : طلعنا اني وشامل لباب المحكمة سمعنا صوت اطلاق نار جان اكو قضية دم بين عشيرتين كومة ناس مجروحين ومقتولين والشرطة والدنيا هوسة ركضنا اني وياه نساعد الناس والمجروحين باوعت بعد شوية شامل واكف بدون حركة تقربت منه شبيك

شامل : هاي غسق أمجد لو اني اتخيلها هاي جنطتها اشتريلتها من سافرت واكعة اريد اتقدم أحس نفسي مشلول الله يخليك امجد روح ساعدها

أمجد : شامل بعده مصدوم اخذنا غسق ويا جماعة اصدقاءنا واني أجر شامل للمستشفى لايحجي ولا يجاوب

شامل :مو مصدك شنو جاب غسق للمحكمة ليش مكالتلي ليش تردين تحركين كلبي طلع الدكتور يريدني أدخل شفتها كوة تتنفس بستها من كل مكان كانما وعيت على نفسي من شفت الدم والدكتور ينتظر ياخذها للعملية

غسق : شامل اوعدني تتزوج من بعدني أحبك

شامل : ولج راح اموت اشجابج للموت جيتي برجلج يازواج راح تكومين غسق اريدج تطلعين من عملية طببوها واني ادعي تطلعلي ونتزوج جنت احلم بزواجنا والقاعة والترتيبات كروت الزواج المعازيم مرت ساعة اثنين اهلي واهلها موجودين والناس والصياح اني متأمل تطلع وتصير بخير اصيح عليهم يسكتون حبيبتي قوية

منار : شامل الله يخليك كافي لاتصيح شامل اختي متهنت بفستانها ولك شامل اختي حبت تفرحك وتكولك واخيرا اشتريت فستان اختي راح تروح شامل راح تروح غسق لاتعوفنا انت همينة شوف امي وابوية واكعين يباوعون عليك ينتظرونك تهديهم لحظات وطلع الدكتور شفت وجهه عرفت اختي راحت جان يتأسف ويحجي شامل ماكو اختفى أريد شخص يسندني ابويه تعب امي غايبة عن الوعي اصرخ والطم ميفيد .

أمل : الكارثة اللي صارت نستنا طعم الفرح والسعادة شامل مختفي مرت اسبوعين على وفاة غسق ماكو مكان مدورنا بيه أهله تعبانين لا ليلنا ليل ولا نهارنا نهار اخذت اجازة باقية بيتهم امجد مبقى مكان ميدور بيه ماكو أنام بالليل افز اخاف اسمع شي مو زين عن شامل واهل غسق يريدون يشوفون شامل لان بيه ريحة غسق شفت امجد رجع وجايب ادوية لام شامل

امجد : الله يخليج أمل لاتسأليني عن شي اللي بيه مكفيني راح اموت وينه ماكو حتى سألت بالمطار ماكو اسمه أضطريت ابلغ الشرطة مو معقول وين رايح حتى سيارته جان بكراج محكمة صبح جبته أم شامل شلونها

أبو شامل : فوت ابني استريح تعبناك ويانا لاتخافون مبيه شي راح يرجع اني متأكد الله كريم مراح يضيع صلاتي ودعائي يمه

أم شامل : اوف ياابني وين صرت عايش ميت مادري منين جايب هالبرود يارجال كلبي نار على أبني حتى لو جان عايش روحه راحت ويا غسق

أبو شامل : بدل اللطم والبجي صلي ورفعي ايدج لربج وتوسلي بيه هو يحمي ويحفظ أبنج مو البجي اروح اصلي بالجامع احسنلي تجي أمجد لو تبقى تتعشى وياهم

سمر : هم تروح وتعوفني بديت أكره العطلات من وراك يعني أسبوع شسوي بدونك الله ميقبلها 😭😭😭 متحبني مو

نزار : أشكد نصابة من البارحة مبقى شي تسوي مو كلتلج عمري وفهمتج عفرا محتاجتني أهواية الحمدالله بدت تتقبل الموضوع لازم نوكف وياها أكثر وبعدين مو تروحين يم اهلج وتتونسين ليش تقهرين وتبجين اوعدج اسبوع يمهم والثاني يمج أخذج لمكان حلو نرتاح وحدنا

سمر : أحبك يااعز انسان بحياتي يارب يحفظك أليه ويطول بعمرك ديربالك من الطريق وعينك لاتروح منا ومناك ترى كلبي يحس وأنجلط واموت

نزار : كومي اودعج بطريقتي تأكدي بنفسج أباوع لغيرج لو لا 😍

فرح : حامد ظهري يوجعني كلش والله تعبت من الأبر والمثبتات الحمدالله خلصت منه أحسن نفسي برميل وأمشي خليني اليوم اروح يم البنات ضجت من السرير هسة 7 أشهر ماكو خوف الله يخليك

حامد : نسيتي اشكد تعبنا وتبهدلنا نسيتي الالامج وجعج وروحاتج للمستشفى باقيلج شهرين وترتاحين هانت ليش معاندة واني مو كلتلهم من يرجعون من الدوام يجون يمج بس شسوي بأبوج راسه يابس كلشي يمه ميصير اني وصيت عفرا عليهم لايظل بالج

عفرا : ميرا شلون صرتي أحسن مو شربي كلش مفيد ألف مرة نبهتكم من تسبحون بالليل لاتنامون كدام تكييف بس شسوي بيكم متسمعون كلام اروح أحضرلكم شي قبل لايرجع عمي ومرمر نزلت اباوع على بيتهم قصر مو بيت عادي كلشي بيه فخم وغالي من الاثاث للسيراميك والتحفيات بس مابي روح اباوع على المرايات الموجودة بالصالة شفت نفسي منو هاي أني لو غيري التعب والسواد داير ماداير عيوني وجه شاحب دمعة محصورة داخل عيني شفايفي بيها تشققات ايديه ترجف ماكدر اسيطر عليها أشسوى بيه غيابك ياحسن اباوع على صورة طلعت بعز شبابه راح الله يعين كلب عمي على فراقه هسة يمكن أحس بالالامه.

مرمر : صديقتي القريبة مني بالمدرسة من الابتدائية سوية ميرا متختلط بأحد على كد السلام والدروس اني لا حتى من ارجع اخابر صديقتي ونحجي بالساعات أحب اعرف كلشي من حولي طلبت مني أرجع وياها للبيت وأخوها يوصلنا اني خفت بالبداية بس حسيته زعلت

والله عيب عليج طريق كله 10 دقايق ماعندج ثقة بيه لعد شلون صديقات وتكوليلي انتي مثل ميرا

مرمر : ظلت تلح طول اليوم لحد ماوافقت فكرت أرجع قبل جبار وميشوفني ومااحجي لميرا وينتهي الموضوع فعلا اجه الولد سيارته تلعب النفس صعدت كوة سلمت من الخوف لساني الطويل راح حسيت طريق مو هو سألتها هذا الطريق غلط بيتنا من اهناك

شبيج غير اخويه يريد يشتريلنا ايس كريم ونرجع فدوة علمودي والله نفسي بيها

مرمر : وصلنا نزلو اثنيناتهم اني مقبلت قفل الباب بقيت انتظرهم مرت اكثر من نص ساعة واجوي وماكو بيدهم شي يضحكون واني صايرة اعصاب تأخرت اهواية شفتها صعدت بالخلف وكعدت يمي ترتب نفسها وأخوها فرحان متونس كلبي جان يدك سريع سوالفهم كله الغاز وصلنا لحد راس فرعنا كتله نزلني اهنا مقبلت يوصلني يم باب بيتنا ماعرف شلون نزلت شفت سيارة حامد وراية وياه جبار ركضت دخلت للبيت ماعرف شافوني لو لا

حامد : رجعنا ويا عمي من المكتب تأخرنا اليوم جان عندي شغل اهواية قبل مانوصل شفت سيارة نزلت منها بنية تقربت مرمر شافتنا وركضت اباوع على السيارة بيها ولد شكله مبين هو شنو وبنية كاعدة بالخلف نزلت عليهم ردت أعرف منو همه شخط بسيارته وراح تخبلت وصلنا للبيت عمي من جهة يحجي ويسب واني لاول مرة صرت اعصاب صحت بأعلى صوتي عليها

فرح : ميرا كلش مريضة جنت اسويلها كمادات من تمرض تبجي تريد أمها واني اكعد أبجي وياها شفت مرمر دخلت للغرفة وقفلت الباب أصيحها متجاوبني وأسمع صياح حامد وأبوية من تحت ماعرف شنو صاير اباوع عليها شمسوي يصيحوج ليش متأخرة اشبيج ترجفين جاوبيني

مرمر : ممسوية شي متعرفين ابوج الله يخليج لاتفتحين الباب والله راح يموتني

حامد : سمعت صوت فرح وياها كتلها تفتح الباب بهدوء اريد بس احجي وياها اوعدج ماسويلج شي بس جاوبيني بصراحة منو اللي وصلج لاتكذبين عليه شفتج بعيني اكثر من ساعة انتي طالعة من المدرسة وين جنتي

مرمر : طلعت من الغرفة متأكدة حامد مراح يضربني اخو صديقتي والله ماعرفه هي لحت توصلني اشترو غراض ورجعوني للبيت توبة اخر مرة حامد لاتخلي جدي يضربني

حامد :اخو صديقتج ليش يوصلج متكوليلي متخافين على نفسج المدرسة 10 دقايق تبعد عن البيت شنو هالشي اللي خلاج تتأخرين ساعة تعالي نروح لبيت صديقتج اشوف كلامج صح لو لا اكو وحدة تصعد ويا اخوها وتكعد بالخلف

فرح : ليش مكبر الموضوع حامد لاتصير ظالم مثل بابا بدل ماتهدي صاير نار تريد تضرب بنت طلعت هاي اخرتها

حامد: فرح لبسي عبايتج وتعالي ويانا حتى متكولين عليه ظالم بعدين كوة سكتت عمي انطيته علاجه وكلتله يرتاح واني احل الموضوع باوعت عليها ترجف خايفة ماريد اظلمها بس حلفت أذا جانت تكذب اموتها بيدي

فرح : طول الطريق اهدي بحامد اول مرة اشوفه معصب بهالشكل وخصوصا على بنات طلعت كلش حنون ويحبهم وصلنا طلعتلنا البنية مبين شكلها مو راحة ويا امها

مرمر : احجيلهم مو اخوج وصلنا عمي مو مصدكني

البنية : الله واكبر عليج يااخويه مو عيب عليج تردين تلفين السالفة عليه ماما هاي كالت ابن عمي يوصلنا وحلفتلي الا اروح وياها بعدين راحو غير مكان بجيت يالله رجعوني

حامد : اباوع على مرمر وهي تبجي تتوسل بيها تكول الحقيقة وهاي بكل ثقة تحجي والام تحجي علينا وعلى تربيتنا ماغرف شسوي اموتها ونرتاح لو شنو وين رحتو

البنية : مادري مكان جان يخوف راحت وياه شوية ورجعت

مرمر : والله كذابة انتي رحتي وياه هسة عرفت هذا عشيقج مو اخوج حرام عليج

أم النية : روحو منا لاالم عليكم الناس ربو بنتكم ولاتجون تتهجمون على احد تفو عليكم ناس بلا اخلاق

فرح : دموعي تنزل ليش مرمر بشنو قصرنا وياج هيجي تسوين احس بطني يتقطع وهاي البنية تحجي بثقة ومرمر متكدر تدافع على نفسها عفتهم وصعدت بالسيارة ماتحمل اوكف واسمع اكثر متاكدة ابويه راح يذبحها رجعنا حامد ميحجي شي ومرمر تبجي