علمني كيف الحب يداوي الفصل السابع عشر 17 - بقلم Chrakirkuki

#علمني_كيف_الحب_يداوي 17

لمحات من الماضي 16

شامل : فتحت عيني كوة راسي موتني من الوجع طلعت برا الغرفة أسمع صوت حيوانات وطيور شربت مي وغسلت وجهي رجعت للغرفة وسديت الباب ماريد اشوف لانور ولاشمس الظلمة تهون عليه وجعي الغرفة اقرب بالزريبة مابيها شي غير فراش ريحته تموت وكرسي مكسور وغراض متكومة فوك بعض أتذكرت من طلعت من المستشفى بعد ماسمعت غسق ماتت راحت روحي وياها مشيت بالشوارع صعدت بسيارة ونزلت وصعدت ظليت يومين أفتر بالسيارات من كراج لكراج مادري وين وصلت من التعب شفت قرية ودخلت بيها مشيت مسافة قريبة يم بستان وكعت لحد ماصحيت على اصوات غريبة وناس وجههم غريب ماعرفهم وهمه مستغربين اكثر مني جايبين للغرفة من وكعت بالبستان واحد بيهم جان صاحب الغرفة جابولي اكل بسيط ردت اروح مقبل صاحب الغرفة عرف من شكلي عندي فلوس يمكن ضغط عليه ابقى بغرفته وهو يروح بغير مكان ينام فكرت هذا المكان الوحيد اللي راح ارتاح بي محد راح يكدر يوصلني اول يومين جنت بس أبجي وأحرك بروحي اني السبب لو مجايتني مجانت راح تموت سمع صوتي من ابجي وألوم بنفسي ثالث ليلة جابلي مشروب كلي راح يداويك اول مرة بحياتي اشرب جربته وتعلمت عليه جنت هلكد مااشرب ادوخ وانام هالأسابيع تعودت عليه من اضوج هو يجيبلي فلوسي راح تخلص مشتاق لأهلي ولغسق هسة جنا متزوجين طلعت صورتها واني ابجي عليها ليش علقتيني بيج وانتي مو اليه شلون اتحمل اعيش من غيرج بيتنا واحلامنا اشكد جنتي تحبين الحياة وأخذتج الموت من الدنيا كرهت نفسي لو اني بدالها مو احسن المفروض اني ميت مو هي اني اللي جنت واحد من المحاميين اللي يدافعون على هالوحوش قتلتج بيدي معرفت نيتهم ذبحي مجنت اساعدهم معرفت أحضرلج موتج بيدي طلعت غلطان ذولة ميعترفون لا بالعدالة ولا بالقانون غسق اني مو حبيبج اني قاتلج أكرهيني بقبرج لاتحبيني ولا تحنين عليه حتى بأحلامي متجين اشكد جنت احلم بيج واحنا سوية حتى هاي اخذتي مني أستاهل هالشي منج مو لازم اسافر لازم اعوف هالبلد قررت ارجع وأخذ جوازي واسافر .

مرمر : اباوع عليهم شلون يحددون مصيري شبعني ضرب وكتل حامد عمري متصورته يضربني جرني وذبني بالمخزن اكثر مكان أخاف منه منطقت بشي اهواية توسلت محد يصدكني كرهتهم كلهم

جبار : اربطها بالمخزن راح أذبحها اني هالكلبة تنزل راسي على أخر عمري الناس كلها طول عمري يحمدون بينا وبأخلاقنا تاليتها هالحشرة تفضحنا

فرح : اباوع على مرمر ساكته متحجي شي وحامد يربطها بالمخزن وابويه يريد يذبحها حامد لخاطري لاتخلي ابوية يكتلها والله ماتحمل تروح مني هاي باقيتلي من ريحة طلعت

حامد : فرح رجعي للبيت وماعليج بشي لا والله اربطج وياها أفتهمتي لاتدافعين على هالحقيرة ولج نار بصدري افتهمتي الحجي لو لا ولج طالعة ويا واحد ورايحة ويا بمكان لوحدهم صيحت عليها تفهمين يعني شنو ضيعت نفسها ومتريد تفضح الافندي شوفيها جم مرة سألتها وين بيتهم متقبل تحجي هو أهم عدها من شرفها ربطتها ونزعت حزامي اريد بس تكولي وين بيت النذل متنطق بشي عينها قوية

ميرا : نسيت المرض من الخوف جنت ارجف واني اسمع صوت مرمر والحجي اللي صار ماصدك يمتى لحكت تحب وشلون سوت هالشي اشكد حاولت عفرا تاخذني لغرفتي مقبلت ولا خلتني انزل ويا كل انين وصوت ضرب روحي تطلع وياها لحد ماشفت جدي صعد فوك رحت على غرفتي وصلني وقفل الباب بدون ميسأل عن شي بدا يضربني بالحزام

جبار : انتي وهي 24 ساعة سوية اكيد مسوية شي وياها ومرضج كذبة حتى تدارين على اختج الساقطة ياعار اليوم ادفنكم وارتاح من همكم ياربي ليش اخذت ابني وعفتلي هالحيوانات العرق دساس طالعات على نورجان مو اني اعلمج

عفرا : اخذت فرح للبيت بالغصب صحتها مو تمام لا اني ولا هي كدرنا على حامد وعمي خفت تصير بيها شي امي وابوية على حظنا مسافرين يم اقاربنا انتي ابقى اهنا فرح لايصير بيج شي خافي الله باللي ببطنج حرام عليج اني اروح يمهم واطلع حامد من بيتكم اوعدج

فرح : مشفتي اخوج صاير وحش عبالك مو هو حامد نفسه كرهت روحي ظنيته سندي طلع حاله حال أبويه ظالم وميخاف الله

حامد : رجعت للبيت واني اغلي من القهر سمعت فرح شلون توصفني بأبشع صورة كرهت روحي جاوبتها اشكرج فرح اني ظالم مو لأن كسرت ظهري بنت طلعت لان من عرفت السالفة عبالي اليوم خسرت طلعت راح يجي يوم وتندمين على كلامج اني مو ظالم بس كلشي الا شرف افتهمتي واحذرج بعد تتدخلين بشي يخص مرمر راح اربيها بنفسي وأبني امانة ببطنج اذا يصير بيه شي متلومين الا نفسج صبرت وتحملت بما يكفي كبرت مابيه حيل اريد اشوف ابني سمعتي لو لا ومن هاللحظة اعفيج من حياتي

عفرا : وكفت كدامه لاتكولها حامد والله احرك روحي بعدها افتهمت هي شنو ذنبها لاتقسى انت مو قاسي روح لغرفتك وارتاح اني اهتم بفرح والبنات نسيت ألمي وحزني ألتهيت اسكت فرح لو اروح اداوي ميرا اللي صايرة جسمها خريطة من الضرب ومرمر غير حامد محد يروحلها

نزار : وصلت اهلي مو موجودين نسيت اخابرهم مشتاق لأمي كلش دخلت عفرا وفرح كاعدين يحجون وفرح تبجي من شافتني كمزت لبست حجابها بالبداية جنت اضوج من حركتها بعدين من عرفتها زين عذرتها تتصرف بعفوية ضحكت حتى مااحرجها والله شفتج مو محتاجة تلبسي ولج غير شعرج يخبل ياحظك حامد

عفرا : رحت شبكته وبسته اشكد مشتاقتلك اسبوعين منشوفك وين سمر واني من داخلي فرحانة لان مجاية علمود الظروف اللي احنا بيها

فرح : جنت ابجي على حظي وعلى اللي صار ايام وحامد ميحجي ويايه ولا يقبل أشوف مرمر أني انخدعت بيه لو شنو ماتحمل تصرفاته ويايه ليش عودتني عليك وعلى اهتمامك وحبك اشكد تحاول عفرا اسكت ومااحزن ماكدر يعني اللي ببطني اهم مني هذا اللي يهمه حامد شفنا نزار دخل للصالة ردت البس حجابي خجلني حاولت اكون طبيعية وياه وهو مثل اخوية بس من اشوفه استحي وهو يحرجني بكلامه

نزار : كعدنا نسولف سمعت اللي صار مستحيل حامد هيجي يسوي أكيد اكو شي ماصدك بعدين البنات صغار مو مال هالسوالف انتظرته يرجع بس كلش تعبان من الطريق نمت محسيت بنفسي.

حامد : اخذت اكل لمرمر انتظرتها تاكل وتروح للحمام ورجعت قفلت عليها الباب طلعت لبيتناشفت سيارة نزار مجنت احب يجي واحنا بهالظروف مهما يكن مرته غريبة علينا واني احسب بنات طلعت بناتي كلش مقهور من فرح صعدت لغرفة عفرا يوميا بالليل اشوفها من تنام يالله كلبي يطمن وارجع لغرفتي وعفرا اهددها متحجيلها وهي تضحك عليه تكول بس لسان صح اني صاير كدام فرح بس لسان أشوف مكانها خالي كلبي يوجعني عليها بس لازم اعاقبها حتى تتوب ومتشك بيه وبحبي ألها واهتمامي وخوفي على بنات طلعت اني مو ظالم

ميرا : نص الليل كمت بشويش رغم جسمي كله مكسر نزلت بهدوء رحت يم المخزن تأكدت جدي نايم ناديت على مرمر جاوبيني حبيبتي انتي بخير

مرمر : سمعت صوت ميرا جاوبتها تفو عليج حيوانة اكرهج ميرا ياحقيرة اشكد جبانة ليش مدافعتي عليه حتى لاتنحرمين من المدرسة مو روحي عوفيني ويا عمتج اللي باعتني علمود زوجها

ميرا : هاي شدكولين والله موتني جبار من الضرب وحارمني انزل يمج ليش هيجي سويتي مو كلتلج ابتعدي عن هالبنية مبينة مو خوش شنو جنتي تكولين احب اتعرف على ناس وانتي باردة وانتي معقدة وهسة تعاتبيني على شنو اني شنو ذنبي

مرمر : روحي ماريد اسمع صوتج راح يزوجني جدج اللي ميخاف الله انشالله يموت واخلص منه

ميرا : ليش ساكتة ليش متدافعين على نفسج احجيلي كلشي واني احاول احجي ويا عمو حامد بلكي يلين ويسامحج

مرمر : لو يموتوني بعد لا أطلب يسامحوني ولا شي اللي شفته يكفي اني ماعندي أحد يتيمة وعار وحيدة روحي وانسيني لان نسيتج انتي مو اختي واني ابجي أكره أمي وابوية لان عافوني ويا هالظالم واكره نورجان اللي بسبب أخطائها احنا ندفع الثمن .

فرح : دخلت لغرفتي الصبح شفت حامد يبدل ويريد يروح وكفت كدامه أني مو زينة لاتروح أحس بألم راح يصير بيه شي ليش صرت قاسي ويايه

حامد : اوف اشكد جنت مشتاقلها وجتي برجليها سويت نفسي عادي مو يمها بس من كالت عندي الم خفت عليها حضنتها ومسحت على شعرها باوعي بعيوني شنو تشوفين فرح

فرح : رفعت راسي واني مو مصدكة يحضني عبالي هسة يضربني أشوف نفسي شنو يعني

حامد : خليت ايدي على بطنها يعني انتي حبيبتي وانتي داويتي جرحي يعني اعشقج

فرح : كعدت رجليه متحملني من سعادتي وهو كعد يمي يمسح على شعري وايده الثانية على بطني خليت ايدي عليه سامحني حامد من القهر ماعرف شنو كلت اني غلطانة انت مو قاسي موقف مرمر صعب اي شخص يتحمله وخصوصا واحد مثلك شهم وصاحب غيره اعترف غلطت بحقك بس مهما يكون هي بعدها طفلة لازم نوجها ونحجي وياها نعلمها الصح من الغلط مو بالضرب

حامد : الله عليج وعلى كلامج صرتي تحجين كلام حلو وموزون يجوز اني تصرفت غلط وياها لو مجنت أسوي هيجي صدكيني ابوج جان يذبحها خلي اني اكون ظالم بعينها بس المهم متموت تكون كدام عينا أني افكر بمصلحتها اكثر منج ايام واخليها تروح لغرفتها اريدها تعترف بغلطتها لحد الان راسها يابس مادري طالعة على منو واني اغمز لفرح مسمعنا منها كلمة حبيبي

عفرا : نزار مرمر حالتها مو زينة الله يخليك من الصبح متجاوبني وحامد راح اخذ فرح للمستشفى الله عليك احجي ويا عمي يفتحلنا الباب مو راضي يسمع مني واني مادري اسكت ميرا لو اهتم بمرمر

نزار : بارحة حجيت وبا حامد يكولي لاتتدخل وانتي تعرفين علاقتي بعمي صفر

عفرا : ابوس ايدك حاول علمودي حبيبي حتى لو كلك شي لاتهتم لاتموت البنية بين ايدينا

نزار : والله لو ماعلمودج ولا اروح كمت دكيت الباب ساعة يالله فتح من شافني صار وجهه ثكيل

جبار : هذا انت صارلك اشكد موجود مكلفت على نفسك تجي تزورني ولا كأنه عمك الجبير خير شتريد وجهك مو جاييني زيارة

نزار : ردت اجاوبه سمعت صياح ميرا دخلت للبيت واكفة تبجي تكول اختي ميته حاولت افتح الباب مكدرت وهو واكف وراية ميريدني اشوف شكو اهنا مسمعته كسرته شفت مرمر وجهها صاير ازرك وكله كدمات ومربوطة متتنفس فتحت الحبل وشلتها وديتها للصالة هاي لو اخذها للمستشفى اكيد ندخل بسين وجيم حاولت اصحيها انطيتها مي ورشيت على وجهها خليتها تشم عطر ميرا هاج مفتاح سيارتي بيها جهاز ضغط وعلبة اسعافات اولية جيبيها بسرعة

جبار : اني صارلي ساعة ويا من احجي مالك دخل بيها عوفها وروح لاتتدخل

نزار : االه واكبر عليك البنية تموت هاي من لحمك ودمك متخاف الله عليها هاليتيمة شنو من بشر انت قست ضغطها

جبار : وانتي ليش واكفة حيوانة حسابج بعدين دخلي غرفتج اياني واياج أشوفج نازلة لو اسمع صوتج تفو عليج من وراج دخل هالاشكال لبيتنا

نزار : بدت تصحى شوية شوية ضغطها نازل يمكن مماكلة شي انقهرت عليها طفلة تعيش بهالمعاناة واني متحسر على طفل والله مينطيني

جبار : كوم خلص صحت رجعها للمخزن

نزار :شنو تكول راح تموت حرام عليك تحتاج تغذية وتهوية بديت انظف جروحها واخليلها ملصق وشاش وهو يتأفف ويلعن الشيطان على راسي وهو أسوء من الشيطان نفسه

جبار : ماعليك راح ازوجها واخلص منها روح لبيتكم أعرف مصلح سيارات ماعنده احد يتيم انطيه اله

نزار : عرفت منو يقصد اكبر من طلعت الرجال محد ينطيله مرة لان ماعنده اصل هزيت راسي خلي ابوية يرجع ونشوف شلون تزوجها من كيفك

جبار : زين مادامك رجال وتهدد ليش متاخذها وتخلصني منها وهم تخلفلك بدل مرتك العاقر والا هسة زوجتها لذاك الرجال

نزار : اباوع عليها ماعرف شسوي شنو اتزوجها وهي بعدها طفلة فكرت اخذها عندي مدة لحد مايهدون شوية اتذكرت طلعت اشكد جان شهم وزين ويانا واشكد جان يحبني خلاص اني اخذها يمي وماعليك بيها اربيها مثل بنتي

جبار : شنو تاخذها هيجي ماكو كوم اطلع تتزوجها اي تاخذها مثل بنتك لا طبعا شايفني ابو قرون

نزار : رجعت لبيتنا واني حسبة تجيبني وحسبة توديني عفرا سألتني الف مرة مكدرت اكوللها شي بقيت طول اليوم افكر وصورتها وهي عبالك ميتة متروح من بالي

حامد :واكف على اعصابي ومنهار فرح تخربطت وجبتها على المستشفى صحتها مو زينة اليوم لازم تبات واني وحدي عفرا متكدر تجي علمود البنات خابرت اهلي راح يرجعون باجر الدكتورة طلعت

الدكتورة : لازم عملية هسه وضع الاطفال مو تمام رجاء روح وقع على الاوراق واحنا راح ندخلها للعمليات

نزار :رجليه ودتني يم بيت عمي بالليل حجيت وياه اهواية حاولت أخذها من غير زواج مقبل وافقت بس بشرط محد يعرف غيري وغيره الصبح رحنا يم سيد اني وياه وصارت زوجتي حسيت براحة اني اصلا اعتبرها مثل بنتي وراح اهتم بيها رحت على مدرستها سحبت اوراقها وزرت حامد بالمستشفى ويا عفرا

حامد : بعدني مو مصدك صرت اب ولدين فرح بعد العملية صحتها مو زينة كلش تعبت توم وصار ولادتها بشهرها السابع بقيت على راسها طول الليل حتى مشفت جهالي من خوفي عليها صبح شفناهم سوية

فرح : حامد أني هسة أحس اسمي يلوكلي من السعادة اللي اني بيها الله لايحرمني منك اشكد حلوين الله عليك خليهم بحضني اوف ريحتهم اشكد حلوة

حامد : هسة عفرا ونزار يجون كل دقيقة يطلبوني بالاستعلامات يخابروني يردون يجون واني مقبلت حتى تكومين وترتاحين شوية انتي من دخلتي لحياتي جبتي الفرحة وياج جنت شايل هم زواجي منج ردت غيرج بس الله جان يحبني خلاج اليه ومن قسمتي اشكر ابوج على هالدكة من نرجع ابوس رجله مو ايده

فرح : اني دكة زين حامد راح ارجع انام يم عفرا واحرمك مني الله اني صرت دكة واني هم وياك ابوس رجله ههههه لان غصبني عليك 😍