علمني كيف الحب يداوي الفصل الخامس 5 - بقلم Chrakirkuki

علمني_كيف_الحب_يداوي 5

عامر : مو أني حتى لو أحلفلك ادري بيك مراح تصدكني دايما اني الغلطان وحسن أحسن مني

أبو حسن :صدك متستحي فوك مكسراتك تحجي على أخوك الكبير ولك ليش هيجي راح تجلطني يوميا مشتكين عليك لو بالمدرسة لو بالمنطقة يمتى اني ارتاح من هالعيشة ترى كرهت روحي من وراك

عامر : والله حسن كسر الجامة مالت السيارة شفنا عصفور ذبينا حجارة وكعت على السيارة

أبو حسن : سمعتي ام حسن حتى لاتكوليلي تفرق بين عيالك يكول ذبينا يعني هو بالسالفة أني اعرف سوالفه لو بيك خير تنجح مثل أخوك وتجيب درجات عالية مو نجاح على الحافة

عامر : ميفيد الحجي وياك عصبت منه دخلت لغرفتي حسن كاعد ومنصي راسه يحس بالذنب بس ادري بيه جبان واناني ميريد يشوهه صورته يم أبويه باوعتله بغضب ليش هيجي تسوي ويايه ماريد اكرههك انت اخويه الكبير

حسن : سامحني تدري مو قصدي أذيك بس أخاف من بابا

عامر : تخاف لو متريد تنزل من عينه دايما تغلط وتذبه براسي وتطلع من الموضوع المفروض انت اخويه الكبير وتحميني من كلشي مو العكس بس والله راح يجي يوم وتندمون كلكم بيها راح اثبتلكم اني شنو .

حسن : لازم اني أبين الولد المطيع والحباب والشاطر حتى لو جان على حساب اخويه اني اعرف ابويه يفرق بيناتنا واني احب عامر بس هو احسن مني ماريد يكون احسن اريد نفسي وبس عندي هالطبع دايما اسوي شغلات مو زينة ويوكع على راس عامر وابويه يهينه ويحجي عليه وهو مرات يجاوب مرات يسكت.

طلعت : مااعرف شلون أفرح أمي واختي الناس ظاهريا شايفيني مرتاح وعندي فلوس عبالهم متونس وعايش حياتي ميعرفون محسيت بطعم الفرح والراحة بحياتي أشكد احاول ويا ابويه يتغير ميفيد بيه طبعه صعب ويا العالم ماكو أحسن منه رجال صايم ويصلي وكل سنة يروح للحج لو للعمرة وميقصر ويا الفقراء بس كدام أمي واختي غير شخصية أبد مو زين غير الضرب والأهانات هالفترة كله يزن براسي يريدني اتزوج واني اشوف نفسي بعدني صغير وافكر بالموضوع

أمل : ألتهيت بدراستي حاولت قدر الامكان مااحتك بشامل وامجد أستحي اشوفهم وجهي وجسمي كله علامات ضرب أمي تشك بيا وتكول تسوين اغراءات لرضا ومتستحين انواع الاهانات والغلط اهواية شامل يجي يسأل عليه ماأطلعله اوصي اخواني من يجي يصرفوه ويكولوله مو موجودة لو نايمه أدري بيه خايف عليه بس يشوف شكلي يعرف حتى نقلت نفسي ورجعت لمدرستي القديمة علمود دعاء متكون ويايه وتنقل اللي يصير بيه .جنت كاعدة انظف سمعت صوت شامل وهو معصب ويصيح على اخويه يريد يشوفني وهو يكوله مو موجودة جريت حسرة وكلت هسة راح يروح ويمل لحظات وصار على راسي باوعت عليه بخوف هسة لو رضا يرجع يكول مدخلته للبيت وميصدك يسويلي سالفة

شامل : صار فترة امل ماكو اروح للكلية بالي يمها حتى خواتي واهلي مفتقديها كلما اروح اخوانها يكولون مو موجودة واني اعرف جذب ماعدها احد تزوره غيرنا وطلعة للسوك والاوقات اللي اروح بيها مو وكت طلعة بس اليوم قررت الا اشوفها واعرف شنو سالفتها حجيت ويا اخوانها كل واحد يكول حجي دفعتهم من الباب ودخلت لبيتهم شفتها تنظف شافتني كمزت بس ردت ارزلها شفت وجهها وايدها مو مال واحد يرزل بيها كتلها بدلي انتظرج كدام الباب بعصبية حجيت وياها

امل : شامل ماكدر روح وعوفني خليني بهمي ماريد تتأذى بسببي

شامل : من كل عقلج اروح واعوفج بعد ماشفت وجهج منو احجيلي رضا مو

أمل : اي اي واني ابجي وماخذة راحتي لان امي راحت توصل طلبية خبز ورضا ماعرف وين فلتان كعدت واني انتحب شامل هذا واحد مجرم وكلاوجي انت مو من مستواه وأهلك والله استحي منكم يوم طلباتنا يوم مشاكلنا روح وانساني انسى امل

شامل : مجاوبتها بس نار بصدري طلعت لبيتنا واني بالي شي شفت ابويه بالحديقة يرتبها سلمت باوعلي

أبو شامل : وعليكم السلام خليت اللي بأيدي وجريت الكرسي وكعدت حتى هو هم يكعد مبين بعيونه عنده موضوع ها حبيبي اشوفك رجعت من وكت خير

شامل : حجيتله على اللي شفته ببيت أمل

ابو شامل : لا حول ولا قوة الا بالله ياحيف على الرجال اللي مات وهو يدافع عن الوطن وبنته متمرمطة بيد هذا السرسري اني من عرفت امها متزوجة رضا تنبأت بالمصايب اللي يشوفوها من وراه بس متصورت لهالحد

شامل : بابا اني قررت أجيب حقها منه ماكدر اسكت بعد اللي شفته حتى ضميري ميرتاح

ابو شامل : ماكدر امنعك لان هي اختك وأحنا كلنا نحبها الله يشهد عليه لو امها تقبل اجيبها لبيتنا وأخليها بعيوني ابني اعرف راح تسوي اللي براسك بس نصيحة مني رجال عسكري سابق عندي خبرة بالدنيا اكثر منك مو قصدي اقلل من قيمتك بس ديربالك على نفسك والله يحمينا ويحمي هاليتيمة من هيجي واحد

شامل : بابا كل مااكعد وياك تصدمني عبالك ساحر دايما تقرا افكاري ياريت عندي ربع نبهاتك وذكاءك

ابو شامل : ههههههه ابني هاي كلها من دروس الحياة بعدك باول خطواتك راح يجي يوم وتصير احسن مني شوف الحديقة ضفت عليها اضاءات جديدة علمودك

شامل : عاشت ايدك واني اكول اكو شي متغير كلش احب النور والأضاءة سويتها مثل ماردت صحت ماما وين الجاي والكيك دعاء نور تعالو

نورجان : اليوم مدينة عزمتني اروح وياها على حفلة مولد كرايبهم اول مرة ادخل بيت ناس مااعرفهم رحت حتى فرح تتونس شفت بنية تشبه أختي ملامحها وجهه الحزين الخالي من السعادة جانت تضيفنا تجيب وتشيل سألت عليها مدينة عرفت هي يتيمة وعايشة بيت عمها كلش انقهرت عليها وحبيتها لو مالعيب جنت أحضنها كدام النسوان بس خفت لاتفشلني طول ماكاعدين بالي عيوني عليها رجعت للبيت طول الطريق اخذ معلومات من مدينة جبار جان رايح للحج ويا اخوه كل سنة يطلع للعمرة ولا مرة اخذني وياه جنت صافنة دخل طلعت يبوس راسي

طلعت : شبيها الحلوة زعلانة عبالي فرحانة قبل ماادخل شفت فرح متونسة صار شي

لا حبيبي ماكو لاتشيل هم هسة انام وارتاح

تخبين عليه ماما أعرفج اكثر من نفسج

مادري طلعت حجيتله على سالفة البنية كلش مقهورة ذكرتني بنفسي من تزوجت أبوك شفته يفكر ومجاوبني رحت نمت الصبح كمت خيال هالبنية تروح وتجي كدامي حتى حلمت بيها تريدني اساعدها شلون اساعدها واني حالتي حالة فزيت على صوت فرح وطلعت وهمه داخلين عليه للمطبخ

ماما صارلي ساعة أكولج سويلي لفة تأخرت على المدرسة متسمعيني

هسة حبيبتي ايدي كامت ترجف شفت طلعت تقرب مني وكعدني على الكرسي

لاتعبين نفسج أحنا نحضر الفطور اليوم مو فروحتي

يالله خلي نسوي بس تاخذني بسيارتك للمدرسة اخاف اتاخر .

ودعتهم رحت اكمل شغلي مصارت نص ساعة وطلعت رجع سمعت صوته يصيحني ماما

ماما البنية حلوة مثلج لو لا

يابنية تقصد ولك طلعت خفت منه

اللي حجيتي عليها البارحة اليتيمة

أشذكرك بيها

ماما اذا هي مثلج وبأخلاقج اني مستعد اتزوجها

لا طلعت بعدك صغير وبعدين أختار شريكة حياتك بنفسك بداخلي فرحت بس خفت بنفس الوكت لا يتزوجها علمودي ومن ياخذها يسوي بيها مثل ماسوى جبار بيه

ماما اني واثق بيج وبأختيارج توكلي ولاتخافين اخليها بعيني اني طلعت تربيتج مو جبار

شبيه ابوك ليش هيجي تكول

ماما اني اعرف ابويه مو زين وياج ودايما يهينج ويضربج بسبب الماضي

وكعت وعيوني تدمع اللي جنت خايفة منه ابني يعرفه

رفعي راسج ماما اني افتخر بيج صح انتي غلطتي بس دفعتي ثمنها تحملتي اللي مايتحمله بشر ابد لاتنزلين راسج باوعيلي ولاتبجين شيلي راسج مرفوع انتي ام طلعت وفرح

كلش فرحت وارتاحيت ياربي أخذت سعادتي وراحتي من تزوجت جبار وانطيتني أغلى جوهرتين طلعت وفرح مرت الايام وتزوج طلعت فرحتي أضعاف رغم جبار مجان راضي ومو مقتنع بس ميكدر يكول لا لطلعت.

شامل : بعد فترة راقبت رضا وشفته يطلع من خرابه بيت مشبوه جنا اني وامجد اهواية حاول ويايه ماادخل مسمعته لاتنزل من السيارة اريد أخذ راحتي وياه تقربت منه تعال ياحيوان

رضا : جنت اغني ومتونس احس نفسي فوك الغيم سمعت صوت باوعت شاب طويل وحلو اني شايفته بس ماعرف منو هو هسة حسيت ضربات وركلات عليه واني هلكد ماسكران ماكدر اكوم وكعت وبجيت توسلت بيه يعوفني اكثر شي جان يضرب بوجهي حسيت دم ينزل مني زاني اتوسل يعوفني لو جان الصبح أكدر ادافع على نفسي هسة شورطني وشربت لهالحد من الألم محسيت شلون يجر بيه وركبني سيارة

أمجد : شفت شامل شلون يضرب رضا متصورته هيجي شايل بكلبه عليه شوية ويموته كوة طلعته من بين ايده شلنا وخلينا بالسيارة باوعت عليه ارتاحيت راح تودي نفسك بمصيبة فرضا مات جوا ايدك شتسوي

شامل : أمشي وشغل السيارة وانت ساكت ماعاش اللي يضرب أختي أفتهمت منو ماجان وهذا الحقير بعدني باول خطوة مجرد كرصة اذن بس خلي يسويها مرة ثانية شوف شسوي بيه ودينا يم باب بيتهم فتحت الباب وجريته وذبيته بالحوش لان نص الليل اكيد نايمين محبيت انطيهم خبر ردته من يكوم يشوف نفسه متممد بالكاع .

امجد : والله كوة لازم نفسي عليك افكار مصيبة مو شامل هسة نروح لبيتنا وعدتني تنام يمي اليوم ولو اتصور أمي راح ترزلنا ويمكن ننام مثل رضا بالحوش دعواتك ويايه تكون الوالدة نايمة .

شامل : والله اذا امك تطلعنا من بيتكم راح ارجع على رضا اكمل عليه واذبه براسك هههههه.

أمل : صبح كمت حضرت الفطور شفت امي بغرفتها كاعدة وصافنة والأفندي يمكن مجاي على البيت محجيت شي شلون احجي هي تطلع قهرها بيه طلعت برا شفت رضا نايم بالكاع أكيد سكران تقربت منه وجهه ميبين من الدم ويون صوته ميطلع تقربت اكثر ضربته بحذائي

رضا : صيحي امج لا أكوم أدفنج هسة

امل : ههههه منو مسوي بيك هيجي عاشت ايده على صوتنا أمي طلعت بس شافته بدت تلطم وتضرب بنفسها

أم امل : هاي شنو حبيبي شصاير بيك منو مسوي بيك هيجي تعالي حيوانة أسنديه ويايه خلينا ندخله جوا

امل : دخلنا واني ماكدر اسيطر على نفسي من الضحك اني اروح تاخرت على المدرسة

أم امل : صدك متستحين تروحين للمدرسة وتعوفينا واحنا بهالظروف بدل ماتموتين نفسج من اللطم مو هذا اللي كبرج ورباج

امل : بس كافي شنو كبرني هذا الحرامي اللي عايش بفلوسي وتعبج

رضا : خليها حبيبتي الله على الظالم هاي ناكرة معروف اخ اخ رجليه راسي كله منها هي السبب ياما حذرتج ديريبالج عليها هاي بنية

أم امل : شتكول ماافهم شعليها هيه بسالفتك منو مسوي بيك هيجي

رضا : حبيب الكلب اللي تونسه بنتج على حسابي لان نصحتها رايحة مشتكية عليه يم شامل مااعرف شنو حاجيتله البذاته هاي اخرتها

ام امل : روحي جيبي علايتي خلي اشوف ام شامل واشتكيلها من ابنها قابل الدنيا سايبة حبيبي واجيبلك دجاجة اسويها شوربة حتى توكف على رجلك حسبي الله على الظالم واني اباوع على امل

أمل : اوكفي لاتروحين لبيت الناس اللي دايما يساعدونه عيب منو يكول شامل يمكن رجلج يتبلى عليه تعرفينه أكبر جذاب يمتى جان يحجي صدك واني بداخلي فرحانة عندي اخ مثل شامل اكدر اعتمد عليه

رضا : مااكولج متفيد شي وياهم لاعب بعقل بنتج لعب شرفنا راح يضيع طول عمرنا راسنا مرفوع من ورا بنتج لازم انزل راسي واني امشي بين الناس ياربي ليش هيجي هذا جزاتي جنتي باللفة وربيتج وكبرتج ومقصرت بشي وياج راح يجي يوم وتندمين بس اوكف على رجلي شوفي شسوي بشامل راح ادوسه مثل الحشرة

امل : كملت تمثيليتك أسمعني اني مكلتله حاولت تتحرش بيا بس شاف وجهي هيجي سوا بيك لو يدري بسوالفك التعبانة مراح يرحمك متأكدة وبعدين شلون ربيتني على الشرب لو التحرش لو الحجي الوسخ ياهو بيهم تقصده حتى اشكرك عليه

ام امل : روحي ولي للمدرسة راح تموتين الرجال من ورا سوالفج الله النا احنا روحي ماريد وكفتج ويايه ياحيف تعبي وشبابي اللي ضيعتها عليج لو جنت مثل الامهات اللي يتزوجون ويشمرون جهالهم على اهلهم جنتي هسة تتمنيني مو تحجين عليه الله لايوفقج من بنية عديمة التربية.