علمني كيف الحب يداوي الفصل السادس 6 - بقلم Chrakirkuki

#علمني_كيف_الحب_يداوي 6

نورجان : صارلي فترة وضعي مخربط الليل كله أفز واحلامي كلها كوابيس والصبح كوة اتحرك وأشتغل مشتاقة كلش لأهلي المكان اللي انولدت بيه رغم انشغالي بعرس طلعت وتحضيراتنا بس اجبر نفسي وابتسم من اشوف فرح تقيس فساتينها اللي مشتريته على ذوقها فرحانة لان طلعت اخذها ويا خطيبته ومشتريلهم غراض .

فرح : ماما واني احضن بيها اشوف وضعها مو زين هالفترة شبيج مريضة ليش تبجين

نورجان : ماكو شي حبيبتي رجعي نامي تونستي اليوم

فرح : كلش ماما أميرة كلش حبابة حتى وعدتني نصير خوات احس بيتنا راح يتغير متشوقة هالاسبوع يخلص وتجي لبيتنا

نوورجان : انشالله تجي وتصيرون خوات متأكدة هي كلبها طيب وحبابة الله يوفقها ويا اخوج سويت نفسي نايمة حتى فرح متخاف وتتوتر بقت تحجي على راسي واني مغمضة عيوني احس راح أصحى على كابوس

طلعت : نزلت على صوت صياح أبويه شكو بابا معصب شنو صاير

جبار : ليش تسألني روح اسال امك بنت الشوارع اللي متستحي تروح تطلب من اخويه يدور على اهلها

طلعت : شنو اهلها مافتهم شي شنو الموضوع انداريت امي جتي واكفة ورايه ابوية راد يضربها لزمت ايده كافي ضرب خلي افتهم شنو السالفة

نورجان : كل الشتايم بجهة منتظرة النتيجة ابو حامد يمكن شايف اهلي ويمكن حاجي وياهم كومة اشياء بداخلي انتظره يكولي اللي اتمنى اسمعها من زمان اهلج ينتظروج ومسامحينج

جبار : هاي ثقتي بيج تغدرين بيا مااستحيتي تحجين ويا اخويا بهالموضوع ليش ماأستأذنتي مني قبل ولج صار سنين اربيج ولا فاد بيج ابشرج اهلج ماكو بعد ماوطيتي راسهم رايحين ومحد يعرف وينهم ارتاحي ياعار

نورجان : مكدرت انطق من الصدمة رجعت لغرفة فرح توسلت بيها تعوفني وحدي وسديت الباب واني الطم وادك براسي على الحايط ماحس بشي كلشي صار اسود الخبر اللي انتظرته ياريتني ماسمعته اسمع صوت طلعت وهو يريدني افتح الباب وفرح تبجي زاد الأصوات صار اكثر من صوتين نمت وكعت ماعرف

فرح : رحت على خاله مدينة جبار يركض ورايه يريد يوكفني واني دخلت لبيت عمي جانو كاعدين يفطرون راد يجرني وهو يحجي عليه كلهم كامو مخروعين واني اصيح خاله لحكي امي راح تموت كوة طلعني عمي بين ايدين ابويه

أبو حامد : أستهدي بالله يااخويه شبيك ويا الطفلة روحي ام حامد شوفي الجماعة تعالي عفرا بابا اخذي فرح لغرفتج ولعبو لزمت ايد اخويه وهو من عصبيته شوية وينفجر

جبار : وخر لاتلزمني خلي اربيها ولك هاي عينها قوية طالعة لامها راح تجيبلي العار

ابو حامد :حرام عليك والله حرام متخاف من الله سنين وانت تعذب بهالمسكينة ام طلعت يعني كفرت الصبح واحنا نصلي بالجامع كتلك واسيها واعتذرلي منها لان اهلها ماكو جنت أكدر اكولها الها بنفسي بس ردتك توكف وياها ترى غلطتك انت اكبر كل اللي صار صوجك هي جانت مراهقة بس انت جنت رجال جبير خدعتها

جبار : لاتنسى نفسك أني اخوك الجبير وبعدين لو ماهي سهلة مجانت تجي ويايه انت مجنت تعرفها حركاتها ونظراتها مو مال مراهقة

ابو حامد: اخويه على عيني وراسي بس اشوفك تظلم لا والله مااسكتلك وبعدين ليش تحجي على بنتك وتكوللها العار يعني الصوج بيك مو بيها لوما كذبت على نورجان المسكينة وهمتها طالبها من ابوها وهو مو موافق مجانت تقبل تهرب وياك المفروض تعبدها مو بس تحبها وتقدرها النبي (ص) وصانا رفقا بالقوارير منو انت تجي تكسر بيها وتأذيها خاف الله

جبار : يعني اني ماخاف الله تعال شوف شلون عايشة احسن من عدكم بدل بيت عدنا بيوت وسيارات وعمارة والذهب كومة زوجتك شنو عدها ماكو ابنك شنو عنده مجرد بيت واحد وسيارة وعايشين على كدكم

ابو حامد : ميفيد وياك الحجي والارزاق على الله الحمدلله مو محتاجين بس عايشين بنعمة ومقتنعين لا اضرب مرتي كدام جهالي ولا أقلل من قيمة بنتي ترى الكسر مينجبر بالفلوس عن اذنك اشوف اشصار على ام طلعت

مدينة : طلعت عفية اكسر الباب صوتها مبقى مااسمع شي

طلعت : تعبت اترجى امي تفتح الباب كسرناها اني وحامد شفت امي واكعة ودم على راسها ينزل

مدينة : وخرو اشوف لا ياربي ولج نورجان شمسوية بنفسج غطيتها بعباية وديناها على المستشفى

طلعت : ماما اصحي اموت من بعدج والله لو يصير بيج شي راح اكتل نفسي اذا مو لخاطري لخاطر فرح مجنت اكدر اسوق واني بهالحالة حامد ساق بدالي وصلنا للمستشفى واني بحالة خوف ورعب .

عفرا : كافي حبيبتي ماكو شي هسة خالة تجي لهنا وناكل سوية ونظل نلعب اني وانتي ونطلع دفتر رسومات واكول لنزار يلعب ويانا

فرح : عفرا مشفتي امي شكلها يخوف جان دخلت للغرفة وطلعتني منها اول مرة ماما متنطيني وجه هالفترة كولها هي بس تفز من تنام

نزار : شفت خالة نورجان أنقهرت عليها كلش خطية رجعت لبيتنا واني اسمع عفرا تهدي بفرح وهي تبجي خطية متعرف اخذو امها على المستشفى شلت الفطور ونظفت الطاولة جبت صينية وخليت بيها بسكت وعصير يمكن خطية مماكلة شي وديتها لغرفة عفرا واني أسوي حركات مضحكة بوجهي تعالو شوفو شنو سويتلكم اطيب فطور مسحت على شعرها الله شكد حلو شعرج فرح احلى من عفرا ام الكفشة

فرح : خفت من تقرب يمي كتله وخر ميصير انت مو اخويه

عفرا : شبيج فرح احنا كلنا اخوان ماكو فرق بعدين نزار حاب يفرحج حتى يحجي عليه ويمدح بيج بعد شتردين

نزار : استغربت منها بس محبيت اكبر السالفة طول ماكاعدين نحجي اني وعفرا ونضحك وياها هي متتجاوب ويانا بقيت شوية وعفتهم على راحتهم .

طلعت : الحمدالله لحكنا على امي لو جنا متاخرين جنت تروح بيها طلعنها بعد ماخيطو جرحها بس متحجي شي صامته اشكد حاولنا وياها ميفيد جنت شايل هم من نرجع للبيت شراح تصير بيها اذا شافت ابويه الحمدالله مجان موجود خليناها بالفراش طلعت اجيب عشا من برا وصيت أم حامد تبقى يمها .

مدينة : حبيبتي جاوبي واذكري الله طمنينه عليج خطية طلعت شوية وكلبه يوكف خايف عليج تحملي واوكفي على رجلج علمود جهالج ياما شفتي وتحملتي خليج قوية

نورجان : جاوبتها راح القوة راح التحمل كلشي عنده نهاية وهاي نهايتي يمكن لو ميته من زمان جهالي جانو عايشين احسن من هالعيشة شفت فرح وهي تبجي

فرح : اول مرة ابقى بيت عمي وحدي طول اليوم عمي مجان يقبل ارجع لبيتنا لحد الليل اجى طلعت ورجعت وياه عفته بالمطبخ جان جايب عشا وصعدت لغرفتي اني وامي شفت راسها ملفوف وتحجي وياخاله مدينه عن الموت ماما تردين تعوفيني اني احبج حرام عليج الله يخليج شتريدين اسويه بس لاتعوفيني راح اتغير اوعدج مراح احبس نفسي راح اساعدج بشغل البيت كلشي تردينه اسوي بس لاتعوفيني.

طلعت : صار عرسي وتزوجت زوجتي كلش فقيرة ومؤدبة متصورتها بهالشكل تعتبر امي مثل امها لان هي هم يتيمة كلش حبتها لامي وفرح صار عدها أخت جنت اشكر ربي دايما الله وفقني وصارت من قسمتي اول شهر حملت بعد المأساة اللي عشناها الفترة السابقة بحمل اميرة رجعت الفرح لبيتنا وأولهم ابويه اكثر شخص فرحان .

أمل :رجعت من المدرسة جنت ابدل اسمع صوت رضا يطلب من امي تروح تداين من ناس فلوس حتى يبدل سيارته بحجة تعبانة وميكدر يشتغل بيه وهو كل شغله يوصل بيها بنات الليل حسب ماسمعته من شامل حضرت غراضي وطلعت باوعتلهم سكتو

أم امل : وين رايحة من هسة غير تنظفين البيت وتغسلين اخوانج روحي بالليل عمج راح يوصلج بعد وكت

رضا : اي بنتي اني اوصلج بنفسي يم شامل وأغمزلها حتى لو تردون تروحون مشوار اوصلكم بعيني

امل : باوعت على امي اريدها تجاوبه وتكوله شي بس كالعادة تلهي نفسها كأنه مسامعة شي من اللي يكوله هالحقير اني رايحة هسة وجهال رضا خلي هو يهتم بيهم عفتهم ورايا يحجون ويسبوني براحتهم دخلت للبيت واني اشوفهم ينتظروني وبعدهم مماكلين جانت تسوى الدنيا عندي وانسى نفسي واني انتقل من حضنهم ويبوسوني يرحبون بيه .

أمجد: دايما تتأخرين متت من الجوع اشكد حاولت ويا خاله مقبلت كالت تجي القردة امل يالله تاكلون

امل : صدك ماما كلتي عليه قردة 😢

دهاء : غبية يداهرج حتى متاكلين وهو يخلص ماعونج ابو بطن هذا ميطبخون بالبيت خطية كله من المطاعم

امجد: لاتذكريني دعاء الله يخليج بارحة وصتني امي اجيبلهم من المطعم علمود اختها والشمبانزي اللي وياها حتى لفة فلافل خسارة بيهم وطول مااكل وحدة بيهم تضحكلي انسدت نفسي بقيت بدون غدا والعشا نفس الشي وبالليل ابويه خابرني جان بالمستشفى بشرني صار عندي أخت
وهسة صارو 6 الله يعني

أم شامل وابو شامل : الله يحفظها ألكم

شامل : ياربي لو منك اهج لغير قارة اني 3 وروحي طافرة منهم أشرت على امل ودعاء ونور لعد لو مكانك يمكن أنتحر .😜

امل ودعاء سوية هجوم على شامل 👊👊👊👊

أم شامل : ههههه تستاهل اكو احلى من البنات وخصوصا هالحلوات الله يديم هاللمة الحلوة ويخليكم اليه وأشوفكم عرسان شامل وأمجد

أمجد: الله يسمعها منج ياخالة كثري هالدعوة الحلوة

شامل : الله ياخذك انشالله على شنو مستعجل غير تتخرج اول شي شبيك عبالك مو مصدك لو مشايف

امجد : لخاطر ربك اسكت وين شايف بنات الكلية كلهم صايرين خواتي من وراك الله وكيلك عمي حتى النظرة مستخسرها عليه يكولي عيب عندك خوات دايما يذكرني بمصيبتي وبالمحل ابويه واكف على راسي عيني مااشيلها لعد مو حقي اريد اتزوج وافضها كافي مذلة

شامل : مو امك محددتلك بنات خواتها وبنات اخوانها بعد شتريد أكثر من هالنعمة

أمجد : ياريتني متزقنب بالبيت ولا اسمع سوالفك الغثيثة عاشت ايدج خالة اروح اشوف ابويه ومنا ارجع للبيت بلكي القرودة رايحين ..

دعاء : يالله امل كعدي واحجيلي شنو اكو تطورات هالاسبوع بس قبلها سمعي النكتة بارحة جاين عليه خطابة امي من راحو ضلت تبجي ومو راضية تسكت واحنا منعرف شنو الموضوع لحد مافكت بالليل وحجتلي متت من الضحك كتلها وليش تبجين تكولي خايفة صدك تتزوجين وتعوفيني

امل : ههههههه واي بطني فدوة ماما اشكد حنونة اكولج منين اجاج الخاطب لايكون تعرفينه ومخبيه عليه اطلع عينج والله

دعاء : منحرفة جوارينه تعرف امي وزمان جانت تخيط عدها وابنها اصلا مو اهنا بغير محافظة مهندس يعني اكبر مني

امل : لا منريد مادام محافظات نشوفلج غير واحدقريب علينا حتى اكعد على كلبكم يوميا ههههههه

عامر : حسن اني قررت اسافر للخارج مااريد ابقى اهنا يوميه عركة ويا بابا كرهت نفسي بس يكولي فاشل

حسن : لاتروح وتعوفني ترى كوة متحمل نفسي اني ماحب العسكرية وهو غاصبني عليه والله يلوكلك اكثر جنت اتمنى اصير دكتور بس هو مجان يقبل بوقتها ورضيت حتى ماكسر كلبه المهم يتفاخر كدام الناس هذا الضابط أبني

عامر : الله يحفظك واشوفك احلى ضابط ولو ميلوكلك تقربت على المراية واني اغمزله يلوكلي اكثر بس محبيت افشلك واقدم وياك لان تعرفني جمالي وهيبتي لاتقاوم

حسن : يابه لو مااني جاي قبلكم جنتو متطلعون حلوين راح أقنع بابا ينطيك فلوس وتسافر بيها

هناء : وينكم نريد نطلع يالله احنا حاضرين بيت خالو هم جايين راح أصعد وياهم علمود اكون ويا البنات كافي اشوف وجهكم بالبيت وهم بالطلعة راح تنسد نفسي من وراكم

عامر وحسن 😨😨😠😠😠😠

ملاحظة ( بعض الاسماء متعرفنا عليها غير بالحوار لان دورهم قليل بالرواية)

طلعت : بعد شهور صار عندي بنات أثنين توأم وحدة سمتها امي مرمر على اسم امها والثانية فرح سمتها ميرا كلش فرحان بيهم حياتي صار بيه طعم وزوجتي يوم عن يوم انبهر بيها وباخلاقها وطيبتها رغم تسمع حجي تغث من
ابوية وخصوصا بعد ماصار عدنا بنات اثنين وهو ميحب البنات بس دايما تبتسم وتغلس ابد متضوج

جبار : عاجبك سوالف امك كوللها ترجع لغرفتنا عيب عليها كدام اللي يسوى والمايسوى تنام يم بنتها

طلعت : ابوية ندمان ويريد امي ترجعله مثل قبل بس يستحي وميعترف بحاجته الها جاوبته ببرود ماكو احد غريب بالبيت خليها مثل ماتحب
مو هيجي احسن 😄

جبار : من تزوجت وخلفت بنات غسلت ايدي منك صوجي احجي لواحد زعطوط مثلك

طلعت : ههههه

نورجان : يمه فديت الحلوات مرمر كلش احبها مو مسالة افرق بيناتهم بس لان شايلة اسم امي واثنيناتهم يشبهوني ملتهية وياهم ناسية جبار اصلا وجوده وعدمه نفس الشي أميرة وفرح عليهم تنظيف وترتيب واني عليه الطبخ وغسل ملابس جبار ها حبيبي شبيك تضحك ضحكني وياك

طلعت: ماما ابويه مشتاقلج حني عليه خطية يمكن كبر وصار باردة الغرفة من دونج

نورجان : نعم شنو هالحجي جبار يشتاق ماصدك حتى لو

طلعت : ماما لخاطري خلي ننسى الفات ونعيش براحة مناقصنا شي ترى احنا احسن من غيرنا

اميرة : اي ماما خطية عمي رجال جبير وفرح كبرت خلي تاخذ راحتها

نورجان : ياطيبتج يابنتي مخيبتي ضني من اختاريتج الله يحميج ويحفظلج زوجج وبناتج جبار اللي من اليوم دخلتي بيه بيتنا مسمعج غير حجي يسم البدن وانتي هيجي تكولين يابختك ياجبار الله انطاك هالعائلة اللي متستاهلها امري لله راح ارجع يمه وانشوف اخرته وياه

شامل : امجد خلي نروح نرجع امل من المدرسة حتى ناخذها ويانه لبيتنا فد مرة

امجد : لا حول هم العزومة بيها امل يمتى اخذ راحتي وياك عبالك نازلة عليه ضرة

شامل : ههههههه خوش ضراير واني اعمى حتى اتزوجكم اتخيلك بنية نفسي تلعب يالله خلي انزل واصيحها يامرتي

منار :شفت واحد كلش حلو يحجي ويا امل هاي الوحيدة اللي ابادل وياها السوالف كل همي دراستي وماحب احجي ويا اي وحدة مجرد سلام احسهم مو من مستواية رغم مااحبها لان حالتهم تعبانة بس احسن من لاشيء شفتها رجعت تاخذ جنطتها وكفت كدامها منو هذا امل

امل : هذا شامل اخويه

منار : لعد ليش معزمتيني مرة لبيتكم حتى نتعرف اكثر مو انتي صديقتي الوحيدة بالشعبة

امل : ترى هذا اخوية بالرضاعة واذا مصرة تجين لبيتنا بابنا مفتوح الج ورضا بالخدمة باي طلعت واني اضحك عليها منار المغرورة بنت الدكتور اللي شايفه نفسها فوك الجميع شافت شامل تخبلت هههههه

أمجد : صارلنا ساعة واكفين ننتظرج وحضرتج جاية تضحكين خاتون صوجي اجي ورا الزعاطيط

شامل : بدينا سكتي امل ولا كلمة صدعتوني لاتخلوني انزل من السيارة وارجع مشي

امل وامجد : هاهي خلاص توبة هههههههه راح نصير عقال أستاذنا