علمني كيف الحب يداوي الفصل الثامن والعشرون 28 - بقلم Chrakirkuki

#علمني_كيف_الحب_يداوي 28

أمل : حفلة خطوبتي اليوم رحت ويا امجد اختاريت الفستان احس بخجل مرات واسكت من يحجي شي مرات اجاوبه واحجي عليه مثل قبل

أمجد : شنو شعورج امل اني اسعد انسان حاليا لزمت ايدها واحنا كاعدين على الكوشة حرام عليج جنتي مخبية هالجمال والله الفستان يخبل عليج

أمل : جريت ايدي كافي امك تباوع علينا هسة ضغطها يرتفع والحفلة نخلصها بالمستشفى واني ماريد هالشي تعبي يروح بلاش اني دومي حلوة وانيقة مو بس اليوم بس حضرتك عندك قصر نظر

أمجد : ميلوكلج تستحين اريدج امولتي ام لسان وميهمها أحد سمعي ماكو فترة خطوبة شهر كافي اسبوع لحد ماتجهزين نفسج.

امل : بكيف ابوك مو تختار موعد عرسنا يمتى مردت يصير احتمال بعد سنة سنتين هههههه شفت امي من بعيد جاية ومرتبة نفسها متخيلت تجي واني اصلا علاقتي مقطوعة بيهم وخواتي وياها تقدمو مني يباركولي وامي تبجي بحضني

ام امل : سامحيني بنتي الله يخليج انشالله تفرحين دايما تستاهلين اني مجنت ام زينة وياج

امل : بست ايدها واشوف ام شامل ترحب بيها وكعدت بصفي اكيد هاي عمايلها هي عازمتهم باوعتلها بأمتنان

شامل : اني يمكن اسعد من اثنيناتهم الحمدالله كدرت اوفق بين أكثر شخصين عزيزين على قلبي جريت امل حتى ترقص ويايه وامجد يصيح

أمجد : حرام عليكم راح انجلط من وراكم تعال ولك شامل ملكيت غير خطيبتي ترقص وياها والبنات مالين القاعة وعينهم عليك

شامل : ارقص ويا أختي ماريد وجع راس تريد تبليني بوحدة واضطر اتزوجها مو ارقص ويا امك خطية كاعدة ماكلة بروحها .

عامر : عفرا ارجوج لاتسدين التليفون واسف خابرتج من تليفون امي أعرفج متجاوبيني

عفرا : عامر مو وقتك احنا بيا حال لا ليلنا ليل ولا نهارنا نهار

عامر : والله العظيم ادري بس حبيت اطمن عليج انشالله تلكوها حتى أهلي مثلكم على نار ينتظرون اي خبر اليوم راح نجيكم لاتهربين مني مثل كل مرة اتوسل بيج

عفرا : الله كريم سديت التليفون بين يوم ويوم يجون لبيتنا وعامر يومية يحاول يطمن عليه بس اني خايفة بديت أتعلق بيه واني ماريد هالشي من يجون اني ماكعد وياهم ومااجاوبه ابد من يخابر عبالي امه هي متعودة كل يوم الصبح تخابر تسال على ميرا ياترى شصاير بيج حبيبتي رجعت للصالة باوعت اهلي روح مابيهم بس عايشين امي كاعدة وسبحتها بيدها وابوية وحامد اللي كبرو عشر سنوات على عمرهم وفرح اللي بعالم ثاني مرمر اهون منها نزار وياها

فرح : عفرا حبيبتي اخذي الجهال صعديهم لغرفتج ماكدر اتحملهم راسي ينفجر وهمه كل واحد يريد شي أحس نفسي عاجزة عن كلشي الندم ماكل بروحي باوعت مرمر ماكو استغفرالله وين راحت اكيد ويا نزار اشكد اهددها ميفيد وياها

حامد : عمري اني رايح للمركز أشوف الأخبار ديربالج من نفسج كافي اللي بيج زين اوعديني متبجين بعد وداعتي

مدينة :ابني اخذ اخوك وياك دورو بالمستشفيات بلكي لاسامح الله موجودة بيها وانتي فرح كومي نصلي وندعي كافي بجي

نزار : مسحت على شعر مرمر وخليتها بفراشها وطلعت اشكد انقهر عليها نزلت اروح ويا حامد فرح تباوعلي بعتب ويا امي غلست ميعجبهم تعلق مرمر بيه واني ماكدر من تجيني اردها

حامد : نزار محبيت احجي كدامهم لاتخلي البنية تتعلق بيك اكثر وانت تعرف شنو مصيركم يكفي خسرنا ميرا خلي نحافظ على مرمر

نزار : اني اساعدها وبس لايروح بالك بعيد وهي تتوسل بيه ماعوفها شتريدني اسوي متكولي عبالك فرحان بهالوضع واني جديد طالع من خيبة دمرت نفسيتي شفت تليفوني سمر باليوم مية مرة تخابر وتتوسل ارجعها شوف البلوة ماعرف يمتى تفهم هي انتهت من حياتي افكر احجي ويا ابوها

حامد : مو وكتها خلي نشوف شيصير بقضية ميرا وبعدين الله كريم واكسر رجلك تروح تنام يم مرمر أكعد ويانا بالصالة وهي متكدر تجي يمك

ميرا : أخ راسي وجع مو طبيعي صحت أشوف الغرفة نفسها بجيت بارحة حلمت اني بفراشي يعني حلم بس وهذا المزبلة صار واقعي باوعت على ايدي أكثر من مكان ابرة شفت الولد دخل جايب اكل وجهه مو مبين رجعت ليورة

تعالي اكلي بسرعة واخذج للحمام اذا تصيحين اضربج ابرة افتهمتي

اشرتله براسي زين حلقي جاف ماكدر احجي شفايفي صار بيها شقوق ودم بس شربت شوية حليب اريد اكوم راسي يفتر هو يجرني بيده اباوع ماكو منفذ اهرب

لاتتأملين اهواية ايام ويجي ياخذج اشكد محظوظ بيج اوف اتمنى اكون بمكانه واني اخلي ايدي على شعرها هاي وجهج شيصير بي من ابوسه تقربت منها

شدتسوي حيوان مو اتفقنا متسوي شي بيها انت مو مال واحد يامن بيك تريد نسلمه ناقصة ونخسر فلوس

ميىا : شفتهم يتعاركون بيناتهم وهذا الحقير اللي جان يريد يبوسني باوعلي بنظرات تهديد شفت الثاني وكع من الضربة الحقير اضخم منه ركض عليه

اليوم راح العب بيج حقيرة وساقطة مسوية روحج شريفة الله يعلم شمسوية ويا والشباب اذا مطلعت قهري بيج فلا اني ابن ابويه لزمت راسها وركعتها على الحايط مرة مرتين وكعت دفرتها برجليه كومي لاتمثلين عليه جبت أبرة بيها نسبة مخدر حتى تكون غايبة عن الوعي ومتصيح تصدع راسي جريتها للزواية حسيت بعدني اريد اشفي غليلي منها وهي صارت جثة متتحرك بعد

مرمر : طول هالأسبوعين وميرا ماكو احس اخذت روحي وياها كرهت كلشي حولي ألوم فرح اهواية لو عدها تليفون جانت تخابر لو نحصل مكانها كمت باوعت هي كاعدة تنتظرني

فرح : كومي خاتون احجي وياج غسلي انتظرج باوعت قميص نزار وملابسه موجود بغرفتها اوف لوين تردين توصلين ها

مرمر : متعبتي من العتب واللوم والنصايح شنو استفاديتي متكوليلي اختي وضاعت واني هاي حالتي لا دراسة لا زواج مثل العالم والناس ولا مستقبل شتريدين مني

فرح : اشكرج يعني اني بس دمرتكم مو وضيعتكم وميحقلي احاسبج وانتي تروحين برجلج للهاوية ترى هذا مراح يكون الج بيوم من الايام هو يحب زوجته ويجي يوم ويرجعها وانتي شنو موقفج ساعتها انسحبي من هسة بكرامتج بعدج صغيرة الف واحد يتمناج

مرمر : اللي عشته وشفته كافي خلاني اتقبل كلشي بحياتي بس نزار ماعوفه وسمر انتهت من حياته هو ملكي من اليوم اللي ابوج طلعني من البيت وكالي زوجتج وخلصت من عارج معرفت شنو يعني زواج انتي جنتي بحضن زوجج اللي ظلمني وميرا بغرفتها كالعادة جبانة وتبجي بهدوء واني بوحدي ماعرف ليل لو نهار محبوسة بالمخزن اون من الالم وهو بكل جبروته واكف ويكولي زوجتج نزار واياني واياج احد يعرف غيرج مو اذبحج هالمرة شنو تتوقعين من طفلة تسمع هالحجي كبرت وعشت بعيد عنكم وعرفت بعدها شنو يعني زواج متقربت من نزار ولا من زوجته ولاتدخلت بحياتهم أصلا جنت دخيلة عليهم ضليت ساكته وصابرة هسة اني محتاجته وهو نفس الشي مااسمحلج تدخلين بيا بعد ضربتني راشدي

فرح : وكفت اسمعها شلون تتهمنا كلنا ناكرة المعروف شنو اسويلها ميغزر بعينها متحملت ضربتها اكسر راسج ولسانج اكصه افتهمتي ردت اضربها خالتي لزمتني

مدينة : شكو هالصياح وكت هذا هسة فرح تخبلتي تضربيها وانتي مرمر مو عيب عليج تردين هيجي على عمتج احنا بيا حال وانتو شتسوون اهنا

فرح : خالتي عوفيني اربيها متستاهل تدافعين عليها مع الاسف

نزار : جنت موجود يم الباب وسمعت كلشي محبيت ادخل صحت امي تشوف شنو سالفتهم بعدها دخلت باوعت على مرمر لازمة خدها وتبجي فرح مرة ثانية لاتمدين ايدج عليها واي شي عندج احجي ويايه هسة مو وكتها خلي كلشي بوقتها

فرح : انت وياها وصلتوني لهالحالة اني اعتب عليك المفروض تفهمها مو تشجعها الحجي ويا عمي المسالة كبرت وطلعت من ايدي طلعت من الغرفة واني حايرة شسوي باوعت حامد كاعد ومنزل راسه مردت اساله على ميرا الجواب مبين بديت اشتغل والهي نفسي ويا جهالي صارلي فترة هاملتهم

حامد : عوفي كلشي وكعدي يمي لاتسوين هيجي بنفسج ادري تطلعين حرتج بهالحركات ميرا ماكو مبقينا مستشفى مدورنا بيها شنسوي هسة وين انطي وجهي مبقيت احد من معارفنا بالحزب وبالدولة محجيت وياهم

فرح : مسحت دموعي يعني اشوفها تغلط ويا اخوك واسكت تريد زوجها هسة وكتها ماريد اسمع شي مو زين عن ميرا غيرت السالفة على مرمر واني جواية بركان من النار عليها سامحني طلعت سامحني

عامر : مااصدك اشوفج كدامي لايكون بعدني بالبيت وبالفراش احلم

عفرا : شنو صارلي خابرني وعزمني على قهوة وطلعت رحت يمه تخبلتي عفرا اكيد هسة وكتها جاوبته مو لحيت عليه وحلفتني بأمي مكدرت اردك رجاء بلا حجي حبيات كول شعندك اصلا وضعنا غلط اهنا اباوع لا يشوفني احد من اهلنا ومعارفنا وانفضح

عامر : الله رجعتيني لايام زمان من البنية تكعد كدام حبيبها وتخجل وتتورد خدودها وتلتفت حتى لايشوفها احد حاسة بخوف ليش خايفة احنا معارف واني مو جاي من الشارع حتى تخافين على صورتج كدام الناس تدرين عفرا هاي عيونج لغز بيها فرح وحزن بنفس الوقت اشكد اتامل بيها مااشبع ياريت تحسين بربع احساسي بيج

عفرا : كافي عامر اني هم بشر ويمكن راح اضعف من الحاحك واني ماريد شي جربت مرة وضعت بعدها متصورت راح ارجع اوكف على حيلي من جديد محد حس بالالم والمعاناة اللي عشتها

عامر : خليني اداوي جروحج واني هم عانيت اهواية بحياتي ماريد اكولج بسبب منو وتكرهيني حتى زواجي اللي جان اشبه بسيناريو فلم فاشل انتهت بالطلاق أنطيني فرصة بس فرصة مراح تخسرين شي داويني واداويج

عفرا : خليها على الظروف مادري ليش هالمرة معارضته رجعت طول الطريق احجي ويا نفسي صدك اريد أنطي لروحي فرصة ثانية واعيش الحب من جديد عامر مينرفض شاب ناجح وخلوق واهلي يحبونه اهوايه خصوصا بعد اللي صار بميرا لاهو ولا اهله قصرو ويانه اف ياربي

ميرا : سمعت صوتهم من جديد خفت احس دم على كتافي ورجلي شنو هذا صحت لا لايكون مغتصبني هالحقير جان يهددني اني ليش اغيب عن الدنيا ومااحس بروحي بعد مايضربوني ابرة مديت ايدي على راسي ملفوف بشاش

كومي ولج بسرعة خليتها على كتافي حيلها منهد من الضرب والابر

وين نروح الدنيا مكلوبة بالمنطقة وهاي البلوة ابتلينا بيها

انخليها بكيس زبالة ونعوف الاسلحة ونروح عادي محد يشك بينا خابرني الريس نغير مكانه لحد مانشوف الوضع شيصير بيه كله من وجه الفكر هاي

الله لو ينطيني الريس هالفكر جان اني بخير والدنيا امان ههههه

ميرا : اسمعهم شلون يضحكون على مصيري بيناتهم الله يخليك بس عبايتي اريدها رجليه وايدي يبين طالعات كلش اخاف من نظرتتهم على جسمي واصلا مادري شمسوين بيه

شنو تردين تسترين خلص شرفج ضاع صرتي رخيصة ومتحتاجين عباية لبسج حلو يلوكلج ويفتح نفسنا وعبايتج حركناها بنت الكلب

ميرا : لا عفية اعتبرني اختك حرام عليكم اني بشنو مأذيتكم تردون فلوس بس اخابر اهلي ينطوكم اهواية

ههههه مسوية نفسج مسكينة وفقيرة طلعتي دهية تردين تورطينا مو تستغلين ضعفنا وحاجتنا للفلوس واختي مو مثلج لاتقارنين نفسج بيها هي حتى اكسسوار عادي ماعدها وانتي كومة ذهب جنتي لابسة غير خاتم الماس اللي جان بيدج فلوسها بكد شعر راسج مادري الله ليش ينطي فلوس للناس الطايح حضها ابجي ابجي بعد شنو شفتي

ميرا : لا بجي ولا توسل يفيد وياهم خلوني بكيس واني مربوطة ايدي ورجلي وحلكي خلوني بالسيارة والله اعلم هالمرة لوين ماخذيني طول الطريق ادعي يصير حادث وتنقلب السيارة اريد اموت ماريد اعيش ماتحمل العار

شانل : جنت كاعد ويا اهلي نسولف ونشرب جاي اليوم بالليل اروح للشغل بالي يم القضايا ولازم اسافر اغير جو وارتاح شدتني سالفة تحجي بيها نور اختي

نور : ماما اليوم سمعت البنات يحجون على سالفة البنية المخطوفة يكولون جذب هي رايحة وياهم عدها علاقة بواحد اهلها رافضين يتزوجون فهي متفقة وياه يخطفها واصلا مسافرين رايحين شهر عسل

أم شامل : لا واني اشكد انقهرت عليها طلعت هاي سالفتها ليش هيجي مسوية بنفسها

ابو شامل : استغفرالله وانتو اي شي تسمعوها تصدكون الله يعلم شنو اللي صاير وانتي نور لاتحجين بهاي السوالف بنتي هاي اعراض ناس مو نكتة تنقلوها بيناتكم زين حبيبتي واني اعرف اهلها خوش ناس ومتربيين

شامل : خوش سيناريو مسوية تنخطف وتروح ويا حبيبها بابا هسة كلشي يصير والله اللي اشوفه بشغلي يشيب الراس اهواية صادفتنا هالحالات واكو لا مظلمومين بس الناس مترحم

ابو شامل : الله يبعدنا عن هالناس ابني الأنسان المؤمن لازم دايما يستر حتى لو شاف الغلط يحاول يصلحه بالسر والكتمان مو يفضحه لعد شلون نطلب الرحمة من رب العالمين واحنا منرحم عباده

شامل : اني شفت صورتها بالمركز قضيتها يم واحد صديقي الله يساعد اهلها الفضيحة تكسر الظهر

نور : حلوة لو لا يكولون كلش حلوة وعدها فلوس اهواية ابوها تاجر جبير

شامل :هههههه ماعرف مدققت حلوة لولا بس مبين اول سنة كليه صغيرة ابوها تاجر مو تاجر ماعرف مسألت بس شفت الصورة

نور : صار عندي فضول اشوف البنية من كد مايحجون عليها الطلاب بكليتنا

حامد : خابروني من المركز رحنا اني وابوية ونزار كلش جنت متفائل كلت اكيد هي موجودة يمهم هسة وصلنا

أبو حامد : الله يساعدكم ابني واني ادور بعيوني على الوجوه اريد اشوف ميرا بس وجه الضابط ميتفسر

الضابط : اهلا بيكم تمنيت اجيبكم تسمعون اخبار حلوة بس مع الاسف مكدرنا نلحك على بنتكم البقية بحياتكم يمكن هاي غراضها هذا الكيس بيها عباية وجنطة اوهاي صورة المكان اللي لكينا بيها الغراض

ابو حامد : جريت الكيس اي هاي عبايتها مو حامد وايدي ترجف اتذكر هاي الجنطة اشتريناها اخر مرة اخذتها للسوك لاحول ولا قوة الابالله

نزار : باوعت على الصورة مكان بيها دم وصورة ثانية مبين حرق وباقي بيها رماد باوعت على الضابط شنو اللي يثبت هي ميته

الضابط : الدليل حارقين الجثة وياها اخشاب واوراق اهواية حتى تضيع بيناته

نزار : لعد المعمل الجنائي شنو شغله حجيت وياه بعصبية مو المفروض تحققون وبعدين تنطون النتاىج لو بكيفكم تخلصون الموضوع هاي حالتكم ضيعت اهواية ناس وتسجلون قضية ضد مجهول وتروح ارواح وشرف الناس بشربة مي مو الله لايوفقكم

الضابط : تجاوزت حدودك لو لا حضرة الوالد واحترم شيباته جنت احبسك على اتهامك المباشر بشغلنا

حامد : بقيت واكف مثل الصنم عقلي ميستوعب شكول لفرح ومرمر جبتلكم بقايا ميرا شكول لروحي ضاعت وردة بيتنا بلحظات والناس اللي مترحم يارب عونك طلعنا من المركز مكدرت احبس دموعي لا اني ولا ابوية ولا نزار .