علمني كيف الحب يداوي الفصل التاسع والعشرون 29 - بقلم Chrakirkuki

#علمني_كيف_الحب_يداوي 29

عفرا :عامر كلش متفائلة اليوم مادري ليش يمكن راح نسمع شي عن ميرا اخواني راحو للمركز بس تأخرو بعدهم مجايين على البيت

عامر : انشالله ترجعلكم بالسلامة وتفرحون بيها وتنسون هالايام العصيبة ونكدر نحجي بموضوعنا اشكرج عفرا انطيتني هالفرصة واتقرب منج متدرين اشكد احس بسعادة حتى اهلي يلاحظون هالشي

ميرا : غيرو مكان حبسي هسة ويا الحيوانات مربوطة كلش اخاف منهم وخصوصا من يطلعون اصوات اني ارجف من مكاني شفت الدجاجة وهي تسوي اصوات مادري فرحانة تعبانة مسوية بيضة تذكرت من نسوي حلويات اني اكرهه ريحة البيض بالبيت و اتذمر منها وعمو ابو حامد يوديني ويا جهال فرح نشتري كيك وحلويات على ذوقنا ونتعارك اني اريدها فراولة هم يريدون شوكلاته نمت واني احلم بأجواء العيد شفت أبوية مديت ايدي ياخذني ضحك بوجهي سألته بابا انت جاي تاخذني مو مزعلان مني اني مو عار مثل مايكول جدي هز براسه وابو حامد راح وياه عافوني وبديت ابجي وراهم اريد امشي احس رجليه مربوطة وشخص شالني من مكاني باوعت عليه ماعرفه منو هذا صحت بابا لاتعوفني عمو اخذوني وياكم فزيت على صوت الجلاب

ابو حامد : مكدرنا نرجع للبيت احس نفسي ضيق محد بينا يكدر يحجي بقينا نفتر بالسيارة بدون هدف اوكف ابني راح اختنك

نزار : طفيت السيارة شبيك بابا جاوبني تحس بشي نروح للمستشفى

حامد : جنت بعالم ثاني افكر شلون أوصل الموضوع لفرح شيصير بيها سمعت ابوية ونزار يحجون نزلت وفتحت الباب ابوية وضعه مخربط

ابو حامد : لاتسوون شي نزار وصيتي مرمر لاتعوفها وعفرا زوجوها

حامد : بابا جاوبني بابا نزار خلي ناخذه للمستشفى نبضه ضعيف ميجاوب

نزار : ماعرف شلون وصلنا دخلنا للطوارئ وتليفوناتنا يدك ماكدر ارد ولا حامد لحظات مرت كأنما سنة وسمعنا بيها رحيل اعز اب وصديق واخ وكلشي بالدنيا

حامد :جنت شايل هم فرح شكوللها بنت طلعت راحت هسة الحمل زاد عليه أمي وعفرا شجاوبهم اخذت ابويه برجله ورجعته الكم جثة يارب صبرني كملنا أجراءات وخابرنا اقاربنا علمود الفاتحة

مدينة : عفرا جيبيلي حبوبي من الغرفة كلبي يوجعني اهواية يمكن نسيت اخذ حبوب الضغط الصبح ياربي هذولة وين صارو الدنيا ليل وماكو خبر منهم ولايجاوبون مرمر خابري مرة ثانية بلكي يجاوبون

مرمر : اخاف ميرا بيها شي ميردون يكولولنه شتكولين عمتي مو

فرح : لا انشالله ماكو شي سمعت صوت السيارة لبست حجابي وطلعت برا شفت حامد باوعت عليه وين عمي ماعرف ليش بالذات سئلت عليه

حامد : مسحت دموعي ابويه انطاج عمره سمعت صياح امي ورا الباب عرفت سمعتنا ركضت عليها فاقدة الوعي صرت بينهم ماعرف اسكت منو الجوارين التمو علينا

عفرا : عبالي أسوء ايامي هو موت حسن بس يختلف موت ابوية كسرنا كلنا اللي يهون علينا الناس اللي تجي تعزينا اشكد جان انسان طيب وبسيط كل الناس جانت تحبه وتقدره عامر واهله يمنا وخصوصا امه متكفلة بأمور النسوان والاكل امي وكعت اول يوم هسة احسن كاعدة تقرا قرآن وتصلي على روح ابوية وجود عامر بحياتي شال عني اهواية هموم وضغوط

أمل : بدينا نشتري الغراض الضرورية اللي تخصني اما البيت نكعد وياهم اشترينا غرفة نوم بعد مشادات بيني وبين امه اللي مادري شلون اتصرف وياها

أمجد : مو كافي تعبت خلي نرتاح وناكل شي بعدين نكمل انتو روحو جهة المطاعم واني اخذ الغراض اخليها بالسيارة

أم امجد : اني اروح اختار مطعم ناكل بي خلي امل تجي وياك ليش تشيل وحدك كل هالغراض حمال لو شنو الخاتون مابيها شي الحنة مراح تروح من رجليها

أمل : باوعت على امجد اي صدك حبيبي اجي وياك اتونس ماريد اسمع مغثة تدري معدتي تكلب واحتمال نفسي تنسد يالله حبيبي خليت ايدي بايده على عنادها شوية وانفجر بمكاني

امجد : ايدي كسرتيها كلش ماكو رومانسية حياتي على كيفج ليش تطلعين قهرج بيه تحمليها لخاطري زين

أمل : اشكد احاول الزم نفسي ماكدر هي تجبرني اتصرف بهالشكل مادري اني زوجة ابنها لو ضرتها متاكدة تكرهني اكثر من زوجة ابوك ياريتها هي امك شلون وحدة طيبة وخلوقة

امجد : الله يعيني عليكم انتي وياها اني ضايع بيناتكم تدرين شنو لو تملخون بعض مراح اتدخل شيبتو شعر راسي

امل : هههههه على الاساس عندك شعر مو خابر شامل خلي نجتمع اليوم بالشقة من زمان عنها الله على ذيج الايام

امجد : من زين ايامكم انتي واخوج اشكد جنتو نذلين تتحاضنون كدامي واني حتى سلام بالأيد ممنوع عليه مو قبل اسبوع جنا اهناك تحجين عبالك قرن مشايفة لو تردين تبوسيني وتستحين
تنطيني اشارات نروح للشقة هسة فهمت

أمل : هسة اخابر شامل يسمعك شتكول متستحي من نفسك ها يمتى نروح

أمجد : علمود البوسة مستعجلة ارجع امي للبيت وبعدين نروح

أمل:😗

ابو شامل : ابني اذا طالع برا اخذني وياك واحد صاحبنا انطاك عمره ماكدر اسوق سيارة تعبان

شامل : انتظرك بابا مواعد امجد مو مشكلة منو هو اعرفه صعدنا بالسيارة وصلنا طلب مني انزل وياه نزلت سلمت وكعدت يم شخص سمعته يحجي ويا اللي بصفه يكوله ضربه جلطة من ورا حفيدة أخوه اللي هربت ويا حبيبها صار عندي فضول سألته منو هي جاوبني اللي انهزمت من الكلية جابت العار لاهلها ناس زينين ميستاهلون باوعت على اهل المتوفي مبين عليهم محترمين وحالتهم زينة

ابو شامل : اشكرك حبيبي اخرتك على موعدك بس هذا واجب لازم نسوي الله يعينهم مجان بي شي قبل فترة رحت يمه بس المشكلة اللي صارت مو هينه

شامل : بعيني اخذك مادري احس اكو شي بخصوص هالبنية يعني مو معقولة عايشة بالعز وتروح ويا واحد تنهزم سمعت عائلتها مثقفين ومعروفين بين الناس

ابو شامل : والله مادري شكول ابني الله يصبرهم اكول شامل ليش متستفسر من الضابط صاحبك بلكي نكدر نساعدهم بشي

شامل : تأمرني انت هسة من اوصلك للبيت اروح يمه يمكن اني جان نفس الشي بداخلي استفسر وصلت بعد السلام والكلام سألت على القضية وبن وصلتو بيها

الضابط : قبل ايام انطيناهم غراض البنية ميتة وحارقين الجثة القضية خلصت وصدر قرار سجلت ضد مجهول

شامل : منين جبتو الادلة بقيت اباوع على اوراق التحقيق والتحريات والادلة شنو هذا اكو نقص اهواية اني ساعدتك اهواية اريد منك تنطيني معلومات اكثر راح استلم هالقضية منك ويا جماعتي وبمساعدتكم

الضابط : شامل ادري بيك متقصر وتريد تساعد بس هالقضية مبينة واضحة متونسين بيها وكاتليها اهواية تصير

شامل : تجي ويايه نروح للمكان لو لا لان راح اروح اني متأكد اكو شي طلعت خابرت جماعتي واخذت اذن من رئيسي وباجر راح اروح ابدي ادور على ميرا رجعت للبيت حضرت غراضي ردت انام مكدرت خابرت صديقي طلعنا بالليل اندور على المكان طريق خارجي بعيد ومزارع موجودة على الاطراف بين المزارع مسافات اهواية يعني اي شي يصير محد يعرف

شامل يمكن هاي المزرعة شتكول ندخل لو ننتظر يطلع الصبح

شامل : لا أنت أبقى بالسيارة وأوكف بعيد راقب الطريق لأن المزرعة فارغة احتمال يجون عليه خابرني اني اروح ادور بلكي نحصل دليل او معلومات تساعدنا دخلت للمزرعة ريحة وساخة والمكان مبين مو اي شي مال واحد عنده فلوس دورت بالغرف لكيت بقايا حبوب وأبر وأوراق تحت السرير مخبيها خليتها بكيس نزلت للطابق الارضي دخلت للغرفة اللي محتركة ابوابها اهنا جانت ميرا مبين قاعة مو غرفة عادية اثار دم على الحايط مو قديمة اهواية تأكدت معذبيها وضاربيها والحرق صاير بزاوية وحدة مو كل القاعة رجعت للسيارة اني اقرا بالاوراق وصديقي يراقب الطريق.

فرح : ودعنا الناس البيت فرغت علينا تذكرت موت ابوية نفس الشي صار نسينا ميرا وماكدر اسأل عليها من حامد هو وضعه صعب بس أدعيلها الله يحرسها حضرت الفطور محد يقبل ياكل حلفت حامد وخالتي غصب كعدتهم رحت على عفرا اخاف رجعت لعزلتها فتحت الباب

عفرا : هاي انتي عبالي مرمر ردت ارزلها امي كامت جنت احجي ويا عامر طول الليل محسينا بالوقت من فتحت فرح الباب عبالي سامعتني واني اودعه حسيت بخجل شتكول عليه هسة

فرح : اي كاعدة تفطر ويا حامد كومي نروح ناكل وياهم وصيحي نزار ومرمر ماريد ادخل لغرفتهم واشوف شي

عفرا : ماتصور صاير شي من اللي بالج حلال عليج حرام عليهم مرمر كبرت مو صغيرة وهي قررت تبقى ويا نزار انتي ليش شايله همهم

فرح : كعدت يمها اخاف من أخوج يجي يوم ويحن لسمر وهاي الغبية تنكسر كلبها وانتي احسج مخبية شي عليه من دخلت يمج خفتي

عفرا : جنت احجي ويا عامر تدرين يختلف اهواية عن حسن جرىء اهواية واثق بنفسه بشكل مو طبيعي متصورت يهون عليه رحيل بابا كلش ساعدني اتجاوز هالأيام

مدينة : ابني ماكو شي عن ميرا من الفاتحة واللي صار بينه نسيناها طول الليل ببالي ابوك راح بس لازم أحنا نشيل هالأمانة من بعده

حامد : نسيت سالفتها بعد ماتوفى ابويه جاوبتها انشالله مو ناقصنا فاتحة ثانية صدك هالمرة اهلي يروحون بيها مثل ابوية فضلت أسكت هالفترة

نزار : بست امي وخليت راسي بحضنها مشتاقلج حبيبتي هسة حسيت اني يتيم من راح عمي كلش صعب عليه وامي مكسورة بس علمودنا صامدة حبيت اشاقيها مثل ايام زمان باوعت حامد منزل راسه وساكت

مدينة : متكبر ابد ومتشبع من حضني لايكون مرمر مقصرة وياك

نزار : ضحكت على كلام امي ميعرفون ماكو شي بيناتنا بس ارتاح يمها وهي نفس الشي

حامد : وعيت على كلمات امي ماما ابوية اخر كلماته جانت على مرمر لازم تروحون للمحكمة وتسون عقد زواج زين نزار هاي وصية بابا وعفرا انتي هم نفس الشي بابا وصلني ازوجج بعد مايمر فترة على وفاته اذا اجاج قسمة زينة راح تتزوجين وماكو اعتراض

عفرا : اول مرة من يجيبون سيرة زواج مااعارض وابجي بس بجيت على وصية ابوية حتى بأخر انفاسه جان شايل همي هزيت راسي لحامد وكعدت أكل

مرمر : سمعت وصية عمي سجدت شكر لله واخيرا نزار حيكون اليه تذكرت ميرا وينج حبيبتي تجين تشوفين اختج لو انتي ويايه هسة جنت أسعد انسانة

ميرا :اباوع على اصابيع ايدي اللي جانت مزينة بأحلى صبغ ومحابس اللي نادرا ماانزعها وسوارات وهسة كلها مكسورة وايدي صاير عظم يخوف ومكان الابر اللي صاير بنفسجي على ازرق بسبب اكلي القليل مديت ايدي على راسي ملفوف والشاش لازك بشعري ياترى وجهي صاير مشوه لو لا احسن شي ماكو مراية راح أموت اذا شفته مشوه رجليه نفس الشي دم وخدوش عليه أهلي ميسةلون عليه ممبلغين الشرطة ومرمر اشكد مشتاقتلها وليش اشوف ابوية اكثر من مرة بالحلم يباوعلي ويبتسم ويروح ياخذني شخص ثاني

ههههي انتي ام الصفنات باجر يجي الرئيس ويشوفج راح اجيبلج ملابس نظيفة حتى تغسلين متأكد راح يتخبل عليج ايام وترجعيلي بعد طلعة ماكو اخذج لمكان نعيش بيه وحدنا ويصير عندي فلوس اهواية اروح انظف وارتب المزرعة

ميرا : مجاوبته بقيت ساكته تقدم مني رجعت ليورة وارجف لاتلمسني كافي حرام عليك

من قهري ضربتها على اي مكان بجسمها ماعدا وجهها حتى لايبين ولج حقيرة اني مو عاجبج لو مو من مستواج اذا مخليتج تبوسين رجلي حتى اتقرب منج ازين شواربي

ميرا : حتى دموع مبقت بعيني هلكد مابجيت يعرفني اخاف من الحيوانات جاب الدجاج وشمرهم وحدة وحدة عليه واني اكمز بيناتهم خايفة لايجيب عليه الجلب اللي مخليها كدام الباب بس اسمع صوته اموت من الخوف وأصحابه يباوعون ويضحكون عليه

شامل :بقينا ايام بالسيارة نراقب مشفنا يجون صديقي صار عنده احباط ميجون بس اني متاكد راح يجون خابرت يجي بمكانه واحد ثاني تأكدت الجماعة يشتغلون بالمخدرات عصابة

شامل أسمع كلامي وخلينا نرجع سوية حتى الاكل والمي نفذ عدنا أموت وينطوني جكارة هسه

شامل : شفت سيارة تقترب اش اسكت ونزل راسك بلكي يطلعون همه من طريقة السرعة اللي تمشي السيارة حسيتهم جايين على المزرعة فعلا دخلت اهناك انتظرنا ربع ساعة واحنا منعرف عدد الموجودين قربت سيارتي من البوابة ونزلنا ويانا سلاح دخلنا ندور عليهم اني صعدت للطابق الثاني لان الاوراق جانت اهناك شفت واحد يدور تحت السرير جريته من ياقته وطلعته واحد صايع

منو انت وشلون دخلت لهنا حرامي مو

شامل : يحجي ويرجف من شاف المسدس بيدي شلته مبين مااحتاجه طلعت سكينة تريد تعرف منو اني ملك الموت وكعته وخليته جوا رجلي وين البنية

ماعرف عن يابنية تحجي راح تندم منو مفكر نفسك هسة يجون جماعتي اقرا على روحك الفاتحة

شامل : زين خلي نخلص اوعدك اقرا الفاتحة على روحك جريته من شعره ونزلته للطابق الارضي الظاهر تريد تتعرف عليه متريد تحجي شي شفت صديقي

شامل ماكو غيره دورت بكل المكان شنسوي بيه هذا

شامل : بقينا نسأله ميجاوب ويستهزء طلعت سكينة وخليتها على ركبته وجرحته تحجي لو اكمل للأخير

والله ماعرف شي الله يخليكم عوفوني اني أنظف هالمكان واروح مجرد خادم

شامل : المشكلة الخادم ادرى بأمور البيت اكثر من صاحبه شتكول اقطع ايدك لو رجلك دخلت السكينة بفخذه هسة تحجي لو ابقيها وينها

لا لا اتوسل بيك يوجع طلعه مو اهنا بمكان ثاني انت مو كدنا اخذ صاحبك وروح

شامل: تأكدت من كلامه ميرا عايشة باوعلي تدري شايل اكثر من مسدس افرغها كلها بيك المكان اللي هي بيها جم واحد موجودين وياها

راح احجي بس طلع السجينة رجليه تنزف اخ اخ يأذي اني واثنين من اصحابي

شامل شتكول نخابر يجون فرقة يساندونه اخاف يكذب ونروح اهناك نتورط

شامل : انت اصعد بسيارتي واني اسوق سيارة هالحقير واربطه بالكرسي لاتخابر هسة يجون يخربون علينا خلي نستعجل لايتأخر هذا الجلب عليهم ويأذون البنية الطريق بين المكانين اهواية بقيت اسأله من ميجاوب لو يكذب اضربه وصلنا المزرعة هاي اكبر طلعت تليفونه من جيبه خابر صديقك يفتح الباب خليت المسدس على راسه كلمة زيادة وتعرف شيصير بيك دقايق وانفتحت الباب دخلت السيارة صاحبه من شافنا انهزم نزلت بسرعة وركضت وراه جانو كاعدين مسوين حفلة الهم شرب ونركيلة ومشغلين اغاني بسرعة لزمته وصاحبي دور على الثاني ميكدرون يركضون اهواية بسبب المخدرات اللي ياخذوها سألته وين البنية

يم حظيرة الحيوانات اني ماعليه عوفني اتوسل بيك عندي جهال

شامل انتبه ردت أروح اوكفه ضرب شامل على كتفه

شامل : انداريت طلقة جتي على كتفي ضربني وركض تعال اربط هالحقير وخلي بالسيارة واروح اجيب الجلب

شامل انت مصاب لاتركض اني اجيبه ابقى اهنا

شامل : اقفل البوابة اول شي وبعدين نلزمه اخذت اللي بيدي وخليته بالسيارة شفت صديقي هم لازم اللي ضربني خليناهم مربوطين بالسيارة وخابرت الضابط يجي ياخذهم انت ابقى احرسهم اي حركة يسووها اضربهم على رجلهم رحت ادور على البنية الحظيرة شوية بعيدة عن البيت وصلت صحت بأسمها متجاوبني ميبين شي من الغراض والحيوانات شفت وحدة ضامة رجليها ونايمه تتمتم بينها وبين نفسها ملابسها مشكوك ورجليها عليها اثار دم وراسها مربوط احجي وياها متسمعني لو متريد تجاوب

ميرا : جنت مابين نايمة ودايخة سمعت صوت طلقات خفت هسة يموتوني لو شنو سمعت صوت رجلين تقترب مني وتصيح بأسمي مكدرت اجاوب لو افتح عيني منو هذا صوته غريب حسيته شالني ويضرب على ايدي هاي نهايتي انتهيت هذا جاي ياخذني للرئيس بقيت اردد بابا ساعدني اخذني يمك بابا لاتعوفني .