علمني كيف الحب يداوي الفصل الثاني والعشرون 22 - بقلم Chrakirkuki

#علني_كيف_الحب_يداوي 22

مرمر : رحت على بيت ام سمر بقيت يمهم اسبوعين نزار وسمر مسافرين عيد زواجهم يحتفلون بيه أختها اكبر مني اتعجب من حياتهم وعيشتهم ماخذة راحتها على الأخر عدها حبيب وتليفون خاص بيها طول الليل تحجي وياه واني بس ركبت ويا صديقتي واخوها موتوني واتهموني اشكال والوان محد كال مراهقة بعدها متفتهم الصح والغلط قبل مايرجعوني طلبت مني أحجي ويا أخوها وحدنا بغرفتها جان مسافر رجع اخر يوم كلما يشوفني يتحارش ويتغزل بيه جنت خايفة بصراحة منه بس كلت خلي اشوف شيريد طلع يحبني ويريد يتزوجني فرحت اهواية راح اخلص من عيشتي ويصير عندي بيت وعدني اول مايرجع نزار يطلبني منه

عامر : رجعت للشقة واني اسمع امي تحجي ويا وحدة بالتليفون تقربت منها كعدت صوتها كلش عجبني حلو ودافي توصي امي على نفسها ولاتنسى ادويتها وتسأل على أبويه حرصها مو طبيعي عبالك بنتهم وامي نفس الشي وياها محبيت تخلص مكالمتهم بقيت ارجع صوتها بمخيلتي لحد ماسمعت امي تحجي ويايه

رجعت حبيبي روح للمطبخ اليوم طبختلك دولمة تاكل صوابعك وراها

الله ناسي طعمه من زمان مماكله ياغالية ابويه نايم مو تعالي ويايه احجيلي شلون دبرتيها الغراض ورحتي للسوك

اي اخذت المربية ويايه ابني عامر ميصير هيجي جهالك كلش مياكلون من اطبخ كله معلبات وهذا شعرية بيها مي

ههههه اندومي مو شعرية اهنا كله هيجي عبالج مثلنا يطبخون اشكال والوان وجدور شكبره الحياة تختلف وهمه ممشين حالهم صدك ويامنو جنتي تحجين هسة

هاي عفرا خطية مشتاقتلنا اهواية اشكد انقهر عليها والله معزتها من معزة المرحوم ادب واخلاق وبنت ناس بس شنسوي ويا القسمة

انسدت نفسي من عرفت هي خطيبة حسن استأذنت من امي ودخلت لغرفتي احجي ويا روحي تخبلت عامر تعلقت بصوت سمعته من لحظات وعجبتك متعرف منو صاحبته بقيت افكر بيني وبين نفسي ياترى شكلج شلون يمكن امي عدها صورتها شلون أشوفج عفرا أختيارات حسن دايما جانت فاشلة وانتي جنتي من ضمنها لو لا

ميرا : جنت اسمع عمتي وخالة مدينة يحجون ويتناقشون بيناتهم تقربت وكفت من جابو اسمي عرفت جايني خطابة درجة حرارتي صعدت حسيت بخجل مو طبيعي شافتني عفرا وضحكت عليه

عفرا : والله انتي تحفة ولج بس خطابة هيجي تسوي بيج لو زواج شتسوين جريتها للصالة باوعي فرح شصار بيها الاخت سمعت سوالفكم واي بطني ماكدر الزم نفسي

فرح : باوعت على ميرا يمتى كبرتي ولج بعدني اشوفج توج تمشين وتكومين هسة يجوج خطابة ومو واحد اكثر من واحد من تكملين السادس لازم اسويلهم سرة

مدينة : ماشالله عليها شايلة جمال امج كله الله يحفظج بطلت اروح للزيارات من وراج ميرا الي يشوفني يسألني عليج غير جنتي طالعة كمر من جان يزورون عمتج بالمستشفى بعد كبرت وصارت عروسة هنياله اللي تصير ميرا من نصيبه

عفرا : كولي هنياله اللي تصير بحضنه امه داعيتله باوعو خدود طماطة ولج على كيفج لايصير بيج شي تعالي وين تنهزمين مني فصعونة حركتي كرتي وصرت عانس بعد محد يدك بابي

فرح : تسلمين خالتي دعواتج الها تكفي وانتي عفرا خاتون شوية على كيفج شفري كلماتج بنتنا تستحي

عفرا : اي طالعة عليج ام الحضن والبوس بالختلات اغمض عيوني من افوت يم غرفتكم لو من ادخل للمطبخ لا اشوف شغلات الكبار عيني على كيفكم ويانه مو عايشين وحدكم اكو بشر حسو بيهم

مدينة : ههههه اخ من لسانج عفرا محد يسلم منج روحي صيحيها خطية خلي تجي تكعد ويانا كاتلة نفسها بالدراسة

فرح : اي والله وخايفة حامد ميخليها تدرس من تكمل وكل مااسأله يكول الله كريم وعمي نفس الشي رجعت اباوع على جهالي الحمدالله صار عندي ولدين وبنتي جديد تمشي يمكن دعوات اهلي اني عايشة بهالنعيم ويازوجي وجهالي ناقصنا مرمر ترجع تعيش ويانا كدرت اقنع حامد من يرجعون نزار ومرته نروح نجيبها حتى لو بالغصب هي كبرت مو مال اعوفها كافي اللي راح وميرا ميمر اسبوع اذا ميجون ناس عليها واحنا منوافق خلي تكمل المدرسة يالله تتزوج

ميرا : لمست خدودي واي اشكد عيب شيكولون عليه هسة مو مصدكة افكر شلون الزواج و هو منو يشبه حامد نزار عمي اللي اشوفهم بالتلفزيون نمت واني افكر بعدة وجوه من خيالي

سمر : اخوية صارله فترة يلح يريد يتزوج مرمر عزمتهم الليلة على العشا حتى يحجون ويانزار بدلت مرمر سويتلها مكياج خفيف كلش فرحانة راح اخلص منها وارتاح من رجع كالعادة يحضني ويبوس بيا

نزار : شنو هالجمال والاناقة ياروحي ناوية تموتيني الليلة واني اغمزلها الريحة تخبل واو هالسفرة الحلوة شكو واني اباوع على مرمر وتغيراتها شنو السالفة

سمر : حبي عازمة اهلي من زمان ممجتمعين سوية مو واني اضحك واخذه للغرفة حتى يبدل

مرمر : اباوع عليهم واني اضحك يعني اني هم بعد ايام هيجي اسوي بس اخوها كلش طويل اني اوصل لخصره اخاف من امشي وياه الناس تضحك عليه بس كلامه حلو اهواية باوعت على روحي صدك اني حلوة بهالشكل لا مرمر شنو حلوة تخبلين وراح اعوف المدرسة اللي بحياتي محبيتها اسافر واشوف الدنيا اوف يمتى بس

نزار : اول مرة يجون بهالشكل جايبين كومة هدايا وياهم السالفة مو عادية والاخ يباوع على مرمر شوية وياكلها واني لولا وجود ابوه جنت اموته لايستحي ولاشي مني نبهته مرتين ولافاد جريت مرمر وطلبت منها تروح لغرفتها كعدنا ناكل حلو والسوالف كلها عن الزواج لحد ماسمعت الطامة الكبرى يريدون مرمر لابنهم الدايح شوية اكوم اذبحه بالكوة سيطرت على نفسي كتلهم هذا الشي بيد ابوية وحامد راح احجي وياهم اي هذا الباقي حتى انفضح ويطلع المستور بس راحو لزمتهم هي وسمر رزايل لاول مرة اعصب منها بهالشكل ليش هيجي تستغفليني انتي ناسية اخوج وحركاته هذا زواج مو لعب يشبع منها يومين ويشمرها مثل غيرها

سمر : اشبيه اخوية مو عاجبك وتصيح معصب وهاي اشرت على مرمر لازم تبوس ايدها اخويه راضي يتزوجها وهي الله يعلم هالسنين ليش عافوها اهنا وطردوها 😨😨😨اول مرة نزار يرفع ايده ويضربني هاي نهايتها اشكرك حبيبي دخلت لغرفتي وقفلت الباب مو مصدكة اباوع على خدي اثار اصابعه مطبوعه عليه بعد مستحيل اقبل هالحقيرة تبقى ببيتي

مرمر : وكفت ارجف كدامه منتظرة الضربة الثانية على خدي بس كلت خلي اخلص نفسي بعد هالضربة اللي اكلتها الخاتون راح تطيح حظي اني راضية وانت معليك

نزار : امشي ولي نظفي الصالة وشيلي الغراض وروحي نامي الله ياخذج زعطوطة بالاول عرفي شنو يعني زواج بعدين تعالي كولي اريد اتزوج باجر ارجعج يم فرح انتي واحد بعد ميأمن بيج رحتي اسبوع بيتهم الله يعلم شمسوية من وراية

مرمر : ليش دايما تظلموني حرام عليكم دخلت لغرفتي واني اجمع غراضي بعد مااكعد اهنا ارجع اشتاقيت لميرا كلش بجيت من كل كلبي اتمنى صدك يجون وراية ويرجعوني حتى احس يردوني صدك مو شفقة

نزار : ياربي شنو هالمصيبة اللي لا عالبال ولا على الخاطر شسوي احجيلها السالفة مو مال تسكت تفضحني يم سمر ومستحيل تسامحني ويمكن تطلب طلاق اعوفها هيجي ومااكوللها تروح تسوي علاقات طلعت برا خابرت حامد حجيتله السالفة هو الوحيد اللي يدري بالموضوع وعدني يجيب فرح وياخذوها وياهم هذا احسن حل

شامل : كلشي بيه تغير رجعتلي جزء من راحتي حتى من كملت التدريب مجنت واثق بالشغلة بس من بدينا بالعمليات عرفت الهدف منه حسيت اني عندي قيمة ويا كل روح بريء نخلصه من الموت لو نخرب عملية تهريب لو من نمسك دلائل على عصابة تجار الاعضاء البشرية وننطي المعلومات للجهات الامنية واحنا وياهم نسوي اللازم مرات بكل قضية يدخل واحد لو اثنين من عدنا ويا الجهات الامنية صح مرجعت شامل قديم بس صرت احسن منه صار عندي اصابات خفيفة اكثر من مرة بس من اشوف القضية انحلت انسى وجعي والمي بالعكس ارتاح رجعت بعد التدريبات مرات ابات يم اهلي مرات بالشقة

فرح : الله يخليك حبيبي والله كلش فرحانة مو مصدكة اخيرا راح نجتمع كلنا بعد شريد

حامد : لا عمري بعد باقي مفاجاة الكبرى بس مراح اكولج عليها خلي نرجع وتدللين ساعتها اكول

فرح : على الاساس ناقص دلال مو عرفت عيد ميلادي بعد ايام وجايبلي هدية قديمة مفاجاتك

حامد : والله وزمان ومو عاجبج اسويلج عيد ميلاد مو اني الج اذا مخليتج تنسين اسمج الليلة اني مو حامد

فرح : عيب عيب شكو فد مرة بايعها شوية حيا ومستحى ماكو اي صدك الليلة ننام بالفندق وتنسيني اسمي حبيبي 😍

حامد : نصابة فروحتي واني المسكين مخدوع بيج فرحة حياتي تراهنين مارجع الا و انتي حامل شتكولين

مرمر : جنت مبدلة وكاعدة مشفت سمر من البارحة رايحة لبيت اهلها زعلانة اباوع على نزار صاير اعصاب عبالك مو هو انتظر على نار وصول عمتي واحس بخجل شلون ألتقي بيهم بعد اللي سويته وياهم اول مادخلت عمتي بجيت من تأنيب ضميري هي منستني بس اني مجنت اقدر النعمة