علمني كيف الحب يداوي الفصل الحادي والعشرون 21 - بقلم Chrakirkuki

#علمني_كيف_الحب_يداوي 21

أمل : ادور فلوسي ماكو اني متأكدة مخليتها بهالمكان وينه اوف تأخرت على الدوام صحت ماما وين الفلوس اللي بالدولاب

ام امل : صرفتها عندج مانع اذا انتي متحسين بينا ولا عايشة ويانا خواتج محتاجات غراض ناقصهم بالجهاز جبتلهم ياه

امل : شنو جهاز على شنو تحجين

ام امل : خواتج انخطبو قبل اسبوع وبعد ايام عرسهم منين تعرفين ياحظي اذا 24 ساعة لاهية عنا روحي باركيلهم وجيبي وياج هدية ذهب من ترجعين

أمل : أخي تزوج واني ماعرف فجأة شفت زوجته ويانا بالبيت وهسة خواتي هم اللي اصغر مني فوك ما ماخذين فلوسي يردون هدية منين اجيبلهم وانتي ماخذة التحويشة كلها

ام امل : لعد امجد شنو محل مالته يسد عين الشمس جيبي من عنده وبعدين اتصرفي وياه تردين خواتج يروحون يم عيالهم بدون هدايا مو عيب علينا

امل : عرفت مراح اخلص منها ردت اطلع شفت زوجة اخويه نازلة وتبوس بيه مشتاقتلي انطتني قائمة تريد اجيبلها غراض طبعا أعرف هي تتلوك بس أحسن من عدهم على الاقل تحجي بأدب ومو ناكرة معروف ضحكت واني امشي بالطريق يمتى كبرو حتى يتزوجون وصلت منار صارتلها فترة متغيرة حجاب ماكو لبس ملون الوان واشكال والشعر كل فترة لون سمعتها تحجي بالتليفون وتنصي صوتها سلمت عليها ورحت اباشر شغلي صعدت يم قسم العجايز احس نفسي اتونس وياهم اكثر معتبريني خطيبتهم ويتغزلون بيه واني اضحك عليهم يمكن اخرتي اتزوج واحد بيهم

امجد : ماصدك اشوفك كدامي ولك حقير هذا انت مكدرت ارجع لبيتنا من خابرتني وكلتلي رجعت سديت المحل وجيتك مشتاقلك حقير

ابو شامل : هههه الله يخليكم لبعض ابني اروح اجيبلكم عشا حلفت ام شامل متدخل المطبخ اليوم ادللها برجوع ابنها

نور : بابا لحظة ابدل واجي وياك بست شامل حبيبي من وراك راح اخسر بابا 😆

ام شامل : خليت راسه بحظني واني ابوسه اوف ريحتك تخبل حبيبي اشكد اشتاقيتلك صدك نسينا امل اروح اخابرها .

شامل : قررت ارجع بعد صراعات كثيرة بداخلي بين ارجع او لا بس رجعت وراح ابدي اشتغل بلكي ارتاح من صدك سويتلهم مفاجأة مكلتلهم على رجوعي بس قهرتني دعاء وجهالها تعودو عليه هالفترة كلش جانت صعبة عليه أرجع واعوفهم بس وعدتها بين فترة وفترة اروحلها سمعت امي من كالت امل جاوبتها لاتخابريها راح اروح بنفسي عليها اعرفها مراح تجي

أمجد : خابريها خالة ماعليج بيه ماعنده عقل ولك تموت وتشوفك صدك جذب لاعبالك مسوية نفسها مو يمها يعني ناسيتك لا جذب ماخذة على خاطرها انت متعرف معزتك عدها اي احجيلي شكو ماكو مكلتلي راح ترجع

شامل : ردت اسويها مفاجاة شلون الشغل وياك انطيني مفتاح الشقة راح اروح اكعد بيه بعد يومين

امجد : ليش تروح للشقة واهلك شلون تعوفهم امك مراح تقبل هي مصدكت ترجع لايكون علمود السم اللي تشربه

شامل : لا مو بس هالشي راح اشتغل ولازم هالفترة ابتعد شوية احتمال اسافر لغير مكان ولاتسألني على وين وشنو الشغل اني بنفسي ماعرف شي

منار : واخيرا رجع ورجعت روحي وياه بسرعة طلعت من المستشفى رحت للصالون غيرت كلشي شعري حواجبي اظافري رجعت للبيت وجهزت نفسي ورحنا على بيت شامل

أمل : وصلت بسرعة لبيت أم شامل شفت سيارة بيت منار وسيارة أمجد كلبي دك سريع لايكون اللي ببالي شلون اتاكد ماريد اشوفه ياربي شسوي ارجع للمستشفى واخابر امجد بعدين لو ادخل ومااحجي وياه اقهره مثل ماسوى بيه دخلت سلمت وصلت يمه جرني وحضني بقيت جامدة سلمت عليه عادي خلي يحس شوية اشوف منار لاعبة بنفسها لعب ضحكت على تفكيرها وتصرفاتها مباوعت بوجهه حتى لا اضعف كدامه طلعت ويا امجد حتى يرجعني مقبلت ابقى يمهم

أمجد : اي خاتون شنو استفاديتي من حركتج كل الموجودين حسو عليج هو رجع بعد شكو شايلة خشمج

أمل : متحس بناري ولا هو راح يحس خلي يولي ماعليه بيه وصلني بلا لغوة راسي يوجعني

أمجد : تدرين مبين صدك منار ناوية على شامل اليوم تأكدت بس هو ولا يمها

امل : لا اصلا اسمعها يوميه تحجي وياه من تشوفني تنصي صوتها عبالها غشيمة الاخ عاجبه السالفة ومنطيها وجه وهو دمر نفسه علمود أختها مات ودمرنا وياه واخرتها صفى على منار خاتون

مرمر : طبخت وكملت الغسل بعد اكو شي عندي واجبات تعبت منها ومن طلباتها مسويتني خدامة هي متسوي شي ونزار بس أسمع صوته من يرجع بالليل مرات اريد ارجع مرات اكول لا بديت اتعود على مدرستي وحريتي اروح واجي بكيفي بس اوصل للبيت سمر تبدي ويايه سوالفها

سمر : اخذي اكلج وروحي لغرفتج اياني واياج تطلعين حتى لو يصيحج نزار افتهمتي

مرمر : لاتخافين هو اصلا ميريد يشوفني بعد ماهددته صار يكرهني تذكرت قبل شهر وصلني للمدرسة بالطريق حذرني أسوي شغلات منا ومنا وكالي بس تصيرين 18 سنة ازوجج واخلص منج مراح اخليج ترجعين يم فرح وحامد تخربين حياتهم .

حامد : عفرا متعبتي من البيت ليش متداومين راح تتغير نفسيتج تطلعين وتشوفين العالم انتي حاسبة نفسج عايشة

عفرا : ماريد حامد اني مرتاحة منا ادرس ميرا واساعدها منا اساعد امي على البيت وجهالك الوكحين هههه

أم حامد : أسم الله عليهم عسل على كلبي يمه حامد أخذ فرح للدكتورة اليوم خطية مبينة تعبانة بس متحجي شكلها مو تمام روحي عفرا حضري غرفة نزار راح يوصل بعد شوي

حامد : ضحكت على حركات أمي صرفت عفرا حتى تحجي ويايه شفت فرح تقربت منا لزمتها وكعدتها خليت ايدي على اكتافها

أم حامد : خليني اكوم احسن شفت فرح نسيت السالفة ومجاوبتني عيني فرح دكومي الولد مشتاقلج خطية عيونه طلعت لحد يمتى اظل اعلم بيج

فرح : خجلوني ماكو شي خالتي عادي كعدي ويانه

حامد : لاتصدكيها ماما روحي اخذي راحتج كملي طبخاتج راح يجيج الدلوع عمري شلونج واني اشيل خصل شعرها النازل على وجهها وارجعها ورا أذنها مشتاقلج اهواية حني عليه نامي يمي الغرفة بدونج منفى

فرح : هانت روحي واني هم مشتاقتلك شنسوي نتحمل مباقي شي وارجع انام يمك لاتنسى هاي أوامر الدكتورة وانت بنفسك سمعتها وافقت أنام جوا ومااصعد لغرفتنا الله يخليك لاتجبر عفرا على الزواج ادري تردون تساعدوها بس مو بهالشكل

حامد : فدوة للحلوة اللي شايلة همي وهم عائلتي مرتي العاقلة لاتخافين مااجبرها بارحة حجيت وياها علمود تتزوج تهسترت أبويه غصبها اليوم تنزل والا كالعادة تحبس نفسها يومين غيري لبسج خلي نطلع نغير جو

شامل : خابرت ابو تمارا وحجيت وياه وافقت اشتغل وياهم بقيت شهر بالبيت مرات اروح ابات بالشقة تعبت من حياتي الخالية بدون هدف ودعت أهلي وسافرت من جديد بس على أمل ثاني

ميرا : عمة اريد اعرف ليش تتعبون نفسكم بالحلويات وهي اكو بالسوك انكسرت ظهري من الصبح كاعدين نحضر حلويات العيد والجهال ماكلين راسنا كلش يتحركون ومشاغبين غرفتي صايرة دمار شامل من وراهم غير الشخابيط على الحايط رغم هاي احس بسعادة عايشة وياهم بدون مشاكل بس اشتاق لمرمر مرات اخابرها بس حتى اسمع صوتها ومااحجي اباوع على عفرا وهي تلعب ويا جهال وتضحك ايام اشوفها متونسة وايام منعزلة بغرفتها وعمتي الله يحفظها مادري شلون اجازيها رغم صحتها وتعبها تهتم بيه ومتقصر مو بس هي كلهم يهتمون بيه بطريقتهم الخاصة

عفرا : اشتغلي وانتي ساكته تردين تغيرين قوانين امي الازلية لو يجيبولها محل حلويات متقتنع الا من تسويها بايدها صدك اليوم ابوية عازم ناس على الفطور لو لا اذا اي حتى اروح انتحر

مدينة : بنات اخر زمن من كلشي تتعبون لاتخافين اخوج يجيب من مطعم موصين من ايام وانتي ميرا خاتون تعلمي حتى من تتزوجين تسوين شي بأيدج للمحروس مو يكعد هو وامه يسبوني لان معلمتج باوعت على فرح هاي اللي مريحتني حبيبة كلبي

فرح : طلعت لساني عليهم تسلمين خالتي الحبيبة بعد نزلي عليهم يستاهلون 😋

عفرا : 😤الله لنا الحبيات نازلة عليج مثل المطر منا حامد ومنا امي روحي اجى زوجج ودي لغرفتج انطيله حنان مو كافي ينام وحيد خافي الله بولدنا

فرح : عفرا سكتي شنو حنان وهو صايم عبالج منحرف مثلج هو هسة يجي اهنا يشوفني يرتاح وينسى التعب مو خالتي وانتي ميرا سدي اذاناتج من تحجي عفرا زين لاتفتحيها على الاخر

عفرا : ليش ياظالمة ولج ميرا فتحي اذنج وعينج تعلمي مراح تخسرين شي ورا الفطور ماما نروح للسوك والصالون لاتتحججين تعبانة وماعندي خلق حتى تكعدين تتغزلين بأبويه

مدينة : صدك متستحين كومي اخذي جهال اخوج نيميهم اذا هلكد تعرفين تنصحين غيرج علمي نفسج شوية تزوجي وعيشي حياتج انسي الماضي

عفرا : ليش هيجي ماما اني هلكد ثقيلة وكاعدة على كلبكم احرك روحي تردون هالشي كمت مثل الملسوعة اركض لغرفتي قفلت الباب وانهاريت شلون اتزوج واني روحي ويا حسن ليش ميفهمون اني ماكدر والله ماكدر سمعت صوت حامد وفرح يترجوني افتح الباب صيحت عليهم يعوفوني براحتي اللي ناسيتها بعد مامات حسن

مدينة : مسحت دموعي وميرا تواسيني اوف يابنتي لاتخلينا نرتاح ولا تريحين نفسج منسيتي شنو هالحب اللي مسوي بيج هيجي كعدي حبيبتي عادي تعودت على عفرا وانفعالاتي هي تحس بالذنب اتجاه نفسها بس متحس لاتنقهرين لان مراح تطلع وياج اني وعمج ناخذج للسوك والصالون وكل ملابسج على حسابي هدية مني .

ميرا : غسلت بدلت ملابسي كعدت افكر بيها متروح من بالي عفرا اشكد خطية تضحك وتسولف فجاة تنقلب وتروح لغرفتها تحبس نفسها الحب هيجي يسوي انشالله عمري مااحب ياربي لاتخليني مثل عفرا مو ناقصني حلمي ادخل كلية واشوف الجامعة وأتخرج اتعين اشكد عندي احلام ياترى مرمر هم تفكر مثلي لو لا

شامل : بديت بالتدريبات كلش متعب جسمي متكسر اللي ويايه وضعهم أسوء مني نسيت الحزن نسيت منو اني من الفظاعة اللي جنت اشوفها بملفات القضايا والأختبارات النوم على كد الحاجة وبس المكان سري محد يعرف احنا وين سافرت بالطيارة بعدين نزلت شخص جان ينتظرني بالسيارة صعدت جان موجود وياه شخصين لبسهم عادي ميدل على شي والسيارة شكلها غريب من الداخل افكر هذا شلون عرفني بقيت8ساعات بالسيارة وقبل منوصل للمكان ربطو عيوني كل اسبوع مرة نخابر والتليفون رقمها ميطلع مرات جنت اخاف من نفسي لوين اريد اوصل مرات ارتاح من اسمع من اصدقائي مصايبهم اللي اهون من مصيبتي مليون مرة