رواية عندما تزهر الاشواك الفصل الخامس 5 - بقلم ورود الخالدي

#عندماتزهرالاشواك

#الكاتبةورودالخالدي

البارت5

مهيمن:::

طلعنا من بيت ابويه وعلى اربيل كبل وصلنا بيت عمي ابو سوزان...وسوزان مترددت حجت لابوها وامها كل الصار بالتفصيل ..امها ضلت تفتر وتحجي:

واحنا شنو جابرنه ننطي بتنا لناس ميقدرون قيمتها..بتنا مدلله وهالوحدة ممستغنين عنها حتى نخليها تكرف وتلم زبايل..

جان سوزان تغمزلها..وتعض شفه:

ماما مو هيج الحجي لو ع الزبل الموضوع سهل بس..ميصير عمتي تتهجم عليه وتريد تضربني ومن يدافعلي زوجي ابوه يضربة كدامي شنو قابل هو طفل ماعندة كرامة..

شنو تتهجم عليج هيه هيونطة خو ما هيونطة تعيشين عدنا مدلله بجال ابوج..وانعل ابو ابليس لا ابو الشيطان!!!

عمي يسمع وساكت بعدين راحت يم ابوها تتبجبج..تكوله :

بابا بس مهيمن يحبني منطه بيه كدامهم وعاف اهله على مودي واجه ويايه:

جان ابوها انتفخ..كام لزمني من متني:

بابا مهيمن..اذا ابوك متبري..منك.ع مود بنتي هذا بيتي اعتبرة بيتك..واني ان شاء الله ابوك..لتحسبني ابو مرتك..لا اشو ابوك..واكثر من ابوك..وشتريد يجرالك..مادام..انت طلعت شهم وماكسرت كلب بنتي الوحيدة..

اشكرك عمي..

يالله بدلو وارتاحو..وباجر الصبح ارتب جوازاتكم وطيروا لتركيا..لو لجورجيا بكيفكم ارتاحو وغيروا جو ضربو الدنيا جلاق..وراح دخل الغرفته طلع شدة ورق خلاهن بيدي وكال:

هذا مصرفكم ضلو 3شهور اربعه برة واذا تحتاجون بعد خابروني احول الكم فلوس..

كلت بكلبي زنكيل متهمة الفلوس حقها بته تجقل ومدلله..صح فرحت بالسفر والفلوس بس احس روحي مقبوضة وعيون ابويه يلوحن كدامي..والاكثر امي منظرها ميروح من بالي وهي تتوسل بيه..اووف ربي شسوي ادري بنفسي غلطان..بس مابيدي شي..قابل اطلك مرتي واني احبها ومصارلي سنه من تزوجتها..وسافرنا لتركيا..اخ عالم ثاني شنو الناس شنو الجو.....

شنو المناظر..ورغم كولشي..كلبي هناك يم اهلي والاسوء نسيت موبايلي يمهم لان طلعت معصب وكلبي مكسور متذكرت موبايلي واني محافظ اي رقم بس رقمي..اشتريت موبايل جديد دكيت على رقمي مغلق..شلون بيه..اريد بس اعرف..اخبار امي..بقيت شهرين بتركيا بس كلبي يلوب..روحي مو عندي..بعدين فكرت افتح نت لان حساب لمياء ع الفيس بوك موجود عندي بالاصدقاء..فتحت نت فرحت لكيتها فاتحة اتصلت مجاوبت..ورة ربع ساعة دزت رسالة:

مهيمن..الموبايل جان ع الشحن مشفت..الاتصال..رد عليه لخاطر الله..

شفت رسالتها..سكتت لان سوزان كاعدة يمي ومااريدها تحس دا احجي ويه اهلي

طلعت برة اتصلت..جان تجاوب لمياء

هلو مهيمن شلونك اخويه ...ليش مخابرتنه امي راح تموت من القهر..

موبايلي بقه بسيارة ابويه..ماحافظ الارقام..شبيها امي لمياء..حاجيني..

امي تكسر الخاطر مافاركتها الدمعة عليك..حتى رادت تلحكك..لاربيل بس ابويه سوة مشكلة وياها وصياح وعياط..وكلها اذا تلحكين ابنج اطلكج..

نزلت دموعي اختنكت..اوووف يمه..الحنينة

لمياء..صيحيها وفتحي كاميرا..خلي تشوفني..

هسه ما اكدر هي يم ابويه واذا عرف ابويه دنتواصل وياك يحرك البيت علينا ميريد يسمع بطاريك ابد..

شوكت اكدر اشوف امي:

اني ادزلك رسالة من يطلع ابوية المهم..انت شلونك مهيمن..والله اشتاقينالك..

اووف لعد اني شكول..لمياء..راح اموت على شوفتكم..راح افتح كاميرا خلي اشوفج:

فتحنا كاميرا

هاي انت وين مهيمن بيا منطقة

اني بفندق بتركيا..

يااا شتسوي..بتركيا

مسافرين اني وسوزان..

يعني تبقون بتركيا مترجعون؟؟

لا كم شهر ونرجع..

ها..زين؟؟

وبقينا نسولف اني وياها وبعدين قطعنا الاتصال بالليل دزتلي رسالة

امي يمي وتريد تشوفك

طلعت برة الفندق اتصلت كاميرا..بسرعة ..طلعت امي دموعها مغركة خدودها مختنكة..........

بالبجي..

يمه مهيمن بعد عمري..همزين شفتك..

اني هم بجيت..من شفتها كوة نحجي..لان نبجي ونسولف وحجيتلها اني بتركيا ومن ارجع للعراق اجي لبغداد واشوفها باي مكان بدون علم ابوية وكتلها تجيب وياها حمودي وضمياء..اشتاقيتلهم حيل..

ورة شهرين رجعت للعراق وسويتلي عذر جيت بي البغداد وشفت امي وحمودي وضمياء ارتاح..كلبي...وكمت كل شهرين 3اسويلي حجة اجي بيها البغداد واشوفهم..وع النت هم نتشاوف ونسولف..من غير علم سوزان واهلها ومن غير علم ابويه ..هم..وسنتين على هالحال.. امي تسألني ..

ماحبلت مرتك..؟؟

اكولها لاوالله..

بعدين صار موضوع الحمل يهمني.كلت السوزان خلينا نروح للدكتورة ع مود الحمل:
.كالت:

ع شنو نروح اني اخذ مانع!!

تخبلت ليش تاخذ مانع..جان تكولي:

لا حكين ع الخلفة خلي نطلع ونتونس ونسافر..قنعتني.واربع سنين هيه تاخذ مانع واني ع نفس الحال اتواصل ويه اهلي بالسر..كلبي طك على ابويه اريد اشوفه شلون مجان ..صح يدزولي صور لابويه بس اريد اشوفه من صدوك..جيت لبغداد دزيت جماعة معارف..حتى يحجون ويه ابويه طردهم وكلهم:

ماعندي ولد اسمه مهيمن واذا يجي لبيتي اعتبرة حرامي وطاب للبيت ارميه طلقة واكتله وشيصير خلي يصير

جان هذا رده..ميريدني ومتبري مني..للموت..بس اني كلبي طك عليه صار فوك الاربع سنوات اشوفه بس بالصور..قررت اروح للشركة مالتنا اشوفة ولو من بعيد وفعلا..رحت..اباوع القطعة مغيرهاجانت شركة ابو مهيمين للاخشاب..هسه شايل اسمي من القطعة كاتب شركة ابو احمد للاخشاب..انعصر كلبي صدوك متبري مني وشايلني من حساباته كولها بس يبقى ابويه ومشتاقلة..شفته طلع وكفت اباوع من بعيد..اووف متغيير ابويه..حتى مشيته مو مثل قبل صاير يمشي على كيفه..بودي اركض واحضنه بس ادري بيه عصبي ويجوز يفشلني بالشارع..المهم ارتاحيت من شفته ......

وكمت كل ما اجي البغداد..اجي اشوفه بسكوت..الى ان انخطبت..اختي لمياء..اتجرأت اخابرة اول محجيت سد التليفون بوجهي..دزيتله رسالة:

يابة ادري بيك متريدني بس..اريد احضر المشيه مال خطبة لمياء!

جان يخابرني:

اسمع ولك..انت متت من زمان من يوم طلعت من بيتي..وماكو ميت يحضر مشيات..ادري امك توصلك الحجي اني ما نايم على اذاني..بس انت متدخل بيتي اله فوك جنازتي..واذا دخلت اطلع جنازتك من البيت فاهم لولا وتدري بحجايتي وحده..فكافينا شرك..وبعد لتتواصل ويانه..

واتزوجت لمياء..ومحضرت مشيتها بس نتشاوف ع النت وكامت ضمياء هم تراسلني لان هي هم كبرت وصار عدها حساب ع النت.ومرت الايام والاشهر..صار فوك الخمس سنوات مداخل بيت اهلي..فكرت بلكي من تصير عندي خلفة ابويه..يسامحني ويرضة عني من يشوف احفاده..كمت الح على سوزان تكطع االمانع..وفعلا كطعته..بس مصارحمل لاورة سنه ولا ورة سنتين سبع سنوات متزوجين وماكو اطفال وكامت..تروح للدكتور تعالج..وبالسنه الثامنه لزوجنا الله رزقنا وحبلت سوزان جنت طاير من الفرح بحملها وكلت هو هذا الطفل الي راح يرجع العلاقة ويه ابويه..

سارة:::

من طلع مهيمن من بيت عمي بعد مشفته سنين وسنين مرت لا سأل عني ولا يعرف اني وين الله خالقني هو ناسيني واني هم نسيته..كل الي يربطني بيه ورقة سيد وعقد محكمة..وبهالسنين كبرت..وعرفت الدنيا زين عايشه مدلله عد بيت عمي وشايليني بالصلوات يحبوني اكثر من بناتهم..البس احسن لبس وعلمتني خالة ام مهيمن ع الصلاة والصوم وكمت البس..حجاب..وشاطرة بالمدرسه انجح سنه على سنه حتى من صرت بالسادس..اشترولي ملازم اقرة بيهن وعيت ع الدنيا صرت ذكيه افهم كولشي وعندي كومه صديقات..نحجي ونسولف ونتراسل ع الماسنجر وكل وحدة عدها حبيب شكل..بس اني ملتهيه بدراستي اريد اطلع معدل زين........

وحتى اذا صادفني شاب وراد يتعرف عليه اتهرب منه وما انطي مجال صديقاتي متعجبات معقولة كل هالجمال الشايلته وماعندج حبيب؟؟؟ميعرفن اني كل شاب اشوفه اكرهه واشوف بيه صورة عمو نزار..الي اشوفه بكوابيسي..ميعرفن شكد اكره شي اسمه رجال...المهم..خلصت سادس ومعدلي انقبل كليه صيدلة عمي كيف كال اخليها اداوم وتشوف الدنيا وبداية الدوام انخطبت بت عمي ضمياء لان لمياء تزوجت وصار عدها ولد ..دخلت الكليه عالم ثاني واختلاط بنات وولد وهناك تعرفت ع ولد اسمه ابراهيم من اهل الكوت..اول مرة كلبي يرتاح الولد هو حيل مؤدب وحباب...وبقينا مثل الاصدقاء اني وهو بعدين اعترفلي وكلي هو يحبني وقصدة شريف..واذا اقبل بيه نهايه هالسنه يتقدم ويخطبني..وبصراحة اني هم حبيته..وحجيتله كولشي عن حياتي..كتلة اني متزوجة بس ع الورق من ابن عمي..وهو..معايش هنا متزوج وبس تصير فرصة ويجي ننفصل اني وهو..اقتنع بكلامي..وبقينا واحد يحب اللاخ حب شريف هو كولش مؤدب وخجول وعينه ميرفعها بيه ..عجبتني اخلاقة وتعلقت بيه كولش ومحتفظة بصورة ..بموبايلي..ونتراسل ع الماسنجر لو يتصل بيه ونسولف..بس اني معندي احد احجيلة حتى يصير بجانبي عمي ما اكدر اسولفلة استحي منه..ومن..انخطبت ضمياء لزميلها بالكلية اتجرأت احجي لخالة ام مهيمن..لان هي مثل امي..الي صار كومة سنين مشايفتها..لان عمي محرم عليها الجيه وكولهم يخافون منه..اول مرة تعصبت وكالت :

انتي متزوجة شلون تحبين وترتبطين بواحد ثاني؟؟

بجيت وكتلها يازواج هذا خالة هو ابنج يدري بيه هسه ميته عدلة صار 8سنوات ميعرف عني شي..قابل يضل طول العمررابطني يمه هو اصلا ميريدني متزوج ويحب..مرته وعايش حياته وعاف اهلة وولايته ..اني بيش اهمه...اصلا..اذا متت..يكوم يهلهل..ويكول هم وانزاح وهمزين مرته مكشفت زواجنا ياخاله..

اقتنعت ..........

خالة بكلامي..وكالت الله كريم بس هسه لتحجين لاحد خلي سر بيناتنا ومن تخلص هالسنه ويريد الولد يجي يخطبج اني احجي ويه عمج واخلي يطلكج من مهيمن..وتشوفين نصيبج انتي مثل بناتي واريدلج الخير جنت اتمنى تصيرين جنتي..واشوف خلفتج من مهيمن بس الله ماقاسم تستمرون..

اشكرج خاله ام مهيمن والله انتي اغلى من امي لان امي ذبتني عدكم وشافت حياتها ونستني وانتي حضنتيني مثل بنتج وعمرج مقصرتي ويايه دللتيني..اني احبج خاله...كولش احبج..انتي وعمو ابو مهيمن الله عوضني بيكم عن الام والاب

انتظروا بارت6♥♥♥♥