رواية عندما تزهر الاشواك الفصل السادس 6 - بقلم ورود الخالدي

#عندماتزهرالاشواك

#الكاتبةورودالخالدي

البارت6

مهيمن::

الدنيا مسايعتني بحمل سوزان حيل فرحان لان كل افكاري محصورة بهذا الطفل الي راح يكون سبب الصلح بيني وبين ابويه ان شاء الله وزادت فرحتي من ظهر بجهاز السونار ولد..اكيد ابويه راح يطير من الفرح..من يشوف حفيده وينسه كل الزعل ويسامحني ويلتم شملنا من جديد رغم الحمل طلع ..عليه انتقام يومية رايحين وراجعين ع الدكتورة وسوزان ماصدكت تدلع زيادة وشلعت كلبي شلع بس كل هذا واكول كولشي يهون بس خلي يجي الولد واخر شهر الدكتورة كالت مراح تجيب طبيعي لازم عمليه بعد3ايام..خابرت ع تليفون ضمياء ردت افرح امي:

هلو ضمياء شلونج..

الحمد لله اذا انت بخير احنا بخير!

ضمياء انطيني امي

امي متكدر تحاجيك صار كم يوم متطلع من غرفة ابويه لان ابويه مااله خلك وياخذ كومة ادوية..ولازم راسه خطية..

تحجين صدوك ابويه بعمرة ما اخذ حباية براسيتول..شنو شصاير..

مثل ما اكلك صار كم يوم حته للشركة ميروح ما اله خلك..واول البارحة دخلت اخذ الشاحنه نص الليل لكيته..لازم صورتك ودموعة يجرن..

لازم صورتي..ودموعة يجرن..تحجين صدوك انتي؟؟

اي والله مهيمن..حتى من شافني دخلت ضم الصورة ومسح عيونه بسرعة مهيمن انت لازم تجي هالفترة اني متأكدة اذا جيت ابويه راح يسامحك!!

الله يسمع من حلكج ضماوي بس هالليلتين والليلةالثالثة اني جاي بس تطلع سوازان من العمليه اجيبها فورا هي وابني وافرح ابويه ومتأكد راح يصالحني ويلتم شملنه من جديد..

ماشي ننتظرك

وسديت التليفون احسب ساعة ساعة شوكت تدخل سوزان للعملية حتى اخذها واروح لبيت ابويه..ومرت الليلتين عبالك الفين ليلة..واجت ساعة العمليه ودخلت سوزان للعملية واني بممر الانتظار دك تليفوني رقم ضمياء..نطيته رفض وطلعت للحديقة اتصلت وقبل متحجي كتلها:

ضماوي...

دخلت سوزان للعملية ساعات واصير يمكم اني وابني؟؟

شو هاي مختنكة وكوه تحجي:

مهيمن..مهيمن يا ابنك..ابويه..ابويه انجلط..وهسه بالمستشفى والاطباء يكولون حالته خطرة كولش تعال..مهيمن تعال هسه لو تلحك لو متلحك عليه...

اسمع صوتها تفرفرح بس..ممصدك حجيها سديت التلفون واخذت تكسي من باب المستشفى كتلة كبل لبغداد واستعجل...الطريق كله كلبي يتعصر واقشمر بروحي اكول ابويه قوي..وهاي ضمياء خايفة وتبالغ بالحجي هسه بس اوصل ويشوفني..يصير زين ويكوم ..وقبل ما اوصل بغداد بنص ساعة اتصلت ضمياء شلت التليفون:

اسمع بس صريخ:

مهيمن..ابويه مات..مات..مهيمن راح ابويه..بعد منشوفه..

وسدت التليفون..

سارة:::

اخذو عمي الصبح للمستشفى..كالو متخربط حيل والبنات كولهن راحن بس حمودي بقة يمي..اشو ساعه 3الظهر..اجاني الخبر عمي توفه حسيت روحي راحت مني..مو عمي الي توفه ابويه حسيته توفه مرة ثانية ممصدكة اشوف لمياء وضمياء..يملخن بشعرهن ويفرفحن واني بس دموعي يجرن بيتنا انترس نسوان وجهال..النسوان يبوسن بيه ويعزني..بس ممصدكة..ابد عقلي ميشيل الموضوع عمي البارحة جان بغرفته واليوم مات....بعد ما اشوفه يعني تيتمت من جديد..
بالليل اخوان خالة ام مهيمن جابوها للبيت لان واكعة بالمستشفى بس حالته من جابوها تبجي الصخر بس تونون..وملخة خدودها..وصوتها بالكوة يطلع..جتي يمي خالة ام يوسف اخت خالة ام مهيمن تكولي:

بنيتي صيري هبت ريح..لمي البيت..النسوان غربة يطبن..اوكفي بالمطبخ ويه بناتي..انتي جنتهم..ولازم تكومين بالنسوان

دخلت المطبخ ما اعرف شسوي البنات يخدرن جاي....ويكسرن ثلج اني اديه ميته ودموعي تجري مثل المطر....ردت اشوف عمي افكر بلكي يجيبوه للبيت..بس مجابو كالو طلعو يدفنو بالليل من المستشفى لان الدنيا حارة...وبقينا للصبح نبجي وخاله مصدومة....

وتفرك بديها..حالها صدوك يبجي الصخر ..الفجر كالو اجوي الولد من الدفن وسمعت مهيمن جاي وراح يدفن هو وخواله وولد خواله لان عمي ابو مهيمن جان معنده اخوان بس ابويه وتوفه من زمان..بس مشفت مهيمن كالو واكف بالفاتحة واني هم ويه النسوان لهذا مشفته ..بالليل..النسوان خفن بقت بس اخوات خالة وبناتهن نايمات بالاستقبال..خالة ..عافتهن ودخلت لغرفتها.. بقيت بالاستقبال يم البنات طلعت اجيب مي واسمع صوت رجال خشن يبجي:

ليش..ليش يابه سويتها صدوك..ليش رحت عن الدنيا ومسامحتني..ليش يابه ..ليش..؟؟

واسمع صوت كانما ديضرب راسه بفد شي....ورجع يبجي:

سويتها صدوك..يابه طلعت جنازتك..ومخليتني ادخل البيتك..ليش حرمتني من شوفتك..

طبعا اسمعه ودموعي يجرن..صح احنا نسوان ونبجي مسألة عادية بس واحد من يسمع صوت رجال خشن ينعى ويبجي اصعب..والله اصعب لحظة بحياتي من سمعت صوت مهيمن يبجي ويون على ابوه واسمع خاله:

يمه ..راسك..يمه لتضرب راسك بالحايط..

يمة عوفيني..يمه اريد اموت..اريد الموت ياخذني مثل ما اخذ ابويه..

الباب مسدودة عليهم ما اشوف شي بس صوت بجي  مهيمن..للصبح منام..بس يبجي وقافلين الباب ثاني..يوم هم مشفته كالو واكف ..بالفاتحة وثاني ليلة وثالث ليلة نفس الشي هم ساديين الباب هو يبجي ..وصوته يبجي الما بكلبه رحم..رابع يوم الفجر..طلعت خالة:

يمه وليدي..الحكو عليه وليدي راح يروح من ايدي..يبووو..يبووو..ابو يوسف ابو فؤاد وينكم الحكو على مهيمن وكع..يمه وليدي..

شفت اخوه خالة ابو يوسف وابو فؤاد دخلو للغرفة وياهم كم ولد..شفتهم شايليه ويركضون للسيارة ويصيحون:

مابي شي..رضية فوتي جوة دخلوها جوه..لامه دخلوها..

اجوي ..ولد اخوها..ابو.يوسف دخلوها....

وهي تفرفح:

وليدي مهيمن راح يروح مني مثل ما اراح ابو..وتبجي بحركة...نص..

ساعة.... واجه زوج لمياء..كال لخالة:

مابي شي عمه لتخافين بس عندة صدمة ولان صار 3ايام بس شايط ومماكل شي وكع شدوله مغذي ومهدئات..يومين 3ويطلع

اخذوني..اخذوني لابني خلي اشوفة
وبقت تلح..وتبجي..اضطر زوج..لمياء ياخذها..وبقت خالة ومهيمن 3ايام بالمستشفى..طلعو بيوم السابع مال  عمي..مهيمن ابد مشفته ولاصارت عيني بعينه من اجه لليوم

مهيمن:::

طلعت من المستشفى..بقيت بغرفتي لان امي تتوسل بيه تكولي ارتاح وكامت تصعدلي اكل فوك..موبايلي ما ادري عنه..بيوم الثامن جابته الي ضمياء..

هذا موبايلك..مهيمن دك..هوايه بعدين طفه من الشحن..شحنته بس مفتحته اخذته فتحته لكيت مكالمات من سوزان ومن امها وابوها اتصلت عليها قبل متحجي:

سوزان كولشي لتحجين..ابويه توفه وما اجي الى ان يخلص الاربعين؟؟

ونهيت المكالمة وقفلت الجهاز ما الي خلك للدنيا كولها بقيت بغرفتي منزلت..الى ان صار العاشر مال ابويه..ضمياء ولمياء يصعدن يمي وحمودي وامي..ينامون يمي بنفس الغرفة..ورة يوم صعد يمي خالي الجبير:

وليدي مهيمن..لازم تروح لشركة ابوك عنده طلبيات الله يرحمه والعمال اجوني للبيت كافي حابس روحك اطلع للشركة شوف مصالح عائلتك ماعدهم غير بس الله وانته

اي..خالي باجر اطلع

امي كالت المفاتيح..والاوراق مال ابوك..كولهن بالقاصة بغرفتنا..

نزلت بالليل اخذت مفتاح القاصة من امي طلعت مفاتيح الشركة والاوراق..ولكيت بينهن مغلف..اصفر..مكتوب عليه..لابني مهيمن..هذا خط ابويه فكرت شبيه هذا الظرف..فتحته لكيت ورقة مكتوب بيها:

ابني مهيمن..احس روحي مامطول بهالدنيا..انته باقي بمكاني..
بس شفت حروف ابويه جرن دموعي كملت؛

صح ما احاجيك بس كل هذا لمصلحتك..ولتعتقد فد يوم..ما فكرت بيك اني والد ومن تخلف راح تعرف شنو معنى الوالد..وليدي اذا صار بيه شي..اوصيك بامك..دير بالك......

عليها..ردت اخذها للحج..بس اشوف روحي ما الي خلك..وصيتي تاخذها للحج بمكاني..واوصيك بخواتك..انت ابوهن وانت اخوهن..واذا ضمياء يردون عيالها ياخذوها لتعطل عرسها..وحمودي ربي بيدك اريده يصير قوي..ويخشن كلبه..وخلي يكمل دراسته..وواصيك بعد بمرتك سارة بويه عاملها بالمعروف..وصيتي الك..وذمه بركبتك..انه متعوفها ولا اطلكها..ابد..وبالنسبة لفلوسي وورثي..هو بيدك..شوكت ما طالبن اخواتك وزعه عليهن بشرع الله..

ولا تفكر اني ماراضي عليك..لابابا اطمئن ماكو غضب بكلبي عليك..وراضي عنك من كلبي..يشهد الله بس ردت اسويلك درس..

خلصت وصيته ودموعي مغركه وجهي بس كلامه ريحني من كلي راضي عنك الحمد لله..سديت الظرف وضميته..وكلت:

صار..يابة كل التريدة يصير..

صعدت لغرفتي ردت انام جان تجي ضمياء:

مهيمن..اني كليتي قريبة اروحلها مشي بس كليه..سارة حيل بعيدة ..وخطية صارلها 12يوم ممداومة وامتحاناتها جاية ..جان ابويه مكيف وفرحان بيها ويوصلها بنفسه للكليه ..اذا باجر تروح للشركة اخذها وياك وصلها..

ماشي..ماشي

وكعدت الصبح صعدت سيارة ابويه تذكرت سارة شفت حمودي يم الباب كتله صيح سارة خلي اوصلها مضل وكت:

اول مرة اشوفها صار اكثر من8سنوات بس مدنكة شفت بس طولها لابسه تنورة سودة طويلة وقميص وحجاب اسود لبسها حيل مستور بحيث مشفت شي لا وتمشي مدنكة..حتى وجهها مشفته فتحتةالباب الورة وصعدت:

كلتلها وين كليتج:

كالت:

اطلع كبل ومن نوصل للتقاطع ادليك:

لا يا الله شهالصوت صوتها ناعم يخبل..رغم كلبي مغيم وحزين بس صوتها طرب اذني..بس هي مدنكة اريد اشوف وجههاقبل منوصل التقاطع كتلها:

منين افتر يمنه..لو يسره..رفعت راسها:

بس شفتها..دست بريك الطخت السيارة بالرصيف..شنو هاي دخيل رب العالمين هاي من صدوك سارة..لو اني متوهم..معقوله هيج صايرة؟؟

بقيت واكف صافن والسيارت ادوك هورنات من وارية ويصيحون..اطلع..اطلع شبيك واكف...بس جني ما اسمعهم..شهالوجه يربي..دائرة كاملة عبالك..قمر ضاوي بالحجاب الاسود الحواجب..مجرورات مرسومات والعيون ع كد ما كبار وحدتهن جنها ساعة ولونهن عسلي فاتح..يلمعن..والرموش ثخان وطوال..والخدود متفحة والشفايف اووف ربي ململمات..مثل الطماطاية الناعمة..والشامه جوة الشفه مكانها مغري..وتكتل كتل..بقيت صافن لا اخذ ولا انطي..

فزيت من سمعتها كالت:

عمو..مهيمن..ليش واكف..السواق خبصونه بالهورنات..متسمعهم؟؟

انتبهت السواق حاركين الجو بالهورنات ويصيحون يمعود اخرتنا اطلع ليش موكف السير..مال الشارع..

حركت مشيت..مشدوه..افكر شلون بيه مرتبك..اذا ابقة اباوعلها ميه بالميه اسوي حادث..دنكت بس بكلبي..شي يرفرف..حتى حزني مافكرت بي شدهتني بت الاوادم..لا وجماله تكولي عمو..مهيمن؟؟

انتظروا بارت7♥♥♥♥♥♥♥♥