رواية عندما يعصف الحب الفصل السادس والعشرون 26 - بقلم زينب العبيدي(زينبيه)

مررررراحب🙋‍♀️ حبات القلب❤❤😘

تفاعلو 😠

#عندما_يعصف_الحب

#بقلم_الكاتبه_مولاتي_زينب

#البارت٢٢

مر اسبوع والحال ماتغير غير ان كليوم عزام يوصلها للجامعه وطلعوا ٣ مرات تعشو بره بس بكل مره جانت نفس القبلها ورود ابتعدت اكثر من قبل عن عزام جانت تجاوب على كد السؤال وتسكت مايدور بينهم اي حوار او مواضيع لاتاخذ ولاتنطي بالحجي وجان عزام كل لحظه تمر عليه بعدها دهر بالاضافه الى ان الغيره كاتلته متصور ان بال  ورود مشغول وي رضا جان محتار شيسوي من جه الحب والغيره ماكله كلبه ومن جهه مأيس من حب ورود اله

باليل الساعه ١٠ دخل عزام للبيت سلم على امه وابوه وسعاد وعماد الي جانو كاعدين بالصاله كعد يمهم

سعاد عزام متعشي لو اصبلك

عزام لامتعشي مشكوره جا ورود وين

ام عزام سوده علي بنيتي مادري شبيها مريضه وبس دايخه وجهه اصفر ومساع ذبت من راسه مادري شبيها بنيتي

عزام وليش ماخذيتوه للدكتور يمه صدك جذب

ام عزام يووو يمه طاحت وذره من اللساني وانه اكللها خل ناخذج وكومي بدلي وامشي للدكتوربس ابد راسها يابس

سعاد حتى اني كلتلها بس معنده تكول مابيه شي تعبانه من الدوام

ام عزام هي كاطعه الاكل وماتاكل لاتتغده ولاتتعشه تنگش تنگش(معناتها تنقش كلمه يكولونها بعض اهالي البصره)  تكول معدة بلبول يجوز فقر دم من قلت الاكل

عزام مو بكيفها ماتاكل شهل حجي ولازم تروح للدكتور وكام راح الغرفتها لكه الباب مفتوح والضوه مشتعل ونايمه كا العده تفتح الباب والضوه لان تخاف وتتخيل اشباح و وحوش

دخل وسد الباب كعد على طرف الجربايه يمها رفع خصلات شعرها عن وجها وهو يتامل وجها دنك باسها على كصتها فتحت عيونها بكسل

وقبل ماتحجي سبقها وحجه شبيج حبيبتي شنو يوجعج وردايه

ورود مابيه شي شوي دوخه ولعبان نفس

عزام وليش ماقبلتي ياخذونج للدكتور ليش لعناد حبيبتي اذا ماتخافين على روحج فا انه خايف عليها

رفعت روحها ورود وارتجت وحجت مابيه شي والله باجر اكوم مثل الحصان لاتخاف

عزام زين يالحصان اذا ماكمت باجر اخذك للدكتور

ورود عابت لاتغلط علي

عزام انتي كلتي ماكلت شي انه

ورود روحي واغلط عليها انت لا

عزام مو روحج هي روحي وكيفي

ورود عزام لاتكول هيج اصلا لاتحجي هيج حجي

عزام زين ما راح احجي خل اسوي

ورود شتسوي

عزام مو انتي ماتقبلين احجي جاشلون اعبر عن الي بداخلي فا ماكو غير ابوسج او احضنج مثلا او مادري هيج سوالف يعني

ورود اهووو شبيك عزام

عزام احتاريت مايصير واحد يكبت مشاعره ينفجر لو حجي لو فعل شتكولين

ورود خليك على الحجي احسن 

عزام زين احبج اموت عليج اعشقج اهواج كل معاني الحب بيج تتفسر

ورود ابتسمت

عزام جذب ابتسمتي لو يتراوالي شنو يعني هل ابتسامه

ورود اي ابتسمت اتذكرت سالفه صارت وياي بالكليه اليوم

عزام بيأس اهاا وليش هسه تذكرتي هلشي وبهل اثناء لمن انه حجيت بالضبط

ورود عادي بدون مقدمات تذكرت هل شي

عزام ورود احنه ما صارلنه هواي كلها اسبوع سوه مو صح

ورود امم

عزام ماتغير بداخلج شي شلون تنضريلي ومن تشوفيني شنو شعورج ادري الوكت قصير ومالحكتي بس اكو امل بالمستقبل لولا

ورود اتنهدت ودنكت ما ادرري

عزام شنو ماتدرين احجي اي شي احجي لبداخلج بكل صراحه

ورود الي بداخلي صرت استحي هواي منك ومو مثل قبل ضليت احسك غريب من تصرفاتك وحجيك بس هيج اما الباقي كلشي على ماهو

عزام اها يعني شلتي فكرة انه اخوج وهل سالفه

ورود اكيد انساها وانت كل ماتشوفني تكلي حبيبتي وحياتي ومريتي وامنييتي وتزعجني

عزام مايهمني ان اذا ازعجج اولا اهم شي انتي شلتي الفكره يعني اكو تقدم صدكيني انتي تحبيني بس ماتردين تثبتين النفسج هل شي

ورود لابالله بالكوه تحببني شنو داخل كلبي انت وباوعتله بنص عين

عزام اكيد داخل كلبج ومتمشي بي

ورود مستحيل ولا واصل البابه

لزمها من شعرها وقربها عليه بحيث صارت المسافه بينهم بس هوى انفاسهم وحجه ورود خوبالج مو ويه غيري

رادت تتبعد عنه بس جان مثبتها بأيدها عدل حجت وهي تحاول تتبعد بالي مو ويه احد

عزام متاكده

ورود والله شبيك وخر اذيتني

قربها حيل عليه وهي تقاوم وباسه بوسه سريعه دفعته بثنين ايديها حيل وطاح من الجربايه كام وهو عيونه بكصته ثول حيوانه ادبسز غبيه طاح حضج

ورود وهي تصيح مامسموحلك تلمسني بدون رضاتي فهمت

اتقرب عزام عليها ولزمها من فجها وعصرها اششو كيفي شتردين تسويين

ورود عزام لاتكرهنيي بيك هذا مو اتفاقنه

عزام حجه بعصبيه لا ضمن اتفاقنه لان احنه اتفقنه نعيش فتره خطوبه والمخطوبين تصير بينهم هل سوالف وسوالف الغزل والحب اتحمليني غصبا عنج فاهمه لازم تتحمليني واله ماراح يتغير شيي وراح تضل مشاعرج جامد اتجامي

ورود وبرأيك بهل طريقه راح تتحرك مشاعري

عزام اكيد تتحرك بس انتي انطيني فرصه انكون اقرب من هل حدود الخالتها انتي

ورود ما اكدر

كعد يمها عزام شوفي انتي صغيره ولهذا السبب متحملج ومتحمل غبائج وجاي ارخص لج هواي من كرامتي ولان احبج ما استنكف اتنازل الج شوفي ياورود لازم تنطيني فرصه اتقربلج اكثر غصبي نفسج مره مرتين راح تتعودين بس انتي شيلي هل شوائب الي ماليه راسج واعتبري ابن عمج وزوجوج اله بدون حب ولاشي مثل مازوجوج الرضا اول مره انه ماطالب منج شي هواي بس لاتعارضين اي شي اسوي حتى الكلمه تعترضين عليها

اكتفت ورود بالسكوت ومدنكه راسها للكاع

عزام ها اشوفج ساكته

ضلت على سكوتها

عزام متفقين لو شلون

هزت راسها ورود بمعنه اي وحجت بس انت اصبر علي ولاتصير جريئ

عزام ولج هو انه شمسوي بس جاي احجي بالساني وكتلت روحي ياله بستج بوسه طايره حجه الكلمتين الاخيره وهو يضحك

ابتسمت ورود على حجايته

عزام ها تذكرتي شي

ضحكت ورود اكثر

عزام يله اكوم اصعد اسبح وابدل واجي يمج

ورود شكو تجي ليش

عزام هاي شنو طرده ماعندي شي اكعد اسولف وياج

ورود اها

عزام وانتي كومي اكلي لاتضلين هيج تعبانه وجهج اصفر

ورود ما اشتهي بحلكي طعم مر

عزام ميخالف جبري نفسج وباجر اخذج للدكتور

ورود لا ما اريد يمكن فلاونزه هسه اخذ علاج

عزام. هسه كومي اكلي وبعدين نتفاهم وطلع 

طلعت ورا ورود شافت عماد وسعاد كاعدين الوحدهم وعماد شابكها ويهمس بأذانها وسعاد تضحك ضلت امفهيه ورود من الخجله ماتدري ترجع لو تتقدم وفجأه انتبهولها  واحد دفع الثاني وه يضحكون

عماد ولج انتي من يمته هنا حجه وهو يضحك

ورود. اني جنت عابره اروح للمطبخ اكل ماي جوعانه

سعاد هاا تاكلين شنو وفطسو من الضحك عليها

ورود حجت بسرعه وهي تحرك بأيديها يوووه شسويلكم اكو واحد يكعد اهنا ويسوي هيج سوالف توترون المايتوتر كولو ناس وياكم بالبيت زين المن خلو الغرفه اذا اتسون هيج اشياء اهنا

عماد. اعصابج يابه وين ندري بيج كاعده  اصلا احنه غرنه من عدكم مو هيج سعاد حجه وهو يغمز الها

سعاد. يووو يمعود ليش هي الباگله هم يطلع منها دهن هاي يابسه مو وجه رومانسيات

عماد التفت على سعاد خجلي شوي تحجين على اختي بهيج سوالف كدامي

سعاد. اول شي انته الحجيت. وثاني شي هاي حلوه مال اختك واخوك مزوجين ههههه

عماد اي هي اختي بس مو اخته مو صح ورود

ورود. دارت وجها وهي تبوس ايدها وجه وظهر

عماد جنه استهزأت بينه يححي وهو يظحك هديني خل اروح أئدبها

سعاد لا خطيه مريضه.

عزام وين ورود.

عماد. باوع السعاد وهو يضحك الظاهر شارده

عزام. منو شارده

عماد ورود منك.

عزام شتخربط انته جاي اسألكم وين ورود

ورود. ها حجت وهي جاي تاكل  بيدها لفة جبن كوب
حليب

عزام لا ماكو شي بس جاي اشوفج اكلتي شي لو لاء

سعاد اوف اوف. شفت شلون يسأل عليه اكلت لو لاء احححح شبيكم مو اخوان انتم موتفس الدم واللحم

حجه. عماد وهو يضحك لج احنه قدييمين وعلينه تراب  هذوله توهم مطلعينهم  من الباكيت

ورود. سلامات انتم شبيكم اليوم شو هواي تحجون وتصنفون

عماد. اي والله بعد اخوج طاكنه الضيم تعالي انطيني هاي اللفه

ورود. جا الكاعده يمك شبيها ماتسويلك عشه

سعاد سويتله مرتين قابل مثلج ماتسألين بزوجج اتعشه لا مبارك ملتهيه بروحج

عزام هو هذا المطلوب تهتم بروحها شعندي غيرها اذا تاكل معناتها انه شبعان يحجي ويباوع الورود وهو مبتسم

عماد خرب حضي شسالفه عزام ترى سعاد راح تطلب الطلاك ارحمني خويه لا تشيشها علي

ورود شكرا

سعاد هو هذا الي كدرتي عليه صدك والله ينطي الجوز للماعنده سنون تحجي وهي تضحك

ضحكو ورود وعزام

عماد حجه وهو يضحك طاح حضج كاعده كبالها وتحسدين بيها والتفت على عزام وحجه اكوم اخذ مرتي واروح لا نوب يصير مصيرها مثل زهيره ياساحر النساء

وضلو يضحكون وستمرت السوالف للساعه ب١ بعدها راحو عماد وسعاد الغرفتهم ينامون

عزام ماتنامين

ورود اي هسه اروح تحجي وهي لازمه بطنها وتتلوه

عزام بيج شي

ورود لا بس بطني توجعني

كام عزام وكومها وياه امشي ارتاحي بغرفتج على ما يصير باجر واخذج للدكتور

هزت راسها ورود ومجرد مادخلو للغرفه طلعت ورود تركض وايديها على حلكها وكبل للحمام اتقيئت تبعها عزام وهو واكف باب الحمام شبيج وردايتي اسم الله عليج حجه بوجع ونكسار لحالتها غسلت وطلعت

عزام احجيلي شنو يوجعج حجه وهو لازمها من ايدها وموديها الغرفتها

ورود ما ادري وجع بطني ولعبان نفس ودايخه وحلكي مر مادري شنو السالفه ياعزام

عزام باجر اخذج للدكتور  ياعين عزام انتي

دخلها للغرفه ونومها على الجربايه نزعها الشال وغطاها وضل يباوع عليها وحجه وجهج اصفر

ورود يمكن فقر دم

عزام نامي حبيبتي  طفه الضوه

ورود لاشغله وافتح الباب

عزام لا ما اقبل تنامين والباب مفتوح والولد هنا يعبرون عليج والنايم مايدري بروحه يجوز تتكشفين مايصير يا ورود

ورود جا اخاف

عزام انه انام يمج

ورود لا عزام

عزام ليش هاي مو اول مره انام سوه

ورود بس هذيج المره...

عزام قاطعها لاتخافين ماراح يتغير شي ونام على الطرف الثاني مال الجربايه

كامت ورود

عزام ها وين

ورود اجيبلك غطه

عزام انتي نامي انه اذا بردت اجيبلي

هزت راسها ورود بمعنه اي ونامت وعزام كاعد يطكطك على النقال يراسل فيصل ونص ساعه التفت على ورود لكاها نايمه سحب الغطه اتغطه وياها وخله راسه يم راسها وايده على خصرها ونضرات عيونه تتنقل بوجها تحجي حب وعشك مكبوت تحجي هيام وغرام عبر مرر اصابعه على شفايفها وباسها على كيف ونام

الصبح دك منبه الدوام بتلفون ورود فتحت عيونها بكسل وانطته غفوه وقبل ماترجع تنام انتبهت العزام نايم وياها نفس المخده ونفس الغطه بس داير وجها للجهه الثانيه

سدت عيونها ورجعت نامت

ورجع دك المنبه مره وثنين وبكل مره تنطي غفوه ورابع مره لمن دك اندار عليها عزام واخذ التلفون من ايدها ونطاه ايقاف

حجت ورود بكسل ليشش

عزام ماكو دوام اليوم خل اخذج للدكتور نامي هسه

رجعت نامت وكأنما رادتها من الله حتى اكمل نومتها

للساعه ب١٠ كعدو وتريكو وبعدها خذاها للمستشفى وسوو تحليل دم وطلع عدها فقر دم وكتبلها الدكتور علاج اشترو من برا المستشفى

عزام العصر هم نروح الدكتور اخصائي لان ما اثق بهذول الدكاتره

ورود لا شنو السالفه عزام بعد هو هذا هم دكتور قابل طباخ

عزام ادري دكتور بس اشو ما كو اهتمام بالمريض اذا بعيادته يكوملج بالصلوات بس هنا لا ابالي

ورود لاهذا هو شسالفه بعد ما اروح لادكتور ولاشي خل ناخذ العلاج ونروح للبيت

عزام نزل للصيدليه صرف الدوه ورجعوا للبيت نزلت ورود قبله ودخلت لكت وفاء و ولاء عدهم

سلمن عليها
ولاء سلامتج حبيبتي شبيج

ورود فقر دم

وفاء هاي كله من سوء التغذيه باع وجهج شلون اصفر

سعاد يله صبيت غده تعالن

جانو الكل متجمعين على الغده عدا عماد لان يداوم بشركه اهليه ويرجع ب٥ العصر اما علاء فا طالب جامعي وعلي معلم يخلص دوامهم بين ١ و٢ الضهر وعزام عنده محل صيرفه واليوم ما مداوم بي لذالك صايره جمعه حلوه وسوالف وضحك علي نضراته على ولاء لان اهله خلوها بباله وعزام يشيل ويخلي الاكل كبال ورود حتى تاكل وامها كذالك اما ابوها فاكل شوي ويوكلها بيده وهي تدلع علي

وعلاء متكهرب لان تتمضيك عليهم وكل شوي يتعارك وياها بس عركه كلاميه

وره الغده عزام راح على شغله بعد ما وصه ورود تهتم بروحها
اما ورود كعدت سوالف وضحك وي ولاء وفاء

والباقين كل واحد راح الغرفته خذاله قيلوله الظهر

مرسبوعين ورود بعدها على حالتها تشكي من لعبان النفس والدوخه وعلاجها ما تاخذه بانتضام لو امها تنطيها العلاج لو تنساه ماتاخذه واكلها قليل كلش

بيوم من الايام اجه عزام باليل الساعه ب٩ شكتله امه عليها وهي ما تاكل وماتاخذ علاجها وبعدها على حالها تعبانه

عزام انه احجي وياها يمه وصبولها عشه وجيبو للغرفه

راح الغرفتها فتح الباب

وبسرعه فزت ورود ضمت شي وراها و بده الخوف بوجهه وحجت بتوتر ع.عزام .......

يتبع.......

''''''''''''''''''''''''''''''''''''''''''''''''''''''''''''''''''''''''''''

والي يكولون السالفه ما مستاهله لو عزام من البدايه معترف الورود بحبه

جواب/عزام يعرف اهله من النوع الي يهمهم كلام الناس وبالاخص ابو يفكر بالفشله والعيب بعد الناس كلمن وتفكيره ولولا ان الاقدار لعبه لعبتها وعزام تزوج ورود بالخطه جان ابد ماراح تكون بيوم من الايام زوجته ولاراح تقبل هي بس الاقدار جبرتها تنطي فرصه والله هده ابوه ان الله يفعل مايريد

والي يكولون على رضا لمن تزوج ورود حس بالخيانه ولمن تزوج دعاء يعني مو خيانه

الجواب/لان هو حب ورود من البدايه بس ضل يكابر ويتبع عقله الي باني فكره ان هو مايحب غير حبيبته المتوفيه وعاند كلبه الي نبض من البدايه اما دعاء فما عنده اي مشاعر اتجاها ولاعايشه وياه بيت واحد على طول اخذها زوجه وبس بدون اي احب ومشاعر لذالك ماجان يحس بالخيانه

والي سألوا القصه شلون وصلتلي

جواب/وصلتلي عن طريق نور صديقه ورود وجانت فكرتها ان تنكتب القصه فا اقنعت ورود وجانت هي الوسيط بيناتنه ونقلت احداث القصه