رواية عندما يكون العشق صوفيا الفصل الرابع 4 - بقلم ruqaya H algurtani

لاتجزع من جرحك وإلا فكيف للنور أن يتسلل إلى باطنك....
جلال الدين الرومي

فجاة كل الايادي الي تمسك بيك تتركك ويتخلى عنك حتى اقرب المقربين منك والمشكلة مو تركهم ايدك المشكلة انو هم طيروك بعيد وخلوك تحلق بالسماء وفجاة تركوك وخلوك وحيد تسقط على الارض ومااهتمو اذا رح تكون هذي الضربة موجعة اومميتة بالاخير الخطآ مو خطآهم، الخطآ خطآئك انت لان وثقت بيهم وغمضت عينك..

بعد فاتحة زوجة علي والي صار ليلتهة استحيت كلش من الموقف الصار وظليت اهرب من نظرات الكل حسيت روحي انفضحت والكل يعرف، وحتى خالد محجة وياي بعد، اصلا صار شخص اقرب مايكون ماموجود بحياتي بعد ماكان دنيا كاملة محاوطتني اني مااعرف اتصرف اكل، البس كيف بالفراغ الي بداخلي الي فجاة صار...
حسيت محتاجة ارجع لخالد محتاجتة يملي فراغاتي، كمت اتحجج عمود اروح بيت عمي واشوفة، يمكن زعلان علية، اني صوجي اكيد احرجتة كدام علي واستلمة رزالة اعرف علي يخوف وكلمتة متصير اثنين ابد..

تكررت زياراتي مرة ويا اهلي مرة ويا مرة اخوية المهم اشوفه واطفي النيران الي تحركني، بس جان بارد مثل الثلج وبس يسلم ويطلع ردت اقنع روحي انو التفت عمود يلمحني او يشوف التغير بية بس ماشفتة بس كلبي تخيل شافني وميت شوق الية، بس هو زعلان، وبيوم بعيد الأضحى بيت عمي ذبحو ورحنا بتنا يمهم، ونص الهوسة وانشغالهم شفت خالد فات غرفته رحت وراه دكيت الباب فتحة، لمن شافني دار وجهة..
شهد:خالد انت بعدك زعلان علية..
خالد:شهد.. طلعي منا..
شهد: مااشتاقيتلي.. مو كلت مااكدر اتحمل فراكج..
شنو غيرك.. ليش هيج سوي..
خالد: اي.. جنت.. بس من كمتي تشكين لعلي وتحطي كدامي اختلف الوضع..
شهد:والله ماشاكيتلة..
هو اجة صدفة..
صدفة.. كافي.. لاتجذبين وطلعي برة يلة..
شهد:مسكت ايدة..
خاااالد.. اني احبك.. مااكدر بلياك.. شتريد اسوي.. بس لاتتركني..
خااااالد..
اخذ نفس وحك لحيتة..
هااا.. شااكلج.. سوين..
شهد:هزيت.. راسي.. بالموافقة...
طبك الباب.. وابتسم الي..
حسيت كلبي كام يخفق بسرعة.. وحرارتي ارتفعت..
تقرب خطوات مني.. تعرفين جكد مشتاقلج اني هسة اشوفج انتي كبرانة ومحلوة.. ومتغيرة شمسوية انتي...
شهد: ايييي.. ععع مودك..
حجيت بخوف وتردد..
وصلت قريب سريرة ابو النفر.. وحسيت.. بنوايا لمن ناقوس الخطر داخلي دك..
وحسيت قرر ينزع ملابسة ويبوسني...
دفعتة وخرمشتة بااظفري معرفت شو صار بس اسمع صوتة يكلي طلعي برة مااريد اشوفج..

شهد:بعدة كلبي.. يدك.. وجسمي صار مثل النار.. باوعت علي، ركض فتحت الباب وطلعت...
وجسمي كلة يرجف..
ولمت نفسي شون ارخصهة هيج...
وطلبت من رافت يرجعني للبيت لان تعبت...
رجعت للبيت وحبست روحي وماشفت خالد بعد.. خلصت العطلة بدت سنة جديدة بحياتي..
حسيت فجاة هجم حب الشباب علية..
من السهر واالتفكير قللت مشاكلي ويا فواد شيريد اسويلة بس عمود اخلص..

هاي السنة خامس اعدادي.. اخبار خالد ع طول مشاكل ويا اهلة ومااعرف ليش يمكن لان اني ويا متعاركين..
او يمكن لان بيت عمي قررو ينتقلون لكربلاء لان الوضع مو تمام..
ويمكن البلد داخل ع حرب..
بس كلة حجي.. بس للاحتياط..

اشجان ظلت ويايا، وبلشت علاقتنا تقوى عرفت انو هي يتيمة عدها اخ اكبر منها وعايشة ويا عمتهة الي دائمة الانشغال.. ومخليتهة ع راحتها..
حسدتها ماكو احد فوك راسهة.
امي راحت يم اختها ام علي، وبقيت اني ومرة اخوية وفؤاد بالبيت، وزاد فؤاد مشاكلة وياي يستغل غياب رافت لما يجي من الشغل ومرة اخوية يم اهلها لان جهالها صغار لهذا بس ارجع للبيت يستفرد بية، وبعدني احس اثار ذكريات الطفولة، وهسة اكثر لان ماعدت طفلة اني شابة، بس بعد مارجع رافت من الجيش تغير والي صار زمان فضول مراهقين وكلة من ورا حجي رشاد الشاذ..
بس مااتغير طبعه السئ وغيرتة مني..

لهذا اشجان جانت تقنعني ابقة يمهم بالبيت لان وحدهة..

وجانت تهيألي أشياء مجنت امتلكها لان حالتهم المادية احسن بهواي من حالتنة...

جنت احس عيوني تفتر بالمكان واحس محتاجة كل هاي حتى اتخيلها الي...
بس ومانيل المطالب بالتمني..

جنت دائما احجيلهة عن حياتي.. وتفاصيلها.. كل شي..
وثقت بيها..
وبيوم واني فايتة بيتهم اندكت الباب.. ونط كلبي من الخوف....
اشجان:هاي شبيج.. صمالله.. روحي بالصالة.. خل اشوف منو..
كعدت شوي سمعت صوت خشن..
هذا صوت ولد...
كتلني الفضول فتحت البردة.. وشفتهم يتباوسون..
كلت احتمال اخوهة.. بس لمن فاتت وبدة يتلمس جسمهة اني خفت.. كلت هاي متستحي وصوجي فتت بيتهم خل اتحجج واطلع...
شهد:فتحت الباب ولفيت شالي..
شفتهم بعدهم بنفس الوضع نزلت راسي..
الولد اسمة يحيا..
هاي شنو اشجان.. لج هاي منو صدقة تستحي...

اشجان: اي بعدهة بالباكيت مامفتوحة..
دكت بكلبي الكلمة وناقوسي دك... قاطعتهم..
اشجان.. اني رح اروح.. هسة فؤاد يكوم يحجي...
لا.. شهد بعد وكت اريد اعرفج على يحيا..
فد واحد يخبل..
شوكت ماحسيت بالضوجة ميعوفني..
لاتخافين.. تعالي يلا...
رجعتني للاستقبال وفوتتني كالتلي كعدي...
وانت يحيا هم اكعد البيت بيتك..

بحركة فجائية.. استاذنت وجرت المفتاح
هسة اجيكم..
وقفلت الباب علينا..
حسيت بخوف وكمت اثور بطريقة هستيرية ودك عالباب..

اشجان.. فتحي الباب طلعيني.. والله اهلي يذبحوني.. فدوة فتحي.. اشجان..
اشجان..
ضليت ادك الباب.. وماتفتح.. حسيت تقربلي...
يحيا: ميفيدج.. هاي متسمع احد...
اهدي....
شهد:ابتعد عني.. والله اموت روحي ولا اخليك تلمس شعرة من راسي..

يحيا:فهمي هذا الباب مينفتح اذا مو اشجان تسوي الي تريدة..

شهد:رجعت.. دكيت الباب.. اشجان فتحي الله يخليج.. اني شسويتلج ليش تريدين تاذيني هيج... فدوة..
لج خالد يذبحني..
وماسمعت اي صوت رد..

يحيا: هو هيج اكو ناس متحب تشوف احد انظف منها..
عندج أشياء هي ماعدها..

شهد: وشعندي اني.. شعندي.. اني وحدة مجردة من كل شي..
اني وحدة ماعندي غير شرفي ولاحكيني علي..

يحيا:لعد.. شجابج ع وحدة مثل اشجان..

لاني غبية.. عبالي ضحية..
بس طلعت اني الغبية..
اني الي استاهل الكتل..

يحيا:هذا الحجي مامنة فائدة..
شهد:اموت روحي والله..
كسرت الكلاص واخذت قطعة وناوية اقتل روحي..
يحيا:انتظري.. لاتسوين هيج..
عبالج تخلصين.. وظل سمعتج حتى اذا متي ع كل لسان واهلج..

شهد:خلص.. بيني وبين ربي بعد.. وحسبي الله عليك وعلى رشاد وفؤاد واشجان عساكم تحتركون بنار جهنم..

يحيا:باوعي.. هاي اشجان تريد تكسرج وبس.. اني مااكدرلهة رح اتفق وياج اتفاق..
شهد:حسيت بالا مل وهو يحجي..
مسحت عيني وكعدت اسمعلة..
باوعي.. رح اضربج كم ضربة.. وانتي صيحي..
عمود اتصدك...
سويت الكالة ورا دقايق حسبتهن عبالك اكثر من سنة مرووو..
بالاخير انفتحت الباب عدلت هدومي وشالي وطلعت.. ركض..

ركضت.. ومااشوف كدامي حسيت اكو حبل مشدود داير مداير ركبتي واشجان رح جرة باااي لحظة..
وترجع تسوي التريدة.. فتت لوني مخطوف.. ونفسي منكطع.. توة فؤاد ديصيح علية لان متاخرة.. وكعت .. ومااعرف شوكت فتحت مرت اخوية عُلا فوك راسي وابوية خطية هم، حتى فؤاد حسيت الخوف بعيونة، وابوية ورافت مستلمي رزالة عبالهم بسببة اني هيج..
ظليت بس دموع تكت.. ومااكدر لااكل ولااحجي.. حتى دوام مداومت..
ولزمتني صخونة وباردة ارجف ومحد فاهم شو صار..
بعد اسبوع بالصدفة سمعت عُلا تحجي ويا امهة تكللهة انو شون خالد يريد يخطب، وخطوبتة لشهد والله رأفت اذا سمع يطلكني واحنا واكفين ع شعرة، يووم لاتخلين ابوية يوافق
سدت التلفون وحسيت خلص شعرة بس بيني وبين انهياري بعد ماكل الناس د رت هذا خطيبي، كملها خالد وموتي بهذا القرار جنت مطمنة انو اهلة مرح يقبلون بوحدة غريبة بس معناها حتى اذا زوجني مرح يكون يحبني وعقلة يم ذيج.. حاولت اطمن روحي..
و را اسبوعين تقريبا داومت وكوم دروس فايتتني، وحاسة وجود اشجان يوترني ومرح يخليني اركز خصوصا بعد الصار..
أشجان:هاي شنو هالغيبة الطويلة شهودة..
اشتاقينالج، لا ويحيا بس يسال عليج..
شنو رايج تجين وياي اليوم..
شهد:هس.. ولا كلمة انتي وحدة مستهترة واني مااريد اتعرف ع وحدة مثلج..
وسخة.. ورح اكول للبنات ع سوالفج..
أشجان:وتفضحين نفسج..
شهد:شنو.. اني اشرف من عشيرتج..
وهاي اخر مرة توكفين ويايا هالوكفة..
باااي..
أشجان:تعتقدين.. اذا عرف خالد بالموضوع شرح يصير..
شهد:ياموضوع.. قصدج..
أشجان:صح نسيت.. انتي عندج مواضيع هواي.. من رشاد.. فؤاد
ولحد ماوصلتي لااحضان يحيا..
شهد:انجبي.. ولج..
عبالج احد يصدك وحدة مستهترة مثلج..
أشجان:والي يمشي ويا مستهترة مثلي شيريد، حبيبتي اكيد تمشين نفس طريقي..
نسيتي المثل اليكول الصاحب ساحب..
وهياتج.. انتي..
لاتنكرين عجبج احد يهتم بيج، ويعوضح..
شهد:شتريدين انتي هسة...
أشجان:نرجع مثل قبل... وتعرفين شنو ذيج سماح وحدة رافعة خشمها ومستشرفة عاجبني اكسر خشمها..
هي متحجي وياي بس تحجي وياج..
شهد:انتي وحدة مو طبيعية وهسة اشتكي ست جميلة عليج انتي صايعه ويحتاجلج تاديب..
أشجان :ومنو رح ياادبني ابوج ابو النسوان..
لو امج العايشة بحسرة....
وتاشر بااصبعهة...
شهد :"انتي وحدة مو بس قليلة ادب انتي وحدة.....
اشجان:متكملين ياحلوة.. مو بمزاجج اذا مسويتي كتلج يا افضحج.. تحلمين داومين مدرسة..
عفتها ونسيت الموضوع مرت الايام بسرعه وصلت نصف السنة مال خامس
ويا الامتحانات ورا تهديدات اشجان الي صارت باارض الواقع جنت اسمع ومااهتم...

بس ويا اخر امتحان الي كملت وطلعت شفت خالد واكف باب المدرسة فرحت واخيرا حن علية ورجع بهاللحظة شفت اشجان واكفة برة.. بسرعة شغل سيارتة وطلع وياهة...
عرفت وكتها انو هاي البنية الي اخذت مكاني..
وتااكدت انو ناوي يخطبهة جن جنوني..
حسيت من العصبية نفسي ضاق... وبعد مااكدر اتنفس رجعت للبيت وطلبت من علا تكول لخالد يمر لبيتنا لازم يعرف شرادت تسوي اشجان بية..

ظليت انتظر ع نار يجي عمود اكلة...
بس اَول مدخل ومنطاني حتى فرصة احجي ضربني...
خالد:ولج.. انتي شون سوين هيج..
شون تسوين علاقة ويا ابن خالة اشجان..
لج.. ممالين عينج.. انتي مو صوجج صوجي اني الي خليتج تلعبين علية..
شهد:خالد.. والله كذب.. وداعتك..
هاي اشجان فد وحدة تعبانة..
و....
اسكتي.. اسكتي تشمرين بلاج ع الناس..
لج سمعتج صارت ع كل لسان... الكل يحجي بحبج وغرامياتج..
شهد:خالد.. انت جذب الجذبة وصدكها.. جيب احد شايفني شوف عين، انت تصدك اني احب وامشي ويا احد...
سكتي.. جنت عايفج ومااعرف شتخربطين.. بس لهنا حدج..
الجمعة ع لمة عمامي احجي..
اني ما يشرفني مرتي تكون بهالاخلاق..
شهد:خالد.. بس اسمعني..
ويا مدنحجي دخلو رافت وفؤاد..
حدك خالد... حدك لهنا لاجيب سيرة اختنا ع لسانك...
خالد:اسمعو.. الاول.. وبعدينن..
فؤاد :اسكت ولك.. احنا مو عميان.. ولا اني عايف اختي بالشارع تفرفر..
واذا معاجبك تتزوجها.. لاتشمر بكلامك اذا انت رجال.. هاي هم عرضك لاتنسى..

خالد:طبعا.. اختكم تطلع هيج اذا اخوتها..

بهاي اللحظة جكد ماحسيت روحي قوية حسيت بالضعف..

لزمو خالد كتلو كتلة مرتبة. واخوية رافت كال لمرتة تلم هدومها تروح ويا اخوها.. والتمو الجوارين ميعرفون الصار...
وكبرت المشكلة.. وخالد مقصر واقتنع بحجي اشجان وفضحني..
رأفت اخوية قرر يطلك مرتة بس ابوية مقبل..
وعمامي اثنين وكفو ويا خالد.. وانطو الحق..
بس عمي ابو علي مقبل بالحجي ووكف وياي ويا اخوتي..
ابوية لايريد يخسر اخواني ولايخسر اخوانة لذا سكت..
واخواني بعد هاي المشكلة راحو لكربلاء ولحكو امي..
وابوية ظل حاير بية.. بطلني من المد رسة
ويومية يقفل الباب ويطلع..
وبالاخير زوجتة الثانية معجبها الوضع وابوية حس بثقل جبير شون يتحمل مسووليتي وحدة....
خالد.. خطب اشجان.. ورافت اخوية نكاية ببيت عمي قرر يزوج خصوصا ان امي متكدر تربي جهالة اصلا امي نست تعتني بينا، مرح تذكر تعتني بذولة الصغار..
لذا قرر ابوية يدزني لاامي واخواني..
ودعت الموصل وودعت كل ذكرياتي السيئة بيهة وانتقلت إلى مكاني الجديد محطمة وكل ابواب الامل مسدودة بوجهي..
واجة ابن خااتي علي اخذني لان يداوم بالموصل ويا نزلتة لااهلة مر اخذني..
واني احضر بجنطتي وغراض امي وصتني عليهم..
اندكت الباب ووكف كلبي.. بس سمعت صوت ابوية ارتاحيت..
تفضل.. تفضل.. ابو الحسن..
جان علي جاي ببدلتة العسكرية.. وشكله كلة هيبة ووقار.. وظليت صافنة بي جكد شكلة حلو وهيبة..
رغم الحجي سمعتة اخر شي علي صاير درويش.. ومتزمت بس اني شايفة غير شي.. ظليت اباوع من الشباك ووسط الافكار المزاحمة بدماغي صاحني ابوية اسلم وذكرت اخر مرة جانت صدفة محلوة لمن لكفني ويا خالد وهو يريد يحضني..
بس الظاهر مو بس اني متفاجاة بالتغير البي هو كذلك..
اتوسل ابوية بي يبقى عالغدا مقبل لان ورانا طريق..
شال الغراض.. واتحركت السيارة ونقلتني لعالم جديد مااعرف شنو مخبي جواتة..
للقصة بقية....
♥️♥️♥️♥️♥️♥️♥️♥️♥️♥️♥️
لاتنسون التصويت عالبارت اذا اعجبكم...