رواية عروس البيت الاسود الفصل العاشر 10 - بقلم لارا سالم

نزعت نعالي نزلت حافيه ع اطراف اصابيعي ركض عالموبايل
خايفه اعرف شي يرعبني

فتحته مسجات هوايه ممبقي احد مسائله ع ابويه كالب الدنيا
يسال جيران و ناس غربه و اصحاب المكاتب العقاريه يريد بس يلزمه

كلبي كام يوجعني سديت الموبايل فركت عيني رجعت حطيته

ماعرف ليش رجعت فتحته ايدي صارت تكلب بالبرامج لا اراديا

ردت اعرف شعنده ماعنده علاقات اكلب و اباوع

ملكيت غير طليقته محادثه طويله عريضه تكتبله باليوم 5 مرات

تكلبه عليه و ع اهله تحرضه يعوف كلشي و يزوجون

ركعت الموبايل بحركه اعصاب ايدي رجفت

سمعت صوته ورايه كال : شتسوين بموبايلي

نداريت شاف الموبايل بيدي جاعصته بايدي ع الميز

رجعت شعري وره اذاناتي مشيت كتله ماكو شي وكف كدامي : مجاوبتي

صرت امتمت : م ا س ه
اشوف شناوي ع ابويه طبعا

رفع تك حاجب : متاكده ؟

دفعته برهاوتي صعدت لغرفتي احجي ع روحي
شوداني ع موبايله صاحيه مخبله و شبي هذا يباوعني هيج عباله غيرانه عليه ههه مصدك نفسه ماكو هيج شي طبعا

وره كم يوم طلعت بالحديقه مهدي ديزرع شتلات جديده بحديقتهم

هيه حديقه صغيره بس الولد يحبون يعتنون بيها رحت عليه كتله اساعدك

هو و ديزرع مكنبص بااوعني ليفوك مبتسم كال : شلون صرتي

- وين

اشر بعينه ع رجلي

كتله زينه الحمدلله خل اناوشك

صرت اناوشه و ازرع وياه نسولف ضحكنا ع سالفه

كلي : ضحكتج حلوه كلش

خجلت درت وجهي اكمل شغل

يوم بعد يوم يزيد اهتمامه

جابلي كم شغله التهي بيها بالبيت

جوي صديقه و مرته زارونا وياهم طفلهم عمره 4 شهور

نزلت كعدت يمهم عرفني عليهم

حطيت ابنهم بحضني الكعده كلها سوالف اني ملتهيه بالطفل اموت عالجهال وحركاتهم

اني والعب وياه شاهين دخل شافهم كعد مقابيلي يمهم يسولف
يباوع عالطفل بحضني

كلما ارفع راسي اشوفه يباوعني بس يكابر يلوف راسه من يحس انتبهت عليه

مهدي انتبه علينا من راحو الجماعه بالمطبخ كتله

- شاهين ماشال عينه عالطفل لاحضت

جاوب بطريقه معاجبه : اي

- معقول شاف ابنه بي ؟

- بالاصل عينه جانت عليكم ثنينكم

حجاها بتلميح و نبره مدري شلونها

مجاوبته

- شتكولين

- ل لا عالاغلب تذكر ابنه

سكت مجاوبني

- ليش تسئل

- هيج ماكو شي

بيومها شاهين لليل ساكت ع غير العاده مايحجي بس يباوع و اذا انتبه يلوف راسه

بليل تخابرت ويه زهراء اختي نسولف
اذكرنا سوالف قديمه صرنا نضحك عليها نسيت نفسي صرت اضحك بصوت مسموع

فتح باب الغرفه اجه بلا مقدمات سحب الموبايل من اذني يسمع صوت منو

سمع صوت زهراء رفع حاجبه و نطاني الموبايل

كملت وياها اخر كلمتين بضحك كتلها ماشي زهراء الصبح اخابرج
و لتنسين دوه الضغط مال امي

سديت الموبايل تجتفت : خير ؟

- مرتي تحجي بالموبايل بليل و ضحكتها لاذنها شتردين اسوي

- هههه ضحكتني عايش الدور

ماحسيت غير جر ايدي ثبتها وره ضهري شدني ع صدره
حط خشمه ع خشمي يباوع بعيني بخنزره

رجفت حيل من الخوف او غير شي ماعرف مدا افهم شي من حياتي
ضل يراقب حركه جسمي و نضرتي
بلعت ريكي

كال : لازم مامصدكه انتي مرتي اثبتلج

- شاهين وخر رجاء

- ليش ترجفين

- مارجفت وخر

ضغط بايده ع ضهري اقوه لزكني بي حيل صرت اسمع صوت انفاسه

- ليش تبعديني

- لان ماريدك

- واثقه من هالحجايه ؟

- اي

درت راسي وجهه صار بركبتي

حراره شفته ع ركبتي هو و يمصها مصت غضبي وياها

كلبي رجف يدك بسرعه خفت مقاومتي اله

ضل يحاول خدرني عالاخير

طار هالاحساس هذا من همس بأذني فجاه كال :

- شفتي شلون جذابه ؟

نعصر كلبي عصر من حجايته دفعته حيل رجع ليوره

عيوني دمعت اشهنك رافضه دموعي تنزل كدامه

باوعني بين المنتصر و المقهور

بليل نزل للحمام يغسل

اني بقيت امدده صفح طول الليل ابجي و اشهك من كلبي

يقربني اله و يضربني بكلبي مرضني موته لكلبي

دخل للغرفه عصرت شفتي قوي علمود مايحس ببجيتي
سويت نفسي نايمه هو بقه يفتر بالغرفه
بعدين كعد عالفراش يكلب بالتلفزيون بلا صوت طلعت اغنيه
عله الصوت حته اسمع مال وائل كفوري
حسيتها حركه منه ديعتذر بيها

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

اسمعها و دموعي تنزل لا ارادي يمكن سمع صوت بجيتي
ماكدرت اكتمه

ثاني يوم نزلت عالريوك عيوني مورمه من البجي حاولت اكل ماكدرت

رغد شافتني كالت شبيج هزيت راسي ماكو شي

- وبعدين وياكم حور ؟ ليوين تضلون ع هالحاله
شاهين طلع من الفجر ماتريك وانتي من كعدتي وانتي تبجين شصار بينكم

هيه وتحجي بجيت كامت حضنتني ضلت تكول
لا حول ولا قوه الا بالله الله يهديكم

مشت الايام شاهين سافر ويه ابوه شغل

من ليلتها ماباوع عليه ولا وجهلي حجي بعد
لا مغثات لا مشاكل اي رد فعل منه ماكو

بعد ماراح ضلت نفسيتي تعبانه علي صار بليلتها

بلحضه من اللحضات تمنيت يجي يعتذر يكلي اسف زعلتج
اسف ذليتج
اسف نزلت دموعج
وجان سامحته

لحضات ثانيه تمنيت ماشوفه بعد اروح لمكان بعيد مايوصلني بي

كتله احاسيس جوايه مكسوره ع ضعيفه ع محتاجه ع ...
ماريد انطق الاخيره ماريد اعترف بيها حته لو بيني وبين نفسي

وكفني مهدي اني و فايته هز راسه : شبيج

حاولت مابينله رجع وكفني كلي شسوالج وكفت الدمعه بعيني

- خلص كلبي من الحجي مهدي ماريد احجي الله يخليك

حجيتها ب ترجي اني و مغمضه ماحسيت الا بايده تمسح دمعتي و توخر كذلتي من وجهي

تخيلته احد من اهلي يطبطب عليه

لما استوعبت الوكفه الاني بيها
عفته رحت لغرفتي كعدت اندعي ساعه و ساعتين
كلت بكلبي ساعدني يارب لا تتوهني و تضيعني ساعدني الكي طريقي

بيوم جنه بالمطبخ نطبخ اني و رغد عمتي كاعده تدندن اغنيه

دخل مهدي كعد ياكل كيك وياها

كامت تحجي : انت مناوي تفضها عد شوكت نكعد ويه اهلها

مهدي : اهل منو

عمتي : ساره الشفناها بعرس فلان مو عجبتك

رفعت عيني صارت بعينه باوعني ونزل راسه راسا

كال : ع شنو الاستعجال

عمتي : مو سالتك عليها بوكتها وكتلي اي حلوه
شفت امها بالسوك البارحه وكتلها حابين نجي نشوفكم فد عصريه
وهيه فهمت الفلم اعتبرها تعارف تكعد ويه البنيه و تقرر وليدي شكلت

شاهين : اي حلوه بس مكلت اخذها

عمتي : بعد نطيتهم كلمه يمه والبنيه ماتتفوت

ضل ساكت وهيه تحجي : شجاك ابني انت مو صغير عمرك 29 وداخل عال30 شتنتظر لو تريد تخيب خيبه اخوك

باوعتني من فوك ليجوه
اني عفتهم بنص الكلام صعدت لغرفتي بقيت افكر معقول يخطب ليش بهالطريقه ؟
كلامها نرفزني مثل الحطته كدام امر الواقع
ضحكت كلت واني شنو
قابل ينسى نفسه يضل مربوط يمي بالبيت
مو كفيل بيه

اني معجبه بي مثلا ؟ ليش هو ضل شي جواج حلو يخليج تنعجبين و تحبين
ممنوع اصلا تفكرين بي شجاج
هو هم تصرفاته غريبه شلون هيج ميصير
شديصير يربي شهالخربطططه الي بحياتي ختنكت

اسال واجاوب نفسي
بقيت متنرفزه بيومها ماكدرت افتح حوارات وياه
يمكن غرت احس بغيره
غرت حخسر حنيته و مداراته اليه
بنفس الوقت حياته هاي اني شنو

كتبلي مرتين عالواتساب مارديت
رجع كلي طلعي بالحديقه نحجي شويه
هم مارديت
وره ساعتين نزلت اشرب مي شفته نزل ورايه سريع كتله شنووو
سوالي هشش هو و جاي عليه سحبني للمطبخ

سد الضوه كال بنرفزه : ليش مجاوبين

- انشغلت شويه

- بغرفتج كاعده ماعندج شي كتلج عندي حجي وياج ليش منزلتي

- ماكو شي نكوله هد ايدي

- محتاج افتهم

- ماكو كلام اكوله خلص عوفني اصعد انام

- حور احجي

- شتريد

- ليش ضجتي من كلام امي

- منو كال ضجت

- عيونج

- مهدي عوف ايدي

- مو كبل ما تسمعيني

- شسمع

- مرح اخطب

- اخطب شعليه بيك

- مضايقه كالبه وجهج شنو معناها

- وانت ليش مهتم لوجهي ليش مهتم لرايي ها وين تريد توصل

- ماعرف ماعرف ماشي وره كلبي مثل المخبل ماعرف وين رايح
احس اريد اشوفج دائما

- تماديت هوايه

داروح حاول يلزمني وخرت ايدي ماعرف شجاوبه ماعندي جواب ع اي كلمه يكولها

- لتنهزمين مني و صدكي كل كلمه كاعد اكولها ماكادر اضمها اكثر

- مهدي الدتحجي غلط و عيب

- عيب من منو

- بحقي و حقك و يسوي كارثه بين الاخ و اخو

- تنكرين انتي هم حاسه بشي اتجاهي

- مانكر احب وجودك و حنيتك بس ماعندي تسميه لهلشي و مو حب

- بلسانج كلتي ماحب شاهين صح لو جذب

تبلعمت الكلام وكف ع شفتي
تذكرت شاهين تذكرت كلشي بينا الزين والموزين
اختنكت من كلام مهدي بهاللحظه

رزلته كتله : كانو ماحجيت واني ماسمعت

- حور

- اني ماباقيه هنا حته لو حبيت احد من هالبيت ما باقيه
هذا الفلم اني مو كده و رح ينتهي عن قريب
شوف حياتك الله يسعدك

- هيج تشوفين ؟

- اي هيج اشوف

كعدت وحدي افكر ماعرفت ليش هيج جاوبته جنت ارتاح وياه ليش عصبني كلامه مافاهمه نفسي شريد بالضبط حتخبل

تذكرت ساره صديقتي الي ويايه بالدوام حافظه رقمها خابرتها

ساره : لج نعال هاي وينج رحتي و كلتو عدولي ناكره العشره تف

- لج شنسى اني بيه حيل احك راسي البيه مكفيني

ساره : اهوو بدت سوالف الصديقات من يزوجن يكومن يطردن عيون
شحال الزواج و شحال الزواج

- يا حيوان كلج سبع سعادات اكلها ماكله تبن

ساره : احجي شصار بعد

حجيتلها الديصير بالتفصيل

ساره : مادري دخت عشتي كل هذا و بعدج متحمله اني بمكانج انتحر

- تجي ايام اصير مريضه من القهر بس ماعندي حل ثاني
اعوفه يعني انفجع باهلي

ساره : تكولين اذا لكه ابوج ياذي من صدك يعني ؟

- لو تشوفين موبايله استخبارات عبالك يسئل و يخطط
مستعد حته يدفع فلوس حته يوصل لابويه

ساره : انتي هم اكلتيها من وره ابوج و حركاته 

- شقصدج بله

ساره : ليش ينهزم اذا ماسوه شي

- ساره دتحجين عن ابويه

ساره: ع عيني و راسي بس لو مامسوي شي ينهزم مده لما يهدء الوضع ويرجع
مو يفلت سنه كامله و يا عالم يرجع لو لا

كلامها نغز كلبي

- اكيد خايف منه هذا ثار شاهين بصراوي و البصاروه عشاير ميعوفون حقهم

ساره : و اخذج بمكانه يسكت عشيرته شكد قاسي رجلج هذا
بس حجي بيناتنا مالومه كلبه محروك ع ابنه و حسب كلامج ابنه جان بعده صغير و طيب متعلقين بي هو واهله كلش

- اي كلش لدرجه اخذه من امه ماكدر يعوفه يمها وره طلاكهم

ساره : مادري دخت بيناتكم يمكن يجي يوم يتصلح الوضع متعرفين
و مهدي شحتسوين وياه ؟
زين شحاسه هسه ليش وصلتي هلمرحله وكعتي روحج بين اثنين

- لو حاسه اجي احجيلج ؟ دايخه و تايهه ساره
جنت كلش احب كعدته ليش ضجت منه من صارحني
البارحه كلش ضجت منه و بعدني بداخلي محابه فكره زواجه

ساره : اكلج و متضوجين

-  كولي

ساره : مهدي الوحيد الوكف وياج يعني مصدر الامان بالنسبه الج بذاك البيت
من حسيتي حيزوج ضجتي تجي وحده تسلب هالامان منج
و ترجعين تواجهين عيالج وحدج وهذا الشي وارد
بس مو هذا السبب الاساسي الخلاج ضجتي منه

- لعد شنو

سكتت متحجي

- شنوو

ساره : انتي حابه شاهين

اقشعر جلدي من كلتلي هالجمله كلبي صار يدك سريع

ساره : ليش سكتي ؟ كلامي صحيح

- متوهمه

ساره : فسريلي ليش ضايجه من سافر ليهسه و مطايقه روحج
تبجين لان حابته مو مقهوره منه
متاذيه لان تردي يتغير مو لان تكرهي
حووور احنه بنات و نفهم ع بعض مو عليه هالحركات

- كل هالضيم و تردين احبه

ساره : مو اني اريد انتي تردي متعلقه بي و تصرفاتج دليل بس تكابرين
صار كم مره متقربلج ؟

سكتت

ساره : جاوبي ع سؤالي

- كذا مره بس انتي مفاهمه الوضع

ساره : مختلفنا بس عاشرج لو لا ؟ قاومتي بس ماكدرتي او ماردتي تقاومين اكثر
بداخلج رايدته مستمتعه بس تكابرين علمود السواه بيج
الرغبه و الحب شي و الكرامه و الكبرياء شي ثاني

صفنت بكلامها معقول الكالته صحيح تنرفزت

- بلا هالكلام ساره خرب بخرط الي دتكولي

ساره : بكيفج الايام تثبتلج
بس برايي لتكابرين بعد انطي مجال و خلي يتعلق بيج لتخلين طليقته تستفرد بي رجلج ومن حقج هذا انسي الكرامه شويه

- وشلون اعيش بعد بلا كرامتي ببيت عيالي

ساره : علساس همه مبقيلج كرامه هسه ؟ لتزعلين حور بس دتكابرين ع شي ماموجود هو اخذج ديكسر كرامتج و نفسيتج و سواها
دورج هسه ترجعيله الضربه عشر اضعاف
بس بالاول الكي صيغه حل ويه مهدي مبين متعلق بيج و مرح ينسى ليسويلج مشكله ديلعب بالنار هذا

سديت وياها حسيت كلامها كله صح
لازم اتحرك عد وابطل بجي  مفادني بشي

عالغده ناكل مهدي كل ميحط لكمه بحلكه يباوعني يريد يشوف تعابير بوجهي

سويت نفسي مامنتبهه

وره الغده وكفت اغسل مواعين اجه راد يحجي رغد جتي تسوي جاي

كال اصعد انام كبل ماروح الشغل

اني و دا اصعد لغرفتي فتح الباب ديجي اشرتله ووين

طببني و سد الباب

- مهدي بروح موتاك شدسوي

- اريدج بعد ماضمها

- و اني ماريد احد ماريد احد

تقربلي : كذابه

- اسمعني اني احب احجي وياك احب اسمعك و تسمعني بس ماكدر اخون
حته لو الي مزوجته ماذيني ماعرف اخون
يمكن لو شايفتك كبل ماعرفه مجان جان تعلقنا ببعض
بهذا وضعي ماكدر اضلمك واضلم نفسي ابد مو علمود شاهين علمودنا احنه
انت حبيت وجودي هنا يجوز تعويد يجوز مادري شلون افسرها
باوع اني

اني واحجي رجعني ليوره ديحصرني راد يبوسني

دفعته بسرعه تعصبت

- اطلع بره لتخليني اهينك

- هيج صارت

- صارت ونص بررره

طلع قفلت الباب راسا
متت من القهر ع نفسي
اني الجنت اعيب ع صديقاتي و علاقاتهن المتعدده
انحط بموقف بين زوجي واخوه
خرب بحضي شرح اشوف بعد
كله مني صوجي اني النطيته مجال وخليته يتقربلي
انانيتي الزايده وياه علمود اضل اتحامى بي بهالبيت عفته يتعلق بيه
اذكرت كلام ساره كلتلي الكي حل سريع وياه
شسوي شلون ابعده عني

بقينا يومين مانحجي هو يجي ساعتين يتغده و يروح
اسمع عمتي بالصدفه تكول لرغد صار يومين ميحجي ويايه عبالي زعلان مني بس لا يمكن شغله مماشي هالفتره و تعبانه نفسيته
رغد : ماسئلتيه
عمتي : يكول ماكو شي ميحجي غير شي

نقهرت من كلبي ضميري عذبني

وره يومين دك عليه بحجه يسئلني محتاجه شي جاوبته بمسج : لا

- اسف علي صار

مجاوبته كام يدك مره مرتين تلاثه ما جاوبته بعد
عفت الموبايل نزلت اشرب مي اتعوذ ابليس

بهاللحظه دخل شاهين وابو راجعين من السفر ابوهم ماعنده حجي ويايه ابد يسلم ويفوت مرات حته السلام مايذبه

شاهين باوعني : شلونج

- الحمدلله

هز راسه يباوعني كال : اخذي من ايدي

ركضت رغد تبوسهم جتي عمتي هم تسلم وتسولف

اني اصفي واطلع الغراض من العلاليك باوعت شفت شاهين صعد لنهايه الدرج رايح لغرفتنا تذكرت موبايلي فوك و مهدي ديدك

كلبي راد يوكف يامن ينطيني جناح يوصلني لغرفتي بهاللحضه

عفت الغراض كمزت اريد الحك عليه

.....

يتبع ....