رواية عروس البيت الاسود الفصل السابع عشر 17 - بقلم لارا سالم

...................

عمتي شافتني رايحه ع مهدي عاطت ع مهدي :  كولها تصعد فوك لا اخليها تلحك ابوها

رحت عليه كتله : شنو

باوعني بتعب : ابوج بليل رايح لمكتبنا مكسر الجام ماخذ منه اوراق و فلوس و فالت بسياره ويه واحد
كامرات الشارع لاكطته ومصوره رقم السياره هسه خابرونا لاكين الرقم

- اي ؟ !!! شاهين شاهين وين راح ؟؟؟

مهدي : مادري حور مادري

- ماتدري شنو ابويه شاهين شرح يصير بينهم
اذا مات ابويه لو شاهين اني شسوي ها

الم بطني زاد بهاللحضه صرت الزم بطني و امشي بالمكان
احجي مثل المخبله اهلوس ويه نفسي

مهدي يطلع بره يخابر كل شويه اني صعدت لغرفتي اركض
دكيت ع شاهين مرتين و تلاثه و عشره مايرد
لحد ما نغلق موبايله

نهاريت هنا صرت ابجي و اضرب ع وجهي
كلما اضرب روحي الالم يزيد ببطني

عشت الم و حرب نفسيه فضيعه الي يشوفني بيها يكول مخبله مو صاحيه

التفكير اكلني افكر اكول اذا صار هيج شسوي واذا صار هيج شسوي بيا وجه اعيش كدام العالم
خايفه على ابويه خايفه على شاهين على اهلى على بيتي
الي حيضرر بيهم رح اخسره اني مو كد هالحمل يارب
ضليت افكر و اندعي
ادك ع شاهين كل شويه مغلق

لبست عبايتي رحت لاهلي اول مطبيت سمعت امي تبجي بالمطبخ و زهراء تكلها مايرد مايرددددد موبايله مغلق

امي شافتني جايه عليهم للمطبخ كامت ع حيلها تجر النفس كوه : ليش جيتي ها مو بيتج هذا بيتج هذااك الفضلتي ع اهلج

- ماما البيه مكفيني والله وجعي ماينحمل

- لتكليلي امي انتي مو بنتي اني ماخلفت هيج بنيه فضلتي مصلحتج ع اهلج
100 مره كتلج عوفيهم ترجيتج ترجعين ويايه ماسمعتي

- ماعشتي الي عشته ماتعرفين شي

- و وضعج احسن هسه خاتون ؟ وصلو لابوج ارتاحيتي هسه ؟
ليش جيتي انتي طلعي بره

- ماما

- بره كتلجججج لتشوفيني وجهج بعد

زهراء تباوعني اتلوى لازمه بطني وابجي

زهراء : ماما

- ولا حررف الي ميعجبه كلامي يلحكها لعبت روحي منكم
طلعي يله روحي لعيالج روحي للي ديقتلون ابوج هسه يللله

ضلت تدفعني بالكراج و تصيح عليه حسيت طب احد يركض
ماركزت من البجي و الالم

صار بالنص من سمعت صوته هو و يكفها عني عرفت مهدي

طلعنا بره بالشارع حطيت الشال ع وجهي ابجي

الرايح والجاي يباوع ع حالتي

مهدي كلي عذريها لامج اعصابها تعبانه
زين كافي تبجين شيفيد البجي
كافي
حور !
تعالي نطب جوه صعدي لغرفتج اني رايح .....

- مهدي .... اذا تعزني من صدك سوي شي
روحله وكفه لياذي ابويه
ليخسرني

باوعني بحزن : اعرف الجواب حور
بس انتي كلتيها اذا يحبج ما يسويها

- عالاقل نحاول اخر مره اعرف صعب ينسى ثار ابنه بس الي صار بيني وبينه المفروض يخلي يسامح علمودي و علمود بنته
حاول وياه الله يخليك حاول اتوسل بيك ابوس ايدكم حلو الموضوع بدون قتل

ضليت احجي وابجي لما امه طلعت شافتني اتوسل

ضلت تدردم بس بعينها فرحه وصلو هالمرحله ومكيفه شايفتني بهالحاله

عفتهم وصعدت فوك اني وصاعده لغرفتي شفته اضلم باهت

فرحتي ضاعت بهالمكان

اباوع الحياطين غرفتي الباب مفتوحه ضلمه داخل منها بس ضوه الشباك

اني رايحه لغرفتي شفت رغد طالعه من غرفتها صارت ورايه كالت : خل نحجي شويه

طبيت سديت الباب ماجاوبتها

طبت ورايه جتي كعدت يمي : اي كلمه اكولها ماتعبرلج شكد مقهوره و ندمانه اني الج حق تكرهيني و ماتسامحيني صدكيني ماردت يصير كل هذا الشيطان مرات يلعب بعقل الواحد و يدمر حياته
مثل اخويه هسه راح ياخذ حقه بس بعد كم سنه رح يذكر كل هذا ويندم
و مثل ما هدمو زواجي و ندمو
الحق اله ضريبه يدفعوها بعدين
الله واعلم بعدين حتسامحي لو لا اتمنى تسامحيني الي هم منا لوكتها
ماريد اعيش بعقده الذنب طول حياتي

بقت تحجي تحجي اني كاعده مغمضه دموعي تصب وحدها
ماتعبانه من الوجع ببطني كد ما كلبي موجعني
الكل اذاني و تخلى عني
امي ابويه رغد حته شاهين رغم مرينا باصعب الضروف
كدرنا نتخطاها و نبدي من جديد ليش رجعنا للصفر
ليش ماكدر يعفي عن ابويه علمودي
ليش ما خلاني سبب بعينه حته ينسى
الي بينا ماجان كافي ؟
اني ماجنت كدها؟ ماكدرت انسي وجعه ؟
فشلت وياه
فشلت بكلشي 💔

مددت بالفراش قرفصت ع نفسي شكد مابيه رغم الوجع
صافنه ابجي بلا صوت
ماذكر شكد ضليت ع هالوضع
و كم ساعه عشت بهالدوامه
مثل الي يدخل يغط ببانيو مي
يختفي الصوت يختفي الشعور
يعد الدقايق يلهي روحه
يتمنى يضل جوه المي طول حياته مايطلع
ماشوف احد بعد
هالدنيا صعبه عالم بشع ماريده

الفجر سمعت عمتي تحجي بالموبايل بصياح

كمت كوه سندت نفسي منا ومنا مشيت بالضلمه شلون مجان
هاجت اوجاعي عطت خفيف لزمت بطني
رجعت سندت روحي نزلت عالدرج شلون مجان

لكيت عمتي بالمطبخ كاعده وحدها والموبايل بايدها تباوع ع شباك الحديقه

شافتني رجعت دارت راسها

- ويامن جنتي تحجين

مجاوبتني

- شاهين مو

رحت عليها جريت الموبايل منها بسرعه عاطت بيه
ماركزت بحجيها دست ع رقمه شلون مجان خابرته

رد عليه كال ها يمه كتله : شاهين شاهين وينك

- اني مهدي وين انتي

- انت وين شكتلها لامك ها مهدي احجي

- تعالي للمستشفى

- ا ا ا اي مستشفى ؟ خوما لتكلي !!!!! جاوبني مهدي ااااخ

بطني وجعها صار ماينحمل صرت اتلوى بمكاني ادنج

صار يصيح : خل يجيبوج لمستشفى فلان بسرعه
اجي عليج اني الو حور حور تسمعيني

شمرت الموبايل ع عمتي صعدت لبست العبايه اني و اصيح اخ اخ

بطني مثل السجاجين تكصكص بيها عضامي تشنجت و تطكطك

الف شعور بهاللحضه ماعرف شلون طلعت كوه لكيت تكسي باوعت بيت اهلي باب الشارع مفتوحه يعني همه هم راحو

وكف كلبي ضليت اصيح عالتكسي استعجل استعجل اااخ

خطيه ابو التكسي راد يجيب بدالي من الخرعه

وصلنا للمستشفى دكيت ع مهدي طلع اخذني من التكسي اباوع بعينه ماكو تعابير و التعب ماااكله اكل ديسندني انتبهت ايده مايكدر يحركها

باوعتلها شفت مشكوك البلوز مالته كتله شبيها ايدك كال تصوبت

ضربت ع وجهي ليشش شنو تصوبت اخوك وين ابويه وين احجي دخيلك

- مو وكت حجي حور ابوج بالغرفه رقم هلكد

صرت ما اسمع شي اذني كامت تصوفر من الهبطه

صعدت شلون مجان وصلت لغرفه ابويه

ريتني ماشفته

مختفيه ملامحه من الضرب ماعرفته

جسمه ازرك طوخ وجهه مورم ايديناته مكسوره
رجل من رجليناته مادري شمسوين بيها مورمه و مصلوخه عبالك
شادي من فوك ليجوه

امي كاعده يمه ايدها ع راسها تبجي
تجمدت بمكاني عالمنظر مالته

امي طبعا ماقبلت ابقى رزلتني و طلعتني من الغرفه حسيتها كارهتني من صدك ماعرف شنو العاشته وحدها من جنت بعيده عنها
عبالك مو امي قسوه كلبها حركت كلبي
بلحضه حسيت بندم بس شنو جان بيدي
شاهين جان رابطني ببيته لما تعلقت بي
شجان كدرت اسوي امي ماتفهمت هالشي باي طريقه
حاولت افهمها اكثر من مره مافهمتني محد فهمني

يمكن الي مايعيش وياك و يعيش ضروفك صعب يحس بيك

قليلين عاشو الي عشته اني ف صعب يصدكوني
والاصعب يصدكون اني مابعت ابويه ولا بعت زوجي
الناس كد ماسمعت حجي عني من وره الي صار ويايه
حجو هوايه طعنو بعرضي سنين
تعذيب ابويه من شاهين الناس فسرته بعت ابويه لزوجي
دائما جانو الداير مدايري يغلطون واني اكلها
دفعت ثمن فواتير اني ماطلبتها
حملت نفسي فوك طاقتي علمود الحواليه
ماضلت عندي طاقه اتحمل احد بعد
مابقت عندي طاقه من الاساس

اني و طالعه من المستشفى انتبهت عليه دكتوره ابجي وامشي كوه
جتي سئلتني بيا شهر انتي كتلها بدايه الثامن
كالت انتي جايبه اليوم باجر بالهوايه بطنج نازله كلش
اخذتني ع دكتور ثاني فحصني كال مع الاسف ولاده مبكره عندج
و بالفعل ماطولت سالفتي 5 ساعات دخلوني عمليات
مهدي ضل بره ماعافني مجان احد ويايه بهاليوم ابد غيره
غمضت كعدت لكيت نفسي جايبه

اول مافتحت عيني صحت صحت لما جتي ممرضه سئلت ع بنتي كالت صعب تشوفيها هسه لازم تبقى بالخدج نراقب حالتها
جفلت كالت مابيها شي لتخافين بس لان ولاده مبكره جتي ضعيفه
لازم مراقبه من الدكتور

ماحابه احجي عن هالايام اكثر لان وجعها جان يعادل وجع الف سنه
اهلي غادرو المستشفى بالجذب ماكالو نشوف صار وياها
عدا زهراء جايه سائله مهدي عن حالتي هو و كاعد بالممر كالها نايمه هسه بعدها تعبانه و شايفه بنتي و رايحه

بمرور الايام عرفت مهدي هو الماخذ ابويه
من توسلت بي يحل الموضوع
رايح لشاهين لاكي معذب ابويه لاخر لحضه
شاهين جان ناوي يعوفه يموت بمكانه
متعارك ويه مهدي و متاذي بايده ماعرف شلون
شاهين من شاف اخوه تاذه عافهم و طلع
مهدي شايل ابويه مصعده بسيارته و طار بي للمستشفى
والفجر خابرنا وره مامداوين ابويه و شادين كسوره

ابويه من تحسن مابلغ ع شاهين ماعرف ليش ولا اعرف الصار بينهم

العشاير ادخلو و انتهت بفصل

يمكن بنتي جتي بايام صعبه بس جيتها نهت امور هوايه
مثل الي حطت نقطه و بده سطر جديد

اني هم حطيت نقطه نهايه وبديت من جديد

طلبت الطلاك

شاهين عارض اول فتره و انو الي سواه حقه و رجعه
والمفروض اوكف وياه و نبدي مره لخ

كتله لو ادري حقك نهايته فلوس جان سويت سلف ونطيتك ولا تخليني اعيش الي عيشته

ضلت مشاكل بينا سنه بالمحاكم نجر و نعر

اخر شي صار الطلاك

جانت صعبه بس استحقينا هالنهايه اثنينا تعبنا
ماكو شي حيرجع مثل الاول
حته الاول جان صعب 💔
طريق كله شوك و اسلاك نمشيه يوم يومين
بس مرح نكدر نكمل بي العمر كله

بتنا ضلت بيناتنا الشي الخلانا نحترم بعض عالاقل كدامها

اجرت مشتمل مبني بحديقه داخل بيت جبير
كاعده بي مره جبيره بالعمر رجلها توفي بالفتره الاخيره و الوحشه اكلتها
قبلت تاجرلي من عرفت وضعي
والبيت بنفس المنطقه مالتي
عشت من نفقه البنيه و نفقتي
سويت حياه بسيطه بعيده عن اهلي و بيت عيالي
مسؤوليه و حمل ثكيل عليه وحدي بس من احط راسي ع المخده اعرف انام
بنتي ربيتها بجو هادء مابي مشاكل و كره وحقد
اهلي ماتقبلوني بعد ولا اني تقبلتهم
بس زهراء تخابرني وتجيني تكلي : امج حتموت و تشوفج انتي وبنتج روحيلها طيبي خاطرها

احس بثكل جبير من اسمع هالكلام

سنين اعاني وحدي ابجي واضم دموعي عن بنتي
جانت بعدها صغيره امددها يمي
تلعب باصابيعها ترفس برجلها تضحك ويه الهوا واني يمها دموعي تصب

كبرت سنه وره سنه شاهين كل فتره يجي يشوفها
ياخذها يم اهله من الصبح للعصر
و رغد هناك تهتم بيها حفاضات ممه وهالسوالف ادزها بجنطه وياه
مانطاني كلبي احرم البنيه تشوف حياه طبيعيه
ام واب و كرابه يحبوها
شاهين من جان يجي يشوفها ينسى نفسه يلعب وياها
يكعدها بحضنه يهزها حيل وهيه تخرب ضحك
يجيبلها العاب
يسوكلها هدوم كل بدايه شهر ماعرفها ابد اول سنتين
كلما يجي جان يحاول يحجي ويايه بس اعوفه و ادخل غرفتي
اكله اخذو راحتكم و من يريد يطلع اخذ البنيه منه واودعه طبيعي

لحد ما اجاه شغل سافر بره سوه شغل جديد بكردستان يم جماعه اكراد يعرفهم همه تكفلو بجيته و امنوله سكن هناك

الخطوه هاي سواها وره ما ايس من رجعتي اله
مثل الي حاول ينساني
ارتاحيت من راح صار لموضوع اسهل عليه اندعيت انساه هوايه

مهدي فتح ورشه جديده بمنطقه ثانيه جاب بيها ولد 3 من الشارع شغلهم
راد يكسب بيهم اجر و بالفعل شغله اطور و فتح ورشه ثالثه و رابعه
صار مايلحك عالشغل الله نطاه ع كل نيته و طيبته

رغم انشغالاته جان يجينا عالاقل مرتين بالاسبوع
يشوف ايه بنتي
سميتها ايه احب هالاسم
مهدي تعلق بهالاسم كالي من تجيني بنيه هم اسميها ايه بلكي تطلع تشبهه
يحبها لايه كلش

شاهين راح مطمن لان يعرف مهدي مرح يعوفنا يبقى مهتم بينا و بالفعل ماقصر ويانه

ايه تكبر يوميه نست ملامح ابوها اشوفهيا بالصور بالفيديوهات
اخر مره شافته جان عمرها سنتين بعد ماشافته غير بالصور

جنت احجيلها هوايه عنه حجيتلها ابوها شكد طيب و يحبها
تسئلني ليش مايجي لعد

اسكت بعدين اجمع قوتي اكلها سافر لازم يشتغل حته يجيبلج هدوم والالعاب الترديها والاكل الي تحبي مو صحيح ؟ هيه تهز براسها

جانت تشبهه هوايه هيه وصغيره ماخذه من شاهين ملامحه
و ماخذه مني فهاوه كلبي و فطاريته

جانت تشوفني ابجي لازمه ورقه وقلم اكتب تجي تقلدني هيه همين تلزم ورقه و قلم تشخبط يمي
مره دكتوره نفسيه عالانترنيت نصحتني اكتب كلشي احسه بورقه
ومن اخلص كتابه احرك الورقه كلتلي هالشي حيساعدج تتخطين المريتي بي

ف جنت كلما اذكر و اختنك الزم ورقه وقلم اكتب اكتب و دموعي تصب
ايه تنتبه عليه امسح دموعي هيه هم تجي تصعد عالكرسي يمي تباوع عليه تحاول تكتب الي اني كاتبته ماتعرف ف تكوم تشخبط

امسح دموعي والزم القلم ويه ايدها ارسملها ع ورقتها

رسمنا كوخ صغير بمكان اخضر واسع
الشمس تفوت بشبابيكه من كل جهه
و السما زركه تطير بيها طيور هوايه
مكان دافي يريح الكلب

مره ع مره تعلمت ترسم وحدها

رسمتني اني وياها و زهراء ومهدي

- نسيتي احد بعد

-منو

- بابا

- هو هم ناسي مو

- لا طبعا انتي اغلى شي عنده يمكن هو هم ديرسمج بخياله هسه ومشتاقلج

اضل احجي واحجي مرات ترتاح لكلامي مرات ماتفهم عليه

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

تسئل عليه دائما بس يمكن وجود مهدي مجان يحسسها بغياب شاهين
يلعب وياها و يسولف و يضحك
غطه ع غياب شاهين
ك تفكير طفله اعتبرت عمها ابوها
مهدي هم اعتبرها بنته مو مجرد بت اخ
اهتم بيها وبيه
احترم المسافه الي بينا
مافتح المواضيع القديمه فهم وضعي و يعرف الي بداخلي
خطب مرتين و بالمرتين يصير اختلاف و ينفصلون
طليقته حاولت ترجعله ماقبل نهائيا

حاول دائما يصالحني ويه رغد بس ماكدرت اسامحها
التسامح مو دائما سهل
اذا شريط ذكرياتك يمر كل شويه كدام عينك
صعب تمسحه و تكول سامحت
اصعب مما تتخيلون

مرن اربع سنين
صار يوم ميلاد ايه متعودين كل سنه نحتفل بي
اني عليه الاكل و مهدي عليه الكيك و الزينه
جان كل سنه يسويلها ثيم ميلاد حسب الشخصيه الي تحبها
مره سبونج بوب
مره بيل
مره ربونزل
جاب الغراض واجه اني جنت بالمطبخ احضر الغده والمواعين
بيومها عزمت الحجيه ام البيت و زهراء اختي جابت باقي اخواني
ايه جانت مستغربتهم لان شايفتهم مرتين تلاثه مو اكثر
بس حبت كعدتهم وتأقلمت وياهم
لبستها بلوز ابيض و فستان قصير شتوي مربعات احمر و كولون برجلها ابيض و حذاء دانتيل مثل ماتحبه
شعرها طول شويه سويتلهيا ذيل حصان ثنين بالجوانب منا ومنا

البيت هوسه و صوت كارتون بالتلفزيون عالي

مهدي اجه للمطبخ جابلي الغراض

- عاشت ايدك بس لو تجوز من سالفه ثيم الميلاد
ماحب هالاشكال جان زينه المكان زينه عاديه

- مو مهم انتي تحبين المهم هيه حابته

- هههه بعدين تتعود ع هالسوالف و تصير تريد يوميه ميلاد

- تدلل علينا صدك جذب ميلاد يوميه اسويلها واحد حبيبه عمها هاي

- تسلملي متعبيك ويانه دائما

- ايي ابدي ضيعي الوكت بهالسوالف و عوفيني ميت جوع
جاي من ورشه الوزيريه بطني تصوفر من الجوع تره

- امم ساعدني لعد بدل هالوكفه و حناكل بعد شويه
اخذ المواعين و الكلاصات هاي اسبقني
احضر بلم الفطاير و البورك ولاحكتك

اني واجهز بغراض المطبخ جوه صار هدوء بالهول
و صوت طبطبه ع الجتاف

اخذت الغراض رحت للهول لكيت شاهين جاي متحاضنين هو ومهدي عبالك صارلهم عمر مامشاوفين

البقيه كاعدين ويمهم ايه

باوعتلها شفتها مستغربه شاهين دتعرف ابوها بس متعرف شتسوي

مشت ليم مهدي ختلت وراه تباوع بتك عين لابوها

شاهين انقهر شافها راحت لمهدي مو اله
نزل ايده بيأس

مهدي شالها باسها همس باذنها : شفتي شون ميلاد حلو ؟
حته بابا اجه علمودج
شنسوي هسه ؟

نزلها للكاع : بوسه و حضنه لبابا ركض

مشت ع كيفها ليم شاهين
دنج الها يباوعلها و تباوعله خايف يتقربلها و توخر منه
فتحتله ايدها حضنته من ركبته

تنهد حضنها هو همين
غمض عينه داخ بحضن بنته

مهدي وراهم ايده بجيوبه باوعني
انتبهتله اني هم متجفه تعب الدنيا بعيني
شاهين ضل مغمض عينه خايف تنزل دموعه
جان مبين عليه شكد مشتاقلها و محتاج هالحضنه تعوضه شوقه الها و لابنه الله يرحمه

كل واحد بينا بالمكان ضل شايل حجي بكلبه
كلام فات وكته ماينحجي بعد

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الميلاد هذا جان اكثر يوم تفرح بي ايه مو لان ابوها بي
بس حست كل الداير مدايرها يحبها
فرحانلها من كلبه
من الايام القليله الي ضحكنا بيها من كلبنا سوه
بس جانت ضحكه ايه و برائتها احلى شي بالمكان
مثل حياه جديده الله رزقنا بيها
تعويض عالصبر و الالم الشفناه
احيانا نختار امور بحياتنا و نتمسك بيها بس نتيجتها وجع و تعب النا
الموضوع يشبه وجع الاسنان من سن يوجعك وانت جوعان و مصر تاكل رح تتحمل شويه شويتين بعد بس ماتكدر تتحمل اكثر
لازم تشلعه من داخله وتخلص من المه
الحب هيج مرات يصير وجع مو راحه و عافيه مثل مامتخيلين
ولا شرط يكون سعادتك مو بالكوه الامور
احيانا تختار غلط احيانا التوقيت غلط
تضعف و تحاول
تدفع بحايط مايندفع لما تعرف محاولاتك اضعف من الواقع
تغلط و تشمر نفسك بكوارث و اخطاء ماتسامح نفسك عليها طول حياتك
البشر خطاء ضعيف هذا عذره الوحيد
بس بعد الخطاء و سنين من التعب و الغلط يفتهم الحقيقه
انو شكد ماتحاول كلشي مكتوب و نصيب
و سعادتك مو شرط حب
السعاده براحه البال بالحريه بالاستقرار بالصحه والعافيه
كنوز الدنيا ماتعوض هالاحساس
دست ع كلبي بس كسبت صحتي و راحه بالي و سعاده بنتي
رح اكبرها و اتعب عليها واحققلها الماكدرت احققه لنفسي
يارب اكعد اسعدها و ينطيها بخت احسن من بختي
لتنسوني بالدعاء ❤️

..............

قصه حور مليانه عبر سامحوني اذا نسيت اذكرها
اني اسمع منها واكتب وشايله هم اذا دا اكدر اوصللكم المها وجع صاحبتها بين السطور
دائما عندي هدف بقصصي اوصله الكم
انو تفاصيل قصصنا الي نعيشها يوميه مو كل الناس تعرف تفاصيلها
و لو بيوتنا مفتوحه ع بعض بدون حياطين و شبابيك جان شفنا العجب
و ماجان احد كتبلي ( قصصج مو حقيقيه ) 😅
لتستغربون اي شي الواقع ابشع من انو ينكتب بقصه
و متاكده حتوصلني قصص اقوه من قصه حور والقصص النشرتها
الدنيا صعبه والبشر اصعب
الله يجفيكم شرهم و يحفظكم من كل سوء
لهنا اختم قصه عروس البيت الاسود
و التقيكم ان شاء الله بقصه جديده
رح اشتاقلكم🥺
احبكم هوايه ❤️
لارا

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]