رواية عروس البيت الاسود الفصل السادس عشر 16 - بقلم لارا سالم

..........................

يدخن ميجاوب

- لتعوفني بناري شاهين حرام عليك اني حامل نفسيتي تعبانه لتعبني اكثر

ضليت احجي احجي ماحسيت الا شال شي ركعه صار ميت وصله خنزر عليه

رجعت ليوره حجيت بخوف : شاهيين !!

قطع كلامي بعيطه رجفتني رجف : ابوج رجع ! حابه تسمعين الباقي ؟

بهاللحضه صارت صرخه عاليه بالمكان فزيت من نومي

اباوع كلشي ماكو

كوابيس هالموضوع دمرتني زيدتلي تقلصات الحمل الوجع صار قوي

صرت اضوج انام

اخاف تتحقق احلامي

اذكرت ادويتي ما ماخذتها كمت من مكاني ادورها بالغرفه

ما اذكر وين حاطتها كمت امشي ع كيفي راسي يون عليه

عيني مغوشه دورت بالميز تواليت المجرات ماكو

يم الفراش ماكو تعوذت ابليس فتحت كنتوري مع انو ما اضم ادويتي بالكنتور بس كلت يجوز خالتها بي بلا ما انتبه

اني وادور حسيت شي جوه رجلي باوعت
غراض جنطتي نصها واكعه بالكاع
حمره مسكاره قلم و سيم كارت جديد جان جايبليا شاهين و بعدني ما خالته بالموبايل

دنجت الم بالغراض شفت شريط الدوه صاير جوه الكنتور

هفف شرح يجيبه هذا وبطني كدامي متر

مددت بالكاع ع كيفي حته انوش الشريط

اني و ماده ايدي اخذه لمحت شي اسود جوه الكنتور

جانت الغرفه شبه ضلمه فاتحه بس براكيت اصفر

ماكدرت اشوف بوضوح شنو هالسواد

كمت فتحت الاضويه رجعت مددت مره ثانيه الحايط اسووود حرفيا اسوود

جبت موبايلي فتحت ضواه اريد استوعب شهالسواد

باوعت عبالك زيت لاجع بالحايط اسود و ذاب عالكاع

الي استغربته الحايط الجوه مال جهه الكنتور كلها سواد من الطول للطول

ردت طريقه اوخر الكنتور بس كنتوري ضخم كلش و على طول الحايط مايتزحزح

خرعني الموضوع صرت ادور بحياطين الغرفه

لكيت بالاطراف شي مثل الملح بس لونه غريب صرت اقره ايات
مستحيل اني انضف غرفتي دائما ماكو هيج شي
بس الاسود الجوه الكنتور مادري بي لان ما انوشه بالتنضيف

كمت انكت بغراضي مجاريري هدومي مكياجي حته عطوري شمرتها زبل

من الخرعه صرت اشيل واشمر زبل خفت كلش

فتحت الكنتور صرت ادور بالخانات اني من جيت لهلبيت وهمه يحطون وصل قماش بالطبكات مال الكناتير و نسفط الهدوم فوكاهن

طلعت الهدوم بالكاع اشم بيهن ماكو شي رجعت اصفطهن بالكنتور

لمحت القماشه الجوانيه المفروض بيضه هيه بس صايره غامقه

جريتها لكيت الطبكات الخشب صايره سوووده و حته طابعه عالقماش الجان فوكاهن

لشتي صارت ترجف شميته ريحه اسيتون مخبوط بزيت خفيف مو مركز

حسيت نفسي شامه هالريحه من كبل بس ما اذكر وين

كعدت ع صفحه اعصر بدماغي اريد اذكر افكر افكر

خطرت ببالي !!!!!!!!!

طلعت من الغرفه رحت لغرفتها مجانت موجوده طالعه ويه مهدي يسوكون للبيت

صرت انبش غرفتها قطعه قطعه ماخليت دورت جوه كنتورها وره بردتها
غرفتها طبيعيه مابيها السواد الي بغرفتي

تاكدت هيه

ضليت ادور لما لكيت العلبه ليهسه اذكر شكلها

يوم الدخلت لغرفتها اصيحها و شفت العلبه جوه الكومدي

بوكتها تحججتلي بحجه تافهه

حاطتها بين علب مكياجها عود حته خاف احد يسئلها تكول شي يخص العنايه بالجسم لان الماده خشنه شويه تشبه سكراب الجسم

فتحت العلبه الماده سوووده شميتها نفس ريحه الماده الي بغرفتي

اويليي عالوجع النفسي الحسيته بلحضتها

حته انتي !! لج حته انتي !!

رجعو من الطلعه هيه جوه تسولف ويه امها عالمسواك
مهدي كاعد يمهم يتعشه

صحتها من فوك  بعصبيه  : رغدددددددددد

مدت راسها من المطبخ : ها حور خوما صارلج شي؟

- تعالي

صعدت عليه شافتني واكفه يم الدرج فوك جتي عليه : بيج شي كلبي عبالنا .....

ماسمعتها جريتها من شعرها جره طلعت روحها بيها

مشيت بيها سريع لغرفتي دفعتها و قفلت الباب

سمعت صوت رجلينات عالدرج صعدت بس ماركزت
بودي اخنكها بهالحضه

رغد : تخبلتييي ؟؟ لو ما حامل جان عرفت ارد عليج

- وانتي لو ما اخت شاهين جان شمرتج من الدرج و خلصت من شرج

رغد ضلت فاتحه عينها مامفتهمه شبيه

اني لازمه العلبه بايدي الثانيه رفعتها حجيت بنبره حاده: شنو هذا ؟؟

فتحت عينها بالزايد وجهه صار يضرب الوان باوعت ع كنتوري

- هههه اي اي خليتي جوه هدومي و هدوم زوجي و جوه كنتوري تشوفي ؟

جريتها من شعرها بطحتها بالكاع اني ولازمه بطني بايدي الثانيه تقلصاتي موتتني من حرك الاعصاب

اني و لازمه شعرها : شفتي ؟ خاف نسيتي تخلي بمكان ثاني ؟
خاف مادمرتي حياتي بما فيه الكفايه ؟؟
شتردين لج ها ؟

جريت شعرها رجعت وكفتها هيه بس تصيح اه اه ماجاوبتني ابد

رفعتها اني و شاده شعرها :  تردين تموتيني ها
منو علمج امج ؟ هاي المثاليات مالتكم طلعت هوا
طلعت براسي ها دايحه لج احجيييييي

رغد : نصي صوتج حور رح احجيلج كلشي والله بس لتسمعيهم الله يخليج

- بعد تردين استر عليج ؟ لج دمرتي حياتي حطمتيني شنو خطتج الجايه جانت تكتليني اني و بنتي ؟

رغد : مو هيج والقران مو هيج كعدي بس اوعدج حتعرفين كلشي والله رح احجيلج  نصي صوتج الله يخليج

كعدت تحجيلي اني بقيت واكفه كبالها ما كعدت من العصبيه

تحجي و تبجي

رغد : بالبدايه اريدج تعرفين مجان الي نيه ااذيج مجنت اعرفج كفايه حته ااذيج بس هيه لعبت بعقلي خلتني اروح وياها شيخ تعرفه بالزعفرانيه
كلتلي هو يحل مشكلتنا

- منو هيه

رغد سكتت

- منو احجي

- طليقه شاهين

- طليقه شاهين !! هههههه طليقه شاهين ااااخ كلبي طليقه شاهين

صرت افتر والوب من القهر

- و شنو المقابل بله ؟

رغد : تسويلي سحر يم الشيخ يرجعلي زوجي

- وانتي صدكتيها

رغد : سوت سحر لزوجها السابق و رجعتله

- جانت مزوجه كبل شاهين ؟ سمعيني كلشي بالتفصيل

رغد : اي و من كعد عالحديده عافته
شاهين تعرفت عليه بالعده جانت كاعده بيت وحد
غرته بسوالفها و حركاتها حبها و اخذها
و صار عدهم امير من جوي كعدو هنا يم اهلي زادت المشاكل
رادته يسجل نص البيت باسمها خافت من شغل شاهين بالعقارات وانو ممكن هالبيت ينباع فد يوم شرطت عليه تاخذ نص البيت من ماوافق عافته
كامت تأذي ماخلته يشوف ابنه وره طلاكهم حته يرجعلها لوت ايده بامير
بس شاهين عاند و خطبج من ابوج

- ليش شمعنى اني ؟

رغد : جيف بعدج بنيه و صغيره و جوارين
جان يعيرها بطلاكها و لبسها و انو ماعدها مانع يوميه تصير ويه واحد
هيه ضاربته راشدي يمكن و راجع هو هم ضاربها
زايده المشاكل بينهم راد يردلهيا بطريقه ثانيه
ف خطبج
من عرفت حاولت ترجعله عاند وياها
اذا تذكرين جان يجيكم دائما للبيت يحاول يكعد وياج
يحاول يقنع ابوج انو تطلعون سوه كل هذا جان عناد بيها
رادها ترجع ندمانه هالمره

- ليش كل هذا ؟

رغد : يحبها جان يحبها هوايه

دموعي نزلت هنا ماسيطرت ع نفسي

رغد : شاهين من نوع مايبين مشاعره بسهوله
اذاها هوايه بس ضل يحبها
جيتي انتي هم اذاج بس كدرتي تخلي يحبج و ينساها
بحياتي ماتخيلت يكدر يعوفها جانت مسيطره عليه كلش
هالكلام كله حجاه لمهدي واني سمعته بعدين من مهدي و منها
ايام ما جنه نروح للشيخ تحجيلي عن شاهين و الي ناويه تسوي

- كملي السحر شنو جان

رغد : عذاب و مشاكل و نفور
من نجح سوتلي اليه واحد محبه اني و طليقي
و سوتلج اللج واحد ثاني

- شوكت هالكلام ؟

- اول مره من جنتو مخطوبين و المره الثانيه كبل 3 شهور من درت بيج حامل و شاهين كطع وياها رجعت اتصلت بيه كلتلي اخر مره اطلب منج طلب و هالمره ماعوفج اذا مارجعج لزوجج كتلها شلون كلتلي نسوي سحر لزوجج يرجعلج يتوسل

تحجي و تبجي ماهزتني دموعها كد ماجنت كاعده اسمعها ع اعصابي

- كملي ؟ شلون كدرتي تطلعين من البيت وحدج و اهلج خانكيج هالخنكه ؟

رغد: تشاوفنا بالمول خليت شاهين يوصلني علمود اشتري هدوم و عطورات اخواني من يودوني للمول يعرفوني ابات بالمحلات ف يرحون يكضون شغلاتهم ويرجعون عليه من اخابرهم
نطتني موعد هناك تشاوفنا بالمول و رحنا للشيخ سوالنا اعمالنا

- وانتي طبعا صدكتي هالخزعبلات هالدايحه قشمرتج

رغد : هالسحر مايخيب و الدليل الي صار وياج بهالبيت

- ليش مايخيب بله

رغد : لان ......

صارت تلوف بوجهه تمسح دموعها

-  سوده عليه استحيتي؟  احجي شنو هالسحر

رغد : نكس

- يعني شنو نكس

ماجاوبتني

- لج بابا احجي لتعبيني نكس يعني شنو

رغد : يعني على وصاخه وصاخه افتهمي

- هدوم نكسه يعني ؟ لو شنوووو

باوعتني صفح و دارت وجهه تبجي

بلحضتها خطر ببالي تقرير قريته مره عالانترنيت انواع السحر و اخطرهم السحر الاسود و السحر النكس هذا يصير بالمعاشره

باوعتلها مصعوقه فتحت عيني : لتكليلي !!!! كاعده تجذبين مو

صارت تبجي و تشهك تمسح دموعها و خشمها

- مو الي ببالي مو ؟

رغد : هيه ورطتني والله اني .......

نهاريت رحت دفعتها من جتفها حيل : تخبلتييييييي لج انتي شنووو

رغد : ابوس ايدج صوتج حور والله العظيم ماجنت ادري كلتلي نص ساعه يسويلنا السحر و نرجع شو طبينا دقيقتين كالها عوفيها يمي اقره عليها واتفضلي بره اشرتلها ماسمعتني كلتلي خلصي و لحكيني
و سوه عملته ويايه حاولت امنعه طلعت هيه حاجيتله كلشي عني يكلي اكدر امنعج بالزايد عن طليقج لتوكفين بطريق سعادتج اني حاب اساعدج
و ماتلكين اسرع من هالسحر سويته لصاحبتج و رجعت لزوجها
يقصد شاهين من رجعتله وره زواجكم
طلعت عدها سوالف ويه الشيخ و مشتغللها كل سوالفها شغل مضبوط
كل سحورتها ع نكاسه
طلعت من عنده تفلت عليها بس شحجي و شكدر اسوي ايدي مربطه كرهتها كطعت علاقتي بيها من ساعتها و هيه مخابرت بعد ولا سئلت

- و رجعتي لزوجج ؟

دارت وجهه تبجي بجهه ثانيه

- تدرين شداشوفج هسه ؟ شكد شفت قذرين بحياتي مثلج ماشفت
ياحيف حسبتج اختي بيوم من الايام
اشمئزيت منج

رغد : حور انتي عشتي بهالبيت و شفتي شكد الحياه صعبه هنا
اهلي مايتفاهمون اخوتي خانكيني
زوجي طلكوني منه بلمح البصر ماتهنيت مثل باقي البنات
جنت مثل الغريق مايصدك يصعد ع شي حته يكدر يعيش
مجان كلامي غيرها يساعدني
كل همي جان ارجع لزوجي ماجنت اعرفج حته ااذيج
اني نفذت شرطها بس

- هنا المصيبه اذيتيني وانتي ماتعرفيني
دستي ع حياتي علمود حياتج
موتيني حته تعيشين انتي
قذره انتي وحده قذرررره

رغد : شماتكولين حقج غلطت و اعترف بغلطي بس اترجاج ماتحجين شي
اخواني اذا عرفو يذبحوني خاصه سالفتي ويه الشيخ اني حجيتلج كلشي حته اخاف تكليلهم ع سالفه السحر مايوصلون للشيخ و يعرفون شسوه ويايه

- واني اكلها لان حضرتج غلطتي
اسكت واعبر الموضوع علمود مايعرفون وصاختج وين واصله
كومي طلعي بره برررررررره

رحت عليها جريتها هيه تبجي تحاول تسكتني
بس ماتحملت فقدت صرت اعيط وادفع بيها فتحت الباب طلعتها بره
وهيه عيطه هيه بجيه سديت الباب الوب بالغرفه و ابجي

بهاللحضه اجه مهدي يدك الباب يحجي يصيحني ماجاوبته

هاليوم جان من ايامي السوده الي ما انساها

صدك هالبيت لعنه

لعنه ع كل الي بيه

افكارهم المريضه و تصرفاتهم متخيلين همه محافضين ع شرفهم و عرضهم

مايدرون شديصير

بتهم القافلين عليها الباب ليل ونهار ضيعت شرفهم بلحضه

تمنيت اطلع اعيط بعلو حسي و افضحها
اعرفهم شكد همه ناس يدعون المثاليات وهمه مريضين و بلا شرف

كرهتهم كلهم كرهت البيت حايط حايط شبر شبر

حسيت المكان ديخنك بركبتي خنك

جريت غراضي طلعت بره مهدي جان عالدرج حاول يوكفني ماخليته

نزلت جوه عمتي صارت بضهري تدردم عليه لان شافو رغد نزلت للحمام و مبين عليها باجيه

طلعت للحديقه اجر النفس كوه

كعدت بالمرجوحه اكح و ابجي مهدي اجه ورايه عصبي
يريد يفتهم شبينا

ضليت مدنجه ابجي صاح : هسه تفهميني شكو بسرعه

ماكدرت اسكت كتله بصوت مبحوح : مسويتلي سحر

مهدي ضل فاتح حلكه : اكيد متوهمه مو رغد

- حجتلي كلشي

مهدي : كتلج متوهمه

صحت : روح افتر بغرفتي شوف السواد الي بيها
شوف حالتي شوف حياتي شلون جانت بهالبيت الي جرالي جره لاحد ؟

مهدي : هيه كلتلج

- اي هيه

- شكالت ؟

- مسوتلي سحر

- مال شنو ؟ احجي كلشي مو اجر الكلام جر منج

شجاوبه شحجيله اخ من حضي

- تحجين لو افوت اشكها نصين

- سحر عادي شمدريني ناطيها ماده موزعتها بغرفتي هاهيه

بعدني مامكمله الحجايه مهدي ركض طب جوه

كبت العيطه اسمع بس ضربه الها و صراخها هيه

عمتي تعيط بالنص و تلطم ماكدرت تخلصها من ايده

وره ساعه رجع شاهين متأخر كالعاده

دخل امه استلمته هاي اليوم تطلكها هسه هسه تطلكها
اذا تبقه ازيد من هيج تموتنا كلنا اختك رادت تروح بيها اليوم

مهدي نزل من فوك حجاله كلشي شاهين راد يصعدلها مره لخ
مهدي كاله ادبتها  باست الايادي علمود اعوفها و حبستها بغرفتها
شاهين من العصبيه
نزل تعارك ويه امه شيلها مسؤوليه الي صار
وهيه تكله جذابه مرتك تتبلى عليها بنتي متربيه ماتسويها

اني بالحديقه اسمع حجيها عني اووف بنتج لو كد نفسها تنزل تحجيلكم كلشي بالحرف
وانتو لو ناس عدكم شرف جان ماكدرتو تحطون عينكم بعين العالم
بس عرفتو تبيعون شرف عليه وتشوهون سمعتي

مشت الايام علاقتي بشاهين بقت متوتره
كذا مره طلبت منه ابقى عد اهلي ماوافق كتله هذا سحر مايروح بسهوله
يكلي ماضمن ابوج شيسوي

- ليش وينه ابويه ؟

ماجاوبني

مشه شهر صرت بالثامن حملي يوم بعد يوم يصير اصعب

البيت كئيب محد يحجي ويه احد

رغد من يوم العركه ماشفتها ولا تمنيت اشوفها بعد

شاهين يجي ياكل وينام مرات يسولف ويايه مرات يصفن

مهدي يدخل لغرفته مايطلع بعد

رحت اشوف اهلي حجيت لامي كلشي ماكدرت ما احجي

اختنكت كد ما كبتت بداخلي

رادت تلبس عبايتها تروح تتعارك ويه عيالي و تفضح رغد

بس ماخليتها مو علمودها بس خفت ع شاهين و مهدي ماردتهم يتأذون بشرفهم

امي صارت تضرب ع رجلها تكلي لج همه بيوم من الايام داسو ع شرفج انتي شبيج ليوين تضلين ع نياتج

كتلها واحد زوجي و الثاني وكف ويايه وكفات ما انساها بحياتي اجي هسه ااذيهم ليش هين الكلام هذا ؟ الله يخليج فهميني اريد احجيلج و تسمعيني ماريد تزيدها عليه

صارت تكلي اطلكي ابوج ناوي يرجع و حجه وياها بالموبايل و مرح يعوفني ويه شاهين وره هالسوالف

ضحكت كتلها والي ببطني و كلبي ادوس ع كل هذا علمود ابويه قرر يرجع ؟

- ماتكيفين ؟

- لا ماكيف خلي بمكانه احسن

- لج ابوج ابوج هذا

- ع عيني و راسي بس ماعوف شاهين

- اذا صارت مصيبه ترتاحين يعني ؟ تعرفين عواقب كلامج

- الي يحبني بيهم رح يقدر اني بالنص و مرح ياذون بعض

رجعت من بيت اهلي ثاني يوم دك موبايلي استغربت لان خط جديد محد يعرفه غير امي و زهراء اختي و شاهين

رديت عالخط : ب ب بابا ؟!!!!

صرت احجي وابجي و هو يبرر تبريرات مافهمتها ولا كدرت اقتنع بيها
انو خاف ع اخوتي و امي و انهزم ولو عليه مايعوفني و هو يحبني و ماراد يعوفني و راجع يريد يصلح الغلط

ماعجبني كلامه بس كتله : شلون

كال اكو اوراق عد شاهين شغلات تخص عماره مشتريها سابقا واذا هالاوراق وكعت بايد ابويه يلوي ايد شاهين بهالموضوع لان بيها حبس
و ينهي سالفه الثار يعني شي مقابل شي

كتله شاهين مايعوف ثاره تعرفه عدل

كال سمعي مني اني اعرف شداكول مرح ااذي بهالاوراق مجرد اضغط علي بيهن و اخلي يقبل ثاره فلوس مو قتل
يعني فصليه تخلص بكم مليون

- ههههه تحجي بالملايين لعد امي واخوتي ليش ماتو من الجوع ؟ شسويت بينا انت

ضل يعاتبني انو لازم اطبك وياه هالمره حته ينتهي هالموضوع والكل ترتاح واني بنته واذا ماساندته وانقتل الناس مرح تباوع بوجهي بعد
ذكرني بكل شي مو زين ممكن يصير ضليت ساكته معرفت اجاوبه

عرفت ابويه اناني بوقت متأخر
جنت ااكدلهم ابويه ماقتل بس وجهه الثاني خلاني اشك بي مثلهم

سديت الخط وياه والدنيا تفتر بيه من التفكير

سمعت صوت شاهين جوه اجه

لزمت الموبايل مسحت المكالمه من السجلات

مرت 4 ايام ابويه رجع دك ماجاوبته

صار يدز مسجات ساعه يحجي عليه ساعه يتوسل
ساعه يذكرني بامي و اخواني

قفلت الموبايل نهائي و ضميته بالكنتور

مره شاهين داك عليه الصبح مرتين ماجاوبته

من رجع تعصب عليه كالي : موبايلج ليش قافلته خليت مهدي يعوف ورشته ويجي يشوفج فتحي المهجوم الواحد شلون يوصلج مثلا

كتله مادري نسيت اشحنه

ثاني يوم هم خابرني لكاه مغلق من رجع الضهر كال شو ماشحنتي

ارتبكت اني واكل كتله: مادري شاحنتي حسيتها دتخربط

- حسيتيها !! شحني بشاحنتي ثنينا ايفون

- ها اي ان شاء الله

- بيج شي حور ؟ مو ع بعضج عبالك صار كم يوم

- اني لو انته ؟

- انتي

- اني بعدني باقيه عليك و شاريتك انت شنو ؟

طبطب ع ايدي بابتسامه صغيره ماجاوبني

وره الغده صعد فوك اني بقيت اغسل مواعين صاحني من فوك : تعالي شويه

صعدت طبيت لغرفتي فتحت الباب لكيته كاعد فاتح موبايلي يكلب بي

الهبطه الهبطتها الا شويه اجيب بهاللحضه

اجه يمي هو ويباوع بالموبايل مايباوع بعيني

- شاحنتج تخربط مو

- مو هيج

- مسجات ثنين منه تواسيل
وماسحه نص الحجي و المكالمات هم
وين الباقي ؟

- ماحجه شي ....

- كدامج دقيقه وحده تحجيلي كلشي بيها يله

- ماكو شاهين

- بسرعه

بطني هاجت عليه لزمتها وحجيت : راد اسمه اوراق منك

- اوراق شنو

- العماره الي عليها مشاكل و بعتوها ماعرف شوكت الي فهمته مسويها باوراق مو اصوليه يريد انطيهيا حته ينتهي هالموضوع

- ممم يلوي ايدي باوراق و انسى ثار ابني ؟ من كتلج ابوج عار تكليلي لا

- و بعدين شاهين وبعدين هالقصه مالها نهايه ؟ شوكت تنتهي

تقرب عليه : من ينتهي ابوج

- حتكدر تباوع بعيني وراها ؟ اني حكدر ابقى وياك ؟ حنربي ابنا و نرفع راسنا بعد هيج عمله ؟

- اي اكدر

- اني ماكدر ولو اني لو ثارك صار لازم تختار

- تهدديني

- شتعتبرها اعتبرها لو اني و بنتك لو ثارك

- مممم

- قرر

-  ثاري ماعوفه حور خليها تراجي باذنج

- والي بينا ؟

- موجود

- اذا نفذت الي براسك كلشي ينتهي

- رجعنا نهدد

- اي رجعنا اذا اذيتني اذيه جديده ما اشتهيك بعيشتي بعد
اعوفك اليوم كبل باجر

لزم شعري جره حيل لزمت ايده غمضت حيل من الوجع
من فتحت عيني جانت مليانه دموع
ماتمنيت ارجع اشوف شاهين القديم
اريد الي حبيته وين عيونه الي تباوعني بحب

شفت عينه مليانه حجي حب و تعب و قهر و حقد
شاهين تركيبه من كلشي

عافني وطلع ضليت ابجي ابجي لما نمت

كميه الخذلان الي تعرضتلها بهالفتره جانت فوك طاقتي
وين ماباوع الكل خذلتني و داست عليه
المن اعيش بعد بمنو اوثق شلون حكمل حياتي هيج

مهدي ثاني يوم جابلي دوه جديد اخذته اني وابجي اعصابي و حملي الم و شعور الله لا يراوي لاحد

عافني ابجي ضل ساكت بعدين كالي : منو يستاهل تبجيله حور
كافي تذبلين وتستعجلين الامور و شمايصير اني يمج وعد صدكيني

شاهين اخذ موبايلي من يومها و كدر يوصل لرقم ابويه
متخابرين ماعرف شحاجين بس نتائج هالمكالمه جانت بدايه كارثه
ماعرف اسميها بدايه كارثه لو نهايه كارثه

جنت بغرفتي ارتب غراض ابني
من الخبصه الي احنه بيها نسيت حته احط غراض ابني بكنتوره

اني و بالغرفه سمعت صياحهم جوه

ابو شاهين يتصايح ويه شاهين و مهدي تعاركو بيناتهم

بلمح البصر سمعت شاهين بره صار ركب السياره و طار

نزلت عالدرج شفت مهدي واكف بالمطبخ ايديناته ع راسه يفتر

عمتي شافتني رايحه ع مهدي عاطت ع مهدي :  كولها تصعد فوك لا اخليها تلحك ابوها

رحت عليه : شنو

باوعني بتعب : ابوج بليل رايح لمكتبنا مكسر الجام ماخذ منه اوراق و فلوس و فالت بسياره ويه واحد
كامرات الشارع لاكطته ومصوره رقم السياره هسه خابرونا لاكين الرقم

- اي ؟ !!! شاهين شاهين وين راح ؟؟؟

!!!!!

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

اني وعدتكم اليوم اخر بارت
بس الاحداث طلعت اطول مالحكت اكتبها ببارت واحد
باجر انزل الجزء الاخير ❤️
كتبولي توقعاتكم ❤️