رواية عروس البيت الاسود الفصل الثالث 3 - بقلم لارا سالم

..........................

نزلت ركض مثل المخبله نعالي وكع ع الدرج كملت ركض حافيه
وصلت للمطبخ نشف دمي عالمنظر الشفته !!!!

- امير لا يا الله اميررر ماما بابا لحكوني وينكمممم

محد بالبيت كلها بالشارع يتجادلون اسمع صوت ناس تتراكض و تبجي

دخل شاهين يركض مثل المخبل انجبح بالكاع يم امير
شاله يركع بوجهه يصيح : امير امير حبيبي اكعد باباتي اكعد حبيبي امير ابني لتروح لا يا الله لاااااا

اجه ابوه شاهين شاف منظرهم بالكاع كام يصرخ : كووم نودي للمستشفى بسرعةةة

هذا كله شاهين مثل الفاقد بس حاضن ابنه يصيح لا لا

همه وديطلعون من مطبخنا ابوه ندار عليه صاح : ابوج الحيوان اني اعرف اشلون اصرف وياه اذا صار ماصار ع حفيدي ابجيكم دم والله

اني قطره دم ماضلت بجسمي واكفه يم باب المطبخ سانده نفسي عليها

ماعرف انقهر ع هالطفل لو ع شاهين واهله ما الومهم انهارو

امير حفيدهم الوحيد والمدلل شاهين يعبده عباده لابنه كلشي ولا يصير عليه شي

امي دخلت تبجي رحت كابلتها اسئلها ليش واكع بالكاع احجي شمسوين بالطفل و بابا شله علاقه ؟ جاوبينيي

امي بس تبجي كوه تحجي : ماكل من الزرنيخ الي عايفي يم باب الثلاجه

- ا اي اي زرنيخ ؟ لتكليلي حاطي يم الكيكه عالكاونتر؟؟؟؟؟؟؟؟؟؟

تضرب ع وجهه كالت : ماعرف ماعرررف يمكن عباله جبن من النوع الي يحبه ماكلهن كلهن

ضربت ع خدي بجيت بحركه : ليش ماوزعتي بالبيت ليش يم الثلاجه محسبتو حساب اكو جهال بالبيت كلشي تحط بحلكهاااا ماما ليش

امي تبجي : ابوج خبطه ويه الجبن كبل نص ساعه ويمكن اجاه تلفون مستعجل وطلع مو عوايده يعوفه عالكاونتر كلبي حيوكف ع هالطفللل

شاغت روحي اني واسمعها صرت افتر الوب بالمطبخ واضرب ع وجهي

ماطول ساعه و سمعنا عياط النسوان ببيتهم عرفنا مات امير !

افقر فرد بعائلتهم راح و ببيتنا

متت قهر عليه جنت حاسبته ابني والله العظيم تخيل طفل يكبر كدام عينك يروح فجاه بهالطريقه

القهر و الندم اكلوني اني وامي نبجي الليل كله

بيتنا من البيوت القديمه باليرموك مامعمري من سنين طويله و الفيران تارسته متعودين كل اسبوع نجيب جبن نعجنه بزرنيخ قوي خبط و نوزعه ع طول البيت

امير جان جاي يلعب ويه اخواني امي تسويلهم اكل بالمطبخ دائما اندومي و هالسوالف
رايح للمطبخ شاف الجبن معيوف عالكاونتر عباله امي عايفته اله ولاخوتي ماكل نصه من الجوع و موكل لعابته الكرندايزر منه هم
لكيناه واكع يمه بالمطبخ

صار الصبح لبست الاسود رحت لامي كتلها
- امشي نروح لفاتحه النسوان عيب نتأخر

- كلبي مامرتاح حبيبي مات عدنا

- اني هم ماكدرت انام الله يعينهم ويصبرهم

- سبقيني بين ماغير هدومي

حطيت شال اسود ع راسي و رحت ناصبين جادر و الشارع مكلوب
دخلت لبيتهم همه بيتهم حايط بحايط ويانه
باب الشارع مفتوحه كلها دخلت جوه الكاعدات صارو يتغمزون و يتلمزون عليه يباوعولي من فوك ليجوه

رحت للمطبخ لكيت رغد اخت شاهين تسوي كهوه صافنه عالطباخ ودموعها عشره عشره

بس شافتني فزت جتي عليه عينها مورمه من البجي :

- ليش جايه

- ماترديني اجي ؟

- البيت كله مايريدج طلعي بره

- رغد

- طلعي بره لمصلحتج حور اهلي ناويلكم نيه

- صدك تحجين احنه شعلينا ؟

- جايه تستفزيني انتي ؟ طلعي بره كبل متشوفج امي

انداريت اطلع ام شاهين حست ع جيتي طلعت تركض ورايه
جتي تهد عليه رغد وكفت بالنص تهديها

- الكم عين تجون الفاتحه ؟ تكتلون الميت و تمشون بجنازتةةة اليوم اجنزج انتي واهلج

- خاله الله يخليج اني شلي علاقه هذا قدر

- الله لا يخليني اذا عفتكم ترتاحون قدر بت المجرم ؟ كله من ابوج القاتل ماتحمل خساره فلوسه
اخذ حقه من هالطفل اليوم نخلي يلحكه والحسين جنازته نطلعها بنفس العصريه الكتل بيها ابنه يا عاريه يا مجرمين وخروها من كداممييييي

رغد عاطت : حور كتلج طلعي منا

طلعت الدمعه بعيني امي جانت جايه بعدها بالكراج ركضت عليه : شبيج تبجين

- امشي لبيتنا
- فهميني شبيج احد سوالج شي

عفتها رجعت لبيتنا نزعت الربطه شمرتها كعدت عالكرسي ابجي

جتي امي حجيتلها الكالو كامت تضرب ع راسها

ركضت عالموبايل خابرت ابويه كلتله دير بالك ترجع الدنيا مكلوبه عليك انت شمسوي رزلها كال مامسوي شي و ذوله ناس متخاف الله حيل بيهم الله ماينسى حق احد

هيه وتحجي ويه ابويه رحت يم الشباك اباوع عالشارع

شفت شاهين واكف بباب الجادر يمه واحد يحجي وياه بهدوء

شاهين ورث جكاره يدخن و يطرد الدخان يباوع عالكاع والرجال يحجي وياه

حسيت الشر ينط من عينه

بعصريتها هدو علينا الزلم ناس مانعرف منين شاهين دخل اخر واحد

بعصبيه حاجاني هو و يتلفت يدور : ابوج وين ؟

امي : شمعرفنا بالشغل احتمال

شاهين : رحناله كل الاتجاهات ماكو بسرعه مكانه وين احسنلكم

امي صارت تعيط وتلطم : اخذوني الي ولا يروح بيها زوجي او جهالي

الزلم كلولها : ماناخذ ثار من نسوان و مانقبل الفصل
حقنا ناخذه بالدم لو ع كطع ركبتنا

امي : مانعرف كتلكم مانعرف

اثناء هالكلام شاهين مخنزر عليه ماحجه حرف

نقطه دم ماضلت بجسمي متت خوف

طلع و الزلم طلعت وراه

امي كعدت تبجي و تندعي الله يعديها ع خير

خابرت خالتي حجتلها بحجه تاخذ رأيها او نروح عدها
خالتي تكلها: ياا الله يعديها ع خير عود طمنونا عليكم مع السلامه

سئلت امي كوه احجي : ماما بابا شكالج بالموبايل ؟ اله علاقه بلي صار مثل ميكولون ؟

- انجبي ادبسز ابوج مايسوي هيج شي الناس من عصبيتها دتلوب
شويه و يهدون ماكو شي

اخواني الصغار كاعدين عالقنفه مخروعين من عياط الزلم وتهديدهم

رحت يمهم حظنتهم وابجي : ماكو شي حبيبي لتبجون ماكو شي

زهراء ندارت ع امي : و حور شنو وضعها حتبقى هنا ؟ السالفه بعدها حاره مانعرف رده فعلهم شنو

امي باوعتني : لا لا اكيد لا مايستجرون يسوون شي اطيح حضهم بالمحاكم

زهراء : بنتج مرت ابنهم يمه يامحاكم وحفيدهم المات عدنا شحنكول للعالم اذا مرجع ابويه

امي : ماعرف ماعرف اسكتي البيه مكفيني وابوج راجع بأذن الله
بس هم الحذر واجب كومي حور

- وين اروح

- ماتبقين بالبيت اليوم

- شلون يعني ؟

- يصير الليل والشارع يهدء اطلعج بالخفيه

- ماما شتحجين وين توديني وبابا ؟

- مايرجع ابوج هاليومين طفر لاربيل و مناك شو وين يروح

زهراء : شنوو طفر ليش طفر غير يجي يواجه الزلم

امي : خايف ع نفسه لو تردو ينكتل يله ترتاحون

زهراء : لا احنه نموت

امي : مايسوون شي النا ماسمعيتهم كالو مانكتل نسوان
يله حور يله بنتي كومي

- ماما خايفه ماريد اروح

- مو وكت عناد حبيبتي اطمن عليج يومين وارجعج

زهراء : كلام امي صحيح حور اقلها هاليومين تهدء الامور و رجعي

صارت ب 9 بليل الفاتحه خلصت الشارع فرغ

امي تلم بهدومي تعبي بالجنطه شلون مجان

- بس فهميني بابا ليش عافنه اعرف ابويه مايسويها شلون عافنا واني وين رايحه بهالليل

امي : عوفي الحجي هسه بوجهج لبيت خالتج بابو غريب بسرعه حور

حطت شال ع راسي شلون مجان يخفيني عنهم طلعنا نمشي سريع و تفهمني شسوي و شلون اضم نفسي
طلعنا بالباب ركضت امي عالشارع تاشر بيديناتها الاثنين لتكسي بعيد

اني : زين وانتي؟ خايفه عليج و ع اخوتي شلون اروح

امي : مو مهم احنه المهم انتي يله يله بسرعه

دا نركض ع التكسي سمعنا صوت ورانا ركع الباب بايده صاح :هوووب !!

اندارينا ثنينا لكينا شاهين واكف عيونه حمر من العصبيه !!!!

......

يتبع ....