رواية عروس البيت الاسود الفصل الرابع 4 - بقلم لارا سالم

........................

دا اصعد للتكسي سمعنا صوت ورانا ركع الباب بايده عاط : هوب وين رايحه مرتي ؟

اندارينا ثنينا نرجف شاهين واكف عيونه حمر من العصبيه !!!!

- فوتي جوه

امي وكفت كدامي : خلينا نتفاهم وليدي واليرضيكم نسوي

قاطعها شاهين اجه من يمها لزمني من ايدي يجر بيه

امي : ابوس ايدك ابني ابوس رجلك بنتي مالها ذنب محد كتله والله محد سواله شي بس اسمع

شاهين : ابوها يجي ياخذها وخري

امي تتوسل تبجي ماخلاها اخر شي دفعها جرني منها جر

تبجي و اني ابجي كتله : مانهزم ابقى بس عوفني يم امي شاهين الله يخليك

امي : شحتسوي مالها ذنب عوفها هد بنتيي

ماجاوبها سحل بيه سحل لبيتهم امه واكفه بباب المطبخ تكله والله ماتفوت بيتي شاهين لتكسر كلمتي

مارد عليها دخلني من غرفه الخطار امي بره تصيح ام شاهين طلعت سدت الباب بوجهه

يجر بايدي جر البيت كله فتح باب غرفته شمرني بالكاع

جاوبني ببرود : حسج ماسمعه

- ش شاهين شتريد مني ؟ ابنك مثل ابني جان والله لو ادري اكتل روحي بداله والله ماسويت شي خليني اروح

- طول ما ابوج مهزوم ماطلعين منا ولا توصلين باب الشارع

- شنو ذنبي اني شعليه مشكلتك ويه ابويه

- من نكتله ترحين

- ماتشوف هاليوم ع جثتي تكتله اموتك اذا يصيرله شي

عافني طلع وقفل الباب

صرخت : سمعتني اموتكككككككك

حطيت راسي عالكاع ابجي و اشهك ياربي شصار بيه اني شنو بكل الديصير

امي صوتها هرج الشارع تبجي و تركع بالباب الناس كوه هدوها و اخذوها

جوارينا جوي حجو ويه شاهين كالهم مرتي واخذتها موضوع مايخصكم هذا

اسمع امه بره تصيح جلبه ولا تسوه تدخلها غرفتك طلكها و اشمرها مانريدها

شاهين عافهم و طلع

بجيت بجيت بمكاني لما نهد حيلي و نمت

كعدت بنص الليل دنيا ضلمه بس ضوه الممر فايت من جوه الباب

بقيت ارمش بعيني ع كيفي احاول استوعب ريتني فقدت الذاكره ونسيت كلشي

سمعت صوت بره واحد ديبجي بنفس مكتوم

كمت ع كيفي انتجيت عالباب وكفت اتصنط عالبره

سمعت مهدي اخو شاهين جاي و عرف بكل الي صار

شاهين حاظنه يبجي بحركخ يكله : راح امير راح .. خسرت ابني مهدي خسرته

مهدي ماجاوبه ابد بقه حاضنه بدون ماينطق كلمه

كلام شاهين و نبره صوته تعور الكلب

بجيت ع بجيته نمرد كلبي لا كدرت اسويله شي ولا كادره ابقى بمكاني

اهلي ماعرف شنو مصيرهم

ضليت ابجي واندعي يخلص هالكابوس ع خير

صار الصبح الفاتحه بره وهوسه النسوان و جهال تركض تلعب بالبيت

اني وحدي بالغرفه كاعده متجيه راسي عالحايط صافنه

ساعه انام ع روحي ساعه اكعد ابجي

اتفرج اثاث غرفتي الي ختاريناه اتحصر ع زواجي الي تدمر

فستان عرسي الي مالبسته دموعي تنزل مال كسره نفس و خاطر

بليل وره مخلصت الفاتحه نفتحت الباب رغد كالت : كومي تعشي

ماجاوبتها

- شاهين مو هنا لتخافين

- مالي نفس

طلعت وسدت الباب

نمت ماعرف كم ساعه كعدت ب 1 بليل البيت كله اضلم ماكو ضوه بره

ميته جوع مصاريني تكطعت مماكله من البارحه

كمت ع كيفي توقعت الباب مقفوله لكيتها مفتوحه رغد عافتها

طلعت امشي ع كيفي نزلت للمطبخ اضلم فتحت الثلاجه طلعت كباب طاوه و خضره حطيتهن بصمونه اكل لكم جبيره من الجوع

اني واكل حسيت احد ورايه باوعت

شاب واكف بباب المطبخ

فتح الضوه شاب اسمراني طويل و مرتب

باوعني باستغراب بلعت ريكي منو هذا

كال
- انتي العروس ؟

هزيت راسي اي و درت وجهي رجعت اكل

جاوبني هو و يفتح الضوه : شغلي الضوه اقلها عبالي حرامي

ضل يفتر بالمطبخ مادري شخذ اني عفت اللفه و رجعت صعدت لغرفتي

سديت الباب كلت : يمكن مهدي اخو شاهين هذا ماعرفه

كد مامحبوسه بالبيت ماجنت اعرف جواريني منو
غير شاهين وابو لان يشتغلون ويه ابويه بالعقارات

ثاني يوم سمعته يحجي ويه امه و رغد كالهم شمسويه هيه ليهسه ماعرفت

كلوله هيج وهيج وابوها سوه و ابوها عمل سكت مجاوبهم

وره يومين شاهين طب للغرفه ياخذ غراض كتله اريد اشوف امي

ماجاوبني

كملت : من يوم الاخذتني منها كلبي نار عليها ماعرف شصار وياها

كلي : روحي كعدي خليني ساكت عنج

- ليش شسويت شسوييييت حقك مو عندي اكدر اشتكي عليك

- خو نسيتي عاقد عليج ؟ لو بس تعرفين تدافعين عالكواد ابوج و تحجين بحقوقكم
انطمي و لتسمعيني حسج ماطايقج

دفعني بايده وطلع

تعوذت ابليس اني بيدمن وكعت ياربي

مشت الايام ابويه مابين ولا رجع بس ماهتميت كلت اهم شي مايوصلوله يومين و يملون

رحت اغسل بالحمام طلعت عمتي حارت شحجت سمعتني حجي سم

- مالي علاقه اني والي يطلع بيدكم سوو عبالكم من تحبسوني تهينوني اخر همي

- بعد بعد مدي لسانج شحنيني زايد عليج بعد

- انتي مشحونه من كاعج اسبوع سميتوني بالطلعه والنزله كانو خنكته بايدي شيلتوني ذنب طفل مالي دخل بموته كدرتو بس عليه

- نكدر نكدر نوصله و تشوفين شنكدر نسوي

- ابويه ماقتل احد

- كليله يرجع لعد لو اذا مامسوي شي لو بس عرفتي تهزمي انتي و امج ؟ بعدين منين عرفتو احنه ناويله ها

باوعت ليوره عيني جتي ع رغد واكفه بباب الهول تباوعني يخوف

رجعت باوعت لعمتي : حسينا شركم واصل لسابع جار

عفتها وصعدت دفعتني صاحت : بعدكم مشفتو شي انتضري شاهين يرجع لوعيه حتشوفين اسود ايام حياتج

بيوم جانو ديلمون هدوم الغسل عمتي كلتلهم عوفوها

صاحتني بعلو حسها نزلت عالدرج كلتلي : لمي الهدوم من الكاع و غسليها سنيوره مو فندق ابوج هذا

- اني ؟

- لعد امي ؟ و روحي لغرفه مهدي جيبي هدومه من عالفراش كعدي غسليهن يله لتصفنين بوجهي

تعوذت ابليس رحت فوك هنه بس غرفتين فوك غرفتنا و غرفه مهدي ماكو غيرهن فتحت الباب شفت مهدي كاعد ع فراشه يكلب بموبايله

شافني انزعج : ماتعرفين تدكين الباب كبل ماتفوتين؟

- اسفه

- خير ؟

- هدومك

- شبيها ؟

- تسلم عليك .. دنغسلها عفوا اقصد خدامتكم تغسلها

باوعني باستهزاء و اندار بوجهه اشرلي عالهدوم محطوطه عالكرسي

رحت شلتها توكع بالكاع وادنج المها طلعت من الغرفه نزلت حطيتهن

بالطشت اجلف واجرجر بيهن بعصبيه طلعت قهري بالهدوم

طبعا عدهم غساله اوتماتيك بس عمتي دكت رجل الا اني اغسلهن

جتي بالحمام تشمر هدوم بالطشت فوك الي دا اغسلهن

- صبر بس اكمل الي بايدي

- و يطبج عرج ان شاء الله غسلي وانتي ساكته

- خاله ماسمحلج لتحبيني بس لتتجاوزين

- وانتي تعلميني شحجي شاكول بت العاريه الها واهس تراددني

- لا يمج ولا حواليج اشتغل و مامعترضه انتي المعايفتني بحالي

- واكص راسج و عضمج بعد حمدي ربج ملفيج ببيتنا نلبسج ونطفحج

- ماردت شي مارايده منكم شيي و ابنج جنت ع وشك اطلك منه لو ما موته امير

- سيره حفيدي لتجيبيها ع لسانج لا اكصه سمعتي لو لا
و ابني تحلمين ياخذ امثالج بس غلطه و تتصلح عن قريب

مناك نزل مهدي يحجي هو و يمشي

- هاي شنو شكو شكو؟ يوم واحد يمر بلا مشاكل شبيكم

هو و يحجي شافني اشطف بالكاع

امه بقت تعيط تأشر عليه هو سكت كالها بهدوء : عوفو هدومي اني اغسلها

- ع شنو ابني تغسلها وغصب ماعليها

- ميحتاج اغسلها بالغساله ذبوها ع صفحه

راح بقت امه تتعارك فوك راسي ساعه ارد ساعه اسكت

فهمت بقوني بهالبيت مذله اليه ولاهلي متأملين ابويه يرجع و يقتلو

ماقبلو بالفصل ولا التفاهم فاد

مهدي هم مامتقبلني بالبيت بس مايعاملني مثلهم
واحيانا مايتعامل ويايه من الاساس مثل الميعرف يطبك ويه منو مليوصه السالفه

شاهين يتجنب يحاجيني واذا اجتي عيني بعينه يوخرها
مرات نضراته ما افهمها صار شخص ثاني
لا يضحك لا يجامل كلامه بالقطاره

عمتي ترزل بيه بالصعده و النزله

رغد تشوفني تدير وجهه

امي واخواني ماعرف شي عنهم نهاريت من الحاله النفسيه الصرت بيها

تمنيت الكي المعجزه تطلعني من هالبيت الاسود

دخلت عروس الله واعلم شلون رح اطلع منه

فد يوم سمعت امي كالبه الدنيا بالباب ركضت عالمطبخ باوعت بالبرده شفت عمتي تطرد بيها من وره الباب

طلعتلها عمتي اشرتلي : رجلج اكسرها والله طبي جوووه

اني ابجي وامي تبجي بهالاثناء طلع مهدي صاح شبيكم

كتله : ميخلوني اشوف امي الله يخليك مهدي ماطول والله احاجيها وادخل دقيقتين بس والله دقيقتين

باوع مهدي ع امي لكاها فاحطه من البجي اشرلي عالباب روحي

ركضت فتحتها حضنتها و ابجي بأنين وهيه مثلي

ضلينا كم دقيقه متحاضنين بعدين لزمت وجهي : ضربج مو دياذوج شاهين سوالج شي كلما اشوفه اتوسل بي ميجاوبني و يفوت احجي شسوو بيج الميخافون الله

- مسوولي شي اني زينه لتخافين عليه

- احجي الصدك حور محروك كلبي عليج بنتي

- والله زينه متعرفين بنتج بس بالي يمكم و يم ابويه شخباره

باوعت ع مهدي ورايه من بعيد رجعت شاورتني : طلع لتركيا

- شيسوي هناك ؟

- حاول يتفاهم وياهم عن طريق جماعه بس ماقبلو و هددو بيج

- شلون يعني شيسوون؟

- ماعرف بس شاهين مناوي يسكت كالب الدنيا يدور ع ابوج شبر شبر ببغداد

- همزين طفر لتركيا ... زين واني ؟

- ماعرف ماعرف وكعت بيناتكم انتي وابوج ياربي ساعدني حيصير بكلبي شي

- خلص خلص اهدي ماكو شي اني زينه متحمله تصرفاتهم مايكدرون يسوولي اكثر من هلكد

- عوفيهم يحجون لتجاوبين

- مو ع مزاجهم اضل اراددهم و اجاوب لما يزهكون و يعتقوني

- حور خايفه عليج بنتي هذوله وجههم الثاني طلع لينفذوج انتقامهم بيج

- خليها ع الله

مهدي صاح من وره : حور

لزمت ايد امي بستها : رجعي للبيت هسه واهتمي بخواني اني اعرف اتصرف

- بنتي

- والله زينه خلص وعد احاول الكي طريقه اشوفكم بيها

ودعتها شلون مجان وسديت الباب

مسحت دموعي وانداريت فتت من يمه دخلت وسديت الباب

بليل شاهين عرف من مهدي انو شفت امي علساس وكف ينصحه
شاهين ماسمعه صعد بعصبيه يهطر الباب
حسيت باب الغرفه حتنفجر من التركع مالته

.....

يتبع