تحميل رواية «عروس البيت الاسود» PDF

اني اصفي واطلع الغراض من العلاليك باوعت شفت شاهين صعد لنهايه الدرج رايح لغرفتنا تذكرت موبايلي فوك و مهدي ديدك

كلبي راد يوكف يامن يلبسني جناح يوصلني لغرفتي

عفت الغراض كمزت اريد الحك عليه

اعبر الدرجات بصعوبه من الخوف توه داخل الغرفه لكاني وراه

كتله بتعب : شاهيين

لاف باوعني باستغراب

الموبايل صار بضهره يشعل و يطفي ضوه

دمي نشف من الخوف اذا لاف راسه و شافه انتهي و ينتهي اخوه

معرفت شسوي كتله : شتاقيتلك

رفع حاجبه ابتسمت ابتسامه خفيفه كتله: مامتعود تغيب هلكد

تقربلي هو و يفتح دكمه قميصه

باوعني عيوني تباوع بعيونه يمنى يسره

خفت و توترت كلت لو تصيب لو تخيب الله وحده يوكف ويايه

مد ايده فتح قراصتي وكع شعري

فرده ع جتافي منا و منا ماحجه شي اخذني وياه عالفراش

فتحت عيني العصر الغرفه ضلمه شويه بس اشم ريحه جكاير

باوعت اني نايمه صفح ع ايده اليمنى هو نايم ع ضهره يباوع عالسكف و يدخن بالايد الثانيه انتبه عليه

كال : صباح الليل

- صار هوايه نايمه ع ايدك ؟

- من نمنا ليهسه

- اسفه

رفع ايده الي نايمه عليها رجع راسي : لتكومين

- ماتريد اكوم

هو ويباوعني نفخ الجكاير ليفوك : ماريد تكومين

صح يحجيها بتعب ثكيله ع لسانه يكولها بس حسيتها من كلبه

اندار عالكومدي يطفي الجكاره بالنفاضه يدندن ويه نفسه

- شتغني

رجع يباوعني

احب حركه عنده من فجاه يباوعني نضرات استغراب

من سالته شيغني كال

- اكرهها و اشتهي وصالها وانني احب كرهي لها

احب هذا الئم في عينيها

وازورها ان زورت قولها

اكرهها

كلت بكلبي كون اخنكك بمكانك بس لو افهم مشاعرك اتجاهي

جر ايده من جوه راسي كام يلبس هدومه كال :

ماجعتي ؟ تعاي ننزل نتعشى

عدلت جسمي اني و اضم روحي بالبطانيه

- نازله وراك

فتح الباب كال : لتطولين

نفخت اووف الف شكر ياربي خلصت من مصيبه

كمزت ركض عالموبايل

22 مكالمه و 5 مسجات من مهدي

موبايلي عبوه لو واكعه بيد شاهين جان نفجرت عليه و عالبيت كله

حمدت الله الف مره

اخذت هدومي نزلت اغسل مهدي بالمطبخ عالميز يشرب جاي

عيونه تجدح نار لفت من يم الدرج سريع طبيت للحمام

اغسل واقره ايات ربي عديها ع خير يارب ساعدني مالي غيرك

اذكرت شاهين نعومته ويايه هاليوم عيد اول مره يعاملني برقه

نقهرت ع روحي لان مستغربه هالوضع

عروس مصارلي سنه ونص المفروض هاي حياتي الطبيعيه مثلي مثل هالمزوجات

فوضت امري لله الحمدلله ع كل حال

من طلعت سمعت موبايلي دك رحت رديت ساره خابرت تسئلني شصار ماصار

- ماصار شي بس

ساره : بس شنو صار شي جديد من مهدي

- مو مهدي ..

دا احجي  ماحسيت غير رغد ورايه

كالت : تشربين جاي مو ؟

هزيت راسي اي

نشفت شعري رتبته و نزلت

دخلت للهول شفتها كاعده يم شاهين جانت تتشاور وياه

هو ينركل بالنركيله ساكت من شافني باوعني رحت كعدت مقابيلهم

اخذت الجاي اشرب صافنه عالتلفزيون كلهم يسولفون ويضحكون اني ساكته وحدي اتفرج شمطلعه عمتي بالتلفزيون

ساعه و كام شاهين ماعرف وين غط جوه بعدين هو و فايت من يم الهول اشرلي لحكيني

عفتهم رحت وراه طلع بالحديقه كعد عالكرسي متجي ايديناته ع ركبات رجله كال : كعدي

كعدت بالكرسي الي يمه الجو جان طيب حلو بروده ع ريحه قداح و ورد

جريت نفس حسيته غسل روحي

باوعت عليه يبلع الحجي يريد يحجي ويسكت

- دتتواصلين ويه احد هالفتره ؟

باوعته : صديقتي ساره

سكت

- ردت اكلك بس جنت مسافر

- كلتلي رغد

رجعنا سكتنا

- شحجيتيلها

- كلشي

- ليش

- ماعندي غيرها احجيله مضل عندي احد يسمعني

- شسويلج و تنسين

جنت مدنجه راسي باوعته باستغراب معقوله هذا شاهين ؟

هالجمله جانت محتاجه اعاني سنه و نص حته اسمعها ؟

دموعي نجمعت بعيني

تذكرت الكتل و الضرب و الاهانات الشفتها وياه

كلبي صار حجار عليه بهاللحظه

- طلكني

- بلا هالحجي حور

- انت كلت شلون انسيج هذا الحل الوحيد خليني ارجع ابدي من جديد

التهي بحياتي وانسى

- اني اعوضج

- بعديش

- انطيني فرصه

- صعب بعد كل الي صار ماترهم بعد

اني بعدني هنا لخاطر ابويه

- متاكده

سؤاله مال واحد يعرف البداخلي

جاوبته بنبره حاده و خوف بنفس الوقت : اي

ضل يباوع بعيني يعني دتجذبين

ردت اثول الموضوع : ماريد ابويه ينكتل و اخواني يتيتمون و يموتون جوع و فكر هذا كلشي

- نشوف باجر شيصير

كام طب جوه بقيت بمكاني اجر نفس و ابجي

صعب تكون بوضع ماتريده ويه انسان تحبه

ماتوقعت اكول هالكلمه عنه بيوم من الايام

كلام ساره صحيح

اني حابته !

بس بعد شنو و شوكت

شلون حنسى و شلون هو حينسى

ربي لا تعلقني بيه اكثر خليني قويه كدامه حياتي وياه جحيم لتعلقني بيه

ماكادره اسامحه و انسى دخيلك ساعدني و بعده عني

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

وره اسبوعين

رجعت تمشي الايام شلون مجان  بلا لون و طعم

عمتي اخذت مهدي و رغد كلولي نروح نشوف العروسه كتلهم روحو انتو ماريد عمتي حجت بصوت ناصي : احسن

راحو شافوها من رجعو تفاجئت يكولون خطبناها و همه نطو راسا

باوعت لمهدي فاتح الثلاجه ياكل مانطق كلمه

وره اسبوع ضبط سوو المهر رحنا لبيت البنيه صارفين اهلها حايرين شمسوين فرحانين بيها

البنيه كلش حلوه تخبل مهدي كعد يمها يلبسها النيشان يبتسم كل شويه و يدير راسه يباوع عالناس كانو معزوم مو هو العريس

كمنا نسلم عليهم باركتلها انداريت اباركله مديت ايدي بخوف سلم عليه بايده قبض ع ايدي يباوعني بعتب

رجعت ليوره راسا وكفت يم الناس

بليل رجعنا دا ارتب بالبيت اجه يمشي ع كيفه يكلب بموبايله كال :

- حلوه خطيبتي؟

- تخبل

- يعني عجبتج

- -المهم عاجبتك الك الله يسعدكم

نصه صوته اكثر حجه بهمس : ما لايكلج دور الا اباليه

- شتريد

- رجعتيله عناد سويتيها بيه مو ؟

- ههههه البركه بيك

- اني كتلج رجعي ؟

- مسجاتك و تلفوناتك صارت بلحضه رجعته من السفر

الا شويه يوكع الموبايل بيده جان هسه ثنينا مدفنونين بمكبره النجف

- وهسه؟

- ماكو بينا شي .. تصبح ع خير

طبيت لغرفتي صرت انام بلا مافكر لبعدين ولا اريد اعرف شيصير منا لباجر كد ماحس روحي ثكيله و مهمومه

شاهين من يوم الحجينا و تصارحنا ماباوع بوجهي مثل اليحاول يرجع كرامته يوم الكتله لا

اتفاجئت سمعته مودي مسواك و فلوس لاهلي

رغد ركضت تكلي كتلها معقول ؟

- والله اختج شفتها بالاسواق و كلتلي

- ماجابلي سيره

رغد : شهالتغيير هذا مو شاهين اخويه مستحيل

سكتت

رغد : ليني انتي الخ شويه صار لازم تحطون حد للقديم و تبدون من جديد

مجاوبتها رجعت اخيط شغله بايدي

اجه يوم الحنه مال مهدي بليلتها احجي بالموبايل ويه زهراء

اسمه صياح جوه و عركه بين مهدي و شاهين و ابوهم

طلعت ركض اتصنط عالدرج لكيت رغد هم واكفه تتصنط اشرتلي ع شفتها : هشش

ابوهم : لك بابا شنو بطلت مشينا زلم عليها و صارت مرتك دنلعب احنه

مهدي : لا اله الا الله ماكو قسمه يابه مو بعيني البنيه

ابوهم : المفروض تكولها من الخطوبه مو بدل ماتروح تحنيها تكلها مازوجج فضيحه هاي النا بالمنطقه شيكولون مالنا كلمه

مهدي : يابه ماريد مارررريد اعوفها من هسه احسن ماطلك بعدين

شاهين كعد يمه يحجي وياه بهدوء

مرت عمي طلعت من الهول تضرب ع رجلها ووجهه شافتنا واكفين عالدرج صاحت ع رغد : متجين تحجين كلمه ناوي ع صخام وجهنا هذا

نزلت تركض رغد ستاذنت ابوها كعدت يمه هيه وشاهين يحجون

كلبي وكف من عملته  حيكسر ركبه بنيه وياه

تذكرت كلامه اليه شسويت بهالولد ياربي اني ليش نقمه ع كلمن يتقربلي

بس اني ماوعدته بشي ليش ديسوي هيج

نزلت رحت للهول طبيت صرت كبالهم هو كاعد يسمع صافن شافني باوع و دنج راسه راسا مايريد اشوفه بهالحاله

شاهين ضل يحاجيه : بت عائله و شاريتك لتتهور واحنه اخوتك احزام ضهرك تبقون يمنا ماتفاركونا اريد افرح بيك اليوم كبل باجر انت ضهري الانسد عليه و ينسند عليه مهدي

حسيت كلامه مثل السجاجين بكلب مهدي ضل مدنج هاين عليه يكعد يبجي

ماجاوبهم وره كلام شاهين مرت عمي راحت بوسته وهلهلت

كالت تحضرو باجر ب 5 العصر نروح نحنيها

كامو يبوسون بي يباركوله اني يم الباب بقيت ماتقربت مالي نفس و عين اصير يمهم

صارت الحنه رحنا يمها كملنا

هوسه و دوخه اني تعبت لبسنا العبي فوك بدلاتنا رجعت ويه رغد من وكت

وصلنا لبيتنا الزلم ماليه البيت ملي وهووسه

صعدنا فوك ركض اني و دا اغير هدومي جتي كالت طلعو كلهم بره يركصون جوبي امشي ننزل نتفرج

نزلنا طفينه ضوه الهول نتفرج من الجامه عليهم حته ميشوفونا

مصفوفين صفه للشارع يركصون و يدبجون مهدي بنصهم يدبج

كلت يهدي و يحنن كلبه عليها

رغد تاشرلي ع اصدقائهم و كرابتهم كلهم زلم كباريه و ولد شيوخ

عيني راحت ع شاهين يدبج و يضحك وياهم

لابس دشداشه بيضه و الغتره

يرفع ايده يفر بالسبحه شكله يجنن بالزي العربي

يدبج براس الدبكه يمه مهدي و البقيه مسطرين وراهم يدبكون

دخت بتفاصيله رغد تحجي ماركز بحجيها

ع كد ماسرحت بي ع كد ماكلبي يعصرني

صعب تكون بنص طريق لا انتي مكمله ولا انتي تاركه

لا مسامحته ولا فاتحه صفحه جديده

هذا رجلي و هذا بيتي المفروض كل حياتي هنا

ليش تفاصيل حياتي ناقصه هلكد

اختنكت غمضت عيني طبيت جوه اشرتلها رايحه امسح مكياجي

بليلتها صعد شافني كاعده اكلب بالموبايل

غير هدومه و نام ماحجه حرف ولا كلي ويامن تحجين ع غير العاده

ثاني يوم حضرت الريوك نزل ديطلع كتله ماتاكل ؟

- شبعان

وطلع

وره فتره رجعت من اهلي اسوي كيك النا و الهم من دخل كال شتسوين

كتله كيك النا و لاهلي

- ليش مكلتي اجيب جاهز

استغربت حجايته ماضاج لان حودي لاهلي ؟

- ميحتاج مالتي اطيب

- اي سوي نفسيتي رايحه عالكيك هاليومين

اول مره اكل من ايدج شي اخيرا تفضلتي علينا بلكمه

- مو شرط تاكل

- من ايدج شرط

كلت بكلبي حته بهاي امر

داروح وكفني : اهلج تتخابرين وياهم دائما ؟

- زهراء اكثر شي امي ماتحجي ويايه

- ليش

- تعرفني وضعي مجبوره

- خليها تتعود لعد

- شنو مكيف انت ع هالوضع ؟

باوعلي بنضره حلوه : مليتي مني ؟

كلبي رجف خفت يحس درت وجهي رجعت اشتغل ماجاوبته

صار عرس مهدي والحفله غير شكل عيالي طايرين بي

الا هو كاعد يبتسم و ساكت عبالك معزوم مو عريس يوم عرسه

نظراته شكتني نصين ادير وجهي عنه كل شويه

احسه محملني ذنبه

متاكده لو جنت بنيه عاديه بغير ضروف ماجان انتبه عليه

بس يمكن كل ممنوع مرغوب

العروس انتبهت بدلتها خلاعيه ستغربت مهدي شلون وافق

عيالي مايعترفون غير بالعبايه و الربطه ماكو بقاموسهم الصلوخ و هالحركات حته لو عروس البدله لازم محتشمه

بس انتبهت اهل البنيه متمكنين صرف و كشخه و معازيمهم يباوعون بمعازيم عيالي من فوك ليجوه عود مو كد المقام

عدا الزلم الي من طرفنا حلوين ولد البصره

معازيم العروسه مرغلن روحهن بالدبج والركص

عيالي ماخذين للعروس نيشان ثكيل

و اهلها هم حارو شكد لبسوها ذهب عمتي رجعت هدتلها سوار ثكيل

من ندارت تباوعني من فوك ليجوه عود تغورني

هزيت ايدي طلعت بره

صفنت لعد شبيه اني جابولي ذهب خرك و المهر شلون مجان ساعتين و كلمن راح لحاله

واختارولي اكثر بدله خنكه مقفله تقفل عبالك كماط ناكص يسوولها ياخه

مرت مهدي بدله صلوخ

الصدر نصه بره

المكياج و التسريحه بسنتر بالمنصور ستاف تركي

ايدها ماشالتها من ايده

يوكف يسلم عالناس الي تباركله بس يرجع يكعد تلزم ايده

اهل ابوها جوي من كردستان حارو شلبسوها ذهب صاغوها من فوك ليجوه

اني واكفه يم النسوان مجتفه ايدي نتفرج عالعرسان كاعدين بالكوشه

و بحكم انو العرسان محط انظار كلما اباوعلهم مهدي يلمحني

و يحجي بعيونه

ادير وجهي لو اندار اسولف ويه الي بصفي

عمتي تروح و تجي هيه و رغد

ماخلتني الزم شي وياهن اصلا مامعترفه بيه جنه

الناس اكلتني بعيونها تقارن بين العروس الدخلت ع هالبيت مسحوله والعروس الجديده الي مسويلها كل هالعرس و اهلها طايرين بيها

نظراتهم تعبتني طلعت بره اتفرج ع سيارات الشارع جانت دنيا مطر بشهر ال 11

وكفت يمي مره جبيره صدفه تحجي بالموبايل كملت باوعتني : انتي مرت الجبير مو ؟

- اي خاله

- والنعم اهلج وين لعد ؟

دنجت : مشغولين شويه

- اي .. الله يقرب البعيد

عافتني دخلت جوه صفنت يعني تعرفين كلشي ليش تسئليني

اسهل ما عليهم كسر الخواطر

ضليت بره اتفرج ع الطاب و الطالع اصفن

تخيلت ابويه جوه يم زوجي واكف

وامي يمي واكفه نتفرج و نصفك و عمتي و رغد كاعدين يمنا يضحكون

زوجي يباوعني من بعيد يغمزلي

حمايه فرحان بزوجته واحنه فرحانيله و الناس تكمز بالنص الكل فرحان من كلبه

رجعت للواقع لكيت كل هذا بعيد .. شبه مستحيل

باوعت للسما حمدت الله ع كلشي اندعيت من كلبي ارتاح لو اخلص لو ارتاح رسيني ع بر يا رب

طول الحفله رغد تفرك بايدها تروح و تجي لا ركصت لا ضحكت

بعدين سمعتها تتشاور ويه عمتي كل شويه

خلصت الحفله زفينا العرسان للفندق مشينا وراهم نفوتهم

عمتي تمشي وره مهدي لزك ايدها ع كلبها لا يتراجع و تصير فضيحه

اضاهر بيوم العرس عانو وياه هوايه و ضل متردد لاخر لحظه

و كبل ميصعدون لزمته تتشاور وياه هو مدنج بس يهز راسه

اني بالبدله لافه لفاف ع جتافاتي اباوعهم من بعيد

شاهين طول الحفله ملتهي ويه اصدقاءه هو و مهدي و ابوهم وياهم

سمعت يمي وحده تكلي : شو مو يم زوجج ليش ؟

باوعت اخت العروس بنيه صغيره بعدها 16 سنه

كتلها : غير عرس ملتهي ويه اخوه

اختها : بس ماشفته وكف يمج غير يحير بمرته شويه

باوعتلها من فوك ليجوه بعدج بكد زري تعلميني شسوي ويه رجلي

هزيت ايدي ابتسمت باستهزاء : روحي يم امج ياشاطره لتضيعيها

والله يا الله

كبل منطلع من صاله الفندق رحت للحمام اعدل البدله اخذت اللفاف ويايه الفه ع جتافي

بدلتي طويله عدله سوده ردن بس شفافه و بالنص خطوط مايله فضي

باوعت بالجامه شفت شاهين جاي سويت نفسي احط الحمره

اجه للحمام هو و ماشي طلع كلينسه من جيبه وكف يمي صفح رفعها بوجهي

باوعتله : شنو هاي

- شتشوفيها

- فتهمت كلينسه شلي بيها

- تمسحين بيها الوان الطيف الي بوجهج

- شاهين هو ايلاينر و حمره لون مشمشي شحاطه

- هذا الحجي تكوله فاشنيستا ذني الخزعبلات التتابعيها عاليوتيوب

سوالف الدلالات ماتصرفلي عندج رجال مو جيس حب

- وليصرف

- حور لتخليني اطلع اخلاقي الوصخه

مسحي العرس الي بوجهج يله

- شتسوي تضربني كدام العالم مثلا

تقرب عليه رجعت بخطواتي ليوره راد يمنعني داس ع حذائي حيل ثبت رجلي

كتله اااخ

رفعت عيني بعينه وجهه لزك بوجهي

شفته بيها وبين شفتي اصبع

باوعت عليها كلبي صار يدك سريع

ضل ساكت خرعني بصفنته خفت يسوي حركه من حركاته

رجع شال الكلينسه فتح شويه من الشال من جهه الصدر و بالاصبع الثاني حطها بفركه صدري

هو ويباوعله رفع عينه بعيني خنزر : بسرعه

عافني و طلع

لزمت المغسله اتنفس سريع

طلعت الكلينسه من صدري بعصبيه مسحت الحمره حيل

عدلت شعري و بدلتي

طلعت امشي سريع صوت كعبي يطك بالكاع طك رج الفندق من نرفزتي

حيجلطني هالانسان لا هو قريب ولا هو بعيد يريد يموتني يريد جنازتي

امشي و احجي ويه نفسي بصوت ناصي بنرفزه و امسح بشفتي

دخلت بخطوات سريعه لصاله الفندق

وكفت فجاه من شفت مهدي صار بوجهي هو وعيالي واكفين يسولفون شاهين سابقني توه واصل يمهم

مهدي انتبه شاهين جاي من اتجاهي واني وراه طالعه منرفزه

نضراته مره ع مره ترعبني

بلعت ريكي لزمت فستاني لان يخب بالكاع طلعت بسرعه بره الفندق

وكفت يم الناس

شويه وطلعو عيالي شاهين كدامهم اشرلي وين جنتي

مجاوبته سبقتهم للسياره

صعدو اسمع عمتي تكلهم وين يلكي هيج بنيه و هيج نسب الله يهديه

شاهين صعد للسياره لاف مرايته عليه مخنزر جاوب امه : عبرت ع خير يمه

لفت راسي عالجامه جنه مرح يعبرلي سالفه الحمره و الفستان

من جابتليا رغد وهو ماعاجبه بس التهو بهوسه العرس و روحه وجيه ماركز ويايه

رجعنا للبيت نزلت من السياره سريع

اسمع عمتي هيه ونازله تكلهم: حقها خطيه مشافت هيج يوم ولا حتشوف

طبيت للبيت سريع الا شويه انجبح شايله الفستان امشي سريع

متت اريد بس اوصل غرفتي

....

يتبع ....

ادري طولت عليكم

ماقريت تعليقاتكم خفت منها طبيت كبل كتبت البارت 😅

اليوم اعوضكم انزل بارت ثاني بليل ❤️

................................

طبيت للبيت سريع الا شويه انجبح شايله الفستان امشي سريع سريع

متت اريد بس اوصل غرفتي

ركضت عالكنتور طلعتله بجامه و الخاولي حطيتها بباب الغرفه طبيت و سديت الباب

حطيت اذني عالباب اتصنط حيصعد لو لا

اسمع امه عالدرج تشحن بي : عايفها ع راحتها زايد وليدي شهالمنظر مالتها اليوم كلها تباوع ع جسمها

شاهين جاوبها بهمس : عيني عليها ماسوت شي والي باوع اقلع عيونه

عمتي : ها حنينا و كلبنا رجف ؟ لتنسى وعدك اليه ولابنك

هالبنيه ماتصيرلك مره للابد النا غايه منها ناخذها و نشمرها ع اهلها

مرح تشمت العشاير بينا انت نطيت كلمه

شاهين : بعد وكت ع الموضوع يبين ابوها و نشوف

عمتي : ماكو نشوف اطلكها يعني اطلكها

عسى ارجع اخطبلك طليقتك اسويلك عرس جديد لا صار ولا استوى

بس هاي ماتبقى ع ذمتك الناس اكلو وجهنا اليوم كلها تلمحلنا بعيونها تباوع عليها و علينا

رجعت لفراشي كلت بكلبي ياريت اليوم كبل باجر عساني لا صرت جنتكم ولا عشت لحضه بهالبيت علساس كلش ميته عليكم

اني وافكر انفتحت الباب لكاها مقفوله

دك الباب مافتحتله

رجع دك مرتين تلاثه مافتحت

الصبح كعدنا نكرب من الصبح البيت مخبوص خبص وره العرس

شلنا الغراض نكنس و نمسح شلهت دشداشتي و بديت امسح

رغد كلتلي: عبالي نكسر ضهري خل نكعد نسولف عالعرس البارحه وين صعدتي من وكت

- جنت تعبانه نمت

سمعت صوت ورايه كال : نوم العوافي

اني و بالكاع نداريت بسرعه شاهين بالباب شايل علاليك

رفعها : شيلي مني رغد

حجاها هو و مخنزر عليه

كمت نزلت دشداشتي بديت ارجع بالغراض

رغد : شجايب وياك

شاهين : غده اليوم

رغد : شالمناسبه احنه نطبخ

شاهين : علمود مهدي و وداد

رغد : تتشاااقه؟

شاهين : مايريد يبقى بالفندق خابرني من الصبح كلي اليوم راجعين

رغد :   شجاه هذا بس لا تعاركو

شاهين: بعد مامبين استعجلي بالطريق همه

اني ناطيتهم ضهري اشتغل و اسمع كلبي انقبض

نص ساعه سمعت الهلاهل بالمطبخ و صوت البوس و التحضن

طارو بي و بوداد

بقيت افتر بالهول سويت نفسي ارتب

رغد جتي : ماتجين تسلمين حور جوي العرسان

- اي اي صح يله

مشيت وراها جريت نفس رحت للمطبخ

مرته عمتي تبوس وتحضن بوداد ما عافتها

مهدي شافني انطفت الضحكه بوجهه

رحت مرته اندارت : هلاو حياتي حور

- نورتي حبي الف مبروك

وداد : يبارك بعمرج كلبي

تخطيتها وصلت لمهدي مديت ايدي سلمت : مبروك شايف كل الخير

مهدي : تسلمين

حجاها هو و مدنج راسه راسه كال ابويه وين

كلوله بالشغل كالعاده كال اروح اسلم و ارجعلكم لعد

طلع كعدنا ويه مرته رغد تسئلها شلونه الفندق ارتاحيتو بي

وداد : من العمر طبعا بعدج تسئلين ههههه لو مامهدي ضيعها بدخان جكايره وحده وره الخ ثول الغرفه

عمتي : هاي عود نبهته كبل فتره ووعدني يخففها شجاه رجعلها

رغد : عريس و متشنج يمه شتردي طرزان قابل

ضحكو ع حجايتها

لليل التمينا عالعشه يسولفون ويضحكون

كملت اخذت كم ماعون فارغات عالميز غسلتهن صعدت لغرفتي

كعدت عالفراش انتجيت رفعت رجلي اكلب بالتلفزيون

طلع بالتلفزيون تاريخ خطر ببالي من شوكت ماجايتني الدوره الشهريه ؟

فتحت اصابيعي احسب كذا يوم كذا كذا

متأخره عليه اسبوع و يومين!

الله يستر

اني وصافنه افكر اجاني مسج عالموبايل

مهدي : نزلي ليش حابسه نفسج بالغرفه

- شبعت الحمدلله وماحابسه نفسي ولا شي .. شلونك

مهدي :  يهمج امري

- يهمني ليش مايهمني

مهدي : سوالج شي البارحه

- منو

مهدي : منو يعني شاهين

- لا ليش تسئل

مهدي : جنتي عصبيه وجهج شاحب انتي وطالعه

- خلاني امسح المكياج

سكت بعدين جاوب : فهمت

- خفف مسجات لتنتبه مرتك باي

بنفس اللحضه خابرت ساره من الملل

اسولفلها عالمراسيم و العرس كال : وهو

- منو

ساره: مهدي

- تزوج بعد شذكرج

ساره : توج كلتي كالب وجهه طول العرس

- شمعرفني خجلان يجوز

ساره : يولي هذا يحبج

- دكعدي يمعوده شيحب مني مرت اخو و الحجي عليه بفلس بالمنطقه و ماخذيني رهن لما ياخذون حقهم من ابويه شيحب مني

ساره: يمكن كل هذا خلاه يحبج مرات البشر يتفاعل و يحب الضعيف

يحب الي بعيد عليه

- مقهور عليه يا الفيلسوفه  متعاطف ويايه مو اكثر

ساره : اليتعاطف يتعاطف يوم يومين مو سنه ونص وهو وراج وراج

- بس هو ماعترفلي

ساره : بس راد يبوسج نسيتي

- لخاطر الله ساره هالموضوع يضايقني وانتي ترجعين تذكريني بي

غيري السيره شاهين يدخل الغرفه باي لحضه

ساره : هذا الثاني شلونه وياج

- كعد ويايه كبل فتره يريد نبدي من جديد

ساره : بشرررفج ! وشجاوبتيه

- شجاوبه كتله لا

ساره : شلون اعجنها هسه مخبله انتي بابا شبيج ليش

- وره كل الصار بقه شي نبدي علموده

ساره : تحبيه تحبييه و مبين من تصرفاته كلبه ديلين عليج يوم بعد يوم شبيج حور لتقفليها بوجهه

- مامقفله شي بس اذا وافقته يعني موافقه ياخذ ثاره من ابويه تردين انطي باهلي علمود سعادتي ؟ ليش تحملت كل هذا لعد

ثم بعده ويه طليقته

ساره : يروحلها

- اي يبات بره مرات

ساره : شلون صابره حتخبليني

- منو كال متحمله هالغرفه تشهد ع البجي و النوح مالتي

ماكو ليله نمتها الا ودمعتي ع خدي بس شبيدي

خلي وياها لما ينتهي زواجنا

ساره : انتي زينه احسج تحجين بتعب

- فوك متتصورين الحمدلله ع كل حال

يله لازم اروح هسه كبل ميجي شاهين يفتحلي تحقيق

ثاني يوم اني وارتب بالغرفه اندكت الباب كلت ادخل

فتحت الباب مرت مهدي : اكدر ادخل

- طبعا

- من البارحه معتكفه هنا خيرج

- الهي نفسي بالشغل مابيه شي

- عد لكيتي خوش لهو اني صرت هنا يوميه اخذج نطلع نفتر

- ههههه ضحكتيني منو يخليني اطلع

- وليش ميخلوج

سكتت

- اهااا ذاك الموضوع اي نحبستي تالي ارتاح زوجج؟

- المسئله اكبر من زوجي بهوايه ثار و فصليه منعرف وين توصل

- خير ان شاء الله خير امشي ننزل عد اختنكت من الغرف

- ليش اختنكتي رجلج وين لعد

- مهدي طلع الصبح للشغل و كال اتاخر

هزيت راسي حته اول ايام عرسه كاضيها شغل بالورشه

نزلنا اني وياها عمتي عقجت وجهه من شافتها ويايه

شربنا جاي سولفنا رغد ويانه تسولف و تضحك

صار العصر كالت كومو نفتر شويه

رغد : طلعو انتو اني مالي خلك بعدني تعبانه عالركض الركضناه بالعرس

عمتي : تكلمي عن نفسج ست رغد مو كلمن يدربن من هالبيت ع مزاجه

هزيت راسي اني واشرب الجاي

وداد : اني عروس عمه يحقلي ادلل و اخذ الاريده ويايه ليش هيج

عمتي : حبيبتي روحي وين متردين بس هاي رجلها ماتعتب الباب

مو كلامي هذا زوجها منبه علينا

وداد : بعد خل يكطع الهوا و المي عليها فد مره

عمتي معجبتها الحجايه سكتت

بيومها مهدي رجع بليل متأخر اكل لكمتين و صعد نام

انتبهت وداد ماهتمت ضلت بالهول تكلب بموبايلها

سئلتها ليش مصعدتي وراه ؟

وداد : كالب وجهه عليه

- ع شنو

وداد : لان مارضيت اروح وياه للبصره اسلم ع كرايبه

- لو رايحه والله تتونسين خوش ناس صاحبين كعده

وداد : و اتمرغل بالجول اني واحذيتي نوو ويي

بعدين رجلج وينه لازم حلاله حضن ثاني

حجايتها كصتني كص كتلها : براحته ينام وين ميريد شلي علاقه تصبحين ع خير

صعدت لغرفتي اهز بيدي ناكصتج خاف

استغرب عليها يوميه تنزل بالستريجات تفتر بالبيت

والذهب مالتها ع طول الايدينات و الركبه سلاسل

و كل فتره تروح سناتر صبغ و تسريح واكريلك

جريئه كلش تضحك بصوت عالي

ذبت ميانه ويه شاهين من اول يوم تشاقه و تصفك ايد بايد وياه

لمحتها مره بالهول كاعده يم مهدي تتهامس وياه تقربت تبوس شفته

و ايدها جوه ببنطرونه

اني دا ادخل الهول لمحت المنظر رجعت ليوره سريع يبست علي شفته

عيالي مجانو موجودين واني بغرفتي يعرفوني ما انزل ماخذين راحتهم ماعبالهم انزل فجاه

رغد هم مره لمحتها مدري شمسويه سمعتها تدردم ويه امها : ماتستحي جسمها يراري بالهدوم كاعده ببيت عيال مو بيت ابوها شو ماخذه راحتها زايد

مرات نسوي شيره رغد تسوي و تكلي او اني اسوي واكلها

كلنه مره لوداد ضحكت علينا : اني بالصالون اسوي هم عايزه اسوي بالبيت و الوص نفسي

تروح صالون بنات ثنين يشتغلولها جسمها شمع

بس علاقتها فاتره بمهدي لا هيه متلهفه عليه لهفه عروس

ولا هو عاجبه الوضع رغم جمالها و اناقتها و لسانها

بس باله مو يمها

مره بغرفتي اكلب بالموبايل سمعت صوتهم يتعاركون بغرفتهم

رحت اسمع اني وقافله الباب

وداد : متكول لامك هالحجي كلما رحت لاهلي صاحت شعندج و ليش رايحه احد كاللها اني حور اخذتوني مدلله واضل مدلله

مهدي : لبسي هدومج

وداد : بعد ! ماتريدني اتقربلك هم

مهدي : لدوخيني فضيها لبسي اوديج لاهلج

وداد : تره مليت من برودك و مشاكل اهلك اسمع و اسكت امك يوميه مسمعتنا قوانه لازم نمشي عليها بعد ماصبر اكثر

مو احجي وياااك ليش ساكت

مهدي : روحي لاهلج يومين و يصير خير

وداد : اني احجيلك علمود نعزل مو تكلي يصير خير

كاعده احجي وياك اني وين بالك

مهدي : وداد كتلج ما ادري هسه روحي والله كريم

وداد : باوع احسن حل انت ضل يم اهلك واني ابقى يم اهلي

من تريدني تندل دربي

لو تلكيلي بيت وحد تكعدني بي

مجاوبها

وداد : بالقران مو طبيعي احجي ويه صنم اني

مهدي : تعبااااان و راسي يفتر ماتفتهمين انتي

وداد : واني كلت لعندي مهدي و اشوف كلامي لو كلام اهلك

مهدي : استغفرك اللهي

لبست هدومها شلون مجان طلعت سريع نزلت راحت لاهلها

بليل طلعت للحديقه افتح المي عالساكيه شفته كاعد يدخن صافن

- بيك شي ؟