عشگ ابن السواتر الفصل الثامن والعشرون 28 - بقلم زينب العبيدي

اخيراً وصلنه النهاية القصه اتمنالكم قراءه ممتعه لاتنسون التفاعل

#عشگ_ابن_السواتر

بقلمي #مولاتي_يازينب

#البارت٢٢

جنه. اني اطمنت الحد الهنا شفت علاء كره راويه كلش واني اتقربتله بسلوبي الجديد الي جنت

اسوي غصباً عني لان احسه مو اسلوبي ولا الي تعودت عليه بس ميخالف في سبيل حب علاء

كلشي اسوي وستمر هذا الاطمئنان الى ان بيوم من الايام اتصل علي ابراهيم وجان يحجي

وهو صوته كأنما شارب شي

ابراهيم الو جوجو شلونج حبي

جنه. هاي شبي صوتك ابراهيم

ابراهيم لاتشيلين ابالج شارب اشوي

جنه. ابراهيم انته من شوكت تشرب

ابراهيم اهووو من زمان حبي

جنه شنو هاي حبي ماحبي ابراهيم

ابراهيم وهو الصدك شنو يعني اكول جوجو شخبار ضرتج بعدها محبوسه مثل الكلب

جنه. اي والله يابراهيم ماعرف شلون اشكرك لولاك ماكدرت اتخلص من عدها وجا هسه اني المحبوسه مو هي

ابراهيم اهااا يعني فدتج هواي

جنه. اكيد واني كلش ممنونه الك

ابراهيم. اوك جنه انه ماريدج اتكونين ممنونه انتي كلتيلي اطلب اي شي وانه اسويلك تذكرين

جنه هسه وبعد اكلك ايها اطلب اي شي تتمنا

ابراهيم عاد تدرين شنو اتمنه اتمناج انتي من زمان ياجنه وانه معجب بيج ومعجب بتفاصيل

جسمج وبكل انحنائه وهواي اتخيلتج بأحلام اليقضه

جنه. فتحت عيوني على كبرهن وحجيت بصوت اشبه للهمس خفت ماعرف لا احد يسمع حجيه

اتلخبطت اتصورت الناس جاي تسمعه مو بس اني كتله. ابراهيم انته اشجاي تحجي ابراهيم

انته اكيد سكران وماتعرف اشجاي تحجي

ابراهيم لا جنه حبي انه متعود ع الشرب يعني ما اثمل ما اذب خيط وخيط وجاي احجي هذا

الحجي من وعيي

جنه. ابراهيم اني ما اسمحلك هيج احنه ما ابينه غير الصداقه والاخوه ابينه وبس

ابراهيم. لج يا اخوه هاي التحجين عنها هو انتي بيج طن مجال

جنه. ابراهيم شوف هلمره كلتها المره الثانيه اذا انعادت

ابراهيم قاطعتها شتسوين ههههه ماتكدرين اتسوين شي واني عندي كل محادثاتج وخططج

وصوتياتج وانتي تخططين على راويه

جنه لا ابراهيم ماتصورتك هيج انته ماتصورت النذاله توصل بيك الهاي المواصيل

ابراهيم. بلا لغي زايد وفلسفه زايده الي تسوي سوايتج كلشي تكدر اتسوي بعد اصلاً علاء مغشوش بيج

جنه ابراهيم لاتحجي هذا الحجي تدري بيه اني احب علاء والاجل حبه هيج سويت

ابراهيم لاء تدرين انتي ليش هيج سويتي انتي ماتحبين علاء انتي عندج حب التملك واعتبرتي

علاء صار ملكج ولان انتي ماعندج ثقه بنفسج ولا مستعده اتضحين وتغيرين بسلوبج لجل

زوجج اختاريتي طريق الحيله حتى اتبعدينه عن زوجته الثانيه وارجع واكلج انتي ماتحبينه والي

تحب ماتتفشل من زوجها ولاتشكي من عيشتها ويا وهلشي انتي سويتي انتي حبيتي علاء

جسد ماحبيتي روح واذا تردين جسد اكو غيره هواي وانه اقدملج اول عرض ههههه شوفي

كدامج منا الباجر يا اما نطلع بعد الجامعه او تكولين انه رايحه لهلي ومن عدها تجيني او

ارسل العلاء كل محادثاتج وصوتياتج

جنه. بس علاء. راح يكتلك خلاص لاتضنه يسكت عنك ويذب اللوم كله علي

ابراهيم ههههه عادي انه اكدر من باجر اعوف الجامعه وارجع المحافضتي ولا نسيتي انه مو

من البصره

جنه. علاء راح يلكاك حتلو تروح جوه سابع ارض وبعدين بغداد مو بعيده عنه ويكدر يوصلك

ابراهيم. عاد اهنا الحجي يختلف انه هم مو من بغداد مثل ماكتلج واصلاً كل المعلومات الي

تعرفيها عني كلها جذب بجذب انه عمري ماكايل لحد عني معلومه صحيحه حتى اقرب

اصدقائي بي باي حبيبي كدامج منا الباجر وسديت التلفون

جنه. ضليت ابجي لا يانذل لا ياحقير ماجنت متصورتك بهاي النذاله شراح اسوي ما اكدر

اطلع وياك وانته خسيس واني نفسيتي ماتسمحلي ولا اكدر اتجاهلك لان راح اخسر كلشي

علاء وحتى اهلي ومتئكده راح انحرم حتى من طفلي الي ابطني ياربي شسوي ياربي اني

حيل ندمانه اني شسويت ابروحي ذبيت نفسي بتهلكه اني مو كدها بهل اثناء دخل علاء بعد

ماجان بالمستشفى يم حسين ضليت امسح بدموعي بسرعه

علاء. طلعنه حسين من المستشفى وجبنا للبيت جانت الساعه ب١٠ بالليل صعدت الغرفتي

وشفت جنه تبجي ومن شافتني بسرعه مسحت ادموعها سئلتها بستغراب ليش تبجين

جنه ها. اني لا ما ابجي بس بطني شوي يوجعني

علاء. ماصدكتها كلتلها زين ليش مسحتي دموعج لمن شفتيني

جنه. حتى لا اكدر خاطرك واشغلك عليه بعد كافي الي بيكً مكفيك

علاء ابتسمت معقوله ياجنه هاي انتي جاي اتعجبيني يوم عن يوم احسج انسانه ثانيه

جنه ابتسمت بالكوه مافهمت يعني هسه زين لو موزين

علاء. اتقربت منها رفعت وجهه بيدي كلش زين ياجنه كمت احبج اكثر ويتغيرج هذا صرت

اعشقج وبعد حملج صرت اتنفسج الله لايحرمني منج

جنه. خنكتني العبره يا ربي يحبني وصدك هو مغشوش بيه اني اشسويت بروحي ياربي ليش

مامشيت ويا من الاول ياربي بس لا لا هاي حوبة راويه وراح تطلع بيه واني متئكده شسوي

ياربي ساعدني

علاء. فهميني شنو شبيج بعدج متوجعه ليش تبجين اخذج لامستشفى

جنه لا حبيبي ما احتاج مستشفى شويه تقلصات مال حمل هسه اصير زينه

علاء. تنهدت بتعب وكلتلها خوش جا انه طاب اسبح وراح انام لأن كلش تعبان

جنه. على راحتك شفت علاء دخل للحمام وبعدها طلع لف راسه ونام جنت الوب محتاره شسوي

ياربي سامحني اني ليش سويت هيج اي شنو الي يستاهل وسويت هيج علموده شنو

استفاديت غير ان اذيت نفسي واذيته خل انتضر منا الباجر بلكن احاول اقنعه لبراهيم وفعلاً

يوم ثاني لمن طلع علاء اتصلت على ابراهيم وتوسلته وبجيت وكتله اطلب كلشي الا هذا الشي

والله كلشي اسويلك افلوس ذهب اي شي تريده وبعد نص ساعه من الاقناع اقتنع وطلب من

عندي مبلغ قدره ٥ ملاين وبدون تردد وافقت وكتله باجر اجيبهن الك طبعاً طلب هو يجي

ياخذهن بس اني رفضت كتله كلشي ولا احد يشوفك اهنا وبلاخير صفه ع راي وكلي العصر

تجيبيهن هاي اكثر مهله اكدر انطيج اياها سديت التلفون من عنده واتصلت ع ابوي بسرعه

كتله بابا محتاجه خمس ملاين علاء عنده مشروع يريد يفتحه بس مايرضا اداين منك ف كتله

اني عندي خمس ملايين بابا تكدر اتوفرلي هذا المبلغ طبعاً بعد استفسار بابا عن المشروع الي الفته من

يمي الي هو يدخل وي صديقه بمحل مواد غدائيه بابا وافق وكلي شوكت ماتجين تلكين لفلوس

موجوده ابنفس الوكت اجت ازهار اتشوف عمتي ام علاء وعمي ابو علاء يعني زياره سلمت

عليها وردت علي من ورا خشمها كلش ع العموم اني ماهتميت الها

ازهار بعد الي سمعته عن السالفه الي صايره وسوايت راويه ماصدكت هذا الشي ابد ورحت

الغرفة راويه دكيت الباب

راويه بصوت مبحوح من اثر البجي والافلاونزه اتفضل

ازهار دخلت عليها لكيتها كاعده على سجادتها ولابسه احرام الصلاة وعيونها كلها دموع وكمر

تلعب يمها كلتلها شلي سمعته هذا ياراويه

راويه كمت بالكوه سلمت عليها وباوستها اتحسرت كلتلها والله مالي ذنب يا ازهار اني متئكده

جنه الي سوت كل هذا لان محد يكرهني مثلها ودنكت ورجعت رفعت عيوني باوعتلها ازهار والله

اني مو هاي سوالفي واتهموني باطل بلعت الغصه الي بصدري اني مالومهم عاذرتهم لان اي

واحد ابمكانهم راح يصدك جنه ماتركت مجال للشك وانتي مثلهم هم مستحيل راح اتصدكيني

ازهار لا ياراويه اتنهدت بحسره اني مصدكتج جنه كلشي يطلع منها اصلاً اني بهذاك اليوم

سمعتها وهي تخابر صديقها وتكله لازم انخلي نهايه الراويه اكيد هاي سوالفهه هي وهذا الحقير الي ساعدهه

راويه يعني انتي مصدكتني ازهار

ازهار مصدكتج ولازم الكل يصدكج ياراويه

راويه بس اني محد مصدكني ولا احد راح يصدكني نزلت دمعه من عيني واني. تعبت يا ازهار ما اتحمل هل وضع

ازهار شوفي راويه انتي لازم اتشرحين موقفج العلاء ولازم يصدكج وبما ان علاء يحبج ويحب

جنه لازم يختار اني ما احرضج على علاء بس لازم تضهر برائتج واذا ماصدكج سوي مثلي

وعوفي البيت لان اني متئكده ان حتى اشرف مايرضا ان بنته وام بنته ينضلمون فا لاتفكرين

بالوصيه تدرين ليش هيج كتلج اتحسرت لان جربت شعور لمن انسان عايش بصافي النيه

وعمره ما مجرب الغلط وفجئه تجي وحده مثل جنه تتهمه بالغلط وهي الغلط راكبها من ساسهه

الراسهه اخ ياراويه نفسي عزيزه علي ماتحملت الصار بيه

راويه. الله انشاء الله يضهر الحق وتطلع حوبتي وحوبتج بهاي جنه

ازهار. ماراح تطلع اذا مانحجي وي علاء ونفهمه ونفتح عينه على جنه وعمايلهه اكيد هو ماشاك

ان هي ورا هاي العمايل ولا واحد يمكن يتصور لان هاي سوالف شيطانيه بحيث لبستنه التهمه

وما خلت اي اثر ودليل وراها بس نست الله موجود ع العموم يا راويه روحي حاجي علاء هسه

وبأقرب وقت واني دريت ان جنه راح تروح الاهلهه قبل شويه خابرت علاء وهسه راح يجي ياخذهه

راويه تمام اني راح احاجي واتمنى يصدكني

ازهار زين ماتسوين وبعد ماتحاجينه اني هم لازم احجي ويا لان الساكت عن الحق شيطان اخرس

علاء بعد ما وديت جنه ورجعت ع البيت اتغدينه وجانت عدنه ازهار كلش مشتاقيلها كعدنه

انسولف لحد الساعه ب٣:٠٠الضهر لحد ماحسيت بالنعاس استئذنت منهم وكمت

علاء. من رخصتكم رايح انام شويه

الكل. نوم العوافي

راويه اخذت گمر وطلعت من غرفتي بعد عشر ايام حابسه نفسي بالغرفه حدي بس اروح

للحمام وارجع طلعت والعيون كلها اتوجهتلي شفت ازهار تبتسملي وتشجعني بنضراته

ام علاء. ها يمه راويه اشوفج واكفه محتاجه شي

راويه خالتي وين علاء

ام علاء صعد ينام شويه محتاجه شي

راويه شكراً خاله ورحت صعدت لغرفته

ازهار يمه ام علاء ترا راويه مو شكل هيج سوالف مال حب وخيانه ادري بيكم انتم كلوبكم

رافضه هذا الشي بس الادله العقل مستقبلهه بس انتم مافكرتم لو لحضه ان يمكن تكون

مضلومه ويمكن الضلمهه هو واحد خبيث ومخطط الهذا الشي واله مصلحه من هذا كله

ام علاء. منو. قصدج يايمه قصدج جنه

ازهار شفتي ياخالتي اصلاً انتم هم شاكين بيهه بس مثل ماكتلج العقل يصدك الدليل الموجود وبس

علياء. يعني معقوله يا ازهار اكو بشر توصل بي المواصيل يسوي هيج ابدافع الغيره بس لا ما

اتصور يا ازهار شكد ماتكون جنه حقيره بس ماجاي استوعب ان تسوي هيج

ازهار لا يا علياء استوعبي لان البشر اذا صار عقله مريض كلشي يسوي وجنه وحده مريضه

وحتى علاء ماتحبه تعرفين شنو شعورها شعور ابنيه مدلله كلشي اتئشر عليه اتحصله وتصورة

علاء شي من ممتلكاتها فهي جاي ادافع عن شي ملكهه مو جاي ادافع عن حبهه والدليل هي

جاي اتئذي علاء نفسه فقط لارضاء رغبتهه واني سمعت كل حجيهه وهي تكول الصديقهه

لازم نتخلص من راويه

زهراء. وهاي لعبه رخيصه من العابهه مثل ماجنت احاول افهم امي وعلياء هذا الشي بس ماكو

فايده ع كولتج مصدكين بس الدليل الموجوده

وبنفس الوقت

راويه. صعدت لكيت علاء نايم ومطفي الضوه طبعاً مادكيت الباب دخلت مباشرتاً لان اعرف بي

ما راح يحب يشوفني

علاء. حسيت الباب انفتح التفتت لجهة الباب شفت راويه وشايله گمر

راويه فتحت الضوه

علاء. ابنبره حاده انتي شسوين اهنا انه موكتلج ما اريد اشوف وجهج

راويه خليت گمر ع الجربايه وكعدت يم رجليه علاء ما راح اطلع لحد ماتسمعني

علاء. حجيت بحده وانه ماحاب اسمعلج اصلاً ما احب اباوع بوجهج

راويه. مسحت ادموعي علاء اني بريئه خليت يدي على راس گمر احلفلك وحياة كمر يا علاء

وصحة ابنيتي وعافيتها وماعندي اغلى من عدهه اني بريئه علاء اني ماسويت هاي السوالف

من جنت عند اهلي وبعدني مامتزوجه تريدني هسه اسويهه

علاء. راويه. بلا ماتحلفين بداعت بنيتي انه خايف عليهه منج انتي انسانه جذابه

راويه. قاطعته انته ماراح تخاف عليهه مثلي اني واني جاي احلفلك باغلى ماعندي صدكني فدوه

علاء اني حبيتك لان شفتك مثل اشرف وحسيت وياك بالامان بس غيرة جنه خربت كلشي

جنه انسانه مريضه

علاء وشدخل جنه بهذا كله انه لزمت التلفون وجان اسمج بي مو اسم جنه والحجي البي كله

جان يدل عليج انتي وعلى خصوصياتج

راويه اني ماعندي دليل اقدمه ضد جنه بس كل الي عندي حجي ازهار هذاك اليوم لمن

سمعتها تتصل ببراهيم ويخططون ضدي علاء فدوه المره وحده صدكني

علاء للحضه وجان صوت ابداخلي يكلي علاء انته تعرف جنه بيهه هواي خرابيط وحتى شكلهه

يدل على هذا الشي بينما تلكه راويه صاحبت الوجه البريئ السمعه الطيبه ربما فعلاً جنه وصل

بيهه عقلهه المجنون لهاي الدرجه عقلي يكلي صدك راويه ولازم اصدكهه بس ما اكدر اضلم جنه

هم شنو الدليل ضدهه ما اكدر اضلمهه من مجرد شك اتنهدت بحيره وكلت الراويه

علاء شوفي راويه انه راح اعرف استجوب جنه بطريقتي الغير مباشره لكن اذا طلع كل شكج

افتراء اتنهدت ماعندي غير اسلمج لخوانج وهم يتصرفون بيج اما اذا اطلعتي انتي مضلومه

فا لاتسامحيني على ضلمج لان ما استاهل وكمت لبست وانه ادعي ربي يساعدني الكا

الحقيقه لان حسيت الدنيه كلهه ذبت حملهه على ضهري وبينما انه نازل شفت ازهار بوجهي

ازهار علاء. جنه فد وحده خبيثه وكلشي اتوقع من عدهه من انسانه مريضه مجنونه عقلياً ومثل

ما اتهمتني بالسرقه رجعت واتهمت راويه بشرفهه لان اثنيناتنه انشكل خطر عليهه لي اسباب

مختلفه واذا ضلت على راحتهه راح تتماده والله اليعلم راح اتطيح منو بشباك خططها الخبيثه

علاء عفتها من غير ما احجي اي احجايه وانه افكر بكل كلمه حجتهه راويه وازهار وبكل فعايل

جنه وياي وكرهه الاهلي قربت اقتنع ان فعلاً جنه هي ورا كلشي. بس ما اكدر اضلمها بدون

دليل ومابين الفكره وفكره ومشدوه بالي وصلت يم باب بيتهم جانت الساعه ب ٤:٣٠ دكيت البا

طلعلي ابو جنان

علاء السلام عليكم

ابو جنان هلا بابا هلا وليدي علاوي جا انته مو اجيت على جنه ورحتو خو ماناسين شي وليدي

علاء انه اجيت على جنه

ابو جنان اي بابا مو قبل عشر دقايق خابرت على جنه وكلتلها طلعيلي بره حتى اسئلت جنه

كالت لا ميدخل

علاء بصدمه عمي ابو جنان انته اشجاي تحجي انه لا اجيت على جنه ولا خابرت الهه بعدين

ياعمي هي جنه كالت امي تعبانه وانه رايحهه اشوفهه صوت ام جنان من ورا ابو جنان وهي

تحجي بصوت كله كره الي

ام جنان اكيد اتجذب عليك ليش تكدر اتكلك اني جايه اداين خمس ملاين علمودك فوك مايجدي

مايريد واحد يعرف اجداوته

ابو جنان ابعصبيه سكتي ولج ماعليك بابا علاوي لاتستحي انه حسبة ابوك ولاتفكر بحجي

هاي واي شي تريده لاتستنكف مني

علاء بصدمه لحضه لحضه ابو جنان شنو خمس ملاين وشنو اجدي اصلاً انه شسوي بالخمس

ملاين ولا كايل الجنه تدينلي منكم

ابو جنان ميخالف بابا لاتستحي ولاتنحرج كتلك انه ابوك

علاء حجيت بعصبيه جاي اكلك انه ماكلت الجنه على فلوس اصلاً شلي بيهن

ابو جنان موانت اتريد اطب شريك وي صاحبك بمحل مال اسواق وانت ماعندك وهي كالتلك هي راح تساعدك

علاء درت وجهي بحركه سريعه واني امسح على جبهتي حتا استوعب الحجي رجعت باوعت

على ابو جنان وكتله عمي بنتك امسويه طركاعه بس اصبر علي انه الي راح اعرفهه شني هي

اتصلت عليها كدام ابوهه وانه اطرد الغضب الي بداخلي وحجيت بهدوء مسطنع الو ها حبيبتي

انتي وين

جنه. شنو اني وين حبيبي مو عند اهلي بعد

علاء باوعت الابو جنه انفعل وراد يحجي مباشرتاً خليت ايدي كبال وجهه بمعنى اسكت لايطلع صوتك عمي

علاء. راح اجي عليج هسه

جنه لا حبيبي مو كتلك ماما شوي تعبانه اني بعدين بابا يجيبني

علاء. ويمتى تجين

جنه ماكو فد نص ساعه اكون يمك او اقل

علاء اوك وسديت التلفون شفت يا ابو جنان انه اعرف بنتك ويامن حالياً امشي وياي رحنه

على مكان شغل ابراهيم سئلت صاحبه الي يشتغل ويا كال طلع من نص ساعه كتلع ماتعرف

وين راح كلي لا مع الاسف ما اعرف وانتضرنه ابمكان شغله لحد ما اجه وهو مجرد ما شافنه

وجهه انخطفت الوان ومن لاوعي ومن خوفه شرد راد يرجع للسياره مالته بس انه بسرعه ركضت

عليه ولزمته دخلته للمحل مالتهم ونزلت عليه ضرب وكتله اعترف وين رحت انته وجنه لحد ما

خليته يعترف راد يموت بيدي ولو مامعترف جان موته خلاص

ابراهيم وبالگوه يطلع صوتي رفعت ايدي بوجهه علاء وكتله اوكف اي اي جنت وي جنه حتى

اخذ منهه فلوس تعبي

علاء. خنكته بيدي الثنين اجيت اكطع نفسه ياتعب يانذل ياوصخ تعب شنو انته وياها شمسوين

ابراهيم والله انه مالي دخل هاي خطة جنه هي الي خلتني ادخل البيتكم واخلي النقال الي

لكيتو عند مرتك الثانيه اي هاي خطة جنه

علاء. كافي يانذل وضحت الصوره وطحت عليه دك لحد ماخليته ينزف وبالكوه وخرني صاحبه

وفلته من بين ايديه

علاء حجيت وانه الهث ومكطوع نفسي شوف يانذل وين ما الكفك بأي شارع بأي مكان احسب

روحك متت وهذا المحل حجيت وانه اكسر كلشي اشوفه كبالي اذا انفتح احركك هو والي به وانه

راح ارفع عليك دعوه قضائيه محاولة قتل وعفته وطلعت ورحت للبيت وانه شايط وابو جنان

حاله ماينوصف دهشه على صدمه على غضب دخلت للبيت هايج ادور جنه بكل مكان صعدت

الها فوك للغرفه

جنه. بسم الله علاء شبي شكلك

علاء وتسئلين الج عين يانذله يامريضه سحلتها من شعرها ولج انه اتضحكين علي انه الي

حسبتيني غبي لا انه مو غبي رغم الي سويتي محد دره بي بس الله نسيتي الله يدري وماراح

يسكت ع الضلم نزلتها الدرج كله دگ اطكها بأي مكان يصير كدامي وانه استرجع كل ايام

عمري الي كضيتها وياها ومالكيت ولا يوم مر علينه حلو بدون ماتئذيني فهي بلا وعي رادت

تخلص روحها من عندي فذبت روحها من المحجر مال الدرج وضلت تنزف وسبحت ابدمهه وبسرعه اتنفست بصوت عالي ومسموع

وماتت ما اسولف اهنا المئساة الي عشتها بهاي اللحضه لمن شفتها تموت كدامي وهي حامل

بأبني جنت مصدوم بحيث مابديت اي ردت فعل ابو جنان اتخبل على بنته اخذهه بسرعه

للمستشفى ويا اهلي مجرد ما وصلو للمستشفى كالولهم ان هي ماتت ضلمت نفسي وضلمتها

وضلمت راويه يمكن جان من البدايه خياري غلط بجنه ويمكن جان عقلي محجر بحيث ما

استمعت النصيحة اشرف ويمكن الغلط غلطي من البدايه لان حبيتها بجنون كل الي اعرفهه

انه غلطان ومذنب بحق نفسي وبحق راويه وبحق جنه الله يرحمهه اجو الشرطه واخذوني

وبهل اثناء وانه طالع شفت راويه تبجي اكبالي وامي تلطم على راسها واخواتي يبجن طاحن

دموعي وبجيت بجيت دمعه على اشرف وايامه ودمعه على حياتي والعذاب الي شفته ودمعه

على گمر الي شفت اخر شي ضحكتها ودمعه على اهلي والدنيه الي ماضحكت الهم ودمعه

على راويه ومضلوميتهه ودمعه على شباب جنه الراح والي ماستغلته بشي يرضي الله عنهه

حجيت برفيع الصوت راويه لاتسامحيني عليج بروح اشرف لاتسامحيني

راويه واني ابجي لا علاء انته مالك ذنب اني مسامحتك دنيه واخره لاتبجي يا ابو گمر الله

يرجعك النه

بعد مرور العزاء مال جنه الله يرحمهه راح ابو جنان وتنازل ع القضيه ولكن لفشل حكومتنه ما

زال علاء الى الان بالسجن وكل يوم من محكمه الى محكمه. ينتضر حكم البرائه وصارله

مايقارب السنه بالسجن اندعوله بالافراج فهو بريئ امام الله من دم جنه

عبرتي من القصة اولا احسنوا في دنياكم ليحسن الله عاقبتكم

ثانيا ان ليس كل مايطرق قلوبنا هو حب فربما تكون نزوه عابره فلنحكم عقولنا ونشدد على قلوبنا

ثالثاً ان لدى كل انسان عقل يعرف ماهو انسب اليه فلابد ان تفاوة الطبقات الماديه والعلميه بين
الطرفين قد تسبب في مشاكل زوجيه عائمه مدى الحياة الا في نسب قليله جدا بسبب عدم تكيف الطرف الاول الاعلى مع الطرف الادنى

فلغلط هنا حيث جنه اقنعت علاء بانها سوف لن تعترض على شي يخص المعيشه او الحاله الماديه وانها ستصبر معه على ارذل الضروف وبدوره علاء كان غافلا لم ينتصح حين نصحه صديقه بان جنه ليس الخيار الصحيح

🌸((النهايه))🌸
اتمنى اتجاوبون ع الاسئله الموجوده👇🏻

١اكثر شخصيه حبيتوها
٢اكثر شخصيه كرهتوها
٣الموقف الي حبيتو
٤الموقف الي زعلكم
٥قيوم القصه من١٠

اتمنى ان القصه نالت رضاكم