رواية عشگ أهل الجنوب الفصل الاول 1 - بقلم أسيل

#ساره

اعرف بنفسي اني ساره عمري 20 سنه عايشه بغداد من جان عمري عشر سنين عندي اخ واحد اسمه حسين جنت عايشه ويه امي بس قبل فترة توفت امي  وحسين اخويه  بس من غير ام الله شاهد حنين عليه وزلمه كل اسبوع يجي النه ويشوف شنو ناقصنه  او محتاجين شي و تره هم بعد معروفين اهل الجنوب عاد بكرمهم امي من اهالي بغداد عشكها ابويه الي جان من الجنوب  واخذها ضره على ام حسين  وتوفت ام حسين  الله يرحمها  من سنين كومه بس امي اعتنت بحسين جن هو ابنها مو ابن ضرتها تموت عليه مرات اداهر بيها واكلها انتي تحبيه اكثر مني تضحك وتكلي هذا ابن العزيز وخيج وهل مرت سنين من تركنه الجنوب وره وفاة ابويه امي ما تحملت العيشه هناك بدونه وحسين ما كدر يترك حلاله وشغله هناك ويجي يسكن بغداد طول عمره عايش هناك بس يجي مرات يطمئن علينه وكل مره يتصل بيه اخاف محتاجه شي او واحد مضوجنه او مقهوره مغثوثه رايده شي ما ينام اذا ما يتصل عليه ويشوف شناقصنه من اضوج واختنك اتصل بيه وعسى ما اكله ضايجه يركب سيارته ويجي رأسا ل بغداد تمرضت امي قبل فتره ما بقينه مستشفى ما وديناها حتى سفرنها للخارج امي جانت تعبانه كلش والمرض انتشر بجسمها بقت ايام بغيبوبه والله اخذ امانته ما تعبت بموتتها بس تعبتني الي هدت حيلي وحق القران الي الله يحبه يموته هو قبل لا ياخذ الله واحد من اهلها واحد يحجي الأمانه حسين بضهري جان ما خلاني بحالي شهر هو وياي بالبيت حته ما يكلي اريد اكل لو  جوعان يكوم اذا جاع يجيب اكل من بره لو يوصي وما ياكل اذا مو اني اكل وياه و خيرني بين ابقه بغداد وهو يبيع كل ملكه وحلاله ويجي بس اني ما ضل احد الي بغداد واعرف هو ابن عرب وما يتحمل يعيش بين بغداد واهلها عيشتهم غير عن عيشه اهل الجنوب متحررين هواي فاني قررت اروح وياه مو مال اعيش وحدي وعدني راح يخليني اكمل دراستي وما ينقص علي شي حسين جان خاطب هاجر بنت خاله يموت عليها وهي هم عشكها من هي طفله يرجف عليها كل مره اداهرة  واكله ها وينها الزركه وهو يتخبل علي احلى منج جنج لبن هايشه وهو يعرف بيه شكد احبها والله وهي هم حبابه اصلا سمارها يموت عبالك لعابه تركت بغداد بس احن الها احن للشوارع والأكل هناك  وره سنه ونص تزوج حسين هاجر بدون موسيقى ولا شي جابها من بيت خاله لبيتنه بيومها جنت لابسه اسود وما نزعته من وفاة امي  بقيت لابسته شكد راد يجبر بخاطري وجابلي ملابس الوان والله جان يتعنى لبغداد يعرف بيه شحب البس ومن يا محلات يحمل ويجيب الي اشكال والوان ويجي بس قلبي يلجمني كل مره يكلي حرام هل اسود وعدته اكسره بلون نيلي بيوم عرسه وهو فرح وخليت شال نيلي على راسي جان ثوبي اسود وقصير ويه الركبه وعفت شعري مفتوح اني شعري يوصل لجوه ضهري اسود ناعم واني بيضه عيوني كبار خشم صغير ملامحي حلوه على امي الله يرحمها وحتى كصري بس ماخذه بياضي من ابوي ولون شعري هم من ابوي  امي شكره وعيون عسليه بيومها  من رحنه خطبنه هاجر واخذنه هاجر كتله سوي عرس والله موافقه وما اعترض اصلا فرحانه اله  وما قبل وما قبل حتى بيت اهل هاجر ما قبلو بهل شي  وبيوم العرس صارت هوس وطلق نار واني جنت واكفه باب بيت هاجر اريد ادخل بس مصارت الي فرصه كتل والله وحسين طلع محبوب هنا بين الناس كلها هاجه عليه فرحت عندي هيج اخ زلمه ارفع الراس بي من صار الطلق جفلت ورجعت ليوره وناس جانو يهوسون وكع شالي على الكاع واني جنت جافله من وره الطلق انرعب من اسمع صوت عالي جنت ارجع وره لحد ما شفت حسين راح وملتهي بهاجر باوع عليه من بعيد وراح كمت ابجي وما احس غير واحد مخلي غطى ع راسي جفلت وباوعت اله وهذا الشيخ الي حسين يشتغل وياه ومثل اخوه الجبير اول مره اشوفه من قريب ابد ما حاجيه وياه وكال الي

نواف: ستري نفسج يا حرمه ترانه مو بغداد

_اني كتله اسفه عمو

نزلت راسي وجنت لازمه بعبايته الي مغطيني بيها وجسمي كله يرجف وكال

نواف: ما عليج بنتي هسه ادزج لهلج لا تخافين اني اشريت لحسين يروح

_اشكرك عمو

ضحك وصاح على سيف اخوه الأصغر منه وركض سيف وكله

سيف  : ها خويه نواف أمرني

نواف:  ما يأمرك ظالم خلي نرجع للبيت وناخذها بطريكنه (بطريقنه) لبيت حسين

سيف : منو انتي

نواف : اخت حسين

سيف :ها الحضريه
( المثقفه او بنت المدينه الي مو من الريف يطلقون عليها هذا الأسم) بنت الولايه

*مع احترامي لكل اهل الجنوب  هم اهل الثقافه وكل العراقيين على راسي  بس هم اهل الريف يكولون حضريه على بنات المدينه او المثقفات 🌻🌻

#نواف. (هو الي راح يحجي من وجهة نضره)👍

اليوم عرس اخوي وصديقي وايدي اليمنى حسين  هل ولد واكف الي وكفات اخو وما بيوم كال لا لو ردت شي منه وردني   اشوفه طاير من الفرح اذكر ذاك اليوم من رحت انا خطبت اله هل بنيه هاجر مارضو ينطوها  واجه كال الي والدمعه واكفه بطرف عينه يعشكها عشك مخابيل  وانا هل رحت طلبتها تحججو هي  بعدها صغيره  بس هذا كلبه طاك عليها والله سوالف شباب هل ايام  وانا وعدته راح اخليها تصير اله بس بشرط هل بنيه راح يخليها بنص قلبه وعينه وما يقصر عليها شي ومن رحت وطلبت ايدها و لان انا الشيخ ما ردو طلبي واليوم عرسه ورحت اله انا واخواني ونسوانهم انوب ريت ما حضرت وشفت هل طركاعه واكفه ب الشارع بين الوادم وكلها تباوع عليها جنها شطب ريحان كل جسمها باين بياضها يلج لج وانوب كل زرورها باينه و شعرها جنه سواد الليل جفلت من الطلق وحسين جان يدور عليها وانا اشرت اله يروح وانا اجيبها مخبوص بفرحته جانو الشباب كلهم يباعون عليها وهي ترجف والله حقهم على هل جمال يصفنون انوب الضليمه من وكع شالها على الكاع والله لو اختي لو وحده من حريم البيت لا كسرت كل ضلوعها بس حسين اخ منك حسين مدللها حتى خدم مخلي الها ما تجيس العود هو يكلي ما انقص من دلالها انا ازيد دلالها يموت عليها نزعت هل عبايه وخليتها ع راسها جفلت وباوعت الي جنها تعرفني وانوب كالتلي عمو وجها جنه ماعون كيمر بمصباح العيد  وسنونها جنها ليلو مسطر تبجي تريد ترد لهلها صحت سيف فك حلكه اول مشافهة وكتله هاي اخت حسين صير رزن ومن كالت الي عمو رجعني لهلي ضحك سيف وكال الها

سيف  : ولج عمو شنو هذا شيخ نواف صكار الزلم تصيحين اله عموو لا تشوفين الشيب تراه صغير

كفخته على راسه وضحكت باوعت الها والدموع تارسه عيونها وتضحك جنها طفله جاب سيف السياره صعدت وساق سيف

عاينت الها بالمرايه جانت حاطه راسها على الجامه الحزن تارس  وجهها وكتلها

_شون تركبين ويه وادم ما تعرفيهم

🦋🦋🦋🦋🦋🦋🦋🦋🦋🦋🦋🦋🦋🦋🦋🦋

🌻خلصت البارت الأول اتمنى يعجبكم وسوري على الأخطاء اسفه اذا اكو غلط ياريت اذا تشوفون غلطه تنبهوني عليها

🌻واتمنى فد كلمه حلو او تعليق حلو اذا عجبكم اول بارت  ولا تنسون تعليق يسعد قلبي🖤 و تصويت

اذا شفت تفاعل اكمل القصه ان شاء الله 😍🙏