عشگ أهل الجنوب الفصل الثامن وثلاثون 38 - بقلم أسيل

جاسم :دكتور ساره هذا

فات إيفان وابتسم بس ابتسم جسمي رجف حسيت بفرحه بس ما كدرت اصدك اريد اسمعها منه وكال

إيفان :طلع حميد الورم وجسمج ما يحمل اي ورم خبيث او خلايا سرطانيه افرحي

ساره :والله

إيفان :انتو مو تحلفون بالعباس لج بالعباس حميد

ساره :الف الحمد لك

رادت توكع ساحت روحها ولزمتها بسرعه وامي طكتها بهلهوله والبنات وياها سحبتها كل قوتي لصدري وبست خدودها من كل قلبي ابوي ضحك وضحكو البنات والولد يتحمدون لسلامتها مشو البنات سحبوها بالكوه من بين اديني وامي كالت وهي تبوس بيها

رسميه :ام الخير عجني الحنه بدينج

جانت قاصده علياء بأم الخير شفتها تعاين لجاسم واشرت اله لا استغربت حسيت نكسر خاطره من أشرت اله براسها لا وابتسمت بقهرة هذا بعده قافل على موضوع الشيله وصاح ابوي

حيدر : سيف نبيل هوايش اثنين وتلث خرفان وعجل باب البيت تحنيهم سويره بنيتنه وينذبحن حدر رجلها ويتوزعن ثواب لوجه الله تعالى

إيفان :يعني راح اكل تشريب

رسميه :يمه منو هذا وغفه الصابون

جانت تقصد إيفان لان ابيض وشعره اشكر وعيونه صفر طبعا إيفان جان جبير بالعمر ضحكت وسلمت عليهم والولد هم وسمر ويه البنات مشيت وخليت ايدي على جتف جاسم وبست راسه بقه يباوع ب استغراب وسحبته على جهة وكتله

_شكو

جاسم :خيرك اخوي شبيك

_جاسم انا الي اسئلك شبيك

جاسم :وروح امي ماكو شي شبيك تره الكاع ما سايعتني

_تريد تشيل من البيت بعدك زعلان مني

جاسم :خويه جنك تسودنت من الفرحه

_تره شفت علياء تكلك لا وانت جنت ناوي تكول شي

جاسم :ها اي لا مو شي لا تخاف مزعلان

_جاسم ها تضم على خيك مواثق بيه

جاسم :لا والله خويه ما أكدر احجي فدوه لا تجبرني

_براحتك ما دامك ما رايد تحجي براحتك

جاسم :خويه لا تزعل مني ولا تنقهر والله ما قاصد شي وما ردت احجي لان خويه اعذرني والله بس علياء حامل بشهرها الثاني والطفل بصحه وعافيه وماكو اي خطوره عليها لو على الطفل

_دكول بغلاه ابوي ما تجذب صدك لو تجذب

جاسم :وداعه ابوي وغلاه بنيتي ملك

_انت مخبل لك لك شهل يوم ساره تعالي بشرفج تعالي

جاسم :لا نواف لا عليك الله

ساره :كول عيني شكو راح احني الخروف

_تحجي انت لو اني

ساره :شكو

جاسم :ماكو

_علياء حامل بشهرها الثاني وهي والطفل بخير

ساره :جذااااب

رسميه :هاااا وج وليدي ما يجذب

ساره :عمه يكول علياء حبله بشهرها الثاني والطفل وهي بخيررر

رسميه :كول وعلي

هند :ياااا واكول شلبها تاكل بالليمون صبح وليل

زينب :وسئلتني البارحه على ليمون

علياء :اعذريني خيتي

وتباوع على ساره الي هلهلت من كل قلبها وحضنتها البربوك اول مره اشوفها تهلهل خزرتها بس ضحكت وامي رجعت تهلهل وسحبت إيفان وفوتته للأستقبال وابوي كال لهند

حيدر:صيحليهم عجلين و اربع هوايش واربع خرفان كل ما نزيد توزيع لوجه الله تعالى الله يفرح لمتنه وتحني علياء ويه سويره

مشو البنات وباسو اديه باركت لساره وصاحت هند مثل ما كال ابوي وكالت الهم راح يزيد البيت نفر جاسم جايه وليد وهل سرسري سيف هلهل موتني ضحك وضربت جاسم على ضهرهة وامي تسولف ويه علياء وما مصدكه

_جاسم تره فرحتك هي فرحتي والي يوجع قلبك يوجع قلبي لا تضن بيوم انقهر انت صبرت وهل الله عوضك وانا الله هم عوضني برده قلبي وهسه بنيتي بخير وعافيه

جاسم :لو افديك بعمري قليل بحقك

_لعد اشويلنه كباب

واشر لعيونه وضحك وانا هم شفت ساره تباوع علي ابتسمت وكالت الي وهي تحرك شفتها بدون صوت (احبك) خرب رجفت قلبي بكلمتها ردت اسيطر على روحي ما كدرت رجعتني مراهق وكلت الها بصوت مسموع

_وانا بعد احبج يبعد هلي يبعد عافيتي وفرحتي بهل دنيا اموت عليج

رسميه :ها

صعدت ساره فوك من الخجل والبنات ميتات ضحك وره شويه صعدت وجانت ساره واكفه كبال المرايه لابسه كلبيه بلون النهر زركه وشعرها هادته وتخلي هل وردي لخدودهها وشفتها ورديه وكحلت عينها غرت اغار والله من كحل عينها اغار والله وخلت شي لشفتها وصارت لمعه بيها خلت عطر وكتلها

_ورب الكعبه اغار

ساره :ماما رسميه كالت تكشخي حته تغيض نسوان الديره

_يبووووو منها ومن سوالفها زين واني

ساره :يجون يتخطبوني منك

ضحكت وسحبتها بسرعه وبستها من شفتها طلعت قهر ايامي كله بشفايفها رفعت راسها وجهة احمر ابتسمت ورجعت باستني وسحبتني الها اكثر وندك الباب بتعدت ساره بسرعه وجانت ملاك أشرت الها بيدي اسبها وهي ضحكت وكالت

ملاك :عمو كبالكم العمر الطويل كله تخلصونه سوه بس المزرعه جابوها كلها بالباب منتضرين ساره تحنيهم

_جايين حبيبه قلب عمج

لبست ذهبها ساره ولزمت ايدي كل قوتها والتفت عليه وكالت

ساره :اوعدني ما تهد ايدي مره ثانيه

_عسى الله ياخذ عمري قبل لا اهدها

ساره :اسم الله اسم اللله عمرك وعمري طويل ان شاء الله

طلعنه وايدي بيدها ومتحمسه مثل الطفله وخلت ايدها بالحنه بس تخاف تتقرب وكفت وراها ولزمت ايدها وحنينه كل الذبايح وهي تضحك وتتراجف بين ايدي من الخوف والتفت عليه وباوعت علي ايدي وكالت

ساره :توصخت بالحنه وانت متحبها على ايدك تعال اغسلها الك

لزمت ايدها بيدي الثانيه وخليت جفها ابطن جفي وخليت جفها يحني اديه باوعت علي بست عينها وكلت الها

_كلشي منج احبه

رسميه :يمه كافي لا تنحسدون صلو على النبي ولجن زريكات يله يله هنيده وزنيبه فوتن طكطن حرمل مليكه بنت الازرك وينج حبيبه جدتها فوتي فوتي جيبي جيس ذهيباتي تعالي ام الخير وانتي ينبعه الريحان هم تعالي

#ساره

ساره مر اسبوع إيفان يمنه كمل النه كل المعاملات وحجزنه بمستشفي بتركيا تجنن ودكاترتها ممتازين أصدقاء إيفان أصولهم عراقيه بس متجنسين ألماني وجايين بعثه لتركيا وطبعا افتهمنه سبب عنايه إيفان بينه لهل درجه لان مرته تمرضت وجان كلش يحبها وصار عدها ورم بالدماغ وماتت وهم متزاعلين ومن عرف قصتي هو الي جبر سمر واحمد يوصلون الخبر لنواف جان يعرف بينه بس متزاعلين وتذكر نفسه بينه اني ونواف... البيت خلال هل اسبوع كله عباره عن ضحك وفرح وعمه كل شويه تشغل قرآن وتحصنه وعمو هم يقره قرآن ويدعي النه جنت متمدده باجر سفرتنه اني ونواف جاسم راد يجي والولد هم بس مقبل نواف كال الهم ينتبهون على البيت وعمو لان تعبان وشغلهم تراكم كتله لنواف اروح وحدي رمقني بنضره تسكتين لو اجي ادفنج وضحك وراسي يوجعني جان صحت اله باسمه عاف شغله وكام مشه الي وكال

نواف :عيونه

ساره :راسي يوجعني خلي انام على صدرك

تمدد بصفي وسحبني لحضنه طفه ضوه التيبلام الي يم راسي وبده يضغط باصابعه على راسي غمضت عيني ونمت بسبب التعب نعسانه كلش وهاي فتحت عيني على صوت نواف وهو يكعدني فتحت عيني نعسانه بعدني راسي راح يموتني وجع سحبني من ايدي جان مبدل فتحت عيني ضربته على صدره وكتله

_راح يتحرشون بيك البنات ليش طالع هلكد حلو

نواف :كل ما راح يتحرشون راح اكوللهم هاي مرتي واشوفهم الحلقه بيدي وراح امشي وراسي بالكاع

_جذاب

نواف :اي والله جذاب ما أكدر امشي وراسي بالكاع بس تعرفين والله مراح افكر بغيرج

_اشاقه وياك

نواف :ها يعني عادي اباوع

_نوووواف

نواف :عيونه لنواف

ضحكني فتت سبحت ونشفت شعري طلعت ملابسي جان كاعد ورايه على الجربايه وكتله

_ليش باقي انزل جوه راح اكمل واجي

نواف :لا ننزل جوه سويه

_ليش شكو ما اتأخر

نواف :ما اريد ابعد عنج ولا أريد انزل عيني من شوفه وجهج

ضحكت عبالي يتغزل بيه بس نضراته الي جانت غريبه فتت بدلت وطلعت جنت لابسه جينز عريض و بلوز قطن ثخين لون فستقي فاتح وجاكيت ابيض صوف وعريض ولفيت حجاب اوف وايت عدلت وجهي وشلت الجنطه مالتي خليت الادويه وتليفوني ومشه نواف حضني وباس عيوني وكال

نواف :زين اذا تحرشو بيج شسوي

_متسوي شي عادي غير حلوة ومن حقهم

بقه صافن على ردي ضحكت وجان يبوس خدي وعظه على كيف رجفني ومشينه سويه ردت انزل الدرج بس عيني بدت تغوش لزمت ايده ونزلت على كيف تعثرت اكثر من مره بس ثبتني نواف ونزلنه الكل موجودين ومحظرين سفره الاكل وماما رسميه تخلي الاكل الي اكلت لحد ما انترست بطني اكل وطلعنه جاسم ونبيل وسيف راح يجون ويايه سلمت على البنات عمه رسميه كلش بجت هواي وبقت تحضن وتبوس بيه وتدعي الي وسلمت على عمو من بست ايده بأس راسي وكال

حيدر :بويه ابريني الذمه

_ليش عمو تحجي هيج تره راح ارجع

حيدر:ترجعين بويه ترجعين بالسلامه بس كليلي مبري الذمه وريحي قلبي

_عمو والله مبري الذمه كلكم مبريين الذمه وسامحوني اذا غلطت وياكم بيوم

بقيت ابجي وحسيت قلبي راح ينفجر هلكد ما مقهورة وخايفه ركبت بالسياره جان نواف كاعد بصفي ورشو مي كلهم ورانه شهكت وخله ايده على راسي وسحبني لجتفه وكال

نواف :راجعين والله راجعين لا تقهرين نفسج وهسه تسيل الكحله وتفضحينه

ضحكت ومسحت دموعي صاير بسهولة يضحكني جانب جديد من شخصيته اكتشفته وهاي مرت ساعات وصلنه لتركيا واستقبلنه إيفان وسمر واحمد هناك الصراحه جان هل شي كلش حلو منهم وبقه يحجي إيفان واحنه واكفين بالفندق صدع راسي بشكل مو طبيعي احسه راح ينفجر لزمت نواف من ايده التفت الي قبل لا احجي كلمه كال

نواف :عن اذنك دكتور إيفان بس نرتاح ونغسل وان شاء الله نرجع نحجي بالتفاصيل الباقيه

سحب ايده من ايدي وخله ايده على خاصرتي وسندني نمشي وصلنه للمصعد نسد الباب مال مصعد وسحبني لصدره ما اعترضت الصراحه هلكد ما متوجعه ودايخه وصلنه للجناح مالتنه وفتت جنت متحمسه اشوفه بس كل هل حماس راح من الوجع عيني ضلت ادمع فتت للحمام بسرعه غسلت وجهي نزعت الحجاب الضوه يوجع راسي دك نواف الباب بس فتحه حسيت نزل شي من خشمي خليت ايدي ونزلتها نترست دم حسيت الدنيا افترت بيه ردت اوكع و بسرعه خله ايده على راسي وشالني بجيت من الوجع مخليه ايدي على عيني الضوه يخترق مخي احسه خلاني على الجربايه واتصل ب إيفان خليت راسي جوه المخده ما اريد ضوه لو صوت التلفزيون مشتغل وره دقيقه حسيت بالخدر هلكد متوجعت طفه نواف التلفزيون وسد البردات مال غرفه عملاقه جانت مشه وخله ايده جوه راسي وسحبني كعدني وشربني الدوه وكال

نواف :ليش ولج عايفه دوه البارحه واليوم وتكليلي هسه اشرب

_نسيت والله

بقه يفرك براسي على كيفه وره شويه كمت ما أكدر افتح عيني غفيت بحضنه كعدت وره مدري شكد نواف مو بصفي الغرفه ضلمه بس على ضوه الحمام كمت فتحت الباب واشوف نواف بالبالكونه يدخن وعصبت عليه هذا مو مريض شافني وطفه الجكاره وفات وكال

نواف:هلا بحبيبه قلبي

_انت وعدتني نواااف رجعت يعني رجعت

نواف:وانتي ما شربتي الدوه

_نسسسيت ما متعمده نسيت والله وانت تتعمد تسويها وحده بوحده

نواف :لا والله بس محروك قلبي

_يا ستار ليش محروك قلبك لا تنطي أعذار

نوا :لا والله محروك قلبي

_شصاير احجي

نواف :شحجي شكول هسه انتي كبالي بهل شكل وهل لبس وما أكدر اتكرب صوبج ومحروم من طعم شفتج وتردين ما يحترك قلبي

هذا شيحجي حسيت بنار اشتعت بيه التفت على المرايه الي ورايه اكيد يضحك عليه والله لو ميته ولا هل موقف شعر مخربط وبس بالبلوز الفستقي الي ما يستر شي مني وجواريب خدود حمر صحت رأسا

_نووووواااااف شدسووووي بيه شسووويت

مشيت بسرعه اريد افوت بس بتك ايد حضني وسحبني لصدره ويضحك ضحكته الخشنه الي احبها ومن كل قلبه واني انزل بالبلوز وكتله بسرعه

_نووواف النبي النبي عليك ابدل دير وجهك

نواف :ساره

_لا اروح فدوه دير وجهك

نواف :لج يبعد حيلي ليش ما ترديني اعاين عليج تره والله رجلج انا لا تحسسيني غريب عنج

_عيب

جفصت بأم السالفه عيب شنو اني شحس غير رجلي ضحك دفعته ومشيت وما حسيت بس شايلني وعلى الفراش وهو فوكايه باس شفتي وخله راسه على صدري وباس قلبي وكال

نواف :لا تهديني بروحي راح تسوين العمليه وتردين الي زين

_تحبني

نواف :كثر ما احبج كمت ادعي من الله يكصر بعمري على كل دمعه نزلت من عينج بسببي

_لااااا لا تحرك قلبي لا تكول هيج

نواف :راح أضل طول عمري مكهور لان بسبب عنادي وعصبيتي خسرت وليدي وخسرت مرتي

_ما خسرتني كافي لا تقهر روحك وانت مريض كافي

نواف:والله عاجبني اطلع ضيم الدنيا بشفتج وبيج

دفعته وضحك وكمت فتحت جنطتي وبدلت لبسي خابرنه عمه رسميه وسلمنه على الكل وطمناهم وكلنه الهم باجر الفحوصات وبعدها اذا فحوصاتي العمليه رأسا ضلت تدعي هي وعمو حيدر الي وضلت تبجي كلش قهرتني و سلمنه عليهم وسد التليفون وكال

نواف :غيري لبسج خلي نتعشى بره

_اذا تحب روح بوحدك لان والله تعبانه فردنوب

نواف :لا حبيبه انا ما اريد مكان انتي مو يمي علمودج زين شطلب الج

_شوربه فطر

ضحك وكام بأس راسي ورفع التليفون وضل يحجي انكليزي وياهم بطلاقه واني صافنه عليه احس نفسي وكعت بحب رجلي مره ثانيه ودرت وجهي منه جان يرجع يكعد يمي فوت ايده جوه الغطه ولزم رجلي جانت اصابع رجلي ثلج مشه و فتح جنطتي طلع جواريبي وكعد يم رجلي ردت اخذ منه جواريبي ما قبل وكلت اله وعيوني غركت ب الدموع

_ليش تسوي بيه هيج

نواف :ليش لج شسويت

_ليش توجع قلبي

نواف:ليش لان داير بالي عليج اوجع قلبج شون تريدن اتصرف

_ارجع مثل قبل

نواف:و اوجع قلبج وأرجع الانسان الغبي العصبي الي خسر كلشي يحبه بسبب غبائه

قبل لا يكمل ركعت كباله ولزمت وجهة وبسته من شفته نزلت دموعي هو سحبني لصدره وعمق البوسه وره ثوان ابتعد سحبته لصدري وتمددت راسه صار على صدري وشعره جان طولان وكتله

_لا تزينه مره ثانيه احبه طويل حته نغيض جاسم ونبيل وسيف من امشطه الك

نواف:ساره

_لا تحرمني من كلمه بنيتي

نواف:بنيه قلبي بنيتي روحي من الدنيا

_الله لا يحرمني منك

نواف:ولا منج اكلج

_كول

نواف :تره الشاهد الله ما جان بقلبي شي لنجوى

_لا تفتح الموضوع كافي الي صار بينه اما أريد اسمع اسمها

نواف :حاضر باجر الصبح فوحصاتج وراها نطلع نتونس شنو يعجبج اسوي الج وراها الصبح نرجع للمستشفى شنو حابه تسوين

_ وره ما نرجع من المستشفى اضل نايمه اليوم كله بحضنك

ضليت اباوع بوجهة ورجع راسه على صدري غمض عينه وأيده على خاصرتي وسحبني اله ابتسمت

#نواف

طلع الصبح وكعدتها من النوم ما قبلت تكعد تعبانه بالكوه تفتح عينها بوست عينها وخشمها وخدودها ضحكت بست شفتها ورجعت بست ركبتها ضحكت وسحبتها وكعدتها خلت راسها على صدري وانا احرك ايدي على ضهرها وكلت الها

_يله حبيبه قلبي كومي كومي سمي باسم الله طلبت ريوك للغرفه نتريك ونروح للمستشفى وراها نروح لمكان راح تحبي

ابتسمت وكامت خلصنه ريوك وطلعنه للمستشفى إيفان منتضرنه جان وبقو ساعت يفحصون بيها ويشوفون تحاليلها وطلعت كلها زينه وهل شي ريح بالنه كلنه وطلعنه وجان احمد وسمر منتضرينه وايفان وطلعو يحتفلون خابرنه على اهلي وطمناهم امي فرحت كلش وابوي هم بس حسيته تعبان والبنات فرحن وبقن يسلمن ويدعن بقيت اتراسل ويه جاسم على ابوي وجانت فحوصاته مو زينه وهاي مر اليوم كله نسولف ونضحك تعبت ساره اخر شي استأذنت ورجعنه للفندق اعتذرت منهم لان عفناهم فاتت سبحت واني وراها فتت طلعت لكيتها تنشف شعرها خلت عطر ومرطب لبشرتها وانا ضليت انشف شعري واعاين عليها التفت الي وابتسمت دنكت راسها ورجعت باوعت ليكدام يعني كل هل ايام الي بينه بعدها تستحي مني وخدودها تصير حمر وهل شي كل مره يخليني اوكع بحبها اكثر واكثر وكالت بمستحه

ساره :عادي تطلب الي فاكهة مشتهيه اكل تفاح وركي

_عيوني الج

اتصلت بالرسبشن وعاد طلبت فواكه منهم ويكثرون الي تفاح وركي وكمت وره شويه من ندك الباب وفتت الفاكهة مسوينها ملكيه النه زدت التدفئه وشغلت التلفزيون بديت اكلب على فلم وطفت الضوه وخلت الفاكهة على الجربايه بصفي و كعدت بين رجليه وضهرها على صدري وجنت متمدد وهي بحضني وتغطت جانت لابسه ثوب عسلي كصير وضافره شعرها بدت تاكل وتعاين على التلفزيون لزمت ايدي وخلتني احضنها وعرفت بيها خايفه بست راسها وكتلها كولي

ساره :شكول

_شبيج شتفكرين

ساره :زين اذا نعميت اذا ماكدرت امشي واذا

خليت ايدي على وجها وخليتها أدير وجها الي وبست شفتها اخذت حيفي من شفتها ضلت صافنه بوجهي وكلت الها

_ما اعوفج بس انتي راح تردين الي وبصحه وعافيه راح تردين

ساره :وانت شوكت

_وره ما تسوين عمليتج راح اسوي كلشي تريدينه

نامت على أيدي مثل الطفله ووتعاين عليه وتلعب بلحيتي تحرك اصابعها على لحيتي وكالت

ساره :اذا صار شي

قبل لا تكمل عضيت اصبعها بشفتي فزت وضحكت بسرعه وضليت ابوس بوجها وركبتها وهي خربانه ضحك وصوتها ترس الغرفه ضحك وهاي الليل كله ما رمشت عيني نايمه بحضني وراسها على صدري اريد اشبع عيني بشوفتها جنت العصر اتراسل ويه جاسم وكتله خايف يصير بيها شي وهو بقه يواسيني جاسم أقرب الناس الي صح اخوتي البقيه احبهم بس جاسم يفهمني كلش ردت اتصل بيه بس خفت نايم دزيت رساله اله وعرفته نايم مطفي النت مايدري قلبي راح يوكف من خوفي عليها تحركت وكالت بهمس نواف بارده سحبتها لحضني اكثر وغطيتها بغطه ثاني شفتها يم ركبتي واحس بنفسها الهادي طلع الصبح وكمت حظرت أغراضها ولبسها وكلشي رادته ما قبلت تكوم من الفراش المفروض ما تاكل شي بس شربت جاي دافي ايدها ترجف بست اديناتها وكامت تبدل خايفه كلش اتصلت بأهلي تريد تسلم عليهم وجانت تضحك واتكول الهم ادعولي اتصل عمر سمره عليها وهاي خلصنه رحنه للمستشفى بدت تحظر ولبست لبس العمليات وساعدتها بكل شي وضلينه ناخذ صور واحاول اضحكها وكال المساعد كدامها بس عشر دقايق قبل العمليه بدت تبجي رجفت قلبي وكلت الها

_شبيج باباتي شبيج بنيتي حبيبتي عمري روحي شبيج انتي

ساره :اخاف اخاف بعد ما اشوفك اخاف يصير بيه شي انت مسامحني

_ساره لا توجعين قلبي لا تعيفيني بوحدي والله ما أكدر اصبر قلبي بعد

ساره :واذا ما طلعت من العمليات اذا صار غلط

_ما يصير ما يصير

ساره :نواف خايفه خلي ما نسويها وابقه اخلص عمري وياك

_واشوفج كبالي عيني تموتين يوم وره يوم خو كوليلي كاعد أعذب بيك لا تبجين اروح فدوه لدموعج لا تبجين خليني اشوف ضحكتج الي احبها ولعيونج الحلوات

بست عينها وخشمها وشفتها وخدودها واديناتها وحضنتها لصدري ما اشبع منها خليت سبحتي بيدها ضحكت بس شافتها ونفتح الباب فزت والتفت وجان جاسم ضحك الخبل وجانت ملاك وياه ركضت ملاك وحضنت ساره وكمت بسرعه حضنت جاسم وكتله على كيفي وصوتي يرجف

_جاسم راح ياخذونها

جاسم :ترد الك والله ترد هدي نفسك

ملاك :هاي بيبي زورته للعلك بكل الائمه وبيت الله وكالت خلي تشد هل علك بيدها وراح يوكفون اهل البيت الها مرحبا ورب العالمين راح يرجعج وتردين بالسلامه

شدت ملاك العلك ومشت باستني وحضنتني وكالت

ملاك :سويت بحث مفصل ماكو احد يصير بيه شي بهل عمليه بس انتي خليج قويه وخليج واثقه برب العالمين شوفي كلنه منتضريج ماما تسلم عليج وتكول مشتهيه من ايدها الكهوة وعمه زنوبه تكول مشتاقين لتحشيشاتها وهنوده تكول مشتاقه ابوك ملابسها فردي النه بخير وعافيه لان وعديني السنه الجايه نداوم انا وياج جامعه

ضحكت ساره واشرت براسها وسلم جاسم عليها وحسيتها صارت قويه اخذوها الدكاتره وانا لازم بيدها الي ترجف وصلنه لباب غرفه العمليات باست ايدي وكالت

ساره :احبك يا أول وجع ترتاحله ضلوعي

وفوتوها التفت الجاسم ومشيت جم خطوه واحس ادموعي تصب ما كدرت اصبر روحي وكعت بالكاع وما حسيت بروحي اله انا بغرفه بيضه واحمد وسمر يسولفون كعدت مغذي بيدي وكلت بسرعه بس تذكرت ساره

_وين ساره

جاسم :خويه هدي والله إيفان يكول العمليه تمشي بخير

_صار شكد نايم

جاسم :ساعه ونص

سمر :شيخ هاي عود رايديك تصير قوي وتسند ساره تاليتها هيج توكع وكعه

جاسم :كول يا الله

_ونعم بالله يا الله

كعدت عدل جابت ملاك الي اكل وما ردت اكسر بخاطرها اكلت لكمه وشربت العصير وكمت احمد يسولف ضل ويه جاسم وانا مكابل غرفه العمليات وملاك جانت كاعده ضليت اعاين عليها لازمه التليفون وتقره قرآن بست راسها وضحكت وهي تعاين علي وكلت الها

_ما اريد بيوم تاخذين بخاطرج عليه لان شفتيني اتعارك ويه ابوج واصيح عليه مرينه بأيام صعبه بس والله ابوج قطعه من قلبي

ملاك :اعرف هل شي وبيوم الي تعاركتو ضل ابويه يروح ويرجع لغرفتك يريد يحجي وياك ابوي هم يحبك ويعزك انت تعرف بهل شي ما يحتاج احجي عمو لا تضن بيوم من الايام ازعل منك ماكو وحده تزعل من ابوها والي رباها وتدللت جوه ايده صح ابوي دللني بس واحد يحجي ل الله جان دلالك احلى

جاسم:بنت الجلب نفس امها كلشي اسوي اطلع انا مو زين

_جا هي جذابه

ضحكنه وكعد يمنه بيني وبينها شي دفعها بعيد عني بقت صافنه على ابوها وضحك وكال

جاسم:ها تره اخوي هذا ويحبني اكثر منج

ملاك:صدك عمو

_ لا انا احبج اكثر

دخت وصارت الدنيا مشوشه بعيني ردت اوكع بالكاع نحنيت وبسرعه سندني جاسم ورجعني اكعد عدل ركضت ملاك للدكتور تحجي وياه وجابته قاس ضغطي منخفض شفت ملاك تبجي وترجف كلت لجاسم من راحت تشرب مي وتجيب النه

_جاسم خذ بنيتك وروحو ارتاحو لا يصير بالبنيه شي خذها واحنه نازلين بالفندق شيراتو انا بخير خذها بس ترجع

❤️❤️❤️❤️❤️❤️❤️❤️🖤🖤🖤🖤🖤🖤🖤🖤

هلاااااا هلااااااااا

اقتربنه اقتربنه من النهايه جدا 🥺🥺 اني احبكم 🥺🥺وانتو هم تحبوني شون حفارقكم ما ادري 🥺🥺

بارت لطيف وطويل 3197 كلمه