عشگ أهل الجنوب الفصل الأربعون 40 - بقلم أسيل

نواف :اعتذر

_شبيه.. شبي عمو حيدر

نواف :ماكو شي

مشه ولزمته من تي شيرته وصحت بيه بعصبيه وكل جسمي يرجف والدموع تنزل من عيني خليت راسي بضهره شهكت

_لا أدير ضهرك عليه مثل كل مره احجيييي الي كلي شبيه عمو ليش بالمستشفى منو هذا ليش يكلك العمليه عدت بخير شصاير من شوكت من شوكت تعبان وضام عليه ليش اسوي بيه هيج نواف ليش متحجي الي ليش توجع قلبي

نواف: الله ياخذ عمري إذا متقصد أوجع قلبج قبل يوم من روحه جاسم ابوي نضرب جلطه هو جاسم رد للديره كتله انا ارجع ما رضى وامي اتصلت بيه وحلفتني وذممت بركبتي ما اعيفج بروحج وارد لو اخليج تدرين بسالفه ابوي لان مريضه وحالتج خطر كلنه خايفين عليج وابوي ما قبل ارد لو ارجعج قبل لا تخلص كل فحوصاتج ابوي نضرب جلطه وكام ما يكدر يحرك ايد ورجله وهسه سوو عمليه وخلصت على خير الف الحمد لله صح يحتاج وكت حته يتعالج بس الحمد لله عدت مرحله الخطر كل مكالماتي ورسائلي ويه جاسم هذا رقمه الجديد لان موسى شمر تليفون جاسم على ابوه وشك راسه والسيم كارت طار ب الحديقه وضاع وما لكوه من شمره وغير رقمه

_ن.. نواف اني

نواف :استاهل والله انا استاهل اعيش كل عمري بهل وجع كلشي استاهل اني عن اذنج

ابتعد مني وكفت كباله ميباوع بوجهي من كتله ما احبك وطلبت الطلاك منه كام ما يباوع بوجهي احسه صدك كرهني لزمت ايده ثلج جانت سحب ايده على كيف وشال سترته وطلع بس لبس حذائه شسويت اني عايف ابو الي هو روحه من الدنيا وضال يهتم بيه واني صارلي اربع ايام بس اغث بيه وسامه بدنه بحجي وتصرفاتي مال زعاطيط وهو القهر ياكل قلبه فتحت الباب واني لابسه دشداشه سمائيه كصيره وردان وشفته واكف بنهايه الممر يم الشباج فاتحه ويدخن مشيت وكتله واني ارجف والدموع ما ترضه توكف من عيني

_لا تنطيني ضهرك لا تعوفني اي اي اني غبيه وعصبت لان كذبت عليه نواف تعبت بالقرآن تعبت وما ادري شسوي اني شسويت الك لا تقهرني بداعه غواليك

نواف:احتركو عشيرتج بجهنم عدى اهلج فوتي لا يشوفج احد

جان عصبي ومشيت عناد بيه حافيه والجو بارد بره الغرفة طبعا هل حجي الثوب دلع وصدره خفيف وفوك الركبه وطالعه اتمشى بالممر وساعه الساعه واحد يفوت لو يفتح الباب نواف عيونه صارت دم طفه الجكاره واشر الي افوت مشيت ابتعدت من الغرفه اقترب مني ما احسيت بيه بس ساحبني من ايدي نضربت بصدره شهكت وشالني بحضنه وفوتني للغرفه وسد الباب برجله ميقبل يباوع بعيني وجعت قلبه هواي شمرني على الجربايه وكال بعصبيه

نواف:انا كتلج بعدج على ذمتي لا تطلعين هيج ليش ادخل سجن هنا حرامات والله لو شايفج احد ادفنج وادفنه والكفل زينب تره كتلج ما اعصب بس توصل احد يعاين عليج لا ابد

_اسفه اسفه ما اريدك تعوفني جنت عصبيه وكلش كلش نقهرت من كذبت وبعدين اشوفك طول الليل تحجي اسفه والله شكيت بيك و ..و

ما كملت حجيي لان جنت ابجي وغاصه بدموعي نزع حذائه وسترته شمرها على الكرويته تقرب مني كلش ركع على الجربايه دفعني حته اتمدد ردت اكوم ايدي ترجف واكيد حيسوي شي بس خله ايده على خصري وراسه على صدري يم ركبتي ذب نص جسمه على الجربايه والنص الثاني فوكايه راسه جان يم صدري ووركبتي حسيت بشي دافي على صدري وعرفت هاي دموعه بقيت متفاجئه نواف يبجي بحضني شنو من وجع لعد بقلبه طفيت الضوه الي يم الجربايه وحضنت راسه كل قوتي بست راسه وكتله واني العب بشعره وافوت اصابعي بين خصل شعره

_لا تخاف عمو راح يصير بخير وراح نرجع كلنه سويه نكعد بنفس السفره وراح يجي النه طفل نسمي حيدرا على اسم عمو حته يصير المدلل مالته ويفسده بدلاله

نواف:كتلج مريض لان ادري بيج راح تعاندين وما تسوين العمليه وانا ما اكدر اشوفج تموتين كبالي صح جذبت بس والله يا بنت الناس مابيه طاقه اخسرج الج هم ساره انتي صدك ما تحبيني صدك مجبوره تضلين تدرين بيه ما اجبرج على الحجاب بس اغار عليج و واذا تردين تنزعي ب.. بكي... ما أكدر اكلج نزعي والله اغار احد يعاين على شعرك لو ركبتج وانتي بذمتي ما اريد احد يعاين عليج غيري

_وداعه حسين وداعه سعد يا نواف اني جنت ناويه بس اضوجك اعرف قسيت عليك بس الحجاب انا لبسته بإرادتي تره صح جنت تكلي خلي حجاب وهل شي بس من لبسته لان حبيته هاي اول شي وثاني شي نواف احبك والله شاهد على كل كلمه اكولها احبك مو بس احبك لا نواف انت الدنيا كلها بالنسبه الي اسفه والله اعرف اعرف قسيت عليك مخبله وانت تكلي بنيتك وانت ابوي بس فدوه لا تزعل مني وكل اب يسامح بنته على غلطها غرت من شفتها تباوع على صدرك من تضحك بوجهك ما اقبل ونوب الليل كله تتراسل حركتلي اعصابي وغرت

نواف:وانتي سمطتي جدي السابع عشر

ضحكت وهو هم وما حسيته بس سحبني وصار وجهي كبال وجهة باس خشمي وعيني ونزل لشفتي وعرفت شنو يريد دفعته بس ما رضى يبتعد بس اقترب لركبتي معت بين ايده اغار وما هدني لحد ما طلع غصب الدنيا بيه فتحت عيني لكيته مو يمي على الجربايه لبست الروب فتحت البرده ولكيته كاعد يشرب جاي الساعه جانت ب ١١ الصبح التفت عليه وضحك اشر الي اطلع فتحت الباب الجو بارد ريحه المي الجو صافي والهوة ثلج دفع الكرسي من ردت اكعد باوعت عليه جان يلزم ايدي وباسها وكعدت بحضنه رفع رجلي وخلاها على الكرويته لزم الغطه وغطاني بقيت صافنه بوجهة ضحك وكال

نواف:لا تضلين تباعين عليه تره تدرين بيه اضعف من اشوف عيونج

_احبك

باوع بعيني وسحبني كل قوته لحضنه وباس راسي وخدي وعيني وخشمي وشفتي وركبتي واخذ نفس ضحكت على هل حركات مالته خليت رأسي على جتفه وابتسمت لزم خصله من شعري وباسها وضل يباوع عليه وكال

نواف:تدرين شكد احبج

_شكد

نواف:بكد حب امي لابوي وبكد حب ابوي لامي وبكد حب ابويه النه انا واخوتي وبكد حب البنات الج وبكد حقارتج من خليتي كحل لعيونج وحركتي قلبيييي

ضحكت وهو هم باس حنجي سئلته على عمو حيدر وكال ان هو بخير الف الحمد لله والشكر وهسه بدو اله علاج فيزيائي اليوم اني عندي فحص ورحت المستشفى اني ونواف طلعت كل فحوصي نضيفه وماكو اي شي يخوف وفرحت بهل شي الف الحمد لله وطلعنه من المستشفى اتصلت سمره بيه تعتذر مني على البارحه وبقيت اسولف واضحك وياها فهمتها مزعلانه منها خلصنه اليوم بس اني ونواف رحنه وتسوكنه قيامه أغراض وهدايه للبنات وعمه وعمو حيدر ورجعنه نوب متت فرح تسوكت لعلياء أغراض البيبي جنت فرحانه كلش واني اتسوك الها واشتريت كم قطعه الي بحال الله رزقني بطفل ثاني وهاي مرت الايام رجعنه لبغداد عمو حيدر بس شافني عيونه نترست دموع حضنته وهو يضحك وحالته الصحيه الف الحمد لله والشكر يوم بعد يوم تتحسن فرحو البنات بالهدايه لجبتها الهم وجان نواف بين يوم ويوم ياخذني يطلعني لمكان هو يحبه ب الديره تغير لدرجه مو طبيعيه هادي ومبتسم وجهة بشوش بحيث مرات من احجي وياه واكله لا تجبر نفسك يكلي اول مره بحياته مرتاح من كل القيود ويحس نفسه سعيد ويحمد الله ويشكره على أهله موجودين بصحه وعافيه واني يمه الناس بعدهم يصيحون اله شيخ ومن يحتاجون شي يجون آلة واني اكله ممنوع ترد احد جايك بشغله لو طلب واما علياء تكوم وتكعد تحمد الله بالبدايه جانت متطلع من غرفتها ومن تشوفني احسها يحز بقلبها هي حامل واني ابني راح لحد ما بديت اني يوميه افوت الها وازعجها و وضحت الها ابد ما مقهوره بسبب هي حامل لان هذا الله كاتبه النه والله فرحانه الها من كل قلبي وبطنها صارت طوبه ملاك طايره من الفرح لان راح يجيها اخ وموسى روحه من الدنيه بيه مرات يجي ينام يمنه ويسولف الي على سعد ويكلي راح يرجع للبيت وهو مسافر ويه عمو واضحك على سوالفه جنت نايمه من حلمت بحسين فرحان وسعد بحضنه بالحلم فرفح قلبي عليه وبس ابجي وأريده لسعد بحضني وحسين يكلي رجعي للبيت منتضريج واني اتوسل بيه وميقبل ينطيني اياه مشيت وراه وصاح بعصبيه عليه وكلي ارجع للبيت منتضريني ويه نواف فزيت من النوم كل جسمي يرجف اليوم عندي فحص علمود راسي صار شهرين من آخر مره فحصت نفسي فتت سبحت نواف ماكو ليش مكعدني بدلت وخلصت احس نار بجسمي وعظامي مكسره صارت عندي خربطه بالهرمونات بسبب الادويه والدكتوره كالت عادي بس اخلص العلاج مال راسي أكدر ابدي اعالج الهرمونات وانظمها هل شي مراح يأثر عليه وإكدر اصير حامل هل شي طمني جان اتصلت بنواف وجاوب من ثاني دكه فردت اشاقه وياه وكتله

_هاااا هاملني ومن ثاني دكه تجاوب وما كعدتني من رحت للشغل

نواف :تليفوني بيد عيسى واليوم ما رحت للدوام لان عندج فحص وما اريد اعوفج بوحدج ترحين وثالث شي ما كعدتج من النوم لان البارحه تأخرتي بالنومه وردتج ترتاحين حته اليوم نطلع نتونس سويه وكذلك اليوم حسبت رموش عيونج وانتي نايمه

جاسم:كافي تتغزل بيها اصعد فوك الها وفض الموضوع

ضحكت وكحيت وكتله نواف وقبل لا اكمل الدنيا افترت بيه وما حسيت بشي... فتحت عيني واني بالمستشفى اجتي الدكتوره وطمنتنتي الكل جان بره وبدأت تسألني اخر مره اجتني الدوره اخر مره نمت يم زوجي وكلت الها مايصير عندي حمل لان هرموناتي متخربطه وشرحت الها حالتي قلبي يوجعني الورم احتمال رجع الي الدكتوره ضلت بحيره وطلبت من مساعدتها جهاز السونر رفعت بلوزي وخلت شي سائل تذكرت ايام حملي بسعد عيوني نترست دموع وضحكت الدكتوره وجانت مريه جبيره وكالت

الدكتوره :بنيتي صلاه النبي انتي حامل بتلث أطفال تلث قلوب تنبض داخل رحمج كعدت ومسحت بطني وكتلها واني ارجف

_لا تحجين شي لا تكولين شي ومسحت دموعي وجسمي كله يرجف وطلعت وحضني نواف بسرعه وجاسم جان موجود وكال للدكتوره شكو وكتله بسرعه

_ماكو شي بس شويه ضغطي والحمد لله مر الموضوع بخير والدموع تنزل من عيني وكال

نواف :ساره شبيج لا تخوفيني شصاير وياج

_لا لا ماكو شي بس خفت من تخربطت ان الورم لو شي

جنت احجي بغصه وصوتي يرجف ضحك ورحنه فحصنه وحللنه وحالتي مابيها شي رادني اطلع وياه بس كتله تعبانه وأريد ارجع البيت سلمت على الكل وصعدت بسرعه بس ردت افوت للغرفه ما كدرت اسكت انهاريت بالبجي نزعت الحجاب وحذائي والستر فات نواف مبتسم وكال

نواف:جنج ناسيه اليوم عيد ميلادي

ومن شافني ابجي مشه بسرعه وابتعدت عنه ودرت وجهي وأمسح بدموعي وضل صافن عليه وكتله

_اسفه

نواف :تره من تخربطتي لحد هسه جسمي يرجف لا تسوين هيج بيه ليش حالتج هيج سويت انا الج شي وضوجج تره والله وداعه امي وابوي ما كعدتج لان حسيت بيج تعبانه

زدت بالبجي وبس كتله بغصه واشهك بالكوه احجي

_اسفه بس اذا ماتو نفس سعد شون

نواف :شنو ساره شبيج منو يموت لج بابا فهمي بنيه قلبي تعالي تعالي بويه باباتي والله مابيج شي وصحتج بخير وانا هم وأهلي الله الحافظ لا تضلين خايفه تره هذا حرام ثقي برب العالمين شويه

حضني لصدره وضل يضحك وباس راسي نوب زدت بجي من خوفي ولزمته كل قوتي وكتله

_اني حامل بتلث جهال

نواف :اي مو أرنب هو خلي يجي واحد والله كريم نفكر بغيره

ما حجيت شي وشهكت وبعد نواف عني بس ضل لازم زندي وكال

نواف:تحششين عليه مو

هزيت براسي ضل صافن بوجهي هد ايده ورجع ليوره كعد بالكاع فزيت عبالي تخربط ركعت يمه وكال نواف بجديه مو طبيعيه لدرجه رجف كل جسمي

نواف :هذا الموضوع مو مال تضوجيني بيه لان سويت شي ما حبيتيه وما كعدتج كتلج والله تليفوني يم موسى

_وداعتك وداعه حسين وسعد هذا الي كالته الدكتوره اكو نبض ل تلث جهال وخايفه خايفه يصير شي خايفه انحرم منهم شسوي نواف

ضحك نواف وضحكته زادت لحد ما بده يبجي وركع بالكاع وخله راسه على الكاع وضل يكول (الحمد لله الف الحمد لله والشكر ربي) كعدت بصفه وخليت ايدي على راسه وضليت احركها وابجي وكال

نواف :لا تخافين الله عوضنه

_واذا

نواف :لا تكولين واذا كولي ان شاء الله الله يخلينه نشوف أحفاد احفادنا لا تعترضين ولا تشكين بأمر الله كاتبه النه الله عوضنه

رجعت بجيت حضن وجهي بثنين اديناته جان يبوس شفتي كل قوته وكفني وباس اديناتي وهو يضحك شون الطفل ونزلني على كيف ويريد يشيلني ما قبلت وصاح عليهم كلهم يم عمو حيدر وضليت خاتله وراه واجوي يركضون و جاسم وجهة اصفر جان بس شاف نواف مبتسم اطمئن وعباله بيه شي وعمه كالت

رسميه :يمه احجي نشفت ريجي شكو صاير شي خير

نواف:يمه كل الخير صاير بنيتي ساره حامل بتلث جهال

كلهم ضلو صافنين من بجت عمه رسميه بجيت ما تحملت والبنات هلهلن شفت عمو رفع ايده للسمه وكلهم ضحكو وصيحو وعمه رسميه تشكر رب العالمين واشر الي عمو حيدر اقترب بست ايده وخليتها على كصتي وحضنت عمه رسميه ضلت تضحك وتدعي الي واجوي البنات كلهم فاتو بحضن عمه رسميه ....

اكتشفت السعاده هي مو شي نشتريه من السوك السعاده مو فلوسي السعاده الحقيقيه هي السعاده الي تطلع من داخلنه هي الشعور بالشكر لكلشي الله انطاه النه واكتشفت الله ممكن يأخر شي حته ينطي بوكت الكل محتاج بيه فرحه ... مثل ما صار لعلياء من اكتشفت هي حامل بعد محاولات هواي فاشله و اكتشفت ان الفلوس مو كلشي مهم بالحياة مثل قصه زينب ونبيل زينب فقيره بس الله اغناها واغنى نبيل من تزوجو ونبيل البنيه الي جان يحبها جانت غنيه بس اخر شي سمعناه اطلكت من رجلها لان جانت كلش تعيسه وعرفت المضاهر ممكن تنخدع بيها مثل قصه سيف وهند سيف الإنسان الشقاوجي الي بنات الكليه ماتو عليه وجان الكل يسميه ابو النسوان هلكد ما عنده معجبات اتضح اول حب واول بنيه فاتت بحياته هي هند وعرفت الأحلام ممكن تتحقق بس يحتاج الها صبر مثل حلم ملاك الي حققته ودخلت طب عام بالسنه الثانيه الها بالسادس جابت معدل 100 بحيث كلنه كلنه حسينه بفخر وهديتي وهديه عمها نواف جانت سياره باسمها اخر موديل وتعلمت مو كل شخص يجي غريب ضيف النه لازم نثق بيه لان حلف النه بالله معناها نصدكه ونكرمه مرات الكرم الزايد يأذينا ويخرب حياتنه واخر شي تعلمته الله ممكن يحرمنا من شي لان ضام النه شي احلى وشي راح نفرح بيه زياده....

اما

سمره تزوجت وصارت حامل وعمر خطب كل ما نروح لبغداد نمر عليهم عمر ونواف صارو أصدقاء ومقررين يفتحون مشروع مشترك اما علياء صار عدها ولد وسمته حسنين وهند وسيف بعدهم على دعاء و زينب ونبيل نفس الحاله على موسى بس زينب رجعت تدرس وتمتحن خارجي وكلش شجعها نبيل على هل شي وملوكه صارت سنه اولى طب اما اني ونواف الله رزقنه ب حيدرا اول طفل طلع من بطني و غيث الطفل الثاني و فدك بنوتتنه الصغيره والاخيره وهسه عايفتهم على ابوهم ومنهزمه منهم كاعده ب الحديقه...

نواف:لج بنيتييييي تعالي راح اهج والله تعالي اخذيهم

رسالتي الاخيره الكم
لا تيأسو من رحمه الله حته اذا اختبركم بشي عزيز على قلبكم لان صدكو رحمه الله تسع الكون كله خلي ثقتكم برب العالمين كلش جبيره لان يجي يوم وراح ينجبر كل كسر بقلبكم....

تم النهايه

🦋🦋🦋🦋🦋🦋🦋🦋🦋🦋🦋🦋🦋🦋🦋🦋🦋

يا اجمل عطايه الله
يا احلى شي صار بحياتي وبايامي يا سعاده ايامي انتو شكرا الكم

شكرا لان اخذت من وقتكم وقريتو القصه وعشتو ويه الابطال
شكرا لكل كلمه حلوة خلتني افرح
شكرًا لان انتو جزء من حياتي

اسفه اذا بدر شي محلو مني
واسفه لان شويه تاخرت ب التنزيل بس جنت محتاره شون ممكن اختم هل قصه وياكم وشنو النهايه الي تليق بيكم

احبكم 💙🦋يا فراشاتي