رواية عشگ الفرات ( عِندما تَهوى القُلوب ) الفصل الأول 1 - بقلم سحر الدليمي

مَــشـهـــد ( ١ )

عشق : وين تردين توصلين ماما ؟!

بدور : آني قررت

عشق : شقررتي ؟

بدور : نروح لخوالچ بالأنبار نستقر يمهم هناك تشو بيت و عدنه هناك و گرايبنه كلهم هناك يعني راح نأمن

عشق : شنوو ماما ؟! شلون ترديني أعوف بغداد هنا ذكريات طفولتي و ذكريات بابا شلون اعوف بغداد ماما شللووون !!

بدور : بنتي أعرف صعب عليچ بس صدگيني من نروح للأنبار راح تحبينها و تتعودين عليها

عشق : ماما شلون اتعود عليها شلووون آني حتى خوالي ما أعرفهم أسمع عنهم منچ بس

بدور : بنتي آني أخذت هالقرار علمودچ انتي لأن أفكر بيچ و بمستقبلچ اريد أمن عليچ عشق ماما افهميني
باچر من تروحين للجامعة أطلبي نقل للأنبار علمود نكمل بسرعة و نمشي

گامت ماما و طلعت و آني بقيت مصدومة و ضايجة لليل بعدين فكرت بكلام أمي كله صح أحنه هنا وحدنه ماعدنه سند و خوالي على حسب حچي ماما كلش يحبونه

***

مَــشـهـــد ( ٢ )

طلع عمو بكر و الكُل طلعو وياه بقو الولد سجاد و شهم و فرات گاعد
تقدمت عليه و آني بالگوة مسيطره على دموعي و ما نزلن ، حچيت بصوت بيه رجفه ..

- الحمدلله ع السلامة فرات

- الله يسلمچ

- آني آسفه كله بسببي

- ليش أنتِ شعليچ مُهره ؟!

- مو عباس شافني وياك من گعدنه بالحديقة نحچي و ضاج من هالشي

سجاد : چا قابل گاعده ويه واحد غريب هذا أبن عمتچ

شهم : معودين هذا عباس يخوط بصف الستكان ماعليكم بيه

ورا شوية بابا گال نرجع للبيت و ناخذ فرات ويانه عمو بكر ما قبل گال يبقى يمي بس بابا گاله يرجع عباس و خاف تصير مشكلة ثانية و مابينه حيل فرات يجي يمنه أحسن
فرحت لأن حيضل گدام عيني و أتطمن عليه ع الأقل أحاول اهتم بيه

***

مَــشـهـــد ( ٣ )

- أي شيخ فرات ، يلا أحچيلي

- شحچي!

- شوكت تتزوج؟

- سد الموضوع شهم

- لا ما أسده فرات ، لك ياخي غلط اللي دتسوي غلط و حرام بحق نفسك

- دحگ شهم آني جاي أحاول أنسى الماضي و أطلع منه ، بس ياخي سالفة الزواج ما أحبها ، ماريد أتزوج

- و هذا الشي دليل على انك مجاي تنسى الماضي و مجاي تنساها ، فرات أنت على منو دتضحك على نفسك لو عليه؟ ، ولك آني أعرفك أكثر من نفسي!

بدت تظهر ملامح القهر على وجهه ، سكت و زفر هوى قوي و بحسرة و رجع ظهرة ليورا ، حط أيده على رُگبته و صار يباوع ليساره ، رجع يباوعلي و حچه ..

- أي شهم أي ما ناسيها  و حق لا اله ألا الله ما ناسيها ، ياخي جربت انساها بس ما گدرت بكُل مره أحاول أنساها أفشل ، صورتها ما جاي تفارگ خيالي و صوتها لهسه يرن بمسامعي والله ، يول أنت تدري آني باليوم جاي أموت ألف ميته على فراگها ، صح تشوفني أضحك و اسولف بس بداخلي نار مشتغله ، 4 سنوات 4 ضبط صارلها من توفت و آني ليهساع أحبها و أتمناها ترجع

***

مَــشـهـــد ( ٤ )

رُسل
يومي كُله گضيته بالغرفة ادحگ على مكان صگر و أشوف ملابسه و گمت أبچي بچيت هواي لحد ما غفيت ، بين گاعده و بين نايمة تقريبًا أحس باللي يصير حواليه ، حسيت أحد فتح الباب و دخل ، ما أهتميت أكيد هاي عشق أو ريان جن يشوفني ، فجأة سمعته يناديني آني من سمعت صوته فز گلبي ، هذا صوته يا ألله شگد مشتاگه أسمعه ، خفت لا يطلع هذا حلم ، بسرعة أنداريت و گعدت على حيلي ، صارت عيوني بعيونه ، يدحگ عليه و هو مبتسم ...

- صگر!

- يـ روحه

- جيت؟!

- أي يگلبي

- خاف آني جاي أحلم!

- لا حياتي ما جاي تحلمين آني جيت

بسرعة أرتميت بحضنه و هو حضني ، و آني حضنته قوي أحس لو بيدي أدخل بين ضلوعه ، حاضنته و أبچي وأشاهگ ...

- هسه ليش تبچين يا عُمري!

- متت بغيابك والله صگر أنتهيت ، من گلت راح تروح لـ ديالى و آني گلبي ما مرتاح و حاسه راح يصير شي موزين و طلع أحساسي بمكانه ، لا تروح بعد حبيبي لا تعوفني و تروح تره أموت وراك والله

- أششش كافي يا عيني لا تبچين مو نعلتي سلفه سلفات گلبي

***

مَــشـهـــد ( ٥ )

- خير سلوى رايدة شي؟

- ليش رجعتي نجاة؟

- أنتي أللي ليش رجعتي مو آني ، ليش أبتعدتي عن أهلي و هسه رجعتي؟

- بسببچ أنتي

- آني؟!

- اي أنتي ، مرتاحة ويه علي مو ، عايشة بسعادة و خلفتي منه ، و آني حال الظيم حالي كُل هالسنين ما نسيته لحظة وحدة

- أنتي شجاي تحچين سلوى!!!

- تزوجتيه و أنتي تدرين بيه شگد أحبه و رغم هذا طعنتيني بظهري و أخذتي مني

- آني ما طعنتچ بظهرچ ، من الأساس هو ما رادچ و لا چان ألچ ، و أنتي تعرفين كلش زين انو أحنه نحب بعض ، و ياريت تسدين هالموضوع لأن أحنه كُبرنه على هالسوالف

سكتت شوي ، بعدين تقربت مني و همست بأذني كلام وترني و خربط أحوالي ...

و لـ هنا خلص أعلان الرواية🌞💜
أكتبولي شنو رأيكم بالأحداث؟ ، إذا شفت تفاعل  ع الأعلان أنزللكم البارت الأول قريبًا جدًا هيچ متحسون ألا و البارت نازل😂😂 ، هاي إذا شفت أكو تفاعل يعني🙂 ، المهم شاركو الأعلان ويه اللي تعرفونهم هيچ أريدكم تفجرونه بعد گلبي أنتو

ملاحظة : الرواية خيالية و ليست حقيقية ، أقتضى التنويه .

نلتقي بالبارت الأول أن شاء ألله

صديقتكم سحر الدليمي ♥️🦋.