رواية عشگ الفرات ( عِندما تَهوى القُلوب ) الفصل الثاني 2 - بقلم سحر الدليمي

بدور : يمه عشق يلا گومي راح تتأخرين على دوامچ

عشق
چنت نايمه و حسيت على صوت أمي و هي تگعدني مثل كل مرة مستحييل أگدر أگعد وحدي أذا ما ماما هي تگعدني ما أحس لو يطگ مدفع يم راسي ، اسمعها و هي تحاچيني بس غلست ما رديت بلكت تعوفني أنام

بدور : يلا ماما عشق گومي مو فطرتي گلبي

عشق : يوم اليوم عطلة خليني أنام عفيه

بدور : ول عطلة شنو يمه گومي اليوم ثلاثاء گومي ماما

عشق : أوووف گمت گمت
صباح الخير حُبي

بدور : صباح النور بنيتي يلا گومي غسلي و بدلي و تعاي تريگي

عشق
گمت دا أغسل وجهي و ماما راحت تسوي ريوگ
اووف والله أكره الگعده من الصبح و الدوام لعبان نفس هسه هم اروح أگابل وجه هذا دكتور حسن وجهه يطرد النعمة من الصبح
كملت غسول و رحت لغرفتي بدلت و لبست لبس رسمي يعني جامعة و كذا احب ألبس هيچ
لبست بنطرون بنفسجي فاتح شوية عريض و فوگاه ستره مالته بنفسجي و لبست شيلة لونها شوندري مدري بيتنجاني يعني هو راهم ويه البنفسجي الفاتح طلع التنسيق فد شي
حطيت مكياج خفيف ما أحب أطوخ شلت جنطتي و كتبي و نزلت جوه لگيت ماما توه مكمله الريوگ و دتصيحتي

- وااااو بيض عيون أموووت عليه

بدور : اليسمعچ يگول اول مره تاكل بيض عيون دگعدي يلا أگعدي

كعدنه نتريگ آني و ماما كملنه و طلعت ماما حتى توصلني للجامعة لأن مترضى تخليني اصعد ويه التكاسي وحدي حقها لأن هذوله أهل التكاسي يلعبون النفس
طلعنه و أخذنه تكسي و رحنه للجامعة آني نزلت و امي رجعت للبيت
أول ما دخلت الجامعة تلگتني نور الأبتسامة من الاذن للأذن هاي البنيه على كلشي تضحك شگد فاهيه يربي
هااا طبعاً هذا اول يوم دوام بالمرحلة الأخيرة اووف يعني راح أخلص

نور : هلووو عوعو شلونچ

عشق : أهووو انگلبتلي ديچ من الصبح لچ ماما كم مره كايلتلچ لا تدلعيني هيچ

نور : هههههه شسوي شدلعچ لعد

عشق : أي شي بس مو عوعو خبله أنتي لو شنو

نور : هههه أي خبله ، لچ يلا أمشي هسه تبلش المحاظرة و أحنه ماكو و هذا حسن يشعل جد جدنا

عشق : اي والله أمشي مابيه حيل رزايل كافي عليه رزايل أمي من الصبح

رحنه ركض للقاعة دخلنه و الحمدلله بعده مو جاي بس الكل چان موجود رحنه گعدنه بأماكننا و شوي أجه دكتور حسن و بلشت أكثر محاظرة أكرها أوويلي هسه شيخلصها
مر الوكت و هو يشرح و آني على شوي أنام من گد ما منعسه البارحة تأخرت بالنومه رچيت راسي ع الكرسي و غفيت شويه و حسيت على صوت نور ..

نور : عشق هييي نمتي يا عزاا لچ گعدي

عشق : ليش أنتي تخلين احد ينام

نور : لچ أگلچ شفتي الفستان الجديد اللي گتلچ عليه البارحة نزل خلينه نروح نشوفه فدوة

عشق : لچ سُكتي شبيچ أحنه بالمحاظرة و جاي تحچين بالملابس

نور : ماا ماااا عفيه خل نروح

قاطع حديثنه صوت دكتور حسن الحاد اووويلي شكله أنتبهلنه

دكتور حسن : أنتن شكو تتهامسن وين گاعدين أحنه

نور : هاا لا دكتور مچنه نحچي أحنه بس هذا ..

دكتور حسن : تفضلن طلعن بره

عشق : دكتور أحـ ...

دكتور حسن : گلت برهههه

گمنه آني و نور طلعنه خارج القاعة

- أرتاحيتي هسه من وراچ أنطردنه

نور : اووووي و هسه و اذا انطردنه يعني أمشي نروح للكافتريا آتي جوعانه

عشق : أوووف منچ اوووف

رحنه للكافتريا و اكلنه و بعدين أستمرينه بالمحاظرات و مشى اليوم طبيعي مثل كل مرة
أجتي ماما و رجعنه للبيت
تغديت و لفيت راسي و نمت گد ما تعبانه و نعسانه وقتت الفون ع الـ 3:30 علمود نروح آني و نور للسوگ

دگ الفون و گعدت رحت توضيت و صليت و نزلت على ماما حتى أحاچيها علمود الطلعه نزلت لگيته بالصالة دتباوع برنامج ديني ، گعدت يمها

- أحم أحم ماماتي

بدور : خير عشق گولي شتريدين

عشق : أأأ شسمه ماما هو آني

بدور : أحچي ماما شبيچ شتريدين

عشق : ماما نريد نروح آني و نور للسوگ فدوه وافقي خليني أروح

بدور : ماكو روحه عشق

عشق : فدوووه ماما عفيه والله منتأخر

بدور : بنتي ما أگدر أخليچ تروحين بالتكاسي مو أمان ماما

عشق : لا لا ماما مو بالتكاسي أبوها يوصلنه و بالرجعة هو هم يوصلنه

بدور : شوكت تريد تروحن

عشق : هسه فد شوية

بدور - زين روحي بس ماكو تأخير

عشق : يمممه فدوووه حاضر تدللين تريدين أجيبلچ شي وياي

بدور : لا حبيبتي ماريد بس لا تتأخرين

عشق
عفت أمي و صعدت دزيت مسج لنور أنو راح أتجهز و من اكمل أخابركم و تجون
لبست ملابسي و تحضرت و كملت كلشي خابرت على نور و گالت جايين بالطريق ورا شوية و وصلو
نزلتلهم و طلعنه للسوگ
كملنه كلشي عادي و نور كالعادة زهگت روحي ميعجبها العجب
أخيراً أقتنعت و أخذت فستان وردي فاتح طويل مخصر يجنن
و آني أخذت فستان بنفسجي يشابه لفستان نور
أحب البنفسجي لذالك اخذته هاللون
كملنه و رجعنه نور گالت لأبوها راح تبات يمي اليوم و قبل
وصلنه و راح
دخلنه للبيت و آني جسمي مكسر من گد ما افتريت ويه هاي المطيه نور
گبل ذبيت كلشي و گعدت ع القنفه

بدور : شبيچ يمه جنچ السكرانه

عشق : يمه فحطت تكسرت من ورا هاي نور بس تفتر بيه

نور : اهووو والله أنتي چنچ العجايز ما تتحملين تمشين خطوة منا لهناك

عشق : بس خل أرتاح آني ألچ

ورا شوية گمنه نسوي عشه آني و ماما أتفقنه نسوي برياني
آني حضرت شغلات البرياني و بديت أشتغل بيه و ماما بدت تثرم بالزلاطة و جتي نور علساس تساعدنه و هي بس تفتر و تسولف
كملنه و بعدين حطينه العشه و تعشينه چان كلش طيب طبعاً شغل أيدي فديتني
كملنه عشه و نور بدت تغسل المواعين و آني أنظف المطبخ و ماما راحت دتابع مسلسل بالصالة
كملت و چان يدگ فوني و چان رقم غريب ما مسجل يمي ماما منبهتني ما أرد ع الأرقام الغريبة بس آني الفضول حيكتلني منو هذا حرگ الفون و هو يتصل فتحت خط و ما جاوبت و بالمقابل هم محد جاوب أنتظرت ثواني و محد جاوب و سديته و شمرته ع الكاونتر أستغربت منو هذا
كملنه آني و نور و ماما گالت تعبانه حتروح تنام و آني و نور صعدنه لغرفتي حتى نشوف الغراض الجبناهن

عشق : أگلچ باعي هاي الدگمه مو مشلوعه

نور : شو أشوف ، لا ولچ هاي هي هيچ

عشق : وچ ما أنتبهت دايخة عبالي مشلوعه وگع گلبي

نور : يلا تعاي خل أحطلچ مكياج

عشق : مكياج شنو لا ولچ مالي خلگ

نور : انچبي تعاي خنشوف يا لوك يرهم ويه الفستان دتعاي

سحبتني نور و بلشت تلطخ على وجهي مكياج و آني هم حطيتلها مكياج كملنه و وگفنه نباوع على نفسنه بالمرايه فدووة طلعنه چنه أميرات هههههه
نزعنه الفساتين و مسحنه المكياج بعد سهرة جرت لنص الليل يعني باچر لو نگعد لو ما نگعد اوووف كله من ورا نور عود آني أخذت عهد على نفسي أنام من وكت
ذبيت نفسي ع الچربايه و نور بصفي نمنه و ما حسينه على شي .

***

فرات
چنت گاعد بالصالة مو جايني نوم ساعة أگلب بالفون و ساعة أدحگ ع التلفزيون
جت أمي گعدت گبالي ع القنفة أستغربت أمي بهالوكت تكون نايمة شگعدها

- يوم خير شو گاعدة أكو شي ؟

نجاة : هااا لا ماما ماكو شي بس ما جايني نوم و شفتك گاعد گلت أجي أگعد وياك

فرات : أي زين ، أگلچ يوم اليوم خابرني خالي سألني عليچ يگول جاي أدگ عليها متجاوب

نجاة : هااا والله مدري يجوز ما سمعته

أنتبهت لأمي مو على بعضها وجهها اصفر و عرگان و بالكوة تحچي خفت عليها

فرات : يوم بيج شي ؟

نجاة : لا حبيبي مابيه شي بس اليوم تعبت بالدوام و هسه ما جايني نوم لذالك وضعي مخربط شوي
آني راح أروح أحاول أنام

فرات : اي زين تصبحين على خير

رجعت دنگت راسي أگلب بالفون و أمي گامت من يمي
فجأة حسيت بحركة رفعت راسي و شفت أمي واگعة بالگاع و ما تتحرك هنا أحس گلبي وگف ركضت عليها و صرت أگعدها و أصيح

- يوووم يمممه شبببيييچ يممه اگعدي يمهههه فتحي عيونچ شووو يممممه شصارلچ

على أثر صوتي العالي گعدو أبوية و رُسُل

رُسُل : ياااا هاي شبيها عمتي

علي : فرات أبني شبيها امك

فرات : ما أدري يابة ما أدري چانت گاعده يمي و گامت و وگعت لحالها

تقدم عليها أبوية و صاح برُسُل حتى تجيبله مي
آني گحزت ليورا و ارتچيت ع الحايط و حطيت راسي بين أديه و آني ما أعرف شسوي للحظة حسيت أمي راح تعوفني آني ما أتحمل فراگ أمي والله ما اتحمل
جاب ابوية مي و صار يمسح وجهه بمي و يكعدها بس ماكو متفعل تصحى

علي : أم صگر تسمعيني نجاة اذا تسمعيني حاولي تحچين شي
نجاااة ردي عليه
فرات فرااات ابني گوم لازم ناخذها للمستشفى

فزيت من مكاني و رحت حضنت أمي و شلتها و طلعت للسيارة و أبوية ورايه
حطيت أمي من ورا و ابوية صعد بصفها سقت السيارة بسرعة بأتجاه المستشفى ماكو شوية و وصلنه دخلنه أمي للمستشفى أخذتها الدكتورة و الممرضات للغرفة و أحنه ضلينه بره
گعدت بالگاع و ما حسيت
فجأة هيچ حسيت الدنيا تريد تطلع من عيني

علي : فراات شبيك وليدي شد حيلك لا تسوي هيچ

فرات : مگدر أبوية هاي أمي أمي شيصير بحالي لو عافتني و راحت

علي : متعوفك فرات متعوفك لا تحچي هيچ ابني ميصير تفاول على أمك هي بس داخت لو صعد عدها الضغط و صار وياها هيچ هسه تصحى و كلشي ميضل بيها أن شاء الله

بالرغم من الحزن و القلق اللي واضح بوجه أبوية ألا أنه جاي يحاول يقويني و ينطيني طاقة إيجابية
شوية و طلعت الدكتورة من الغرفة رحنالها آني و أبوية نسألها عن وضع أمي

الدكتورة : لا تخافون ماكو داعي للخوف هي بس صار عدها هبوط شوية بالضغط هسه حطينالها مغذي و من يخلص تگدرون تاخذونها للبيت و هاي شوي أدوية هم أخذولها ياهن من الصيدلية و أن شاء الله مابيها شي

علي : مشكورة دكتورة

الدكتورة : ولو هذا واجبي

علي : هاا فرات مو گتلك أمك مابيها شي الحمدلله

فرات : اووف الحمدلله يلا يابة خل نفوت نشوفها

دخلنه للغرفة و چانت أمي نايمة جريت كرسي و گعدت مقابيلها و ابوية وگف من الجهة الثانية أخذت ايدها و بستها و خليتها على خدي هاي الأيد اللي كل ما حسيت بهم او أختنگت من شي بلمسه منها أحس كلشي ميضل بيه

علي : فرات وليدي اليشوفك عبالك طفل و ميقبل يفارگ أمه

فرات : يابة للحظة حسيت أنو امي راح تعوفني و تروح

علي : لا أبني لا تحچي هيچ أمك مابيها شي الحمدلله

فرات : الحمدلله

شوي و صحت أمي و چان الحمدلله وضعها تمام صار الفجر و أخذناها للبيت
وصلنه البيت و دخلنه چان الكل گاعد ينتظرنه بالصالة عمي و رافد و رُسُل ألا صگر لأن چان مداوم و محد خابر گاله
رُسُل : الحمدلله ع السلامة عمه خوفتينه عليچ

نجاة : الله يسلمج حبيبتي لا تخافين مابيه شي

جسام : الحمدلله ع السلامة ام صگر ما تشوفين شر

نجاة : الله يسلمك ابو رافد الشر ما يجيك

رافد : عمه خوفتينا عليچ حيل الحمدلله ع السلامة

نجاة : الله يسلمك حبيبي

فرات : يلا يوم خلي آخذچ للغرفة ترتاحين

نجاة : لا حبيبي آني أروح الحمدلله كلشي مابية أنت روح ارتاح تعبت البارحة

فرات : براحتچ حبيبتي

راحت أمي للغرفة و گعدنه كلنه بالصالة چنت حييل تعبان بالكوة فاتح عيوني

- رُسُل بلا أمر عليچ گلاص مي

رُسُل : اي تدلل

راحت رسل و شوي اجت بأيدها گلاص المي أخذته و شربت

- خابرتي على صگر گلتيله

رُسُل : أي خابرت و گتله گال شوي و جاي

- اي زين ، من رخصتكم آني رايح أنام

الكُل : مرخوص

صعدت لغرفتي دخلت للحمام سبحت و طلعت أحاول انام حتى أنسى اللي صار البارحة ذبيت نفسي ع الجرباية و نمت و ما حسيت على شي

صگر
چنت بالدوام و خابرتني رُسُل گالت عمتي البارحة تخربطت و أخذوها عمي و فرات للمستشفى من سمعت هيچ عفت كلشي و ركبت سيارتي و بوجهي للبيت
وصلت و لگيت الكلُ گاعد بالصالة سلمت و سألتهم على أمي و گال ابوية الحمدلله زينة صعدتلها للغرفة حتى أشوفها دگيت الباب ...

نجاة : تفضل

فتحت الباب و دخلت و كالعادة شفت امي فاتحة الشباك و گاعدة گباله تحب تگعد هالكعده هاي
رحت يمها جريت كرسي و گعدت گبالها

- ها أم صگر سمعت بيچ متمرضه

نجاة : أول شي أنت شجابك مو چنت بالدوام

صگر : اسمع بيج مريضة و تريديني أضل بالدوام أنعل ابو الدوام ، المهم شلون صرتي هسه

نجاة : الحمدلله ابني هاي گدامك مابيه شي

صگر : اي الحمدلله ، زين ليش محد خابرني البارحة ع الأقل چان جيتكم للمستشفى

نجاة : ميحتاج نخابرك و نزعجك ماما جانو فرات و ابوك وياي و ما طولنه الفجر طلعنه

صگر : اي زين هسه آني من رخصتچ أروح ابدل و أرتاح

نجاة : الله وياك حبيبي

رُسُل
چنت جاي أرتب بالغرفة و شوي أنظف بيها أنفتح الباب و دخل صگر

- يااا حبيبي شوكت جيت

صگر : قبل شوية

رُسُل : شو ما حسيت عليك

صگر : هههههه شلون تحسين عليه و أنتي هينه بالغرفة

تقدمت عليه و حطيت أدية على صدره و صرت أحچي بمياعه شوي ..

- اممم حبيبي مو گلبي يحس بيك من تكون موجود

صفن عليه شوية و آني هم صفنت عليه و آني رافعة راسي من گد ما طويل و آني قزمة يعني صايرين رقم 10 هههههه
فجأة حاوط خصري بأديه الثنين و دنگ راسه حتى يبوسني و هنا انفتح الباب و دخلت لارين چانت توها كاعده من النوم و الشعر مكفش و شكلها يضحك
بسرعة ابتعد عني صكر و راحلها شالها و صار يلاعبها

صگر : يممه أروح فدوة لبنيتي التوها گاعدة من النوم
أشتاكيتيلي بابا

هزتله راسها بمعنى أي
و صارت تحاول تحچي و تگول كلمة ( جدو ) هذا اللي فهمناه عليها

- خاف عمي گاللها تناديك

صگر : اي يمكن يلا هسه أبدل و اروح اشوفه

**********

يتبع ...

هلو بروهات شلونكم🌞💙
احب أشكركم على تفاعلكم على أعلان الرواية ما قصرتو ، و اللي جايين من التيك توك حياكم الله ، هذا جان البارت الأول بارت خفيف لطيف مابي احداث قوية مجرد بداية القصة لكن أن شاء الله منتظرتكم أحداث تجنن فـ ابقو ويانه .

18.kij
هذا حسابي ع الأنستا تعالو هناك علمود نتفق على جدول للتنزيل لأن عندي 18 بارت جاهزات فـ لازم نسوي جدول للتنزيل ، تعالو ع الأنستا راح انزللكم بالستوري بوكس أسئلة و هناك أكتبولي أقتراحاتكم للجدول و شلون تريدون التنزيل ♥️.

سحر الدليمي