رواية عشگ الفرات ( عِندما تَهوى القُلوب ) الفصل الحادي والأربعون 41 - بقلم سحر الدليمي

لا تنسون التصويت و التعليق بين الفقرات ضروري جدًا ، قراءة مُمتعة 💜

*****

شهم يگول :

- أللي فگد له شخص غالي ، لا بد ما يسهر ليالي
مثلي أنا كل ليلة حالي ، أبكي عليه لا مِن طَريته

*****

صاح على واحد من الولد ينطي علاگة سوده ، أنطاني ياها و حچه ...

- لگينه هذا الثوب بدائرة أختفاء البنيه ، الثوب ملطخ بالدماء و بي أكثر من أثر لطعنات سكين ، شوفو إذا چان ثوب بنتكم لو لا

العلاگة بين أدي و أبوي و عمي يگلولي أفتحها ، بديت أفتحها و آني إيديه ترجف ، ما گدرت أفتحها نطيتها لـ عمي هو يفتحها ، أخذها و فتح العلاگه و طلع الثوب كله دم ، ذبها بالگاع و لطم على گصته ، عاينت زين للثوب إي هذا ثوبها آخر مَره شفتها بيها چانت لابسته ، أحس أذاني بعد ما أسمع بيهن عيوني غوشن أنصدمت ، لا لا مو أنصدمت أنصعقت ، أعاين لـ عمي يبچي ، أبوي يبچي ، سجاد يبچي ، يعني شنو مُهره ماتت؟ ، أبني اللي ما لحگت أشوفه و أفرح بي مات؟ ، لا لا ما ماتت شمالك شهم أصحى ، أنداريت للضابط ...

- شنو يعني ماتت؟

- الله يرحمها و يصبركم

سمعته گال هيچ و آني تخبلت صرت أصيح و أضرب بالميز ...

- شججاااي تتتحچييي أنتتت ، لااا تگوول ماااتتت مااا مااتتت مُهررره مااا ماااتت

گام أبوي و أجه عليه صار يحاول يهديني بَس آني فقدت بَعد ما أحس بشي ...

- بوووية جااي تسسمععههه شييگووول؟؟ ، مُهرره مااا مااتت ، وييين جثتهااا إذذذااا مييتتههه ، يااابة چذاااب والله چذاااب

حضني أبوي و هو يبچي ...

- يابة و العباس ما ماتت چذاب ، چذابين كلهم ذوله بوية چذااابين والله

- أشش خلص وليدي لا تسوي هيچ ميصير ، أدعيلها بالرحمة

وخرت عنه و صحت ...

- أدعييلهاا بالررحمةة شنوو ، بووية جاي أگللك ماا ماتت ماا ماااتتت ليش ما جاااي تفهمووني

- زين زين وليدي ، أمشي نروح يلا

طلعنه نمشي بدرب البيت بَس آنـه متيه دربي ، عقلي يگلي ماتت لازم تتقبل الموضوع و گلبي يگلي لا ما ماتت مرتك و أبنك عايشين ، و ظليت بين عقلي و گلبي المجروح بفراگها

***

فرات
طول الطريق عشگ حاطة راسها ع الجامة و صافنه ، وصلنه المستشفى و نزلنه ، جاي نمشي تا نفوت و ما أحس أله عشگ واگعه بين أديه ما تتحرك ، تخبلت من شفتها هيچ ، شلتها و فتت للمستشفى صحت الكادر الطبي و دخلتها لوحدة من الغرف ، دخل الدكتور و گالي أطلع ما ردت أطلع و أخلي وياها وحده بَس بعدين جت ممرضة و طلعت أنتظر بره ، شوي و طلع الدكتور ...

- هاا دكتور شبيها؟

- لتخاف مابيها سي بَس دمها نازل فـ شدينالها بطل دم

- يعني مابيها شي

- لا

- زين شوكت نگدر نطلع؟

- بَس يخلص الدم و التحاليل أخذوها و أطلعو

- مشكور دكتور

- العَفو هذا واجبي

راح و آني دخلت للغرفة ، لگيتها نايمه و بطل الدم مشكل بإيدها ، ظليت گاعد يمها ، و تقريب الساعة و نص خلص بطل الدم و عشگ صحت ، دحگت عليه و حچت ...

- آني وين؟

- بالمستشفى حَبيبتي

- هاااا

- إي ، الحمدلله ع السلامة

- الله يسلمك

- آني مو من الصبح گتلچ لا تداومين ، أگعدي و ارتاحي

- شسوي فرات عندي أمتحان مهم

- يابة طزز بالأمتحان ، أهم شي أنتِ

- خَلص حَبيبي صارت بعد

گامت تا تفصخ المغذي ...

- أگفي أگفي ، آني أفصخلچ ياه

أخذت إيدها و فصختلها المغذي ، حچت ...

- راح نطلع؟

- إي يلا

گامت و گدتها من إيدها و طلعنه وگفنه يم المختبر ، شوي و طلعت البنيه بإيدها ورقة التحليل ، أنطتها لعشگ و حچت ...

- مبروك حامل

صفنت ثواني ، اللي سمعته صَحيح لو آني متوهم؟ ، حامل شنو !! ...

- حااامل؟؟؟

- إي زوجتك حامل

عشق : شنو حامل؟! ، آني بعدني حَتى ما متزوجة ، دشوفي خاف أكو غلط يمعودة

أحس الدم صعد لراسي ، گمت ما اشوف دربي ، عتيتها من إيدها و رحنه وگفنه بزاوية بعيد عن الناس ...

- شللووون حااامل يووولي ، تخوونينييي مووو؟؟

- هاي شبيك فرات صوتك لتفضحنه

- يوليي مححدد فضحننه غييرچ ، منييين حااامل أحچييي؟؟؟

- هاااي شبيييك تخببلت ، شنوو صدگت بهالسرعة ، أكيد اكوو غللطط

- أكوو غللطط هااا ، هاي تاليهاا عششگ ، لييش هيييچ تسووين ليييش !!

رادت تحچي و جت البنيه ، حچت ...

- أحنه نعتذر منكم صار أختلاط بالاوراق ، هذا مو تحليلچ

فرات : يعني مو حامل؟

- لا مو حامل

راحت و عشگ دحگت عليه ...

- أنت الظاهر بعد لحد هَسه متثق بيه

- عشگ

عافتني و طلعت ، لحگتها و طلعنه للبيت ...

- عشگ آني من سمعت هيچ گمت ما أشوف دربي

- لا تحچي شي فرات ، رجعني للبيت و بَس

- عشگ ..

- ماريد اسمع منك شي ماااريد

دگ تيلفوني ، و طلع سجاد ، جاوبته ، حاچاني و هو يبچي ...

- سجااد هااي شبيييك؟؟ ، بَس على كيفك فهمني شبيك

- مُهره ماتت فرات ماااتت

- شنووو؟!

- و العباس ماتت

گال هيچ و سد التيلفون ، أنداريت على عشگ ...

- مُهره توفت

- شنووو؟!

دارت وجهها و گامت تبچي ، شوي و وصلنه البيت ، نزلنه و عشگ راحت لغرفتها ...

- يممههه ، يووووم

طلعت أمي من المطبخ ...

- خير ماما شبيك تصيح؟

ألتفتت عليها ...

- أحد خابرچ من خوالي و گالچ؟

- محد خابرتي ، ليش شيگلولي؟

تنهدت و جريت نفس ...

- الشرطة مبلغينهم أنُ مُهره توفت

شهگت و لطمت على صدرها و گامت تبچي ، رحتلها ...

- على كيفچ يمه مو هيچ

- ماتت ولك يمه ماتت و هي حامل ، بعدها ما شافت من حياتها شي

- الله يرحمها يمه

- الله يساعد گلبچ يـَ سليمه ، و شهم ، شهم شصار بحاله هَسه ، فقد مرته و أبنه اللي بعده ما شافه بمره وحده

- شهم ملچوم گلبه هَسه ، يحبها و ما يگدر على فراگها ، راح يتخبل والله

- آخخخخ ، سوده عليه ولچ يمه مُهره رحتي بوكت يـَ عمه

على صوت الصياح و ألتمو أهل البيت كُلهم ، أبوية شاف أمي تبچي و جه گعد بصفها ...

- خير نجاة شبيچ ليش تبچين؟؟؟

جسام : شصاير يولو !!

- عمي مُهره توفت

- لااااا ، إنا لله و إنا إليهِ راجعون ، الله يرحمها

صگر : فرات أنت منو گالك؟

- سجاد خابرني و گال

- شهم ، شهم شوضعه هَسه

- ما أدري ، خل أخابره

طلعت بره و دگيت عليه أكثر من مَره و ما جاوب ، رجعت التيلفون بجيبي ...

- شصار بحالك هَسه يخوي

***

شهم و سجاد و أبوه و عمه و لاحقًا كُلهم أچتمعو ببيت سلام ، هُمه گاعدين بالديوانية و النسوان يبچن داخل ، حچه بكر ...

- شد حيلك أبو سجاد هاي منيتها

- حيلي أنهد يخوي ، أنهد ، راحت بنيتي ، غاليتي راحت

- أدعيلها بالرحمة ياخوي و لا تگول هيچ

- آخخخ يا نار گلبي آخخخ

- عباس وليدي ، گومو حضرو للفاتحة

رفع راسه شهم اللي چان طول الوكت ساكت ...

- فاتحة شنو؟ ، جاي أگللكم ما مااتت ماااا مااتتت ، تگلوليي فاااتحة ، أنتوو لييش ما جااي تفهمووني

- وليدي ما يصير البت توفت و لازم نسويلها فاتحة

شهم تسودن ، عاين للميز اللي گدامة محطوط عليه الموس مال أبوه شاله و گام على حيله و حطه على رگبته ، شافو و فز عليه ، حچه ...

- مُهرره مااا مااتت أفهمووو هالششيي ، و فااتحة ماا تصيرلهااا

تقرب من يمه أبوه و صاح عليه ...

- لااا تگررب بووية

- زين زين بوية بَس بهداي و ذب الموس من إيدك

بكر : شهم ، لا تتهور وليدي

- و حگ هو عَلي أذبح روحي گدامكم لو فكرتو تسوولها فاتحة

حاط الموس على رگبته و ضاغط حييل لدرجة رگبته أنجرحت و صارت تنزف ، شافه أبوه و تسودن گعد ع القنفة و صاح على حسين ...

- دخيلك حسين شوفه ، آنـه ما ظللي حيل

تقرب من يمه حسين ، حچه شهم و العبرة واضحة بصوته ...

- عمي أنت تعرف أنها ما ماتت مو؟ ، گللهم خل يلغون الفاتحة و لا يگولون ماتت و يحرگون گلبي

ردله حسين و صوته مبحوح من گد البچي ...

- إي إي وليدي ما ماتت ، أنت أنطيني هالموس هَسه

تقرب من يمه و سحب الموس من إيده بهدوء و أنطاه لعباس ، جره لصدره و حضنه ، و شهم صار يبچي بقوة على چتف عمه ، حاضن عمه بكل قوته و يبچي و يون

گام عليه أبوه ، جره و هزه من چتافه ...

- وللكك شسووويت أننت؟! ، نااويي تذبح رووحك؟؟

شهم مو داير بال لـ كلام أبوه ، و صافن و الدموع تنزل من عيونه ...

- شد حيلك ولك بوية ، الرجال للحمول الثگال و أنت رجال يـَ شهم

- يا حيل هذا الأشده بوية ، آنـه متت خلص روحي طلعت

- أدعيلها بالرحمة يبوي و الله يصبرك و يصبرنه

رفع راسه و صفن ثواني بوجه أبوه ، رجع حچه ...

- لا لا بوية مُهره ما ماتت

- ولك وليدي لا تتسودن البت ماتت خلص مااتت لازم تتقبل الموضوع

گرب من يمه بكر و جره على صفحة ...

- سلام شمالك مو هيچ ، الولد هَسه مصدوم خله ويه الوكت يقتنع

- أنت ما تشوف شلون حالته ، ولك راح يتسودن

- بَس أتركه و لا تضغط عليه

لليل و بدت الناس تجي و تعزيهم رغم هُمه قررو ما يسوون فاتحة وره ما شافو حالة شهم و تهديده بَس الناس أجتهم ، شهم حالته زادت و هو يشوف الناس تجي و تعزيهم ، تسودن و هو يصيح ما ماتت ، آخر شي سلام خله عباس ياخذه لبيتهم بعد ما شاف حالته و وصاه يبقى وياه ، أخذه عباس و راحو للبيت

***

رُسل
گاعده و بحضني أبني جاي أرضع بي ، من وكت ما دريت بـ مُهره متوفيه و آني أبچي ، صَحيح ما عاشرتها هواي بَس أنقهرت عليها بعدها زغيره و فوگ هذا حامل ، دخل صگر و نزع ملابسة و لبس تراك ، جه يمي و زاح الغطى و أنجضع ، أدحگ عليه إيده مرات يحس بيها بألم بَس يحاول ما يبين ، ميدري آني أحس بي ...

- شلون صارت إيدك؟

- زينة الحمدلله

- لا مو زينة ، تره أدري إيدك جاي توجعك ، باچر روح ع الطبيب خل يشوفلك ياها

- إن شاء الله حَبيبتي

ألتفت عليه و حچه ...

- هاي شبيهن عيونچ ! ، باچيه؟

- إي چنت أبچي

- ليش؟

- أنقهرت على مُهره

تنهد بقهر ، حچه ...

- الله يرحمها

- آمين ، راح تروحون على فاتحتها؟

- آني ما اگدر أروح ، منا وضعچ و منا دوامي ، و أبوية عنده شغل هَم ميگدر يروح ، راح يروحون فرات و أمي و أحتمال يروح وياهم عَمي

- و متروح تعزي خالك و شهم؟

- بعدين أروحلهم

دحگ على سيف و هو نايم بحظني ...

- جيبي خل أودي أنومه بفراشه

أنطيته ياه و أخذه ، شمه و باسه ...

- آخخخ يهالريحة اللي ما أشبع منها

أنتبهتله صفن بوجه سيف ...

- شبيك صگر شو صفنت؟

- بالي يم شهم ، خطية ما لحگ حَتى يفرح بأبنه

- والله الله يساعد گلبه و يكون بعونه ، گلبي مفطور عليه

شال سيف و حطه بسريره و رجع أنجضع بصفي

***

سلام أنتظر لحد ما تخف الرجل عنهم شوي ، صعد سيارته و راح لبيت أخوه بكر ، حَتى يشوف شهم ، وصل هناك و دخل لگه عباس گاعد بالصالة ...

- السلام عليكم

گام بوجهه عباس ...

- هلا عمي

- چا شهم وين؟

- نايم بالهول

- شلونه؟

- والله عمي على حاله ، ما حچه و لا كلمة ، و ما أكل شي ، و حَتى جرحه ما قبل يداوي

غمض عيونه و تنهد ، رجع حچه ...

- آنـه رايح أشوفه

- براحتك عمي

راح للهول و دخل و لگاه نايم ع القنفة ، گعد يمه و شاف الجرح اللي برگبته ، مد إيده حَتى يشوفه ، أول ما لمسه فز ، عاين على أبوه ، گعد على حيله و رچه راسه ع القنفة و غمض عيونه ...

- شلونك بوية؟

ما رد عليه ...

- ليش ما مداوي جرحك؟

هَم ما رد ساكت ما يحچي شي ...

گام أبوه و راح جاب تعقيم مال جروح و شاش و لزگ و أجه ، گعد يمه و مد إيده حَتى يداوي بَس شهم أبتعد عنه ...

- خلني أداوي الجرح

- ماريد

- ولك بوية ما يصير ، بعدين يلتهب و تتأذة

- أكثر من ما متأذي هَسه؟

- گرب يـَبوك خل أداوي جرحك

- و جرح الفراگ شيداويه بوية؟

- ربك يداوي يـَ بوية

أستسلم و گرب من أبوه ، داواله جرحه و حچه ...

- چنه متفقين آنـه وياها نسمي الولد الياس

- حلو مو بوية؟

أبوه ساكت و يستمعله ، سكت شهم شوي و رجع حچه ...

- تالي راحو و عافوني ثنينهم

- الله يرحمهم بوية

ألتفت على أبوه ...

- لا ما ماتو بوية

- بعد چم يوم ينولد أبني ، و أصير أب ، أبنك راح يصير أب يابة ، شبيك ما فرحنالي؟

- يلا بوية نام ، أنت اليوم تعبت كِلش

- يابة أنت ليش جاي تعاملني كأني طفل ! ، ليش أحسك جاي تسايرني؟

- لا بوية مو هيچ ، هَسه أنت نام و آنـه راجع للبيت

- أريد أجي وياك

- لا بوية خلك هنا هالفترة أحسن

عافه و طلع لعباس ...

- عباس وليدي خلي عينك عليه

- صار عمي لا تشيل هَم

- هو هالفترة مصدوم ، ما جاي يعرف شيحچي و لا جاي يستوعب اللي صار

- أدري بي والله

- زين بوية آنـه رايح ، ديرو بالكم على نفسكم و إذا صار شي خابرني

- إن شاء الله

***

فرات
گعدت الصبح ، صليت و بدلت و طلعت ، بلكت أگدر أحچي ويه عشگ ، رحت لغرفتها دگيت الباب مرتين ماكو رد ، فتحت الباب شوي شوي و فتت ، لگيتها نايمة ، رحت يمها بستها من راسها و غطيتها و طلعت ، نزلت جوه لگيت أمي و أبوي گاعدين ...

- صباح الخير

- صباح النور

- يابة عمي يروح ويانه؟

- لا وليدي ما يگدر اليوم عدنه شغل

- هاا خوش ، يلا يوم كملي و آني أنتظرچ بره

- إي يمه

طلعت بره ، صعدت بالسيارة و شغلتها و گعدت أنتظر ، شوي و جت أمي ، صعدت و تحركنه ...

نجاة : فرات

- هلا

- ماما صاير بينكم شي أنت و عشق؟

- لا ماما ماكو شي

- لعد ليش وجوهكم ثگال على بعض؟!

- خلاف بسيط و ينحل إن شاء الله ، أنتِ لا تدوخين راسچ

- أبني على كيفك ويه البنيه ، لا تقسى عليها و كون لين وياها ، و دائمًا طول بالك و حاول تتفهمها ، لا تتسرع بشي

- تسرعت و لصت الوضع والله يـَ ماما

- ميخالف كُل علاقة تصير بيها هالأمور ، و أنت من تغلط بادر و حاول تصلح غلطك

- و إذا هي ما جاي تنطيني فرصة؟

- طبيعي هالشي لأنها مزعوجة منك ، خليها شوي تهدأ و تنسى و بعدين روحلها

- إن شاء الله

***

عشق
گعدت الساعة بالـ 10 ، اليوم مالي واهس أداوم ، نزلت أتريگ ، لگيت ماما بالمطبخ ...

- صباح الخير

- هلا ماما صباح النور

- لعد وين البقية

- خالتچ و فرات طلعو للبصرة ، و البقية كلمن لاهي بشغلة

- يعني فرات طلع للبصرة؟

- إي

طالع للبصرة بدون ميحچي وياي !! ، لا و حَتى ما تعب نفسه و گالي آني راح أطلع ، بسيطة آني الك يـَ فرات

***

رُسل
حسيت على باب الغرفة و هو ينفتح ، رفعت راسي و شفت لارين دخلت و راحت لـ سيف اللي بده يتنعوص ، وگفت تدحگ عليه و تحاول تسكته ، دنگت عليه و حاچته بهمس ...

- أشش أشش أسكت بابا و ماما نايمين

من شافته ما سكت صارت تهزله بَس هَم ما سكت ، تقربت من صگر ...

- بابا بابا ، أدعد ( أگعد )

گعد صگر و دحگ عليها ...

- هاا بنيتي شبيچ؟

- سيف يبچي

زاح الغطى عنه و گام على سيف ، شاله و راح ع القنفة و گعد ، لارين واگفه يمه ، اشرلها تگعد بحضنه ، گعدهم ثنينهم بحضنه و صار يلاعبهم بهدوء ، حچيت ...

- و آني مالي مكان بحضنك لو بَس جهالك؟

رفع راسه و دحگلي ...

- أنتِ الأصل أم سيف و مكانچ بالگلب

أبتسمت و گمت رحت گعدت يمهم ...

- شلونچ

- آني زينة ، و أنت؟

- ما زال أنتِ زينة آني زين

- شوكت تداوم؟

- أحتمال باچر

- تعودت عليك دائمًا يمي

- شسوي يا حياتي لازم اروح للقسم ، هاي صارلي اسبوع گاعد يمكم

- تروح و ترجعلنه بالسلامة يـَ نور عيوني

أبتسم و تقرب من يمي و باسني بخدي ، و لارين صاحت ...

- باابااا ، آني هَم بوسني

أنطته خدها و باسها ، و تدحگ عليه و تضحك ...

- آخخخ منچ أنتِ يولَ ضرتي

- هههههههه ، ضرتچ؟

- إي والله متشوفها شلون ، مو يگولون البنيه ضرت أمها

- ههههههههه

***

نَفس
گاعدة بالصالة و أندگ الباب ، گمت فتحته و طلع رافد ...

- أنت مو رحت للشغل ، شنو نسيت شي؟

- لا لغيت الشغل اليوم ، بدلي و الحگيني للسيارة

- ليش؟

- هَسه دبدلي و تعاي يا عيني

- أوكي

راح للسيارة و آني رحت لغرفتي بدلت و شلت جنطتي و طلعت ، لگيته واگف يم السيارة ، صعدنه و مشى ...

- وين رايحين؟

- مالچ علاقة

- خاف تريد تخطفني

- إي أخطفچ احبسچ عادي ، أنتِ خطيبتي

- هَسه دگول وين ماخذني حباب

- بيها مجال تسكتين و تخليني أشوف دربي

سكتت آني ، بعدين رجع گال ...

- شگد متگرگرن أنتن النسوان

- هااا يعني طلعنه بَس أحنه اللي نسولف

التفت عليه و خزرني ...

- تمام تمام حسكت

وره شوي و وصلنه للشط ، المكان اللي جابني عليه قبل فترة ، نزلنه و رحت گعدت ع الكرسي ، حچه ...

- تنتظريني إلى ما أروح أجيب عصاير و أجي ، لو تجين وياي؟

- من المحل القريب لو غيره؟

- لا من القريب

- تمام أنتظرك

راح و آني بقيت گاعدة ، شوي و أجه جاب العصاير ...

- جبتلچ عصير فراولة ، أعرفچ تحبينه

- ياااا و شمعرفك أحب هالعصير !!

- مالچ علاقة حُبي ، يلا أشربي

كملنه العصير و حچه و هو يباوع للشط ...

- بعدچ تحبين الفرات؟

- أكييد ، بَس مو بگد حُبي ألك

ألتفت عليه و أبتسم ، طلع علبة صغيرة من جيب الستره ، فتحها و طلع من عدها سوار ذهب كلش حلو ، أخذ إيدي و صار يلبسني السوار و هو يگول ...

- و آني أحبچ و أعشگچ و أموت عليچ ، البنيه الوحيدة اللي أخذت گلبي و ما رجعته ، أنتِ نَفس ريتي

كمل تلبيسي السوار ، حچيت ...

- كُلش حِلو ، شُكرًا رافد

- لا تگولين شُكرًا

- جديات أشكر ربي ع النعمة اللي نطاني ياها اللي هو أنت ، الله عوضني بيك أنت عن كُلشي فقدته بالحياة ، أمي أبوية أهلي ديرتي ، أنت عوضتني عن كُلشي ، أنت عوضي

- الله يقدرني و أگدر أسعدچ طول العمر و ما أخليچ تفكرين بالماضي ولو للحظة

- ما دام أنت وياي ، الماضي دفتر و سديته

***

فرات
وصلنه لبيت خالي سلام ، نزلنه و أمي راحت للنسوان و آني فتت للديوان ، لگيت خوالي و الولد كُلهم موجودين ، حَتى عبدالله جاي ، سلمت عليهم و عزيتهم ، جرني خالي سلام على صفحة ...

- وليدي فرات طالبك

- أفاااا ، أنت تآمر ما تطلب يـَ خالي

- ما يآمر عليك ظالم يـَ بعد خالك ، رايدك تشوف شهم و تحچي وياه و توعيه ، آنـه أدري بي يسمع منك ، گلبي ممرود عليه ، صارله أيام متسودن الولد لا ياكل و لا يشرب و لا يحچي ويه أحد

- بدون متگُلي والله أريد أشوفه ، بَس هو وينه؟

- خليته ببيت خالك بكر و عباس يمه

- تمام رايحله هَسه

- زين بوية بالسلامة

- الله يسلمك

عفت الفاتحة و طلعت لبيت خالي بكر ، طبيت فرعهم و بعدني ما وصلت الباب و شفت عباس واگف ويه ثنين ولد و مبينين ناس تصيح على ناس ، وصلت و طبگت السيارة و نزلت ، ويه ما نزلت ، صاح واحد من الولد ...

- شللووون يعنيي تبتت؟؟ ، مو بكييفكك عباااس فاااهم

- لااا بكيفييي ، و هااي سواالفكم الطااايح حظهااا آنـه بععدد ماالي بييهااا ، و وجووهكم مااريد أشووفها يلااا منااا

گال هيچ و هد عليه الوليد تا يضربه ، صحت ...

- عننندككك

ألتفت عليه ، وصلت يمهم ...

- ما سمعته شگالك ، يلا منا

- و أنت ياهو مالتك ولك؟

- هيچ بكيفي ، يلا أشطح منا

- أممم بكيفك ، چا تعال أعلمك الكيف شنهو

جرني من هدومي و راد يضربني بَس دفعته ، الحاصل أنچتلو چتله مرتبة و راحو ، بَس عباس حصل ضربه و وگع بالگاع ، رحتله مديتله إيدي و گومته و هو صافن عليه ...

- شبيك صافن؟ ، شنو أول مره تشوفني

- لو ما أجيت و فزعتلي چان ولوني ، ما أنسالك ياها هاي

- شوف تره آني تلعب نفسي منك و من سوالفك ، بَس لو ما خالي بكر واگف بعيني لأن أدري بي يتأذة إذا صارلك شي ، چان خليتك أنت و شلتك العفطية تتذابحون

- آنـه تركتهم و عَلي ، سامحني فرات ، أدري غلطت بحقك و تجاوزت عليك و أذيتك ، چنت مسودن و هَسه صحيت

عفته و مشيت تا أطب للبيت ، لزمني من إيدي ...

- عليك العباس سامحني

ألتفتت عليه ، ما هان عليه أظل مخاصمه ، ما دامه عرف غلطه هاهيه بعد ...

- يول أنت تظل أبن خالي من دمي و لحمي ، حَتى لو مذاهبنه تختلف

- يعني سامحتني؟

- أكيد

جرني و حضني ...

- والله ما راح أضوجك بشي ، و راح تشوف عباس ثاني

- إي تا نشوف ، هَسه تعال گُلي شهم وين؟

- جوه فوت

فتنه جوه للبيت ...

- شلونه؟

- والله يا خوية حالته تبچي الصخر ، ساعة يگول ماتت و يگوم يبچي و ساعة يگول لا ما ماتت و باقي على هالرنه ، هذا غير الأكل و الشرب اللي ما حطهن بحلگه صارله أيام

- بالله عليك

- والله

- وينه هَسه ؟

- فوگ بغرفتي روحله

عفت عباس و صعدت فوگ ، دگيت الباب 3 مرات ما جاني جواب ، فتحته و دخلت ، لگيته گاعد ع القنفة و مدنگ راسه ...

- شهم

رفع راسه و دحگلي ...

- فرات

- إي أخوك

گام من مكانه و جه يمشي عليه ، وصل يمي ، دحگ عليه و چان يگع بين أديه ...

********

يتبع ...

تعالو أنستا

سحر الدليمي