رواية عشگ الفرات ( عِندما تَهوى القُلوب ) الفصل الثاني والأربعون 42 - بقلم سحر الدليمي

هلوو شلونكم ، ماظل شي و نختم الجزء الأول إن شاء الله يعني أحتمال بقى 15 بارت و نختمه و نبلش بالجزء الثاني ، حييييل متحمستله ، قُصصه راح تكون جديدة و مُختلفة و ما مطروقة أبدًا يعني ما راح تلگونها بأي رواية ثانية ، يعني بأختصار الجزء الثاني راح يكون🔥🔥 إن شاء الله فـ أبقو ويانه ، و هَسه أخليكم ويه البارت و لا تنسون التفاعل ، قراءة مُمتعة♥️

*****

- كل شي ممكن أتقبله ألا جفى الحَبيب ، يكسرني

*****

گام من مكانه و جه يمشي عليه ، وصل يمي ، دحگ عليه و چان يگع بين أديه ...

- ششههمم ، ششهم حاچينييي شبيييك !!

أحاچي ميرد و فاقد بين إديه ، صحت عباس ...

- عباااس ، عبباااس

شوي و جاني يركض ...

- شبييي ، شهمم ، ولكك ششهمم

شبييي؟؟؟

- ما أدري داخ و وگع

گمت جبت مي و رشيت على وجهه ، شوي و صحى بَس دايخ ، دحگت خشمه طگ بدم ، هنا آني تخبلت كُبل جه ببالي مرضه اللي صابه گبل فترة ، يعني معقولة رجعله؟! ، گمنه و أخذناه آني و عباس للمستشفى ، تحاليل و فحوصات و هالسوالف ، واگفين آني و عباس و جانه الدكتور ...

- هااا دكتور شبي؟

- نقص تغذية لا أكثر ، ماكو شي خطر ، ليش مجاي ياكل؟

عباس : دكتور صارت عنده حالة وفاة بالبيت و كلش تأثر

- إلى رحمة الله

فرات : دكتور يعني أكيد مابي شي؟

- لا لا مابي شي لا تخاف

راح الدكتور و آني و عباس دخلنه للغرفة ، لگيناه نايم و المغذي بإيده لأن جسمه حييل تعبان ، گعدنه و شوي و عباس طلع ما أدري وين ، صحى شهم ، گمت رحت يمه ...

- هااا الحمدلله ع السلامة يالعضيد

جاوبني و چان صوته مبحوح و تعبان حيييل ...

- الله يسلمك

- شلونك هَسه؟

- تعبان فرات

- زين أرتاح هَسه لتحچي

- رجعني للبيت ماريد أبقى هنا

- بَس يخلص المغذي نرجع

سكت و دار وجهه ، شوي و حسيته نام ، دخل عباس ...

- هاا شلونه؟

- زين ، أنت وين چنت؟

- هَسه ماعليك آني وين چنت ، عبدالله خابرني و گتله و راح يجي

- بَس لا درى خالي سلام؟

- لا نبهت عليه ميگله

- إي زين

وره نص ساعة جانه عبدالله ، سلم و راح يشوف المغذي ...

- شلونه ، شگاللكم الدكتور؟

- قلة تغذية

- مثل ما توقعت ، ولكم راح يموت روحه

عباس : ما لازم يبقى حاله هيچ

فرات : لا تضغطون عليه ، شگد متحچون وياه ما راح يفيد ، لأن وضعه هذا مو بإيده ، خسر مرته و أبنه بيوم واحد أنتو متخيلين؟

عبدالله : صَح خلو هالفترة

عباس : بَس أنتو تدرون عمي سلام ميگدر يشوفه هيچ

عبدالله : نحچي وياه و نفهمه

صحى شهم ، حچه عبدالله ...

- الحمدلله ع السلامة شهوم

- الله يسلمك ، عبدالله طلني منا عليك العباس

- لا مو هَسه لازم تبقى للصبح

- ماريد ، طلعني عبدالله

دحگ عليه عبدالله ، هزيتله براسي ، رجع حچه ...

- تمام راح أطلعك على مسؤوليتي ، بَس لازم نكمل الك المغذي هناك لأن وضعيتك حيل تعبانه

هزله براسه و زاح الغطى تا يگوم ، گام و آني واگف يمه داخ و لزم إيدي ...

- شبيك شهم؟

- مابيه شي

عبدالله راح يحچي ويه الدكتور و أحنه طلعنه هو بعدين يلحگنه ، وصلنه البيت و دخلنه لگينه خالي سلام و وياه خالي بكر بالصالة ...

سلام : وينكم ولكم؟؟؟

شاف شهم وضعه تعبان أجاه ...

- شبيي ، شهم شبيك بابا ، وين چنتو؟؟

عباس : بالمستشفى عمي ، شهم تخربط و أخذناه

- شصارله؟؟

- لا تخاف خالي ، خفيفة إن شاء الله ، مابي شي

- زين بابا أخذو للغرفة يرتاح

أخذه عباس و راحو ، جاني خالي ...

- فرات أبني ، ديربالك عليه آنـه ما أگدر أبقى هنا

- شهم أخوي خالي ، لا توصيني عليه

- عفيه وليدي

- خالي حسين شلونه؟

غمض عيونه و تنهد ، حچه خالي بكر ...

- شلونه ، مهدود حيله و فوگ هذا خالتك سليمة كلساع تتخربط عليه

- الله يساعدهم

سلام : يلا أحنه هَسه راح نروح

- تمام الله وياكم

راحو و آني مشيت تا اصعد فوگ و دگ موبايلي ، طلعت أمي ...

- هلا يمه

- وينك يمه؟ ، من الظهر أختفيت ظل بالي يمك

- آني ببيت خالي بكر ويه شهم ما أگدر أعوفه

- شلونه؟

- والله يا يمه شلونه ، حالته تصعب ع الكافر

- سوده عليه ، تعال أخذني باچر علمود أشوفه

- إن شاء الله

نهيت المكالمة ويه أمي و رحت لـ شهم ، گاعد ع الچرباية و صافن بموبايله ، جريت كُرسي و گعدت گباله ، شفته يدحگ على صورتها ...

- مو كافي شهم؟

حچه و هو صافن بالصورة ...

- آنـه گلبي مو حِمل فراگ

- ماتت شهم لازم تتقبل الموضوع

رفع راسه و صاح ...

- لتتگوول مااتتت ، مااا مااتتت فررااات ، هيي بَسس مختتفييية

- زين زين بَس على كيفك

دنگ راسه و حچه ...

- مشتاقلها و عَلي

رفع راسه و أبتسم ...

- أبني باقيله بَس چم شهر و ينولد ، بَس ...

- بَس شنو؟!

- معقولة ما ألگاها منا لذاك الوكت؟!

گال هيچ و گام على حيله ...

- هاي وين؟

- أدورها

- شهم مُهره ماتت استوعب خلص مااتتت

- وين جثتها؟

- هااا ؟

- إي وين جثتها ، جيبولي جثتها و ساعتها أقتنع بموتها

- مو شفت ملابسها كُلهن دم و أثر طعنات

- و آنـه شلي غرض بالملابس ، آنـه أريد أشوفها بعيني و هي ميته و عود أصدگ

جريت نفس و حچيت ...

- زين هَسه أنت أترك هالموضوع و أرتاح

- راحتي وياها فرات

- فاهمك والله العظيم محد يفهمك و يفهم اللي جاي تمر بي بگدي

- أريدها فرات

كال هيچ و نزلت دموعه ، رحت يمه و حضنته ...

- إذا عايشة راح ترجعلك صدگني ، أنت بَس لتسوي بنفسك هيچ و شد حيلك

وخر عني و راح تمدد بالفراش و هو ساكت ، ظليت گاعد يمه لحد ما حسيته غفى رحت غطيته و أنفتح الباب دخل عبدالله ...

- شو تأخرت

- چان عندي شغل بالمستشفى ، شلونه شهم

- على حاله

أخذ المغذي و راح حَتى يشكله ياه ...

- ما حچيت وياه؟

- حچيت بَس ما فاد

- ما راح يقتنع

- بَس تدري حچيه صَحيح

- شلون؟

- إذا مُهره صدُگ ماتت ، وين جثتها؟

- و الملابس اللي لگوهن الشرطة

- يجوز اللي خطفوها سوو هالحركة تا يوهمونه أنها ماتت

صفن شوي ، رد حچه ...

- ما أدري والله ، بَس فرات أنت لا تحچي گدامه هيچ لأن راح يصير عنده أمل و أحنه ما متأكدين

- لا ما أحچي

- زين آني راح أروح

- الله وياك

طلع عبدالله و آني ظليت گاعد يم شهم ، طلعت تيلفوني و دگيت على عشگ بَس سدته بوجهي ، رجعت دگيت عليها مرتين و هَم سدته ، تخبلت ...

- لاااا هااي نااوية تمووتتي

عليت صوتي نسيت شهم نايم ، دحگت عليه بعده نايم ، رجعت كتبتلها ...

🗨️ ردي على أتصالاتي خل نتفاهم

شافتها و ما ردت ...

🗨️ خوش عَجل يعني ما تردين

قفلت الجهاز و لگحته بعيد عني ، گمت و ظليت رايح راد بالغرفة ، حسيت نفسي أختنگت فتحت دگم القميص و طلعت للبلكونه ظليت گاعد بيها ما جاني نوم و آني أفكر بعشگ و تصرفاتها اللي تشعل بگلبي النار ، شهم نايم بَس مو مرتاح بنومته ، لو يهذي لو كلساع يفز لو يون ، ظليت رايح راد عليه ، صارت الساعة بالـ 4 الفجر و آني على گعده وحدة ، الضو بده يطلع ، شوي و جاني شهم ، التفتت عليه واگف ورايه و يدحگلي ...

- شبيك رايد شي؟

- أنت اللي شبيك؟

- مابيه شي

- لا بيك ، ما نمت مو

رفعت راسي و دحگت عليه ، چان مركز بيه و ينتظرني أحچي ...

- حَتى و أنت بعز تعبك مهتم بيه و تسألني

- ليش آنـه مو أخوك ، أنت و لا مره عفتني وحدي تريدني آنـه أعوفك

جريت نفس و حچيت ...

- عوفك مني ، أنت شلونك؟

- آنـه مو بخير بغيابها

- شهم مُهره ماتت

- والله ما ماتت ، فرات گلبي جاي يگلي ما ماتت و گلب العاشگ دليله

- و شتسوي يعني؟

- أدورها

- تدورها و أنت بهالحالة !!

- والله لو مكسر هَم أدورها و ألگاها

سكتت عنه ما ردت اضغط عليه و آني أشوفه مُصر أنها عايشة ، مصيره يستوعب وفاتها و يتأقلم و يرجع لحياته

مرت أيام و أحنه بالبصرة ، خلصت الفاتحة و شهم صار أحسن و رجع لبيتهم و هو عازم أنه يدور مُهره ، ردت أظل وياه و ما أعوفه بَس ما اگدر لازم أرجع أمي و ورايه سالفة عشگ لازم أحلها فـ من الصبح توكلنه للأنبار

***

مُهره
مَر شهر و آني هنا محبوسة بهالغرفة ، لا أعرف اللي حابسيني و لا أعرف شيردون مني و لا أعرف آني وين أصلاً ، ما أشوف أحد غير رجاء ، هي ما عافتني و بقت وياي و تهتم بيه حَتى صارت صديقتي بَس كُلما اسألها أحنه وين أو أنتو منو و شتردون مني تگلي ...

- لا تسألين مُهره ما أگدر أجاوبچ

- ليش متگدرين تجاوبيني ، حابسيني هنا و آني ما أعرفكم و لا أعرف شتردون مني ، الى متى أبقى آني محبوسة يمكم ؟؟؟

- صدگيني راح يجي يوم و تطلعين منا و ترجعين لأهلچ بَس ساعتها آني متأكدة راح تتمنين لو أنچ باقية هنا يمنه و ما راجعة لأهلچ

- ما فهمت شلون يعني؟!

- بعدين تفهمين كلشي ، هَسه آني لازم أروح و أرجعلچ بعدين

عافتني و طلعت و بقيت آني افكر بكلامها ، شنو تقصد؟ ، لا أكيد مخبله مستحيل أتمنى ابقى يمهم
گمت اتمشى بالغرفة لأن حسيت بشوي ألم ، جاي أمشي و حسيت حركة ببطني ، وگفت و حطيت إيدي على بطني و أنتبهت الطفل يتحرك ، فرحت و دمعت عيوني ، شيصر لو چان شهم وياي بهاللحظة و أخلي إيده على بطني و يحس بحركة أبنه و هو ببطني ، بچيت و آني أتذكر گعداتنه و سوالفنه سوه ، كلش أشتاقيتله و أشتاقيت لحنيته و لحضنه اللي ما أعرف أنام من دونه ، يا ترى هَسه هو شحاله بدوني ، اشتاقيت لـ بابا و ماما ، اشتاقيتلهم كلهم ، أريد ارجع ، رجعت گعدت ع الچرباية و بقيت أبچي وحدي و آني أگول معقوله أولد أبني هنا؟!

***

عشق
كملت مُحاظراتي و طلعت ويه أسراء أنتظر رافد يجيني ، گعدنه و حچت اسراء ...

- عشق شبيچ عُمري؟

- مابيه شي

- لا بيچ ، أنتِ صارلچ فترة مو تمام ، أحچيلي ع الاقل حتى ميظل بگلبچ

كالت هيچ و آني بچيت ، حجت ...

- ولچ ليش البچي حَبيبتي ، أحچي عشق شبيچ !!

- تعاركنه آني و فرات

- ليش؟

- صار سوء تفاهم بينه و صارلنه أسبوع منحچي أو بالأحرى آني اللي ما أحچي وياه ، لأن هو شگد يراسلني و يدگ عليه بَس ما أجاوبه

- لا عشق غلط ميصير هيچ لازم تحچون و تحلون هالخلاف اللي بينكم

- مجاي أگدر أحچي وياه ، بَس أشتاقيتله كُلش ، صار أسبوع ما شايفته و لا سامعة صوته

التفتت ليمينها و رجعت ألتفتتلي و گالت ...

- السايق أجه آني مضطرة أروح ، بَس قبل ما أمشي أگلچ لا تظلين تكابرين ، أنتِ تحبي و هو هَم يحبچ فـ لا تخلين سوء التفاهم سبب بنهاية علاقتكم ، حكمي عقلچ عشق و أسمعي رأي گلبچ هَم ، يلا باي حُبي

گالت هيچ و راحت و آني بقيت گاعده وحدي ، شوي و حسيت أحد واگف بصفي ، أنداريت و چان أشوف فؤاد واگف و يباوعلي ، أبتسم و حچه ...

- شلونچ عشق

- هلا

- عادي أگعد يمچ؟

- هااا؟؟

- أگدر أگعد؟

- إي تفضل

***

فرات
وصلنه البيت و دخلنه گعدنه بالهول ، جت عمتي بدور گعدت يمنه ...

- عمه وين عشق عَجل؟

- والله يـَ عمه بالكلية لحد هَسه ما جت

- ليش؟

- يمكن رافد عنده شغل و ما گدر يروح يجيبها

- هذا رافد ما عليه منتكل ، آني رايح أجيبها

- إي والله يمه

***

فؤاد : شبيچ عشق؟

- مابيه شي

- إذا تحبين أحچيلي

- ماكو شي

سكت و آني بقيت أفرك بأديه ، شلون لو يشوفني فرات گاعدة ويه فؤاد والله يتخبل ، لا عشق هاي شبيچ فرات بالبصرة ، أنتبهت لـ فؤاد يباوع لأديه ، حچه ...

- شو بعدچ لهسه ما رجعتي؟

- أنتظر رافد يجي ياخذني

- رافد أبن خالچ جسام مو؟

- إي

- بَس تأخر ، باعي الكلية كلها طلعت

سكتت ما جاوبته ، رجع حچه ..

- أوصلچ آني؟

- لا هَسه يجي رافد

- شكله مو جاي عشق و آني ما أگدر اعوفچ هنا وحدچ ، خليني أوصلچ

بقيت ساكته ما گتله شي ...

- ليش أحسچ خايفة مني عشق؟ ، تره آني أبن عمچ مو غريب

- لا مو خايفة

- لعد گومي أوصلچ ، آني خايف عليچ

باوعت للكلية الكل طلع محد بقى ، و آني مگدر أبقى وحدي ، ما گدامي غير أروح وياه ...

- تمام يلا

گمنه و رحنه نمشي للسيارة مالته ، فجأة طبگت سيارة فرات بينه و بين سيارة فؤاد ، نزل منها و أجه عليه سحبني من إيدي و خلاني وراه ، حچه موجه كلامه لـ فؤاد ...

- شعندك وياها؟؟؟؟

- ما مضطر أبررلك وگفتي ويه بنت عمي

عشق : فرات فدوة خلينه نروح

أندار عليه و هو معصب و عاگد حواجبه ...

- روحي للسياارة ععششگ

أندار لـ فؤاد ...

- شوف يروح أمك ، لعب لا تلعب وياي ما أنصحك ، گول من الأخير شتريد؟؟؟

تقرب منه فؤاد و حچه ...

- اللي أريده أنت أخذته مني

گال هيچ و فرات لزمه من رگبته و خنگه ...

- لااااا فرااات وخررر عنهه ، فدووةة عوووفهه

فؤاد : لك أنت لو رجال متخلي خطيبتك تنتظر وحدها بالكلية و جاي تحاسبني لأن واگف وياها

سحبه من هدومه و شمره ع السيارة و هو خانگه ، فؤاد يحاول يتخلص منه بَس مجاي يگدر ، صار يگح و وجهه صار أحمر ...

- فررااات عووفه فدووة بااوع راااح يمووت بين إيديك ، فرااات داحچي ويااك عووفه

- والله الخلق مُحمد ، إذا شفتك تحوم يم عشگ لو بَس لمحتك تدحگ عليها من بعيد ، غير أذبحك ع الجبله

گال هيچ و شمره بالگاع و فؤاد بقى يگح ، أجه سحبني من إيدي و صعدني بالسيارة و هو راح صعد و مشينه ، چان طول الطريق يحچي و يغلط على فؤاد ، معصب كلش لدرجة كل ما أحچي كلمة يصيح بيه و يسكتني

*

وصلو البيت و دخلو ، فران گايد عشگ من إيدها و هو معصب ، الكُل بالبيت أنتبهله ، سألو شكو شبيكم ، صاح بيهم ...

- للحدد يددخلل

گال هيچ و أخذها و فاتو بالهول و قفل الباب عليهم ، نجاة و بدور تخبلن ظلن يدگن بالباب ...

نجاة : فرااات افتح الباب ماما بَس خل نفتهم شبيكم !!

فرات رايح راد بالهول و عشگ واگفه و تدحگ عليه ، حچه ..

- ستتيين أللف مررره گتللچ و نببهتچ هذاا الحيواان مااريدچ تتعاطيين وياااه ، شنوو جااي تعاندينيي أنتِ ؟؟؟

- والله ما وگفت وياه هو أجاني بدون ما أدري و گال خل أوصلچ و آني قبلت لأن بقيت بَس وحدي و رافد تأخر عليه

دفر الميز اللي گباله و وگع الگلاص و تكسر ، حچه ...

- يووصلللچ هاااا ، هيي هاااي العاييزة ، يوول ياابة هذاا رااسم عليييچ افتههميي يرييدچ

عشگ ظلت ساكته و هو دنگ و شال قزازة من الگاع و صار يلعب بيها و يفتر بالهول

نجاة تسمع صياحهم و راحت لغرفتها حَتى تنادي عَلي ، فاتت و لگته گاعد ع الكرسي يقره كتاب ...

- ألحگ عَلي بَسرعة

نزع نظارته و دحگ عليه بأستغراب ...

- خير نجاة شبيچ شصاير؟!

- فرات أخذ عشق للهول و قفل الباب عليهم ، هو معصب لا يروح يأذي البنيه

ذب الكتاب من إيده و گام راح للهول ، دگ الباب و صاح ...

- فراات ، افتح الباب بابا

ماكو رد و الهول هدوء مابي صوت ...

- فراات جاي أحچي ويااك جاوبني

ريان واگفة و تدحگ عليهم و هي فرحانه بالمشكلة اللي صارت بين فرات و عشگ ، تتوقع هالشي من صالحها

فرات رايح راد و يدحگ ع القزازة اللي بإيده ، حچت عشگ ...

- إذا أنت لهدرجة متثق بيه فـ خلينه نفصخ الخطوبة

رفع راسه و دحگ عليها ...

- يعني أنتِ متريديني؟

- إييي مااريدكك

فرات سمع هالحچايه منها و حسها مثل السهم و جه بگلبه ، سد إيده ع القزازة و ضغط عليها ، حچه ...

- معقولة بهالسهولة تخليتي عني عشگ؟ ، عفتيني من أول خلاف صار بينه !!

عَلي : يوول فراات أفتحح البااب لا تخلينيي أكسره

فرات يسمع صوت أبوه و ما مهتمله ، صافن على عشگ و عيونه حُمر ، و القزازة بإيده ضاغط عليها لحد ما خله الدم ينگط بالكاع ، عشگ أنتبهت لأيده ...

- فرات إيدك

ما رد عليها و القزازة بعدها بإيده ...

- فرااات ذب القزازة من إييدك

راحت يمه و رادت تلزم إيده بَس سحبها من يمها ...

- عوفيني

- فراات إيدك حَبيبي باوع دتنزف هوواي فدوة ذب القزازة

- تريدين تعوفيني مو عشگ؟!

- ما أعوفك والله ما أعوفك حَبيبي بَس افتح إيدك

أخذت إيده و حاولت تفتحها و الدم يجري منها ، بچت و صاحت ...

- فرااات عليييك الله ذب القزاازة والله ماا أعوفك ذبهااا

عشق
و أخيرًا فتح إيده و آني گُبل حضنته ، حچه ...

- متعوفيني مو؟

- والله ما أعوفك بَس لا تأذي نفسك

شال إيده الثانية و صار يمسح على راسي ، وخرت عنه و باوعت لإيده القزازة نابته بيها حاولت أشيلها بَس ما گدرت گلبي ميتحمل ، رحت فتحت الباب و دخلو ماما و خالة نجاة و وياهن خالي علي ...

- خالي فدوة شوف إيد فرات

راح عليه و شال إيده و شافها ...

- شمسوي بإيدك ول يابة

- غصبًا عني يابة

تقرب عليه و شال القزازة من إيده و حطها ع الميز ...

- أنطوني كلينس أي شي إيده جاي تنزف

فتحت جنطتي و أنطيته كلينس أخذه و حطه على إيده ...

- أمشي آخذك للمضمد يشوفلك ياها

- ميحتاج آني أروح

- ما تگدر تسوق ، نجاة جيبيلي شماغي و عگالي بساع

راحت خالة نجاة و فرات بقى يباوع عليه ، أجت خالة أنطت خالي شماغه و عگاله و لبسهن بسرعة و طلعو ، أجتني ماما ...

- شبي فرات يولي ، شصاير؟

- ماما بَس خليني أگعد و أرتاح و آني أحچيلچ كُلشي

***

مُهره
أجيت للبيت و دخلت چانت الدنيا ظلمة كلش و البيت فارغ مابي أحد و هدوء حييل ، مشيت بالبيت و صعدت للطابق الثاني و هَم چان ظلمة و فارغ ، وصلت غرفتنه آني و شهم باوعت أكو ضو من جوه الباب ، فتحت الباب و فتت ، باوعت شهم گاعد ع الچرباية ، رفع راسه و باوعلي و أبتسم ، حچه ...

- أشتاقيتلچ كلش

رحت گعدت بصفه ...

- آني هَم كلش مشتاقتلك

أنتبهتله كلش متغير ، عيونه حُمر و اللي جوه عيونه أسود و صوته تعبان ، حطيت إيدي على وجهه ...

- شبيك حَبيبي ليش هيچ متغير؟

- غيابچ هد حيلي يـَ غاليتي

- من حيلي على حيلك يـَ روحي

حسيت بحركة أبني ببطني ، أبتسمت و باوعت لـ شهم ...

- شهم خلي إيدك على بطني

- ليش؟

- بَس خليها و شوف بشنو راح تحس

تقرب مني و خله إيده على چتفي و الإيد الثانية على بطني و بقى يباوع عليه ، أبتسم و حچه ...

- جاي يتحرك ، الطفل يتحرك

- إييي أبننا كُبر و صار يرافس هواي

- هههههههه ، تدرين شي

- شنوه؟

- آني غيرت رأيي ما أسمي الياس

- لعد؟

- عاجبني أسمي عَلي الأكبر ، علمود يصيحولنه آني وياچ أبو الأكبر و أم الأكبر ، شتگولين؟

- كلش حلو والله

- يعني موافقة؟

- أكيييد

ضحك و حضني و باسني من راسي و حچه ...

- أدعي من ربي تبقون وياي أنتِ و أبني طول العمر و متفارگوني أبد

فتحت عيوني و حسيت على حركة أبني ببطني ، گمت على حيلي ، نزلت دموعي و آني أتذكر شهم ، حطيت إيدي على بطني ...

- دتتحرك هواي حَبيبي ، مشتاق لـ بابا مثلي مو؟

- أكبر ، شرايك بأسمك حلو مو

صفنت هاي آني شبيه تخبلت جاي أحچي وياه و هو بعده ببطني ، أنفتح الباب و دخلت رجاء ، حچت ...

- ويه منو چنتي تحچين؟

- ويه أبني

- تحچبن صدگ أنتِ؟

- والله ، ما حسيت أله و آني احچي وياه من كل عقلي ، يمكن من شوگي لأبوه حچيت وياه لأنه قطعة منه

- مشتاقتله؟

- كلش هوواي

- آني هَم مشتاقتله

- المن؟!

- خطيبي

- أنتِ مخطوبة؟

- إي

- و وينه خطيبچ؟

- بصلاح الدين لأن هو مناك

- شوكت تتزوجون؟

- ما أعرف هالشي يقرره أبوي

***

شهم دور لـ مُهره هوواي بَس ما لگالها أثر و هالشي سببله أزمة نفسية و قضى على آخر ذرة أمل بگلبه ، أبتعد عن أهله و عزل نفسه و رجع لنفس حالته من اول ما سمع بوفاة مُهره

أندگ الباب و راح فتحه سلام ، طلع عامل توصيل جايب وياه السرير اللي وصو عليه شهم و مُهره قبل فترة ، سلام ما راد شهم يشوفه ظن منه أنه راح يگدر ينسى فـ گال للعامل ...

- ما نريده وليدي رجعه وياك

بالصدفة طلع شهم و شافهم ، راحلهم و گاله ...

- لا خلي أريده

سلام : شهم ...

- أريده بوية

طلع فلوس و أنطاهن للعامل ، شال السرير و أخذه لغرفته لحگه أبوه ...

- شهم وليدي شلك بي عوفه

- هي أختارته بوية ، عجبها هواي و گالتلي أريده

فتحه و شاله خلاه بصف الچرباية ...

- گالت أخلي هنا بصفي علمود من يگعد أبني أكون قريبة منه ، بَس هي وينها هَسه !!

- الله يرحمها وليدي

ظل ساكت و هو صافن ع السرير ، ابوه طلع و عافه وحده

مرت الأيام و الشهور و شهم وضعه من سيئ الى أسوء ، عزل نفسه تمامًا عن العالم ، حَتى شغلة عافه ، فرات ظل كُل فترة يجي و يحچي وياه بَس شهم مات وره موت مُهره بقى جسد بلا روح

فرات و عشگ بهالفترة ، يختلفون بين بعظهم و يرجعون يتصالحون و ظالين على هالرنه ، رافد و نَفس هَم نفس الشي ، صگر و رُسل علاقتهم حلوة و صگر حييل فرحان بأبنه سيف اللي صار عُمره 3 أشهر بَس معاملته ما تغيرت ويه لارين ظال يدللها و يلعب وياها بَس هي تغار من تشوفه يجي على سيف ، أما ريان فـ هي تعتقد أنُ المشاحنات اللي تصير بين عشگ و فرات من صالها و ظاله تتأمل ينفصلون و تبتعد عشگ عن فرات

***

مُهره
ما تخيلت أبقى محبوسة هنا بهالمكان لحد ما أولد و أجيب أبني ، بَس صار و ولدت أبني و آني بعيده عن شهم و أهلي ، رجاء بقت وياي ما تركتني و لا لحظة لحد ما تعافيت و رجعتلي صحتي ، أبني سميته علي الأكبر لمن حلمت بـ شهم چان رايد أسمه هيچ و بقى ببالي و سميته أكبر ، عمره شهر حاليًا ، هو الوحيد اللي مصبرني على فراگ شهم ، لمن أباوع بوجهه أحس بوجود شهم يمي ، گاعده بالغرفة أرضع أكبر و هو بحضني حچيت و آني أمسح على وجهه ...

- تدري أبوك شگد چان متحمس يشوفك

- إذا رجعنه او بقينه هنا ، أريدك تعرف أنُ أبوك كلش يحبك و آني متأكدة هو جاي يدورلنه و راح يلگانه و ياخذك بحظنه و ...

قاطع كلامي صوت الباب و هو ينفتح ، دخلو زلم ثنين ملثمين و دخلت وياهم رجاء ، أستغربت لأن اول مره زلم يدخلون هنا ، طول المدة اللي عشتها هنا رجاء هي الوحيدة اللي تدخل عليه و وياي بكلشي ، حچه واحد من الزلم ...

- جيبي الطفل ...

********

يتبع ...

القفلة🔥🔥
برأيكم شراح يصير بالبارت الجاي؟
يلا أكتبولي توقعاتكم

تعالو أنستا
18.kij

سحر الدليمي