رواية عشگ الفرات ( عِندما تَهوى القُلوب ) الفصل الحادي والسبعون 71 - بقلم سحر الدليمي

بروهات آسفه حيل ع التأخير چان المفروض البارت ينزل گبل هالوكت بَس النت چان مگطوع
لا تنسون التصويت و التعليق بين الفقرات
قراءة مُمتعة ♥️

***

- أنا و أنت كـ القمر و نجمتهُ

***

مُهره
دخلت للغرفة لگيت شهم واگف يلف الغترة چراويه ، رحت وگفت يمه ...

- أنت كلش حلو تدري

ألتفت عليه و أبتسم ...

- چا ما دام آنـه بعيونچ حلو هايهيه أنعم الله بويه

- هههههههه

- بويه أروح فدوة و نذر لضحكتچ هاي

- أسم الله عليك حَبيبي ، أگول

- گولي يـَ غاليتي گولي

- أهل الأنبار شوكت يوصلون؟

- خابرتهم قبل شوي ، يرادلهم فد ساعة ساعتين و يوصلون إن شاء الله

- زين بعدها الجمعة ببيتنه؟

- إي

- و شوكت نروح؟

- هَسه ، چا ما تشوفيني بدلت ، يلا أنتِ هَم بدلي مو تأخرينه مثل كل مره

- و يعني إذا تأخرت متنتظرني؟

- بويه آنـه أنتظرچ العمر كله و لا أخطي خطوة من دونچ

أبتسمت و عفته يلبس بالساعة مالته و رحت للكنتور أطلع ملابسي ، وگفت و چان أحس بحركة ببطني ، أبني جاي يتحرك ، فرحت كلش لأن هاي أول مره يتحرك و هاي آنـه صارلي ٦ أشهر حامل ، خفت لا يكون بي شي رغم الدكتورة گالت وضعه زين و مابي شي بَس آنـه بقيت خايفة لحد ما هَسه تحرك ، خليت إيدي على بطني و صرت أتحسس حركته ، كلش فرحت ...

- شهممم تعااال بسرعة

ألتفت و باوعلي شافني حاطه إيدي على بطني ، خاف و أجه يركض ...

- هااا شماالچ ، مُهره؟؟

أخذت إيده و خليتها على بطني ...

- أبنك جاي يتحرك ، تحس بي مو؟

وگف شوي و سكت و إيده على بطني ، ابتسم و حچه بلهفة ...

- إي والله جاي يتحرك

سحبني عليه و حضني و إيده بعدها على بطني ، رجع تحرك الطفل ، شهم ضحك و أباوع بعيونه لمعن عبالك يريد يبچي ، حچه ...

- حَبيبي يـَ روحي بابا أنت

- و روح ماما هَم

حضني أكثر و باسني من راسي و گال ...

- أوعدچ أنتِ و أبني راح أحميكم من الهوا الطاير و أفديكم بروحي و ما أخلي شي يجيسكم

- الله يخليك النه و لا يحرمنه منك

- و لا يحرمني منكم يـَ روحي أنتوا

- تذكرت من چنت حامل بأكبر ، چان لما يتحرك ببطني أتمناك موجود و تحط إيدك و تحس بحركته ، تحس بحركة أبنك الأول

- خلص أنسي هالموضوع و لا تفتحي مره ثانية

رجع للميز و شال موبايله يگلب بي ، حسيته ضاج من اللي گلته ، رحتله ...

- حَبيبي آني آسفه ضوجتك

- لا ما ضجت ، يلا بدلي حتى نطلع

عافني و طلع ، بقيت الوم بنفسي ، آني ليش حچيت هيچ ، ليش ذكرته و قهرته ، أوووف مُهره أوووف

رحت لبست ملابسي بسرعة و كملت ، شلت جنطتي و طلعت لگيتهم مكلملين و ينتظروني ، باوعت لـ شهم بعده على ضوجته ، ردت أنسي الصار ، رحت و حضنت إيده و أحنه نمشي ، وگف و باوعلي ، أبتسم و هز راسه آني هَم أبتسمتله ، صعدنه بالسيارة و مشينه

وصلنه بيتنه و نزلت ، سلمت على بابا و سجاد ، شهم و عمو سلام بقوا بره و آني و عمه فاطمة فتنه جوه لگيت زينب موجودة ، كلش فرحت بشوفتها ، سلمت عليها و بوست بنتها صايرة تجنن ما شاء الله ، أجت ماما و سلمت عليها ، و شفت عمه سلوى هم جايه ، سلمت عليها من وره خشمي لأن آني كرهتها من بعد ما تعاركت ويه عمه نجاة ، فاتوا الولد و گعدنه كلنه بعدين أجوا بيت عمي بكر و بقى ناقص اللمة بَس أهل الأنبار

عشق
بَعد عناء الطريق اللي أحسه صار أطول من حياتي وصلنه و أخيرًا ، نزل خالو علي يسلم على عمو حسين لأن تلگونه بالباب ، فتحت الباب آني و أريد أنزل مجاي أگدر أحس نفسي ثگيله كلش و الباب مجاي ينفتح ، أجه فرات سحب الباب و فتحه ، مدلي إيده و سحبني شوي شوي ...

- على كيفچ عشگي شوي شوي

نزلت و گادني و مشينه ، هو راح يسلم على خواله و آني و نَفس فتنه جوه ، تلگتنه مُهره و البنات أختها و خوات شهم كلهن أجن ، گعدنه كلنه بالهول و الزلم بالديوان ، أجت سلوى وگفت متخوصره و تباوع علينه ، شوي و أجت خالة نجاة چانت يم أخوانها ، صارن هي و سلوى عين بعين ، و سلوى نظراتها مو راحة أبد ، خالة نجاة عافتها و گعدت ويه البنات تحچي و تضحك وياهن ، شوي و صدمتنه سلوى من أجت و سلمت على خالة نجاة و تهلي و تمرحب بيها ، گلت بنفسي هاي من شوكت هالحب بينچ و بينها ، حچت مُهره ...

- هاي سلوى و لا مرتاحتلها

- صراحة حتى آني

- المهم هَسه عوفينه منها ، شلونچ ويه الحمل و التوم هذول

- أوووف لچ والله متعبيني أحس شايلة حجار ببطني مو أطفال هالگدوتهم

- ههههههههه ، هو حمل التوم يتعب

- إي والله كلش ، و أنتِ شلونچ؟

- آنـه كلش زينة الحمدلله

بقينه نسولف لحد ما فاتوا الولد ، شهم و فرات و رافد و سجاد و عباس ، أجه فرات سلم على بنات خواله و باوعلي و راح للمطبخ جابوا الجدورة هنا بالصالة لأن المطبخ ميكفي ، صارو عباس و سجاد ع الصب و شوي أجه عمو حسين وگف فوگ روسهم يعلم بيهم سوو هيچ و لا تسوون هيچ ، كملوا أول صينية و تگابلوا عليها فرات و شهم و أخذوها للديوان ، لحد ما كملوا غدة الزلم و راحوا يتغدون ، مشى الوقت و فض الغدة و كُل الموجودين تغدوا ، آني نعست كلش و منا تعبانة من الطريق گلت لـ مُهره و أخذتني لغرفتها ، ما صدگت لگيت فراش شمرت روحي ع الچرباية و نمت

بقيت نايمة ما أعرف شگد ، لحد ما حسيت إيد على بطني ، فتحت عيوني لگيت فرات گاعد بصفي و مخلي إيده على بطني ، شافني و أبتسم و گال ...

- جهالنه جاي يتحركون

- صدُگ والله

- إي شنو ما جاي تحسين بيهم

گمت عدلت گعدتي و خليت إيدي على بطني شوي ...

- ماكو شي مديتحركون

- إي هاي عبنچ گعدتي بطلوا عبنهم ما يريدونچ يريدون بَس أبوهم و چانوا يلعبون وياي

- ههههههههههه فراااات لتگول هيچ

ضحك و دنگ باس بطني و رفع راسه باسني ...

- لحظة أنت شجابك هنا؟

- جيت أشوفچ غير

- عيب شلون أجيت

- يابه وين العيب غير ببيت خالي آني و محد غريب

- إي هَم صَحيح

- جيت أگُلچ آني رايح ويه شهم على بيت خالي سلام ، تظلين هينه ويه أبويه و أمي لو تجين وياي؟

- لا وياك آني وين ما تروح رجلي على رجلك

- هههههههه ، هاذ هو عجل يالله

گام و آني گمت وراه ...

- وين الغراض تا أنزلهن وياي؟

- هاي الجنطة

أخذها و نزل و آني بقيت أبدل ، شوي و أجت مُهره هَم بدلت ، كملنه و طلعنه ، وصلنه هناك و لگينه الولد كلهم موجودين ، فرات نزل الجنطة و دخلها جوه و طلع وياهم و بقينه آني و مُهره ، بدلنه و گعدنه نسولف

لليل و رحت للغرفة اللي نطونه ياها ، مأثثه أثاث كامل يمكن چان أحد ساكن بيها ، ذبيت الشال و گعدت گدام المرايه أمشط بشعري ، كملت و گمت أتمشى بالغرفة لأن المشي زين للحوامل ، گعدت أنتظر فرات ، صارت الساعة بالعشرة. و نص و بالهدعش و بالثنعش و هو ماكو ، إي أكيد يتأخر بالتعليله و الولد كلهم يمه ، أيست و تمددت بفراشي و غفيت ، وره ما أعرف شگد حسيت على حركة بصفي ، فتحت عيوني و لگيت فرات متمدد بصفي ، شافني و گال ...

- آسف حياتي گعدتچ

- ميخالف حَبيبي بَس تأخرت كلش

باوعت للساعة چانت بالـ 2 و ربع ...

- هاي الساعة فوگ الثنتين و باچر يوم طويل أكيد راح تتعب

- شسوي غير الولد كلهم ملتمين و آني صارلي چثير مو شايفهم ما أنطاني گلبي اعوفهم و أروح أنام

- يلا ميخالف هَسه عوف الحچي حتى تلحگ تناملك كم ساعة

- أبوس اليخاف عليه

تقرب باسني من خدي و رجع لمخدته ...

- تصبح على خير يـَ روحي

- و أنتِ من أهله يـَ عگال راسي

***

ريان
گرب موعد العرس و آني أحس الدنيا كلها خانگتني ، ماريد أتزوج بَس أبويه ضغط عليه ، أصلاً كُله من ورايه آني الوصلت نفسي لهالنقطة ، حُب فرات عماني و دمر حياتي

طول هاي الفترة عبدالله يحاول يتقرب مني و يعرف آني شبيه بَس آني چنت بارده وياه حيل و هو حَس ببرودي بَس ما حچه و لا بين أنُ هو متضايگ مني و من تصرفي وياه ، و لا بيوم حسسته هو خطيبي و لازم أخابره و أسأل عليه ، كُله هو يخابر و يسأل و هو يبادر بكُلشي ، فرات عايش حياته و راح يصير أب و آني الدمرت حياتي بإيدي و مو گدرانه حتى أرضى بنصيبي و أكمل حياتي ، أحس حياتي وگفت على فرات

گعدنه من الصبح و تجهزنه و طلعنه للصالون وياي خالاتي ثنين و عمتي و بنتها ، هناك سوتلي المكياج أم الصالون غلى ذوقها آني ما حچيت و لا أنطيت رأيي بشي ، لبست البدلة و جهزت من كُل النواحي و رجعنه للبيت ، گعدنه و بلش الدگ و الرگص ، صارت الساعة بالوحدة الظهر و گالوا وصلوا العريس و أهله ، گمت وگفت و أمي يمي ودعتني و جوا أبويه و أخواني ودعوني ، أبويه رغم كُل الصار بَس ما حسسني أنُ هو ضايج مني و رغم هالزواج آني ما راضية بي بَس جه و باسني من راسي و وصاني و گال ...

- لا تگولين أبويه كرهني بَعد الصار ، أنتِ تظلين بنيتي و الصار صفحة و أنطوت ، أنتِ هَسه رايحة للبصرة لبيت زلمتچ بَس خلي ببالچ وراچ أبوچ و أخوانچ لو زعلچ أو ضوجچ بَس گولي تلگينه يمچ

هنا أرتاحيت من تأكدت أبويه مو زعلان مني ، ما راح أطلع من يمه و هو زعلان مني و شايل بگلبه عليه ، رجع گال ...

- بَس هذا ما يعني أنچ تستگوين على زلمتچ لا بابا ديري بالچ على عبدالله تراهو خوش وليد و يحبچ و شاريچ و متأكد راح يدير باله عليچ و يحطچ بعيونه

حضني و باسني من راسي ، شوي و فات عبدالله ، گادني بابا من إيدي و خلاها بإيده و لزم إيدينه ثنينه و گال موجه كلامة لـ عبدالله ...

- بنتي برگبتك وليدي ، دير بالك عليها

دحگ عليه و رجع دحگ على ابويه ، أبتسم و گال ...

- لا تشيل هَم عمي ، بنتك أخليها بمجرى الدم

طبطب على چتفه أبويه و گادني عبدالله و مشينه ،صعدنه بالسيارات و ودعت بيتنه و ودعت الأنبار و أتجهت لحياتي الجديدة

عشق
گعدت الصبح ساعة بالسبعة ، باوعت فرات نايم ، گمت رحت للحمام و توضيت و صليت و أجيت حتى أكعده ...

- فراتي ، گوم حَبيبي ما بقى وقت

- فرااات

تحرك شوية : هاا

- گوم عيوني أنت صار الصبح

- إي هَسه

- يلا گوم مو ترجع تنام

ما رد عليه ، عفته و نزلت جوه ، لگيت الكُل گاعد ، رحت للمطبخ أساعد مُهره بتحضير الريوگ ، شوي و أجه عمو سلام علينه ...

- ولچن بويه ذوله ما گعدوا؟

مُهره : منو عمو؟!

- منو غيرهم ، شهم و فرات

- لا والله لسه ، البارحة تأخروا بالنومة

- إي چا هذا الحچي ، گعدوهم بويه ورانه شغل نريد نكمل كلشي گبل لا توصل الزفة

عشق : آني رايحة أگعد فرات

مُهره : عود خلي فرات يگعد شهم لأن شهم من يتأخر بالنومه ميگعد بسهولة بَس فرات يعرف شلون يگعده

- هههههههه تمام حگُله

رحت للغرفة و فرات على نومته ما متحرك ، نايم على بطنه و حاضن المخده ، ضحكت على نومته و رحت گعدت يمه ، خليت إيدي على ظهره و صرت أمشيها شوي شوي ...

- فراتي يلا گوم تره ما صارت والله شنو هالنوم

- مو گتلك نام من وقت حتى تگعد من الصبح

نزلت إيدي على خاصرته حسيت جلده كزبر ، تقربت منه و خليت إيدي بشعره ، دنگت يم أذنه ...

- فراتي يلا گوم حَبيبي

گام و رچه ظهره ع الديكور ...

- صباح الخير عيني

أبتسم : صباح النور

- يلا عمو سلام يگول خل يستعجلون ورانه شغل

- صار

گام يلبس بالبدي مالته و آني رحت وگفت يم الباب و أنداريت عليه ...

- هااا نسيت ، تگول مُهره خل يگعد شهم وياه

هزلي براسه و فات للحمام و آني نزلت جوه ، حضرنه الريوگ و گعدنه ، نزل فرات و شوي و نزل وراه شهم ، صبحوا علينه و گعدنه نتريگ ، كملنه ريوگ و گمنه نلم بالمواعين و الولد بدلوا و كشخوا على آخر شي و طلعوا ويه عمو سلام ، أجتني مُهره ...

- أگلچ ذوله رجالنه ينخاف عليهم

- يااا ليش ينخاف عليهم !!

- ولچ دشوفي كل هالكشخة و الهيبة ، أكيد هَسه تلگين چم وحدة تباوع عليهم

- والله أفگس عينها اللي تباوع على فرات

- و آني أكسر راسها اللي تباوع لـ شهم

مديتلها إيدي : هاهيه متفقين

- متفقين بَعد روحي

بقينه اليوم كله أحنه بالبيت مطلعنه ، ببيت عمو بكر الناس بدت تلتم بَس أحنه ما رحنه فرات و شهم مقبلوا نروح گالوا شوكت ما جينه ناخذچن و نروح و هُمه اليوم كله ما شفناهم ملتهين بالمعازين و شغل العرس و هالسوالف ، للخمسة العصر يلا خابروا گالوا نتحضر حتى واخد منهم يجي ياخذنه للعرس ، تحضرنه آني و مُهره و خالة فاطمة هَم راحت تتحضر ، كملنه و گعدنه ننتظر شوي و أجتني رسالة من فرات يبلغني أنه وصل ، طلعناله و صعدنه بالسيارة و مشينه ، حچت خالة فاطمة ...

- أبني الزفة شوكت توصل ماعندك علم؟

- هَسه خالة على وصول

وصلنه بيت عمو بكر و فرات نزل يمشي ويانه لأن هواي زلم لحد ما دخلنه البيت و هو راح

ريان
وصلنه البيت و نزلنه ، جه عبدالله و گادني من إيدي و دخلنه وسط الهلاهل و الهوسات ، چان الكُل فرحان ألا آني ، آني اللي ما گدرت أفرح لنفسي و لحياتي الجديدة ، دخلنه البيت چان چبير و رحنه للديوان هم چبير حيل ، گعدنه ع الكوشه ، عبدالله گعد شوي و بعدين طلع لأن حفلة الزلم بره ، لليل و الكُل راح ظل بَس گرايبهم اللح ، فاتوا الزلم بالديوان و گاموا يباركولنه ، عيني تروح على عشگ و بطنها أشوف فرات وياها من اول ما دخل ما عافها ، ينطيها المي بإيده و يحچي وياها و مهتم بيها لآخر درجة ، فززني صوت عبدالله ...

- هااا

- شبيچ حَبيبتي أحچي وياچ متردين

- لا بَس ما سمعتك من الهوسة

- شو باوعي عليه

درت وجهي عليه ، شال إيده و خلاها على خدي ...

- شبيچ وجهچ أصفر؟!

- مابيه شي

- من شوكت ما أكلتي؟

- من البارحة

- شنوووو !!

- صوتك عفيه عبدالله هَسه يسمعون

- لچ شلوون من البارحة ما ماكلة شي ، أهلچ وين عنچ ، أنتِ ناوية تذبحين روحچ؟؟

سكتت ما جاوبته و هو عصب ، شوي و أخذوني للغرفة ، گعدت ع الچرباية و وره دقايق أنفتح الباب و دخل عبدالله ، گمت بوجهه ، جه تقرب مني و خله إيده على خدي ...

- آنـه أسف ، قبل شوي عصبت و أنفعلت ، چان المفروض أتحكم أعصابي

- عادي و لا يهمك

أبتسم و أبتعد عني ، ذب الستره مالته و الرباط و فتح أول دگمتين من القميص ، كف رداناته و گال ...

- آنـه نازل جوه شوي ، أخذي راحتچ

هزيتله براسي و طلع ، رحت آني فتحت التسريحة و ذبيت البدلة بالگوة شلعت گلبي ، لبست دشداشة طويلة و مسحت المكياج ، واگفه و أدحگ على نفسي بالمرايه ، أنفتح الباب و دخل عبدالله بإيده صينية الأكل ، گال ...

- يلا گلبي تعاي تعشي ، لازم تاكلين زين لأن من البارحة ما ماكلة شي

مشيت و حسيت بدوخة حيل قوية ، وصلت يمه و گامت الدنيا تفتر بيه ، ما حسيت غير آني واگعه ، آخر شي حسيت عليه عبدالله من لزم إيدي

عبدالله
فجأة وگعت بين إيديه بدون حركة ، تخبلت من شفتها ، البنيه قبل شوي مابيها كلشي ، بسرعة سحبت شال و لفيته على راسها شلون ما چان ، شلتها و نزلت جوه ، شافتنه أمي ...

- يااا أسم الله شبيهاا مرتك يمه !!

- عباااس ، عبااااس أطلع گداميي للسيارة بساااع

- مدري يمه وگعت لحالها

طلع عباس و طلعت وراه ، فتحلي الباب الخلفي خليتها ع الكشن و رحت صعدت من الباب الثاني ، شخط عباس بالسيارة ، شوي و وصلنه المستشفى أخذوها مني و دخلوها للغرفة ، علگولها مغذي و ضربوها أبره و آنـه وياهم ، حچه الدكتور ...

- لتخاف دكتور عبدالله مابيها شي مجرد نقص تغذية

- أعرف و إن شاء الله ويه المغذي ترجع طبيعية

- إي أكيد إن شاء الله

- بَس يخلص المغذي آخذها للبيت لأن ماكو داعي ظلتها هنا

- بكيفك اللي تشوفه مناسب سوي

گمت سلمت عليه و تشكرت منه و راح ، طلعت وراه عباس چان واگف بالممر ، شافني و أجه ...

- هااا شلونها؟

- خفيفة إن شاء الله ، مابيها شي ، عباس أنت روح و آنـه بَس يخلص المغذي أجيبها و أجي

- زين چا آنـه راح أطلع بتكسي و هذا سويچ السيارة يمك

- تمام

نطاني السويچ و راح ، دخلت لـ ريان لگيتها صاحية ...

- هااا الحمدلله ع السلامة

- الله يسلمك ، شصارلي؟

- دختي لأنچ مو ماكلة شي ، آنـه رايح أجيبلچ أكل و ضروري تاكلين لأن المغذي وحده ميسوي شي

- تمام

عفتها و طلعت جبت أكل و رجعت خليته گدامها و كامت تاكل ، بين ما أكلت و كملت المغذي خلص ، شلتلها ياه و گامت لفت شالها و طلعنه

ريان
أدحگ لـ عبدالله چان حيل خايف عليه و ما عافني و لا لحظة ، والله أدري بي يحبني حيل بَس آني ما أگدر أحبه الحُب ميجي بالغصب ، وصلنه البيت الساعة بالوحدة و نص ، آني صعدت للغرفة و عبدالله ظل ويه أهله يحچيلهم شصار ، وگفت يم الميز أنزع الساعة و الگلاده ، جيت انزع الگلاده بَس ما گدرت افتح القفل ، حسيت على إيد فوگ إيدي دحگت بالمرايه لگيته عبدالله ، فتح الگلاده خلاها ع الميز و حضني خله إيديه على بطني ، جسمي كزبر ، خله راسه برگبتي و حچه بهمس ...

- و أخيرًا صرتي حَلالي

- من أول ما شفتچ تمنيت هاللحظة وياچ ، عيوني صدت عن البنات كُلهن من اول ما شفتچ

بلحظة حاولت أنسى كُلشي و سلمته نفسي

***

عشق
گعدنه الصبح و تريگنه و كملنه و عمو سلام قرر يسوي عزيمة هنا بالبيت لأن أحنه باچر حنرجع للأنبار ، صار الظهر و الكُل أجه ، مدوا سفرة طويله و گعدنه كلنه زلم و نسوان ، اباوع لـ هاي سلوى مهتمة بـ خالة نجاة كلش ، سوتلها الأكلة اللي تحبها و خلتلها بماعون و حطته گدامها ، شنو هالتغيير المُفاجئ الصارلها ما أدري ، فرات ضايج من قربها من خالة هو يكره سلوى كلش و صگر نفس الشي يحاول يبعد خالة عنها بَس هي لازگة بيها ، كملنه غده و گعدنه سوالف و ضحك ، اللمه كلش حلوه و متونسين و الولد ناس تحشش على ناس و الرزايل ترگع على روسهم من الكبار ، ريان چانت موجودة بَس ما أهتميتلها ، انتبهتلها تباوع لـ فرات ، فار دمي و تمنيت لو أگوم أخنگها هَسه ، هديت نفسي و گلت متستاهل ، گمت و گعدت بصف فرات و لزمت إيده و صرت أحچي و أضحك وياه و هو حَبيبي ما قصر هم حرگ دمها بحركاته ، هو ميدري بيها مركزة بي ، ضحكه و سوالفه وياي عفوية بَس حرگت دمها

للعصر و گاموا جماعتنه حتى يروحون ، خالوا علي و الولد واگفين يسولفون وياهم ، أجت خالة نجاة بَس أنتبهتلها وجهها أصفر و بالگوة تمشي ، مخليه إيدها على بطنها ، وصلت يم خالو علي و لزمت إيده و حچت ...

- علي ...

ألتفت عليها و چان توگع بين إيديه ...

********

يتبع ...

18.kij
تعالو أنستا و اليجي يدخلي خاص يگُلي علمود أضيفة كلوز لأن نشري اللي يخص الرواية أنشره بالكلوز فقط

سحر الدليمي