لا تنسون التصويت و التعليق بين الفقرات
قراءة مُمتعة ♥️
***
- يـَ الصاعدة أعلى السطح و بحجة الغَربي
ظلي أصعدي و أنزلي و دوسي على گلبي .
***
عشق
رجعنه للفندق بوقت متأخر بعد ما تونسنه كلش ، فتنه للغرفة و فرات بدل بسرعة و راح تمدد ع الچرباية و رچه ظهره ع الديكور ، بقى يباوع عليه ، آني بدلت و فتحت شعري خليت عطر و رحت تمددت يمه و خليت راسي على صدره ، هو صار يلعب بشعري ...
- فراتي
- هاا حَبيبي
- أنت ملاحظ أنُ خالد و نوره ميحبون بعض
- خالد ميحبها بَس هي مدري
- هي تحبه
- شمدريچ؟
- مبينه من نظراتها أله و كلامها وياه ، فرات البنيه كلش تحبه ، أحنه النسوان نفهم بعض
- والله مدري بَس هو گالي آني ما أحبها
- لعد ليش تزوجها؟
- علمود أبوه هو طلب منه يتزوجها ، هو أصلاً چان يحب وحدة غيرها بَس ما صار نصيب
- ليش؟
- عافته
- ليش عافته؟
- من چانوا بالعراق و من دخل داعش أخذوا خالد و ظل يمهم شهر و أنتِ أكيد تعرفين الياخذونه داعش لو يطلع منهم جنازة لو يطلع معلعل و خالد هناك مارسوا عليه أشكال التعذيب و تالي ذبوا على أبوه منتهي حتى مشي ما يمشي
- يااا خطية و شسواله أبوه
- من شافه هيچ أخذه و رجعوا للسعودية و ظل يراجع بي و سفره على أكثر من دولة ، ظل سنة ما يمشي و حالته حالة و حَبيبته من شافته هيچ عافته
- الحقيرة ، زين هُمه داعش ليش أخذوا؟
- چلاب أتهموا أنه عميل سري للجيش و هُمه دم سنونهم العساكر بكُل أصنافهم
- ليش يكرهوهم
- شمدريني ، بوكتها حتى صگر أخذوا ظل يمهم أسبوعين بَس ما أذوه حيل مثل خالد
- و بعدين شلون طلع؟
- أبويه دفعلهم فلوس و هدوا
- و ليش أبو خالد ما دفعلهم فلوس و طلعوا
- جرب يدفعلهم بَس ما فاد ، لأن هذولة جماعات كُل من يشتغل بكيفة فـ اللي أخذوا صگر غير اللي أخذوا خالد
- الله ياخذهم الأنذال ، أحچيلي فرات شصار وياكُم بذيچ الفترة؟
- شصار يعني أكلنه وحل و رجعنه للصفر ، هَسه نامي بعدين أكملچ
- لا فدوة أحچيلي
- يابه تعبان أريد أنام يالله نامي
- صار بابا
- شنو بابا؟ ، هاز كاركوچ آني
- هههههههههه ، مو ذكرتني بـ بابا ، من چنت زغيره هَم چنت ألزگ على گلبه أله يحچيلي قصة و هو يريد ينام خطية هههههههه
- هههههههه ، الله يرحمة حَبيبي
- آمين
نمنه و گعدنه الصبح و نفس الروتين طلعات و طبات و ونسه و مشى شهر عسلنا هيچ ، مخلينه مكان يعتب علينه ، حاولت أتناسى كلام الدكتورة حتى ما أنقهر و يبين عليه و أقهر فرات ويايه لأن شفته كلش فرحان و هو وياي ناسي الدنيا و البيها ، آني من أشوفه هيچ أفرح تلقائيًا ، أهم شي عندي هو مينقهر و لا يتأذة بَس ما أعرف الله شنو كاتبلنه ، هل يا تُرى أگدر أحمل و أفرحه ، بهالفترة هذا أكثر سؤال يتردد بمخي ، رجعنه للعراق و مشت أيامنا بأحسن ما يمكن ، مرات أشوف فرات حالته تتغير بَس ما أگدر أعرف شبي ، من أسأله يگُلي تعبان من الشغل لأن ديشتغلون حتى يوسعون شغلهم أكثر ، بيوم من الأيام طلع فرات العصر للشغل و رجع بالليل بوقت متأخر ، قبل ميجي سبحت و لبست بدلة نوم قصيرة و لونها أحمر ، ما أحب الأحمر آني بَس گلت أجرب ألبسه ، مشطت شعري و خليت عطر و ما خليت مكياج حبيت أكون على طبيعتي ، أنفتح الباب بَس چان مقفول ما أنفتح ، أجاني صوت فرات ...
- هذا آني عشگي أفتحي
گمت و رحت فتحت الباب و صرت وراه ، دخل فرات و آني سديت الباب و قفلته ، أنداريتله لگيته يباوع عليه ، بدون كلام سحبني عليه من خصري و دنگ خله راسه برگبتي ...
- أووووف أشتاگيتلچ يـَ عگالي راسي
- و آني هَم كلش أشتاقيتلك ليش تأخرت؟
رفع راسه و باوعلي و هو لازمني من خصري بإيديه الثنين ...
- عوفيني من التأخير هَسه ، هاي شنو طالعة تشگين شگ بالأحمر
- صدُگ يعني حلو عليه؟
- أگُلها تشگين شگ والله ، أنجعل محد غيرچ يلبس أحمر
- ههههههههه
- يلا حَبيبي أنزع ملابسك و بدل ، ذنيچ حضرتلك ياهن
مديت إيدي و سحبت الغترة و العگال من راسه ، رحت تمددت بفراشي و هو بدل و إجه نام على بطنه و خله راسه على صدري و إيده حضن بيها خصري ، متعود من أول ما تزوجنه مينام أله هيچ ، عاد آني أحضنه و أنام ، أنام مرتاحة و هو خال راسه على صدري ، مرات يگُلي خاف أضوجچ و أگُله بالعكس أصلاً تعودت ما أنام أله راسه على صدري ، حسيته نام بَس شوي و حچه ...
- عشگي
- هاا يـَ عُمري
- باچر آني رايح
- وين رايح؟
- لأربيل
- شتسوي بأربيل فرات !
گعد على حيله و رچه ظهره ع الديكور ...
- مو گلت من زمان لازم أروح أجيب السيارات
- و ليش أنت تجيبهن ، مو قبل ما چنت تروح
- إي مو گبل چنه مكلفين زلمة بهالمهمة الزلمة هذا ترك و هَسه لازم آني أستلم مكانه
- و أكيد ترجع بنفس اليوم مو؟
- لا وين ياريت ، ع الأقل يرادلي أسبوع يلا أكمل الإجراءآت كُلها و أجي
- أهوووو فراات و تعوفني أسبوع كامل ، آني تروح للشغل چم ساعة ما أتحمل غيابك عني أنوب تروح لأربيل و أسبوع هم
- شسوي يا گلبي غير هذا شغلي ، قابل آني مكيف أعوفچ بَس لازم أروح ، هو أسبوع أنتحمله شلون ما چان
- و أكيد راح تظل تروح
- إي كُل فترة لازم أروح
- إيي حلوووو حلووو كلش
عفته و درت وجهي للجهه الثانية ، شوي و تقرب مني ...
- أريد أنام
- و نام شسويلك يعني
- مو راح أروح لأربيل و أظل أسبوع غاد ، أريد وداعية
سكتت عنه ما حاچيته ، رجع گال ...
- شنو ما تودعيني؟!
- لااا ما اودعكك فراات ما ااودعكك ناام و عوفني بهمي
شوي و سحبني عليه من خصري ردت أحچي و چان يدنگ بسرعة و يبوسني ، ما نطاني گلبي أعوفه و أقسى عليه ، حضنته و بادلته الحركة
الصبح حسيت و فتحت عيوني ، باوعت فرات ما موجود ، گمت لميت شعري و لبست الروب و چان يطلع فرات من الحمام دينشف بإيديه ، شافني و أبتسم ...
- صباح الخير يـَ روحي
أبتسمتله : صباحي أنت و عيونك الحلوة
أجه عليه حضني و باسني من خدي ...
- يلا حَبيبي حضريلي جنطة الملابس هم تا ألحگ أطلع
- أحضرلك الملابس
گلتها و نزلت راسي مقهورة ...
- إي گلبي حضريلي ياها
عفته و رحت للحمام غسلت و طلعت لگيته ديصلي ، رحت طلعت الجنطة و گمت أحضرله بملابسه ، هو كمل و راح حتى يبدل ، آني هم كملت و بدلت و هو شال الجنطة و نزلنه لگينه الكُل گاعد بالصالة و البنات بالمطبخ ديحضرن الريوگ ، رافد گاعد ع القنفة و يمه أبنه ، يظل يمه أربعة و عشرين ساعة ميفارگه ، راحله فرات ...
- يول كافي تحوبز يمه مو لعبت نفسه للطفل
- أهووو هَم چك نفسه ، ياخي أبني ما تلعب نفسه مني بَس أرتاح أنت
- دشو جيبه خل أشوفه
أخذه فرات و شاله بحضنه و صار يناغي بي و يحچي وياه ، فرات كلش يحب الأطفال ، قبل مُلهم چان متعلق كلش بجهال صگر و هَسه أكيد هَم راح يتعلق بـ مُلهم ، أجو خالو علي و خالة نجاة ، خالة شافت فرات شايل مُلهم أبتسمت و گالت ...
- حَبيبي يوم الأشوفك شايل أبنك بحضنك و تفرح بي
- إن شاء الله ماما إن شاء الله
بهاللحظة دعيت من كُل گلبي تطلع الدكتورة متوهمة و آني مابيه شي و أگدر أحمل و ميصيرلي شي لا آني و لا الطفل
مُلهم گام يبچي حاولوا يسكتوا الولد بَس ما فاد شكلة جاع ، أجت نَفس و أخذته من فرات ، آني عفتهم و رحت للمطبخ أساعد رُسل ، حضرنه الريوگ و حطينا ، تريگنه و كملنه حچه خالو علي ...
- هاا فرات راح تمشي
- إي يابه
- تصل بالسلامة وليدي و عود من تصل خابرنه
- صار حجي
راح حتى يودع خالة نجاة ...
- سوق على كيفك ماما و ديربالك على نفسك
- إن شاء الله حَبيبتي
ودع الكُل و أجه عليه ، باسني من راسي و گال ...
- ديري بالچ على نفسچ و لا تضوجين هو أسبوع و تلگيني يمچ بإذن الله
- تمام ، أنت هَم دير بالك على نفسك
- صار
- و أبقى وياي على تواصل و من أدگ عليك جاوب بسرعة تمام
- تمام
شال جنطته و طلع ، راح و أخذ گلبي وياه ، صَح هو أسبوع و يجي بَس والله تعودت عليه كلش ، ما أگدر أنام إذا ما هو بصفي ، خصوصًا أنُ آني أبتعدت عنه هواي و هَسه ماريده يبعد عني أبد ، أريد أعوض أيام البُعد ، رحت على نَفس چانت گاعده بغرفتها دتبدل لأبنها ، بدلتله و كملت و گالت ...
- عشق فدوة بَس أبقي يمه عينچ عليه بين ما أغسل ملابسه
- تمام حَبيبتي روحي آني يمه
أخذت ملابسه و راحت و آني تقربت يمه ، حاطته ع الچربايه رحت گعدت يمه و هو يلاعب إيديه بالهوا ، عمره شهر و نص كلش صغير ، مديت إيدي و لزمت إيده الصغيره و هو چلب بأصبعي ، بقيت أباوعله و أفكر يا ترى آني أگدر أصير أم ، شوي و أجت نَفس گعدت بصفي ع الچربايه و تربعت ...
- أحچيلي عشق ، أنتِ شبيچ من يوم ما أجيتوا من السعودية و أنتِ مو على بعضچ
- شبيه ، مابيه شي
- لا بيچ ، متگدرين تضمين عليه لأن حاسه بيچ آني ، إذا تحبين تحچين و تفرغين اللي بگلبچ أحچي آني أسمعچ
عدلت گعدتي و نزلت راسي ...
- والله ما أعرف شنو أگُلچ
- فرات مزعلچ؟ ، موزين وياچ؟
- لاااا بالعكس فرات كلش زين وياي و ميزعلني أبد
- لعد شبيچ؟
- راح أحچيلچ بَس فدوة نَفس ماريد جنس مخلوق يعرف باللي راح أگوله حتى ماما و خصوصًا فرات ، فرات ماريده يعرف أهم شي هو ميعرف
- ليش ولچ أحچي خوفتيني !!
- باعي ، من چنه بالسعودية رجعتلي الآلام اللي برحمي و أخذني فرات ع الدكتورة و هناك گالت ...
نزلت راسي و أحس انهضمت كلش ...
- شگالت أحچي ولچ؟!
- گالت أنُ رحمي متأذي بسبب الضرب اللي تعرضتله ، و گالت أنُ ميصير أحمل لأن خطر ، لو يوگع الطفل ميبقى لو آني أموت بالولادة لو الطفل
- ياااا ولچ ليش هيچ !!
- كُله بسبب الحيوان فؤاد هو دمر حياتي لچ والله دمرها ، بالبداية حرمني من فرات و بعدني عنه سنة كاملة و هَسه إحتمال أنحرم من الأمومه بسببه
نزلت دموعي و بچيت بقهر ، صارت تهدي بيه نَفس ، هدأت شويه بعدين گالت ...
- ليش متريدين فرات يعرف؟ ، عشق تره لازم يعرف و من حقه هَم
- لاااا نَفس لاااا ماريده يعرف
- ليش ولچ
- إذا عرف ما راح يخليني أحمل و آني أريد طفل منه ، أريد أكون أم لأبنه ، حتى لو أموت ميخالف بَس المهم تبقى ذكرى مني يم فرات
- لچ والله ما أعرف شلون تفكرين أنتِ ، خلي يعرف حتى يوديچ يعالجچ
- لاا نَفس فراات ميعررف فدووة ماريده يعرف ، أوعديني ميعرف فدوة نَفس
سكتت و صارت تباوع لـ مُلهم ...
- أوعديني نَفس
- تمام أوعدچ ميعرف
للظهر و خابر فرات گال وصلت أربيل ، تطمنت أنه وصل بخير و سلامة ، ثاني يوم ، اليوم مشى طبيعي بَس آني ضايجة ، محد سأل ليش ضايجة لأن الكُل يعرف ، العصر و قرروا خوالي أنُ يجيبون لحم و يشوون للعشه ، طبعًا هُمه اللي يشوون ، طلعنه اللحم و حضرنالهم ياه و أخذه خالو علي هو سوه التتبيله مالته و الملح و هالسوالف كُله هو ما خلانه نتدخل أحنه ، طلعنه بره لگينه خالوا جسام محضر المنقله ، أخذ اللحم و خلاه عليها و بده يشوي ، أحنه فرشنه حصيرة چبيره بالحديقة و دواشگ و گعدنه ، أجوا رافد و صگر و گعدوا ويانه ، دگ عليه فرات ، جاوبته ...
- هلا
- هاا شلونچ
- الحمدلله و أنت
- على الله ، هاي وين أنتِ شو يمچ هوسه !
- أحنه گاعدين كُلنه بره بالحديقة و خوالي ديشون لحم
- ههههه صدُگ ، شو بالله أفتحي كامره خل أشوفكم
فتحت كامره ، شافهم و حچه ...
- إييييه ما تشون أله من يغيب فرات ، يا حيف والله
سمعه خالو جسام و جاوبه و هو يگلب باللحم ...
- يلا ميخالف لا تزعل عود نصوره و ندزلك ياه برسالة
- شني عمي تضحك عليه أنت
شوي و كتبلي رسالة يريدني أفوت جوه ، قريتها و أبتسمت ، هو عض على شفته و گال ...
- يلا يولي
فتت جوه و صعدت لغرفتنه و گعدت ع القنفه ، هو عدل گعدته و گال ...
- أنزعي الشال خل أشوف شعرچ
نزعته و فتحت شعري نثرته على كتوفي ، هو شافه و غمض عيونه و رجع فتحهن و گال ...
- أيااابه شمشتاگلچ
- والله آني هَم كلش مشتاقتلك
- آخخخ يول يابه أندار عليچ
- شلون يعني تندار عليه؟!
- يعني أروحلچ فدوة يـَ البغدادية
- ههههههههه أموت عليك يـَ الأنباري
- إيي يلا سولفيلي شبيچ
- مابيه شي
- لا بيچ آني أعرفچ ، يلا عشگي سولفي
- حَبيبي والله مابيه شي بَس ضايجة لأن أنت مو يمي
سكت و فرك وجهه ، باوعلي و حچه ...
- رغم أدري مو هذا السبب بَس راح أعديها هالمره
- لا والله حياتي هو هذا السبب
ظلينه نحچي آني وياه فوگ النص ساعة ، بعدين نهينه المكالمة و نزلت و رحتلهم لگيتهم مكملين و ديحطون بالعشه ، حضرنه العشه و حطيناه و گعدنه نتعشه ، كملنه و لملمنه المواعين و الغراض و بقينه گاعدين نتعلل بالحديقة بعدين كلمن راح لغرفته و نمنه
ثاني يوم أجتني نَفس تريدني أروح وياها للسوگ ناقصها شوي ملابس و شغلات لأبنها ، وافقت أروح لأن آني هَم ناقصني كم غرض ، بَس قبل ما أروح خابرت على فرات و گتله ، بدلنه و طلعنه وصلنه رافد و راح لأن عنده شغل ، أمشي و أحس بدوخة و نفسي تلعب ، هاي من أول ما أجينه من السعودية صارلي هيچ ، مرات أگول خاف حامل بَس بعدين أنفي هالفكرة لأن ما متأكدة ، دخلنه للمول آني و نَفس و هي راحت تگلب بالملابس و آني دخت كلش و لعبت نفسي ، عفتها و رحت للحمامات و هي تصيح ورايه بَس ما أگدر أحاچيها ، دخلت و أستفرغت لحد ما شوية أرتاحيت طلعت و لگيتها واگفة تنتظرني ، شافتني و أجت ...
- هااا ولچ شبييچ؟؟
- مادري نَفس ، دخت كلش و لعبت نفسي
گعدت ع الكرسي و هي واگفة يمي ، حچت ...
- من شوكت تحسين بهالأشياء؟
- من أجينه من السعودية لحد الآن
- يعني حيصير شهر ، خاف حامل ولچ؟
- ما أدري ، آني هَم شاكه بهالشي
- إي لعد گومي نتأكد
- وين؟
- للمختبر تسوين تحليل حمل
- مو شلون غير يجي رافد يوصلنه
- ميحتاج هذا هو بالفرع قريب
گمت وياها و طلعنه من المول و رحنه للمختبر ، أنتظرنه لحد ميكملون الناس القبلنه ، بعدين رحت سويت التحليل و گعدنه ننتظر لحد ما طلعت النتيجة و أنصدم أنُ آني حامل حيصيرلي شهر ، طرت من الفرح أحس الدنيا مسايعتني و أضحك ، حچت نَفس ...
- مبروك حَبيبتي بَس ...
- لتحچين شي نَفس ، كُلشي بإيد الله ، آني مخليه هالموضوع يم الله و اللي كاتبلي ياه آني أرضى بي ، المهم آني هَسه حامل ، هذا ثمرة حُبنا و سنين الإنتظار آني و فرات
- الله يهنيچ يا عُمري و ينطيچ على گد نيتچ
- آمين
رجعنه للمول و آني كلش فرحانه ، أشتريت الغراض اللي أريدهن و حتى أشتريت ملابس أطفال صغار ، أشتريت كم قطعة بناتية و ولادية لأن ما أعرف شنو جنس الطفل ، كملنه و أجه رافد رجعنه للبيت
دخلت للغرفة و بدلت و ضميت الغراض اللي جبتهن ، دگ تيلفوني چان فرات جاوبته ...
- أفتحي كامره بسرعه
- ههههههه تمام
فتحت باوعلي و گال ...
- شلونچ يـ عگالي راسي
- آني كُلش زينة حَبيبي ، و أنت
- آني زين الحمدلله ، هاا شو فرحانه و ماكو ضوجة شجايچ
- إي كُلش فرحانة والله
- شصاير
- فراتي آني ...
سكتت ما ردت أگُله هَسه ، ردت أگُله من يجي وجه لوجه و أشوف الفرحة بعيونه ...
- هااا أنتِ شنو دحچي شكو؟؟
- آني أحبك و أموت عليك و أعشقك هَم
- ههههههههه درينه يابه درينه
بقينه نحچي آني وياه و هو يتغزل بيه و گام يتماده بغزله و حچيه و آني أضحك عليه و هو يگُلي أصبريلي بَس خل أجي آني أعلمچ
مشت الأيام و آني و فرات على تواصل دائم ، باليوم نحچي أكثر من مره ، مرات ميصيرله مجال بَس من يفرغ آني أدگ عليه ، مر الأسبوع مثل الشهر على گلبي و اليوم يجي فرات ، جهزت نفسي و كشخت و عطرت الغرفة ، سمعت صوت بره ، فتحت البرده و باوعت فرات وصل و دخل بسيارته للحوش ، طبگها بالگراج مال السيارات و نزل و فات جوه ، بقيت أنتظرة ما يقارب العشر دقايق و سمعت صوت خطواته ع الدرج ، شوي و فتح الباب و فات ، بسرعة رحت حضنته و هو شالني من خصري بإيد و الإيد الثانية لازم بيها الجنطة ، ذبها و حضني بإيديه الثنين ، باسني برگبتي و رفع راسه وخر شعري عن وجهي ...
- ياا بَعد رويحتي ميت عليچ والله
- مشتاقتلك گد رحمة الله والله ، عبالك مو أسبوع چنه شهر
ضحك و رجع راسه برگبتي و آني حضنته و بسته من چتفه ، نزلني و گال ...
- شلونچ حَبيبي
- بخير يـَ عُمري ، و أنت شلونك أكيد تعبان
- تعبان بَس بشوفتچ راح التعب كُله
ساعدته ينزع الستره و أخذت منه التيلفون و المحفظة و راح أخذ ملابسه محضرتله ياهن قبل لا يجي و فات للحمام ، أخذت الجنطة مالته و فتحتها رجعت ملابسه بالكنتور و ضميت الجنطة ، شوي و طلع من الحمام ...
- نعيمًا حَبيبي
- شُكرًا
راح وگف گدام المرايه ينشف بشعره ، رحت وگفت يمه ...
- فراتي
- هاا عُمري
- أكو خبر يجنن أريد أگُلك عليه
شال المشط و صار يمشط بشعره ، حچه ...
- إي گولي حَبيبي أسمعچ
- آني حامل
ذب المشط و ألتفت عليه ...
- هااا شنووو؟؟؟
- آني حامل
- حامل يعني حامل؟؟
و يأشر على بطنه ، آني خربت من الضحك عليه ...
- هههههههههههههه إي فرات حامل شبيك ، أستوعب عاد ههههههه
- ياااااا الله
گال هيچ و شالني و صار يفتر بيه و هو يردد ...
- يوولووو رااح أصيير أب
- هههههههه ولك نزلني حيوگع الطفل
- لا لا خل أنزلچ عجل
نزلني و خله إيده على بطني و يباوعلها ...
- يا الله ما مصدگ
- لا حَبيبي صدگ حيصير عدنه طفل
دارني و حضني من وره ، خله إيده على بطني و صار يمسح عليها ...
- فرحان حَبيبي؟
- حييييل فرحان مو شوية ، هذا الطفل اللي ببطنچ ثمرة حُبنا و صَبرنه
- الحمدلله يـَ روحي
- أهلي يدرون؟
- لا مگلت لأحد بَس نَفس تدري لأن چانت وياي من حللت
- عجل أمشي تا نگوللهم
نزلنه جوه و گلنالهم و الكُل فرحلنه ، أجت خالة نجاة باركتلي و راحت حضنت فرات و باركتله و الولد و خوالي ، ماما أجت و باركتلي هَم ، كلش فرحتلي و گعدت و گامت توصي بيه هيچ سوي و ديري بالچ على نفسچ و بدت تعلمني من هَسه
مشت الأيام و چانت كُلها فرح و سعادة علينه ، و اليوم آني أليه خمس أشهر حامل و طلع بيه توم ولد و بنيه و وضعي و وضعهم لحد الآن كلش زين حتى گلت أنُ الدكتورة متوهمة و كلامها غلط ، فرات من سمع طار من الفرح مو مصدگ أنُ بأول حمل إليه حيجينه توم ، و يبقى يوصي بيه أربعة و عشرين ساعة و من يطلع خارج الأنبار يتصل عليه على عدد الساعات و يگُلي ديري بالچ على جهالي و آني ازعل و أگُله متحب بَس جهالك و نسيتني و من هالحچي و هو يگعد يبررلي و أحبكم أنتِ وياهم و من هالسوالف
تحدد عرس عبدالله و ريان و خابروا عزمونه كُلنه و قرروا يروحون بَس آني أبد مو هاويه الروحه و لا أريد أشوف خلقة ريان كارهتها كُلش خصوصًا بَعد ما عرفت أنُ هي اللي سوتلنه السِحر و هي السبب باللي صار بيناتنا و مرض فرات كُله من وراها ، ما ردت أروح بَس فرات ما قبل گال إذا ظليتي لازم آني هَم أظل وياچ و عيب هذا أبن خالي مگدر ما أحضر عرسه و أفرحله ، قبلت أروح بَس علمود فرات
قررنه نروح قبل العرس بيوم ، جهزنه غراضنه و باچر من الصبح نطلع ، فرات متمدد ع الچربايه ديقره كتاب و آني گاعده گدام المرايه أمشط بشعري ، كملت و رحت تمددت يمه ، هو ذب الكتاب و تقرب حضني ...
- حَبيبي
- روحه
- شنو راح نسمي الجهال بَس يجون؟
- شرايچ أنتِ تسمين الوليد و آني أسمي البنيه
- تمام موافقة ، سنو حتسمي البنوته؟
- البنوته مفكر أسميها رَها
- رَها ، أسم كُلش حلو و غريب اول مره أسمعه
- إي هذا أسم نادر
- أمممم و آني حسمي أبننا فاروق ، شرايك؟
- يجنن هالأسم ، شكو أحلى من أسم الفاروق و هو على أسم سَيدنا عُمر
- إي هو سميته لأنه من أسماء سَيدنا عُمر
- عاش ذوقچ يابه
أبتسمت و حضنته و نمنه
ثاني يوم گعدنه الصبح نزلنه و لگينه ربعنه مخبوصين على گولت فرات صرت أحچي مثله ، اللي يسوي ريوگ و اللي يدور ملابسه و اللي يصلي و اللي يسولف و كلمن بجهه ، ألتمينه ع الريوگ و گعدنه ناكل ، كملنه و طلعنه تجهزنه و أخذنه الغراض و طلعنه متوجهين للبصرة الفيحاء ...
********
يتبع ...
18.kij
تعالو أنستا و اللي يجي يدخلي خاص يگُلي آني جديد علمود اضيفه كلوز لأن نشري اللي يخص الرواية كُله بالكلوز
سحر الدليمي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!