رواية عشگ الفرات ( عِندما تَهوى القُلوب ) الفصل الخامس والسبعون 75 - بقلم سحر الدليمي

لا تنسون التصويت و التعليق بين الفقرات
قراءة مُمتعة ♥️

***

- تذكروا دائمًا أن النهايات ليست كـ البدايات .

***

بَعد مرور خمس سنوات ...

عشق : فرات وصل الجهال ع الروضة فدوة راح يتأخرون

فرات : صارلي أسبوع آني أوصلهم اليوم وصليهم أنتِ آني عندي شغل

- والله مگدر راح أتأخر إذا وصلتهم ، وصلهم أنت حباب

- قميصي الأسود وين رحمة للحمزة؟؟؟

- يمك بالكنتور ، اوووف تعال فاروق تعال ماما خل أسويلك القميص زين

- لك ماما هاي شلون مسوي مو هيچ

- ماما مو ميقبل يصير

- رَهاوي حَبيبي جيبيلي المشط حتى أمشط شعرچ يلا حتتأخرون

- ماااا مااريد ، گتلكم ماا أروح

- أووووف ، فرات شوف بنتك تره ورمته لگلبي

شوي و أجه فرات ، راح لـ رَها ، گعد يمها و لزم إيديها ...

- شبيها بنيتي زعلانة؟

- ماريد أروح للروضة

- السبب؟

- مو حلوة و ماحبها

- لا بنيتي ما يصير لازم تروحين و تتعلمين تا بعدين تسجلين بالمدرسة

- گتلكمم مااريد

عافتنه و راحت للغرفة ، لحكَها فرات و آني بقيت أبدل لفاروق ...

- أوووف يمه فديته بَس هو اللي مريح كَلبي

ضحك و و حضني و باسني من خدي ...

- ماما آني حييييل أحبچ

- أممم و بابا متحبه؟

- لا هم أحبه

- عفيه بالحباب

شوي و طلع فرات و وياه رَها تضحك مبين قنعها ، أجت عليه بدلتلها بسرعة و مشطت شعرها شلون ما چان لأن تأخروا كلش و فرات واگف ع البلب و يصيح يلا و يلا صرعني ، كملتلها و لبست جنطتها و راحت ، گادهم فرات واحد على يسارة و واحد على يمينه و طلعوا ، رحت للغرفة بسرعة بدلت و تجهزت و طلعت لشغلي

***

مُهره
صار ساعة أركض وره ريسان أريد بَس ألزمه حتى ابدل ملابسه ميقبل موتني ، يطلع من غرفة و يطب بغرفة و آني وراه ، آخر شي طلع بوجهه شهم ...

- هووب هووب ، لزمتك

شاله و ريسان يدفع بي ...

- بابا عوفنيي عوفنيي ماريد

- ميصير وليدي لازم تبدل ملابسك حتى نروح للدكتور يشوف إيدك شلون صارت

- مابيه شي ماااريد أرووح

بقى يصيح و يدفع بينه آنـه و شهم لحد ما فجاة دخلو عمو سلام و وياه بابا ، ريسان شافهم و ظل يتحايل و يصيح لحد ما نزله شهم و راح ركض عليهم ، حضنه بابا و گال ...

- لاه لاه ولكم شمسوين بهالولد ، ريسان شو عاينلي جدو شمالك

- جدو بابا يريد ياخذني للدكتور و آني ماريد أروح

رفع راسه بابا و باوع لـ شهم ...

شهم : آنـه بَعد مالي علاقة أنتوا حيروا بي ، ولكم هذا أبني عنودي لو بَس أعرف على منو طالع

سلام : طالع عليك والله يـَ بويه عليش مستغرب

- آنـه؟؟

- إي أنت ، من چنت زغير چنت أعند منه

بقوا يسولفون و بابا قنع ريسان و هو أخذه للدكتور بطريقة و بعدين يروح للشركة و أكيد ريسان وياه ، هاي معوده كل ميجي ياخذه وياه للشركة و مرات ياخذة للألعاب و أربعة و عشرين ساعة يفترون هو وياه

***

من أول ما أجيت ع الدنيا و آني محروم من الحنان و محروم من كلمة بابا و ماما ، حياتي بين المدرسة و البيت ، ما ألعب مثل باقي الأطفال و لا أحچي و من أسوي شي غلط أو ميعجبهم بيبي تعاقبني و العقاب يكون لو تچوي إيدي لو تحرمني من الأكل ، عشت طفولتي كُلها هيچ ، ما شفت أحد زين وياي غير عمتي رجاء ، هي الوحيدة اللي تحبني و تهتملي و أحسها مثل أمي أللي ما أعرفها أصلاً ، مرات تجي علينه هي و بنتها فجر ، تسويلي الأكلات اللي أحبها و تشتريلي ملابس ، آني هذا كُله ميهمني ، اللي يهمني أشوف فجر بَس ، لمن تجي علينه آني أتونس وياها و أنسى كُلشي

أسمي أكبر ، عُمري ٧ سنوات صف أول إبتدائي ، أمي و أبوي ماتوا بحادث من چان عُمري شهر ، ما أعرفهم شايفهم بَس بالصور ، عايش ويه جدي و بيبيتي و عمي اللي يبقى نايم ميگوم من فراشه أبد ، من أسأل عنه جدو يگلي مشلول و ميگدر يمشي

خلص دوام المدرسة و طلعنه ، طلعت أوگف بالباب أنتظر السايق بَس تأخر حيل ، بقيت أنتظره شگد و الشمس حاره كلش ، ما أجه و الطلاب كلهم راحوا ما بقى أحد بَس آني ، شلت جنطتي و تمشيت للبيت ، طولت يلا وصلت و من وصلت و فتت تلگتني بيبيتي ...

- ويين چنت ولكك ، آنـه مو گايلتلك لا تتأخر

- بيبي والله ما تأخرت بَس السايق ما أجه و طلعت مشي

- أشش لا تراددني حيواان

ردت أحچي بَس ما خلتني ضربتني راشدي بكُل قوتها ، عفتها و رحت لغرفتي أبچي ، بقيت أبچي لحد ما نمت بدون ما أتغدة و بدون ما أبدل حتى

***

عشق
تغدينه و كملنه ، لميت المواعين و أجو الجهال يشيلون و ينطوني ، كُل مره هيچ يسوون من يشوفوني أشتغل يجون يساعدوني رغم أنهم زغار ، نطوني المواعين و راحوا يلعبون بغرفتهم ، غسلت المواعين و كملت و رحت لغرفتي ، وگفت يم الكنتور داطلع ملابسي ، ما حسيت أله فرات وراي ، حضني و خله راسه برگبتي ...

- فراتي وخر خل أطلع الملابس

- ما أوخر

رفعت إيديه حتى أطلع الملابس ، أخذهن و چتفهن بين إيديه ...

- فرااات

- مشتاگلچ

باسني بوسه خفيفة و منحس أله و الباب أنفتح بقوة ، بسرعة أبتعد عني ، فاتوا فاروق و رَها يصيحون ...

- بابا بابا بابا بابا

- ها ها ها ها ها

رَها : بابا نريد نگُلك شي زغيروني

تحچي و تأشر بأصابعه علساس فد شي زغير ...

فرات : أولاً و گبل ما تگُلولي هالشي لازم نتعلم گبل ما نفوت على أي غرفة أو مكان ندگ الباب و منفوت أله اللي بالغرفة يسمحولنه ، تمام؟؟

حچوا ثنينهم بصوت واحد : تمام

- ما جاي أسمع علوا صوتكم

- تماااام

- عفيييه ، و هَسه يلا گولوا شعدكُم

فاروق : ضايجين و نريدك تطلعنه للمزرعة و نشوف الفرس مالتك

باوعلي فرات : هااا شتگولين أم فاروق؟

- إي نطلع ليش لا ، الجهال من زمان ما طلعوا

رجع يباوعلهم و يسوي نفسه ديفكر ...

رَها : يلا بابا حَبيبي وافق

- تمام العصر نروح

هُمه سمعوا هيچ و گمزوا لحضن أبوهم واحد على يسارة و الثاني على يمينه ...

فرات : هههههههههه آخخخ شحبكُم يولو

فاروق : ماما و أنتِ هَم تعاي

فتحلي إيديه الزغار و يأشرلي أجي ، رحت و حضنتهم كُلهم

العصر بدلنه و كملنه ، آني لبست فستان نيلي و رَهاوي لبستها فستان أبيض ، فرات لبس دشداشة جوزية و غترة صحراوية و عگال ، و فاروق هَم لبسه دشداشة صحراوية و لفل أله چراوية بغتره بيضة زغيره على گده ، أباوعله طلع يجنن بالزي العربي ، إذا و هو طفل هيچ باچر من يكبر شلون يطلع ، كملنه و طلعنه

وصلنه القرية و طبگنه السيارة يم البيت و رحنه نتمشى بالقرية ، وصلنه النهر و بصف النهر ع الجرف أكو شجرة ، گال فرات ...

- هذا مُكاني المُفضل ، كُل ما أضوج أجي هين

رَها : بابا المكان حيل حلو

- إي بَس بنيتي أحلى مو صَحيح

- أكيد رَهاوي بنت فرات و عشق منو بجمالها

تحچي و ترمش بعيونها ، رحت حضنتها ...

- ولكم هاي بنتي فد وحدة والله

ضحكت و راحت تتمشى هي و فاروق ...

- لتبعدون ماما أبقوا هنا

فرات لزم إيدي و صرنه نتمشى وراهم ...

- فرات

- هاا يـَ عگال راسي

- تدري لحد هَسه مو مستوعبة أنُ أحنه سوه و جهالنه ديلعبون گدامنه ، أحس روحي بحلم

- لا يـَ عُمري مو بحلم أحنه بالواقع

- الحمدلله

- الف الحمدلله و الشُكر اللي حفظلي ياچ بَعد كُل الصار و خلاچ من قسمتي

- لأن اللي حبني رجال من صدُگ ، وفه بوعدة و أخذني من نص النار

بقينه نتمشى بالقرية و أهل القرية كُل ميمر أحد يسلم على فرات و يگعد يسأل بي على عمو جسام و عمو عَلي ، رحنه للبيت و فتنه ، و صاحوا الجهال يريدون يشوفون الفرس ، راح فرات و شوي و أجه جابها وياه شدادلها السرج ، صاح فاروق ...

- بابا أريد أصعد

رَها : بابا و آني هَم

- ديلا تعالوا

- لا فرات عفيه خاف يوگعون

- ما يگعون يمعودة آني وياهم

شال فاروق و صعده على ظهر الفرس و بعدين شال رَها و صعدها وراه ، حچه فاروق ...

- رَهاوي چلبي بيه خاف تگعين

حضنته رَها و هو چلب بإيديها ، أبتسم فرات و گال ...

- عفيه وليدي هيچ اريدك ، تخاف على أختك و تحميها من كُلشي ، أختك و أمك بأمانتك مو فاروقي تذكر هالشي و لا تنساه

- صار بابا

گاد الفرس و صار يمشي بيهم و هُمه فرحانين ، شوي و نزلهم و صَعد هو و صار يفتر بالمكان و الجهال يباوعون عليه و يهوسوله متونسين كُلش ، أجه يمي و نزل و گال ...

- تصعدين؟

- هو آني عاجبني أصعد بَس عالية ما أگدر

- ماعليچ آني وياچ بَس حطي رجلچ هينه و عوفي الباقي عليه

رحت تقربت من الفرس و خليت رجلي و رفعت نفسي شوي بعدين فراتي رفعني أكثر و گدرت أصعد ، گاد الفرس بيه ، تمشي بهدوء و هو كُل شوي يباوعلي و يضحك و الجهال يصفگون

بقينه بالمزرعة لليل رجعنه و بطريقنه أخذنه عشه لأن تأخر الوقت و ما ألحگ أسوي عشه

تعشينه و كملنه و رحت للهول لگيت فرات گاعد يتابع مسلسل بدوي و يكرز حب ...

- فرات

أحچي وياه ميرد مندمج ويه المسلسله حتى ما حَس بوجودي ...

- فراااات

ألتفت عليه : هااا ، شوكت جيتي

- طَبعًا متدري شوكت جيت غير عقلك ويه المسلسله

- ههههههههههه

- أگول

- گولي يا بَعد كُل اليگولون

- فرات لا تتغزل خليني أعرف أحچي

- ديلا أحچي

- خابرتني مُهره تگول باچر حيجون هي و شهم

- صدُگ ، ما گالي شهم المغرب حچيت وياه

- ما أعرف عاد

- إي حياهُم الله ، شتگولين لو نعزم ربعنه و نسوي جمعة مَرة وحدة؟

- إي ليش لا نعزمهم

***

ريان
مشت حياتي ويه عبدالله و حبيته و صارت عدنه بنيه عمرها أربع سنوات و سميناها مَهى ، ما چنت متوقعة أنسى فرات و أحب أحد غيره ، بَس عبدالله بأسلوبه وياي و حنانه و دلاله و حُبه خلاني أموت عليه مو بَس أحبه

چنت گاعده بغرفتي ويه بنتي جاي ألاعبها ، فجأة أنفتح الباب و فات عبدالله معصب حيل و وجهه أحمر ، مَهاوي أخترعت من دخلته هاي ، هو دحگلها و گال ...

- مَهاوي روحي لغرفتچ

- بابا جاي نلعب آني و ماما

نتر بيها : مَهى گتللچ رووحي لغررفتچ ، عندي حچي ويه أمچ

دحگتلي مَهى و الزعل واضح بعيونها ، بستها ...

- روحي حَبيبتي و هَسه أجي و نكمل لعبتنه

هزتلي براسها و فتحلها الباب عبدالله و طلعت ، سده و جه عليه گضبني من إيدي بقوة ...

- آخخخ إيديي شبيك عبدالله

- وللچ أنتُ شمسووية من مصاايب هااا ، ليشش كُل هالسنيين ضاامه علييه و ما گايلتليي هااا أحچييي

- شبيك عبدالله شمسوية آني

- هااا سألتينيي شمسوية ، تذكرري شسويتيي بفراات و مررته ، هااا تذكرتيي لو أذكررچ

- وللچ تروحييله تالي الليل بملااابس گحـ *** و تصوريين وياااه و تتهميننه ، لااا و گبلهااا تسويلهه سِحر و لو ماا قدررة الله چاان هَسه هو مييت ، و خليتيي عششق تكررهه و تفصخخ الخطووبة ، وللچ بَسس فهمينيي أنتِ شنووو شنووووو؟؟!

- عبدالله والله چنت غبيه من سويت هالشي ، ما فكرت شراح يصير و تندمت ع اللي سويته والله

- شيفيد الندم ولچ شيفيد ، طلعت متزوج شيطان ولكم شيطااان الله أكبر

دفعني ع الچربايه و مشى ، گمت بسرعة لزمته من إيده بَس فلتها مني و مشى طلع بره الغرفة و بره البيت كله لأن سمعت صوت السيارة ، گعدت أبچي و حايرة شلون أفهمة اللي صار ، و من بَعدها عبدالله تغيرت معاملته وياي و صار ميطيق يشوف وجهي و أكثر من مره گالي ...

- لو ما بنتي چان طلگتچ و خلصت منچ و أصلاً آني أگدر أسويها و آخذ الطفلة يمي و أحرمچ منها بَس آنـه مو همجي و ماريد بنتي تربى بعيد عن أمها

***

عشق
گعدنه الصبح و طبعًا آني أخذت إجازة من شغلي ، بدلت للجهال و كملتلهم و أخذهم فرات للروضة ، و آني گمت أنظف بالبيت ، بين ما رجع فرات آني كملت و رحت للمطبخ أحضر للغدة ، أجاني فرات ...

- هاي شجاي تسوين؟

- داسوي غدة

- لا عوفي تتعبين وحدچ ، أجيب من المطعم

- فرات مو هاي عزيمة و الأفضل نطبخ هنا

- ماعليچ آني أخليهم يطبخون طبخ مرتب ما أجيب حي الله شي

رحت يمه خليت إيدي على صدره و گرصته من خده ...

- فديت حَبيبي اللي ميريد يتعبني

- هو آني شعندي غيرچ ، مريتي و أم جهالي

دنگ باسني و راح للثلاجة ...

- شتريد

- أريد عصير ، وينه؟

- روح أگعد بالحديقة هَسه أصب و أجيبلك

للساعة بالـ 11 و راح فرات حتى يجيب الغدة ، أجه و جايب وياه الجهال ، بين ما بدلتلهم و غسلوا وصلوا جماعتنة ، طلعت أسلم عَليهم و الجهال يركضون گدامي ، ما صدكوا أجه خالوا عَلي و خالة نجاة و ماما ، كلش يحبوهم ، سلموا ع الكُل و راحوا يلعبون ويه سيف و لارين و مُهاب أبن رافد الزعير ، أما مُلهم چان كُلش هادئ و ميختلط بأحد ، من أول ما وصل و هو لازگ بخالو جسام ، كُلش متعلق بي و حتى نوم ينام يمه ، ما أعرف عجزت أفسر طبيعة مُلهم ، هو طفل محبوب كُلش و ذكي بَس هادئ إلى أبعد الحدود و ميحب يختلط ببقية الجهال

شوي و وصلوا شهم و مُهره ، أستقبلناهُم و گعدنه كُلنه بالحديقة ، جمعة من العمر ، متنونسين على بَعض ، وره شوية گمت حتى أحضر الغدة و أجن يساعدني نَفس و رُسل و بعدين أجت مُهره ، حطينه الغدة و گعدنة نتغدة و نسولف لحد ما كملنه و شلنه المواعين و لمينه المطبخ و رجعنه گعدنه ، حچه رافد ...

- إي أبو الفاروق سمعت بيك تسوي چاي طيب ، دشو گوم ضوگنه ياه

- مو تدلل عزيزي أبو مُلهم

- حَبيبي الله يعزك

هُمه صَح هَسه يحچون بأحترام و بدون غلط بَس لأن الجهال موجودين لو ما الجهال چان حچوا حچي ما ينلبس عليه عگال

،،،

گام فرات و راح للمطبخ اللي صاير بالجهه الثانية لأن هُمه گاعدين بالحديقة الخلفية ، سوه الچاي و كمله بَس نسى الغاز مفتوح ، جت عشگ وياه حضرت الستكانات و راحوا ، جه فاروق على عشق ...

- ماما سيارتي السودة وين؟

- حَبيبي موجودة بالمطبخ بالمجر مال الكاونتر

هزلها براسه و راح للمطبخ ، فتح الباب بَس أنطبگ وراه و هو فز ، حاول يفتحه بَس هو زغير و الباب قوي ميگدر يفتحه ، أنحبس فاروق بالمطبخ و چان الباب الداخلي هَم مسدود ، هنا ريحة الغاز بدت تقوة لأن صارلة فترة مفتوح ، و فاروق بده يختنگ من الغاز و ينادي على أهله بَس بعيدين ميسمعونه

بالجهه الثانية مر تقريبًا نص ساعة و فاروق محد فقده لأن كُل ظنهم يلعب ويه الجهال گدام البيت ، شوي و جو الجهال يتراكضون ...

سيف : بابا أكو ريحة غاز حيل قوية

صگر : وين يول؟

- هناك يم المطبخ

عشق : فاروق وين سيوفي؟

- فاروق ما طلع من المطبخ

- يممهه أبنيي ، فراات فاروووق

گاموا كلهم و راحوا للمطبخ ، لگوا الباب مسدود و ريحة الغاز تارسة المكان ، حاول فرات يفتح الباب مينفتح ، جرب يكسره و هَم ما گدر لأن قوي ، صاح على فاروق ...

- فارووق باباا تسمعنيي ، حاچينيي وليديي

عشق : ماكوو صووت فراات ماكوو صوت أكييد أختنگ

رجع فرات و وياه الولد يحاولون يفتحونه بَس ميقبل ينفتح ، آخر شي شال شهم الچاكوچ ...

- أوگفو أنطوني مجال شوي

وخروا عنه و هو كسر الجام مال الباب و دخل إيده و فتحه ، فاتوا بسرعة و لگوا المطبخ مينطب من ريحة الغاز القوية ، ما گدروا يفوتون بَس فرات فات شال أبنه اللي لگاه واگع بالگاع و نفسه ضعيف ، شاله طلعه بالحديقة و خلاه بالگاع حاول يصحي بَس الوليد منتهي و عشق فوگ راسه و تبچي ، شاله فرات و ركضوا للسيارة هو و شهم و أخذوا للمستشفى

عشق
بقيت آني ألوب و حالتي حالة ، منظره ميروح من بالي من طلعه فرات شايلة بين إيديه ميتحرك و شفايفه زرگ ، أبچي و البنات يمي يهدن بيه و رَها من شافتني أبچي حضنتني و صارت تبچي وياي

لليل يلا رجعوا من المستشفى ، چان فرات شايل فاروق ، جابه للغرفة و خلاه بفراشه و خلاله الأوكسجين ، و بقينه يمه ، الأهل تطمنوا على فاروق و راحوا بقوا يمنه بَس مُهره و شهم و أبنهم ، أجيت على فرات و هو گاعد يم فاروق و لازم إيده ...

- أحچيلي شبي شگال الدكتور؟

- الرئيتين عنده متأذيات حيل ، راد يموت هناك لو ما الله ستر

- و هَسه شلون

- راح يظل ع الأوكسجين فترة لأن ما يگدر يتنفس

بقى فرات يمه و آني طلعت بره ما تحملت أشوفه هيچ ، گعدت بالهول و أجت مُهره يمي ...

- لتقهرين بروحچ حَبيبتي ، الحمدلله الله سلمه منها

- لچ حالته تكسر گلبي والله ، بالگوة يجر النفس و لو ما الأوكسجين ميتنفس حتى

- أدعيله بالشفاء يا حَبيبتي

ثاني يوم مُهره و شهم رجعوا للبصرة و مشت الأيام ويه فاروق و مرضه اللي أجه فجأة ، عانينه كُلش وياه ، بالليل لازم نبقى يمه ثنينه آني و فرات و إذا يغيب واحد يگلبها مناحة و يقبط عليه صدرة فـ لذلك عفنه شغلنه و گابلناه و گعدنه لحد ما طاب و تعافى الحمدلله بَس اليقهر و اللي خمش گلوبنه أنُ وره هالحادثة صار عنده ربو حاد يعني من تجي النوبة لازم أله أوكسجين أو ندخله مستشفى ، أكثر من مره تخربط بالروضة و بطلناه منها و بعد ميروح هو و رَها و بسبب هالشي شلت أله هَم كُلش باچر بالمدرسة شلون ، ما أعرف منين أجتنه هالمصيبة و بهذلت أحوالنه

بيوم چنه طالعين الصبح حتى نروح للشغل آني و فرات و بطريقنه نخلي الجهال يم بيت خالوا عَلي ، وصلنه باب الحوش و چان أشوف ورقة ملفوفة و محطوطه يم الباب ، گلت لـ فرات و وگف شالها و طلعت ملفوفه على حجرة ، ذب الحجره فرات و شاف المكتوب اللي بالورقة و چان بالحرف الواحد ...

- رجعتلكُم يـَ بيت المهيوب ، لا تظنون تخلصون مني
البدوي أخذ ثاره وره أربعين سنة

فرات صفطها و خلاها بجيبه ، و طلعنه لبيت خالي و هناك وصلنه و گلنالهم ع الورقة اللي لگيناها و طلعت محطوطه گدام باب كُل بيت من بيوت المهيوب ، هنا الخوف سيطر عليه و خالي عَلي گال هذا حارث ماكو غيره ، صگر أخذ جماعته و راحوا لبيت حارث بَس ما لگوهم ، سألوا گرايبهم و گالوا طلعوا من المنطقة من زمان و محد يدري وين راحوا ، مَر يوم و يومين و ثلاثة و أسبوع و كُلشي ماكو الوضع هادئ جدًا

***

نَفس
گعدت من الصبح و جهزت مُلهم حتى يروح للروضة ، ريگته و طلعتله ملابسة و لبسهن و گعد ينتظر السايق ، شوي و أجه و طلعت وياه وصلته للباب ، قبل ميطلع حضني و باسني و راح ، رجعت للبيت و رحت للغرفة لگيت رافد بعده نايم و مُهاب نايم على إيدة ، گعدته حتى يتريگ ، گعد و سَحب إيده شوي شوي من جوه راس مُهاب ، بين ما راح غسل و صله آني كملت الريوگ و حطيته و گعدنه نتريگ ...

- أبويه گعدتي تا يتريگ

- عمي گعد من زمان و ما قبل يتريگ راح لبيت عمي عَلي

- و مُلهم شوكت راح

- قبل متگعد بشوي

كملنه الريوگ و مشى الوقت و صارت الساعة بالـ 12 وقت رجعة مُلهم ، أندگ الباب و طلع رافد و شوي و رجع وجهه مگلوب ...

- منو اللي أجه رافد؟

- هذا أبو الخط اللي يودي مُلهم ، يگول مُلهم ماكو بالروضة

- شنوووو ، شلووت ماكوو بالروضة

- بَس على كيفچ

- راافد أبنيي وييين

ما جاوبني طلع تيلفونه و گام يخابر و آني ظليت أطگطگ بأصابيعي و گلبي يدگ سريع ، للعصر و الطفل ماكو لا حس و لا خبر ، آني أنتهيت و گضيتها بچي ، أجه صگر و عمو عَلي و عمو جسام و بعدين بلغوا الشرطة و صاروا يدورون و آني گلبي مفرفح على أبني و مُهاب بَس يبچي و آني مو گادره أسكته

بمكان ما ، مُلهم مخطوف و اللي خاطفينه حارث و ولده و حابسينه بغرفة ظلمة و مابيها شباك و بَس ضوة خفيف يفوت من جوه الباب ، و موجود بهاي الغرفة حنفيه مفتوحة شوية و ظاله تنگط مي و صوتها مزعج و يوتر الأعصاب ، قضى مُلهم أصعب فترة بحياتة بهاي الغرفة ، بين صوت نقاط المي و هو مچتف ميگدر يگوم يسدها و بين ولد حارث اللي كُل شوي جاين عليه يصيحون و يهددون و يگُلوله إذا ما أهلك سوو اللي نريده نذبحك و نگطعك و من هالسوالف و هو كـ طفل أكيد هالحچي يأثر على نفسيته

أستمر هالوضع يومين و مُلهم محبوس و عايش التعذيب النفسي ، لحد ما الكُل مچتمعين و ينتظرون خبر من الشرطة ، جت رسالة لـ عَلي و چان محتواها ...

- إذا ما جيت وحدك الطفل اليمنه يموت و ناخذ ثارنه منه ولو هو طفل ماله ذنب بَس أنت ما خليتلنه مجال

- عندك منا لساعة لو تدز موافقتك لو ندزلك راس الطفل بكارتونه

هنا عَلي شوف الرسالة لـ صگر و گال ...

- يابه ديربالك تروح ، هَسه أنطي الرقم لجماعتنه و يحددون موقعه و نروح نشوفهم بلكت نلگه مُلهم يمهم

- شلون ما أروح و حياة الوليد واگفة عليه ، حارث يريدني آني خليني أروحله و ننهي هالعداوة

- ياابه أبوس إيدك لا تتهور و خلينه نشوف شغلنه

- شتلحگ تشوف شغلك بعالساعة متگُلي

و ظلو يحاولون يقنعونه ما يروح و گاللهم خلص ما أروح ، صگر أخذ الرقم و أنطاه لجماعته و بدوا يشتغلون عليه تا يطلعون موقعة ، هنا عَلي ما گدر يتحمل گعدته ، سحب نفسه من يمهم و أتصل على هذا الرقم بَس لگاه خارج التغطية ، تخلصوا منه حتى ما يلگون مكانهم الشرطة من خلاله ، شوي و راسلوا من رقم ثاني ، حچه وياهم و أنطوه العنوان و هددوا أنُ يجي وحده ، و فعلاً ركب سيارته و توجه لمكانهم

بالبيت حسوا على إختفائه ، حچه صگر ...

- أبويه أكييد راحلهم ، آخخ ياابه موو گتللككك لترووح

رافد : و هَسه شلون نلگاهم

- رقمهم أتلفوه ما نگدر نشتغل عليه ، أكيد أبويه يعرف مكانهم راح نتعقب رقمه

و بالفعل أخذوا رقم عَلي و بدوا يشتغلون عليه ، وره ما يقارب الساعة وصل عَلي للمكان و تلگاه حارث و ولدة ...

حارث : من البداية سلمني نفسك عليش تخلينه نصل لهالمواصيل

- الطفلل وييين ، جييبهه و بدوون حچي زايد

- موجود جوه

ظلوا يحچون و واحد يرفع و الثاني يكبس ، وره شوي گدروا الشرطة يصلون للموقع و بسرعة جهزوا قوة و داهموا المكان ، و چان رافد وياهم ، صار إشتباك قوي  بينهم ، حارث و ثنين من ولده أنقتلوا و ظل واحد أخذوا الشرطة ، گدروا يصيبون عَلي بَس إصابته چانت بچتفه يعني مو خطرة حيل ، الشرطة كسروا الباب و طلعوا مُلهم و من شاف أبوه ركض لحضنه و دفن راسه بصدر أبوه مو راضي يرفع راسه و يشوف أحد و بَس يردد " بابا أخذني منا " حاولوا يحچون وياه بَس الوليد يرجف و ميحچي ويه أحد ، أخذوهم هو و عَلي للمستشفى و عالجوهم و رجعوا للبيت ، تلگتهم نَفس و حضنت مُلهم ...

- حَبيبي يروحي أنت ، ماما مُلهم باوعلي شو ، بواعلي أبني

مخلي راسه بحضن أمه و ميحاچي أحد ، نَفس رفعت راسها لـ رافد ...

- رافد ليش مجاي يحچي؟؟!

- الدكتور يگول اللي صار وياه أثر على نفسيته و خلاه بصدمة ، عوفي لتضغطين عليه

نجاة طلعت و شافت عَلي مجضوع ع القنفة و چتفه ملفوف ، راحت يمه و خلت إيدها على راسه ، هو حَس عليها و فتح عيونه شافها و أبتسم ، حچت ...

- اللي چنت خايفة منه صار

جاوبها بتعب : خلص مات و أرتاحينه منه

- و لو ميت أنت چان شصار بحالنه

- عاد هذا يو ...

- اشش لتكمل ، لتگول هيچ ، الله يحفظك ألنه ، أحنه بدونك ما نسوه شي

مرت الأيام و عَلي تعافى من إصابته بَس مُلهم و فاروق اللي بقوا يعانون ، مُلهم زاد هدوئه و إنعزاله عن الناس أكثر و أكثر و ميحچي ويه أحد قليل و حتى إذا گبل چان يلعب ويه الجهال قليل هَسه ميتقربلهم نهائيًا و فاروق ظل يعاني من مرضة اللي إذا جته النوبه يحيرون بي فرات و عشگ ، مرات تفكه بالأوكسجين و مرات أله يدخلونه مستشفى

********

و هنا وصلنه وياكُم إلى ختام الجزء الأول من رواية عشگ الفرات ( عندما تهوى القلوب ) ، عشنه ويه الأبطال أفراحهُم و أحزانهم ، صَح چانت رواية خيالية بَس أستمتعنه بيها و أتمنى عجبتكُم و حبيتوها ، هالمره ماكو نلتقي بالبارت الجاي لا نلتقي بالرواية الجاية إن شاء الله

هاي صورة الجزء الثاني نزلت منه مُقتطف أدخلوا ع الحساب شوفوا راح تفهمون كُلشي يخصها ، لا تنسون تضيفونها للمكتبة يلا أريد أشوف تفاعلكُم للمقتطف + وصلوا الحساب ألف شنو هاي صارلنع هواي لازگين ع الستميه🥲💔 ، يلا ما أوصيكُم أريد أصل ألف