رواية عشگ الفرات ( عِندما تَهوى القُلوب ) الفصل الرابع والسبعون 74 - بقلم سحر الدليمي

لا تنسون التصويت و التعليق بين الفقرات
قراءة مُمتعة ♥️

***

- دَع عيناكَ تَكُف عن مُلاحقتي ، فـ جمالُ نظراتِها يُربكُني .

***

فرات
طار عقلي من سمعت الخبر ، گُبل عفت كُلشي و ركبت السيارة و طلعت ، أحس الدم نشف بعروگي و الطريق صار شطوله أمشي و أمشي ميقبل يخلص و كُل شوي داگين عليه ، زدت السرعة و ما همني كُلشي هَمي الوحيد أصل ، وره ساعات يلا وصلت و بوجهي للمستشفى ، فتت و لگيت أهلي ، شوي و جت الدكتورة و أنطيتها الموافقة و وقعت و گالوا هَسه يدخلونها للعمليات ، گعدت بَعد ما أگدر أگف على رجليه حيلي باد و صابتني رجفة بَس حاولت أسيطر عليها و ما أبين لأحد ، جتني أمي ...

- أبني گوم شوف جهالك و ...

- ماريدهم

- فرات !! ، شنو متريدهم أبني ذوله قطعة منك ، مو أشهر و أنت تنتظر شوفتهم !

- گتلچ ماريدهم ، إذا ما تطلع عشگ بالسلامة و أتأكد أنها بخير ما أگرب صوبهم

صگر : فرات شهالحچي ، جهالك هذوله خطية شنو ذنبهم

- گتللكم ماااريدهم ، مااريييد شووفتهمم

سكتوا عني و آني گلبي گام يوجعني ، خليت إيدي على صدري و ظليت أدعي تطلع عشگ بالسلامة ، گمت أتمشى بالممر رايح راد و بدون وعي أردد ...

-  يا رب متموت ، يا رب متموت

- يا رب متموت ، يا رب متموت

ما حسيت غير على صگر و هو يهز بيه ...

- فراااات هاي شبيك

- مابيه شي

- خل أنادي الدكتور يشوفك أنت وضعك مو عاجبني

- لا صگر ...

- أششش و لا حرف

صگر
رحت ناديت الدكتور و جه دخله لغرفة و صار يسألة بشنو يحس و من هالأمور و هو يجاوبه ، لحد ما أنطاه دوه و وره شوي فرات نام ، طلع و طلعت وياه و گالي أنُ أنطاه منوم تا ينام و يرتاح لأنه ضروري يرتاح و شرحلي حالته بالتفصيل و ليش هيچ صار وياه ، رجعت للغرفة شفته نايم ، عفته و طلعت ، شوي و جه أبويه ...

- هااا شلونها؟

- بعدها بالعمليات

- فرات وصل يعني

- إي

- وينه عجل شو ما أشوفه

- نايم تعبان من الطريق

- زين الجهال وينهم؟

نجاة : عَلي فرات يگول ماريدهم حاولت وياه يگوم بَس يشوفهم ما يقبل يگول ما أتقربلهم إذا ما تطلع عشق بالسلامة

- شنو تخبل هذا ! ، أمشي ناخذهم آني وياچ

راحوا أبويه و أمي و آني ظليت أنتظر ، دگ عليه عثمان يريدني أروحلهم بَس تعذرته ، شوي و جو أبويه و أمي شايلينهم ، بنيه و وليد زغار حيل ، إبتسمت لا إرادي من شفتهم ، دخلوهم للغرفة اللي نايم بيها فرات ، خلوهم ع الچربايه الثانية ، راحت أمي تگعد بـ فرات ...

- يوم لا تتعبين نفسچ ميگعد هَسه ماخذ منوم

- ولك أبني شلون جهاله لازم يشوفهم حرام هيچ

- يوم بَس أصبري أنطي مجال خل يتطمن على عشق و هو يجيهم ، حچه هيچ من حرگة گلبه على عشق وله ماكو أب ما يريد ضناه

عفناهم بالغرفة و طلعنه

فرات
گعدت من النوم دايخ حيل ، دحگت ع الساعة ونها بالستة المغرب ، أنداريت للجهه الثانية شفت طفلين ع الچربايه ، گمت و رحت يمهم چانوا نايمين و زغار حيل ، ظليت صافن عليهم بعدين عفتهم و طلعت بره لگيت أبويه و أمي و صگر ...

- شلونها عشگ

صگر : طلعوها من العمليات

- و شلون وضعها

- ما گالوا شي بَس گالوا أصبروا

- أريد أشوفها

- متگدر ميقبلون أحد يشوفها

رحت گعدت و خليت راسي بين إيديه ، الدنيا بكبرها طالعة من عيني ، والله لو ماتت آني أموت وراها ، هاي الدنيا كُلها متسوه أظفرها ...

- راح تموت مو

عَلي : أسم الله يابه لا تفاول عليها

- متشوف حالتها شلون يا يابه

- هذا كُله إمتحان و إختبار لصبرك من رب العالمين فـ أنت يا أبني أصبر و خلي إيمانك برب العالمين قوي و أدعيلها و إن شاء الله تگوم بالسلامة و ترجعلك و ترجع لجهالها

- إن شاء الله

سكتنه شوي بعدين رجع گال أبوي ...

- شفت جهالك؟

- إي

- شلتهم؟

- لا

- ليش

- ما أگدر أگرب عليهم نفسي چازه منهم يابه

- أستغفر ربك يا أبني هذول مالهم ذنب ، لا تحملهم نذب اللي صار ويه أمهم ، اللي صار كاتبة رب العالمين و هذوله دمك و لحمك حرام حتى تحچي عليهم هيچ ، شيلهم و أحتظنهم و سميهم ، تدري إلى هَسه ما سميناهم

فركت وجهي بقهر و نفاذ صبر ...

- خل أتطمن على عشگ و يصير خير

سكتوا بَعد محد ناقشني بهالموضوع

***

شهم
گاعد بالهول و يمي أبني مخلي بحظني و أحچي وياه و أناغي أريده يضحك لو حتى بَس يبتسم ماكو ، ضحكت أمي و گالت ...

- ولك ماما بعده زغير يا دوب عمره شهر ميضحك هَسه

- چا شوكت يگوم يضحك؟

- من يصير عمره سبع أو ثمن أشهر

- أهووو طويله ، ريسان أضحك شو يلا بابا مو موتتني

ظلت أمي تضحك عليه ، شوي و نزلت مُهره و چانت مبينه خايفة ...

- مُهره ، شكوو شبيچ؟؟

- شهم قبل شوية خابرتني نَفس و گالت عشق ولدت بَس وضعها كلش موزين

- شلون يعني شبيها؟

- والله ما أعرف ، فدوة شهم أعرفلي وضعها والله بالي يمها

- زين هاچ أخذي ريسان

نطيتها ياه و گمت أخذت تيلفوني من الشحن و دگيت على فرات ، مره و مرتين و ثلاثة بَس ما جاوب ...

- فرات ميجاوب

فاطمة : معناتها البنيه وضعها كِلش موزين

مُهره : شلون هَسه شهم أريد أعرف وضعها

- بَس على كيفچ يا عيني هَسه نشوف

دگيت على صگر شوي و جاوبني فهمني حالتها و سألته على فرات و گالي فاصل عن الدنيا و اللي بيها باله كله يم عشق ، سديته و حچت مُهره ...

- هااا شگلك

- مضطرين يسوولها عملية إستئصال رحم و لحد هَسه ما فهموهم وضعها شنو

- و فرات حتى جهاله ميقبل يريدهم

فاطمة : يااا شلون ولك يمه ، شلون ميقبل يريد جهاله ، تسودن الولد

- لا تلومينه يمه هَسه هو باله يم عشق

- حتى ولو يا أبني هذول يبقون جهاله ميصير هيچ

مُهره
أخذت أبني و رحت للغرفة و شهم طلع للشغل لأن الصبح ما راح فـ راح يشوف شصار بغيابه ، بقيت گاعدة بالغرفة لليل مطلعت منها و بالي يم عشق و أدعي تگوم بالسلامة و تفرح بجهالها خطية هي تحملت هواي ، شوي و أجه شهم بدل و راح يم ريسان ، وصيته يبقى يمه ميطلع و آني نزلت للمطبخ أساعد عمه بالعشه ، كملنه و حطيناه و شهم ما قبل يتعشه ماكل ويه أصدقائه ، كملت شغلي و صعدت فوگ للغرفة أبتسمت للمنظر اللي شفته ، شهم نايم و منوم ريسان على صدره ، نايمين بعمق ، رحت بدلت و فتحت شعري و أخذت ريسان نومته بسريره و رجعت للچرباية خليت راسي على صدر شهم و نمت

الصبح گعدت باوعت للساعة چانت بالثمانية و نص ، باوعت لـ شهم نايم ، گعد ريسان و گام يبچي گمت بسرعة سويتله حليب و بهالأثناء گعد شهم راح غسل و أجه يمي ...

- أنطيني آني أنطي الحليب

أبتسمت و خليته بحظنه و نطيته المميه ...

- باوع لترفعله ياها كلش علمود ميغص بالحليب

- تمام

ريسان يرضع و شهم يباوع عليه و يبتسم ...

- فرحان بي؟

رفع راسه و باوعلي : كِلش فرحان والله

- أحساس الأبوه حلو ، أحس أني كبرت عشر سنين

- هههههههههه

- أضحكي يـَحلات ضحكتچ

كمل ريسان الحليب ، رفعه شهم على چتفه و صار يمسح على ظهره ...

- ما أعرف شنو أخبار عشق

- هَسه أدگ عليهم و أشوف بَس خل نتريگ

- تمام

***

فرات
ظليت أنتظر للصبح و محد جه و فهمنه وضعها و طمنه ، تخبلت أعصابي تلفت حيل و صبري خلص ، الجهال أخذتهم أمي و ودتهم للبيت ظلت يمهم عمتي و أمي رجعت هينه ، ننتظر و ننتظر و ننتظر و حتى الإنتظار مل من عندي ، للظهر و جت الدكتورة ، گبل ما تحچي صحت ...

- أنتِ متگُليليي ويينچ من البااارحة ننتظرر حضرتتچ تشرفيين و ماا جيتيي

- أهده يا عيني

- ماا أهده ، گُليليي مرتيي شبييهااا لاا أقسمم بالله أهد المستسفى على راااسچ

- أستاذ رجاءًا أهده خليني أعرف أحچي

عَلي : فرات بَس على كيفك أضبط أعصابك خل تحچي الدكتورة

- خوش خوش آني هادي ، تفضلي غردي يلا

- الحمدلله زوجتك تعدت مرحلة الخطر و هَسه وضعها ممتاز

- صدُگ؟؟

- إي والله ، گدرنه نوگف النزيف اللي صار بأن أحنه نشيل رحمها ، هو من الأساس الحمل چان خطر عليها

- زين أگدر أشوفها

- أكيد بَس لا تتعبها ...

بدون متكمل حچيها عفتها و فتت للغرفة ، لگيتها توها صاحية ، شافتني و حچت بصوتها المتعوب ...

- فراتي

رحت يمها و بستها من راسها ...

- يا بَعد روحي ، يا گلب فراتچ أنتِ ، شلونچ يـَ عگال راسي؟

- زينة ، بَس أنت شنو جابك مو عندك شغل؟

- أنعل أبو الشغل ، عفته و جيتچ ، أنتِ أهم

تلفتت ليسارها و يمينها ، بعدين دحگت عليه و گالت ...

- وين الجهال؟

- بالبيت

- ليش أخذوهم للبيت ، مو نرجع سوه

- أنتِ صارلچ يومين بالمستشفى ، سوولچ عملية و شالوا رحمچ

أنصدمت و تحركت فجاة بَس حست بوجع و خلت إيدها على مكان العملية ...

- آخخخخ

- أگفي عشگ ميصير تتحركين

- شدتحچي أنت فرات !! ، شلون يشيلون رحمي و ليش منو سمحلهم؟؟

- آني سمحتلهم

- لييش فراات لييششش

- بَس أهدي على كيفچ

- جاوبني ليش فرات؟!

- صار عندچ نزيف و گالوا لازم نشيل الرحم لأن صار خطر عليچ

- بَس هذا يعني أنُ آني بَعد ما أجيب أطفال مستوعب هالشي فرات؟!

- إي و إذا يعني ، أهم شي صحتچ أنتِ و وجودچ بحياتي ، و بعدين هاي الله رزقنه بثنين نعمة من الله

سكتت و هي تداور عيونها بالغرفة ، رجعت حچيت ...

- صَحيح لو آني غلطان؟

- إي صَحيح

- يـَ يابه شگد خفت عليچ ، فقدت أعصابي و آني أنتظر أحد يطمني عليچ

رفعت إيدها اللي بيها الكانونه و خلتها على وجهي ، أبتسمت و گالت ...

- لتخاف حَبيبي آني زينة

- الحمدلله ، الله ما راد يضرني بيچ

- الحمدلله

- فرات عفيه جيبلي الجهال أريد أشوفهم

- بعدين آني أجيبهم

- أنت شفتهم , شلتهم؟

- لا

- ليش؟!

- ما گدرت أگرب عليهم ، يعني اللي صارلچ ...

- اششش فرات لتكمل ، اللي صارلي هُمه مالهم ذنب بي ، اللي صار هذا قضاء و قدر

- إي أدري

- ذوله روحك فرات ، تعرف شنو يعني روحك؟ ، ذوله قطعة منك ، شوف آني شنو تحملت علمودهم ، أنت لازم تحتظتهم و تكون ألهم أحلى أب ، أحنه ماعدنه غيرهم و لا يصير عدنه غيرهم

- إن شاء الله

ظلينه بالمستشفى يوم و بعدين طلعنه للبيت

عشق
جهزولي الغرفة الجوه لأن فوگ ما أگدر أصعد ، دخلت و فرات گايدني من إيدي بإيد و الأيد الثانية مخليها على كتوفي ، ساعدني اتمدد ع الچرباية و غطاني ...

- فرات أريد جهالي فدوة جيبهم

- بعدچ توچ جيتي أرتاحي شوي

- لا عفيه أريد أشوفهم ، شهور و آني منتظرة هاللحظة

- زين

طلع و بقيت أنتظرة ، شوي و دخلت ماما شايلة الجهال بإيديها ، خلتهم بصفي ع الچربايه ، باوعتلهم يجننون ...

- يا عُمري أنتوا يـَ روحي

- ماما وين الولد و وين البنيه ما أعرفهم؟

- اللي يمچ الولد و هاي البنيه

- سميتوهم؟

- لا ، فرات ما قبل كُلشي يسويلهم ، أحچي وياه و خلي يحنن گلبه على جهاله

- تمام

طلعت و شوي أجه فرات ...

- تعال فراتي ، تعال شوفهم شگد حلوين

- أريد أبدل هَسه

- فرات ، شحچينه أحنه؟

وگف يباوعلي بعدين ، أجه للجهه الثانية گعد يباوعلهم ، إبتسم و هو يباوع لـ رَها ...

- هاي البنيه مو؟

- إي

- عادي أشيلها؟

أبتسمتله : إي شيلها

شالها و حظنها لصدره بقى حاظنها شوي و بعدين شال فاروق و صار يبوس بي ...

- هههههههه على كيفك وياه بشرته بعدها رقيقة

- مُدي آكله والله ، ريحته تجنن

- ههههههههه بَس أنتظر خل يكبر شوي و بعدين أكله

نزله من حظنه و خلاه بصف أخته ، بقى يباوعلهم شوي و فاروق مچلب بأصبعه ميقبل يهده ، حچه ....

- آني شلون گلت ماريدهم ، آني أب أناني حييل ، أصلاً حرام أتسمى أب

خليت إيدي على خده ...

- لااا لتحچي هيچ حَبيبي ، آني متأكدة راح تكون أب زين و راح تكون حنون كُلش عليهم

شوي و أندگ الباب و فاتت ماما ، باوعتلي و گالت ...

- راح آخذ الجهال يمي أنومهم بين ما تتحسنين لأن أنتِ متگدرين تهتمين بيهم

ردت أحچي چان يسبقني فرات و يگول ...

- لا عمه خليهم يمنه آني عيني عليهم

باوعتلي ماما و أبتسمت ، طلعت و عافتنه ، لليل و راح فرات جابلي عشه و تعشيت و هو هَم تعشه ويايه ما راضي يفارگ الجهال ، كُل شوي يباوعلهم ، جابلهم سرير چبير ألهم ثنينهم ، خلاه بصفي و شالهم و خلاهم بي ...

- آني راح أنام بالگاع

- ليش متنام يمي؟

- مگدر أخاف أأذيچ بحركتي

- تمام براحتك

فرشله فراش بالگاع و تمدد ، ماكو دقايق و نام ، چان مبين عليه كلش تعبان ، بالليل كُل شوي يفز علمود الجهال يگعد يسويلهم حليب و هو ينطي ألهم بنفسه آني ميخليني كُلشي أسوي

فرات
گعدت الصبح گمت و دحگت على عشگ نايمه و الجهال نايمين هَم ، رحت توضيت و صليت و نزلت جوه ، تريگنه و رحت گعدت بالهول ويه أبويه و عمي و الولد ، حچه رافد ...

- فرات أنت تدري شصار

رفعت راسي : لا ، ليش شصار؟!

- مجموعة السيارات اللي علساس ناخذها راحت من إيدينه أجلونه ع الشهر الجاي ، المشكلة أكو هواي زبائن سلمونه الفلوس و وثقوا بينه ، يعني هَسه شيصبرهم للشهر الجاي

- ميخالف نرجعلهم فلوسهم و اليصبر للشهر الجاي يصبر

- بَس هيچ راح نخسر

جسام : الخسارة تتعوض وليدي

عَلي : المعرض سدوه هالفترة و أنطوا العمال رواتبهم و بلغوهم للشهر الجاي يلا نفتحة

فرات : تمام آني عود أشوفهم

ظلينه نتناقش بالشغل و بعدين گمت رجعت للغرفة ، فتت و لگيت عشگ گاعده ...

- صباح الخير

- صباح النور حَبيبي

- شلونچ اليوم؟

- بخير

- تريگتي؟

- إي قبل شوي أجت ماما أخذت الصينية

- هاا خوش بالعافية

- الله يعافيك

رحت يم الجهال شفتهم ...

- هاي شنو بعدهم نايمين؟

- إي ما گعدوا ، مبينين كُلش هادئين

رحت گعدت يمها و گمت أدحگ عليها ، التعب واضح على ملامحها حيل ، العيون منعسه و الشفايف مفطره و الوجه أصفر ، لزمت إيدها و بستها ...

- شوكت تطيبين و ترجعيلي

- أطيب حَبيبي ، إن شاء الله أطيب بأسرع وقت و نرجع مثل قبل

- إن شاء الله ، شوفي عشگ آني قررت قرار بخصوصنه و جيت أشوف رايچ بي

- شنو شقررت؟!

- أشتري بيت و نعزل وحدنه

- صدُگ؟

- أي والله ، فاتحت أبويه بالموضوع و گال براحتك ، حتى رافد يريد يعزل هَم ، شوفي آني أريد أكون عائلة و بيت ألنه وحدنه ، آني وياچ و جهالنه

- خطوة كلش حلوة و آني وياك بيها

- خوش عجل من اليوم أگوم أدور على بيت

- تمام

عشق
مر شهرين على ولادتي و الحمدلله تحسنت و فرحانين كُلش آني و فرات بهذوله التوم الحلوين ، كُل ميكبرون شهر تزيد حلاوتهم و فرات يتخبل عليهم لازمهم و يبوس بيهم ، بهالفترة فرات و رافد لگوا بيوت و رافد طلع و سكنوا بي لأن ما چان ناقصة أي شي بَس بيتنه بَعده يحتاج تعديلات فرات يگول أكو شغلات بي مو نفس ما أريد فـ ديشتغل بي و علساس قريبًا يكمل ، قررت أحچيله اللي صار بالسعودية و كلام الدكتورة اللي طلع صحيح بَس الحمدلله بقدرة الله طلعت سالمة آني و الجهال ، و فعلاً حچيتله و تخبل زعل مني كلش و يگول ليش ما گلتيلي ، و هيچ سالفة ما تنضم عليه و المفروض گايلتلي و يبووو رزلني رزالة غسل و لبس و حقه بكُلشي گاله ، من البارحة هو ميحچي وياي و اليوم قررت أراضي بطريقتي خصوصًا أنُ هو صار من ولادتي ممتقربلي

بالليل نومت الجهال و بدلت لبست بدلة نوم لونها ذهبي قصيرة و سيورها رفاع كلش ، و قبلها سويت عناية لبشرتي صارلي فترة هاملتها ، گعدت گدام المرايه و چان يفوت فرات ، أباوعله بالمرايه وگف باوعلي شوي و بعدين ذب فانيلته و تمدد ع الچربايه و أخذ كتاب يقره بي ، آني أبتسمت بخبث و خليت من العطر اللي يحبه و الحمره اللي يحب لونها و خليت آيلاينر و بَس مخليت شي ثاني ، فتحت شعري و خليتله عطر هَم و گمت أمشي و أتمايل گدامه ، أسوي نفسي ألم بالغراض و أحطهم بالمجر و أباوعله بالمرايه عيونه عليه وين ما أروح ، گلت بيني و بين نفسي الخطة شكلها حتنجح ، بسيطة إذا ما أخليك تنسى الزعل كُله آني مو عشگك ، مشيت بهدوء و رحت للچربايه تمددت بصفه و بدون ما أباوعله ، و هو ساعة يگلب بالكتاب و ساعة يفرك بوجهه لحد ما ذب الكتاب من إيده و تقرب من يمي ...

- أحمم ، طالعة حلوة

- أصلاً آني من زمان حلوة

- إي ما گلنه شي حلوة أنتِ من زمان

- بلا زحمة عليك لتكثر حچي و طفي الضوه أريد أنام

- بَس آني ماريد أنام

- إي لتنام شسويلك يالزعلان

- هاي منو؟ ، آني زعلان !!

- إي لعد آني

- لا ول يابه متوهمة آني ما أزعل منچ

ردت أحچي و چان يسحبني عليه بسرعة و يبوسني ، و بهيچ نكون ودعنه الزعل و تراضينه ، اوووف زعله ثگيل عليه كُلش ، بودي كُلشي يسوي بَس ميزعل عليه لأن تتخربط أموري كـُلها بزعله ، ثاني يوم الظهر فرات گاعد ع القنفة و بإيده تيلفونه و آني دارضع بـ رَهاوي و أحوص أريد أگُله حتى أرجع للشغل بَس خايفة ميقبل ، كملت رَهاوي الحليب و نامت و خليتها ويه أخوها بالسرير و رحت لـ فرات گعدت على رجله و لفيت إيديه على رگبته ...

- حَبيبي

- هاا

جاوبني و عيونه بالتيلفون حتى ما باوعلي ...

- فرات داحچي وياك باوعلي

- إي إي أسمعچ

باوعت للتيلفون چان داخل ع الأنستا و ديباوع لستوريات بنيه ...

- هااي شنووو !!!

- بسم الله ، شكوو

- ليش تبااوع لستورياات البناات؟؟

- اهووو عبالي عندچ سالفة

- أحچي منين تعرفها هاي؟؟؟

- يابه ما أعرفها طلعتلي فجأة و گمت أگلب بالستوريات ، كفرت خوما كفرت

- لا ما كفرت بَس بَعد لتعيدها

أخذت منه التيلفون و قفلته و ذبيته ع القنفة و هو لزمني من خصري و قربني عليه صار يشم برگبتي ...

- فراتي أريد أحچي وياك

- أحچي

- بَس باوعلي

رفع راسه : هاا دحگت أحچي يلا

- أمممم ، أريد أرجع للشغل

- شغل إيش هذا؟

- وظيفتي حَبيبي شبيك

- هاا إيي

- إي شتگول أنت

- بكيفچ

- يعني عادي أرجع

- إي عادي بَس الجهال شلون

- عادي من نداوم نجيبهم هنا على ماما و خالة نجاة هنه يهتمن بيهم

- حلوو مضبطة أمورچ

- إي شعبالك

- چا خوش

- هاي شنو أنگلبت جنوبي

- مو آني نص غربي و نص جنوبي ، نسيتي عندي عرج بصراوي

خليت إيدي على رگبته : أممم يعني أنباري مطعم ببصراوي

- و لعيونچ بغدادي هَم

- ههههههه ، أروح فدوة للبغدادي

وره أسبوع كمل بيتنه و أنتقلنه عليه ، چان كُلش حلو فرات مرتبه غير عن اول مره شفته ، و مرت الأيام و صار عمر الجهال سبع أشهر و آني ما بين البيت و الشغل و من فرات يطلع خارج المحافظة ياخذنه للبيت الچبير و نبقى هناك لحد ميرجع و نرجع لبيتنه ، بيوم آني رجعت من الشغل و داسوي غده و چانت رَها تبچي و فرات يمها ، فجأة سكتت ، كملت الطبخة و خليتها بين متستوي و رحت لغرفة الجهال لگيت فرات شايلها و هي مخليه راسها على چتفه و حاضنه رگبته بإيديها الزغار ، چان واگف و يهزها شوي شوي و يغنيلها ...

- هيلا يا رمانة
هيلا يمه

- من هي الزعلانه
هيلا يمه

- رَهاوي الزعلانة
هيلا يمه

- منهو يراضيها
هيلا يمه

- أبوها يراضيها
هيلا يمه

- صايغ تراچيها
هيلا يمه

آني واگفه و أباوعلهم شگد حلوين ، و هاي بنتي فد وحدة عيارة متسكت اله يجي أبوها يشيلها و يگوم يفتر بيها ، راح خلاها بالسرير و غطى فاروق زين و باسه ، رحت يمه ...

- بنتك عيارة كُلش

- و آني أموت على عيارة البنات

- فاروق هادئ مو مثلها

- إي فاروقي حيل هادئ

- يلا حَبيبي تعال دتتغدة

- يلا هَسه بَس اصلي

- تمام راح أحضر بين متجي

***

مُهره
رجعت من الشغل اليوم كِلش تأخرت حتى شهم بعده ما راجع هَم تأخر ، فتت للبيت و لگيت ريسان مفرفح من البچي و عمه شايلته و تفتر بي و عمي يمه يناغيله و يحچي وياه بَس ماكو ميقبل يسكت ، ذبيت الجنطة و أخذته منها ...

- ياا حَبيبي سودة عليه شبيك تبچي يـَ عُمري أنت

فاطمة : ولچ يمه الطفل فرفح من البچي ميشوفكم لا أنتِ و لا أبوه و تخبل

- يـَ روح ماما ، أسكت حَبيبي خلص آني يمك ماماتي أشش

بهالأثناء دخل شهم سلم و أجه علينه ...

- هاي شبي؟

- يبچي لأن تأخرنه عليه

- هاا وليدي شنو هالبچي عيب شو تعال

أخذه شهم و صار يطبطب على ظهره و يحچي وياه لحد ما سكت و راح نومه بغرفته ، آني بدلت و خلينه الغدة و تغدينه ، و بالليل چنت دابدل لـ ريسان و دخل شهم و گال ...

- عُمري حضري روحچ ياچر نروح لكربله نزور

- إي والله صار هواي مزايرين

- إي

- و ريسان؟

- ناخذة ويانه

كملتله تبديل و نطيته لـ شهم و گمت حتى أحضر لطلعة باچر ، اباوعلهم ريسان متونس كلش و يضحك ويه أبوه و كل شوي يگول بابا و شهم يتخبل و يظل يگله عيدها ، طبعًا ريسان يشبه شهم نسخة منه آني ميشبهني بشي بَس بالعيون يلا هَم أنعم الله على گولت شهم

الصبح تجهزنه و كملنه و ودعنه عمي و عمتي و طلعنه لـ كربله ، وصلنه و رحنه نتمشى بين الحرمين و هناك تلاگينه ويه فرات و عشق و جهالهم ، تسالمنه و فرحنه كُلش بشوفتهم ، گال فرات ...

- شلون صدفة حلوة هاي سبحان الله

شهم : إي ولك همزين شفناكم

و هنا أرتاحينه لأن لگينه أحد نخلي يمه ريسان بين منزور و هُمه هَم نفس الشي فـ رحنه احنه نزور و خلينه يمهم ريسان و من كملنه خلوا يمنه فاروق و رَها و راحوا يزورون ، أباوعلهم و هُمه بحظن شهم كلش حلوين و شهم مكيف عليهم ، طبعًا هُمه أصغر من ريسان بشهر ، فاروق چان يشبه أمه كِلش عيونه لونهن رصاصي على أزرگ هيج شي بَس يختلف عن لون عيون عشق هي عيونها لونهن أزرگ ، أباوع لشعره خفيف شوي و لونه بُني ، أما رَها تشبه فرات نسخة منه و من عمو عَلي و عمه نجاة يعني ملامحها لامه بَس أكثر شي تشبه فرات

بين ما أحنه گاعدين و ملتهين ويه الجهال ، شفنه حيدر مقابيلنه بَس بعيد عنه ، چانت وياه مره و دايرة وجهها يعني ناطيتنه ظهرها و ياها طفل يطلع عمره تقريبًا سنتين و نص و چان مفرفح من البچي كِلش أنقهرت عليه و تمنيت لو بإيدي أروح أشيله و أحاول أسكته ، چانت گايدته المره من إيده و هو يجر بعبايتها ، شافهم شهم و خلانه نغير المكان يگول مو طايق شوفة وجهه

شوي و أجو فرات و عشق و أخذوا جهالهم و طلعنه أحنه وياهم و تغدينه بمطعم و رحنه للسوگ و تسوگنه و بعدين ودعناهم و رجعنه للبصرة

***

عشق
رجعنه للأنبار بَعد ما تونسنه كُلش لمن شفنه شهم و مُهره ، چنه مخلين الجهال ليوره بالكراسي مالتهم و جان فاروق يناغي و يضحك و هاي اول مره يطلع صوته هيچ ، فرات متونس عليه يباوعله من المرايه و يحچي وياه كأنو عدهم فد حديث مهم ...

- إي بابا كمل و بعدين

- إي والله صحيح هَم صدُگ

كُل ميحچي فرات فاروق يعلي صوته و يناغي كأنه ديفتهم على أبوه ، آني أباوعلهم و ميته من الضحك و رَها چانت نايمة ، لحد ما وصلنه بيتنه و نزلنه و راح فرات فتح الحزام مال الكراسي عنهم و شال فاروق و آني شلت رَها و فتنه جوه و مشى يومنه طبيعي

ثاني يوم الظهر أجه علينه صگر و گعدوا هو و فرات بالهول و آني رحت أسويلهم عصير ، كملته و رحت حتى أقدملهم ياه ، داريد أفوت و أستوقفني كلام صگر ...

- فرات صار سبع اشهر أحچي وياك و أنت ميبس راسك ، يا أخي حاول تروح دكتور و تتعالج تره هذا گلبك مو شي هين

- مابيه شي صگر هو وجع بسيط و بين فترة و فترة

- لا فرات مو وجع بسيط ، تتذكر من عشق سوت العملية و أنت تعبت و جه الدكتور فحصك ، هو حچالي كُلشي و شرحلي وضعك ، فرات وضعك مينسكت عنه

- خوش عود أفكر

- فكر بجهالك ، أنت هَسه عندك عائلة ، مره و جهال برگبتك ، إذا مو علمودك تعالج علمودهم ياخي

- دحگ إذا ما تعالجت أوصل السالفة لأبويه و أمي و عاد هُمه تعرفهم شلون

سكت فرات ما جاوبه ، و آني أنصدمت من اللي سمعته ، ما چنت متوقعة فرات وضعة هيچ و من خلال كلام صگر وضعه خطر ، حاولت أتمالك أعصابي و فتت قدمتلهم العصير و سلمت على صگر و طلعت ، لليل و أجه فرات ديريد ينام ...

- فرات

- ها گلبي

- اليوم آني سمعت حچيكم أنت و صگر

- يا حچي؟!

- بخصوص مرضك

فرك وجهه و گال : مابيه شي آني لا تكبرون الموضوع

گمت و رحت يمه ، لزمت إيده و گلت ...

- لا مو مابيك شي فرات ، آني ملاحظة وضعك و أعرف دتتوجع بَس ما أعرف أنُ وضعك هالشكل صعب

- مو صعب يمعودة هذا أخويه يبالغ

- لا مديبالغ فرات ، الله يخليك حَبيبي روح ع الدكتور و تعالج ، شوف شنو وضع گلبك ، الله يخليك فكر بينه آني و الجهال شنسوي لو صارلك شي لا سامح الله

- أحنه ما ألنه غيرك من بَعد الله

عافني و گعد ع الچربايه ...

- فرات

- زبن زين راح أتعالج ولو مابيه شي

و فعلاً صار فرات يراجع دكتور و يتعالج يمه و شفت فرق بحالته يعني تحسن و ما گام يشكي من گلبه و آني وياه وياه أنطي العلاج بإيدي لأن ما أثق بي خاف يغلس ...

********

يتبع ...

أحب أگُلكم أنُ البارت الجاي راح يكون البارت الأخير و ختام روايتنا هاي❤️.

18.kij
تعالو أنستا و اللي يجي يدخلي خاص يگُلي آني جديد علمود اضيفه كلوز لأن نشري اللي يخص الرواية كُله بالكلوز

سحر الدليمي