رواية عشگ الفرات ( عِندما تَهوى القُلوب ) الفصل الستون 60 - بقلم سحر الدليمي

سلاااام ، بارت خفيف بمناسبة إنتهاء ضيم الإمتحانات
لا تنسون التصويت و التعليق بين الفقرات
قراءة مُمتعة ♥️

***

- يلتمن عليه مشتتات البال
و يمر أسمك ببالي و أنفضهن و لا چني

***

صگر : شنو السالفة يابه؟؟؟

- نااديليي أخوووك الشفيييه بساااع

- مدري وينه

- طلععليي ياااه من جوووه الگااع تحرركك

- زين زين يابه بَس على كيفك

راح صگر فات جوه يدور لـ فرات هو من أجه من الدوام أختفى مندري وين راح ، حچه عمو جسام ...

- شبيك عَلي غير نفتهم شسالفة؟؟

- آخخ شحچييلك يخووي شحچييلك ، إذا طلع الحچي صَحيح والله لا هو أبني و لا أعرفه

حچاله السالفة و آني وگف شعر راسي ، بَس ما قبل أحد يشوف الصورة الوصلته ، معقولة فرات يسويها !! ، و آني أگول ليش ريان راحت لأهلها ، بَس لا لا مستحيل والله فرات ميسويها هو وينه و وين هالسوالف ، أباوع لـ رافد الصدمة باينه بوجهه و ما حچه و لا كلمة ، أجه صگر و وياه فرات وگف گبال عمي علي ...

- ناديتني يابه؟

رفع راسه عمو عَلي و باوعله ...

- شلون تسوي هيچ يول !!

فرات صفن شوية و باوع لـ صگر و رجع يباوع لأبوه ...

- شمسوي آني ؟!

شال إيده عمو عَلي و خله التيلفون بيها ...

- أشرحليي شنووو هااي المهززللهه

شال الموبايل و باوع ، عگد حواجبه و رفع راسه ...

- سوتها الحقير

صاح عمو عَلي : آنييي هيييچ ربيييتك يووول ، هيييچ علممتككك ياااا طااايح الحظ تسوووي هالسواايه و يميي باللبيييت و ويه منووو وييه ريااان

- يابه والله ما سويت شي والله ما گربت عليها هي تتبلى عليه

- تتبلى عليك مو ، زين هَسه نشوف الحچي صَحيح لو تبلي

- رُسسللل

- هلا عمي

- خابري على أختچ بساع و أنطيني التيلفون

دگت رُسل على ريان شوي و نطت الجهاز لـ عمو عَلي ...

- راح أدزلچ صورة من جهازي ، شوفيها و أريدچ تحچبلي شنو سالفتها ، لا تخافين و أحچيلي كُلشي علمود أعرف أتصرف

- شنو الصورة عمي؟

- دزيتها شوفيها

شوي و فتح سبيكر و يباوع لـ فرات ...

- هااا أحچي

- عموو الله يخليك لتحچي لأهلي والله آني مجبورة والله مو بإيدي اللي صار

- شصااار أححچييي

تبچي و تناشغ صاح بيها مره ثانية حتى تحچي ...

- هو جبرني أروحله بالليل للغرفة من يطلبني ، هددني بصوري عمو والله مالي علاقة هو جبرني

- چم مره رحتيله؟

- أربع مرات بطلب منه والله

فرات يسمع الحچي و تغيرت ملامحة للغضب و الصدمة ، سد التيلفون عمو عَلي و باوعله ، حچه فرات ...

- يابه و ...

- أششش و لا كلمممههه ، طلللعتت مربييي گو** مااا تسستححيي أننت ماا حسسبت حساااب أحد ، مااا فكرررت بأختتهااا اللي هيي مرت أخوووك ، أنت شنووو يوول بَسس فهمنيي شنووو

- ياابه والله العظييم و هَسههه أحلفللك ع القرآن الكرييم أنيي ماا جاايسها و لااا مگررب صووبهاا

- گتللك أسككت مااريد أسممع حسسككك

- لااا مااا أسككتتت مووو بكييفكك تتهمنييي بهييچ سالفة ، سممعتت منهااا أسممع منيي آنييي همم

- لاااا تصيير ظااالم

گال هالحچايه و ضربه عمي علي راشدي من قوته خشمه طگ بدم ، صاح صگر ...

- ياابه مووو هييچ شسالفة !!!

- يااا حيف رباتي لك بَس ، طلعت ما أعرف أربي

گعد ع الكُرسي و صار يفرك بصدره ، صگر ويه فرات اللي خشمه يصب دم ...

- شو أرفع راسك ، أرفع راسك تا ينگطع الدم ، فرراات جاي أحچي وياك

فرات مو مهتم لنفسه و لا لحچي صگر و يباوع لعمي عَلي ، حچه ...

- والله العظيم و غلاتك ما سويتلها شي و لا هددتها و لا ناديتها للغرفة ، السالفة كُلها چذب و إفتراء

عمو عَلي عيونه بالگاع و إيده على صدره ...

- يابه

- أششش و لا حررف ، لا أنت أبني و لا أعرفك

جسام : عَلي صلي على مُحمد يمعود

- اللهم صلي عليه و على آله ، ما توقعتها تطلع منك يرباي

صاح فرات يعترض على كلام أبوه گام عمو عَلي يحچي و يصيح عليه لحد ما فقد راد يوگع لزمه عمو جسام و گعده ع الكُرسي و حاوطوا صگر و فرات ...

جسام : علي ، أبو صگر شبييك ستحس ، شوو دحگ عليه

عمو عليه راچي راسه ع الكُرسي و إيده على صدره ..

- ميي ، جيبوولنه ميي بساااع

- صگر : ميي رُسل ميي بسااع

ركضت رُسل جابت مي و نطته لصگر شرب أبوه شوي ، ظل فوگ الربع ساعة على هالحالة و فرات واگف و صافن عليه ميقبل يتقربله شگد أنقهرت عليه والله موقف صعب ، حچه صگر ...

- هاا يابه مو أحسن هَسه؟

هزله براسه بمعنى إي ...

- آخذك للمستشفى؟

- لا مابيه شي

باوع لـ فرات بطارف عينه و گام دخل جوه للبيت ، مشى رافد و آني مشيت وراه ، دخل للغرفة و گعد ع الچربايه حاير ، صرت أعرفه و حفظت كُل تصرفاته گعد يطگطگ بأصابعه و صافن بالگاع معناها ديفكر بشي و هالشي مسببله قلق ...

- رافد

- ها

- شبيك؟

- فرات ميسويها ، والله ميسويها

- عندك شك؟

- مادري مادري راح أتخبل و القرآن

- مستحيل يسوي هيچ والله ، يعني صَح آني ما صارلي هواي أعرفه بَس مبين هو مو مال هيچ سوالف و خصوصًا هو كُل باله و تفكيره يم عشق ، أنت رابي وياه و تعرف أكثر مني

رفع راسه و باوعلي ، بعدين گال ...

- چان دائمًا من يشوفني من بنيه لبنيه يحچي عليه و يعصب و يگُلي بنات الناس مو لعبة بإيدك ، رغم هو أزغر مني بَس چنت أحسه أخويه الچبير ، يعني ما معقولة تطلع منه هيچ سالفة

سكتت ما جاوبته ، حزت بنفسي من گال من بنيه لبنيه ، عفته و رحت أطلع بملابسي حتى أروح أسبح ، شوي و أجه وگف وراي ...

- شنو ضجتي؟

- لا لويش أضوج

- أمبله ضجتي من حچيي ، آني آسف چان المفروض ما أحچي هيچ گدامچ

سديت الكنتور و ألتفتت عليه ...

- آني خايفة رافد

- من شنو؟

- منك

- أفاااا ، مني؟!

- إي ، خايفة ترجع لسوالفك و تخوني

- تبت ، والله العظيم تبت على إيدچ و مستحيل أرجعلهن

- يعني ميجي يوم تخوني أو تتزوج عليه و تكسر گلبي؟

- هو العنده الگُمر شله بالنجوم

- رافد

- عيوني

- ديربالك على گلبي

- گلبچ بگلبي والله

أبتسمت و هو شال إيده و مسح على وجهي ، باوع للملابس و گال ...

- هاي شنو بَس لا تريد تنهزمين يولي

- ههههههههه ، لا أريد أسبح

- آني هَم أريد أسبح

- إي هَسه أكمل و فوت وراي

حچيتها و أنداريت أفتح بشعري ، تقرب مني و حچه ...

- لا أريد وياچ

أنداريت عليه لگيته يباوعلي و يبتسم بخبث ، تقربت عليه و سحبت ياخة قميصه و گمت أفتح بالدگم ، حچيت ...

- أوكي تعال

- أووويلي يابه صايره جسره

- غير أنت علمتني

- هههههههههه ، عفيه ترباتي

***

فرات
ما أعرف شحچي و شگول ، الصار هوواي حييل هوواي عليه ، الحچي اللي حچاه أبويه زرف گلبي زرف و آني بريئ من هالسالفة الگشره ، بَس هو حقه هو شمدريه ، وصلته هيچ صورة أكيد يصدگ ، آخخخ مو ناقصني آني والله مو ناقصني ، وصلتني رسالة من أمي تريدني أجيها لأن خلصت دوامها ، گمت أخذت السويچ و طلعت بالسيارة ، طول الطريق أدعي أسوي حادث و أموت و أخلص من هالطلايب ، هو آني شنو عيشتي من بَعد عشگ ، وصلت المدرسة و طبگت بعيد عن الباب ، البنات جاي يطلعن و الشارع متروس سيارات و وادم و الهوسه واصلة للظالين ، حطيت راسي ع الستيرن و غمضت عيوني و فصلت عن العالم ، سرحت بهمومي و بريان ، شلون گدرت تسوي هيچ و شنو غايتها ، يعني قصدها تنتقم لو شنو بالضبط ، شوي و حسيت على فتحت الباب ، صعدت أمي ...

- شلونك حبيبي

- هلا يمه

شغلت السيارة و تحركنه ، أمي چانت طول الطريق تسألني شبيك و شصاير و حالك مو عاجبني و آني أجاوبها ماكو شي ، لحد ما وصلنه البيت و نزلنه ، لزمتني من إيدي

- شبيك ماما سولفلي مو خوفتني !

- گولي شنو اللي مو بيه يوم

- فرات

عفتها و فتت للديوان ، ظلت تنادي وراي ، فتت گعدت بالگاع و رچيت ظهري ع الحايط

نجاة من شافت وضع فرات خافت أكثر ، عافته و راحت للغرفة ، فاتت و لگت عَلي گاعد و مخلي راسه بيدي إيديه هَم أستغربت وضعه ، راحتله ...

- شبيك أبو صگر ؟

- بيه ضييم ، ضيييم بيه

- لا حول الله ، هاي شبيكُم أنت و فرات شصاير متگلولي

رفع راسه عليها ...

- أبنچ فضحنه ، خزانه بين العربان

- أسم الله شهالحچي عَلي !!

حچالها السالفة و طلع جهازة و شوفها الصورة ، من شافتها شهگت و خلت إيدها على حلگها ، حچه هو ...

- گُليلي شسوي هَسه ، شلون أستر هالفضيحة و لو دروا أهل البنيه شيسون و شيگولون ، مأمنين بنتهم يمنه و أحنه ما گدرنه نصون الأمانة

- لا لا عَلي ، فرات ميسوي هيچ والله ميسوي هيچ

- لاا تخبليينيي نجااة ، عجل هااي الصوورة شنيي چذب !!

- والله ميسويها أكو أنَ بالموضوع ، فرات أبني و آني أعرفه ، عَلي هذا ترباتنه ، أحنه ما ربيناه هالشكل

- و هو هذا الباهضني آني هذا الباهضني

- شراح تسوي هَسه؟

صفن شوي ، بعدين گال ...

- ماكو حل غير نزوجهم.

- تزوجهم شنوو ، جااي أگُلك ماا يسويهاا فراات هااي مو سوالفهه

- لا إله إلا الله ، هَم گالت ما يسويها ، سواها و هاذ هو و السالفة ما تنسد أله من نزوجهم

- بَس فرات ما يرضى يتزوج ، أنت تدري روحه معلگه بعشق و جاي يدورلها و ينتظر شوفتها

- عشق تزوجت و هو مو بكيفه غصبًا عنه يتزوج ريان و ينسى عشق و كُلشي يخصها

عافته و راحت للديوان ، فاتت و لگت فرات گاعد وحده ، راحتله ...

- فرات

- هاا

- ليش ما حچيتلي من سألتك؟

- و شنو الفايدة

- أدري متسوي هيچ أنت ، ماعندك هالسوالف

- أرجع و أگُلچ شنو الفايدة ، أبويه مصدگ و سمعني حچي تمنيت الگاع تنشگ و تبلعني و لا سامعه منه ، يمه هذا أبويه ، تدرين بحياته ما ماد إيده عليه و هَسه ضربني و آني زلمة شطولني و شعرضني

- ميخالف أبني ، أبوك هَسه معصب بَس يهدأ راح يفهم السالفة و يصدگك أنت

- شگالچ من حچيتي وياه؟

- ما گال شي

- أحچي يوم ميخالف خليها تلتم عليه من كُل صفحة

- يريد يزوجكُم أنت و ريان علمود تنسد السالفة

ألتفتت عليه و آني مصدوم ...

- شنو شنو؟؟ ، يزوجني !!

- بَس على كيفك أبني

عفتها و گمت طلعت من الديوان و هي تصيح وراي ، رحت لغرفة أبويه ، فتت ...

- زوااج ماا أتزووج أبوو صگر تسمعنييي

- مو بكيفك

- لا بكيفيي و نصص ، ريااان ما تصيرليي مرره لوو تنگلبب الدنياا

- يعني بَس تريدها تتونس وياها

- جااي أگُللكك ماا سوويت شييي و مُحمد و ررب العررش ماا سوييت شيي ، هيي سووت هالساالفة كُلهاا تاا أتزووجهاا بَسس والله ما تصيير ، تسمعنيي ماا تصيير

نجاة : أهده ماما على كيفك بدون صياح

عَلي : إذا ما تتزوجها يـَ فرات تنسى أنك أبني و آني أبوك ، و ظله بهالبيت مالك و تواصل ويه أي أحد من أهل البيت ماكو و أغضب عليك ليوم الدين و الورث تنحرم منه

نجاة : عَليي شجااي تحچيي أنتت؟؟؟

وگفت أريد أستوعب الگاله بَس أحس عقلي وگف ، معقوله أبويه هيچ يسوي بيه ...

- يابه

- عندك منا لليل فكر زين ، إذا وافقت من باچر نروح نخطبها من أهلها و إذا رفضت تلم غراصك و البيت و أهله يتعذرونك

نجاة : عَلي ...

- أششش أنتِ و لا حرف

رحت گعدت يم رجليه ...

- يابه لا تسوي بيه هيچ تره آني أبنك ، أنت تعرف گلبي ما هاوي غير بنت أختك و من بعدها تحرم عَلي النسوان ، لا تذبحني بهالزواج

- العندي سمعته

گام و طلع بره الغرفة ، ظليت حاير شسوي و شختار ، رضى أبويه لو رضى گلبي ، دحگت على أمي ، گُبل جت حضنتني ، دفنت راسي بصدرها ...

- يمه ضمينيي بين ضلوعچ ماريد هالعالم

- أشش حَبيبي ، هونها و تهون

***

رُسل
من وكت ما سمعت السالفة و آني نار و شابه بصدري ، معقوله فرات يسوي هيچ ، ما توقعته أبد ، دگيت على ريان شوي و فتت خط ...

- أحچيلي السالفة كُلها و لاتزيدين و لا تنقصين

جاوبت و مبين من صوتها چاينه تبچي ...

- مالي خلگ رُسل ، لا تفتحين هالسالفة وياي

- أحچييي ريااان لا تخبليينييي

بچت و گالت ...

- والله الصار مو بإيدي

- شصار أحچي؟؟

سكتت و ظلت تشاهگ من البچي ...

- أهدي حَبيبتي أهدي و سولفيلي الصار على كيفچ

جرت نفس و گالت ...

- هددني بصوري ، ما أعرف منين جاب صوري و گال أدزهن لأبوچ لو أنشرهن ، و طلب مني أجي للغرفة بالليل من ينام الكُل ، گالي أريدچ تلبسين هيچ و هيچ و آني سويت مثل ما يريد و رحتله و صورني وياه بهالشكل بدون ما أدري و صار يهددني إذا ما أجي من يطلبني يدزها لأبويه

- زين من چنتي تروحيله صار بينكُم شي؟

- لا تسألين رُسل

- يعني صار ، صاااار ، آخخخ يوليي أنفضحنهه والله لوو يدرري ابوچ أله يمووت و أخواانچ يسونها دمم والله

- عفيه ماريدهم يدرون شلون رُسل ساعديني

- عمي عَلي هو يحلها ، روحي هَسه

سديت الخط و دخل صگر ...

- ويه منو چنتي تحچين؟

- ويه ريان

راح گعد ع القنفة و حط إيده على راسه ، رحت وگفت گباله ...

- أخوك دمر حياتها

رفع راسه و دحگلي بإستغراب ...

- شجاي تحچين أنتِ

- أنت سمعت الصار

- يعني أنتِ مصدگه

- ليش اللي صار ما يتصدگ يعني

- فرات ما يسويها ، السالفة لعبة

- لا لعبة و لا شي ، أخوك دمر حياة أختي

- رُسل لااا تخبليينييي ، فرااات ماا يسوويهااا

- لتصييح علييه ، فووگ مااا سوااايه فررات تجيي أنت تصييح

- رووحي من وجهيي ترره البيه مكفينيي

- و إذا ما رحت؟

- إذا ظلينه متگابلين ما يصير خير ، آني أروح

عافني و طلع ، ظليت أغلي بناري

***

مُهره
چنت گاعده بالحديقة ، أنفتح باب الحوش و فات شهم ، أجه يمي ذب السويچ و الستره ع الميز و گعد ، و  صفن ، عيونه بيهن حچي هواي و وجهه مگلوب عبالك مو شهم اللي ودعته الصبح و البسمه على وجهه ...

- شهم شبيك؟

ألتفت عليه ...

- ما لگيته ، دورتله و ما لگيته

- منو اللي ما لگيته ، شجاي تحچي حَبيبي !!

- أكبر أبننا ، صارلي سنه متفق ويه فريق محققين من بغداد گالي عليهم صگر ، دفعتلهم فلوس حتى يشتغلون بقضيته و يحققون بإختفائه و كُل هالوكت و هُمه يدورون بَس ما لگوه ، أبني ضاع مني ما گدرت أرجعه

سكتت و غصه صارت بصدري ، اباوعله شلون يحچي و منتهي من القهر ، ما چنت أدري هو جاي يدورله ...

- عبالچ آنـه ناسي ، والله هالفترة هاي كلها آنـه ليلي ما أنامه من التفكير بي

- آسف مُهره ما گدرت أرجعلچ ياه ، آنـه مو خوش أب ما عرفت أحافظ على أبني و مرتي

مسحت دموعي اللي خانني و نزلن ، لزمت إيده ...

- لتحچي هيچ ، أنت أب كلش حنون و زوج ماكو منه ، اللي صار قضاء و قدر و هاي إرادة رب العالمين و أحنه ما لازم نعترض على إرادته

- أنتِ تحچين هيچ؟

- مو سهلة عليه والله ، بَس گتلك هاي إرادة الله أحنه شبيدنا نسوي و ما سوينه ، خلينه نرضى بحكمه و إذا الله كاتبلنه نشوفه راح نشوفه و منا لذاك الوكت هو راح يبقى بگلوبنه ، راح تبقى معزته معزة أول طفل ألنه

شال إيدي و باسها ...

- سامحيني

- مالك ذنب حتى أسامحك ، المهم اريدك تبقى يمي هذا أهم شي

- آنـه يمچ العمر كله ، آنـه عمري ما يسوه بلياچ

- و لا آنـه

- يلا فوت حتى أحطلك عشه

- لا ماريد مو مشتهي ، بَس أريد أنام راسي يوجعني

- تمام

گام فات جوه و آني ظليت گاعده و أبچي ، بالگوه لزمت نفسي گدامه ، ما أعرف شلون تظاهرت بالقوة بَس حتى هو ما ينهار لأن شهم إذا ينهار آنـه أنهار وياه ، ظليت گاعده و أبچي فوگ النص ساعة ، گمت فتت جوه و رحت لغرفتنه ، فتت و لگيته نايم ، رحت للحمام غسلت و نشفت وجهي و أجيت تمددت يمه و حضنته بقوة ما حَس عليه من التعب ، بقيت حاضنته لحد ما غفيت

***

صگر
طلعت بره لگبت فرات واگف بالطرمه ، رحتله ...

- فرات

- هاا

- شبيك

- بيه حيره و كسرة گلب ، بيه شوگ و لهفه ، بيه عتب

- شسوي هَسه صگر

- لا بد ما تبين السالفة و ينكشف الملعوب

- لشوكت ، بعد ما أتزوج

- شتتزوج؟؟!

- أبويه وره الصار قافل أله أتزوج ريان ، لو أتزوجها لو يتبرى مني و يطردني

- آني هَسه أحچي وياه

لزمني من إيدي : لا أگف

- هذا زواج فرات مو لعبه ما يصير بالغصب ، و بعدين السالفة كُلها چذب

- شاللي مخليك متأكد أنها چذب؟

- أخويه و أعرفك ما تسويها

- حاير صگر ، شلون لو رجعت عشگ و لكتني متزوج

- لتتزوج

- و أبويه و تهديده

سكتت ما عرفت شجاوبه

فرات
فتت جوه للديوان و وياي صگر ، لگيت ابويه و عمي و وياهم رافد گاعدين ، رحت وگفت گدام أبويه ...

- يابه

حچه من دون ما يرفع عينه و يدحگ عليه ...

- گول

- آني موافق أتزوجها ، بَس أرضى عليه

رفع راسه و دحگلي بنظرة حسيت نفسي واحد نذل و خسيس ، أبويه نظراته وحدهن يذبحن لو دحگ عليك يخليك تحس بالذنب حتى لو أنت ما مسوي ، يعاقبك بالتجاهل يتعامل وياك كأنك ما موجود على وجه الكرة الأرضية و آني هذا اليذبحني أبويه لو تجاهلني

ثاني يوم من الصبح طلعنه لأهلها ، وصلنه هناك و أبويه و عمي فاتحوهم بالموضوع و طلبوها و وافقوا ينطونها ، و آني فاصل عن العالم كُله ما أسمعهم شيحچون و لا أدحگ بوجوهم ، تفكيري كُله يم عشگي لو درت شراح تگول عليه ، راح تكرهني أكيد و حتى حچي بعد ما تحچي وياي ، فززني صوت عمي ...

- فرات

- هلا عمي

- شوكت تريد نعقدلكُم

- بكيفكم

أتفقوا وياهم يسون العقد بعد أربع أيام و بدون عرس و حفلة ، وافقوا و ما گالوا شي

ريان
و أخيرًا اللي أتمنا سنين صار و تحقق ، خطبني إي والله خطبني ما مصدگه و أخيرًا صار ليه مسجل بأسمي ، فرات ليه آني و بَس ، وره أربع أيام جو و جابوا شيخ و عقدنه و كملنه هالسوالف و رحت وياهم ، بَس هالمره رحت لبيتي رحت بصفتي زوجة فرات إي زوجته ، چنه وحدنه بالسيارة و الباقين ويه صگر و رافد ، چان طول الطريق ساكت و عاگد حواجبه و لا عبرني و دحگ عليه كأنو ما شايفني ، بَس ميخالف المهم تزوجنه بعدين هو يتعود و يگوم يحبني ، حچيت و آني عيوني عليه ...

- حَبيبي

ألتفت عليه و خزرني ...

- لا تگولين هالكلمة ، و لا عبالچ آني ساكت ع السويتيه و التهمه اللي لزگتيها بيه ، كُلشي بوكته حلو

- فرات أحنه هَسه تزوجنه ، أدري اللي سويته غلط بَس والله عبن أحبك آني أسوي كُلشي علمودك ، خلينه ننسى الصار و نلتفت لحياتنه

ضحك و ضرب ع الستيرن بعصبيه ، أندار عليه ...

- و لا كلمة ، حرف ماريد أسمع منچ

ردت أحچي صاح عليه و سكتني ، وصلنه بالثمانيه بالليل لأن أحنه بقضاء و هُمه بقضاء ، نزلنه و كلمن راح لغرفته ، خالتي نجاة دخلتني للغرفة و ما حچت و لا كلمة ، گعدت شويه و بعدين گمت عدلت مكياج و صرت أدحگ ع الغرفة ما مصدگه أنُ صرنه بغرفة وحدة ، رحت و گعدت أنتظر فرات ، و أنتظر و أنتظر ساعة و ساعتين و ثلاثة ، صارت الساعة بالوحدة و هو ماكو ، شگد ضجت ، گمت فتحت الباب و مشيت بالممر دحگت من الدرج الأضوية مطفيه و الكُل نايم ، رحت أتمشى بالممر شفت باب غرفة عشق مفتوح شويه ، رحت فتحته و فتت لگيت فرات نايم ع الچربايه و متغطي بالستره مالته ، تخبلت من شفته نايم بغرفتها و عايفني أنتظرة ساعات و آني مرته ، أنقهرت حيل ، عفته و رجعت للغرفة ، تنرفزت و عصبت حيل ، مسحت المكياج و فتحت شعري و ذبيت الفستان و رحت أنجضعت ع الچربايه ...

- نايم بغرفتها مو ، بسيطة إذا ما نَسيتك حَتى أسمها آني مو ريان ...

********

يتبع ...

18.kij
تعالو أنستا و اليجي يدخلي خاص و يگُلي علمود أضيفة كلوز لأن نشري اللي يخص الرواية كُله بالكلوز

سحر الدليمي