رواية عشگ الفرات ( عِندما تَهوى القُلوب ) الفصل الحادي والستون 61 - بقلم سحر الدليمي

لا تنسون التصويت و التعليق بين الفقرات
قراءة مُمتعة ♥️

***

- الشوگ يَسكِن بالحنايايا و الخفوگ
وش عاد لو طَرى طيفك على بالي تالي الليل

***

عشق
طول اليوم آني گاعده وحدي ، لا أحچي ويه أحد و لا أشوف أحد غير فؤاد و حتى ما أگعد وياه ما طايقه أشوف وجهه ، لا عندي تيلفون أخابر أمي و أسأل عنها كُلش أشتاقيتلها ، و فرات ، فرات أحسه مو بخير والله گلبي ديگُلي هو مو بخير ، يا ربي شلون أتطمن عليه و أطفي نار الحيرة و الخوف ، أجه ببالي أحچي ويه فؤاد بلكي يخليني أحاچي أمي ، رحتله چان گاعد بالهول و حاط أوراق كومه ع الميز و ديراجع بيهن و بصفه كوب چاي ...

- فؤاد

رفع راسه شافني و أبتسم ...

- روحه لـ فؤاد گولي حياتي

- فدوة خليني أتصل بأمي أحاجيها و أتطمن عليها والله مشتاقتلها هواي

أختفت البسمه على وجهه و دنگ للأوراق ...

- لا

- الله يخليك بَس أتطمن عليها والله ما أطول

- گتلچ لا

- أنت ليش هيچ أناني و متفكر بَس بنفسك؟ ، متخاف من الله خطفتني و تزوجتني غصب و هَسه حابسني يمك ، عبالك بأفعالك هاي راح أحبك و أبقى عايشة وياك؟!

ذب القلم من إيده و گام وگف گبالي ، مد إيده خلاها على وجهي بعدتها عني ، حچه ...

- والله ما أگدر يا حبيبتي

- شوف داگُلك ، لو أعرف أذبح نفسي و لا أبقى عايشة يمك طول العمر ، يا أما يجي أحد و يخلصني منك يا أما آني أذبح نفسي و أخلص منك فاهم ، و حُب مستحيل أحبك لأن گلبي ساكنه رجال واحد و هو فرات و مستحيل أبدله بيك او بغيرك

آني حچيت هيچ و هو تخبل ، دفر الميز و وگعه و كسر البلازمه و يصيح ...

- تنسسيننهه فررااات تننسيينه غصبًااا عننچ والله أذبحههه فاااهمه أذببحههه و أدفنهه بإييدييي

للحظة حسيته مخبل مو صاحي والله ، عفته و رحت ركض للغرفة قفلت الباب عليه و گعدت ، أخاف يسوي بيه شي ، أسمعه يصيح و يكسر و يغلط ، سديت أذاني حتى ما أسمع صوته ، ماريد أسمع صوته ، يا ربي خلصني منه والله بعد ما أگدر أتحمل 7 شهور صارلي محبوسه هنا مليت و طگت روحي ، أشتاقيتله ، كُلش أشتاقيتله و أشتاقيت لحنانه و لمست إيده و نظرات عيونه الحلوه اللي كفيلة أنها تشرح كُل اللي بگلبه بدون ميحچي حرف ، الحُب مو تملك الحُب حنان و كلمة حلوه و تفهم و فرات كُل هالأشياء بي و خلتني أعشقه بجنون

***

عَلي چان مار بالصدفة من يم غرفة عشگ ، الباب چان مفتوح شاف فرات نايم و متغطي بَس بالستره ، شال غطه و غطاه ، حَط إيده على راسه و ظل واگف و يدحگ عليه ، بعدين عافه و طلع

ريان
الليل كُله آني ما گدرت أنام رغم تعب الطريق بَس ما گدرت تفكيري كُله يم فرات اللي ما شوفني وجهه ، ظليت أحوص بالفراش و أتگلب آخر شي گمت لبست الروب و طلعت رحت لغرفة عشق فتت و سديت الباب و قفلته ، فرات چان نايم و مو حاس على شي ، رحت گعدت يم راسه ع الجهه الثانية مسحت على شعره و وجهه ما حَس أبد ، بست عيونه هَم ما حَس ، ذبيت الروب ظليت بَس ببدلة النوم قصيرة و صدرها مفتوح ، تمددت بصفه و خليت راسي على صدره و حضنته من خصره ، ماكو دقايق و غفيت ، غفيت و آني على صدره ، اللحظة اللي أتمناها سنين

حسيت عليه تالي الليل ، حضني بقوة و قربني عليه ، فرحت حييل حسيته رايدني و بلش يميل الي ، قربني عليه و حط راسه برگبتي و هو مغمض عيونه و شواربه چككني ، شوي و أبتعد عني بسرعة فتح عيونه و دحگ عليه گام گعد و همس ...

- لا حول الله يا ربي

أخذ سترته و طلع ، ناديته بَس ما جاوبني ، گمت رجعت لغرفتنه ، دگيت عليه بَس ما جاوب ، لبست الروب و نزلت جوه ، رحت للهول لگيته مجضوع ع القنفة و بإيده الموبايل يگلب بي ، عفته و رجعت للغرفة بَس شگد أنقهرت من تصرفه

ثاني يوم الصبح ، حسيت على حركة بالغرفة فتحت عيوني لگيت فرات جاي يطلع ملابس من الكنتور ، أخذ دشداشة رصاصية و غتره بيضة و العگال ، راد يطلع كمت و لزمته من إيده ...

- ليش ما جاي تهتملي؟ ، تره آني مرتك فاهم أنت تزوجت

لزم إيدي بقوة و عصرها ، حچه و هو صاك على أسنانه ...

- هذا الزواج على ورق ، آني تزوجتچ بَس تا أرضي أبويه و مستحيل تصيريلي مره أفتهمتي

عافني و طلع ، ظليت أحوص بالغرفة ، شلون أقربه مني ، شلون أخلي يحبني ، بدلت ملابسي بسرعة و طلعت رحت لغرفة عشق لگيته جاي يلف بالغتره

نجاة واگفة بالمطبخ جاي تسوي ريوگ ، تعده من يمها عَلي وگف تا يفتح الباب ، أندار عليها ...

- أحنه طالعين تره

جاوبته بدون ما تلتفت عليه ...

- أبقى جاي أسوي ريوگ

- ماريد ريوگ

- ما يصير تطلع بدون ريوگ ، أگعد

- أتريگ غاد

ألتفتت عليه : أگلك أگعد لا تتعبني

أبتسم و راح گعد ع الكُرسي ، حچه ...

- يابه أنتن بنات البصرة و لا تنحملن

- علساس أنتوا ولد الأنبار تنحملون

سكت ما جاوبها و هو مبتسم ، حطت الريوگ گدامه و هي ما تدحگ بوجهه ، حچه ...

- لشوكت تظلين مثگله وجهچ عليه؟

- و أنت لشوكت تظل مثگل وجهك على فرات؟

- آني و فرات ننجاز ، خليني أعاقبه ع اللي سواه ، مو أبن المهيوب اللي يسوي هيچ و ينسكت عنه

- فرات ما يسوي هيچ و آني متأكدة مثل ما متأكدة أنك گدامي هَسه ، آني أمه و أعرفه أكثر حتى من نفسه

- أدري أني قسيت عليه و ظلمته بهالزواج بَس من جهه ثانية يمكن يكون من صالحة ، أريده ينسى عشق و يلتفت لحياته ، أريده يأسس عائلته و يستقر

- و أنت تعتقد ينساها لو تزوج ، تدري البارحة حتى ما نام بغرفته لگيته نايم بغرفتها

- أدري كُلشي أدري آني ، بَس نگول عسى و لعل ينسى

سكتوا على صوت لارين و هي تمشي وره صگر و تصيح ...

- بابا أخذني وياك ، أريد أروح وياك ماعليه

- ول بابا ما يصير آخذچ رايح للدوام آني مو رايح لمنتزه

- مااا ماااااا ماعليه والله أروووح

- آخخخ يابه شگد قنقينه

نجاة : شبيها بنتك أبني

- تريد تروح وياي بالله شايفة هيچ

- يلا غلس و اگعد تريگ هَسه هي تنسى

- لا ماريد مستعجل

أخذ لفه زغيره و راد يروح وگفته نجاة ...

- أوگف حَبيبي

- هااا يـَ رويحتي

راحت نفضت التراب اللي على بدلته و عدلت البيريه مالته ...

- هااا ماما كبرت آني مو صف أول إبتدائي

- هههههه ، تظل بعيوني زغير لو شما كبرت ، يلا حَبيبي ديربالك على نفسك

- صار

راد يمشي و صاحه أبوه ...

- صگر

- هلا يابه

- ديربالك على نفسك وليدي

- الحامي الله أبو صگر

طلع و رادت تمشي وراه لارين ، ناداها عَلي ...

- لولو ، تعاي جدو تعاي أريگچ عوفي هذا أبوچ مو خوش آدمي آني عود آخذچ وياي

- جدو أريد أروح وياه

- گتلچ آني آخذچ يلا تعاي تا نتريگ و نروح بساع

راحتله شالها و گعدها بحضنه و صار يريگ بيها ، جو رافد و نَفس و گعدوا ، حچه رافد ...

- عُمري بلا أمرًا عليچ روحي گعدي أبويه يمكن بعده نايم

- صار

گامت و هو ألتفت على لارين ...

- ولك هااا جبار شبيك أتنعوص من الصبح ما خليتنه ننام

- أهوووو لا تگُلي جبار والله أگول لـ بابا عليك

- دطيري أنتِ و أبوچ

- والله يسجنك تره و ما يطلعك أبد

- أنچب جبار

- أهوووو ، جدي عندك ياه

عَلي : لا تداهرها يول تره روحها واصله لخشمها بالگوه قنعتها

- هههههههههه أويليي يابه ، دحگي لارين

- هااا

- باچر يصير عندي وليد و آخذچ لأبني شتگولين

- إيييع ماريده

- والله مو وجه نعمه أنتِ شفايتلچ لو تاخذين أبني

فات فرات و صَبح عليهم كُلهم ردوله أله أبوه حتى ما دحگ بوجهه ، هو أنقهر بَس سكت ما حچه شي ، شافته لارين و نزلت من حضن جدها ركضت عليه ...

- فرااات فرااااات

شالها و حضنها ...

- روح و گلب فرات أنتِ ، أمريني شتريدين

صعدها ع الكاونتر و هي تمسح على وجهه ، حچت ...

- شگد حلو أنت

- ههههههههه ، بَس أنتِ أحلى مني

- أخذني وياك عفيه

- أنلاصت و علي

نزلها بالگاع : هَسه أنتِ روحي كملي ريوگچ و بعدين يصير خير

راحت ، حچت نجاة ...

- تعال تريگ حَبيبي

- لا ماريد بَس أريد چاي ، حار لو أحمي؟

- لا حار بَس صب

راح طلع كوب و دگ موبايله ، صار يحچي و هو يصب بالچاي ...

- هلا مروان ، أي طالع هَسه ، لا والله مگدر أجي عندي شغل فوگ راسي ، دحگ مُر على صگر بالقسم هو يفهمك السالفة ، إي داوم اليوم ، خوش عَجل أنتظر منك خبر ليخوي آني بشاربك ، تسلم حَبيبي ما تقصر ، هلا الله وياك

سد التيلفون و أرتاچ ع الكاونتر يشرب چايه ، كمل و راح باس راس أمه ...

- أدعيلي يوم

- الله يسهل دربك يـَ روحي و ينولك اللي ببالك

***

عباس
حاير شلون أگول لـ عبدالله اللي صار ، والله لو يعرف ينهار ، رحت للمطبخ لگيته گاعد يسوي چاي و بإيده تيلفونه لابس ملابسه حتى يروح للشغل ...

- عبود

جاوبني بدون ميرفع راسه : هلا

- عوف الصخام أريد أحچي وياك

طفه التيلفون و خلا بجيبه

- و هاي عفناه ، أحچي شعندك

طلع كوب حتى يصب چاي ...

- حَبيبتك

رفع راسه : شبيها؟!

- تزوجت

گلت هيچ و رجفة إيده و وگع الكوب و تكسر ...

- الله الله ، خوما تأذيت؟

- شنو تزوجت ، شتحچي أنت عباس ، آني سائل عنها لا مخطوبة و لا صخام

- تزوجت والله

- منووو تزووجت شللوون و شوووكتتت

- أهده على كيفك

- أحچييي عباااس أحجيي شتععررف

على صياحه اجت أمي ...

- أسم الله أبني شكو شبيك تصيح

باوع لأمي و رجع باوعلي ...

- أحچييي ولكك لا تسوودنييي

- فرات تزوجها

- هااا شنوو ، فراات؟؟

- أي البارحة تزوجوا

- بَس فرات يحب ، يحـ ...

ما كمل كلامة جر الكُرسي بسرعة و گعد عليه حسيته راد يوگع ، راحتله أمي ...

- عبدالله حَبيبي شبيك أحچي

ساكت و صافن بالگاع ، حچت أمي و هي تباوعلي ...

- شبي أخوك ولك؟؟

جريتها على صفحة و حچيتلها ، أنصدمت ، راحت لـ عبدالله اللي لهسه بَعده صافن و الصدمة محتلته ...

- سودة عليه وليدي ، لا تنقهر الله يعوضك

باوع عليها و عيونه مليانه قهر ، گام و عافنه و راح لغرفته ، رادت تلحگه أمي وگفتها ...

- عوفي يمه خلي وحده هالفترة

***

فرات
بالشغل و دگ عليه شهم أول مره ما لحگت أجاوبه بالثانية دگ و جاوبته ، أول ما فتحت خط صاح ...

- هَسسهه تحجيليي شصاايير ويااكك أفتتهمتت

- بَس أگف على كيفك

فتت جوه للمكتب و سديت الباب ، حچه ...

- شوكت تزوجت و شلون؟؟

- البارحة ، شهم روحي جاي تطلع والله ، مخنوگ حيل هالزواج خانگني

- أحچي شنو السالفة؟!

حچيتله السالفة كُلها من بدايتها لنهايتها ...

- ولك معقولة تهمتك هيچ تهمة بَس لأنها تحبك !!

- خبله والله العظيم مو صاحية

- و شراح تسويلها هَسه و شلون تبري نفسك

- هَسه مو فارغلها و لا فارغ لهالسوالف ما دام آني أعرف نفسي ما مسوي الشينه ماعليه باليحچون

- برائتك فرات لازم تبري نفسك گدام أهلك

- هَساع ملتهي أدور لـ عشگ بعدين ألتفت لهالسالفة

- بَعدك تحنلها

- ما غابت عن بالي و لا لحظة

- البنيه تزوجت فرات

- حتى لو تزوجت ، بَس خل ألگاها أخلي يطلگها و القندرة على راسه ، يطلگها و أرجعها لحضني

- يجوز عدها طفل منه ، ترضاها؟

- راضي بكُلشي وياها شهم ، أبنها أعتبره أبني و أحطه بعيوني ، هي بَس ترجعلي و تطفي نار الشوگ الشابه بدليلي

- ترجعلك إن شاء الله ، الألك ما يصير لغيرك

- آمين

***

ريان
مَر شهر على زواجي من فرات و هو ما معبرني و لا عبالك متزوجين ، لا يحچي وياي و لا ينام يمي ، حتى غرفته عافها ، كُله ينام بغرفة هذيچ الحيه ما يطب غرفته بَس من يريد ياخذ ملابس او شي من غراضة ، تعبني شگد حاولت أحچي وياه و أتقرب منه بَس هو يصدني و يبني الف حاجز و حاجز بيناتنا ، حتى قلييل أشوفه ، ذاب نفسه بالشغل يطلع من الصبح للشغل و ميرجع للثمانية يتعشه و يلف راسه و ينام و ثاني يوم نفس الروتين ، كأنه طالعه روحه من البيت و ميريد يظل بي ، روحه متعلگه بسيف يحبه حيل ، مرات من أشوفه يلاعبه أتمنى لو يصير عدنه طفل و هيچ يحبه و يلاعبه بَس ما أعتقد تصير و هو كارهني

خلصنه العشه و صعدت للغرفة ، فتت لگيت فرات جاي ياخذ ملابس ، دحگ عليه و چان مبين عليه التعب جاي يهلك نفيه حيل بالشغل ، ذب الملابس و گعد ع الچربايه و لزم راسه ، رحتله ...

- فرات ، بيك شي؟

- جيبيلي مي و وياه بندول

بالگوه يحچي ، عفته و نزلت جوه جبت مي و بندول و رجعت للغرفة لگيته نايم ، گعدته ما رد عليه ، نام بالبنطرون و القميص حتى ما بدل ، أدري بي هو لو شما يصير مينام يمي بَس هالمره لأن تعبان فـ ما حَس على نفسه ، رحت تمددت يمه و لزمت إيده ، أنتبهت أنه نازع الحلقة ، ما أهتميت المهم هو هَسه زلمتي و يمي و كُلشي يجي بوكته ، ظليت گاعده و أدحگ عليه إلى ما غفيت

***

عشق
نايمة و حسيت على دگة الباب ، گمت لميت شعري و لبست شالي ...

- شتريد

- فتحي الباب عشق أرد أحاچيچ

- ماريد روح

- بَس أحاچيچ والله ماطول

كمت فتحتله الباب و رجعت گعدت ع الچربايه ، أجه وگف گبالي بملابس الدوام يريد يطلع ، حط إيديه بجيوبه و باوعلي ...

- أنتِ لشوكت تبقين هيچ؟

- ما أفتهمت؟!

- آني رايدچ كلش ولچ ، صار 7 أشهر متزوجين و أنتِ ما تخليني حتى ألمسچ

- گتلك تحلم أصيرلك مره

- يعني متخافين آخذچ غصب؟

- إذا سويتها فـ أنت مو رجال ، لأن ماكو رجال يتقرب لبنيه هي ما رايدته و بگلبه غيره

زفر هوى قوي بعدين گال ...

- باعي ، آني وعدتچ ما أتقربلچ أله برضاچ

تقرب مني و دنگ همس يم أذني ...

- بَس آني صبري أله حدود و لو نفذ صبري ساعتها لا تلوميني ، تمام يـَ حلوه

عافني و طلع ، شگد كرهت نفسي و آني وياه ، أريد أطلع ، أريد أخلص منه يا ربي شلون والله راح أموت

***

مُهره
جاي أعزل بفراش الچربايه و شهم بالحمام جاي يسبح ، شوي و طلع لابس بَس التراك و شعره و جسمه يقطر مي ، رحتله ...

- أنت شنو متعرف تتنشف زين

أبتسم و ما ردلي ، أخذت المنشفه ...

- دنگ أنشفلك شعرك ، صلوات على مُحمد شگد طويل أنت

أشو آنـه گلت هيچ و هو طگها ضحكة ، صارلي هواي ما شايفته يضحك هيچ ، آنـه شفته يضحك و ضحكت على ضحكته ...

- هههههههههههه ، يا بويه ، شسويلچ إذا أنتِ قزمة هههههه

- هَسه آني قزمه؟؟؟

- بويه مو قزمة يلا كملي نشفيلي

ألتهيت أنشف بشعره و هو مدنگ عليه ، ما حسيت بي غير من جرني عليه و باسني بشفايفي بقوة ، أحس هالبوسه فززت كُلشي بداخلي ، فززت گلبي الميت و رجعته ينبض بكُل حُب و شوگ ، آنـه هَم بادلته و حضنته بقوة ، وخر عني و آني بسته بصدره على جهة گلبه ، رفع راسي بإيده و گال ...

- و عَلي الفحل هذا ينبض بَس بأسمچ

- أحبك

شالني و أخذني للچربايه ...

- شهم دوامك

- أششش أنعل أبو الدوام

***

نَفس
چنت أسبح فجأة لعبت نفسي صرت أگح و أتقيأ شوي و سمعت باب الحمام يدگ ...

رافد : نَفس بيچ شي؟

- لا لا مابيه شي

- متأكدة؟

- إي إي عُمري مابيه شي

نشفت جسمي و لبست روب الحمام و طلعت لگيته منتچي ع الحايط و مچتف إيديه ، من شافني أجه عليه ...

- شبيچ يـَ رويحتي سمعتچ تگحين

- مابيه شي حَبيبي هيچ بَس گحيت

عفته و رحت طلعتلي ملابس ، لبستهن و أنداريت عليه لگيته يباوعلي ، حچه ...

- شنو هذا الأثر اللي بچتفچ؟

باوعت على چتفي و رجعت باوعتله ...

- هذا أثر الإصابة مالت الإنفجار

حسيت راح أبچي ، أنداريت عنه و سويت نفسي أمشط بشعري ، شوي و حسيته وراي ، سحبني عليه و حضني راسي صار على صدره ، باوعلي بالمرايه و هو محاوط بطني بإيديه ...

- إن شاء الله الله يقدرني و أعوضچ عن كُل يوم مو حلو عشتي و كُل دمعة نزلت من عيونچ الحلوات و كُل أذية حسيتي بيها

لزمت إيديه : وجودك يمي هو عَوضي الحلو و هو اللي راح ينسيني كُلشي مو حلو مريت بي

دنگ راسه و باسني من رگبتي ، عافني و راح گعد ع الچربايه و هو يباوعلي ...

- يلا كملي بساع تره جعت أريد ريوگ

- ههههههه صار تدلل

نشفت شعري بالشسوار و مشطته ، لفيت شالي و مشيت وصلت يم رافد و دخت ردت أوگع لو ما ألزم إيده ...

- شبيييچ ، نَفس شبييچ؟؟

- لتخاف مابيه شي بَس دخت شويه

- صارلچ أيام مو على بَعضچ ، بدلي تا آخذچ للمستشفى

- لا ما يحتاج حَبيبي

- يـَ مره لا تعاندين بدلي بساع يالله

- زين بَس خل نتريگ ع الأقل

زفره هوى مو عاجبه ، باوعلي ...

- ديلا

نزلنه جوه ، لگينه الكُل گاعد بَس بعدهم ما ملتمين ، اللي يغسل و اللي يصلي و اللي يخابر ، گعد رافد و عيونه عليه يراقب كُل حركة أسويها ، حسيته كُلش خايف عليه ، أجت ريان و ساعدتني بالريوگ ، كملناه و حطيناه ع الميز ، رحت ع الكاونتر داطلع كوابت الچاي ، شلت الكوب و دخت و وگع من إيدي ، الكُل صاح الله ، رافد بسرعة گام و أجه عليه ...

- دشو عوفي الصخام و روحي بدلي نروح للمستشفى

- والله ميحتاج يا حَبيبي

- نَفس لااا تجلطيينيي ، دشووفي حاالتچ شلوون

- زين زين بَس لتعصب عفيه

عفته و رحت للغرفة بدلت بسرعة و نزلت لگيته رايح راد بالصالة ، شافني و أجه ...

- بعدچ دايخة؟

- شوي

طلعنه و توجهنه للعيادة ، دخلت للدكتورة حچبتلها اللي جاي أمر بي و طلبت مني تحليل حمل ، رحنه للمختبر و سويت التحليل ، شوي و طلع و هنا چانت الصدمة و فرحة عُمري ، طلعب حامل ، رافد بإيده ورقة التحليل و ساعة يباوعلي و ساعة يباوع للورقة ...

- هَسه شنو يعني أنتِ حامل؟

- هههههههه ، إي رافد شبيك

- الله ، والله العظيم لو ما العالم چان هَسه گمت اصيح

- ههههههههه

طلعنه و هو طول الطريق فرحان و يضحك و مشغل أغاني و حاط إيده على بطني و يحچي ويه الجنين ...

- ههههههه ، رافد شبيك تره بعده حتى ما تكون

- ميخالف خلي يتعود على صوت أبوه من هَسه ، يـَ روح أبوك أنت بَعد گلبي شوكت تطلع و تنور الدنيا

- آخخخ يولووو ماا مصدگ رااح أصيير أب

- ههههههه ، رافد

- عيوني و سنوني أنتِ ، أحچي نَفسي

- أنت شتريد ولد لو بنيه؟

- حي الله بَس المهم زعطوط يناديني بابا

- ههههههههه ، يا الله شعليك سوالف

وصلنه البيت و نزلنه ، أول ما فتنه تلگتنه خالة نجاة ...

- هااا سلامات

راحلها رافد و شالها و هو يضحك ...

- عممهه رااح أصيير أب آنيي ، نَفس حامل حااامل

- هههههههه ولك نزلني مسودن

نزلها : سمعتي راح أصير أب

- هههههه ، مبارك حَبيبي يتربى بعزكم إن شاء الله

أجه عمو جسام : هاي شبيكُم يولو حسوسكُم عاليه

- تعال أبو رافد تععال ، أبنك رااح يصيير أب ، مرتي حاامل يابه

حضنه عمو جسام و هو يضحك و يباركله ، عفتهم و رحت للغرفة ، بدلت و جاي أحط بالملابس ، فات رافد يضحك ، گعد ع القنفة و صاحني ، رحتله و گعدت على رجله ، حضنت رگبته و هو إيده على بطني ، دنگ باسها و گال ...

- شوكت تطلع وليدي

- أوووو ، بعدها طويلة

- أووووف شيصبرني

- أگول تره نحن نشعر بالغيره

- ههههههههههه ، أبوس اليغار آني

حضني حييل عصرني عصر ...

- رااافد شبيك راح تموت الطفل

- هااا نسيت نسيت

- لازم تتعود و هاي حركاتك بطلها ، تذكر آني حامل شوية أهدأ

- صار من عيوني

ريان
صارت الساعة بالعشرة و فرات بعده مو گاعد ، هو مو من عوايده يظل نايم لهالوكت ، خفت لا بي شي ، صعدت للغرفة ، فتت لگيته بعده نايم ، رحت گعدته فز و دحگ عليه ، گام گعد و حط إيده على راسه ...

- فرات بيك شي ؟

ما رد عليه گام ، للكنتور طلع ملابس و فات للحمام ، گعدت أنتظرة شوي و طلع بَس بالتراك ، راح للكنتور ما أعرف شيدور ، أندار عليه ...

- فانيلتي البيضه النص ردان ما شفتيها؟

أنتبهت لصدره كُله جروح غميگه ، آني أعرف أنُ هو من أندعم تأذة حيل بَس ما توقعت هيچ ، فززني من گال ...

- الوووو ، جاي أحچي وياچ

- هاااا إي

- فانيلتي البيضه شفتيها؟

- إي لحظة

رحت طلعتها و أنطيته ياها ، أخذها لبسها فوگ التراك الأسود و راح رش عطر و صار يمشط بشعره ...

- اسويلك ريوگ؟

جاوبني بدون ميدحگ عليه ...

- لا

كمل و فتح الجرار و طلع ساعة و لبسها ، شال تيلفونه و طلع

********

يتبع ...

18.kij
تعالو أنستا و اليجي يدخلي خاص يگُلي علمود أضيفة كلوز لأن نشري اللي يخص الرواية كُله بالكلوز

سحر الدليمي