رواية عشگ الفرات ( عِندما تَهوى القُلوب ) الفصل التاسع والثلاثون 39 - بقلم سحر الدليمي

- دَعكَ مِنهُم ، و كُن مَعي يا عَزيزي .

***

مُهره
سحبني من إيدي و طلعني بره البيت ، إيده ساد بيها حلگي لدرجة النفس بصعوبة أتنفسه ، فتح باب السيارة و صعدني بيها ، شد عيوني و گعد بصفي ، مشت السيارة و آني ما أدري وين متوجهين ، صيحت و ناديت بَس ماكو فايدة ، شوي و وگفت السيارة ، نزل و نزلني وياه ، فك عيوني و دخلنه لبيت چبير ، دخلني لوحدة من الغرف خلاني بيها و سد الباب و قفله ، رحت يم الباب أدگ بي و أصيح ...

- رجعوونيي لأهلليي ، منوو أنتووو ، شتردوون منيي ، فدووة عووفونييي

ضليت أصيح و أدگ بالباب هواي و محد أجه ، لحد ما تعبت و گعدت بالگاع ، صرت أتمنى يجي شهم أو سجاد و يساعدوني ، يا رب خلصني منهم و رجعني لأهلي ، حسيت بوجع ببطني ، خفت لا يصير شي ع الولد هو آني من غير شي حملي خطر أنوب أجتني هالسالفة ، صرت أمسح على بطني و أقره آيات و أدعي بلكي يخف الوجع و ميصير شي ...

- تحمل ماما ، ما راح يصيرلك شي إن شاء الله

يربي والله إذا صار لأبني شي آني أموت ما أتحمل ، يارب سترك ، دخيلك يا علي توگفلي بهالشدة ، بقيت أدعي و أردد يا علي و يا الله

***

فاطمة ضلت رايحه راده بالبيت و تبچي و تلوب ، متدري تخابر ع الشرطة و تگُللهم متدري تنتظر سلام لحد ما يجي ، قررت تنتظره يجي و هو يتصرف ، وره نص ساعة جه سلام ، تلگته و هي تبچي ...

- ألححگ سلاااام دخييلك تللححگ ، الببتت راااحت

- شكو فاطمة شصاير؟؟؟

- أخذوها ، أخذوها گدام عيوني سلام

- لا تبچين و أحچياي شصاير ، منو الأخذوها؟؟!

- مُهره ، طبو علينه زلم ما نعرفهم أخذوها و راحو

- شللووون؟؟؟

- هذا الصار ، فدوة سلام رجعها للبيت ، إذا رد شهم و ما لگاها يتسودن و علي

عافها و طلع بره ، ركب سيارته و توجه لبيت أخوه حسين ، وصل و دخللهم و هو ميشوف دربه ...

حسين : خير يخوي شمالك؟؟

- منين أتلاگها ولك خوية گلي منين ، أنهد حيلي بعلي

- شماالك سلام ، أحچي؟؟

- شهم مسجون و ما أدري على أي ساعة ينحكم و يسجنونه نص عمره

- شتحچييي أنتت؟؟

- هذا أهون

- ليش شكو أكبر من هيچ؟؟

گعد و ضل يدگ على راسه و يصيح أنفضحنه ...

- خوية دحچي والله وگعت گلبي ، أنفضحنه شني !! ، شسالفة؟؟

رفع راسه و هو عيونه حمر ، حچه ...

- دايسين بيتي بغيابي و ...

سكت ما گدر يحچي ، حچه حسين و إيده على گلبه و هو خايف من اللي راح يگوله سلام ...

- و شنو؟ ، شصار؟!!

- ماخذن مُهره و رايحين ، مُهره أنخطفت خوية

- شنووو ، شللوون صااار هيييچ؟؟؟

- ما أدري خوية ، آنـه ما چنت بالبيت و شهم بالسجن ، يعني كأنهم مراقبين البيت و يعرفون مابي زلم

طلع حسين و سلام وياه ، راحو للشرطة و بلغو عن خطف مُهره ، عسى و لعل يلگونها ، بلشو الشرطة بتحقيقاتهم و بحثهم عن مُهره

***

عشق
لثاني يوم الصبح و أحنه منعرف أي شي عن صگر و فرات ، بلغنه الشرطة و لحد هَسه ماكو خبر ، گاعده بالصالة. نَفس يمي ، أطگطگ بأصابيعي و دموعي تنزل ، خايفة لا يصيرله شي ، خايفة ميرجع و يعوفني مكسورة بهالدنيا ، خايفة يروح مثل ما راح بابا ، آني شنو حياتي بدونه إذا صارله شي؟ ، مگدر أكملها بدونه ...

نَفس : عشق حَبيبتي كافي تبچين

- أريده نَفس ، أريده يرجعلي ، ما أتحمل بدونه والله

- يرجع يا عمري ، إن شاء الله يرجع سالم هو و صگر

أجتنه رُسل و هي بالگوة تمشي ، حچت ...

- ررااح أموت يوولن ساعدنيي

گمت لزمتها من إيدها و نَفس من الأيد الثانية ...

- رُسل ، شبييچ حَبيبتي شصايرلچ؟؟

- ما أعرف ، يمكن رااح أجييب ، آخخخ يممممههه رااح أمووت وويينك صگررر

صارت تبچي و تردد أسم صگر ، رحت ناديت أمي و خالة نجاة ، أجن شافنها و گالن ع الأغلب دتطلگ ، بسرعة لبسنه آني و خالة و لبسناها ع السريع و رحنه للمستشفى و ويانه رافد ، شافتها الدكتورة و گالت عدها ولادة بَس بعد مو هَسه ، خلتها تحت المراقبة يعني راح ننام بالمستشفى اليوم

***

- حيدر ، فهمني أنت شرايد من البت و خاطفها؟!

- مالك غرض

- شلون مالي غرض خوية ، تره إذا درو أهلها ما نسلم من شرهم و أحنه المتعدين عليهم

- آنـه رايد أذل أهلها بيها

- مو هيچ تذلهم ، هذا يسمونه تعدي على أعراض الناس و هذا ما يجوز لا بالدين و لا بالعشاير ، فكنه من شرهم و رد البت لأهلها

- آنـه ما يهمني لا دين و لا عشاير ، ما أردها غير من أشوف راس أبوها و عمامها منحني من الفضيحة

- لا حول و لا قوة الا بالله ، أنت ما راح ترتاح أله من تسويها دم بينه و بينهم

مُهره
واگفة ع الشباك أباوع للحديقة مالت البيت ، أنفتح الباب و دخلت بنيه شابة ...

- منو أنتِ؟

- مو مهم ، گليلي محتاجة شي ، بيچ شي؟

- طلعوني منا ، عووفوونييي

- والله هالشي مو بإيدي

- الله يخليچ ساعديني و طلعيني منا ، آني حامل و أبني بخطر ، خايفة لا يصيرله شي

- يعني أنتِ متزوجة؟

- إي

بقت ساكتة ، شوي و رجعت حچت ...

- چا أروح أجيبلچ أكل ميصير تبقين بدون أكل

- ماريد أكل ، گتللچ طللعينييي مناااا

ما جاوبتني و طلعت و قفلت الباب وراها ، بقيت أفتر بالغرفة بلكي ألگه مخرج أو شي حاولت أفتح الشباك بَس شكلة مقفول ، سمعت الباب جاي ينفتح رجعت گعدت بمكاني ، أنفتح و دخلت البنيه نفسها و وياها صينية أكل ، أجت گعدت مقابيلي و حطت الصينية گدامي ...

- يلا أكلي

- ماريد

- ميصير لازم تاكلين

- گتلچ ماريد

سكتت شوي و رجعت حچت ...

- إذا مو علمودچ ، أكلي علمود أبنچ ، فكري بي إذا ما أكلتي شراح يصير بي ، راح يموت و تخسرينه

جريت الصينية و أكلت شوية بَس علمود الطفل

- آني رايحة هَسه ، من تحتاجين شي بَس دگي الباب و صيحيني و أجيچ

- بَس آني ما أعرف أسمچ

- أسمي رجاء

أخذت الصينية و طلعت

***

صگر
گاعدين آني و فرات و أحنه مندري شراح يصير بينه و لا گادرين نطلع منا ، ألتفت فرات عليه و حچه ...

- أگُلك والله خوش أكلنه چتل

- بالله بربك هَسه وكت تنكت؟

- شبيك والله ما جاي أنكت ، خوش أنچتلنه ، عوذه هذولة مو أدين عدهم تگول كراكه

- ههههههههه ، الله يصگعك دسكت

- إي لا تخاف إذا ضلينه هينه راح ننصگع ثنيناتنا مابيها مجال

- والله آني هَم أهجس هيچ

- بالله هَسه آني إذا متت ما ورايه أحد ، بَس أنت برگبتك مَره و جهال

- دنچب ، عَجل و خطيبتك و أمك و أبوك ، ذوله شنو

- نسيتهم

- والله شكلها الچتله حيييل مأثرة عليك

- والله ما أدري

***

عشق
گاعددين آني و خالة بالغرفة يم رُسل اللي تتلوه من الوجع ، بقيت أدعي الله يسهلها عليها و تجيب بالسلامة ، حطيت إيدي على صدري و صارت ع الگلادة ، لزمتها و صرت أباوع عليها و أتذكر فرات ، وينه هَسه ، شديسوي ، خاف بي شي ، أوووف يربي رجعلي ياه بالسلامة ، نزلن دموعي و مسحتهن بسرعة لمن دخل خالي عَلي للغرفة ، سلم وحچه ...

- هااا شلونها ، شصار وياكم؟

نجاة : تگول الدكتورة عدها ولادة ، بَس لازم ننتظر شوي

- الله يسهل إن شاء الله

- و أنتو شصار وياكم ، ماكو خبر عن الولد؟

- بلغنه الشرطة و السالفة صارت يم عُثمان و هَسه جاي يدورولهم و إن شاء الله خير

- إن شاء الله يا رب

عشق : خالو أنت راح تبقى هنا؟

- إي خالو مگدر أعوفكم هين وحدكم

- تمام

- تريدين أرجعچ للبيت؟

- لا خالو أريد أبقى ويه رُسل

- خير إن شاء الله

***

ثاني يوم الصبح ...

صگر : هاي شجاي تسوي؟!

- جاي أحاول أفتح الباب ، شو ألگحلي هاي الخشبه اليمك

- يمعود مينفتح عوفه

- هَسه دنطيني يا عيني أنطيني

لگحلي الخشبه و أخذتها ، گمت أضرب باليده مال الباب بلكت تنكسر و ينفتح ، ضربتها و صارت تتحرك رجعت أضرب بيها لحد ما أنكسرت ، جريت الباب و أنفتح ...

- أنفتح

- صدُگ والله؟

- إي والله

گام صگر و جه وياي و طلعنه بره ، چنه بمكان زراعي أول مرة نشوفه و المكان فارغ مابي أحد ...

- والله ذوله مطايه شلون يعوفونه هين وحدنه و يرحون ، ما خافو ننهزم

- هَسه دمشي ، لونهم موجودين چان ما گدرنه نطلع

- وين راح نروح هَسه؟

- للمستشفى ما تشوف حالتنه شلون ، آخخخ يا يابة والله يمكن إيدي مكسورة

- يلا تكبر و تنسى

ألتفت عليه صگر و دحگلي بغضب ، اللي أفتهمته أنُ لازم أسكت و أمشي ، ضلينه نمشي و طلعنه من المكان كُله متوجهين للمستشفى

***

عشق
للصبح و رُسل زاد عليها الوجع بعد أكثر ، شافتها الدكتورة و قررت تسويلها عملية لأن وضعها مو مال ولادة طبيعية ، جهزوها و دخلوها لغرفة العمليات و خالة واگفة و تدعي الله يسهلها و تگوم بالسلامة و خالي بقى ويانه ما عافنه و لا لحظة بَس كُل شوي و يدگ تيلفونه و يطلع يجاوب بره و من يرجع تستلمه خالة بالأسئلة و هو يجاوبها " خير إن شاء الله بَس أصبري " ، تقرب من خالة و حچه ...

- آني طالع بره من تحتاجون شي خابروني

نجاة : تمام

طلع خالي و أحنه ضلينه

***

فرات و صگر وصلو المستشفى و تعالجو بالصدفة عُثمان چان موجود هو و ربعه شافهم و ترك كُلشي و جاهم ...

- صگررر ، ويين چنتوو يااخي گلبنه الدنيا عليكم

- هَسه دگول الحمدلله ع السلامة

- الحمدلله ع السلامة بَس شصار وياكم؟!

حچاله السالفة كُلها من البداية للنهاية ...

- بعدك تندل المكان؟

- والله ما أدري ، تيهته

فرات : آني أندله

- خوش عجل ، هاك تيلفوني أكتبلي العنوان بالكامل

- زين

أخذ فرات التيلفون و كتبله العنوان بالتفصيل و أنطاه ياه ...

صگر : أگف بَس خل أروح للبيت أبدل و أجي وياكم

- لا لا أنت ضل أرتاح متشوف وضعك شلون

طلع عُثمان و أخذ وياه الجنود و خله يمهم ثنين خاف يحتاجون شي ، گعدو حَتى يرتاحون ، حچه فرات ...

- شبيك صگر؟

- إيدي توجعني

- شگالك الدكتور خوما كسرها خطر؟

- لا مو خطر

- آخذك لغير دكتور؟ ، هو آني عليش أسأل دگوم خل آخذك

- لا لا ميحتاج ، هَسه أرجع للبيت و آخذ الدوه و تهود

عَلي رايح راد بالممر مو گادر يگعد ، منا أختفاء ولده ، و منا دره بالسوالف الصايرة ويه أهل البصرة و منا رُسل و وضعها اللي ميدرون شنو تاليته ، و ضل حاير ميدري يصد على ذول ميدري على ذول ، جو جسام و رافد ...

جسام : هااا شوضعها؟

- ما أدري دخلوها للعمليات و الى هَسه ماكو شي

- روح للبيت أرتاح آني و رافد هينه

- ويني و وين الراحة ، كُلها تلايمت عليه من كُل صوب ، ما أدري وين أصد

- ليش شصاير أنوب؟

حچالة الصاير بـ مُهره و شهم و شلون الأوضاع متوترة ويه أهل البصرة ...

- لا إله إلا الله ، منين جاي تجينه هالمصايب

- الحمدلله على كُل حال

تقرب رافد من أبوه و همسله ...

- يابة تحچبله لو أحچيله آني؟

- متشوف شلون حالته ، أرد أزيدها عليه ، لا يروح يصير بي شي

- بَس يابة عمي لازم يدري

رفع راسه جسام و حچه ...

- أبو صگر

- هلا

- جاني عُثمان للبيت ، صاير وياهم شي جديد و جه تا يبلغنه بي

- شصاير؟

- لاگين سيارات الولد ع الطريق و سيارة فرات بيها آثار طلقات ، يعني أكو أحد متعرضلهم

- شللووون ، شهااللحچي هذااا جسااام !!

- بَس على كيفك ، إن شاء الله ماعليهم شي

- شلون ماعليهم شي يخوي شللووون ، هَسه آني شگول لأمهم ، رُسل شگوللها !!!

گعد ع الكرسي و صار يدگ على رجليه ، دگ تيلفونه و جاوب ...

- عُثمان فهمني شنوو السالفة الولد شصايرلهم؟! ، تره گلبي راح يگف

- عمي بَس أهده ، آني خابرتك تا أبشرك و أگُلك لگينه الولد الحمدلله

گام على حيله ...

- صدُگ ، الله يبشرك بالخير ، وينهم هَسه؟

- عفتهم گاعدين بممر الدخول ، لحگ عليهم گبل لا يمشون

- زين زين

سد التيلفون ، حچه جسام ...

- هااا شكوو؟؟

- لاگينهم ، هُمه هَسه هينه بالمستشفى

طلعو حَتى يشوفونهم ، وصلولهم و فرات و صگر توهم گامو تا يمشون و صاحهم علي ، ألتفتو شافو أبوهم و رجعوله ، عَلي حضنهم ثنينهم و هو يتحمد الله ولده رجعوله بخير و سلامة ...

- وينكم ول يابة ، شصار وياكم ، نشفتو دمي بعروگي

فرات : سلامتك يابة ، عدت الحمدلله

- شصايرلكم ، ليش هيچ حالتكم؟!

صگر : سالفة طويلة يابة خلها هَسه

حچه رافد : يا يابة يا بوية ، يولو وجوهكم صايرة خريطة العراق

ألتفتله فرات ...

- لعد شو بالله تعال حددلي أين تقع الأنبار

- أنچب ، الأنبار لا تقع

- آني أگول لو تستقر هوواي أحسن

جسام : يولو أنتو شوكت تبطلون هالتمسلت هاذ

- بعدين عمي بعدين

صگر : ما گلتولي شعدكم بالمستشفى؟

عَلي : مرتك صارت عدها ولادة و جبناها

- صدُگ ، وينها هَسه ، جابت؟!

- لا بعدها ، دخلوها للعمليات

- عمليات؟ ، يعني ولادتها خطره ، يابة عفيه صايرلها شي؟!

- لا يابة والله مابيها شي و إن شاء الله ماعليها شي

- أخذني عليها

***

عشق
جابت رُسل بخير و سلامة و وضعهم هي و الطفل زين الحمدلله ، خلوها نايمة بالغرفة و آني و خالة گاعدين يمها ، أنفتح الباب و دخل صگر ، شهگنه آني و خالة من شفنا ، گامت خالة بوجهه و حضنته و هو حضنها و باس راسها ...

- وين أخوك يمه ، ليش مو وياك ، خاف بي شي؟!

- لا يمه والله مابي شي هذا واگف بره

سلمت على صگر و تحمدتله بالسلامة و عفتهم و طلعت بره الغرفة ، شفت خوالي و رافد واگفين على يمين الباب ، باوعت ع اليسار شفت فرات گاعد ع الكرسي ، بَس چانت حالته حاله ، وجهه مجرح و أديه ، هَم ، صحته ...

- فرات

بسرعة ألتفتلي من شافني گام على حيله و آني نسيت المكان اللي أحنه بي و نسيت خوالي الواگفين و رحت حضنته ، حضنته بكُل قوتي و هو هَم حضني ، حسيت بأيده اللي حاوطت خصري ، و الأيد الثانية يمسح بيها على چتفي ، حسيت بالأمان بهذيچ اللحظة و بچيت ، عرفت أنُ بغيابة غاب عني الأمان و من رجع رجعلي عرفت أنُ هو أماني الوحيد بهالدنيا ، حچه ...

- لتبچبن عشگي ، خلص آني يمچ ، وداعت عيونچ ما أعوفچ بعد

بعدت وجهي عن صدره و باوعت بعيونه ...

- متتصور شلون عشت هاليومين بدونك ، الخوف و القلق أذاني فرات

- أششش لتحچين هيچ ، يلا كافي أمسحي دموعچ ماريد أشوفهن

مسحتهن و رجعت أباوعله ، حچه و هو مبتسم ...

- والله ما چنت عباليچ جريئة هيچ

- ليش؟!

دنگ عليه و همس ...

- نسيتي أنچ حضنتيني گدامهم

- هُمه منو؟

- أبوية و عمي و رافد ، شبيچ

ألتفت لورايه أباوع ، رجعت باوعتله ...

- ماكو أحد

- عافونه و راحو ، هُمه أستحو خطية هههههه

- ميهمني ، آني من أشوفك أنسى الدنيا كُلها

رجع سحبني عليه و حضني و باسني من گصتي ، حسينه على باب الغرفة و هو ينفتح ، بسرعة أبتعدت و وگفت بصفه ، طلعت خالة نجاة و راح سلم عليها

********

يتبع ...

هلوو شلونكم ، تعمدت أسوي البارت قصير لأن الأحداث مقسمتهن قسمين ، قسم بهذا البارت و قسم بالبارت الجاي + دايرتكم بالقفلة لأن للأسف راح أوقف الرواية مؤقتًا يعني شغلة أيام مو أكثر ، لأن هالفترة والله مالي واهس و نفسيتي تعبانة حيل و آني من أكون بهالوضع ما أكتب بالمستوى المطلوب و ألوص الرواية و يمكن لاحظتو شلون صاير سردي ، لذلك أريد أرتاح شوي تا أرجع أقوى إن شاء الله ، يلا أنتظرونا بالبارت الجاي💜

سحر الدليمي