رواية عشگ الفرات ( عِندما تَهوى القُلوب ) الفصل الثامن والثلاثون 38 - بقلم سحر الدليمي

***

فرات
صرنه بصف السيارة و بالجهه الثانية أكو سيارة واگفة و يرمون علينه ، صگر تصدالهم بَس هو ماعنده غير مسدس و ذوله كُله رشاشات ...

- منو هذوله صگر شسالفة؟؟

- سالفة طويلة هاي

كمت و چان يگضبني من إيدي ...

- أگعد بمكانك وين رايح؟؟

- سلاحي بالسيارة خل أجيبه خوما أخليك وحدك

- لا تگوم فرات خطرر علييك

هديت إيدي منه و رحت ، گام وياي و هو يصيح ...

- تعاال جاااي عووف الصخااام ، فررااات

فتحت الباب و هو ورايه ، جيت تا آخذ المسدس ، جوني ثنين من وره و تلاوو وياي واحد منهم شال المسدس و ضربني بالچسع ماله على راسي ، آخر شي شفته ، صگر گدامي و هو لازمينه ثنين و من بعدها غمضت عيوني و ما حسيت على شي

***

سجاد : ليش سيادة الضابط ، شنو تهمته؟

- تجارة المخدرات

- أكيد أكو سوء تفاهم ، أحنه طول عمرنه نشتغل هالشغلة و كُل عُملائنه يدرون بشغلنه نظيف !!

- هذا الحچي آني ما أفهمه ، نتفاهم بالقسم ، أخذو

شهم : جاي وياكم آنـه بَس أنطوني لحظة

تقرب مني شهم ، و همس بأذني ...

- مُهره لا تدري سجاد ، وضعها الصحي مو مال هبطات ، لا تروح ع البيت و لا تگول لأحد ، شوف عمي بكر و تصرفو

جرو من عندي و أخذو للسيارة ، و آني ركبت السيارة و طلعت بوجهي لبيت عمي بكر ، وصلت و دگيت الباب ، طلع عباس ، دخلت جوه للحوش ...

- عباس وين عمي بكر؟

- جوه

- صيحلي ياه بسااع

- إي فوت أگعد هَسه أصيحه

- لا لا مو مال گعده ، صيحه بسرعة خل يجي

راح عباس ، بقيت أنتظر شوي و طلع عمي ...

- سجاد ، خير وليدي شكو؟

- منين يجي الخير يا عمي

- أنا أخوك ، أحچي ولك شكو؟؟

- عمي ، شهم أخذو الشرطة

- شنوووو ، لييش ولك؟!

- آخر شُحنة طلعت مو هو چان المسؤول عليها ، لاگين بيها الشرطة مخدرات ، بسياراتنه نفسهن عمي ، يعني هَسه أحنه بخطر و هو بخطر و الشركة كلها بخطر

- مصيبة هاي ولكم مصيبة

- عمي آنـه جيتك لأنك أنت چبيرنه بغياب أبوي و عمي ، فهمني شنسوي ، و لو ردو أبوي و عمي شنحچيلهم !!!

- خلونه نروح للقسم و نفهم الصار و شيردون الشرطة و على هالأساس نتصرف

رحنه للقسم و حچينه ويه الضابط و گال أنُ بَس ننتظر المُحاكمة مالته و نشوف شينحكم عليه ، يعني إذا أنحكم راح ينحكم ١٠ سنوات أو أكثر ...

- عمي أحنه لازم نحطله مُحامي و هو يتصرف

- إي زين أنت روح حاچي المُحامي و أحنه رايحين نشوف شنو سالفة المخدرات هاي

عباس : أكيد حيدر وراها هو من زمان حاط عينه على شغلنه و كل اللي صار بالفترة الأخيرة من وراه

بكر : والله آنـه هم شاك بي

سجاد : مو شك عمي و علي هو الوراها

- لازم يكون عدنه دليل ضده ، هالدليل ندين بي حيدر و نبرئ بي شهم

***

نجاة واگفة ع الباب و هي حاسة أنُ صاير او راح يصير شي موزين بَس متعرف شنو هو ، وگفت يمها بدور و حست بيها شي ...

- نجاة ، بيچ شي؟

- لا مابيه شي

- بَس وجهچ يگول غير هالحچي !

جرت نفس و ألتفتت على بدور ...

- والله مادري ، أحس گلبي مو مطمن

- ليش؟!

- ما أدري بَس مو مرتاحة

- هاي عبنچ جيتي تعبانة ، روحي لغرفتچ أرتاحي و الله كريم

هزتلها براسها و مشت لغرفتها ، دخلت و گعدت ، جرت كتاب و گامت تقره بي ، شوي و أنفتح الباب و دخل عَلي ...

- الگوة

گامت بوجهه تستقبله ...

- هلا أبو صگر ، الله يساعدك

- و يساعدچ

حچاها و نزع الشماغ و العگال و أنطاهن ياها ، راح تمدد بالفراش ، راحت يمه ...

- تريد تنام؟

- إي والله تعبان

- بيك شي؟!

- لا مابيه

سكتت و هو دحگ عليها ، گعد على حيله ...

- أنتِ شبيچ؟

- مابيه شي

- عليه يـَ نجاة؟

- لا هيچ ماكو شي ، بَس ضايجة شوية ، أله أگلك فرات شو ما أجه وياك؟

- فرات ما چان وياي ، آني و جسام چنه بالمحلات و فرات خُبري بي بالمعرض

- و صگر ، هو اليوم ينزل ، بَس شو ليهسه لا خابر و لا شفناه !

- يجوز صار عنده شي أخره ، أنتِ ما تعرفين شغلة شلون

تنهدت ، رجعت حچت ...

- طَولو

- نجاة لا توهوسين و تخليني أوهوس وياچ ، ماعليهم شي هُمه يجون

- زين ، أنت أرتاح مبين حيل تعبان

هزلها براسه و رجع أنجضع و هي طلعت بره الغرفة ، دگت عَليهم بَس ثنينهم ميجاوبون و هالشي خلاها تقلق أكثر

***

فرات
صحيت لگيت نفسي بمخزن مال خشب ، عيوني مغوشات ما جاي اگدر أركز ، گعدت على حيلي شفت صگر متمدد گبالي و الدم ينزل من راسه ، رحتله خ
حاولت أگعده ...

- صگر ، تسمعني؟! ، أگعد ، صگر؟؟

ما جاي يرد عليه ، شفت ليغاد عني بطل مال مي ، أخذته و رشگت على وجهه مي ، شوي و چان يفتح عيونه ...

- بيك شي صگر؟؟

عدل گعدته و حط إيده على راسه ، حچه و هو يداور عيونه بالمكان ...

- أحنه وين؟!

- والله علمي علمك ، فتحت عيوني لگيت نفسي هينه

- أنتت شجااابك علييهه هااا ، أحد نااخييك و گاالك تجيينيي ، لوو صاايبك شيي آنيي شسوويي بنفسسيي هااا؟؟؟

- هَسه على كيفك عليش تصيح ، لو أنت صايرلك شي آني اللي شسوي بنفسي مو أنت

سكت و هو يدحگ على كُل زاوية بالمكان ، حچيت ...

- ما ناوي تفهنني شسالفة!!

تنهد و رچه ظهر للحايط ، ألتفت عليه و حچه ...

- هذولة جماعة مهدديني

- شنووو ، مهددينك؟! ، و لييش ما فكييت حلگك و گلت ياابة ترهه آني مُهدد ، لييش ما أخذتت حذرك و أحتااطيت صگر لهدرجة حيياتك رخييصة عندك؟! ، هَسسهه لوو جوو و ذبحوك آنيي شگوول لأبووية و أميي؟؟؟

- أنت مو چنك نسيت اللي گدامك أخوك الچبير و گمت تخرط بالحچي؟!

- والله لو اللي گدامي أبوية و أشوفه هيچ مستهين بحياته ما أسكت

- صارت بعد فرات هَسه ميفيد الحچي

- بشنو مهددينك؟

- جماعة من ربعنه طلعو مُهمة لـ بغداد ، و ذولة يريدوني أتعاون وياهم و أنطيهم معلومات كاملة و مُفصلة عن المُهمة

- و الحل؟

- والله مدري

جاي نحچي و أنفتح الباب بقوة ، دخلو ٣ أشخاص ، وگفو و هُمه يدحگون علينه ...

***

عشق
خلصت دوام صارلي أكثر من نص ساعة و فرات ماكو ، دزيتله مسج و ما جاوب ، هو مو من عوايدة يتأخر هيچ ، أنتظرت شوي و بعدين باوعت شفت كُلها دتطلع الكُلية حتفرغ خوما أبقى وحدي ، طلعت تيلفوني و أتصلت بـ رافد ...

- يا هلا بچنتنه

- هلا بيك ، رافد تگدر تجيني؟

- وين أجيچ؟!

- للكُلية

- ليش أنتِ بعدچ بالكُلية؟!

- إي ، فرات لحد هَسه ماكو

- زين آني جايچ ، ضلي جوه لا تطلعين بره

- تمام

نهيت المكالمة و گعدت أنتظره بالكافتريا ، شوي و أنسحب الكُرسي الگدامي و گعد شخص ، رفعت راسي ، حچه ...

- شلونچ عشق

- فؤاد؟؟

- إي فؤاد

- أنت شتسوي هنا؟

- أجيت أشوفچ

- بَس أنت مو مسافر؟

- رجعت و أجرت بيت هنا لأن عندي شغل ، و گلت اليوم أجي أشوفچ بالكُلية لأن رايدچ وحدچ

- و أنت شمعرفك أدرس هنا؟

- أعرف ، شرايچ تگومين وياي نتغده بفد مطعم حلو و منه ندردش شوي

- لا آسفه ، خطيبي هَسه يجي و ميلگاني

- خطيبچ؟!

- إي

- ليش أنتِ مخطوبة؟

- إي

- ألمن؟!

- لـ فرات

تنهد و رجع راسه ليوره و صار يمسح بوجهه ، حسيت تعابير وجهه تغيرت ، أجاني مسج و باوعت لگيت رافد يبلغني أنُ هو وصل ...

- من رخصتك آني رايحة

هزلي براسه و آني گمت عنه ، شرجعه و شجابه هنا؟! ، و شلون يتجرأ و يطلب مني نروح على مطعم سوه ، حَتى لو أبن عمي بَس أحنه بحياتنا مملتقين شهالصلافة !! ، طلعت و لگيت رافد واگف ، صعدت و حرك السيارة ...

- رافد عندك علم فرات وين؟

- إي بالمعرض

- بَس دا أدگ عليه ميجاوب !

- هَسه تلگين عنده شغل ، هو من يشتغل يقفل جهازة

سكتت و كملنه طريقنه ، وصلنه البيت و نزلت ، سلمت و طلعت لغرفتي بدلت و فتحت جهازي شفت المسجات اللي دزيتهن لـ فرات ما فاتحهن أصلاً ماعنده نت نهائيًا ، دگيت عليه ع الخط أنتظرت يجاوب بَس ماكو ، عفت التيلفون و طلعت ، أكيد هَسه عنده شغل و قافل جهازة مثل مگال رافد ، رحت لـ رُسل دگيت الباب و دخلت لگيتها دتحضر بملابس الطفل ...

- هاي شو دتحضريهن ، شنو حتجيبين هَسه؟

أبتسمت و حچت ...

- لا بَس گلت أحضرهن من هَسه أحسن ، تعرفين آني هَسه بشهر التاسع يعني ما أعرف على أي ساعة أجيب

- الله يگومچ بالسلامة عُمري

- الله يسلمچ حياتي يوم الألچ

- هههههه ، إن شاء الله ، صگر ينزل اليوم مو؟

- إي بَس شو ليهسه ماكو ، حَتى أدگ عليه ميجاوب

- شنو السالفة !!

- والله ما أدري

أنفتح الباب و طبت لارين ، أجت يمي تجرجر بإيدي ...

- دومي تعدي

ضحكت على تصرفاتها ...

- شنو؟ ، وين أتعده !

رُسل : قصدها گومي تغدي

- هاااا ههههههه ، يلا لعد أمشي

طلعنه و هي گايدتني و رُسل تمشي ورانه ، گعدنه ع السفرة و ريان عيونها عليه بَس آني ما أنطيتها أهتمام و لا كأنو موجودة أصلاً ، أباوع لـ لارين تباوع لمكان خالو علي ، گامت و منعرف وين راحت ، شوي و أجت گايده خالو من إيده و خلته يگعد بمكانه و گعدت بحضنه ، الكُل ضحك على تصرفها ، حچه خالي جسام ...

- يعني ما تجي أتغده أله لارين تجيبك

عَلي : والله جابتني أريد ماريد ، غصبًا عني

- ما تلام بيك

- ههههههههه

نجاة : رافد وليدي متعرف ولد عمك وين؟

- والله عمه ، فرات بالمعرض ، و صگر يجوز صار عنده شي و ما گدر يجي

- بَس چان خابرو و گالو أحنه منگدر نجي

- هَسه أتغده و أروح أشوفهم

هزت براسها و گامت ...

- الحمدلله ، دايمة إن شاء الله

عَلي : ما أكلتي شي؟!

- مالي نفس

حچتها و راحت ، خالي علي ذب الخاشوگة من إيده و گام وراها

***

نجاة گاعدة بالغرفة ، دخل عَلي و هو مستغرب من حالتها هاي ...

- نجاة ، للمرة الثانية أسألچ شبيچ؟ ، ليش ما أكلتي؟!

- شلون تريدني أتهنى بالأكل و ولدي مدري عنهم شي !!

- دگولي يا الله يمعودة ، شوي أنوب لو العصر تلگينهم يمچ ، لا تكبرين السالفة

- گلبي مو مرتاح عَلي ، آني أم و گلب الأم يحس

تنهد و هو يدحگ عليها ، صار يمسح بوجهه و گعد مقابيلها ع القنفة ، حچت ...

- شوفهم وين فدوة عَلي ريح گلبي

- هَسه أدز رافد يشوفهم ، و أنتِ گومي أُكليلچ لگمة

- ماريد ، كُلشي ماريد إذا ما أشوفهم گدامي ما أرتاح

- لخاطري گومي ، إذا ما أكلتي تتمرضين و آني ينهد حيلي ، ترضينها؟

سكتت ما حچت شي ، رجع گال ...

- هاااا ، مالي خاطر عندچ يعني؟

- خاطرك چبير يـَ أبو صگر

- خوش عَجل يلا گومي

طلع عَلي و ناده رافد ، جاه رافد ...

عَلي : وليدي رافد هَسه تروح تشوفلي أخوتك وين ، گلبي ما مطمن لتأخيرهم هذا

- صار عَمي

طلع رافد و راح للقسم سأل عن صگر بَس ما لگاه و طلع للمعرض دور فرات و هَم ما لگاه ، وره ساعة رجع للبيت ...

- ماكو محد يدريهم وين ، صگر طالع من القسم من الصبح و فرات ما واصل المعرض نهائيًا

نجاة : شففت مو گتللك أكوو شيي ، گلبي ، گلبي يحس والله

- بَس على كيفچ خل أستوعب

- ولدي علي ، دورهم فدوة أروحلك ، والله مابيه حيل هبطات

- إن شاء الله ، والله أدورهم بَس على كيفچ أنتِ

ضلو حايرين شيسون و وين يدورونهم هَسه

بمكان ما ، صگر و رافد گاعدين و أنفتح الباب و دخل عليهم جمال و وياه ثنين من ربعه ، جمال هذا واحد زايعته الدنيا ، أرهاب أرهابي ، قتل قاتل ، سرقة حرامي ، مخدرات تاجر و على مستوى العراق هَم و الشرطة تلاحگه بكُل مكان بَس هو مرتب أموره ، عنده ببغداد جماعة تابعين له ، و همه اللي رايدين يداهمونهم ربع صگر ، جمال حاول ويه صگر و هدد بَس حتى ينطي معلومات عن هاي العملية بَس ما فاد و ما حصل شي من صگر ، لحد ما قرر يخطفة و يضغط عليه ، تقرب من صگر و حچه ...

- إييي اليوم سيادة الضابط بضيافتنه

صگر : شرايد

- أنت تعرف كلش زين آني شرايد

- و أنت تدري أنك ما راح تحصل مني شي ، بعد عليش متعب نفسك و خاطفنه

- لا لا ما دامك يمي تحچي لتخاف

- أحلامك وردية حيييل

- ههههههههههههههه ، لا وداعتك ، أحلامي حمرة و سودة
و إذا ما حچيت كُلشي تعرفه راح أخليلك ياها حقيقة

- گتلك ما راح تحصل شي

- إي زين ، شوفو شغلكم يولد

دخلو ثنين راحو لـ فرات لزمو و ثنين تولو صگر ، يضربون بي بكُل ما عدهم من قوة صاح فرات و هو يحاول يتخلص منهم ...

- عوووفووو يولوووو ، حيوووان أنت لووو زلممة موو هاااد علييينههه چلابك ، جباااان

ألتفت عليه جمال و هو يضحك ...

- لحظة ، أنت أخوه مو؟

- أخوه اللي راح ياخذ روحك

- عود بعدين تاخذ روحي ، هَسه أحچيلي أكيد أنت هَم تعرف

حچه صگر بتعب و بالگوة الكلام يطلع منه ...

- عوفه ، ماله علاقة هو ، ميعرف شي

ألتفت عليه جمال و ويه ما ألتفت دفره فرات ببطنه وگعه بالگاع خلاه يزوع دم ، فلت نفسه من الزلم اللي لازمينه ، طاح على جمال و صار يضرب بي ، جرو من فوگاه و طيحو عليه ضرب ، و وين صوابك اليوجعك

***

مُهره
صارت الساعة بالـ ٣ و شهم لسه ما راجع و هو من الصبح طالع ، هواي دگينه عليه آني و عمتي بَس ميجاوب ، عمه گامت تلوب و آني الخوف سيطر عليه ...

- عمه شنسوي هَسه؟

- خابرت على عمچ هو جاي بالطريق ، بلكي هَسه يجي و يتصرف

***

بكر : هاا سجاد شسويت؟

- حچيت ويه المحامي ، گال راح أطلب تأجيل المحكمة علما نشوف أمورنه و نحاول نثبت برائته

- إي زين ، رحت شفت كامرات المراقبة بالمكان الچانو بي ، بَس التسجيلات ما جاي تشتغل ، بلكي نشوفلنه أحد يفهم بهالسوالف يجي يشوفهن

- عباس ، أنت ما تعرف أحد؟

- صديقي يعرف بهالأمور هَسه أخابره و أگله

خابر عباس على صديقة و أتفق وياه ، راحوله للبيت أخذو وياهم و توجهو للمكان اللي يصير بي تحميل البضائع ، گعد أحمد صديق عباس و صار يحاول يفتحهن ...

بكر : هاا أبني بشر

- عمي التسجيلات مقفولة و محميه بنظام أمان قوي

- يعني؟

- يعني يرادلها شغل هواي و لو ينفتحن لو ما ينفتحن

- زين أبني على راحتك بَس حاول تفتحهن لأن برائة الولد متوقفة على هالتسجيلات

- إن شاء الله خير عمي

***

مُهره
گاعدين آني و عمه بالحديقة ، أنفتح الباب و دخل عمي سلم و حچه ...

- شكو شبيچن؟

فاطمة : شهم طلع من الصبح و لحد هَسه ما رجع

- وين راح؟

- ما أدري طلع مستعجل ما حچه شي

راد يحچي و دگ تيلفونه ، جاوبه ، ثواني و عَمي تعابير وجهه تغيرت و عگد حواجبه ، سد التيلفون و طلع يمشي سريع ، عمه صاحت وراه و رادت تفهم شبي بَس هو ما رد ، دخلنه جوه للصالة گعدنه ، وره تقريب الربع ساعة أندگ باب الصالة ، توقعنه عمي رجع ، راحت عمه فتحت الباب و ويه ما فتحته دخلو زلم ثنين ملثمين بَس عيونهم تبين واحد لزم عمتي و حط إيده على حلگها حتى متصيح و الثاني أجه عليه حط إيده على حلگي و سحبني وياه ...

********

يتبع ...

أدري تأخرت حيييل هالمره لأن ماعندي مجال والله و أدري البارت قصير لأن اليوم يلا گدرت أكتب و كتبته هيچ ع السريع و بالگوة ، بَس ميخالف أحسن من الماكو و حَتى نمشي بالأحداث ، أحچولي شلونها القفلة؟ ، و أكتبولي توقعاتكم للبارت الجاي شنو اللي راح يصير؟ ، لا تنسولنه التفاعل الحلو

تعالو أنستا
18.kij

سحر الدليمي