رواية عشگ الفرات ( عِندما تَهوى القُلوب ) الفصل الثالث والسبعون 73 - بقلم سحر الدليمي

لا تنسون التصويت و التعليق بين الفقرات
قراءة مُمتعة 💜

***

- أنا على الوعد يا زين وياك
أجيك لو دروبي طويلة و ألاگيك

***

رافد
طلعت من غرفتي و توجهت لغرفة أبويه ، أعرف غلطت بحقه اليوم و حتى بحق نَفس حَبيبتي بَس والله مو بإيدي فقدت أعصابي من سمعت هالسالفة ، مديت إيدي و فتحت الباب ، وگفت و أبويه چان گاعد ع الچرباية و حاط راسه بين إيديه ، رفع راسه و دحگلي ، گام و جه عليه ملهوف ، حضني و حچه ...

- ويين چنت ياابه ويين ، هيچ تروح و تخلي گلب أبوك مثل النار عليك؟

وخر عني و خله إيديه على وجهي ...

- وليدي آني ماعندي غيرك ، أنت وحيدي ، و من غبيت عليك لمصلحتك يعني شگُلك فهمني ، والله السالفة ما أتسولف

- أحچيلي يابه ، أحچيلي السالفة و طفي نار گلبي

سكت و ظل يدحگ عليه بعدين گعد ع الچربايه ، رحت گعدت يم رجليه ...

- گُلي يابه آني لازم أعرف هاي أمي

سكت ما جاوبني ، آني هَم سكتت و ظليت أدحگ عليه أنتظره يحچي ، طال سكوتنه و آني أيست يحچي ، گمت وگفت تا أريد أروح چان يگول و هو مدنگ راسه ...

- چتلها خالك

رجعت گعدت و دحگت عليه و آني مصدوم ...

- شنوووو ؟! ، خااالي !!!

- ياابه أنت تتشاقه وياي لو شنو فهمني شلون خالي يكتل أمي؟

- وره ما تزوجنه آني و أمك ، أكو جماعة ما يخافون من الله أتهموها تهمة شينة و خالك الوسطاني عماد راد يذبحها بَس الله لطف و كشف الحقيقة بَس خالك ما صدگ و ظل يتحلف يذبحها ، أخذوه أخوته و راحوا لغير مدينة تا ما يگرب على أمك

- و شنو هاي التهمة؟

سكت ما جاوبني ...

- أحچيلي يابه بشنو أتهموها؟

- أتهموها أنها غلطت ويه واحد و حبلت بيك

- لحظة آني ما جاي أستوعب ، يعنيي آنييي مو أبننككك؟؟

- راافد أهده و خليني أكملك السالفة إذا تريد تعرفها كُلها

- تمام تمام آني هادي كمل

- أنت أبني يول آني أبوك و گتلك التهمة مرتبيلها و تبلوا على أمك بيها بَس أنكشف كُلشي بعدين

- و خالي ليش ما صدگ؟

- يلگه تنحيش من مرته أللي هي من زمان تكره أمك

- يابه اللي حچيتلي ياه صحيح ، يعني أمي ما مسويه شي غلط؟! ، الله عليك أحچيلي الصحيح

- يول والله و مُحمد أمك ما غلطت ، أمك شريفة ، لو أدري بيها غلطت و جابتك سكتت عليها؟ ، چان آني ذبحتها بإيدي و ما ربيتك

- و هذا عماد وينه هَسه؟

- چتلته

- شلون؟ ، أحچيلي كُلشي شلون ماتت أمي و شلون چتلت عماد

تنهد و جر حسره بقهر ، دحگ عليه و گال ...

- بيوم ودعت أمك و طلعت للشغل ، أنت ما صارلك چثير من جاي عمرك ٣ أسابيع تقريبًا ، طلعت من البيت و رحت للشغل و هناك ما صارلي ساعة من واصل دگ التيلفون ، رديت ...

- ألوو

- جسام آنيي جعفر ، ألححگ عماااد بساااع طاالع يرييد يكتل غيداااء ألحگها ليخووي

بدون ما أجاوب ذبيت التيلفون و طلعت أركض ، ركبت السيارة و توجهت للبيت ، طول الطريق أدعي ألحگهم ، محد بالبيت غيرها و غير أبني ، عَلي و عائلته بالبصرة ، وصلت هناك و نزلت بَس أريد أصل البيت حتى خليت باب السيارة مفتوح ، فتت و وگفت تجمدت بمكاني من اللي شفته ، غيداء واگعه بالگاع غرگانه بدمها و عماد واگف فوگ راسها و موجه سلاحة على رافد ، هبابني طلعت سلاحي و سحبته و صحت بحرگة گلب ...

- عماااااااد محد چتااالك غيرييي

ألتفت عليه و چان أضربه بصدره ، وگع و آني ذبيت السلاح و رحت لـ غيداء ضاربها طلقتين وحدة ببطنها و الثانية بخاصرتها ، چتلها و هي مظلومة و هيچ بدم بارد ما رفله جفن ، حرمني منها طول العمر و يتمك

- لو ما ألحگ عليك بآخر لحظة چان هَم چتلك و خله بگلبي بدال الحسره حسرتين

چان يحچي و دموعة تهمل ، أول مره بحياتي أشوف أبويه يبچي ، صَحيح دائمًا أشوفه حزين بَس هالمره يبچي ، بچيت وياه و بست إيده ...

- آني آسف يابه ، صيحت عليك و ضغطت عليك چثير و ما چنت أدري الحمل اللي شايله على ظهرك ، ما چنت أدري اللي مريت بي و اللي شفته

- لا تعتذر أبني ، أنت حقك تعرف اللي صار ، هَسه المهم أنت يمي ، صَحيح أمك راحت بَس عافتلي قطعة منها تذكرني بيها طول العمر

نَفس
دخل رافد و سد الباب وراه ، بَس چان حاله ميسُر أبد ، وجهه أحمر و عيونه حُمر كلش و مقهور هواي ، راح تمدد ع الچرباية رحت گعدت يمه ...

- هاا حچيتوا؟

- إي

- شگالك؟

- ياريت ما گالي شي ، ياريت ما سمعت

- أحچيلي يا عيوني شنو السالفة ، يمكن أگدر أخفف عنك شوية

- مابيه حيل أحچي ، بَس أريد أنام

جر الغطه و تغطه ، آني ما ضغطت عليه و عفته و رحت تمددت بصفه و هو داير وجهه للجهه الثانية ، غمضت عيوني و شوي سحبني من خصري و قربني عليه ، حضني و ما حچه و لا كلمة

الصبح گعدت باوعت للشباك چان رافد واگف يمه و يباوع و هو مچتف إيديه و مُلهم گاعد و يلاعب بإيديه و يناغي ويه روحه ، گمت صبحت عليه ، ردلي بَس حاله هو هو و لا چنه رافد اليحچي و يضحك دائمًا ، چنت أحسه ميهتم لـ كُلشي ، ما توقعت هالسالفة تأثر عليه كلش و بهالطريقة ، نزلنه حتى نتريگ بَس رافد ما قبل يتريگ و هو من البارحة الظهر ما ماكل شي ، بالگوة خلاه عمو عَلي ياكل شوي ، آني ألتهيت بشغل المطبخ و هالأمور و عفت رافد بَس من كملت رحت گُبل صعدت فوگ لگيته گاعد يم مُلهم و يحچي وياه ، رحت گعدت يمه و هو صار يحچيلي سالفة أمه كُلها ، يحچيلي و آني خانگتني العبره على شوي أبچي بَس تحملت و قويت روحي على موده و صرت أهدي بي و أخفف عنه و لو شوي ، و من يومها و رافد تغير صار إنسان ثاني منشوفه يبتسم أله من يلاعب مُلهم و حتى ميتقرب منه كلش مثل قبل ، بقى على هالحالة ما يُقارب الشهرين بعدين الحمدلله گدر يتجاوزها و يرجع لـ طبيعته بَس بعده يصفن ويه روحه ما أعرف بشنو يفكر

***

مُهره
اليوم شهم يريد يطلع لـ بغداد عنده شغل ، گعدت وياه حتى أودعه ، نزلنه للمطبخ هو گعد و يمه ملفات و ما أعرف شنو جاي يراجع بيهن ، آني بلشت أسويله ريوگ بَس حسيت بوجع ببطني و بظهري ، خليت إيدي على ظهري و عفت اللي بإيدي ، شهم أنتبهلي و گال ...

- هااا بويه شبيچ؟

- لا ماكو شي

- متأكدة؟

- إي

رجع هو لـ ملفاته و آني رجعت أسوي ريوگ ، كملت و خليته گدامه ، طلب مني أتريگ وياه بَس آني ما أشتهي ، كمل هو و ودعته و طلع ، رجعت للغرفة و گعدت ، للظهر و آني الوجع زاد عليه كلش لدرجة گمت ألوب ، عمتي شكت أنه طلوگ و أخذتني هي و عمي للمستشفى و هناك فحصتني الدكتورة و گالت عندي ولادة ، آني منا الوجع و منا أنقهرت كلش لأن شهم مو موجود ، وره يمكن ساعة مدري ساعتين أجوا و دخلوني لصالة الولادة و آني بالي كله يم شهم

شهم
گاعد أنتظر الجماعة اللي راح ألتقي بيهم علمود نتفاهم أكثر ع الشغل اللي بيناتنه بَس شو ذوله شكلهم تأخروا ، دگ تيلفوني و چان أبوي ، جاوبته ...

- هلا بويه

- هلا وليدي ، حاچيت الجماعة و خلصت أمورك وياهم؟

- لا والله يابه بعدهم لحد هَسه ما أجوا

- چا بويه هد كِلشي و رد للبصرة بساع

- ليش بويه؟!

- مرتك صارت عدها ولادة و أحنه هَسه بالمستشفى وياها ، أخاف أنك تبات و ما يصير بويه أكو إجراءآت لازم تتوالها أنت

- زين زين بويه جايكم آنـه مسافة الطريق

سديت التيلفون و ركضت للسيارة و آنـه بالي كله يم مُهره حتى نسيت أخابر الجماعة و أعتذر منهم ، خابرتهم و گلتلهم ما راح أجي ، سقت بسرعة حتى ألحگ أوصل ، و بعد طول الطريق وصلت البصرة العصر و رحت بوجهي للمستشفى ، شفت أبوي و أمي و عمي حسين و وياه عمتي سليمة ، سلمت عليهم و سألتهم گالوا طلعوها قبل ساعة و هَسه هي بالغرفة ، عفتهم و فتت ، لگيتها بَعدها نايمة و تون ، بستها من راسها و گعدت يمها و هي تهذي بأسمي ، وره نص ساعة تقريبًا صحت بَس بَعدها مو حيل صاحية و شوي شوي صحصحت و باوعتلي ...

- شهم

- هااا يـَ غاليتي هااا يـَ بَعد روح شهم

غمضت عيونها بألم و رجعت فتحتهن ...

- ليش ما أجيت

- والله ما أدري و من سمعت عفت كلشي و أجيتچ و هاي وصلتي ما صارلي نص ساعة ، شلونچ هَسه؟

- الحمدلله ، أبني وين ، أنت شفته؟

- لا ما شفته بَعده يم الدكاترة

ظليت يمها و شوي و أنفتح الباب ، دخلوا أهلنه و عمتي سليمة شايله الطفل بإيدها ، گمت و أجت يمي ...

- هاك يمه أبنك ، سمي بالله

سميت بالله و أخذته بحضني ، باوعت عليه و إبتسمت لا إرادي من شفته ، مو مصدگ الله عوضني بهالطفل عن أكبر ، حضنته لـ صدري و بسته ، خليته بصف مُهره و هي حضنته بإيدها و صارت تحچي وياه ...

- يـَ عُمري أنت يـَ روحي

- حَبيبي ماما ...

- لحظة شهم شنو حنسمي؟

رفعت راسي أفكر ما ببالي أسم ، باوعت لأبوي ...

- يابه ساعدني ما جاي يجي ببالي أسم

أبتسم و گال : والله بويه حتى آنـه ما ببالي أسماء

باوعت لـ عمي حسين : عمي و أنت؟

- شو جيبلي ياه خل أشوفه

أخذته و رحت نطيته ياه ، باسه و رفع راسه عليه ...

- نسمي ريسان ، شرايكُم؟

- إي والله حلو

مُهره : كلش حلو بابا

راح لـ يمها و خلاه بصفها و باسها من راسها و گال ...

- يتربى بعزكم و الله يجعله من الصالحين إن شاء الله

بقوا أهلنه شوي و بعدين راحوا و بقيت بَس آنـه و مُهرتي و أبننا ، ظلينه اليوم و ثاني يوم العصر طلعنه ، صعدنه السيارة ، مُهره بصفي و أبني بحضني ، اسوق و كل شوي أباوعلهم لحد ما وصلنه ، شلت ريسان و رحت گدت مُهره و فتنه للبيت ، تلگتنه أمي و طشت جگليت ، أخذت الطفل مني و آنـه صعدت مُهره للغرفة ، ساعدتها تتمدد و غطيته و نزلت أجيب الغراض من السيارة ، توني شلتهن و دگ تيلفوني ، رجعت رميتهن و شفت التيلفون طلع فرات ...

- هلا فراتي

- حي الله أبو الأكبر

- تحيا و تدوم حَبيبي

- مبارك ما جاك

- الله يبارك بيك يوم الألك

- إن شاء الله ماظل شي ، شلون الطفل و مُهره إن شاء الله حالتهم زينة؟

- لا الحمدلله وضعهم تمام ، أنتوا شلونكم

- على الله ، شسميتوا الوليد؟

- سماه عمي حسين ، ريسان

- هااا عجل منا و رايح نگُلك أبو ريسان؟

- لا فرات ، يظل أكبر أبني الچبير و هو صَحيح مختفي بَس متأكد ما مات يعني يظل أسمي أبو الأكبر

- إي والله صَحيح حقك ، تدلل أبو الأكبر

ظلينه نحچي شوي و بعدين نهينه المكالمة و شلت الغراض و فتت ، رحت للغرفة و خليتهن بالگاع ، حچت مُهره ...

- وين چنت شو تأخرت؟

- خابر عليه فرات چنت أحچي وياه

- عشق شلونها و شوكت تولد؟

- ما أدري والله ما سألته عليها

رحت گعدت يمها : أنتِ شلونچ؟

- زينة الحمدلله

مُهره
مرت الأيام و آنـه تحسنت و رجعت لحياتي الطبيعية بَس هالمره ريسان ترس علينه حياتنه و متعلقين بي لدرجة كلش چبيره ، هالطفل هذا عوضنه عن كُل دمعة نزلت من عيونه و كل حزن حسينه بي بفراگ أكبر ، يعني صح أحنه ما نسيناه و مستحيل ننساه بَس وجود ريسان بيناتنا خفف عنه فراگ أكبر ، شهم يبقى لازمه ميفارگه بَس من يروح للشغل و حتى صار يرجع من من وقت بَس علمودة ، أما عمي و عمتي سووله غرفة و جهزوله ياها من كُلشي و فرحانين بي كلش

***

عشق
فرات طلع للمعرض من ساعة تسعة الصبح و هَسه حتصير الساعة بالـ 11 بالليل و هو ماكو و كُل ما أخابره يگُلي بالشغل و عندي ضغط و من هالسوالف بَس آني ما مصدگه أحس ديچذب عليه ، بقيت أمشي بالغرفة و أحسب بالأرقام علمود يخف التوتر ، شوي و فات فرات ، سلم و ذب السويچ ع الميز ، رحتله ...

- وين چنت عيوني؟

- مو گتلچ بالشغل وين يعني

- و تبقى بالشغل النهار كُله

- إي چان عندي هواي شغل ما گدرت أعوفه

- فرات كلهم أجوا من وقت تريد تقنعني بَس أنت عندك شغل

- أهووو عشگ يعني قابل أچذب عليچ

- أكيد چنت ويه وحدة ثانية مو ، متزوج عليه مو فرات

سكت و صفن عليه شوي و طگها ضحكه ...

- هَسه لييش تضحكك

- ههههههههههههه ، ول يابه أنتِ منين طلعتيلي بهالسالفة

- أحچيلي ويين چنتت

- تعبان والله أريد أنام ، بيها مجال تأجلين تحقيقچ بعدين

- طلگني فرات

- يلا أنتِ طـ ...

بسرعة خليت إيدي على حلگه و ما خليته يكمل ...

- تريد تطلگني موو فراات ، يعنيي متحبنيي

- الله الأحد ، يـَ بنت الحلال مو أنتِ گلتي طلگني؟

- ما توقعتك تسويها

- ههههههههههه ، يابه شنو مهبول أسويها ، چنت أتشاقة وياچ تعاي

جرني عليه و حضني ، حچه و هو يمسد على ظهري ...

- والله چنت بالشغل و إذا تريدين أسألي رافد طلع گبلي بنص ساعة ، آني ماعندي غيرچ و مستحيل أدحگ لوحدة غيرچ

حضنته و گلت : آني آسفه

- لا تعتذرين ما صار شي ، هساع ننام لو شلون والله تعبان

- إي ننام

راح هو فات للحمام غسل و طلع بدل ملابسه و أجه تمدد بصفي ، مشت الأيام و آني يزيد شكي بـ فرات أكثر و أظل أسأله على كُلشي و هو يگعد يبرللي كُلشي بَس مرات يعصب و نتعارك آني وياه و يطلع و يعوفني بَس بعدين يجي يراضيني حتى. لو آني الغلطانة هو يجي و يراضيني ، آني مجاي أشوف منه تصرف غلط و لا تقصير بحقي بَس ما أعرف شبيه و ليش داتصرف وياه هيچ ، كُل البيت صار يدري بالمشاحنات اللي بيني و بينه بَس محد تدخل بَس ماما أجت يمي و گالت ...

- ليش هيچ تسوون ماما ، ميصير لازم تتفاهمون و تحلون الخلافات اللي تصير بينكم بهداوة

- ماما آني ممسويتله شي مجرد جاي أسألة وين يروح و وين يجي و ليش يتأخر

- يا بنتي كُلشي يزود عن حده ينگلب ضده ، تمام آني وياچ أسألي بَس مو بكثرة ، آني جاي أشوف أسألتچ هواي و جاي تضوجه ، يا بنتي الزلمة أكثر شي يضوج منه هو الأسئلة و الملحة ، ديري بالچ على فرات تراهو معدل و يحبچ ، و لا تنسين شسوه علمودچ و شلون حصلچ

- تمام

حاولت آخذ بنصيحة أمي و أطبقها بَس بيوم چانوا گاعدين خالي و خالتي و وياهم فرات بالهول ديسولفون ، چنت ماره بالصدفة من الباب و سمعت خالة تگول " عروس لفرات " و فرات يگول " إي والله مشتاگلها " هذا اللي سمعته من حديثهم ، آني سمعت هيچ لو تخبلت صعدت لـ غرفتي و أحس الحرارة صعدت عندي من العصبية گمت أهفي على وجهي بإيديه ، يعني يريد يتزوج عليه ، أحبچ و من هالسوالف و تالي يتزوج عليه ، مستحيييل والله ما أخليي أمووت و متتقربله وحدة غيري ، شلت تيلفوني و دزيتله رسالة " تعال للغرفة أريدك " ، شوي و شافها و وره دقايق أجه للغرفة ...

- هااا حَبيبي شتريدين

- تريد تتزوج عليه مو فرات؟؟

زفر هوى بنفاذ صبر ، باوعلي و حچه ...

- مو چنه الحمل مأثر عليچ هوواي حَبيبتي

- لاا ما مأثرر علييه ، آني سممعت خااله توه تگول عروس لفرات و أنت تگول مشتاگلها

- ههههههههههههه ، لا يابه والله أنتِ متوهمة

- لااا ممتوهمة أصلاً أنتوا أهل الأنباار موو راااحة و عدكم سوابق بهالأمور ، و أنت كونك أنباري أكيد حتتزوج عليه متگدرون إذا متسوونها

- الله أكبر شهالسمعة الطايح حظها اللي مطلعينها علينه

- أنت ليش دتحاچيني ببرود و آني النار شابه بگلبي

تقرب مني و گال : أنتِ گلتي أهل الأنبار يتزوجون أكثر من وحدة و من هالخرابيط مو؟

- إيي

لزم إيدي و گال : أولاً مو بَس أهل الأنبار يثنون ، الله سبحان و تعالى حلل هالشي و الكُل يطبقه و يثني مو بَس أحنه

باس إيدي و گال : ثانيًا أحنه إذا عشگنه نعشگ من صدُگ و ناخذ عشگنه من حلگ السبع ، و النعشگها مستحيل نبدلها بوحدة ثانية و الدليل شوفي أبويه عشرة عمر هو و أمي و ما تزوج عليها و شوفي عمي جسام مرته شگد صارلها من توفت و لحد هَسه ما تزوج و عايش على ذكراها و هذا دليل أنه يحبها ، فـ يا روح فرات هاي نظرتچ غلط و ميصير تمشين بيها و تذكري دائمًا اليحب ما يبدل محبوبه أبد

- أحمم ، لعد شنو هاي عروس لفرات؟

- چنه نحچي عن حديثة ، حديثة أسمها عروس الفرات أبويه گال يرادلنه روحه لحديثة و آني گلت إي والله مشتاگلها و هاي كُل السالفة يا عيني

- و ليش سموها عروس الفرات؟

- لأن نهر الفرات يقسمها نصين ، وين ما تگفين بحديثة تگدرن تشوفين نهر الفرات ، يمر بالسوگ بالأحياء من تگفين ع السطح تشوفينه بالبساتين يمر

- كلش تشوقت أشوفها

- من تجيبين و تگومين بخير و سلامة آخذچ و نروح نشوفها

- و ويانه الجهال

- إن شاء الله

ثاني يوم أخذني و رحنه للدكتورة حتى أشوف وضعي و وضع الأطفال و تحددلي موعد العملية ، شافتني و گالت الأطفال وضعهم زين بَس آني چان عدها تخوف من وضعي فـ نطتني علاج أستخدمه منا لوقت العملية و وصتني أدير بالي على نفسي ، العملية تحددت بعد عشر أيام و الحظ أنُ فرات طلع عنده روحة لأربيل بنفس اليوم اللي أسوي بي العملية ، ضجت كلش و صرت ما أحچي وياه و هو طول هالفترة يحاول يلگه بديل يروح هو بمكانه بَس ماكو ميصير أله هو يروح ، خلصت العشر أيام و باچر عمليتي و فرات يروح ، متمدده ع الچرباية ، أجه فرات و گعد بصفي ، خله إيده على وجهي و گال ...

- سامحيني ما راح أگدر أكون وياچ

عدلت گعدتي و هو لزم إيدي و ساعدني ، أخذت إيده و بستها ...

- مسامحتك حَبيبي و آني آسفه لأن ما تفهمتك ، تروح و ترجعلنه بالسلامة آني و الجهال

- إن شاء الله أرجع و ألگاكم بخير

- إن شاء الله

تمدد بصفي و حضني و نمنه واحد بحضن اللاخ ، گعدنه الصبح و فرات حضر غراضه هو ، ردت آني أحضرله ياهن بَس ما قبل يگُلي أنتِ حيري بنفسچ هَسه ، كمل غراضة و آني هَم كملت و أجت لحظة الوداع ، أجه حضني و باسني من راسي و آني بسته من خده ، و هو حاضني گال ...

- ديري بالچ على نفسچ يـَ عگال راسي

- و أنت هَم ، آني و الجهال نريد ترجع بالسلامة و تكون ألهم أحلى أب

أبتسم و دنگ باسني من شفايفي و راح شال الجنطة و طلع ، وره شوي أحنه هَم طلعنه للمستشفى ، وياي ماما و خالة نجاة و صگر هو اللي يوصلنه و يبقى ويانه خاف نحتاج شي ، وصلنه للمستشفى و خلوني بغرفة و و وره ساعة أجن الممرضات جهزني للعملية و دخلوني

بقوا أم عشق و نجاة ينتظرن و يدعن تطلع عشق بالسلامة و صگر يروح و يرجع عليهن و فرات كُل شوي يتصل ، لحد ما مشى الوقت و ولدت عشق و جابت التوم ، طلعوها خلوها بغرفة و التوم أخذوهم يعتنون بيهم ، جت الدكتورة حتى تشرحلهم الوضع ...

- شوفوا التوم وضعهم ممتاز و الحمدلله بَس يرادلهم شوي عناية

نجاة : ألف الحمدلله ، زين و أمهم دكتورة

- الأم للاسف وضعها مو حيل زين

بدور : شلون يعني دكتورة؟

- يعني إحتمال يصير عدها نزيف ، أحنه ما متأكدين بَس وارد هالإحتمال و إذا صار نزيف فـ هالشي كارثة و راح يعرض حياتها للخطر ، آني گلتلكم حتى تكونون بالصورة مو حتى أخوفكم هو لحد هَسه ماكو شي

بدور گعدت ع الكرسي و خوفها زاد على عشق ...

نجاة : تمام دكتورة مشكورة

- العفو

بدور : شلون هَسه نگول لـ فرات

صگر : لا عمه منگُله و نخوفه ع الفاضي ، الدكتورة گالت مجرد إحتمال و إن شاء الله ميصير شي

- إن شاء الله

- آني هساع أخابره و أطمنه

لليل و عشق ميقبلون أحد يدخل يشوفها و وضعها لحد هَسه مو معروف و الكُل خايف عليها و فرات ميدري بهالوضع من يخابر يگُلوله عشق و الأطفال زينين ، لثاني يوم الصبح جتهم الدكتورة ...

- يا جماعة اللي توقعنا صار للأسف

بدور : شصار دكتورة؟؟!

- صار عدها نزيف و لازم بأسرع وقت نسويلها عملية إستئصال رحم ، زوجها وين لازم ناخذ موافقته

بدور گعدت بعد متگدر تحچي ، جاوبتها نجاة ...

- دكتورة زوجها مو هنا مسافر

- لازم يحضر بأسرع وقت علمود يوقع لدخولها للعملية

صگر : دكتورة زين ميصير أحد ثاني غيره؟

- لا ضروري هو ، خلوا يجي بسرعة و دبرولي دم هَم

صگر : يوم أنتِ خابري على فرات و گُليله الصار و آني راح أروح أدبر دم

راح صگر و نجاة خابرت على فرات و گالتله و هنا تخبل و گاللها آني راجع هَسه طالع ، سدته و گالت للدكتورة تستعجل تدخلها للعملية خاف فرات يتأخر بَس الدكتورة ما قبلت و گالت هاي عملية و مسؤولية چبيره لازم هو يحضر و يوقع يلا أگدر أدخلها ...

********

برأيكُم شنو راح يصير؟

18.kij
تعالو أنستا و اليجي يدخلي خاص يگُلي علمود أضيفة كلوز لأن نشري اللي يخص الرواية أنشره بالكلوز فقط

سحر الدليمي