لا تنسون التصويت و التعليق بين الفقرات
قراءة مُمتعة ♥️
***
- لو رحتي بتضلي بقلبي و بعيوني كمان
و ع شفافي إسمك يا حُبي بيغرد عشقان
" ضلي هِلي يا قَمر الزمان "
***
فرات
يومين آني ببغداد ، فريتها فر و ما لگيتلهم أثر ، حتى على مكان شغله رحت و سألت گالو نقل شغله بَس ما يدرون وين ، أصدقائة سألتهم و هَم نفس الشي ميدرون بي وين و منقطع التواصل بيناتهم ، ضليت أمشي بالشوارع تايه مدري وين أروح ، وين أدورها و شلون أرجعها ، شلون أرجعها و أطفي نار گلبي ، دايخ و راسي أحسه طبول تدگ بي ، نزلت من السيارة و جبت مي شربت بَس أحسه مر و ما ينجرع عبن ما ماكل شي من البارحة ، نفسي عافت كُلشي ، صعدت بالسيارة و طلعت بوجهي لأبو حنيفة ( رضي الله عنه ) صليت و دعيت بعدين طلعت للكاظم ( عليه السلام ) و هَم صليت و دعيت و الدُعاء چان واحد ، ترجعلي و أكحل عيوني بشوفتها ، طلعت من المرقد و صعدت بالسيارة ، حطيت راسي ع الستيرن و ضليت فكرة تجيبني و فكرة توديني ، وين أروح هَسه ، شضل أنوب أسوي تا ألگاها ، شلون أرجع للبيت و هي مو وياي ، شگول لعمتي ، شلون أتحمل الگعده بالبيت و هي مو وياي و بكُل زاوية بالبيت أتخيل صورتها و ضحكتها ترن بمسامعي ، آخخخ يا چويات العشگ شيوجعن ، لشوكت يضل دلالي محروگ بالعشگ ، شوكت آني أرتاح و يصير اللي أريده ، آخر شي قررت أطلع للبصرة ، بلكت البصرة تداوي جرح گلبي ، شغلت السيارة و توكلت
***
عشق
گاعده بالغرفة وحدي و تفكيري كُله بفرات ، شصار بي هَسه ، أخاف گلبه رجع يوجعه ، طلعت الگلاده اللي لابستها ، باوعت لأسمائنا المنحوته بالذهب " عشگ الفرات " تذكرت الحفلة و لمن عقدنه و هداني الگلاده ، چان أحلى يوم بحياتي ، وين چنت و وين صرت ، چان هَسه تزوجنه و كُل ليلة أغفى على صدره و أگعد على صوته مثل ما چان يگُلي ، فززني صوت الباب من أندگ ...
فؤاد : فتحي الباب عشق
- شتريد
- ما رايد شي بَس جبتلچ أكل ، فتحي و أخذي
- ماريد
- فتحي والله ما أسويلچ شي وداعتچ
گمت فتحت الباب و أخذت منه الأكل و رجعت سديته ، گعدت أكلت شويه و گمت للمطبخ ، باوعت لغرفته ما موجود و بالهول هم ماكو أحد يمكن طالع ، رحت للمطبخ و وگفت أغسل بالمواعين و بالي سارح ، شوي و حسيت إيدينه تلتف حول خصري ...
- وخر فؤاد شبيك
شدني أله أكثر ، دنگ على أذني و همس ...
- يجي يوم و تطخين راسچ
فلتت نفسي منه و وگفت گباله ، رفعت أصبعي تهديد اله ...
- أنت صَح تزوجتني غصب بَس تحلم بيوم من الأيام أصيرلك زوجة فعلية و إذا قررت تغصبني هَم فـ بذاك الوكت أذبح روحي و ما توصلني والله العظيم
عفته صافن و رجعت للغرفة ، قفلت الباب و گعدت أبچي ، بعدين صفنت هو آني ليش أبچي ، البچي بشنو راح يفيدني !! ، مسحت دموعي و قررت من هاللحظة مستحيل تنزل دمعة من عيني و راح أواجهه بكُل الطرق لحد ما أخلي يمل مني و يعوفني
***
شهم
خلصت صلاة و گمت ، تيلفوني چان ع الصامت أنتبهتله جاي يدگ ، باوعت فرات اللي جاي يدگ ، فتحت خط و أول ما فتحته ، حچه ...
- شهم تعالي بسرعة
- فرات ، شمالك ، أنت وين؟؟
- آني بالبصرة ، يم جامع الـ *** ، ما أگدر أسوق عادي تجيني؟
- أكيد جايك ، هسه مسافة الطريق آني يمك
بسرعة بدلت ملابسي و طلعت ، و تفكيري يم فرات ، شجابه هنا و بدون ما يگول لأحد و شبي ليش صوته هيچ تعبان ، وصلت للمكان و شفت سيارته واگفه ، طبگت على صفحة و نزلت ، چان راچي راسه ع الكشن و مغمض عيونه ، فتحت الباب و چان يفز ...
- شبيك ولك؟؟
- مابيه شي بَس تعبان شويه
- گلبك مو؟
هزلي براسه بمعنى إي ...
- ديلا تعال أنزل ، بَس سيارتك شلون؟!
- مادري
- أنطيني السويچ خل أقفلها و بعدين أرجعلها
نطاني السويچ و راح صعد بالسيارة ، قفلت سيارته و رحت صعدت و توجهنه للبيت ، حالته متبشر بخير أبد ، أريد أعرف شصاير وياه و شجابه للبصرة بَس حالته مو مال أگعد أسأل بي ، وصلنه للبيت و فتنه ، دخل هو للديوانية ...
- أوگف فرات ، تعال فوگ بالغرفة ترتاح أكثر
- لا ما حاجة هنا بالديوانية ، مابيه حيل أصعد فوگ
فات و فتت وياه ، تمدد ع القنفة و خله إيده على گلبه ...
- أخابر على عبدالله يجي يشوفك؟
- لا لا مابيه شي ، هَسه شويه و أهود
- زين ماعندك علاج ، علاجك وين؟
- ضل بالسيارة
- تمام آني رايح أجيبه هَسه شوي و أرجع ما أتأخر
هزلي براسه و عفته و طلعت صارت بوجهي مُهره ...
- وين رايح شهم؟
- رايح أجيب سيارة فرات ، هو بالديوانية عينچ عليه خاف يحتاج شي
- ماشي
طلعت و أجرت تكسي يوصلني للمكان اللي بي السيارة
مُهره
دخلت للديوانية و شفته متمدد ع القنفة ، بقيت أباوعله ، شسوه بيك حُب عشق يـَ فرات ، يحبها لدرجة ميگدر يرتاح و يهداله بال و هي مو يمه ، نفس شهم بالضبط ، أكتشفت أنُ شهم و فرات نفس الحنيه و نفس الأطباع ، يحبون بنفس الطريقة ، أكتشفت أنهم يتشابهون هواي ، طلعت من يمه و سديت الباب ، لاگتني عمتي ...
- منو بالديوانية؟
- فرات
- شوكت أجه؟
- قبل شوي جابه شهم ، تعبان خطية
- عمت عيني عليه هالولد ما يرتاح
شهم
وصلت للسيارة ، نطيت أبو التكسي أجرته و نزلت ، صعدت بسيارته شغلتها و مشيت ، وصلت و طبگته بالگراج ، دورت العلاج فتحت الجكمچه و لگيته بيها أخذته و نزلت ، فتت لگيته نايم ، خليت العلاج ع الطبله ، طلعت و رحت للغرفة ، تمددت و نمتلي فد ساعة و نص ، گعدت توضيت و صليت صلاة العصر و رحت للديوانية لگيت أبوي و عمامي موجودين و گاعدين وي فرات ، بَس هو مو وياهم أبد ، يسولفون و يجاوبهم ببرود عكس كُل مره ، يندمج وياهم و يسولف و يضحك حتى يضل يگلي أحب أضل گاعد ويه خوالي و أسولف وياهم ، فززني صوت أبوي ...
- شهم بوية ليش ما گلتلنه فرات موجود؟
- والله يابة ما أجه ببالي
حسين : إي خالي گلي شصار بسالفة عشق ما لگيتوها؟
فرات جر حسره طويله و حچه بغصه ...
- تزوجت والله يـَ خالي
أنصدمت آني ، هَسه عرفت شنو السبب اللي مخلي فرات بهالحالة ، أبوي و عمامي واحد صفن بوجه اللاخ هم مستغربين ، شوي و طلعوا للشركة ، فرات چان مدنگ و مخلي راسه بين إيديه ، گعدت يمه ...
- صحيح تزوجت ، شلوون تتزوج و تعوفك ، فرات آني عقلي وگف ، هي مو تحبك !!
رفع راسه و حچه و هو يباوع للحلقة اللي بأصبعه ...
- الحيوان أبن عمها خاطفها و أكيد جبرها تتزوجه ، بَس مادري هُمه بيا گاع ، بَس اللي أعرفه عشگ متخوني شهم متخوني
- و شاللي مخليك متأكد؟
- أعرفعا شهم حافظها مثل أسمي ، تحبني و متخوني والله ، حتى و هي مسحوره و تكرهني بَس ما هان عليها تعوفني مريض و ضلت سهرانه على راسي الليل كُله
سكت بعدين كمل ...
- نبشت الأنبار و بغداد شبر شبر ما خليت مكان يعتب عليه ما دورتهم بي ، بَس ماكو فص ملح و ذاب ، راح أتخبل والله ، أريدها يول أريدها ، گلبي يريدها كُلشي بيه يريدها ، شسوي و أرجعها لحضني ، آآخخ يا عذاب العذاب آخخ
يحچي و يدگ على صدره و الغصه بصوته ...
- أنساها فرات ، أنساها و ريح گلبك
- حتى أنت يـَخوي ، حتى أنت تگُلي أنساها !!
- تزوجت فرات شتنتظر منها !
- تزوجت مغصوبه مو برضاتها ، و متأكد هَسه تنتظر جيتي أخلصها من إيدين هذا الگو** ، بَس وين الگاها وين أدورها
- على كيفك ويه نفسك فرات
- خايف عليها منه
- باوع تتذكر شگلتلي من چانت مُهره مفقودة؟
- شگلت؟
- گلتلي إذا عايشة راح ترجعلك صدگني و فعلاً رجعتلي ، و هَسه آنـه أگلك إذا عشق من نصيبك راح ترجعلك و علي الفحل
- و إذا مو من نصيبي
سكتت ما جاوبته ، گال ...
- أموت إذا ما أنجمع بيها شهم ، هي روحي من الدنيا
ضليت ساكت ما حچيت وياه ، شگله و شلون أخفف عنه ، صعبه والله صعبه و ماكو شي يواسي ، عفته و خليته وحده هو يواسي روحه بروحه أحسن أله ، بعدين رديت رجعت ما هان عليه أعوفه وحده حتى لو بَس أبقى گاعد يمه ما أحچي وياه ، دگ موبايله مرتين و ما جاوب ، مدنگ راسه و الموبايل بصفه يدگ و مو مهتمله ...
- جاوب ع الموبايل !
- مالي خلگ
رحت أخذته و شفت عمتي جاي تدگ ، فتحت خط ...
- هلا عمه
- شهم !! ، شو أنت تجاوبني ، فرات وين؟
- فرات نايم عمه
- نايم ! ، خوما بي شي و بعدين هو شجابه عليك؟!
- لا عمه مابي شي ، مادري أجانه اليوم
- أوووف ، والله يا أبني من البارحة ندگ عليه آني و أبوه و ميجاوب ، خفنه لا صايرله شي
- لا عماتي لتخافين مابي شي
- عينك عليه حَبيبي ، تره مقهور كلش و خايفة لا يصير بي شي
- بعيوني عماتي لا تشيليله هم
- بعد روحي حبيبي ، يلا سلم على أهلك وليدي
- يوصل حَبيبتي
سديت التيلفون و رجعته ع القنفة ...
- ليش متخابر أهلك و تطمنهم عليك ، خطية بالهم يمك
ساكت و عيونه بالگاع ، و كل شوي ينزع الحلقة و يرجع يلبسها ، باله مو يمي أبد و التوتر واضح عليه ...
- فرااات
رفع راسه : ها
- جاي أحچي وياك !
- ما سمعتك
- گوم
- وين
- گوم و ماعليك
- مالي خلگ شهم
- دگوم هي مال خلگ
جريته من إيده و گومته ، مشيت و مشه ورايه ، صعدنه بالسيارة و توجهنه لشط العرب ، وصلنه و نزلنه ...
- أدري بيك من تضوج تحب تگعد ع الفرات ، و هنا دجلة و الفرات أگعد و أشكيلهن همك
سكت و هو يباوع للشط ، راح گعد ع الجرف رحت گعدت يمه ، حچه ...
- دجلة و الفرات هينه يتلاگن و يصيرن شط واحد و يرون العطشان ، آني وياها وين نتلاگه؟ ، و شوكت نروي شوگنه؟
- تتلاگون بعون الله
- مشتاگلها
- الشوگ يذبح و علي ، حاس بيك
- الشوگ ينخر بشرايين گلبي نخر ، يجي يوم و يتگطعن و يكتلني الشوگ
- أشش لتگول هيچ
سكتنه ثنينه ، شوي و گال ...
- شصار بسالفة أبنك؟
- أبني !
- إي أبنك !!
- تدري ، هَسه آنـه صَحيح أب ، بَس أنحرمت من شعور الأبوه ، أبني راح يصير عمره سنة و آنـه ما أدري بيا گاع ، شلون شكله ، هادئ لو يبچي كل شوي ، شنو نطق بالبداية بابا لو ماما ، بالعباس گلبي جاي يفوز عليه ، و مُهره آخخ ، مُهره من بعد ما فقدت أكبر و هي مو ذيچ الأوليه ، أتحسر أشوفها تضحك ، حتى قربي ألها ما تريده بودها ما أجيسها أبد ، گلبها محروگ و عقلها مشوش حتى مشاعرها مشوشه ، تدري ذاك اليوك شتريد؟
- شنو؟
- تريدني أطلگها
- لا بربك !
- إي والله
- ليش؟!
- تگلي زواجنه غلط و آني تعبتك طلگني و ارتاح و تخيط و تخربط موتتني
- و هَسه بعدها تريد تطلگ؟
- لا قنعتها
- والله يخوي آني وياك واحد أطگع من الثاني
- إي بالعباس
- ألنه رب ما ينسانه ، ألا ما يدحگ لحالنه و يرحمنه برحمته الواسعة
- و النعم بالله
ضلينه گاعدين ع الشط ، حسيت فرات شوي طلع من مود الكآبة الچان بي بَس حزنه على عشگه بعده بعيونه و بگلبه ، للمغرب و رجعنه للبيت
***
عشق
گاعدة بغرفتنه و گبالي فرات شايل بنتنا و يلاعب بيها ، حاضنها لصدره و هي تلعب بلحيته ...
- يلا بابا گولي ماما ، شو دحگي عليه يلا حَبيبي
تضحك و ملتهيه تلعب بلحيته متقبل تحچي شي ...
- گولي ماما يلا م م ا ا م ا ماما يلا بنيتي مو شعلتي شيب الخلفوني دگوليها
جرب كُلشي وياها حتى تنطق هالكلمة بَس هي متقبل تگول لا ماما و لا بابا ...
- ليش تريدها تگول ماما مو بابا؟
رفع راسه و باوعلي ، أجه گعد بصفي و گعد بنتنا على رجله ، حضني و حچه ...
- عبنچ أنتِ تعبتي بيها و شلتيها ببطنچ تسع شهور ، أريدها اول ما تنطق تگول ماما
فزيت من النوم و من كُل عقلي أباوع أدورله بالغرفة ، بعدين أستوعبت أنُ هذا حلم ، خليت إيدي على صدري صارت ع الگلادة ، ذبيت النفس الچان محبوس بصدري ، گمت للحمام توضيت و فرشت سجادتي ، صليت و دعيت الله يفك أسري إي نعم أسري و يرجعني لأمي و لـ حبيب گلبي
شلت السجادة و خليتها ع الكرسي ، طلعت أتمشى بالبيت الساعة چانت بالعشره الصبح و چنه ماكو أحد فؤاد طالع ، رحت للبوب و كالعادة مقفولات ، أيست و كملت مشي بالبيت وصلت لغرفته ، صار عندي فضول فتحت الباب و فتت ، وگفت يم الچرباية و شفت علب أدوية ع الميز ، شلتهن گلبتهن فتحت العلبة چان بيها شريطين مخلص واحد و مأخوذ من الثاني ٣ كبسولات ، أستغربت لأن فؤاد أبد ما مبين أنُ هو مريض و لا بي أعراض مرض أصلاً ، رجعتهن لمكانهن و طلعت رجعت لغرفتي
***
نَفس
گاعده بالغرفة چنت اتابع مسلسل ع اليوتيوب ، أندگ الباب ...
- تفضل
أنفتح و دخل رافد ، وگف بالباب ...
- بَعد روحي أريد چاي ولو أزحمچ شوي
- لا حَبيبي مابيها زحمة تدلل
- خوش عَجل آني أنتظرچ بالهول
- تمام
طلع و آني لبست شالي و طلعت وراه ، نزلت للمطبخ و سويت چاي ، أنتظرته يتهدر ، كمل و صبيته بأستكان و خليته بصينية و رحت للهول ، خليته گدامه ع الطبله ...
- عاشت إيدچ
- بالعافية حَبيبي
توه شال الخاشوگه حَتى يخوط الچاي و چان نسمع صوت الجرس يدگ ...
- هذا يمكن فرات ، شنو ماعنده المفتاح !
- لا فرات نايم بغرفته
گام طلع من باب الكيندور و آني وگفت أباوع من الشباك ، طلع رافد و فتح الباب و چان أشوف الشخص اللي چنت خايفة اشوفه ، سالم !! ، رجل خالتي ، لگاني يا ربي عرف مكاني ، صار نقاش حاد بيناتهم و چان يطلع مسدس و يسحبه و يخلي بصدر رافد ، دفعه و دخل للحوش ، رمه طلقه بالهوا و صاح ...
- وييينكممم يااا بييت المهيوووب ، لو أنتووا زللم أطلعوولي نتواااجه
أحس رجلي ثگلت و لساني أنربط ، طلعت أمشي للصالة بالگوة ، نزلوا صگر و فرات من فوگ مفزوعين ، و عمي جسام طلع من غرفته ، الكُل طلع على صوت الرمي ...
نجاة : يا ستار شنو هذا الرمي
آني أريد بَس أحچي ماكو لساني ثگل ، گعدت ع القنفة و اجاني صگر ...
- شبيچ نَفس شصاير؟؟؟
- ر ر رافد رافد
- شبي رافد؟!
- زوج خالتي بره و ديهدد رافد بالسلاح ، ألحگه صگر فدوة
صگر و فرات بسرعة سحبوا سلاحهم و طلعوا و لحگوهم عمو جسام و عمو علي ، و آني طلعت أمشي وراهم ، طلعت للحوش چان سالم مصوب سلاحة إتجاه رافد و يهدده إذا ما طلگني يرمي عليه ، الولد خايفين إذا تقدموا او رمو عليه يأذي رافد لأن قريب عليه كُلش ، شافني و حچه ...
سالم : يلا هاي صاحبة الشأن هنا ، تعاي نَفس الحل يمچ لو تخلي يطلگچ و تجين وياي لو هَسه أذبحه گدامچ
عيوني تجري دموع و واگفة ما أعرف شسوي ، رافد ألتفت عليه و صاح ...
- فووتييي جووه نَفس
سالم : أشش ألتفت عليه لك ، و أنتِ يلا فضيني لو إي لو لا
أباوع لـ عمي جسام يمسح بگصته ، باوعلي بنظرات غريبة ، لا هو اليگدر يگُلي روحي و لا اليگدر يگُلي أبقي
آخر شي رافد هجم على سالم و تلاوه وياه ع المسدس ، و بلمح البصر ثارت الطلقة ، غمضت عيوني و خليت إيدي على وجهي ، شوي و فتحت لگيت رافد واگع بالگاع و ملتمين عليه و سالم مو موجود ...
جسام : راافد ، راافد گووم ابنيي
بسرعة رحتله ، فتح عيونه و هو بحضن عمي جسام ، چتفه ينزف دم هواي ...
- مابيه شي يابة لا تخاف ، الطلقة جت بچتفي
حچيت بالگوة من العبره اللي بصوتي ...
- ر ر راافد
ألتفت باوعلي : أشش لتخافين مابيه شي
گوموا حتى ياخذوه للمستشفى ، گام و داخ راد يوگع ، لزموا صگر و فرات واحد على يمينه و الثاني على يساره و أخذوا للسيارة ، آني ضليت واگفه بمكاني و أبچي ، أجه عمي علي و فوتني وياه للبيت و هو يهدي بيه ...
- لتخافين بنيتي ماعليه شي إن شاء الله
- أريد أروحله عمو ، الله يخليك أخذني أله للمستسفى
- شآخذچ يا عمي ستسوين غاد ، ضلي هينه هُمه يجون
بقيت أمشي بالبيت مثل المخبله مو گادره أگعد ، يا رب ميصير بي شي ، ما أگدر بدونه آني ، هو صار كُل أهلي
********
يتبع ...
بروهاتي بَعد گلبي أحب أگُلكُم أنُ هذا آخر بارت و راح أوقف الرواية مؤقتًا بسبب الأمتحانات ، يعني أحسن ليه و الكم علمود ما نلتهي و إن شاء الله وره الأمتحانات نرجع و بقوة و نختم الجزء الأول من روايتنا ، نلتقي على خير إن شاء الله
18.kij
تعالو أنستا و اللي يجي يدخلي خاص يگُلي آني جديد علمود اضيفه كلوز لأن نشري اللي يخص الرواية كُله بالكلوز
سحر الدليمي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!