سلاااام بدون كلااام
لا تنسون التصويت و التعليق بين الفقرات
قراءة مُمتعة ♥️
***
- هَنيئًا لمن باتَ يَغفو في أحضانكِ
و كانَ الله في عون قَلبي بـِفُراقكِ
***
طلع و عاف الباب مفتوح ، بقيت أبچي و حايره شنو أسوي يا ربي ساعدني ، ماريد أوافق ياربي ماريد ، شلون بيه هسه ، وينك عني فرات تعالي حبيبي
لبست شالي و طلعت أمشي و بكُل خطوة أمشيها أحسها تدگ بگلبي ، وصلت للهول و طلع فؤاد وگف يمي و الشيخ واگف وره الباب ، سألني و أحتاريت بالجواب ، صفنت أفكر شنو أگول ، شنو أسوي ، باوعت لـ فؤاد لگيته خازرني و بإيده تيلفونه يأشرلي عليه بعيونه ، بعد سكوت طويل فززني صوت الشيخ من رجع كرر السؤال ، آخر شي نطقت ...
- موافقة
گلت هيچ و صارت عيني على فؤاد أبتسم و عيونه لمعن ، عفته و رحت للغرفة گعدت أبچي ، شنو يعني خلص كُلشي ، تزوجت غير حَبيبي ، المفروض هاي الموافقة أنطيها لزواجي من فرات بعد كم يوم ، ليش صار هيچ ويايه يا ربي ليش ، إذا عرف فرات شنو حتكون ردة فعله ، آني خسرته ، خسرته للأبد و طعنته ، ياربي ليش هيچ ، ليش آني من دون هالبنات يا الله ليييشش !!
لليل آني بالغرفة ، فؤاد ما أجه عليه و شوفني وجهه ، شوي و أنفتح الباب و دخل ، راح للكنتور و طلع ملابس ، حچه و هو يبدل ...
- يلا گومي ، اليوم أريد أعشيچ بأحلى مطعم بدهوك كُلها
- عوفني ماريد
- لا حَياتي ميصير ، أحنه ما سوينه عرس ، ع الأقل خلينه نحتفل بزواجنه بعشه بره ، يلا گومي
- گتللككك مااريييد ، أنتت كُللككك ماارييدك و ماارييد شيي مننكك
شمر الستره بالگاع و أجه عليه لزمني من إيدي بقوة ...
- لتعانديني عشق
- گووووومي
- آني أنتظرچ بره إذا ما أجيتي ما أضمن نفسي شنو أسوي
شال الستره من الگاع و طلع ، گمت طلعت ملابس و لبست شلون ما كان و طلعتله ، لگيته گاعد بالسيارة ، صعدت و مشينه ، هو يسولف و فرحان و آني بالي مشدوه و مو وياه نهائيًا ، وصلنه المطعم و نزلنه ، گادني من إيدي حاولت أفلتها منه بَس لزمها بقوة لدرجة حسيت بألم ، فتنه للمطعم و گعدنه على طاولتنه ، شال المنيو و صار يگلب بي ...
- شنو تطلبين حياتي
يحچي و عيونه بالمنيو ، ما جاوبته ، رفع راسه و باوعلي و رجع دنگ ...
- تمام راح أطلبلچ نفس طلبي ، متأكد راح تحبين ذوقي بالأكل
صاح النادل و وصاه على أكل ، شوي و جابوا الأكل بده ياكل هو و آني مالي نفس آكل بَس أكلت بإجبار منه
مرت ساعة و أحنه بالمطعم ، كملنه و طلعنه و هو فر دخوك كُلها تقريبًا ، و مشغل أغاني و الصوت عالي و فرحان كلش ، ألا آني ، جسمي هنا و عقلي و گلبي و روحي كُلهن يم فرات ، شراح يسوي إذا عرف ، شراح يفكر بيه و شيگول عليه ، أكيد راح يگول خانتني و تزوجت ، راح يگول كسرت گلبي للمره الثانية ، أوويلي عليك حبيبي ، والله ما حبيت شخص بالدنيا كُلها بگد ما حبيتك أنت ، ملكتني كُلي ، أخذت گلبي و روحي و كُلشي بيه ، حتى أسمي من أحد يناديني عشگ أكرهه بٕس من حبيته و صرت أحب تناديني بهالأسم ، آني وين هَسه و أنت وين
صحيت من دوامة افكاري على صوت فؤاد ...
- يلا نزلي حياتي وصلنه
بدون ما أباوعله نزلت و بوجهي للغرفة ، بدلت ملابسي و گعدت أفكر ، معقولة راح أخلص حياتي كُلها هنا و ويه فؤاد ، لا مستحيل ما أتحمل والله
شوي و دخل فؤاد و سد الباب ...
- شتسوي هنا أنت؟!
ما جاوبني ، نزع الستره و أجه گعد بصفي ، باوعلي و عيونه تتوزع على كُل أنحاء جسمي ، آني بقيت أباوعله مصدومة ، شال إيده و وخر شعري عن وجهي ، تقرب حتى. يبوسني و دفعته و گمت ...
- أنتتت شللوون تتجرأ !!
گام عليه و لزمني من إيدي ...
- ولچ أنتِ مرتي ، سنة كاملة و آني أتمنى هاللحظة وياچ ، ليش تعاندين
- وخرر عنييي مااريدك ، لتتقررب مني ، ووخررر
ما أهتم و حضني بقوة و باسني من رگبتي ، و آني أحاول أفلت نفسي منه شفت قلم حبر ع الميز شلته و ما أعرف منين أجتني القوة دفعته عني و خليت القلم على رگبتي ...
- والله والله أذبح نفسي إذا تلمسني
- عشق لا تتخبلين ، ذبي القلم من إيدچ
- ماذبه ، عوفني بحالي ، ماريدك ، تزوجتك غصب بَس مال تاخذني بالغصب هم لا والله أذبح روحي و ما أخليك تلمسني
- لا تأذيچ نفسچ حبيبتي ، إذا تأذيتي آني هم أتأذة والله
- أطلع بره الغرفة
- تمام تمام طالع بَس لتأذين نفسچ
- أطللععع
- طلعت والله طلعت
طلع و سد الباب و آني گُبل رحت قفلته و گعدت أبچي و ألوم بنفسي و أتمنى يجي فرات و يخلصني من هذا الجحيم ، تذكرت من فرات حاول يتقربلي بَس من شاف رفضي أله عافني ، و فؤاد لو ما هددته چان ما أهتم لرفضي !!
و مشت الأيام و آني كُل ما أنام أقفل الغرفة عليه ، فؤاد ينام بغرفة ثانية ، شگد حاولت أنهزم بَس هو يقفل كُل البوب من يطلع للشغل ، حتى الجيران ما أگدر أوصلهم و لا همه يجون ، يمكن هو مانعهم ما أعرف ، عشت أسوء أسبوعين بحياتي حرفيًا و شكلي راح أعيش أيام سيئة أكثر و أكثر لأن مالي خلاص من هالجحيم
***
رافد
صارلنه أسبوعين ، گلبنه الدنيا على عشق و ما لگيناها ، صگر و فرات ما گعدوا و لا هدالهم بال بَس ماكو نتيجة ، فرات لا ياكل و لا يشرب و ما خله شي ما سواه حتى يلگاها بَس ماكو فايدة
گاعدين كُلنه بالهول من بعد ما شُبه فقدنه الأمل ، حچه أبويه ...
- بدور خابري على أبو فؤاد و أسألي عن أبنه ، عندچ رقمه أنتِ؟
فرات رفع راسه و دحگ على عمتي ينتظر جوابها ، حچت ...
- إي عندي
- إي عَجل دُگي عليه بلكت هو يعرف وينهم
- إي والله شلون ما جه ببالي
طلعت تيلفونها و دگت ع الزلمه ، شوي و جاوبها ...
- شلونك أبو أنمار ، الحمدلله بخير ، ردت اسألك على فؤاد عفيه متعرف هو وين؟ ، إي ماخذها وياه و صارلنه أسبوعين ندورلهم ما لگيناهم ، ما أدري بشنو؟ ، أبو أنمار شهالحچي شلون يتزوجها بنتي مخطوبة لأبن خالها !!
سدت التيلفون و لگحته ع القنفة و صارت تدحگ لـ فرات ، فرات گام و جه گعد يم رجليها ...
- عمه لتگولينها عفيه
بچت عمتي و حچت ...
- تزوجها يـَ عمه ، عشق راحت من إيدك
گام فرات وگف على حيله مصدوم ، راحتله عمتي نجاة لزمته من إيده سحبها و طلع بره ، گمت بسرعه لحگته ، وگف بالحديقة و خله إيديه على وجهه ، دنگ و بچه بحرگه و صوت عالي ، أول مره أشوف فرات يبچي هيچ ، رحتله و لزمته من كتوفه ...
- فرااات ، فرااات ، مو هيچ على كيفك
- آخخخخ يوول آخخخ گلبي أحسه أنمررد مررد و مُحمد
يبچي و يصرخ من كُل گلبه ، رجع گال ...
- أخذهاا مني يووول ، أخذهااا غصببب ، لوو مااخذ رووحيي و لا ماااخذهااا
ضل يبچي و يصرخ لحد ما أنبح حسه ، طلع عمي علي و صاح ..
- فراااات !
ألتفتله فرات عيونه حُمر و العبره شگت صدره شگ ، جه عمي علي وگف گباله و حچه ...
- ماريد أشوفك تبچي و ضعيف هيچ
جاوبه فرات بصوته المبحوح ...
- أخذها مني يابة ، أخذ عشگي
- مو من نصيبك البنيه
- أنعلل أبووو النصييب ، أگُلك أحبهاا أحبهاااا
- كاافيي يوول كاافي موو ضييعتت عمرركك و شباابك كُللهه ورره الحُب
- ليش أنت ما حبيت يـَ أبو صگر
- حبيت بَس الحبيتها من نصيبي و أخذتها ، ما بچيت وره بنيه تزوجت و راحت بنصيبها
ميل راسه و جاوبه بعبره ...
- بَس هي ليه والله ، تحبني آني
گال هيچ و گعد ع الصبخ ، حسيته حيله أنهد ، خله إيده على حلگه و عيونه بالگاع و بَس صوت شهگاته ينسمع ، راحله عمي علي و گعد بصفه ...
- شبيدي عليك ول يابه ، شسوي و أطفي النار اللي بگلبك
- رجعلي عشگي
سكت عمي و دار وجهه ، فرات ضل يدحگ عليه ينتظر جواب منه ، شافه ما رد ، گام و طلع بره الحوش ، ردت ألحگه لزمني عمي من إيدي ...
- عوفه ، خلي وحده
- عمي خاف يصير بي شي
- لا ما يصير بي شي ، خلي يدانش فكره زين بلكت يقتنع
- راعي الهوى ما يقتنع بفراگ محبوبه يـَ عمي
دحگ عليه و هز راسه مقهور ، عافني و طب للبيت
فرات
طلعت و آني أحس گلبي سچاچين نابته بي ، أخذها النذل ، أخذها و أخذ روحي وياها ، شسوي هسه ، شلون أصبر بلياها ، هي بَس المصبرتني على هالدنيا ، شلون بيه يا ربي ، شلون أرجعها وين ألگاها ، ما حسيت نفسي غير و آني يم الفرات ، طبگت السيارة و نزلت ، أدحگ على هالدنيا هاي شوسعها بس ضاگت علي و خنگتني ، بفراگها أحس الحياة مالها طعم ، يعني هسه راحت من إيدي ، عشگي صارت لغيري ، گعدت و رچيت ضهري على شجره ...
- آخخخ يـَ فراگ الولف شگد يهد الحيل
ضليت گاعد و سارح بهمومي و ما دريت شلون غفيت من التعب صارلي يومين مو نايم أدورلها
حسيت و فتحت عيوني لگيت الدنيا ظلمه ، دحگت ع الساعة چانت بالـ 11 ، گمت و جسمي متكسر عبن نومتي مو عدله ، ركبت سيارتي و توجهت للبيت
علي
گاعد بالصالة أنتظر فرات ، لا بين و لا دگ على أحد ، أدگ عليه هم ما يجاوب ، بالي ضل يمه ، ضليت گاعد ليوين ، شوي أنفتح الباب ، رفعت راسي لگيته فرات ...
- وين چنت أنت؟؟ ، ما تگول وراي أهل يفگدوني
جه گعد بصفي ، دحگ عليه و تمدد و خله راسه على رجلي ، حچه ...
- تعبان يابة و غلاتك
خليت إيدي على راسه ...
- لهدرجة تحبها يـَ بعد عين أبوك؟
- شفت الدنيا بعيونها يابه ، هي اللي أنطتني أمل بالحياة ، و هسه راحت و أخذت كُلشي وياها
- أسولفلك سالفة يجوز تخفف عنك؟
- ماكو شي يخفف عني
- يجوز تاخذ منها عبره
- شنيه؟
- تدري آني صابني اللي صابك
- شلون؟!
- هاي گبل ما أعرف أمك ، چنت أريد بنيه و هي تريدني بَس أبوها چان نذل ، مشيت عليها يجيله بالـ ٧ مرات و ما أنطامي ياها و من شافني رايدها ، زوجها لواحد من ربعهم غصب ، و من بعدها الدنيا سودت بوجهي ، هجست الدنيا كُلها راحت وياها
- و بعدين شصار؟
- بعدين وره هيچ سنتين ٣ چنت بشغل يم خوالك و شفت أمك و عجبتني و ضليت أشوفها و ضلت گبال عيني إلى ما وگعتني و خطبتها و تزوجنه و نسيت ذيچ البنيه و عشت حياتي و صرتوا عندي أنتوا و ترستوا الدنيا عليه
- و شنو العبره تللي آخذها من هالسالفة؟
- العبره هي يـَ وليدي ، الله ما ياخذ منك شي غير يعوضك بشي أحسن منه ، باچر تلگه بنيه و تحبها و تنسيك عشق
گام و گعد على حيله ...
- لو مو بنيه وحدة لو ستالاف بنيه ما ينسني عشگي ، و آني أعرف شلون أدورها و أجيبها من أيدين هذا الگو**
گال هيچ و راح صعد فوگ ، ما يفيد وياه الحچي ، فرات عنادي و اللي براسه ما يحيد عنه لو شما نحچي وياه و نريد ماكو ما يسمع
فرات
رحت للغرفة و گعدت ، فكرة تجيبني و فكرة توديني ، أبويه يريدني أنساها ، ليش هو بإيدي ، گلبي متعلگ بيها نسيانها شي مَستحيل ، و لو يضل آخر يوم بعمري أرجعها لحضني ، ضليت گاعد إلى ما صارت الساعة بالسته ، نويت أطلع أدورها ، گمت حضرتلي چم غرض و حطيتهن بجنطه لأن شكل السالفة مطوله ، طلعت البيت هدوء بعدهم نايمين ، شغلت سيارتي و توجهت لبغداد بلكت غاد ألگه شي يوصلني الهم
***
عبدالله
گعدت الصبح باوعت للساعة چانت بالـ 8 ، ما أدري ليش أجت ببالي ريان ، ضحكتها و صوتها أتخايلها هَسه گدامي ...
- ولچ طلعي من راسي شسويتي بيه
من يوم الشفتها لحد هاليوم ما غابت عن بالي ، دولبتني و وگعتني بعشگها ، هو هذا العشگ اليسولفلي عليه شهم ، إيييه والله طلع حچيه كُله صَحيح ، نفضت الأفكار من راسي و گمت غسلت و رحت لغرفة عباس ، شلتله المغذي لأن خلص ...
- عبااس ، ولك هيي
فتح عيونه بتعب ، باوعلي ...
- شبيك شتريد ، چنك أمي من چانت تگعدني أروح للمدرسة
- أسكت أسكت ، شلون جرحك؟
- ولك يوجعني ما نمت الليل والله
- و هَسه شلونه؟
- هسه أشوه
- ميخالف لازم تتحمل هالفترة ، لا تنسى أنت مطعون طعنتين مو وحدة و مو هينات ، و آني وياك ما أعوفك لحد متطيب
هزلي براسه و سكت ...
- يلا صحصح بعد أخوك آنـه رايح أجيبلك ريوگ
- مصحصح آني
گمت نزلت جوه للمطبخ ، لگيت أمي محضره الريوگ ...
- صباح الخير أم عباس
- هلا حَبيبي ، صباح النور عيوني
- ماما بلا أمرًا عليچ حضريلي ريوگ لـ عباس علمود آخذه أله
- صار
حضرت الريوگ و أخذته و صعدت لـ عباس ، خليته گدامه ...
- يلا تاكل لو هم آنـه أوكلك
- ولك ششايفني طفل
- لا أنت مو طفل بَس يحتاجلك تربية من جده و جديد
صفن بوجهي حسيته ضاج ، آخ مني يعني أله أچفص ، حچه ...
- يعني آني لهدرجة واحد موزين؟!
- لا حبيبي أنت مو موزين ، بَس قصدي أنُ أطباعك حاده شوي لازم تتغير و تسمع كلام أبوي و أمي
- أصلاً أنت و أبوي و أمي نفس الحچي ، كوبي بيست
گال هيچ و دار وجهه ضايج ...
- باوعلي عباس ، تره أبوي والله ميكرهك ، صَح يصيح عليك و يعاركك هواي بَس كله لمصلحتك ، يعني شفت ذوله التمشي وياهم شسوو بيك اللي ياما و ياما أبوي نصحك تبتعد عنهم ، ولك بالفترة الچنت بيها بالمستشفى أبوي چان يضل سهران على راسك للصبح و بعدين يرجع للبيت ينامله ساعتين و يرجع للمستشفى ، أبد لتفكر أنُ أبوي يكرهك
رجع باوعلي بَس ما حچه شي ، شوي و أنفتح الباب فات أبوي ...
بكر : هااا شلونهم وليداتي
- الحمدلله يابه
راح للجهه الثانية گعد يم عباس ، باسه من راسه و حچه ...
- هاا بابا شلونك اليوم خوما متأذي؟!
- لا بابا زين الحمدلله
- إي الحمدلله
باوع لصينية الأكل و رجع باوع لـ عباس ...
- هاي شنو بعدك ما ماكل ، يلا أبني تريگ علمود تاخذ من أدويتك
گال هيچ و گام طلع ...
- شفت ولك مو أگلك ميكرهك أنت بَس أمشي وياه عدل و أسمع كلامه
- حاضر ، منا و رايح لو يگلي ذب نفسك بشط العرب أچيت زروگ
- ههههههه ، دتريگ يلا فضني عندي شغل
صفنت شوي و آني أتذكر ريان ، فززني عباس من حچه ...
- هااا شو صافن ولك؟
- هيچ
- لا مو هيچ ، عشگان مو ولك
- لا عشگان و لا شي
- تره عيونك سولفت كُلشي ، لا تچذب
توترت و صرت أمسح بگصتي حاير شگله ، رجع گال ...
- باع التوتر باع و يگول مو عشگان
- إي إي عشگان أرتاحيت هسه
- يا بويه بنات مصر كُلهن ما وگعنك چا منو هاي الوگعتك
- إييييه يخوي ، بنت الأنبار الوگعتني
- هااااا ، مو آني گلت والله روحاتك هاي للأنبار مو خاليه ، زين منو هاي ، من جماعتنه لو غريبة؟
- گرايب بيت المهيوب ، متعرفها أنت
- هاااا
- إي ، يلا كمل أكلك
***
مُهره : طالع للشركة لو عندك شي ثاني؟
شهم : هسه راح أمر على قاسم عدنه شغلة نخلصها و أطلع للشركة
- شنو هالشغلة؟
- ولچ شو صايره فضولية أنتِ؟
- إي أحب أعرف كُل تحركاتك
- ههههههه ، بويه يردون شحنه من عدنه تنقللهم بضاعتهم لمصنعهم الثاني
- هااا
- إي ، أرتاحيتي هسه
- إي ، عود لا تتأخر ع الغدة
- صار من عيوني
درت وجهي حتى أمشي ، صاحت ...
- تتعاال وين البوسه مالتي
وگفت و عيوني عليها ، تقربت مني و باستني من خدي ، ضليت جامد بمكاني ما تحركت ، حچت ...
- يلا شهمي روح
- بويه تره أنتِ وهدنتيني بهالصباحيات
- ههههههههه
- أروح فدوة و نذر لهالضكة اللي صارلي هواي ما شايفها
- أسم الله عليك يـَ روحي
- أضحكي حتى شهم تضحكله الدنيا وي ضحكتچ
- صار
- يلا آنـه أروح ، إذا ضليت شوي أغير رأيي و أضل مگابلچ
- بالسلامة حَبيبي
طلعت و توجهت لبيت قاسم ، وصلت و نزلت دگيت الباب فتحتلي يامور ...
- هلا حَبيبي فوت
- بالمهلي ، آنـه مو گايلچ لا تفتحين الباب أنتِ ، رجلچ وين؟
- قاسم جاي يبدل ، ميخالف بَس هالمره والله
- إي زين ،مهدي خوما نايم؟
- لا جوه مخلينه يلعب بسريره ، فوت شوفه
- لا ما أفوت بَس جيبيلي ياه
- يلا هسه أجيبه
فاتت للبيت و ضليت آني بالطرمه ، شوي و طلعت شايله مهدي وياها ، نطتني ياه ...
- هلا يـَ يروح خالو
أخذته شلته و هو من شافني ضحك و حضني چلب برگبتي ...
- هاااا بعد روحي مشتاق لخالك مو؟
- إي والله مشتاقلك ، من يگوم يبچي بَس أطلعله صورتك بالتيلفون يسكت و يگوم يناغي و يضحك للتيلفون
- ههههههه ، حبيب خالو أنت
ضليت شايله و ألاعبه ، هالولد هذا أشوف بي أكبر ما أعرف ليش من أحضنه أحس شابك أكبر بحضني ، شوكت يجي اليوم اللي أحضن أبني بحضني ، فزيت على صوت قاسم ...
- حي الله أبو الأكبر
- تحيا و تدوم حبيبي
نطيت أكبر لأمه ، شفتها مبدله ...
- راح تروحين للشغل مو؟
- إي
- چا و مهدي؟
- گلت آخذه وياي شسوي ، أهل قاسم طالعين لبغداد
- لا خويه شلون تاخذينه وياچ للشغل !!
- شسوي يا شهم وين أخلي
- ودي يم مُهره ، هي ماعدها شي
- ليش ما رجعت للجامعة؟
- لا تگول مو جاهزة للدراسة
- تمام راح أودي عليها
- راح تفرح بي
- أعرف هي تضل تسألني عليه
قاسم : شرايكم تفوتون جوه و تكملون سوالفكم ويه أستكان چاي مو أحسن
يامور : ههههههه
شهم : يلا يلا أحنه رايحين تأخرنه
قاسم : إي والله همزين عرفت
***
صگر
تونه گاعدين نتريگ ، نزلت أمي من فوگ ...
نجاة : فرات مو بغرفته يمكن ما رجع من البارحة
علي : لا رجع البارحة و حچيت وياه و بعدين صعد فوگ
- ماكو والله هسه شفت غرفته
جسام : رافد أنت ما شفته ما حچه وياك؟
- لا والله يابه
بهالأثناء جتني رسالة على تيلفوني ، چانت من فرات ، فتحتها ...
🗨️ صگر آني طلعت لـ بغداد أدور عشگ ، لا يضل بالكم
رفعت راسي عليهم ...
- أگفو اگفو ، فرات ببغداد
علي : شماخذه لبغداد؟
- توه دزلي رسالة يگول أريد أدور عشق
- ما يتوب هالوليد ما يتوب
جسام : خلي يدورها و إذا ما لگاها هو يگطع نفسه و يجي
سكت الكُل و رجعو ياكلون ، بَس عمتي بدور گاعده و تدحگ ع الأكل ، أدري بيها بالها يم عشق ، خلصت أكل و طلعت ألاعب لارين بره ، شوي و جتني رُسل بإيدها تيلفوني يدگ ...
- هاك تيلفونك صارله ساعة يدگ
- ما سمعته
أخذته و دحگت ، الرقم غريب اول مره يدك علي ، فتحت خط و جاني صوت مَره ...
- ديربالك عليها ، لا تنطيها أله ، هو عرف مكانها و جايكم
- دقيقة بَس خل أفتهم ، منو أنتِ خالة و منو اللي ما أنطيها؟؟!
- نَفس ، رجلي عرف أنك ماخذها يمكم و جايكم حتى يرجعها
- و أنتِ منو؟
- خالتها
- و ليش جاي ، بَعد كُل اللي سواه جاي يريد يرجعها !!
- مو حُبًا بيها بَس طمع ، هو طماع و مستعد يتخلى عن كُلشي علمود الفلوس
- طَمع؟!
- إي ، نَفس طلعلها ورث من أهلها و هو سمع و يريد يرجعها حَتى يستولي عليه من خلالها
- أياا حيوااان ، زين خالة أنتِ منين جبتي رقمي و شلون عرفتي أني آني اللي أخذتها؟
- مو بلغت عن أختفائها بدون ميدري رجلي و الشرطة عرفو أنك أنت اللي مخلصها من اللي خطفوها و هُمه طلعو يعرفونك ، رادو يرحون يجيبوها بَس آني ما قبلت ، گلت خليها يمك أأمن ألها و أحسن و أخذت رقمك من عدهم حَتى أتطمن عليها ، بَس من عرفت أنُ رجلي درى بمكانها خفت عليها و خابرتك ابلغك و تدير بالك عليها
- هاذ هو خالة لا تديرين بال ، نَفس بحمايتي و بعون الله محد يجيس شعره منها
- فدوة لطولك يمه ، الله يحفظك لأمك و لشبابك بجاه الحسين الشهيد
- تسلمين خالة و يحفظچ
سديت التيلفون منها و آني بالي كُله صار يم نَفس ، كُل همي صار شلون أگدر أحافظ عليها و أحميها ، طلع رافد تا يريد يروح ، ناديته ...
- رافد
التفت و جاني ...
- هااا شبيك؟
- أكو شي مُهم لازم تعرفه
- شنو؟
- توه خابرتني خالة نَفس ، هذا الحيوان رجلها عرف أنُ هي هنا و جاي يريد ياخذها
- أنعل والديه والله شنو بكيفه ياخذها !!
- ما ياخذها و أحنه موجودين ، بَس نَفس لا تدري لأن راح تخاف
- و ليش جاي يريد ياخذها؟
- تگول خالتها طالعلها ورث من أهلها و هذا يريد يسيطر عليه من خلالها
- حيووان و گو** ياخي آني هيچ نذاله ما شايف بالقرآن
أنداريت لگيت نَفس واگفه بباب الصالة و تدحگ علينه ، أحنه چنه گريبين من الباب أكيد سمعتنه ، ألتفت رافد و شافها ، رجع دنگ بالگاع ...
- روح أحچي وياها و حاول تحسسها بالأمان
هزلي براسه ، آني عفتهم و طلعت بره
نَفس
طلع صگر و آني ضليت واگفه و حابسه الدموع بعيوني ، جاني رافد ...
- نَفسي
گال هيچ و آني نزلت دموعي ، هو شافني أبچي جرني و حضني لصدره ...
- لا لا ليش تبچين يـَ روحي
- عرف مكاني رافد عرف مكاني
- إي و إذا يعرف مكانچ طُزز بي
- خايفة عليكم منه رافد ، خايفة عليك ، أنت متعرفه هذا واحد شراني و مستعد يسوي كُلشي علمود الفلوس
- ما يخوف چلبي ، شو دحگي عليه ، نَفس أرفعي راسچ يولي
رفعت راسي أباوعله ، باوعلي بنظرة هدأت الخوف اللي بداخلي ما أعرف شلون ، حچه ...
- ما دام آني يمچ ماكو زلمه أبن أمه يگرب صوبچ ، و هاي گضبت شارب ، محد يأذيچ و آني موجود
ما أعرف شلون گدر بكلامه يسيطر ع الخوف اللي أجتاحني ، مسحت دموعي و رجعت حضنته ، و آني أحمد ربي لأنه خله هالرجال بطريقي
***
يتبع ...
و هاي القفلة و داريتكم بيها
18.kij
تعالو أنستا و اللي يجي يدخلي خاص يگُلي آني جديد علمود اضيفه كلوز لأن نشري اللي يخص الرواية كُله بالكلوز
سحر الدليمي
هذا الفيديو يوصف حال فرات🥺💔 ، شوفوا
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!