رواية عشق البدوي الفصل الأربعون 40 - بقلم نور الشمس

مساء المحبة ❤

الى كل جنودنا الابطال عيدكم مبارك
وكل عام وانتو فخرنا ربي يحفظكم العوائلكم ❤

حبايبي تاخرت عليكم لان دمجت تقريبا 2 بارتين ابارت واحد

البارت متكون من اكثر من 5780 كلمة

راح اشتاق الكم هواي 😘

……………………

" بين نصفي الذي يحبك وكلي الذي يعشقك ..
تاهت تقاسيم الهوى ...
فأصبح نصفي وكلي في هواك متيم ❤️

………

شووگ..

چان ياسر يخابر اخواني يسألهم شلون حلها وابو كميل وياهم وجراح جان يتشكر منه ويكله ابو كميل ماقصر مافهمت بالضبط بس هذا الي جان يدور بينهم
واني افتر وراه اريد ارضي قبل لايقطع الاتصال ويرجع يعگد الحاجب علية

لابس كيمونه سودة وبرمودا عسكرية

وطبيعته يتمشه لو اتصل بأحد
حضنته من الخلف شددت ايدي على خصرة
بسته بظهرة
اسمعه صار يقطع بكلامه ويحاول يبعدني واني اشدد قبضة ايدي اكثر
حاول يكمل مخابرته ع السريع وقطع الاتصال
وحاول يديرني عليه واني تمسكت بظهرة ابوس بي وحاصرتني الضحكه خاف انبسط تاليها

حاول يبعد ايدي

..ولچ كافي مصيبه انتي خفاش خو مو خفاش
شبيچ لزگتي بظهري شو وخري عني مو مابيج حيل أنتي..  اذا هذا كله ومابيچ حيل اذا بيج شتسوين

..قل اعوذ برب الفلق ياساتر ياساتر بيش طالبني سيد لاتصير عيونك حارة بردها

..شلونج انتي وتنحسدين وخري عني وخري

..مااا.  ما اوخر حلالي وبكيفي منو يكدر يبعدني عن حلالي اذا مقهور مني روح الحلالك بس لاتنقهر حباب محد مانعك من حلالك لاتجي تمنعني من حلالي

كتم ضحكته كوه

..حلالي وحلالك وبطتنه بطت بطن بطتكم افهم هاي عزومه منج الي باعتبارج انتي حلالي الممتنع ليلة البارحة شخلاج اليوم تعزمين شنوو مو ليلة البارحه جنت ماحاس بيج وبتعبج وانتن عليجن التعب والشغل والحمل والنساة وبعد وراجن ولادة واحنه ع الجاهز ومو قابلين مو حجيتيلي قصة جهادجن العظيمة لو اني غلطان

جان يعدد باصابعه ويحجي

عكدت حواجبي بتمثيل خافيه ابتسامتي الي بانت غصب عني

..هاي منو حاجيه كل هذا معقولة اني

..لايابه منو كال انتي امي جانت هنا وحجتهن

..ضحكت اي صوجك شكوو تحضن امك وهيه تعبانه

ضحك وگال

..انجبي لاتربطين الاحداث وتمثلينها بأمي عقلچ واكف مايشتغل ولايفكر بس السان وممحصل منه غير قلة الادب والتحشيش حاضن امك شنوو

حضنتج الج ياعوبه لو ما مشتاقلج اني واحبج مييت عليج بعدين انتي ماتعرفين هنا الدقايق الها طعم
شايفه من اروح والتحق اتحسر على لحظاتي وياج وع الراحه الاشوفها هنا على اهلي وع كلشي وانتي جايج ملهوف وكعدتي تحچيلي قصة نظال حواء وعدم مبالاة ادم

بسته ودرت عليه

..مو هذا قصدي بس جان بالي مشغول باخواني وعمامي صح اعرفهم يحلونها بس جنت متوقعتها اطول وخفت لتصير ثارات وعرك

..اي وهسه انحلت مشكلتهم والعراريس مرتاحين واخوانج بالعسل واني زعلان بيج خير رضيني

..ماينطيك گلبك تزعل علية

..انعل ابو گلبي لاينطيني حاقد عليج حقد مو طبيعي الليل كلة نايمه مرتاحه واني اتگلب للصبح
بنت الاوادم گعدي شوفيني نمت كعدت سألي عليه حسي بيه رضيني بكلمه بضحكه بسالفة

بعدين انتي وحدة جذابه مهتمه الاهلج ع اساس اهلچ واخوانج مسلحين للصبح وانتي نايمه وماتدرين بالدنيا غير خوف هذا

..اوو ياعمري اني شعلية النوم سلطان غصبا عليه نمت تعبانه جنت  من العقد والله والحمل هم يخليني انعس

غمزتله

اليوم اعوضك

..اليوم شنوو ؟ لو هسه  هسه لو مااقبل

..تدلل بس شلون ارضيك

..اعتمدي مهارتج مااغششج لأن ماكو ابالي شي اريد انتي تفاجأيني وشوفي نفسج شنو فنونج بالصلح
واني اشوف نفسي شنوو الي يبدد زعلي

رفع حاجبه وحركه اليه وعيونه مركزه بيه ابتسم
بس اني انصدمت وافكاري صارت تتزاحم
شلون ارضي ياربي والله صعب زعله

جاي افكر فجأه غير رأيه گال انطيني ملابس اريد اطلع اروح الأمي ومناك البيت ابو كميل اريد اشوفهم

رحت اجيب ملابسة بدون مااناقش بس صعبت علية المهمه هسه لو باقي شوية بسرعه يرضا مدام بيها طلعه راح يعيد حسابة ويرجع قافل جنه مامتناقشين ومتفقين

بدل واخذ سويجه ومحفظته وطلع

واني افكاري تودي وتجيب شلون اصفي البال واشتغل عدل وارضي واكون اني الكاسبة اني مااريد اتوسل وهوه ميحب الضعيفة الي تتوسل يحب اوصلة فكرة اعتذار بس بطريقة ملتوية

قررت اسويله اكله يحبها وبعدها ارتب تفسي اله  طلعت مواد الدولمة نكعت كمية من التمن
وغسلت السلگ ونگعته بمي حار
ثرمت بصل وكرفس وابالي والله لو يجي هسه ويشتم ريحتي وريحة المطبخ يظل قافل عليه اجازتين سوه

ياربي شدعوة عليهم يعني يردون نظافه وجمال وطبخ طييب وبيت مرتب وهدوء بوقت نومتهم
ملابس حاضرة وقت الطلعه ومكوية ومعلگه لا والحلوو من يريد القميص الي لابسة البارحه

حبيبي مو عندك غيره هواي كلهن مكويات

لا.  الا هذا النيلي

يابه البارحه بالليل انت لابسة مالحكت اغسله بالليل
اذا ماراد يحجي بس يعكد حاجبه ويگول شنو جنتي تسوين وشنو شغلج انتي اذا بملابسي ماتهتمين شنو الي يهمج لو مهتمتلي جان فكرتي ردت البسة

اوووف والله صعب بس اموت بي وبصعوبته وكد ماصعب امور ابسط منها ماكو ترضي
بس اني وحظي انتبه الهن البسيطات لو لا

والله كالتلي مرام السادة صعبين وتقصد عمامها بالذات بس ماصدكتها

جاي اثرم وعيوني تدمع وبكلبي احجي ..خلصت ثرم وخلطت المواد التمن وي اللحم المثروم وعليه البصل والكرفس وخليت معجون وبهارات وملح ..وليمون عصرت ودبس الرمان يحبها حامضه زيادة
خلطتها ولفيتها خليتها ع النار غسلت ايدي ورحت للغرفة اطلع ملابس اريد اسبح وارتب نفسي قبل جيته بس فكرت اعزل الهوسه الصارت من الثرم يلله اروح اسبح احسن

كملت تعزيل ع السريع جنت اتسابق وي الوقت نصيت النار حيل
اجيت افوت الغرفة
اندكت الباب البرة

طلعت اشوف منو صوت ابن حماية
عدلت شالي لأن چنت الف شعري بي حته لا يوكع ع الاكل فتحته اغطي بي رگبتي وعدلت  ردن ثوبي وفتحت الباب

..هلو حمودي

..هلوو عمه عمي ياسر دزلج ذني السمچتين يكول خلي تحضرهن وتشويهن للغدة

..اثنينهن كلك

..اي الأثنين كال يريدهن يتغدون يم حبوبة مرت عمي احمد يم اهلها وكلهم غداكم علينه

..صار يدلل هوه وحبوبه

حجيتها لان متأكدة راح بطريقته يفهم ردي منه وشنو حجيتله
الظاهر الحجي الحجاه هنا وشلون ارضي اباله امور اكثر يمكن يريد يضوجني ويشوفني شكد اتحمل حته يقارن بين ضوجته من اهمالي اله البارحه وضوجتي من معاملته

بسيطه ياسر انت تريد تلزم لزمة عليه الظاهر حركاتي صارت قديمة ويعرفني هيج افكر اني فعلا ناويه بعد الغدة اتحضرلة وكلت  شويه وادلعه راح يوافق بس الظاهر يراد ابدل الخطه

السمج جان كبار حيل و منظف همزين غسلته وتبلته وحميت الفرن اشوي
وحضرت التتبيلة الي اتعلمتها من امي ام جراح فديتها انطتني سر المهنه الي مناطيته الوحده حته بناتها من اترجيتها وكتلها السيد يحب السمج علميني شلون تشوينه فدوه يمه بيني وبينج ضحكت وكالت تعاي معاي بس ماتكولين الحد

يمكن الهسه تريد ابويه من يضوگ اكلها يعرف من طعمه هيه الي مسويته وفعلا ابويه يعرف يفرق بين اكلها واكل امي بيوم الي امي ام جراح تطبخ يكلها من يد مانعدمها ام جراح عاشت يدج ونفس الشي الامي

المهم اخذت منها الوصفه وحته الامي مراح اعلمها حفاظا ع الوعد
اول ميبدي السمج ينشف ويحمر اكون محضرة الصلصة الخاصة بيها

ثوم مهروس ودبس الرمان وصاص وكچب وملح الليمون

سويت الطريقة الي تتحضر بيها الصلصه المتكونه من هذي المواد خليتها ع الطباخ ربطت عندي وجهزت
انتظرت السمج يستوي وبالي اكول خوش تجهيز بصل وثوم وزفر
يبوو ع حظي حته الدولمة قربت تجهز واني نسيتها
مدام هيج
حته الدولمة اوديها الهم ياكل يمهم خلي سمجتين وهدية جدر دولمة فوكاه

انوب كل ماافتح الفرن وتكفخني الريحة احس روحي تريد تطلع
يربي عبالك مو سمج مدري شنو اشتم ريحته جنت اموت عليها قبل هسه متنطاق

كملت الدولمة طفيتها
والسمج خليتله الصلصه بفرشة خاصه للطبخ

دقايق وكفت يمها وطفيتهن فتحته اشوفه كمل
شكلهن حلوو بس ريحتهن دمار بعد مااتحملت رحت للحمام احس روحي طلعت يربي شهالعذاب
وماقابل من اسولفله شلون نتعب

بعد وكت الغداهم وره الصلاة
الحك اسبح سبحت واتوضيت اتمكيجت مكياج بسيط ودزيتله رسالة

..الاكل جهز تكدر تجي تاخذة

بين ماجهزت السمج وفصلته وخليته بمواعينه الخاصة رجعلي لعبان النفس
ركضت للحمام سديته عليه شويه وارتاحيت غسلت اندك. باب الحمام عرفته ياسر اكيد دخل من الباب الي بيناتنه وباب المطبخ بس مطبوك مامقفول

گال

..شوگ انتي زينه

..زينه مابيه شي اخذ الاكل وروح واخذ وياهن جدر الدولمة مو تنساه

..ليش انتي ماراح تجين وياي

..لا اني مااشتهي والبيت صار هوسة اعدلة بين ماتجي انت

..براحتج

طلعت جبت ملابسي

سبحت شسورت شعري وخليت مكياج بسيط ميحب المكياج بس مااريده يتعود مااخليله مطلوب الترتيب ولو شي بسيط

بس احس روحي تعبت حيل والنحول زاد عندي من سبحت وشسورت شعري احس نعست

طفيت الضوه وكلت اكيد يطوول ساعه انام بيها بين مايجي

طبكت البيبان ورجعت لفراشي نمت

كعدت وره فتره هدوء خفت من فكرة جاي ولاكيني ع نومتي وماحاسه بيه باوعت تليفوني صار ساعتين ونص هوه ماكوو وحته امي متصلت بيها ولا اخوتي الي مراسليني شو احس نفسي تعبانه وبعد بية نعسه

رجعت نمت

گعدت واحس انفاس حاره قريبه الوجهي وتحولت بوسات اكثر من بوسه الخدي ورگبتي

اريد استوعب اني اتحلم لو صدگ

..شووگي خو مو زعلانه ترة مو متقصد اتركج كل هاي الفتره

استوعبت الدنيا ليل هسه مضلمة الدنيا

اريد افكر يسوة ازعل لو ماتسوة يمكن عباله نايمه زعلانه بس بالحقيقة اني تعبانه ومتسوة زعل هنه كم يوم يجي بيهن مجاز

درت عليه بسته صارت بين خده وشفافه
خله ايده جوه راسي اتمدد ودارني عليه

..تدرين شكد احبج

كتله

..لا

..اكثر مما تتخيلين واكثر مما اني متخيل احب وحده بحياتي هالكثر

..وين جنت

..شغله تعبانه شغلتني عنج بالبداية خبثت عليج اتنهد وكال  مو خبثت حبيت اشوف مريتي عدها عقل تقدر لو بس مشيطنه وتلعب على گلبي

ضحكت

..وشنو اتبينلك

..طلعت ام عقلين عقل فرني وعقل فر دماغ امي شمسوية الامي وهيج تحبج

..المحبة من الله مامسوية شي يستاهل عادي حالي حال غيري بس احبها ومعتبرتها امي

..ماادري بيج مسوية دولمة وتعبانه واتبرعت الامي واحمد  وابن جعفر اخوي جانو عدنه وسجاد هم كتلهم غداكم عليه
ولتشوفين فرحتي بيج من سمعت ردج وشنو كلتي جنت خايف خاف تزعلين لان متوقعه ارجع اتغده وياج
بس طلعتي مرة معدلة مو نص مره ونجحتي بالأختبار
هسه انتي خو مو زعلانه

هزيتله راسي لا

..خو مو ضايجه

..لا

..زين نرجع نتذكر الكلناه الصبح

..شكلنه

..حلالي ومحد مانعني مو هيج كلتي

.امممم بس ماكتلي وين جنت

رفع شعري وباسني وره اذني

..شغلات قديمة مصفيها ورجعت انفتحت عوفج منها وخليج وياي

………… ..

مرام ..

بعد مااجوو العرسان واصر ذياب يروح دزوو ناس تتوسط يسوون الگعدة اليوم

من. الصبح كاعدين ع وكفه وحده للجاي والمي

جنت بالمطبخ اخدر چاي وميثه ترتب الصحون والاستكاين

وعمتي ام جراح جانت تراقب وتوجه شنو تريد نسوي
مرات احب قوة شخصيتها ودي لو عندي من قوتها شوية رغم زوجها تاركته بارادتها مايوم شفتها مقللة ترتيب من نفسها وكشختها واذا فاتت عطرها يسبقها
اكثر ملابسها تكون مثل الهاشمي

وابد مايوم شفت شعرها وهيه بالبيت الا بداخل غرفتها حته يم ولدها وولد رجلها تلبس شالات تلفهن لفه حلوه عليها مثل الشيلة

جانت توجهنه بشموخ
وتحاجي ولدها وتتفاهم وياهم ودت ع منهل وحاجته وكالتله ادخل حاجي مرتك وطمنها

وفعلا دخلته باب الاستقبال المفتوح ع الصالة
وراح العذاري
طوول وهوه يمها

اكو شي حبيته بيهم ماادري عدهم كلهم لو اني حظي حلوو وصادفت عائله راقية من عوائلهم
كل ادم منهم يحترم حواء ويقدر مشاعرها حته المتزوج  زواج تقليدي بس تبقه زوجته متخوفه منه لأن حسب كلامهم يكولون مانعيش بليه حب واذا الواحد حب منه مايرتاح الا تكون اله لو عمره خمسين 

خدرت الجاي وطفيته
اجه اياد كال انطوني وجبه
وحاجاني

ام مريم ابوج هنا وكلامه يريح
يكول اذا انتو امشين عليهم مشية ومنطينكم يم شهود تحكوهم باعتبار الكم حق رباها وعملتو بالاصل
وطلبتو منهم وانطوكم وهمه كلبو عليكم مثل مايحكونكم انتو تحكوهم بهيج حاله تنحل بالصلح

فرحت بجية ابوي ووكفته وياهم اكيد هالشي يعززني وفرحت الركاد ع الأقل كل الي سواه الاجلي ابوي يردله ولو شي بسيط يبينله اهتمامه بي وباهله
حلوو شعور البنت من تفخر بابوها يم اهل زوجها احساس ميحسه بس العايشه خاص اني جنت خايفه ميهتم ابوي لعيالي وهوه معروف يدخل بحل المشاكل بالمنطقة

قدمو وكت المشية كالو نروح الهم الصبح هسه حته لايدخل طرف ويزيدهم غل علينه اكو ناس شغلتهه تأجج المشاكل مااعوف شنو يستفادون عمي ابو جراح كال ماننطيهم فرصه يدخلون وصدك راحوو سيارات هواي
قبل ليروحون اجه ركاد سلم عليه وباس مريومه وطلع
وصاني ع روحي وع امه ادير بالي عليها واتحمل منها كلشي الخاطرة اذا ضوجتني  هوه يعرف يتصرف بس اهم شي كال لتقللين احترام مهما كان
طمنته ممسويتلي شي  بالعكس وهيه فعلا ابد ماحسستني شي خاص من عرفت بيه سمعت خواتها ودافعتلي حته اني اكو شي بداخلي اتحرك حبيتها وحبيت شعور اكون جنه محبوبه الي اعرفه العيال اذا حبو الجنه يحبون حته جهالها واذا كرهوها نفس الشي

مااكول يكرهون جهال ابنهم  بس مو مثل الي يحبون امهم وهذي حقيقه وشايفتها بعيني تصير اكو تفرقة بدون ميحسون الا يكبر الجاهل وهوه يحبب نفسه يلله

كتله حبيبي لاتخوفني ان شاءالله ترجعون بالسلامة

طلعو والخوف ذبحنه ظلينه ندعيلهم وره ماوصلوو بنص ساعة خابرونه انحلت وعطلوهم ع الغده بيت ال شاهين مثل مايسموهم  مامتوقعين بهالسهولة تنحل

بس خالتي حيل ضاجت من عرفت حلها نسوان اثنين
ووحدة اخت ذياب والي عرفته هيه اصلا هاويته للولد وهوه حابها والثانية مهرة لان اخت منهل وادخل هوه بالشغله  انطوها الواحد من ولدهم خالتي حيل ضاجت رغم زواجهن اصولي مهر ومحكمة مو فصلية

بس هم شبسرعه هيج انحلت كلنه اتسائلنه رغم حمدنه ربنه وشكرناه
من اجوو عرفنه  طلعت ام ذياب رايحه الاخوها عم البنت يصير خال ذياب  ذابه شالها بديوانه ومفرعه راسها يمه ويم ولد عمها كايلتله اريد ابني منك تريد تشفعله للفزعه ولاني دخيله عندك

لو للخوة وحليب امنه الغذانه سوه عاد اخوها كايلها الج التردي وبعدهي يمه وطابين ذياب وعمامه مطلعينها كبل طلعتهم بس وره ماحالينها عمها كايل خطوتكم عزيزة وبناتكم نريدهن للكرب وحته ماتظل عداوات يصيرن خوال اولادنه والشباب تنسه وتنترك هالسالفه اذا ظلينه هيج يصير بيها عار وكل فتره تتحرك وترجع تنعاد المشاكل

السالفه محلولة كبلكم الخاطر اختي طيحتها وخاطركم عزيز بنت اخوي طمعت بيها الولدي ومافي فرگ بينها وبين بناتكم تنطوهن الي واجيكم اطلبها حسب الاصول

وفضت بسهوله مامتوقعينها

بس يكولون ذياب ماقابل ع امه تدخل ديوان  وهيه هم حقها ماتريد مذابح بين ولدها واخوانها هيه المتضرره من الجهتين الله يكون بعونها

جانو كلش تعبانين وعبالك سهر ذيج الليلة وقلقها طلع بيهم اليوم

اول مادخل ركاد كال جهزي عمرج نروح دارنه
تعبان

كالتله امه خل نتفاهم مهرة منهوو عطاها

..ابوها عطاها والا نسيتي منهل طرف في السالفة

..كيف يعطيها ومن سمحله وهي مسماية

حطيت ايدي ع گلبي ياربي بس لامسماية الركاد

كالها

..مسمايه حك من ؟

..مسماية الولد خالها طلبها گبل ايام

..مافي نصيب مارادين الهم خبر مافيها شي تسما باسم سلطان جاهز مجهز

..المعرس الي أخذتوو حرمتو صارت له

..اي يمه نفسوو

..وابوك راضي بهالظلم...بالله عليك ركاد انت شرت هالشور حك ذياب وطاحت اختوو فيها 

..يمه مافي ظلم ..واسم الله الله وجلاله وبيته والي يطوفوه  ماني عارف بخطتهم الا يوم ماعلموني انهم ماخذينها ويبون الهم مكان يكصدوه ماحد يشك فيه گلتلهم لكم بيتي
بعدين لاتكبريها 
بيجوها ويطلبوها ويعطون اسياگها زواج عادي بين العمام ماهي معطيه بالساهل ام البنت راضيه وابوها وخوياها انتي ليه حارگه دمك

عافته وراحت
اشرلي نروح

رحنه البيتنه لكيته مثل ماهوه مرتب الظاهر امها منظفه ومرتبه البيت من طالعين غرفة نومنه مقفولة جانت ومفتاحها بجيب ركاد

والغرفه الثانيه بيها فراشات مسفطه

الظاهر هوه مطلع الهم

فتح الباب وكال

.. عوفي كلشي نيمي مريوم وتعالي تراني مشتاگ

رحتله واني مشتاقتله اكثر جنت
مشتاقه الهمسه وللغزل مشتاقه حته النظراته
طفينه نار اشتياقنه
بحرورة الملگه بردت ارواحنه وگلوبنه مشتعله بنار حبنه الي مهما اقتربنه وابتعدنه والمحبه تزيد يوم عن يوم
نام جان تعبان ظليت اتأمل وجهه وهوه نايم
دعيت الله يحفظه اليه ولايوم حسيته متململ من وضعي ومراجعاتي من دوامي وانشغالي يوم عن يوم حبه يزيد بكلبي ودلاله يزيد يحتار شلون يبيين حبه ومكانتي بكلبه
اتأملته واتذكر كل مواقفه
الحد مانعست
ونمت

كعدت العصر كلش

كعدت ع اتصال زينب

حاجيتها وسلمت عليها

وسالتها عن حال اهلي وكميل
علاقتهم حلوة بس هيه حيل تغار وغيرتها تضوج كميل منها
اكو رياجيل تحب النسوان الي تغار واكو يشوفون هالشي قلة ثقه ومن ضمنهم كميل يشوفها قلة ثقه بيه وبنفسها ويحاول يفهمها ومرات يزعل بس مايتحمل زعلها يرضيها مهما كان
خاص من يشوف علاقة هيثم بيها يضوج من يشوفها ضايجه وعبالك صديقته مو زوجة ابوو صار حته من يسافر ابوه ميهتم هيه فاهمته وتهتم بي مثل كميل واكثر

بس غيرتها واعصابها من تفلت تخرب كلشي
وهوه مقدر تعبها وياه وي كرار واكثر شي هيثم يشوفها متفضله ويتحمل كلشي منها
ويحاول يعوض يتمها وفترة شبابها الصعبه
مرة گلي اشوفها بنتي الثالثه حالها حال هيثم وكرار احسها محتاجه حنان من اشوف عيونها تلمع من احاجي الجهال واكلهم بابا والعب كروري ونتلاوه بالايد اني وهيثوم احسسه هوه اقوه مني من اخلي يلوي ايدي

من اتصلت علية
جنت متخيله تحجيلي موقف من مواقفها وي كميل  او هيج شي
اتفاجئت من كالت خالتج هنا الي بالنجف واجت تترجه عمج ياسر باست حته اطراف عباية حبوبتج حته تخليهم يضغطون ع ياسر ويخلوه يتنازل

..ليش شبي عمي ياسر وهمه شبيهم

..مااعرف بس وره الغده من اجه عمج ياسر بعد ماراحوو راسه والف سيف مايتنازل

..عن شنوو

..مااعرف هوه اني حبيت افهم منج  يكلهم صار اكثر من سنتين اريدهم يطيحون واجمع عليهم واخطط وهسه اتنازل خلي يضوكون الي طبخوه بأدينهم

كتلها انطيني امي احاجيها
حاجيتها وجانت امي خايفه من فهمت منها اترجتني احاجي عمي ياسر واتوسط عنده 

بالليل خابرته افهم منه

كال من زمان جاي ارتبلهم وضعهم ومن وصلت هيج اتنازل بسهوله نسوو شلون رموني اباب بيتي ودولي من جلابهم عبالهم الدنيا زاهيتلهم دوم

صار من يوم الحادث وره اشهر جهزت عندي ادلة كامله عنهم بس كل مااقدمها جان الهم نفوذ بحزب معيين يسد القضية حته متصير قضية رأي عام وياثر ع حزبه

ومن كد مالحيت من جميع الاطراف اعلام وسياسه واحزاب وضباط وقيادات عليا صارو همه شغلي الشاغل
طلعووهم من الحزب واتفرغت الهم ومن مالكو وجه الهم صارو يتوسلون وين جانو قبل

خلهم
ياخذون جزائهم ولو يجون ابوي وصادق يطلعون من كبورهم مااتنازل ولااوقف الدعاوي وحته الباقيات كلهن حركتهن اني وشيسوون خلي يسوون

شفت اصراره وحقه بلي يسويه
كتله حقك وبراحتك وخابرت امي فهمتها تطلع منها ومتخلي اخواني بالنص وطلعوو همه هم رافضين وسجاد مأيد عمي ياسر بشده وكميل مامدخل بشي

وفعلا وره فتره طلعت عليهم هواي دعاوي وانسجنو ومنتظرين احكامهم
ولاجنهم الي جانو يحجون بالعالي بس سحبو ادينهم منهم قادة حزبهم صارو حته الناس الي جانت جوه اديهم وتتوسل بيهم صارت تحتقرهم وتشوفهم منبوذين ماادري ليش البشر بسرعه يتغير وينسه
بالرغم يشوفون نهاية الظالم من زمن فرعون لحد الأن

مرت فتره وصرت اروح البيت عيالي عادي وبنفس الوكت امر ع بيت حبوبه وشوك همه نفس الشارع بس شوك متوصلهم الا بوقت معيين الي يشوفها ولا عبالك شارع واحد يجمعهم 

بيوم جنه كلنه مجتمعين وشوك ويانه لان عمي ياسر بدوامه وكايلها روحي يومين الهم وارجعي

رحنه واتونسنه بيومها كلشي جان طبيعي
بعد العشه عمي كال

..بناتي واولادي كلكم حاضرين ابا اتحجه بحضوركم

جراح كله سَم يبوي تكلم

عمي باوع بوجوهم كلهم وركز ع عمتي ام جراح وگال

..صار اكثر من 23 سنة وانا متمسك فيچ لليوم ولامرة تململت منج ومن تجاهلج لي وبرودج ولا مرة عاقبتج الرفضج رغم اي واحد غيري ماهو مجبور بشروطج ياتوافقين تكونين حرمه تعطين الي عليج من حگوك مثل ماانه مسوي العلي ياتتوكلين وكلمن يشوف طريجه ولا مرة تعاجزت من طلباتج وشروطج كله صار وتم

تهگين ليه كنتي متصوره عشان الولاد ماهوو صحيح من كم سنة الولاد اكبروو وكلمن شاف دربه وانا مثل ماانا
ماتغيرت عليج ولاهم الي رابطيني فيج
انا رايدج ومكفيتني شوفتج وبس ماهنتي علي لاگبل ولا الحين الي ردتي ساويتوو وصبرت ولو مااحبج وخاطرج عندي عزيز  ماسكت عليچ يوم وهمتي ركاد وخوياتوو لانو جراح كان كبير وفاهم وظل معي بيني وبينج للاخير
بس الصغار كنتي واهمتهم واكثرهم ركاد كان يستخسر فيني النظرة وكنت اشوف بعيونو العتب كل وكت وحين
كان هذا اكبر عقاب لي وتحملتوو حته لاتزعلين وردتج تفشين غلج
كبروو وصار لازم يعرفون جبتكم هان وجمعتكم فهمتهم الصح وافهموو والحمدلله الله عارف في الي بگلبي وصلح حالهم معي واعرفوو كيف انا اطالع الله ثم اطالعهم

هالحين الولاد كلمن صار ابيت وكلمن ملتهي بعايلتوو
الحين انا وانتي شو حياتنا وكيف نصلح حالنا

انا يوم تزوجت لا انا اول واحد تزوج ولااخر واحد الي ساويتو ماغضبت الله فيه كنت عادل بكل شي اكدر عليه الا مواصلتج والسبب انتي

وانتي ماهي غريبه عليج حالات الزواج
ابوج ماخذ اثنين وانتي بنت الحرمة الثانية له

واخوياج بعد كلهم مثنين واثنين منهم خطبتيلهم بعد زواجي
الي ماترضي لج ليه ترضي الغيرج الا اذا كنتي مقتنعه هالشي ماهو بعيب ولاهو حرام

وشفركج عن حريمهم

هم عايشين ومرتاحين وانتي وش حياتج والوين تبين توصلين

اذا كانت نيتج تنتقمين مني السنين الراحت ماكفتچ ؟

وانا وش راح مني كلمن عايش حياته ومحد متأذي غيرچ يشهد الله بغلاج عندي

مامهتم العمري كثر مامهتملچ طيحي الحاجز الي بگلبج خليه يولي

طردي الحقد والغل تعيشين انتي براحه وتنبسطين وانا بعد انبسط غصب عني

جدام اولادج الحين وهم جالسين

انا طالب نبتدي من جديد وتردين حرمتي حدر عباتي وظلي ماهو بالاسم وبس نعيش عايله وحده والي راح من عمرنه كافي

يا تختارين الحل الثاني
انا رجال ومااتحمل شوفتج كل يوم وانتي كريبه مني وبعيده عني ماابي اعذب عمري الي راح من العمر كافي

جان يحجي وعيوني تتنقل اباوع بوجوهم الولد جراح وركاد دنكو متأثرين ضايجين ع وضع اهلهم
خاص من جاب طاري ركاد وشلون جان متصور ابو السبب وهوه الي تاركهم مو امه الي طالبه تحسر بضيق وباوع الامه بحزن ورجع باوع الابوه ودنك كمل كلامه عمي وكال

الحل الثاني نرجع مثل ماكنه البنات توكلن الله يهنيهن
اشريلج بيت وواحد من اولادج يكعد معاج او الاثنين كيفهم

الي علي ساويته بس اذا لي خاطر عندج خلي العمر الفات كافي لانتقامج النفسج مني وانهي الزعل ماتسوة صرنه جد وجدة

عيني ع عمتي ام ركاد جانت تباوعله بتركيز  واكو دمعة لمعت بعينها بس مانزلت ابد ولاحجت ولاعقبت من كمل كلامها باوعت الولدها

جراح كاله يبى خلها ع راحتها
ودار ع عمتي گالها

..يمه سوي الي في خاطرچ وانا اروح وياج وين تردين

حاجاها ركاد كالها يمه فكري زين ابوي متمسك فيج ولو مايحبج وشاريج جان ماخلانه عندج كل ذيج السنين ونحن نلومه
وان ماقنعتي بيتي وانا ومااملك كلي تحت رجولچ

بس يعذرني الوالد يوم تقررين تتركينو. تتريكينوو  نهائي
بعد مافي جيه وروحه بينكم
ولا فيه مصروف منك يبى انت  تگول صابر عليها وموفر طلباتها بدون مقابل هذا گصدك
يعني انت متفضل عليها بصرفك والسكن

من اليوم ياتختارك ياتختار حياتها بدونك
كنا زغار ومانفهم ومو كد المسؤولية عمر كامل وانتووالاثنين واهميني بشي وحياتي اطلعت شي ثاني السموحه منكم الاثنين ماعرفتوو اديرون حياتكم

كلمن عمل الي براسو وتناسيتوو وجودنه والي بينكم عيال يفهمون وودهم بعايلة تجمعهم

من اليوم اذا امي اختارت حياتها بدونك تشيل ايدك عن مسؤوليتها نهائي

لا في مصرف ولا مسكن ولا كل غرض من اغراضها لك فيه
انا وجراح نكفي ونوفي وهي كيفها تختار الي تريدوو

عمي كال الركاد مو من حگك تشرط علينه يولد نسيت حالك انت

جاوبه جراح كله كلامه صح يبوي

الكل مركز عليهم وعمي ماقبل بحجي ولده هوه ناوي صدك يشتريلها بيت بس يروح يشوفها ينطيها مصرف عادي

بس ولدهم سدوو البيبان بوجهم وجانو ضايجين من الاثنين ماادري ليش عيونهم جانت تباوع الاهلهم بعتب يمكن اتذكروو معاناتهم قبل

عمي كال الجراح انا للحين والباجر وعكبوو متمسك فيها وشاريها خلها هيه الي تريدو يتنفذ

عمتي كالت

..الولاد اكبروو وكل واحد منعم عندو حياتو الخاصه والي راح من العمر كافي والي جاي مايسوى الزعل

انا بعد هذا العمر صعب علي اطلع واكون ابيت ماهو لي
حته لو كان بيت ولدي بيت زوجي بيتي وانا اولى فيه
مثل ماگال ابو جراح انتقمت لنفسي بذيج السنين وكنت حاسبتها انتقام الروحي بس اكتشفت معذبه روحي اكثر ضاع شبابي واجمل سنين العمر بالانتقام ومامستعده اضيع ايامي التجي

الي راح صفحه وانطوت وانا وام سجاد عشنه ايام مع بعض لاانا نويت اكلها ولاهي كلتني

الا لو الحال تغير عند ام سجاد من اليوم
باعتباري ماكنت ضرة فعلية  لها
رفعت حاجبها وركزت بعيون ام سجاد

كالتلها لا والله بالعكس مايتغير اي شي واصلا اني اكثر وحده راح ارتاح لأن احساس الذنب مايفاركني

الولد وكفوو يردون يطلعون حبو ينطون اهلهم مجال يتفاهمون

كال جراح هسه هذا اخر قرار لج ماانتي مندومه ولا انتي زعلانه يمي

..لا يمه ماني متندمة وتعرفني مااتندم ع اي فعل حته لو كان مهو بصالحي بيكون لي درس بس مالوم عمري يوم اختاريتو ماني ندمانه حته ع سنيني الراحت كنت راضيه نفسي ومريحتها

عمي كاله يولد ماني معول الله يهديها تبي تفطنها انت وتذكرها خاف هي ندمانه والا لا

ضحك  جراح وكال

..عاد اطمن ع رضاة امي خاف تنزفلك مغصوبه ماحنا التاخذ حريمنه غصب

ضحكوو الولد واحنه البنات حيل انحرجنه من الموقف ضحكنه بالخفية منهم 

رغم الوجوه كلها جانت فرحانه الولد فرحو الفرحة ابوهم حته سجاد واياد ظلوو يشاقون اخوانهم وابوهم
بس النسوان احنه كلنه جنه صافنين ونباوع بالوجوه
احس الوضع متوتر
حاجيت شوك انتي تدرين. ولج شو مامتفاجأه كالت اي امي من البارحه كالت حاجيت ابوج يرجع يحاول وياها وبلكي تقتنع

..يعني هيه الي فهمت ابوج يحاجيها زين والله اني جنت خايفه تصير مشكله يعني افرح ماكو شي

..هههههه لا افرحي اني فرحانه الابوي ..اي امي
كالت اخر مره بيوم المشكله حسيت بام جراح تريد ترجع تعيش وياه عادي وتهتمله وتهتم بي بس كبريائها يمنعها ولان اني مريه مثلها احس باحساسها قررت اخلي ابو جراح يحاجيها حته ماتتعرض الاحراج وهيه تطلب منه لان خواتها لامنها وجانت ضايجه حيل من ملامتهن الها واني تعرفيني شكد متندمه ع زواجي من ابوج رغم دلاله الي وحبي اله وشكد يحبني ولايوم حسسني انو هوه متندم بزواجه مني حته بعد مانبذته مرته
واتنازلت عنه كليا
بس جانت فرصي بالزواج هواي شنو الجبرني وخلاني اعيش تانيب الضمير كل هاي السنين
ولايوم نمت وحسيته هوه الي وبس وي كل السواه دائما احسه هوه مو بس الي هيه دائما جانت بينه
خل نعيش طبيعي احسن النه اني عمري كله خلصته مو مرتاحه افكر بهيج يوم ومو من حقي ابد خلي يرجعها ع الاقل ارتاح وانسى القلق واني طالبه منه احسن حته ميحتار بيني وبينها ميستاهل ابوج رجال خيير ويستحق يعيش براحه

تردين الصدك مرام  اني هم فرحت الابوي وحته امي
اني اعرف امي واحساسها كتلها احسن اذا حاول وياها تره حقها ومنو منه تقبل رجلها يتزوج عليها وهيه مناقصها شي

ولا مقصرة يعني حقها تعاقبه بس هيه قوية منو تتحمل هالكد ومتأكده يامرام شكد تحبه مبينه من تطبخ بوجوده تعرف الي يحبه شنوو وتريده دائما يميز طبخها

تحرص تتواجد بكعدته يمنه  وتراقب حركاته ع طول كلنه منتبهين عليها وحته اخواني يكولون زين تسوي بابوي
ضحكت كالت والله ماكو هيج عقاب وقابلية

الحمدلله خلي يصلحون امورهم

الولد طلعوو اترخصوو من ابوهم واني لملمت غراضنه وطلعت وره ركاد
شفتهم واكفين يم باب الشارع وراه صايرين بعده مسدود وهم داخل الطرمه

يحجون وي امهم جراح وركاد بطأت مشيتي حته مااضايقهم واخليهم براحتهم مبينين يحجون باهتمام

جراح صاحه ابوه رجعله
وركاد باس راس امه وصاحني حته نطلع

بالطريق سكتت ماعقبت
لان مبيين هوه حيل متأثر ماادري شنو الي يدور اباله بس ماجان فرحان بالعكس حسيته ضايج يمكن متوقع امه انجبرت لان ولدها مو يمها

رجعنه بس وصلنه البيت  دخل للغرفه نام 

ثاني يوم كال انا رايح اهلي اليوم اتأخر تردين اوديج الهلج

عرفته ميريدني موجوده وبينهم كلام

رحت الاهلي صدك
بس من رجع رجع فرحان

كال

..امي وابوي الأسبوع اليجي يسافرون عمرة
يرحون بيت الله يگضون شهر رمضان في السعودية

..كتله بالعافيه يستاهلون فرحت من شفت فرحته ولمعة عيونه بيها فرح

كال ابوي اليوم كلمني وكال هذي هدية صلح ماتوفي صبرها

وكنت خايف لاتكون مجبوره اليوم كلمتا وگلتلها اشتري بيت واخلي بأسمج وانتي راعيتو وحنا

خطارج بس هي كانت مقتنعه وراضيه من خاطرها

اليوم يمرام شفت اللمعة الي انفگدت من عين امي من يوم كنا صغار من وعيت وامي فيها شي طافي
امي مهما كانت قوتها تظل انثى

تحتاج الاهتمام وحب وابوي شاريها تره وتحمل جثير منها وحواها ماخلالها حجه تعوفو ولاگابلها بوجه مكروه كان دايما يسامح

مرت ايام وهذا الاسبوع جان عندي مراجعه قبل شهر رمضان
اشوف طبيبة التغذية حته تسويلي جدول خاص بالشهر الكريم
وتشوف وزني لان ممنوع اوزن الا يمها كالت لتوزنين كل فتره واني عجبني اشوف التغيير يمها
وصدك رحت جنت زايده اربعه كيلوو وجانت نتيجة حلوه بالنسبه الها والي وباقيلي 6 للمثالي

انطتني الجدول
ورجعنه تعبانين جنه..  هوه من شغله للطبيبه بعيده عنه شويه ومسافه يسوق ومريومه تملل

بس وصلنه البيت نمنه كعدت
شبعانه نوم ساعة ثمانية
فايتتني الصلاة
رحت اتوضيت وصليت
كعدت مريومه خليتها بالگاع وطلعتلها ملاعيبها وانطيتها حليب تشرب

ورحت اطلع كبب للعشة
رجعت للغرفه ناسية تليفوني خل اطلعه حته احاجي امي

مصطفى جاي يحضر العرسه بالعيد يريده باقي يومين الشهر رمضان يعني شهر زمان ويتزوج
وجنت اتواصل وياهم بالتليفون ع طول يسألوني شنو تحتاج العروس وغرفتها ومن هالسوالف رغم زينب ممقصرة
بس مصطفى  يحب يشاركني بتفاصيل يومه

واني ادور الجهاز وين خليته ضاع عليه وكعت عطر  من الميز
اوو خليت ايدي ع كلبي بس لا كعدته شفته اتحرك طلعت ع السريع واخذت مريومه يمي

خطيه هوه مبيين تعبان جنت ناويه مااكعده الا يجهز العشه كله

جاي اقنعها تكعد وكومت يمها قباغه وخواشيك شسوي بنتي سولتها بيهن مرات شوك تضحك تكول ام بيت طالعه ع عمتها هههه

سمعت صوته جان مبحوح من اثر نومه

باصابيعه دگ ع باب المطبخ وغناها بلحن

..ول يابنت السادة لاتجعدين النايم
خدچ گيمر بصحونو يفطر عليه الصايم

ضحكت كتله هسه اركصلك لو شنوو

..لا أگلطي هان وانا اعلمچ شو تساوين تعطيني الگيمر اضوگوو

ولو اني ماخذ ع خاطري منچ
يول ماني گايل لچ انتي زايد وزنچ تگوليلي لا اگولج زايد وانتي ماصدگتي لين الطبيبه گالتلج

ماتفهمين تراني خابرج اكثر منها شساوي العگلج المو فاهم  ميزاني اضبط بكثير

ضحكت

..والله ماصدكت لمن قريت الرقم بعيوني

.. خلج مع الارقام انتي بتخسرين

..ههههه اثق بيك اني يالعمر انت

ثاني يوم رحنه الأهله نودع عمي وعمتي جانت فرحانه صدك وبيها شي متغيير بنفسيتها عاكس على ملامح وجهه

من طلعوو عمي  باس راس ام سجاد وحاجاها وعدها يرحون عمرة غير مره

وبدينه بشهر رمضان جنت اخلصه ادعية وقرءان واتوسل ربي ميرجعلي المرض
خلص الشهر وختمناه بفرحتين فرحة زواج مصطفى  وفرحة رجوع عمي وعمتي
وفرحتي اكثر من شفتها جايبتلي گلادة ذهب وسوار ونفس الشي المريومه  مافرقتني عن بناتها لا اني ولا ميثه
حاولت انسى الراح هوه صح مينسي بس ماابقي حقد بكلبي يظل مجرد ذكرى ومرات اليبعد غلاه يزيد
من اجيهم كل فتره من بيتي عمتي صارت تشتاق وتخابر وتسأل خاص مريومه سوالفها حلوه وحببت نفسها من تروحلهم متوكع من ادينهم وهيه وعبود تلعب وترتاح يمهم اكثر

صارت تجبرنه نروح واذا مااروح بسبب امتحان عندي او دوام اووديها تتونس  وابوها يجيبها

ميثه صارت حامل وبقت ع اهتمامها وترتيبها الحمل مااثر بيها وغيرها بالعكس صارت احلى وجراح حته سفراته قللها صار للضرورة يسافر 

مرت الأشهر  سجاد قنع حبيبته وراح خطب وصارت اله

وشوگ جانت بشهرها
قنعتها تجي يمي حته العصر نكمل باقي تجهيزاتها كالت باقيلي شي قليل
خابرت عمي ياسر وكال اني  هسه اكلها تتحضر بس خلي احد يوصلها الج كتله اني اخابر ركاد يجيبها بطريقه وصدك جابها الضهر اتغده ورجع الشغله
حيل يفرح بجيتها

بقينه للعصر منتظرينه يجي ياخذنه نجهز

شو وجه شوگ اتغيير حسيتها مو مرتاحه

كتلها شبيج كالت تقلصات

اجه ركاد اخذنه جهزنه ورجعنه
احنه وصلنه البيت بعدني ارد اذب شالي
وشوگ صاحت اخخ بصوت عالي

كتلها شنو ولج تردين تجيبين

كالت واحنه هناك بده الألم يزيد  عندي بس استحيت اكلج استحيت من ركاد

ولج هيه بيها مستحه

گامت ماتگدر تخفي صرخاتها طلع ركاد من. الغرفه بدون مايفهم شي اخذ سويجه وكال جهزيها انا راح اخابر امي اتجهز بطريكنه انمر عليها

بسرعه لملمت الغراض ورحت وياها بس خايفه حيل ومرتبكه مامتعوده ع هيج مواقف ماشايفه احد بس اتذكر روحي وهم جنت بعالم وحدي وخايفه بس شوك اشجع مني جانت من شافت ركاد يسوق كتمت صوتها ماطلع ابد
وظل هوه طول الطريق عين عليها وعين ع الشارع 
گالها هانت يخيتي الله معاج لاتخافي

اخذنه عمتي ام سجاد وخابرت حبوبه لحكتنه ردنه منها الجنسية مالت شوگ
رادوها

شويه واتصل بيه عمي ياسر جان قلق يسأل عليها كتله دخلت صالة الولاده مقبلو احد يمها

بس كالن هيه قريبه ولادتها لأن من زمان حاسه من الصبح ومحاجيه

اني كلت هيج وهوه اتخبل ليش متحجي ماتخاف ع روحها شلون تخاطر هيج
كتله ماتعرف شمعرفها عبالها عادي هيج اوجاع وبعدهي مو هسه ولادتها حاولت اطمطم چفصتي

ظل طول الوكت ع التليفون والدقايق تمر بسنه
الحد ماصاحو بأسمها وصار صادق
عمي ياسر كال سموه صادق رغم الأتفاق جان عمار
طلع متحلم قبل بيوم بعمي صادق ناطي الشوگ هدية
وعمي ياسر جان خايف من الحلم عباله شي مو زين بس الحمدلله الله سهل عليها و سمه الولد صادق
بيومها طبلنه ب3 بالليل اول يوم بتت يمها ابيتها

بعد سنتين ونص من هاي الاحداث
والمتابعه والالتزام والخوف والقلق
منتظرين اخر تحليل واخر اشعات وسنوارات تحدد الأورام اكو او لا

جنت احس روحي مثل الي مجاهد ومنتظر يرفع رايات واعلام النصر بارضه الي جانت بأيد العدوو

جنت مثل واحد يقرا ويدرس بجد ومنتظر نتيجة تعبه

جنت احس مثل احساس الي واصل الأخر الجسر ومنتظر يعبر هالجسر بخير وصل للاخير ومتحضر لانهياره بس اكو بداخله امل يكمله للأخر

هذا اليوم الوحيد القررت بي مااروح واستلم نتائج ماعندي ذيج القوة رغم هوه حاله حال التحاليل القبلة بس يمكن لأن هوه الفاصل بين اليكون او لا يكون

بقيت ابيتي وقلقة وحته اهلي يمكن مثلي واكثر اليوم الوحيد الي محدد منهم اتصل بيه غير كميل الي جان يهديني ويلومني لأن مارحت بنفسي حته مصطفى ماحاجاني لأن يعرف مخاوفي كلهن حجيتهن اله قبل يوم

اجه ركاد اول ماانفتح الباب احس گلبي انخلع من مكانه خايفه حيل وعيوني تحجي خوفي
بس فتحت  الباب الداخلي شفته فتح ادينه وضحكته طاغيه ع ملامح وجهه

رحتله ركض زرعت روحي بحضنه ودي ادخل بين اضلوعه جنت اسمع دگات گلبه الي جانن يدگن بصورة مومنتظمه تتراقص نبضاته
باسني براسي ومسح دموعي جانن دموع الفرح حسيت بفرحته وعرفت النتيجة قبل ليگولها 
مسح دموعي بأبهامه ونزلت منه دمعه مسحها بنفس الابهام

..الحمدلله ربي ماگصر معي وطيبلي رويحتي
الطبيبه تكول ماكو اي خوف بعد وحته مناعتج ممتازه

..يعني عادي نفكر بأخوو المريومه دخلت بالرابعه خطيه وحدها
جان هذا اكثر موضوع ابالي افكر بمريم اذا طبت مااخليها وحيده اكثر

..تعالي نقرر مانفكر وبس

مسحت دموعي وضحكت

.. ركاد فرحان

..الا طاير من الفرح ..مافي خوف بعد خلص يالعمر انتي لاتفكرين بشي مو زين رحلة وگضيناها سوا وكنا كدها امتحان ونجحنا فيه

..الحمدلله

بيومها الكل باركلي واجو البيتي اهله واهلي
اتحسنت علاقتي بيهم عمتي ام ركاد هند كلهم يحبوني اخوان ركاد حيل يحترموني بالمقابل اني حيل احبهم واحترمهم
كبرت ويمكن السنين المرت قليلة بس انطتني عمر صرت افكر بعمتي
أم مكسورة مهما كابرت بس جانت مكسورة من زوجها وهالشعور صعب
متعلقه بأبنها هواي صح اذتني وغلطت من ربطت انتقامها بيه بحكم حبني تصورتني مثل ام سجاد مو من بيئتهم ولا عندي اطباعهم اتصورت خطفت ابنها منها مثل ام سجاد المفروض جنت اتحمل واحتويها من طلعني ركاد ابيت ماكان لازم اقاطعهم كان

المفروض ابيين الها نظرتها غلط اني مو مثل مامتصورة وهيه اكتشفت ابنها ميتركها ركاد ولايوم يمر اذا ميشوفها حته لو مريض تعبان يروحلها ويشوفها يلله يرتاح

اتندمت ع ذيج الايام الي ثبتت بيها ع نفسي اني غريبه
صح اني ماغلطت بس المفروض الخاطرة احاول
وره فتره اتصلح كلشي صح وهسه همه اهلي وناسي وعمتي حيل تحبني وتحمد بية
وهيه بعد مااتصالحت وي عمي يمكن اتصالحت وي  نفسها حيل اتغيرت للاحسن

الحمدلله اعتبر حياتي حلوة رغم كل الي صارلي واني انسانه محظوظه وي زوجي واهله

بيوم صادف سابع محرم جنت حامل بشهر الخامس
بأبني

بهذا اليوم اترجيت ركاد اطبخ وي حبوبه ابيتهم من تزوجت ولاسنه رحت يمهم ماچان يخليني
وصدگ وافق وقرر هوه ومريومه يباتون ابيت عمي ابو جراح
ثاني يوم بالتوزيع
ماطلعت اوزع مثل قبل ميقبل اكيد واكوو من يتكفل هذي المهمه صرنه اني ونبراس بس نتذكر بعد مااتزوجنه وكبرو الجانو صغار وصار مسؤليتهم التوزيع
بيومها  مصطفى كلي رجلج وبنتج ابابهم واگفين
گتله الله عليك اني اخذ حصتهم
قبل وديت مواعين هالمرة اخذت جداري
بيدي ومشيت مسافه من شافني ضحك

گتله هذا ثواب للامام العباس من بيت العلوية

..گال عساه واصل  بيت من كلتي ؟

جان يحجي ورافع حاجبه ويضحك يجاريني ب كلامه

..من بيت العلوية

..وش اسمچ يبنت

..مرام

..عز انچ ع المرام

ضحكت

..يعني مناسيها

..وهذي تنسي طلعتي انتي هم مو ناسية

..وعشقك ينسي دتعال فوت اخوي جاي يراقبني هسه يكول شبيها هاي شو صدكت روحي وخفت من نظرته عبالك مواعدتك

ضحك عليه واشر المصطفى

..أگلط هان اسمع اختك

دخلت جوه خفت لايحرجني

هذا الموقف رجعت بي بذاكرتي الأول لقاء كان بينه
كانت احلى واجمل صدفة تولد منها اجمل عشق

عشق البدوي

النهاية ..

2019/1/6