رواية عشق البدوي الفصل التاسع والثلاثون 39 - بقلم نور الشمس

مساء المحبة ❤

اشكر صبركم

واشكركم على دعواتكم الي والاطفالي ربي يحفظكم ويعافيكم ويحفظ احبابكم يارب

البارت ٣٨٥٠ كلمة اتمنى مااكون مقصرة

…………………………

اجعلي ثقتك به اكبر من كل شيء اخر....
حتماً ستحيين سعيدة ومطمئنة...🌺

وصلنه اهل العروسة
چانت حلوه خمرية لاسمره حيل ولابيضه
لابسه فستان وردي وشعرها مفتوح ع طوله وتاج ناعم حلوو مزين شعرها

مبتسمه وبأبتسامتها باينه عدها غمازة بخدها الايسر ضايفه الها جمال خاص حلوه واحلى شي بيها جسمها كلش حلوو ومتناسق وي طولها
مصطفى كلش حلوو بس هيه مقاصرة تلائمة بجاذبيتها هوه جميل وهيه جذابة

حبوبه وهوساتها وامي وهلاهلها واني الي احس گلبي مليان فرح
گالوو راح يبدون العقد والي يعقدلهم. عمي برير
بدت مراسيم العقد نسيت كلشي صارلي وكلشي افكر بي وبالي يم صوت مصطفى واخواني وفرحتهم
كمل العقد وعلت اصواتنه بالهلاهل

اتذكرت ركاد وصاني انو هوه بالباب برة وحذرني يسمع صوتي مغنية لو مهلهلة

جاوبته كله الا عرس صوفي اني اصلا منتظرته وبوكت شدتي وخوفي من شفت عيونه الحمر من. اثر بجيه عليه گلت يارب طول عمري بس حته افرح واغني بعرسة وافرحه بفرحتي وسلامتي

..اجل گصري حسك وانتبهي مافي حدا تصورك ماهي من هلج

..لتخاف نوصيهم منريد تصوير

شفته مبيين عليه متضايق حاولت اخلي يهدأ شوية

… ركاد ..ركاد… .جان صافن من حاجيته وصحت باسمه مره ثانيه گال

..هاا

..احبك

ابتسم وكال هاي الكلمة طالعة من گلبك الحين والا كيدك الي خلاك تنطگيها تبين تهديني صح

ضحكت بصوت وگتله

.. اموت عليك والله احبك احبك انت تفهمني اكثر من روحي

اتعالت ضحكاته وهوه يخربط بشعري يعني الي كلته صح اه يالملعونه ..اجل شلون مااعرفك اعرفك اكثر من روحي بعد

شكد مااحبه ومرتاحة وياه بالي يمه واحس نفسي هواي ثگلت عليه ومللتة كلش كافي خوفه علية حته من يطلع صار باله يمي واذا طلعه بعيده يوديني الأهلي
صفنت بروحي وشنو الشافه من زواجنه الهسه مراجعات واطباء وخوف وقلق تنهدت وحاجيته

..حبيبي شگد باقيلي وتخلص فترة المراجعات ترة مليت والله

..يويلي شكثر طماع ولد ادم كولي الحمدلله مليتي من شوو الي فينا نعم من الله من علينه بعطفه وين كنا وين صرنا يمرام

العلمك حته لو خلصت فترة تحاليلك اعيدهم لك والحمل بعد مانفكر فيه الا لما تدخل مريومه مدرسه نكون متعدين كل خطر

..انت مجتهد من وحدك مو كالت تلث سنين كافيه

..مافيها شي بازيد ثلاث  من عندي

ضحكت

براحتك اني المستفادة المهم هسه اغني

..غني يبوي غني وافرحي وساوي الي بخاطرج بس كصري حسچ و بيته عند اهلج مافي

گطع ذاكرتي اصواتهم راح يدخلون العريس
اشوف البنات انخبصن واحتشمن اكثر وفرغت الساحه من البنات بقيت اني وحبوبة وامي وعمتي ام نبراس حبوبة تهووس واحنه نركص
شفته من دخل يباوع بالوجوه عينه صارت بعيني ابتسم وفرح يمكن جان منتظر شوفتنه حته ميحس نفسه غريب بنص هاي العالم

دخل واشوف الكل عيونهن عليه يردن يشوفنه وعبالك عدوة خطف الانظار وصلتني ركزت بطوله الحلوو لابس قاط لونه جوزي وقميص بيجي بي نقشة ناعمه شكل نجمه  لون جوزي

القاط مفصل ع جسمه القميص لابسة بدون رباط فاتح اول دكمتين من القميص طول عمرة يضوج من الرباط ويكول احسه يقيدني وحته بحفلة التخرج مخليها بس كد الصور ويكول بس خلصت اللقطات ذبيته
باوعت
مغيير تسريحته بعد ماداوم بالجيش صار يخفف شعرة بس حاليا مخفف اطرافة ومخلي من الاعلى عالي
عيونه الملونه وشعرة الي بي لمعة شكار قوية
خجلان ويمسح عرگ جبينه
عينه ع عروسته وابتسامته محليه وجهه الحلوو اكثر
قربت عليهم حته اساعده بتلبيس الذهب

وهوه طول الفترة الي كاعد يمها يهمسلها ويكلمها عبالك يعرفها من زمان بس هيه حيل خجلانه ومتوترة

لبسها الذهب وباسها براسها وطلع من وكف كلنه باركناله
اتقدمت رملة بلبسها المحتشم وشايله ابنها بيدها باركتله وباركت الها

من سلمت عليه جان مدنك من سمع صوتها اتلاشت ابتسامته  عبالك يريد يركز او يعرف هذا الصوت نفسه الها لو يتخيله رجع ابتسم بس مارفع عينه ابد بقه ع تدنيكته وردلها السلام استأذن وطلع وكلنه طلعنه وراه
مريومه عند ابوها بس طلعت لكيتهم بالسياره اتقدملي بسيارته عمتي ام ركاد كالت ارجع للبيت وي سجاد وامه بس اني وركاد صعدنه
اشوفه كل شويه عينه عليه باوعتله مبتسمه

..كول شنو الي تريد تحجي

..ماينفع الكول خلها بكلبي ارحم لي ولچ

..لا السالفه خطرة مبينه ..عليك الله شكوو

..انتي تبيني اتحجه وبعدها ترحين تزعلين وانا فوگ حگوو دگوو..  انا المغتاض واروح واراضيج حافظج انا لاتلعبين معي خليني هادي احسن

..ههههههه لا والله مااضوج شكوو كلي

..يبنت انا كايلج سوي الي بخاطرج بس كصري حسج كايل والا لا
اجل انا  ابابهم وانتي اول مادخلتي هلهولتج جابت التايه فرگتا من بين عشرة والله
شكثر رخيصه حجايتي عندچ ماحرمتج بس گتلج انتبهي وگصري حسچ مااهتميتي ماتحملتي تدخلين ابابهم صتيتيها ماگلتي الي وصاني بعدوو واگف

..ماعاش الي يرخصك انت الغالي الماكو بغلاتك هوه اني حته ماغنيت التهيت بفرحتي واراقب صوفي وبس

..هلهولتچ كفت وبعدج فيها روحي الهلج وغني واطربي بعد مين الهامج انتي

سكتت بگلبي كلت اوو الا يطلعها من عيني مو وكت زعلاتك ابد
ظلت عيني عليه اريد افهم ومااكدر اسأله خاف يعصب اكثر

طولت واني اباوعله اتامل ملامحه بوكت هدوئة وبوكت الغضب والتغييرات الي تطري عليهن انتبهلي ابتسم

اتنفست براحه بادلته الابتسامة

گال

..اليوم لچ خذي راحتج تونسي مع اهلج خلج معهم

فرحت قبل شوية جان رافض

كتله

.. وانت

..وانا شوو اروح بيتي ارتاح تعبت اليوم ..واهلج لهم حك عليج وعليه بعد عندكم فرح الله يچثر افراحكم

..حبيبي فدوة الك تعرف الواجب دومك

ماجاوبني عينه بتليفونه اشوف هواي مشغول بي ويراسل حته السياقه ع كيف ساق سيارته
انشغل بالكتابة وصلنه اخر شي

نزلني يم اهلي ومريومه جلبت بي تبجي مااهتملها
نزلت عدلت عباتي بالباب جان كميل واكف كله اتفضل حاجاه اخذ مريومه كميل ودخل وراي
عماتي وخالاتي الكل موجودين
طابخين احنه قبل لنروح للحفلة نعرف عشاهم يمنه
نزلت وردت ملابس نسيت اوصي ركاد يجيبلي
دخلت وكلت بالليل اخابره اخلي يجيبلي وره العشه
شووگ موجوده ومريومه التهت وياها

وعمتي حايرة بشووگ وخايفه عليها حته من الي يمرن من يمها تكلهن

ديرن بالجن بتي لاتسحكنها مرت الولد حامل خية لااطيحن عليها بيمن ربحي

ضحكت ع خوفها شبيها لو عمتي ام ركاد ماخذه ربع من محبة حبوبتي الشوك وحابتني شوية جان كلنه مرتاحين

صبينه العشه والتهينه بترتيب السفره اجانه مصطفى يريد ياخذ اكل الرياجيل اول واكف وراه عمي ياسر هم ياخذ صواني وياه
حاجاني مصطفى

..مرام رجلج وين غير يظل ع العشه حاله حالنه مو عزمته وعطلته اني 

..والله ماادري شكالك هوه

..كال شغلة ضرورية بس ماقنعني عود هوه ابن ناس اجاويد واكرام عيب منه هالطلعه يوم كامل ويانه يجيب غراض ويودي وبوكت الاكل والعزيمة يروح شنو معناها هاي  طلعته مال واحد مامچهوب بيته مو مال ابن وادم معازيب
خابرت سجاد هسه عزمته وسألته عنه

استحيت من الموقف كتله ماادري والله ..جاي احجي دك تليفونه اسمعه يحاجي سجاد كله

.. لا بربك وهسه شنوو  انتوو  وين ؟ حلها شنوو هااا وين ترحون محتاج شي الله عليك والله اجيكم هسه 

حطيت ايدي ع گلبي
گتله شنوو شبيك مصطفى عيني عليه وع عمي ياسر الي هوه هم مو فاهم شي اباوع شووگ وينها ماكو اريد افهم

كال مصطفى ع كيفج  بس ذياب ابن عمه تعرفينه انتي

كتله اي شلون مااعرفه

.. اي كال وواحد ثاني اسمه منهل

…منهل رجل عذاري شبي

اباوعله محتار ويدور بالوجوه كال تعاي بغرفتي لحكيني

حاجاه عمي ياسر كاله شبيك  احجي

..شحجي يمعود ذيج مرتك بالباب عينها عليه مصيبه والله بس شوفلي طريقه اريد اطلع بدون ماينتبهون
وكت عشه مو مال هيج نخربها ابوي عازم عيب

احس عظامي كامت ترجف كتله مصطفى الخاطر الله كلي شكوو لاتخبلني ركاد وين

ركز بعيوني وكال راح اكلج بس ع كيفج لاتخبصين الكل
باوع العمي ياسر وكله

..ذياب يحب بنت خاله الي مربينها اهله وقبل شهرين رايد يخطبها من اهلها وعمامها وماقابلين ماادري شلون مافهمت المهم جايين ماخذينها واليوم زفتها البنية ع اساس الابن عمها من راجعه من الصالون كبل لاتوصل عمامها ويزفونها ع الولد ماخذها ذياب ومنهل متعرضين السيارة ابن عمها ومنزليها غصب عنه العصر يمكن وماخذينها والهسه مايدرون همه وين ناهبها من ايد ابن عمها وهاي عليها دم
المشكلة اهلها مهددين الكل اذا صبح عليها الصبح محد يوكفهم

..يبوو شنو هالسالفه شلون اخذها يعني
تعال اخذني بعد مااكدر ابقه فدوه ودوني

عمي ياسر كال خابري رجلج شوفي وين .نروحله خاف يحتاج شي
وهسه احاجي ابو كميل بلكي يدخل واسطة صلح بعد هوه اخذها يرجعها قابل اكيد يريدها مرة اله بس هاي خاف عاقدين شلون

كتله لا ماعدهم عادات يعقدون قبل العرس
هناك بليلة الزواج يعقدون بزفة العريس حته هند هيج عقدولها
صاح شوك كلها تعاي اوديج الاهلج وي مرام شوفيهم وارجعي مااخليج ترة

وجهه صار اصفر شكوو

كتلها سكتي ذياب ماخذ الي يريدها ابدلة عرسها من الصالون ماخذها هوه ومنهل

..عزه بعيني منين اجت هالسالفه النه لايامخبل يذياب والله كال حذر ابوي وعمامي وكلهم اذا ماشفتولي حل اخطفها بس ماصدكوه

ومنهل الثاني شكو مخلي نفسه وهاي مرته ع وجه ولادة
يلله بالله هاي سالفة هاي

صبو العشه التهت العالم اخذت بنتي وغسلت وجهي وحته ماعندي ثوب يلبس يم عيالي كلت امر للبيت ابدل يلله اروح

شو بابنه مقفول من برة اكيد ركاد يمهم

من زمان ماداخله بيت عيالي واذا دخلت اظل متخوفه
الشارع مليان وكلها دشاديش بيض وغتر ترفرف محزمين باسلحتهم المنظر وحده خله جسمي يختض اما شوك نزلت عادي عبالك متوقعه هالشي عمي ياسر نزل قبلها

وراح يتفاهم وياهم
اجوو سجاد واياد سوولنه طريق
عيني ادوور بينهم لمحته وبايده سلاحه يمه احس گلبي وكف من الخوف

كل واحد بايده تليفونه ويخابر ع جهه عبالك متحضرين

دخلت جوه عمي بنفس شكلة وهيبته مدري جي اني احبه اشوفه هيج .. وجراح الي لابس دشداشة وشادها من الحزام واسلاحه بايده
صاح ركااد

بصوت عالي

..ركاد اگلط هان ابا اكلمك

سلمنه وهمه مامهتمين
ولا شافونه اصلا
ظليت واكفه بالممر اريد اسمع شيريد من ركاد

صاح ركاد مرة ثانية

اجاه ركاد

.. كله سم يخوي

..اولاد عمك وين

..علمي علمك

..للاه ماهو علمي الاثنين مايتحركون الا بشورك كلي وين حته انحميهم لايتكتلون ماهي لعبه هذ لعب بالنار وتراها راح تحركنا كلنا

..جراح وش بلاك  اشور عليهم يخطفون بنت من اهلها جاهل اني ولا عديم الرباية انا العمري ماساويته اروح اساويها بعمامي ناسي ان هي من نفس العشيرة وبنت عمنه بعد

..هاي جدام ابوك اكص يدي لو ماكنت اتعرف فيهم وين ان ماكنت تشور عليهم تدري بفعايلهم عدل 

..ايه دريت بس بعد ايش بعد ماخذوها وكلموني وهي عندم شو اساوي وشو بيدي ساعتها

..اهاا انا هذا الي ابا اوصلو الحين هم فين خلنه نحميهم

محميين لاتخاف عليهم ماحد يگدر يوصلهم

… .…

طلع ركاد واني طخت عندي مراسلاته عزه بعيني شنو حلها هالطلابه

دخلت الجوه والكل مخبوص نسوانهم هم جايات خالات ركاد  وعذاري جابوها اخوانها خاف يوصلون البيتها رجلها مشترك بهاي السالفة

الكل محتار بضيمه محد بحال احد كل وحده بالها يم احبابها وولدنه كلهم بخطر هسه

شوية واجه ركاد وصاحني
رحتله متلهفه وخايفه عليه وهوه مخبوص هم
لاف الغترة ع راسة
وسلاحة بأيده
زاد خوفي عليه حاجاني

..شو الي جابك مرام جهزي عمرك تروحين مع اهلج الحين واخذي شوك معاج

..لا والله ماروح اي مكان مااكدر بالي يظل يمك

..لايظل بالج مافي شي انا الي يظل بالي وانتي هان واتشتت روحي وخلي بالي مرتاح من جانبج وشلج بالظلة ماابيج تتضايگين مهي بصالحج ظلتج

..ركاد فدوة اروحلك خليني يمك مالك علاقه كلشي اتحمل بس اذا رحت اظل بقلق واموت من التفكير ع الاقل هنا انت قريب مني فدوة العمرك خليني 

تنهد بتعب

..كايلچ أنا  لااتفدين .ظلي بس خلج معي اي شي تبينه او احد يضايگچ رني علي ماني ابعيد عنچ

..ان شاءالله لاتخاف بس گلي هالسالفه شنو حلها

..بتنحل بتنحل هم الي غلطوو ذياب خاطب منهم وكالوله جيبها حته تاخذها عروس من بيتنا خلوها تروح واگلبوو وعطوها ولد عما الي مو شايفته ولاذاكرينها بعمرهم

عمتي ماخذتن خال ذياب ترملت وارجعت عاشت عند عمي وهي الربت بنتا ابيت اهلها والرباها عمي ابو ذياب

وهي صغيرة ماهي كبيره توها كبرانه ورادها ذياب وعمل بالاصول وخطبها من عماما بس هم العبو معوو
عاد ابو سرحان ماتنلوي ذراعوو تغده فيهم گبل لايتعشون فيه

..شو احسك فرحان والعالم مخبوصه

..اي بالله فرحان..  فرحان لانوو عمل اليطلع بيدوو واخذ الي كلبوو متعلگ بهواها هم خذوه بالحيله وهوو غافلهم
بس الخوف لاتصير دموم بين العمام نحاول نحلها والله كريم

..الله كريم ..ركاد اريد مفتاح البيت اريد ملابس

..المفتاح عندي وماني معطي الحد كولي الي تبينوو بكرا يجيج

..لا اليوم اريد

..اليوم مافيني دبري عمرك يالغلا
يلله بروح. .. وانتي مثل ماوصيتك

طلع ركاد  واني رجعت اباوع بالوجوه رغم خوفهن وقلقهن احس خالات ركاد ماطايقاتني يمكن متصورات اخذت الولد من امه
حاولت اتجاهل نظراتهن

عذاري تبجي وخايفه ع رجلها
وهنه يصبرن بيها

حسيت نفسي غريبه بينهن شوك اتصل بيها عمي ياسر واخذها وطلع

عمتي ام سجاد بالها يم ولدها وعمي والولد وكل شوية تشوفهم وماخذتها الرجفه مثلي احنه مامتعودين ع هيج طلايب

وخالات ركاد منهل ابن اختهن وذوله ولد اختهن وهنه مو مهتمات
جايات يحرضن بخالتي ع ام سجاد يكللها شكو مخليه الرجال الها

ماكلنالج مالج غير زلمتج الولد ماهو دايم كنتي تزامطين بركاد وينوو عنج ركاد الحين

وشبلاج ماتفهمين رجال وبيت مسلمتو ع الجاهز بالكليل اخذي احكوكج خلي الزلمة يلايل ليله عندج وليله عندها وخليلج كلمه وكول وشور
والا ترحين تهجدين عند اخوياچ

ان كنتي مو طايگه شوفتوو لاتظلي معوو وش الزوم الكعده هان

يحجن بصوت عالي ومامهتمات لا الي ولا الام سجاد الي تسمعهن ومسويه نفسها مو سامعه

الحد من تجرأن وكامن يحجن عن عمي ابو جراح وهيه ساكته ادخلت عمتي ام سجاد وكالتلهن

هذا حجيجن مو وكته بس اذا انتن عدجن هذا الموضوع اهم من سلامة ولدجن راح ادخل واحجي لهنا وكافي

سكتت واحترمتجن احترام الابو جراح انتن بنات عمه مو غريبات وخالات اخوان ولدي بمقام خالات سجاد مادام انتن خالات الجراح وركاد

اني لامانعه ابو جراح من زوجته
ولا هوه الناكر المعروف ومامطبق شرع الله

احتار شلون يرضيها من اول شهر من زواجي الاخر مرة رفضته بعد ماانتقلوو هنا وراحلها اكثر من مرة والهسه متاكدة منه رايدها واني مو من حقي امنع شرع الله

اجذب عليجن اذا مااكول فرحانه لا  فرحانه لان هيه اتنازلتلي بي بدون مااتعب ولا اشيل ذنب

وهاي هيه ام جراح يمجن سألنها فديوم غثيتها بتصرف بحجاية بكلمة

اداري مشاعرها حته وهيه تتصنع القوة
بعد ماجنه متعودين اني وابو جراح ع الكلام الحلوو والغزل بينه بكل مكان وگدام ولدنه

من اجت يمنه حرمته خارج غرفتنه

ابن عمجن تعرفنه خايف الله ومن تزوج ماطلع من دين محمد
خاص انتو عدكم عادي واخوتجن كلهم مثنين وبيهم تلاثه متزوجين

مااقبل ع اي وحده تحجي وتتجاوز بحق رجلي وابو بيتي مهما كانت الاسباب خاص انو الظرف المجتمعين بي مايسمح الهذا النقاش

وهذي ام جراح يمجن وقنعنها تقبل بي من الليلة
واذا تخجل منه او تحس تنكسر صورتها وكبريائها اني اتكفل الها اخلي يوصلها واكله اني قنعتها حته ارضي ربي عني
وماااحس اني سبب بخراب بيت

وفعلا اني رايده هالشي بس حته نفسيتي ترتاح رغم النار الي تشب بصدري من اتخيل الموقف بس غصب عني اتعود وهذا حقها وحرام شرعا الي جاي تسوي جاي تمنع زوجها من قربها تتحاسب ع هالشي يم ربها
بالنسبه الي سويت العليه حته ارضي ضميري وبس لان اني ممسوية الحرام بزواجي منه

اتفاجأت من قوة شخصيتها وشلون خرستهن
وصارت عمتي ام جراح تعتذر لها نيابه عن خواتها وتأكدلهن كلامها انو كل الكالته صح وهنه يعرفن الخلل بيها متكدر تتنازل او من كثر حبها اله طلع من عينها وگلبها

خواتها حاولن يعتذرن انو مصير اختهن مجهول وهسه بعدهي عمرها يسمحلها بعد سنين تكبر ومحد يهتملها
عادت عليهن فكرة ترجع تعيش حياتها عادي
والي فاجئنه حجاية عمتي ام ركاد

كالت بقوة وحزم بينت قوتها بحدية شكد تحب تبيين نفسها قوية وشامخة
ولاتسمح الاي موقف يضعفها ويبيين عاطفتها
جاوبت

..ماهوو وكته الحين تنحل هالطلابة وانا اعيد حساباتي واگعد مع ابو جراح واتفاهم معوو

الحين خلونه بمصيبة اولادنا

صفنت يمه شكد قويات وفكرن بهالسوالف هسه

بس يمكن عدهن حق شافن هالبيت وكلشي بي عبالهن يبقى بس الام سجاد ويجي يوم ويطردها عمي لا انوب يكللها جنتي تزامطين بابنج اكول حاقدات عليه

جتي افكر وحاجتني وحدة

شوفي زلمتج وين وكوليلو شو صار ماحصل خبر منهم

..ماكو شي الحد هسه قبل شويه حاجيته بس يكول ولدنا بامان

..ولدنا ماينخاف عليهم خوفنه من ال شاهين
يتهورون ويتعدون على ولدنا الي هان  وتنشگ الكبيلة نصفين

سكتت ومااعرف شجاوبها شمعرفني بالكبيلة مالتهم وال شاهين منوو

ماسامعه بكبيلتهم بس وكت مايحركها ركاد من اكون مفاجأته بشي معيين بوقتها احس روحي صدك عاجبته
كتمت الضحكه كوه خرب مو وكتها هسه والله يكومن عليه يفترسني

مريومه بدت تبجي متعوده ع مكانها

حاولت انومها ماگدرت

صاحتني عمتي ام سجاد كالت اصعدي نامي

..لاعمه مااريد انام ابقى قريبه الركاد بلكي يبين خبر

..نامي اكلج لاتخافين ركاد عنده علم ويعرف بسوالفهم هسه يطلع نص ترتيب الخطه عليه

..شهكت بخوف لاعمه فدوم لاتكوليها

..والله شبيج بس لاتخافين هوه عاقل ويتصرف بحكمة بس اني شاكة يعرف لان اعصابة باردة حته ابو مامتوقع برودة اعصابة بهيج موضوع

لان قبل يومين هوه صوته كل شويه يعله ع عمامه وجراح من كالوله مو من حق ذياب خلي ياخذوها عمامها نسوان غيرها وخل ياخذ

..عمه هيه شنو السالفة مافهمت اني

..عمه هوه حب بت عمته الي تصير بت خاله ابوها مات وربت عدهم امها كعدت عليها مااتزوجت البنيه توها شابه حلوه بس ذياب عاشكها وطالبها من ابوه ابوه كايله الاصول تكول نخطب من عمامها

راحو خطبوو من عمامها كايليله الك وتستاهلها وماتصير الغيرك وهيه بتكم وانتو ربيتو بس جيبوها عدنه نشوفها وحته تاخذونها من بيت اهلها
وصدك ابو ذياب موديها
ومخابرهم ع موعد العرس كلبو عليهم وكلولهم انطيناها الابن عمها والبنيه رضت

هذا ذياب اتخبل اذبح واصلخ كالوله عوفها واخطب غيرها ماقبل وركاد ساندة بس ماادري منو الي موصله بسالفة عرسها البارحه اكيد واحد وصله همه عمام

..خطيه واني لمت ذياب بالبداية بس عنده حق اذا هيج

..والله عمه ماادري بس الله يستر اخاف ع الولد اني

..والله اني هم خايفه الله كريم

طلعت من غرفة عمتي رجعت الكعدتهن

اسمعهن يكلن العمتي كنتج تشافت  من السرطان لو بعد ان بعدهي ماشفت سنتين وخلي يتزوج يخلفلوو ولد وشوفيها گريبه من عندنا حرام زينة ولدنا تروح للغرب

احس گلبي انخمط من كلمة السرطان هالشي الي سالب راحتي خاف يرجعلي ويكون اقوة جان ابداياته عندي وبقوة الله اتشافيت  حته احروفه بدماغي مااريد اذكرهن من افكر اكول المرض صعب حته اسمه اذكرة

واكثر شي قالقني ومخوفني خاف يجي يوم ويمل ركاد مني ولو هالشي مستحيل بس جائز يفكر يتزوج غيري يمه اني اموت الف موته من افكر بزواجه واني ميتة اكول يجي يوم يكول هالكلام الغيري الرجال مهما يحب اذا اتزوج يتعايش وكميل خير دليل
مو عاد يتزوج واني عدلة غير ينكتب موتي صحيح

دخلت وظلت عيوني عليهن فهمن اني سمعتهن
ماادري شنو الي خله عمتي ام جراح  تحجي وتسندني بكلامها يمكن لان مجربة كسرة الزواج

او يمكن لأن ابالها  اني مريضه وتكول خاف تموت ع الاقل تذكرني بخير

ويمكن تخاف احجي الركاد وتخسرة

كل هاي يمكن اسباب خلتها تدافعلي بس اكيد مو محبه بية 

گالت

..لا الله يشفيلوو مرتو وتخلفلوو صبيان وبنات وتملي داروو  مايتزوج عليها ولاتضوك لوعة الضرة ان شاءالله الي فيها كافيها

غوركت عيوني باوعتلي بحزن وكالت

انتن ماتعرفن شي الي اعرفو هي فرحة ولدي وانا ماريد غير فرحتوو

مير انا اظل ام وگلبي يموو ودي يكون مصبحني وأمسيني الله يسعدوو ان كان جنبي والا بعيد
حنا نربي ونباري ووكت الحصاد محصولنه يروح للغير 

فرحت وضجت نفس الوكت واجه ابالي يمكن لان شافت حالة ركاد بمرضتي وتعرف بي يحبني صدك حبت تدعيلي

بس اني قابل مانعته حته هوه ابد مگاطع عنها ورغم ابو جراح ينطيها مصرف وممحتاجه بس هوه ينطيها واني دائما اوصي سمعانه من بيبي انو الأم شماتكون عدها تظل عينها ع الولد القليل منه يفرحها

اتشكرتها وابتسمتلها بدموع كتلها عمه ارضي عنه وعني وادعيلنه وربي يتقبل دعائج ويشافيني ابركة دعائج للابد

والله احبج المحبة ركاد واعتبرج مقام امي الله يشهد

جاوبتني بتعب

..الله يريحكم ويفرحكم ويحفظج ويحفظ راعي بيتج وبنتج

كالن الله يشافيج يمه وظلن يسألن ع التحاليل واخذت كيمياوي لو لا واكو نتيجه احمل بعد

جاوبتهن انو اكدر من هالشهر احمل بس تضعف مناعتي ومو من صالحي حاليا وبنتي بعدهي صغيرة تلث سنين اصبر والله كريم
حسيتهن مجامله سألني او دافع فضول بس ابد ماكو بعيونهن نظرة عطف ومحبة

مااعرف ليش اقارب الولد من يشوفن ابنهم حب وحدة وارتبط بيها بقناعته واصرار منه يشوفونها ند الهم وعدوة عبالك ماخذته منهم لو بايگته

شويه وصارت اصوات جوه عبالك ركضة الولد اتحولت هنا

اصوات عاليه ومصايح وكلامهم صعب افهمه خاص كلامهم كان بصياح وسريع

قربت اكثر اني وعمتي وعذاري نريد نسمع

عذاري ابد ماجمعتنه صدفه بعد الي صار بس اليوم من شفتها كتلها ربي يهديهم ويسلملج زوجج

ردتلي السلام مالها خلك جانت هادئة وخايفه
ويمكن خجلانه من موقفها وياي مامتصورة احاجيها واهتم الزوجها ويمكن عبالها اشمت بدموعها بس اني وين حيل انقهرت عليها ايام ولادتها هاي واجتها سالفه مو ع البال

سمعت اصواتهم
علت

عمي ابو جراح گال خابروني وكالو ولدكم عندي تعالو نتفاوض وتاخذوهم بس وحدكم انت وابو ذياب وبدون اسلاح

وركاد يكلهم يجذبون ويدرو بالكم تتحركون

جراح يكله اذا يجذبون انت تعرف مكانهم ومسؤول عنهم علمنه وينهم وخلنه انتصرف

جاوبه ركاد

..انا اعرف رايكم تبون تردون البنت وماعلمتكم العصر الحين ظلم عليها الليل ومادام تحت جناح ذياب تكون صارت حرمتوو
وماتكدرون تردوها خلوها للصبح باكول لكم

عمي عله صوته ع ركاد وكله شليت حالنه مانردها والله الي خذاها من ايد ولد عمها ماتنرد منوو لانو بايع روحو عشانها بس ريحنا وكول هم وين

..في بيتي وعقدوو بشهود وامها معها بالبيت ماهم وحدهم

صدمة يمه عزه بعيني هنا يمنه بس لايكتلون ركاد ع ابو ساعدهم

اصواتهم هدأت وعمي كال يعني لو ساكت مثل ماطالبين مني وماكايل لكم ناوين ياخذوني انا وابو ذياب يلوون اذراعكم فينا

لايالرداية ماحنا خطبنا ووجبناكم من اول
فعايلهم ماهي فعايل ارجال

جراح كله باجر ناخذ لهم ابياض وجها وننكل لهم مشايخ ونشوف حلها

بس انا من الحين اكلكم تراهم طالبين منكم حريم

جاوبه واحد صوته خشن

كله هم ماهم غرب خلهم يطلبون وبناتنه جاهزات بس بمهر وزواج اصولي ماياخذوهن جواري

اتفقو ع هالشي

ثاني يوم راحوو الزلم وشويه وصوت رمي بالباب طلنه نباوع من الكبار طلعن واحنه من الشباك

اشوف الخرفان انذبحت بالباب ودخلت بنية صغيرة ناعمة بس عيونها حادة وقوية

وراها مرية بعدهي ثلاثينية

ودخل ذياب وراهم

ذياب اسمر طويل شعره من الغترة ومبيين طويل
عيونه سوود رموش وحواجب كثيفه
بس شكله مبيين ابن عرب بس ينهاب وحلوو

اتذكرت ركاد ليش وكفله مسولفلي عنه اكثر واحد واكف الركاد وكايله لو تمل الدنيا منك انا ماامل اطلبها الك ومن ماصار بالطيب ناخذها غصب

بوكتها حقدت عليه وجاوبت ركاد بكيفه هوه ياخذ غصب

غير عمامي تارسين الشارع وولدهم وكلش كافي عمي ياسر وكميل عليه مستصغرنه شنوو

بوكتها ضحك عليه ركاد يكول يولي اتحرك الدم حگج عز الله ونعم من هلج ماهم يتاخذون بالعين الصغيرة
بس انا اخذتج وخليتهم يرضون كوة

بعد ماهداني خلاني اطفر هههه

دخلت البنت وانترست الخطار زلم يردون يرحون
وذياب يكلهم انا معكم وعمي وابو رافض

بس هوه اصر انو محد ياخذ بياض وجها غيروو وهوه الي يشهر بي ويطلعه كدام عمامها ويحلها

بعد اصرار منه وافقوو

واتحركت السيارات

شووگ..

خايفه وقلقه ع وضع اهلي وعمامي بس جنت مطمأنه يحلونها بعقل مهما كان اعرف عمامي مو من طلاب الدم وهمه اهلها من عمامي مو غربه

من رجعت من اهلي رحت البيتي جان بيومها ياسر نازل علمود العقد
تفكيري باهلي ضيع فرحتي بجيته وبقيت افكر بالليل هوه زعل لان مااهتميتله وغليت ع قربه مني
هوه ضاج واني مو بيدي

وثاني يوم كعد يدور العركه دواره
كل شويه يريد يتعارك
عرفت السبب وغلست عنه

وبالي يم الكعده وشنو الي صار
بعد ماخابروني بعد الكعده وشلون صار حلها فرحت
طفرت ناسيه حملي الي اتحججت بي وصحت

..الحمدلله  يرادلي احتفل واركص

حاجاني ياسر رافع حاجبه وماعاجبه ابد وده يكوم يموتني يمكن

..ياالله وراج احتفال شدي وصلتج وكربي عليه

..ضحكت وخرت شالي وشديته

اريد ارضي بطريقتي

..لا كلش تعبانه  ماصدكتي ترگصين  ناسية حملج انتي ولو حاجيتج لو اجيت يمج كلتي اخخ ظهري
انت ماتحس بية
هسه شديتي وصلة شكوو

يحجي ويقلد صوتي

كتله

..غير انت كتلي شدي

..وانتي جاهزه بكل وكت هيج متزوجلي رقاصة اني عندج جينات من ملايين تكربيلها

..عكدت حواجبك هاي واستجوابك الي جاي اتبيين نفسك ضابط ترة اعرف انت ضابط لا اطبقهن علية كل ذني ميضيعن فرحتي

..السانج هذا يراد اعضه حته من تحجين تتذكرين شگلتي
اريد اعرف شنو مفرحج

..اخواني رجعوو بالطريق حالين المشكله

نسه ضوجته وجاوبني بفرحه

..ها الحمدلله ع الخير وشلون حلوها

..مااعرف والله

..ماتعرفين بس عرفتي تحضرين الوصلة هز ايده ومشه يخابر
واني قررت افتر وراه وهوه يخابر وارضي بطريقتي

يتبع ..