رواية عشق البدوي الفصل الخامس والثلاثون 35 - بقلم نور الشمس

ياويل قلبي كيف تلوع

بعشق تلك العينين

ذبحت قلبي قربان لهما

كيف أكون وحالي معك

كأني أعيش قصص عاشق

بجنون

يامعشوقتي

متيم انا بك

كيف أتماشى مع فكرة

فقدانك

كالطير أذبح

لو حاولو ان يبعدوك

أشتريت قربك بكفني

ومستعد للموت

بكِ اكون

معك أعيش

بقربك أسعد....

كالطفل انا أتوه بحنان أحظانك

معشوقتي

تعالي قربي

أدفني نفسك بجسدي

انتي سجينتي وانا سجانك

اهوى تعذيبك

بأسالب الحب

المختلفة

شمك تقبيلك ضمك

اتوه فيكِ

كيف تكون ايامي دونك💔

للحبيبة المبدعة user32967927

…………………… .........

مرام…

اول يوم احس نفسي بغيبوبه فاصله عن كل الي حواليه بنتي اهلي حبيبي حته نفسي
احس بفراغ خوف قلق وحشة

كأني بطريق مشايفته ولا اعرف منين اكدر اطلع منه ووين اروح ابقى لو ارجع
الحد الليل
انتبهت النفسي بنفس فراشي

من سمعت بنفسي مريضه صرت احس كل جسمي يوجعني
يمكن نفسيتي الي تمرضت مو بس جسمي

بس اسمعت صوت حبيبي كان تعبان حاير يسكت مريم ويتصل بتليفونه شدتني مكالمته وي جراح هوه اباله اني نايمه
بالحقيقة اجاني قبل دقائق اتظاهرت بالنوم حته ميشوف الضعف بعيني حته مااحس بخوف ممكن افقد هالنظرة ووجهه الي يسعدني

احس السنه وال الثلاث اشهر
مرت حلم بيه بمشاكلها بتعبها بفرحها
چانت احلى ايام عمري

سمعت صوته يحچي بنبرة مكسورة
حاولت اقوي نفسي اني مؤمنة ليش الاستسلام
عندي انسان يحبني عائلة بنت يستحقون اقاوم كلشي علمودهم صوته المتعب الحزين  وهوه يطلب من اخوو فلوس للمراجعه والعملية  لان الي عنده مشتري بيهن مجموعة سيارات جديدة للمعرض قبل فترة غير المشروع الي دخل بي وي سجاد بيع ونصب الكامرات
سجاد عجبه يسوي شغل النفسه  حته من يخطب يكون عنده شغل خاص بي وركاد دخل وياه شريك بس حته يسنده ومن يتمكن وشغله يمشي اذا يريد يستقل براحته

نزلت دموعي واني اسمع اتصاله

كل الجراح

كلها ايام ويرجعن لك بس هسه محتاجهن ضروري انا اخلي سجاد يعطيهن لك لما يكون بيع الوارد لك

والظاهر جراح استنكر كلامه وكله احنه اخوان وسند وكلشي بسيط اهم شي تتعالج

فهمت كلامه من رد جراح يكله ربي يسلمك صحيح اهم شي سلامتها ادعيلي وادعيلها

خلص مكالمته واحتار بمريومه الي تبجي وماسكتت
مسويلها الحليب ويمها العابها يحاجيها

..يعمر ابوها گوليلي ليه تبچين شحلوچ كل يوم حته علاجچ عطيتج .. تزيدين تعبي والا انتي حاسه فيني وتواسيني بدموعج

امچ تعبانه اندعيلها يبوووي عسا الله يشفيها لجلج

..طلعتلهم رسمت ابتسامه ع وجهي رغم دموعي الي فقدت السيطره عليهن

نظرة عيونه اتغيرت من شافني احس بيهن هواي حچي صعب ينگال صعب ينشرح صعب انبوح بي حته وي انفسنه

ابتسمتله بشووق صرت احس كل وكتي اني مشتاقتله هوه يمي واريده دوم قربي راح افقده وافقد كلشي حلوو وياه
ماادري همه الي يفقدوني لو اني. الي افقدهم 

من اروح يم ربي ابقى بحاجتهم ابقى اتمنى شوفتهم

بادلني البسمة بنفس الالم والخوف

..يفداچ ركاد ..اشريها بروحي هالبسمه والله

زينه انتي ليه كمتي من فراشج ارتاحي وانا اجي جنبج

..اريد احجي اخاف اشهك واخربط كلشي ويبيين ضعفي وتنهار حصون القوة الي محوطه نفسي بيها
بس احس اسوراي ورق مقوى مو جدار صلب
هذا احساسي حاليا اريد قوة اريد عزم هذا المحتاجته

اشرتله براسي مابيه شي

..طييب ارتاحي كلميني ابا اسمع صوتك لا تخافي والله حته كميل كلمني كل شوي يبا يجيكي يشوفك وكلتلوو نايمة كال  خلها ترتاح باجر اشوفها
يگول سهله لاتخاف ولاتفكر ماكو شي مالو علاج

يحچي وياي ومحتار بمريومه يسكتها
گتله واني امسح بدموعي

..الحمدلله ع كل حال عادي حته لو اموت بس اني اشتاقلكم انت ومريم واهلي شهگت

اخذني بحضنه من قوة الحضنه حسيته يريد يخليني بين ضلوعه
سكتت من سمعت شهگاته علت
صعبت عليه دموعه حيل وعبرته المخنوكه اثرت بيه

رفعت راسي اله مسحت دموعه وبسته واني امسح دموعي واضحك

..حبيبي تعرف شنوو احلى شي صار بدنيتي؟
انت احلى واجمل هدية من ربي

الحمدلله حته لو متت ماخسرانه واني مجربه حبك ودلالك وخوفك وحرصك عليه عشت ايام وياك غيري يعيشون عمر ميشوفونها

اختلطن ضحكنه وعبرته المخنوكه وجناته المبتسمه اتببلت بدموعه

..يبعد العمر انتي ..كل شي ساويته مايجي جنب الي راح اساوي لجلچ والله لعيشج اميرة بنص گلبي وبيتي مرحلة تمر علينا انتحملها بعزم وقوة وثبات
ونكون واثقين من الله بيعينه والله عند حسن الظن
وينوو ايمانج وينها قوتج ابا مرام الي اعرفا وينا صلاتج اليوم كلوو وانتي ماصليتي ليه يالعمر
تاكلين والا تصلين اول

..هسه اصلي بس انطيني مريومه شبيها ماما ليش تبجين حبيبتي

..والله مو عارف كل يوم شحلوا وهي عندي

اتذكرت ممغيره الها وهوه ناسي هذي الفقرة صح يساعدني بيها بس اكو امور مينتبه عليها اي اب
وهذي اول الصعوبات الي راح تواجهكم هواي امور تحتاجوني بيها واني مو يمكم 
مااريد ابجي بس هذا الموقف رغم تفاهته خلاني احس بيهم بدوني شنو حياتهم يبقون هيج لو يضطرون يلكولي بديل

اخذتها غسلتلها ضحكتها بوجهي انطتني امل بالحياة
رفعت راسي عيونه تراقبني بخوف وشغف

بداخلي اردد اني قوية عندي ايمان قدوتي بالحياة  السييدة زينب هذا دوم احساسي قابل بس كلام لازم اقتدي بيها واشعر بانتمائي الها من خلال افكاري ونفسيتي

السيدة زينب فقدت كل الاحبه وفقد الاحبه. فقد الاحبة اصعب من المرض ومواجهة الموت نفسه

كل البشر يموت اذا مريض واذا صاحي
اهم شي الخواتيم دعيت ربي يحسن خاتمتي

غيرتلها وغسلت الها ضحكت ورجعت تلعب وتريد احد يلاعبها خليتها مقابيلي ودموعي متوگف رغم القوة الي بداخلي زين الدموع ليش

مسحت دموعي ماااريد اعذبه صار يومين منايم

گتله حبيبي لاتخاف الله كريم
نام ارتاح ورانه سفر

نامت مريومه شالها لسريرها
رحت صليت ودعيت بجيت وشكيت ضعفي الربي حسيت بطاقة وقوة بداخلي
كملت وصرت اسبح بتسابيح الزهراء عليها السلام
عيني عليه عيونه متفاركني لميتها وابتسمت اله اريد اريحه ع الاقل ميشوف خوفي

قرب عليه
اخذني من ايدي طفه الضوه
اخذني نومني بحضنه اتمنيت بيدي اكدر اوقف الزمن ولهنا وتوگف ايامي مااريد افكر بعلاجي والتغييرات ولا ممكن تنجح العملية او لا ممكن يقضون ع الورم  لو ينتشر اريد انسى كلشي وبس حضنه الي ينسيني

تنفست براحه حسيته باس راسي وجبيني ووجهي واتحولت بوساته الكل وجهي وحته ايدي حسيت ابلل ورجفه بجسمه عرفته رجع يبچي  ادري بي يحبني حته اكثر من نفسه وحته اكثر مما اني احب نفسي اتذكرت قبل يومين شلون اذيته بالكلام
مرات من نعصب مانعرف شنكول
يكولون بوقت العصبيه البشر يحجي الي بداخله بس هالكلام مو صحيح
مرات من. كثر الضغوطات نحجي حجي بس حته نغث المقابل ونريح ارواحنه بدون منفكر بتبعاته

متاكده هوه اكثر واحد يتأثر عليه
اعرف متعلق بيه الدرجة اني مو مستوعبتها

مسحت دموعه وصرت اني الي ابدد خوفه واذكره بالكلام الي گاله الي قبل ساعه
القوة. والعزم والثبات الايمان بالله 

جله صوته

وگال

… تعرفين شي چنت اجيج الهلج اتقدملج وانا متأكد يرفضوني واگول اتحمل بس مااشوفها تصير الغيري
يوم اسمعت بخواطيب جايين لج بالصدفه اسمعت

ماخلولي اهلچ خيار غير المكاون
رميت وتعديت وانا ماخذ الكفن معي
وگلت ياتعطوني وياتكتلوني
واهلچ كرام وعطوچ

الحين انا اكاون الدنيا كلا عشانچ واذا گبل عطيت الهلچ كفن هالمرة رگبتي اعطيها الربي بس لايردني
وانا واثق ومتأكد مايردني هلج ماهم اكرم من الله

لوو ينفع البدل يرويحتي كان بدلت كل الم وخوف بتحسين بي كان شلته عنچ وانا المرتاح

كلامه حيل اثر بيه وحسيت بشعور صعب وصفه

…ركاد اريدك اقوى من هيج واتوقع كلشي كمل حياتك وعيش طبيعي واتزوو

بعد ممكمله خله ايده ع حلگي وباسني

..كافي نامي ارتاحي

..نام انت اول انت تعبان

..نامي وانام معج
الليل كله كل ماافز الكيه صاحي ويتامل ملامحي
احس بادينه بخفه تتحسس ملامحي

فزيت بالليل ع صوت دعائة لكيته ع المصلاية يدعي
كمت صليت صلاة الليل ورجعت نمت
وبعدها كعدت الصلاة الفجر وبقينه للصبح كاعدين
طول الليل هوه مانام ولا غمضت عينه
بس اني چنت متفائله
وخوفي اقل گال جهزي عمرج يالحبيبة كميل على جية

كتله مااريد اهلي يعرفون فدوه ركاد يتاذون ومااريد اشوف حزنهم
وفعلا بداخلي احساس وخوف صعب اشوف الخوف والحزن بعيونهم صعب اكون سبب بحزن احبابي
يمكن اني مو مثل غيري بوقت مرضهم يردون امهم اني مااريد اضعف من اشوف خوفها وحزنها
احساس كلش صعب من خليت نفسي مكان ركاد شفت حالي ارحم من حاله بهواي ولو هوه اسم الله عليه مكاني اتمنى من كلبي اني بداله ونفس الشي اهلي واخواني واحبابي كلهم. 

كال لامادروو كميل كال مااكول الهم

ارتاحيت ماراح. اشوف الضعف بعيونهم وخوفي اكدر اسيطر عليه وحدي كافي عليه هم ركاد وعيونه الي كفيله تشرح الي هوه بي بدون كلام

بدلت وجهزت نفسي وهوه يتحرك وعيونه تراقبني ضحكت وي مريومه واني ابدل الها رفعت راسي اشوفه مبتسم لابتسامتي بس..  هيج يحبني يضحك وياي ويبجي وياي

ياربي الخاطرة شافيني وخليني اكمل وياهم حته لو مرحلة توصلني وتوصلهم البر الأمان مو بهذا الوقت بعدني بحاجتهم وهمه بحاجتي

كطع صفنتي صوته قرأ ابيات شعرية
وهوه مركز بعيني

لا السيفُ يَفعلُ بي ماانتِ فاعلهٌ
ولا لقاءُ عدوّي مِثل لقياكِ
لو باتَ سهمٌ من الأعداء في كَبدي
مانالَ مني كما نالتهُ عيانكِ

تنهد وگال كن المتنبي گايلهم بدل عني

كتله بعدهي عيوني مدوختك

ردت اضحك واغير الجوو متأكدة هوه سمعني حته يحسن نفسيتي وبالمقابل هوه هم يراد احسن نفسيته وانطي قوة لازم نسند بعضنه حته. نقاوم
تنهد وجر نفس

..مدوختني وبس ..الا ذابحتني ومحليه دنياي بعد

سكت لحظات رفع راسه 

..مستعدة يالعمر جدامنه درب طويل وعر وحش ممكن بس نتعداه انا وانتي مااخليج وحدچ
ابد بس لاتضعفين ولاتقنطين من رحمة الله ابد
كلنا تحت رحمتوو ومايكصر حاشاه الله 

هزيتله راسي بدون مااحجي

شويه واندكت الباب
راح فتحلهم الباب
دخلوو عمي وجراح وسجاد واياد وامهم وياهم

اجوو حته يسندون اخوو ويرفعون معنوياته
حضني عمي وباس راسي دعالي واحس دعائه من گلبه يطلع
باس ركاد ولزم كتفه كاله اتگوه يبوك شد حيلك ولاتخاف حنا بظهرك الي تريدوو والي تامر بي
وكولي انا لاتكول الغيري انا كلي تحت امرك

تشكر منه ركاد وباسه

جراح سلم عليه واول مرة يخلي عيونه بعيوني شفت بيهن خوف اخ ع اخته

گال يخوج صيري سبعه وكوية وربي مايكصر معج انتي طيبه وبنت اطياب ترديلنه سالمه غانمه
  ان شاءالله

فرحت بداخلي اشوف ثمار طيبي الزرعته
جراح حيل يحبني ويحترمني وصار يشوفني اخت اله والميثه بعد ماساعدتها
وساعدته على الاستقرار بحياته هوه يحبها بس ميعرف يتصرف وياها وهيه تحبه وتقصيرها عن جهل مو تعمد والحمدلله كدرت اساعدهم
واستقرت حياتهم والحد قبل يوم. اني متاركتها شنو تريده تكلي وانصحها ملابس اختارلها كلشي تريده اني اساعدها وان شاءالله ارجع وابقى وياها طول العمر

سجاد واياد دعولي وعيونهم تتنقل بيني وبين اخوهم
التموو عليه صار بينهم همه وابوهم وصووه وربتو ع ظهرة شدوو عزمه وكلوله تليفون واحد حنه يمك
نسابك الطيور ونجيك  

حيل حلوو موقفهم حته اني اتقويت منه

وهوه نفسيته شويه استقرت

كال يلله كميل جاي
گلبي اتسارعت دكاته

دخل عيوني ماشافته غوشن من الدموع

حضني ودموعه بللت لحيته

باس راسي وخدي

گال صيري سباعيه لاتخافين اني وياج واشوف انتي اسهل حاله بالنسبه الهذا المرض ونسب الشفاء بي كبيره  والاهم ربي وياج وميتركج

طلعنه وصار الوداع بالباب

ام سجاد دموعها منشفت ابد رغم هيه ويانه تروح

جراح اخذ بيده مريومه وهيه تاشر علينه اني وابوها مكدرت اصعد واخليها كتله مااروح اذا ماراحت كال العمها عطينياها واخذها هيه وجنطتها واحتياجاتها جابها ويانه
خلاها بحضنه بالسياره كعد بالصدر يم كميل جان هوه الي يسوق بسيارته

وعمتي ام سجاد يمي

حركت السيارة ومشينه بطريق مانعرف ماخذنه الوين وشنو راح يصير ويانه

كالعادة ابتدأ كميل بدعاء السفر

"اللَّهُمَّ احْفَظْنِي‏ وَ احْفَظْ مَا مَعِي، وَ بَلِّغْنِي وَ بَلِّغْ مَا مَعِي بِبَلَاغِكَ الْحَسَنِ، بِاللَّهِ أَسْتَفْتِحُ وَ بِاللَّهِ أَسْتَنْجِحُ وَ بِمُحَمَّدٍ ( صلى الله عليه و آله ) أَتَوَجَّهُ.
اللَّهُمَّ سَهِّلْ لِي كُلَّ حُزُونَةٍ وَ ذَلِّلْ لِي كُلَّ صُعُوبَةٍ، وَ أَعْطِنِي مِنَ الْخَيْرِ كُلِّهِ أَكْثَرَ مِمَّا أَرْجُو، وَ اصْرِفْ عَنِّي مِنَ الشَّرِّ أَكْثَرَ مِمَّا أَحْذَرُ فِي عَافِيَةٍ، يَا أَرْحَمَ الرَّاحِمِينَ"

غمضت عيوني  واني اسمع صوته الي ياخذني بعالم روحاني
حسيت روحي بغير مكان

كمل وصار يدعي دعاء الحاجه

اللهم صل على محمد وأل محمد

 كيف أدعوك وأنا أنا وكيف أقطع رجائي منك وأنت أنت , إلهي إذ لم أسألك فتعطيني , فمن ذا الذي أسأله فيعطيني , إلهي إذا لم أدعك فتستجيب لي فمن ذا الذي أدعوه فيستجيب لي , إلهي إذا لم أتضرع إليك فترحمني فمن ذا الذي أتضرع اليه فيرحمني , إلهي فكما فلقت البحر لموسى علية السلام ونجيته , أسألك أن تصلي على محمد وآله وأن تنجيني مما أنا فيه وتفرج عني فرجا عاجلا غير آجل بفضلك ورحمتك يا أرحم الراحمين.
 

امنت الدعاء بداخلي

حسيت ايد انمدت عدلت عباتي
فتحت عيني ركاد نص جسمه داير علية عيونه تتفحصني
وعينه عليه
التعب واضح بعيونه والقلق

اتمنيت اكدر اطمئن باله واكله اني بخير لاتفكر بس هالكلام صعب اكوله

طول الطريق كله لو يلزم ايدي يشوف الحرارة.
لو يلمس جبيني

لو يعدل عباتي لو يعدل شعري الطالع
من اطراف حجابي

وصلنه الكوت اكوو  مطعم سياحي ع الطريق

اصر ركاد ع كميل وعمتي ينزلون يتريكون رفضوو كلهم حته لو بس جاي وشي بسيط

نزلو ونزل طلبلهم اجه يشوفني عباله نايمه اتظاهرت بالنوم جابلي بسكت وعصير ماراد يكعدني

باب السياره مفتوح وهوه وكميل واكفين منتظرين. عمتي اخذت مريومه للمغاسل تبدل الها وتغيير ملابسها

كاله كميل خلي الحجيه تصعد يمي وانت صير يم مرام مبيين ممرتاح كل شويه تدير عليها
خليك يمها نفسيتها تتحسن اكثر
واهم شي نفسيتها هسه

اجت عمتي والظاهر هيه منتبهه هم
كالتله يمه اصعد انت هنا واني اروح هناك اريح الك والها وبنتك هم تريد قريبه عليها انشلع كلبها

اخذ مريومه بحضنه وطول الطريق ايدي بايده
اخذ راسي خلاه ع كتفه حته ارتاح بنومتي وفعلا ارتاحيت بقربه حسيت بامان اكثر
نمت الحد دخولنه البغداد

الطبيب بالحارثية

وكميل اتصل بصديقه يحجز باسمي عند الدكتور عيادته قريبه عليه ومينطون. حجز بنفس اليوم. راد يمشيها الخاطره دكتوري يصير اقارب زميل كميل
فطلب منه

وصلنه وحجزنه فندق

غرفه الي اني وركاد وعمتي بغرفه وكميل بغرفه

گال كميل ارتاحوو وخلونه انزور كتله بدون ماارتاح هسه انروح جنت متحمسه للزياره اريد بس اوصل

دخلنه الكاظمية واول ماشفت القبة حسيت گلبي وصل قبلي
ركاد شدد قبضة ايده ع ايدي وعيونه ع القبة
وشفافه تتحرك بدون مينطق بصوت

دعيت وي دعائة يارب الخاطره علمود احبابي وبنتي

افترقنه يم نقاط التفتيش افترقت اجسامنه وگلوبنه جانت سوه سبقت خطواتنه واتعنت راهب اهل البيت

باب الحوائج موسى ابن جعفر
عطاي المراد هيج احنه نسمي
يارب بجاهه عندك

دخلت واردد الصلوات والزيارة
وبعدها شكيت حالي وضعفي

ردت ابدد خوفي وانفض كل مخاوفي وهواجسي القلقتني هنا بحضرته اريد اطلع منه قوية

يارب اذا متشافيني انطيني القوة والقبول بقضاءالله وقدره الاهي مااريد اضعف واكون جازعه
الهي امنحني شعور القبول والرضا بقضائك

يارب شافيني الاجل بنتي وزوجي الي اتغيير حاله بيومين من مرضي اعرف كدامي رحلة طويله ساعدني وساعدهم يارب

حسيت انشرح صدري
والشعور الي جان كاتم على صدري اختفه

بعدني جاي ادعي منصيه ومغمضه عيني اتخيل اني بمكان واسع طاهر ماكو بشر يمي بس الاهي اليسمعني حسيت شي غطاني وفززني صوت الصلوات على محمد واله

فتحت عيني بيرغ مغطيني كلي
الظاهر مريه شامرته ع الشباك ووكع عليه حضنتني عمتي ام سجاد وهيه تبجي حسستني اني بنتها
خوفها عليه يوازي خوف امي وخوفها على ركاد اكثر جان
حضنتني وهيه تردد يارب يكون لباس عافيه الج

طلعت من الحضرة مرتاحه ضحكت من شفت وكفتهم منتظريني اخذت مريم من عمتي تعبت منها تتنحس وعذبتها

ضحكت من شفت عيونهم عليه ردت احسسهم انو اني انفرج همي وماكو خوف بعد ميهمني شي

عيني بعين ركاد الي متفاجأ من تغيير حالي  كتله اريد اتغده جعت حيل

قبل فترة جانو يتوسلون بيه اكل لكمه مااكدر مااشتهي مو من شي بس التفكير ميخليني

كال يخسي الجوع

اخذنه المطعم عائلي ع المحيط
دخلنه جوه بجناح العوائل
كميل ابتسم من شافني يكل الركاد انت ماتعرفها مرام قوية وبعد اقوى من هيج هسه تعرف قوتها

رد عليه

لا انا خابرها عدل انا اعرفها اكثر من كل واحد
وادريها ماتخييل ظني انا اتگوه بيها

بعدها رحنه للطبيب

وصرت اناقش المرض ومرحلته وكيف تكون العملية وشنو الخطوة القادمة وشنو العلاج الي ممكن يسيطر عليه وبيمن نبدأ اسئلة هواي جانت ابالي كلها ناقشتها حته الطبيب اخذ راحته وياي وشرح كلشي وجان متفائل

اتعرف على كميل وطلع كميل طالب عنده بفترة اول سنين دراسه اله

كله اختك قوية لتخاف عليها
وركاد ايضا ناقشه وطلب منه اجراء سريع
كان متعاون ويانه بشكل وطول باله ويانه

طول هذي الفتره وايد ركاد ع ظهري
احسه يكلي اني ساندج طول الوقت

حدد موعد العملية ثاني يوم بالعشرة الصبح

بهذي الليله ماردت انام رغم طلب مني ارتاح اريد اشوفهم واشبع عيوني منهم
كميل ركاد بنتي اتمنيت اشوف اهلي طلعت تليفوني وشفت صورهم تخيلتهم يمي ويحاجوني واحاجيهم

بهذي الليلة حضنت بنتي واثنينه نمنه بحضن ركاد هذا الامان بالنسبه الي

اصابعه بدت تتوغل بشعري بطريقه التدليك غمضت عيني مرتاحه

..گاعده

..اي گاعده..  اتنفست براحه من نبرة صوته حسيته ارتاح بعد ماكلمنه الطبيب

..تتحملين هرجي ابا احجيلك كلام ماحد يعرفوو

..اكيد اتمنى تحجيلي شي خاص بيك ماينكال بس الي

..انا كلي لك  ماكلامي وبس
جر نفس وبصوت مبحوح گال

تعرفين متى اول دمعة طاحت من عيني

هزيتله راسي لا

..يوم خطبتك وعقدنه تماسكت جدام اهلك وعد بابكم طاحن دموعي يشهد الله بس كانت دموع فرح
گلبي كان يخفك من شدة الفرح

اتمنى تنعاد فرحتي بسلامتك وهالمرة مااتماسك ولايهمني يطيحن بدون خوف وخجل جدام اهلي واهلج وخلگ الله كلها

..حبيبي ان شاءالله ربي يرزقنه هالفرحه

..انزين شو كان شعورج لما عقدنه ماناشدج انا

جان يريد يذكرني بأحلى ايام عمري ويتذكر وياي

..ابتسمت واني اتذكر ذاك اليوم

كتله

چنت احس نفسي طايره گلبي حسيته طلع من مكانه من قوة نبضه جانت ابتسامتي غصب عني حته كدام اهلي ماكدرت اخفيها الهسه من اتذكر نظرات عمي ياسر اضحك واخجل
والباقي مااتذكر الحد مابستني بكصتي وظل عطرك ابالي الهسه دهن العود جنت مااحبه من ذاك اليوم حبيته

خله وجهي بين اديه وباس راسي

..تعرفين شگد احب عيونچ واتمنى ابوسهن بس يكولون بوسة العين افراگ
صرت اتجنبهن مامصدك هالخرافات بس ماادري ليه اخاف من افكر ابوسهن.  اتركهن واكتفي بالنظر الهن وبس

عندي تفاركني الدنيا كلها الموت اهوون من فراگج والله

واثق من ربي مايلوع كلبي بيج

حضنته حيل

غفيت وظلت كلماته الاخيرة ابالي

طلعنه للمستشفى جهزوني من التسعه
تمر الدقيقه عليه بسنه وعليهم اكثر لان منتظريني برة
اخر شي من رادو يدخلوني طلبت اشوفهم
سمحولهم يدخلون

اتفاجأت بوجود مصطفى وعمي ياسر

ضحك مصطفى رغم عيونه طاغي عليهن حمار وحواجبه الي معقوده كل وقت بايين عليه الحزن صارت حته الضحكه ماتخفيهن
باسني وابتعد عني يمكن خاف يضعف اذا بقه قريب اكثر
الوحيد الي ريحني عمي ياسر احسه فاهمني
ماراد يبيين ضعفه وخوفه عليه

ابتسملي من شافني
باسني بخدي 

..شو حليانه شني السالفه
دار على ركاد كله يابه انت المريض مو هيه

بتنه تخبل جنها ورد طبيبها مشتبه طلعوها يلله

ضحكت وهمه ضحكو الكلامه  رجع باسني
سلمت عليهم ورجعت استحيت ابوس ركاد يمهم
رغم محتاجته بهذا الوقت بالذات
بعدني بنهاية الممر

اريد ادخل للصالة
سمعت صوته

..مرامي

..درت عليه فتح ادينه
نسى وجود عمي واخواني الموظفات الي ينتظرني
حضني بقوة باس راسي وخدي

..وداعة ربي حافظك لي ومفرحني فيك ان شاءالله
مودعه باسم الرحمان

دخلت وكلماته باذني
وبكلبي ادعيله ربي يبرد گلبه ويخلي

دخلت العملية
سؤال الطبيب والبنج اخذ مفعوله

بعدها حسيت بألم مكان الجرح
فتحت عيوني ايدي بايد ركاد ويمي عمتي وعمي ياسر ومصطفى تحمدولي ع السلامة سالت ع مريم طلع جراح جاي واني بالعملية ومن طلعت من العملية قبل الافاقه ماخذها ورايح الطبيب كايل مو زين تبقى وركاد موديها الميثه وياه
ارتاحيت عليها صح تتاذه اكثر صح اشتاقلها بس هنا مو زين عليها

كميل ماخذ التحاليل للحارثية حته النتيجة تطلع اسرع
وهم انطوه اسبوع يلله تطلع

من صحيت وشافوني بخير راحو عمي ياسر ومصطفى رجعو للبيت اثنينهم مجازين

الحد هسه اهلي ميدرون

بقيت تلث ايام بالمستشفى وبعدها
طلعت بفندق
وياي ركاد وعمتي ام سجاد
بهاي الايام الباقية ركاد ماانطه مجال الاحد يهتم بيه حته عمتي كلشي اريد هوه وياي
من غير العلاج والتحاليل كل شويه طالع مرت الايام الحد يوم النتائج

دخلنه والخوف والقلق مسيطر علينه

الطبيب عيونه بعيونه واحنه منتظري ينطق
وقوع البلاء اهون من انتظاره الانتظار كلش صعب
كال الحمدلله الكتله انشالت الجلد والغدد المحيطه مواصل الها المرض
فرحنه الحد ماكمل
بس نخاف الخلايا ترجع ويرجع نشاطها
لازم اشعاع ع المنطقه المصابه سابقا
وهذا نحدده ويكون بعد اسبوعين ضبط

وتبقى التحاليل والفحوصات كل شهر منا الحد ستة اشهر يكون كل ثلاثة اشهر
لمدة ثلاث سنوات
بس ان شاءالله الاشعه تكون مرة وحده واذا احتاجت بعد نعرف من خلال التحاليل والفحوصات بالمستقبل بس ان شاءالله متحتاج
غير جلسه وحده وممكن اثنين

ارتاحيت لان ماكو جرع كيمياوي

كله ركاد

..دكتور جرع الكيمياوي ماحاجه الهن

..حاليا متحتاج

فرحنه بس ظلينه بقلق من كلمة حاليا

يعني اكو خوف يرجع انشط المرض
بس مانريد انخاف قبل حدوث المرض

طلعنه واحنه نحمد الله ونشكره تليفرن ركاد مبطل رن
وتليفوني قافلته ع اساس اني بسفرة وي ركاد
هيج اهلي يعرفون

اجانه سجاد بسيارته واخذنه بيومنه رجعنه للبيت
طبينه البيتنه المغرب
اتفاجأت من لكيت الكل موجودين اهل ركاد عيني صارت بعين عمتي ام ركاد جانت تبجي ومتانية ابنها تحضنه بيدها الجكليت ذبته عليه وبجت من شافت ركاد وياي الي انشغل بمريم الي ذبت روحها عليه
عبالك جبيرة وتعرف معنى الاشتياق انشغلت عنها بسلامهم الي خواته وميثه
عمي صاح اياد جيب الذبيحه خل جراح يذبحها
وكفت وذبحها يم رجلي

دقايق احس نفسي سعيدة بيهن شفت ركاد حضن امه لان حيل متأثرة دعتله ربي يشافيها ويفرحك فيها يايمه

دخلت للبيت تعبانه من الطريق والعلاج
اشرلي ركاد اروح الغرفتي ابدل وارتاح

رحت بدلت واجيت توني كعدت يمهم واسمع صوت امي وبچيها وبعدت صوت حبوبه جانن يبجن بقوة وعمي يهديهن يكلهن كولن الحمدلله

هانت راحت الصعبه

يتبع…