رواية عشق البدوي الفصل السابع والثلاثون 37 - بقلم نور الشمس

مساء الحب 🌹

رجعت راسلته كتبتله

.. فوكاها انت ماراضي فوك سوالفك وياي يعني عادي انت تخون واليمك تحاجيني وتضحك بكل وكاحه هسه تهددني باهلي اني هم اوصل الصار ال اهلك ناس متدينين وخايفين الله يقبلون بالصار

..بيچ بخت انذار ومااكدر اطلعلي ساعه ينتهي الانذار ويصير خير خليج بمكانج وخيرج يجيج لاتستعجلين وبعد مااريد اي رساله لو مكالمه منج نهائيا اسمج مااريد اشوفه بالتليفون

ولاتهدديني باهلي اني مااخاف لا من اهلج ولا من اهلي بس اذا انتي فد مرة تردين اطلعين بدون اخلاق من صدك كولي واحجي الصار انتي الراح تنضرين اني كلشي ماعلية

..عابت والله عابت شمرت الفون رحت للكنتور الم ملابسي اي المهن واروح الاهلي شنو شكالوله ماعندي احد واتحمل الذلة

طلعت ملابسي اريد الوح الجنطه بعيده الاخ ع طوله شامرها فوك ع الكنتور مخليها

اروح اجيبها

جبت كرسي وصعدت يمه حسيت يتمايل بيه مدري يتخيلي
شلي بهالسوالف اني ليروح الحمل مني
نزلت واحس بيه نار شلون تطفه ماادري
رجعت ملابسي وقررت مااطلع بس اطلع يطلع ثاره من اهلي من حجزني ركاد بذيج روحتي كله انت طلعتها تتحمل بعدها ولمن تتاكد من نفسك رايدها يلله
خاف هسه نفس الشي يكول هيه طلعت خليها ترجع وحدها  وكلشي ولا انذل

اكعد ابيتي بس سهله اني اراويك
كلساع ادخل اشوفه متصل

اخخخ كلبي وجعني  عابت مو صوجك صوجي والله
اني اعرف شلون اقلقك
باوعت العمتي نايمه بالغرفه الثانيه بالليل تبات يمي
سهله باجر اشوفك القلق شلونه

رحت ثاني يوم للدوام داومت اخذت صوره الي قبل لااطلع من البيت  وخفيت وجهي بسمايل لابسه بنطرون ضيگ اسود وبدي ابيض وقميص طويل ماروني
اللون الي يحبه ويمنع لبسه بالدوام وحته هذا اللبس بالذات ميحبه بالدوام 

وشال مشجر وكب
اخذت صوره ولبست عباتي وقبل لااطلع خليتها صورة للوات ساب

رحت وكل افكاري يمه من يشوفها شراح يسوي
خلي اقهره مثل مايقهرني

خليت وضع الخط طيران

رجعت للبيت فتت والتليفون اخذ شبكه اريد الحك ع صوت الرسائل فتحتهن وگلبي تتسارع دگاته

قريت اول رساله

..هاي شنوو انتي شجاي تسوين تعانديني لو شنوو

شوگ غيري صورتج لا والله تعرفين شأسوي

..انتي شنوو وين لاتكليلي رحتي للدوام بهذا اللبس

ومحمد جاي تختبرين صبري وراح اتخليني اسويلي مشكله بالدوام واجيج
مو اني الي لازمني الالتزام وغصبا عني صابر ليش تخليني اخرب كلشي واجي اعلمج الاحترام شلون يصير

رغم الخوف البيه بس مأمنه بالانذار وحبيت العب بأعصابه اكثر  فوك سوالفه هوه الزعلان ومو قابل

كتله هسه اجيت من الدوام انت شتريد مني فوك قهري تريد تقهرني اكثر شمسويه اني لبسي مستور من اتزوجتك اني هذا لبسي

..مالي علاقه عن لبسج ابيت اهلج قبل ..شووگ انعدلي لااعرف شلون اعدلج بس تتندمين والله لاتخليني اطلع من طوري غيري الصورة من الوات ساب وبعد سوالف الزعاطيط هذي لاتعيديها

سد التليفون غيرتها الصورة بس انطيته حظر وسديت البوب من وكت قفلتها حته خاف بالليل يتصل بأمه تجي يمي تلكاني مقفله ونايمه ويظل مشلوع گلبه مثل ماشلع گلبي
ادري بي هوه و هيه يمي وكل شويه متصل يضحك عليه انذار خوش والله هوه ماخذله اسبوع سياحه
اخخ ولابيكم واحد بريء واني الغبرة من يحجن بنات ع الضباط يمي العب لعب والساني ينمد متر عليها وحبيبتي لتجمعين ومن هالسوالف لا والله شو صح كلامها
سديت البيبان وحظرته
ولفيت راسي ونمت من القهر گعدت احس معدتي توجعني اووووف اعراض الحمل هاي
شيخلصها وياي منين الگيها اني

باوعت للساعه عزة بعيني نايمه كل هالفترة الساعه دعش بالليل
لكيت نبراس مراسلتني ومرام هم

فتحت رسائل نبراس اعرفه هوه دازها تبوك الساني حته ينام مرتاح الاخ ولااجاوبج

كاتبتلي انتي وين لج جاوبي وين رحتي

فتحت رسائل مرام
كاتبتلي

..شوگ وينج يمعوده منا لثنعش اذا مارديتي ابلغ اخوتج والله عمي ياسر خبص الدنيا وجاي بالطريق اذا مابيج شي كولي واذا سوالف مال زعاطيط وانتي متعمده ضمي روحج من عمي تره ناويلج نية سودة

عزة عزة وعمج شنوو رئيس الوزراء ولكاله مهرب بعز الهوسة  والانذار لو الوضع استقر ع عين شوك الطايح بختها

امداني وين اظم روحي هسه

ماراسلت حته شوگ ماكو غير اسوي نفسي مريضه هوه صح اني مريضه بس اسوي نفسي حالتي ميؤوس منها

بس شلون امثل ياربي وين عمتي خل تجي يمي اكيد يحترمها ويتركني

اريد افتح الباب اتذكرت هسه هيه بسابع حلم

اووف الانتظار مرضني صدك واحس صارت لويات ابطني من الخوف ماادري شجاني

عبرت ساعه اثنعش وهوه ماكو هنوب خوفي اتحول عليه بس لاصارله شي بالطريق يعني جايني وره العشرة من بغداد اذا الهسه مواصل جاي احسب واسمع طبكة الباب واني اطشرت من الخوف  تعالوو لموني 

گلبي صارت دكاته يم بلعومي ويدك بسرعه عجيبه وجهي بهت لونه اصفر صار احس اعظامي ترجف

حسيت بمقولة أجاك الموت ياتارك الصلاة
فتحت قفل الباب الداخلي وع السريع
دخلت الغرفتي واحس حرارتي صعدت كومت الغطه عليه وسويت نفسي ارجف اسمع خطواته واحس فعلا لزمتني رجفه وحرارتي زايده

اندفع الباب حيل من قوة دفعته ضرب الحايط فزيت وخليت ايدي ع گلبي

باوعتله وكوه كابرت اني زعلانه عليمن خايفه هوه الي يعتذر

..ياهلا بشووگ طلعتي عدلة
ردت اصليلج الوحشة بالطريق

يمه اسم الله علية
بكلبي كلتها
..جاوبته وخشنت صوتي ع اساس مريضه

منتظر تلگاني ميته ان شاءالله اموت وتخلص
مني

..اخخ ياالسانچ كليلي هسه اني شسويلج شنو اليشفي غليلي بيج الطريق كله افكر بياطريقه احاسبج

انتي ليش صايره بلايه اخلاق ليش متحسبين وتوزنين الكلمه يلله اطلعيها

اني مو من مستواج ومستوايه ذني السمعتيهن قصدج مستواي موزين مثلهن شنو شايفتني جايج اطوطح تالي الليل وانظلمتي وياي يابت الحسب والنسب
مستواج اعلى بشنوو حاجيني شبيج انخرستي

اخر جمله حجاها بصوت عالي طفرني وزادت رجفتي

..لتصيح عليه يعني وحده س…  ة تحاجيني منك مبينه من طريقة كلامها شنو هيه شتريد اهلهلك مثلا اقل شي سويته

..لا يابه طلعي قوتج كلها ليش تسوين الأقل احچي كولي وشنو لبسج هذا الرحتي بي اني مانعج من هذا اللون بالذات لو لا كايلج بس الي تلبسي لو لا

..واني حبيت البسه

..انتي تلعبين بالنار صدگي لاتستفزيني من احجي انجبي وخليني احجي مو زين ماموتج هسه اصلا مستغرب روحي هيج واكف وياج
لج شنو معناها تحظريني وتسدين الباب وامي ساعه ادك بابج متفتحين انتي شنو فلمج هوه عناد والسلام لو جلدج يحكج

حيل انقهرت منه ومن نفسي يريد يركب كلشي براسي

احس عظامي صارت ترجف مو خوف قهر وخلي شيسوي خلي يسوي بلكي اكرهه فدمرة واعوفه

سمعته صاح حيل لطمت وجهي بقوتي وخمشت شعري

..لاتصيح لاتصيح هاي اني يمك اكتلني ماتكتلني اني اريد اخلص من روحي ضربت وجهي فوك قهري فوك ماتجي تكلي شنو الي خلاك تخوني باذني اسمعت صوتها مو زين باقيتلك بالبيت
هاك اضرب احجي وديني لهلي شتريد تسوي سوي
ضربت نفسي حيل وطلعت قهري ويمكن بوكتها الحمل وهرموناته مأثرة بيه

بجيت وصيحت واضرب بوجهي وصدري

..ليش هيج تعاملني فوك حبي الك مشتاقتلك واحسب اجازتك يوم يوم تالي تخوني وتهيني كل شويه وتتهدد
تريد توديني الاهلي وديني هاك يلله وديني
كمت وشعري منفوش وعيوني دم حمر
فايضه دموع

اتفاجأ هوه بردة فعلي اول مرة يشوفني هيج اتصرف رغم اعيونه التحجي  استغرابه بس هوه مغلف نفسه ابرود

كعدت بالكاع ولزمتني رجفه ضربت نفسي هسه اروح هسه ماابقي يمك بعد جاي تتهدد عليه عبالي ترضيني عبالي تشرحلي
وديني الاهلي وكلهم هيج حاجتني وخلهم يعاقبوني عادي بس لاتتصرف وياي هيج اني هم بشر انت ضايج من لون لبسته بس اني عادي اسمع واعبر

حسيته قيدني بحضنه بقوة واتحولت بداخلي الرغبه من التمثيل المشاعر نابعه من قلبي دموع وشكوى وخوف

..كافي كتلج اهدي انتي غبيه شسويلج ولج اني الدنيا محتركه عندي يانسوان الاجيبهن ذوله جماعتي من الضوجه كم واحد بيهم يخربون ع المتزوجين عود يلطفون الجوو لمن صخموه الي

كافي بدون بجي كومي غسلي وروحي ارتاحي وبعدين نتفاهم ع تصرفاتج
انتي ابد مو عاقله والله
عبالك متزوج طفله مو بنية جبيرة و جامعية

…… ..

مرام …

بين الدوام والبيت وتعب الدراسه بس الحمدلله مسيطرة
اليوم ركاد كلي عندي سفرة للميناء ولازم اروح الاهلي بعدني الهسه اضوج من يروح يسافر الغير مكان وبيت اهلي العشت بي اسنين من اروحله احس نفسي خطار
وهذا الليل يمر واني عيني متغمض اتعودت ع بيتي ومكاني غرفتي
صح اشتاقلهم واروح وافرح بجمعتهم بس البيته ماارتاح الا ابيتي
اليوم اضطريت اروح
ومن رحت جانت كعده حلوه كميل وزينب وكروشي حبيبي مدنفش يخبل
وهاي بنتي كل متروح يمه متكعد الا تخمشه من شعرة يضحك كميل ويكلها يطلعهن منج بعدين

المغرب كاعدين ودخل علينه صوفي يابه الفرحه الفرحناها صارت جمعتنه احلى ابويه فرح وامي ورجعنه بذاكرتنه الايام زمان وموضوع يجر موضوع
شلون جنه نخاف من كميل اكثر من ابونه
سوالف حلوة ودافية بدفو البيت البي حنان ام واب يكون دافي وجمعته بيها طعم خاص
بداخلي دعيت الله يحفظهم
ويديم لمتنه تحت جناحهم

اتصل بيه ركاد

سحبت نفسي منهم ورحت الغرفة صوفي فوك غرفتي قبل مسوينها الهيثم

جاوبته

..الوو هلا حبيبي

..هلا يرويحة حبيبچ كيف احوالچ ..يبنت شاهت عيني من النوم مابتاخذ نوم افكر فيج واشتاگيت المريمتي

..اني هم والله مشتاقتلك ومريومه تلعب وي خوالها

… الله يحفظهم لها خلها مستانسه حبيبة ابوها ..انتي كيفچ علاجچ اخذتي

..اخذته كميل ذكرني

..عارفج انا الا حد يذكرج شو الي يخلييچ تنسينوو بنت الحلال لاتقلقيني

ضحكت واريد اخلص من تانيبه الي بدافع خوفه علية

كتله

..مو زين اتذكر اسمي حبك منسيني كلشي حته عشيرتي ناسيتها

..ول ول ول لاتدوهنيني يرحم اهلج وراي بضاعه وعقود وملايين تراني مطيرهن بسبتج هساع الي يكولي وقع على بيع عمرك اوقع وماني داري

ضحكت الكلامة وصوت مصطفى اجاني

..لا خوش قبضنه اذا العشيرة كلها ناسيتها شعندج عدنه ولج وين امي وابوي تعالو لحكو البتكم وشوفو تعبكم وين راح

ضحكت بصوت خجلانه لأن سمعني وحته ركاد سمعه وضحك بصوت الكلامه

كال وينه النسيب شو خليني احاجي

انطيته التليفون وحيل خجلانه ادري اني المن انسحبت منكم غير اكو خصوصية شكو لاحكني عجيب امركم الا يخلوني بموقف

حاجه ركاد

..يابه ع كيفك وي بتنه خليلنه حصه
ضحك من رد ركاد ماعرفت شكاله سمعت اتغير الموضوع وكله

ابو مريم شكد مطول بسفرتك هاي

زين يومين  بس اريدك تحضر خطوبتي

لا ماتسوه وراك هوه بس هالنسيب انت شعدنه غيرك انت الغالي

رفعت حواجبي اريد اصدكه
صدك تحجي الله عليك

..شو مامقتنعه شكالولج عليه راهب واظل طول عمري اتعبد لو مجبوس ومنتظر فك الجبسه

ضحكت

..لا هاي تطورات خطيرة وصاير تحشش هم بالجيش خوش مغيريك

..الدنيا اتغير ام مريوم ماكو شي يبقى ع حاله
المهم عاجبج اني بكل حالاتي صح
لو بس ركاد يعجب

ضحكت

..والله انتو اكثر اثنين تعجبوني مع العلم متناقضين بكلشي انت شرارة متنقله وهوه عكسك بس هم عصبي

..والله عاد العصبية ماتجي من فراغ

..عوف كلشي وكلي منو سعيدة الحظ الناوي تخطبها

تعرفيها

..منوو

..اخت صديقي احمد

..لا مصطفى لا بس لا بعدك تفكر بغير شي

… ابد والله اني احجيلج شلون صارت
بس سكتي بنتج هسه ونوميها وخلينه نسهر ونسولف

……

شووگ بعد ماهلكت بجي سكتت واني انتظر منه تبرير اشو  اتجاهلني ودار وجهه ونام

انقهرت حيل شكد قاسي وميحب يتنازل هسه اني شسويت من غيرتي اذا انت متريدني اخربط من الاول واحجي كلشي

ماادري شوكت نمت
ومرت يومين وهوه ابد ممحاجيني ولا اني بعد ماانهاريت كدامه وحجيت كل الي بگلبي وهوه اكتفه يقيدني حته لااذي نفسي وبس وحجاله كلمه حته مافهمني شلون صديقه وشلون صوته هيج وشنو غايته اكو واحد يشاقي ويلطف جوو بهجمان بيوت
لا وختمها الي بانو هوه حاس متزوج طفله

عزم امه واخوته بعد يومين من جيته  وكلشي سويت وحضرت مابيين الاحد صاير شي بيناتنه  ولا اني اتصرفت ع الطبيعه بس مبيين عليه الضوجه وحيل متكأبه انوب راجعلي التحسس الي مااتذكر صاير عندي من جنت طفله يمكن اول متوسط اخر ازمة الي بالتحسس

وصايره لو شميت عطر قوي او بخور او ريحة زيت محترك من اثر تكلاة احس بلاعيمي تجرحني

واني اكلي الدجاج اخر وجبه طلعتها وشكلت وياي كحه قوية
صارت دموعي اطفر من اثرها اريد هوة اجره احس ضاع علية الهوة

طلعت برة شهكت الهوة النظيف عمتي طلعت تشوفني

.. شبيج يمه ماعاجبتني هالايام ابد
شجاج عين ماصلت ع النبي

باوعتله واني اكح بخنكه واكف عينه عليه

كال يمه شبيها

ماادري يمه يمكن تحسس هذا يهيج بوكت الحمل مثل اختك كبل لو حبلت

انطاها مي كلها خل ترتاح

اصلا جنت مكمله كلشي نقل هوه السفرة وعمتي توزع عليهم المواعين بس تأشرله حته تسهمهم ع كولتها وهوه يرتبها
من كملو وبده
الغدة صاح عليه جانت توها الكحه هدأت عندي
عيب اكول مااريد ابين مزعوجه منهم
عدلت نفسي وغسلت ورحت كعدت يمه

الدجاج اني صرت مااطيقه ويدري بيه مااكل بس تمن وروبه
شال كاسه روبة من يمه خلاها يمي وقدم عليه ماعون التمن

عمتي كالت

.. يمه اكلي دولمة هاي اذا ماتاكلين الدجاج

كالها لا موزين عليها بهاراتها حادة تهيج عدها الكحه من جديد

المواعين والبيت نبراس وامها ماخلني اجيس رغم امها جبيره مو بعمري بس بطيبة عمتي وشايفه الضيم من عمتها وخوات رجلها من تجينه تكول مااريد اصير مكروهه اني اخت الجن كبل لااصير الهم
خطيه ماخلتني الزملي ماعون كلهن غسلتهن وسوت المطبخ يلمع ونبراس نظفت البيت كله
حيل اخجلت منهم
خدرت الجاي واخذته بيدي
نزلت الصينيه اريد ادنك اقدمها اخذها من ايدي وبعينه حذرني درت وجهي نسيت ولد حمويني وراي توهم مراهقين زغار مو كبار بس همه بيهم طبيعه بس يكبر الولد شويه يكبروه ويعاملوه معاملة الجبير

فتحوو موضوع انو مصطفى رايد يخطب
حماة رملة
جانت امها مقابله من حجتها العمتي مبيين من نبرة صوتها
تريدهم مايوافقون

بس ياسر كلهم كلفني وسألت عليها خوش بنية واهلها خوش ناس مصطفى مو زغير ومن الاخير اكلكم تره مايسمع كلامكم قرارة ماخذه وناهي كبل ليفاتح اي واحد بي لاتعارضون حته لتجبروه يفشلكم

دخت واني افكر معقوله بس يريد يغث رملة يخطب حماتها والله ماادري شلون يفكرون

يراد افهم من مرام ارضي فضولي ع الاقل

راحوو ومر اليوم والعندي مااتغير طلع ورجع وهوه نفسه
واني هالمرة معنده مااتنازل لأن ماغلطانه بشي يمكن غلطت بالتعبير بس الموقف حقي بي

صار الليل

غسلت وشسورت شعري بدلت وخليت عطر
اتورطت من خليته العطر بلاعيمي احسهن تشحطن اريد اتنفس من الكحه مااكدر امدايه العوبه عود احرك مشاعر الاخ شوور بيه يمكن

طلعت برة بالطرمه اريد اتنفس ناسيه لبسي وكفشتي
وحالي والمكياج

طلع ورايه وبيده كلاص مي

..شو اتنفسي واشربي شويه مي شجابج ع العطر مو تدرين بنفسج انتي

حسيته يتشمت بيه رغم ممبين بس بعز خنكتي وقهرتي دفعت المي مااريد

بدون مااحجي بس وصله الي قصدته

نزلت دموعي وصرت اكح وابجي

..كافي مو زين عليج اهدئي

صرت ابجي واكح اريد احجي اعاتب واكله وديني الاهلي بعد مااتحمل اهمال اكثر اجازته راح تخلص وهوه مجافيني ع شنو باقيه يمه اني خلي يوديني حته لو بس ارتاح مااروح زعلانه بي اريد ارتاح كم يوم كلشي خانكني بوجوده احسه يمي وبعيد عني

كتف اديه الصدره وكال

..جري نفس كافي هسه الدموع عليمن ماتكليلي
لو كايلج انتي مستواج ازباله شتسوين لو كايلج انتي ماتستاهليني شتسوين
وزيدي عليهن اني رجال مااتحمل هالكلام اني تشبهيني وتساويني وي المو زينات ليش لج اشايفه عليه انتي شايفه النار الي بصدري والله ماادري شلون ساكت واشوفج كبالي ومااسوي شي

عاد عليه نفس كلامه اول يوم يعني ماكو فايدة

كتله اريد اروح الاهلي

رفع حاجبه وكال وين ماسمعت

..كوه طلع صوتي وكتله وديني الاهلي تخليني هناك دوم كم يوم ارتاح بس المهم اريد اروح لايصير بيه شي من القهر والخنكه وذنبي بركبتك والله
حته لو عبرت غلط بس ماتسوة تعاملني هيج

دخلت قبله وفتحت الكنتور

وكعت ملابسي كلهن كتله نزلي الجنطه

..ملابس النوم شكووو ماخذتهن

مامنتبهه الهن اصلا من حجه نبهني ورجعتهن

..مااخذهن شسوي بيهن احجي والعبرة خانكتني
نزلي الجنطه يلله

..خليها ع الصبح قبل لاترحين انزلها الج واني اساعدج بيها ولا يهمج

زاد بجي وصوت عبراتي عله

اباله يذلني شنوو شوف منو ترجعلك بعد

تقلصات بطني اذتني حيل كمت اخذتلي نص حبايه واتمددت احس بتكويره بسيطه كلش قريب ع المثانه اول مرة احس هيج احساس

اتمددت واني مقررة خلص العليه سويته واني مغلطانه وخلي يكل الاهلي عادي قابل يذبحوني لو يرضولي الذلة

هدأت بس شهكاتي ماتهدأ ولا دموعي كدرت اوكفها

هاي صار كم يوم مايحاجيني وحته الدوامي من اطلع مايكلف نفسه ويوصلني للباب للخط يحسسني اني مهمه عندة

حسيت السرير اتحرك
وراسي انشال واتخله بحضنه
ظهري ملاسق الصدرة وراسه قريب الوجهي
بايده الثانيه لفني ومسح دموعي
باسني قريب الاذني وهمس

..كافي دموع ماكوو روحه الاهلج ومالج مكان غير حضني
كلامج ضوجني وعبالي عندج ثقة بيه حبيت اغثج مو اكثر
بس كل هذا الحسيتي مايساوي شعرة من النار الي بصدري
عبالي من اعذبج ارتاح انوب زيدتي عذابي

الي صار شقه ثكيل من الولد والله عاركتهم وهذا الرد عليج ضربته حته شفته انشكت مو لان سوة المقلب لا لان اتجرأ وحاجاج وسمع صوتج
واعتذر مني واجيت واني متندم ماسويتله عاهه رغم البيناتنه خوة دم مو صداقه عاديه بس اتجاوز حدة وانتي زودتيها وسممتيني بكلامج ذاك

اجيت احجي واشرح

عدل شعري بيده سحبه من وجهي ع الجهه الهوة بيها

..كافي ارتاحي مايسوة الحجي بعد سدي الموضوع واعتبري درس اتعلمي منه واعرفيني زين

بالتفاهم اخذي حقج اذا عندج حق لاتخربطين وتضيعين حته حقج

دارني عليه وكال ارتاحي هسه مبينه مختنكه حيل باجر اخذج للطبيب نشوفلج حل منين اجاج التحسس

… ..

مرام ..

..مصطفى يعني مالكيت غيرها

..شسوي الگلبي هيه بيدي بعدين شنو المانع اذا ع الي ابالج مايهمني

..شلون عرفتها

..اكثر من مرة رحت وياهم بنفس خطهم للدوام وي اصدقائي وعرفتها ومرة اتأخرت وطلب مني احمد ادزلها مصرف وهوه ينطيني من ارجع مايكدر يروحلها عجبتني البنيه
واكثر من مرة رحت للدوام ع جماعه اليه من نفس منطقتنه اعرفهم صح مو بعمري بس ولد ولاية واحنه هواي متفاهمين بكعداتنه وشقانه وضحكنه
رحت اسأل عنها واشوفها بحجتهم
والمرة  جرت مرة الحد ماصرت اريد بس فرصه حته المحها من بعيد واكدولي ماعدها شي لاعلاقه ولا حب ولاصداقه غير البنات والولد بحدود السلام فقط وولد منطقتها وبس حته يساعدوها بالملازم وطبعهن مو اكثر

قررت اخطبها واكيد مااخطي قبل مااعرف رايها

كلفت عليها ولد يكلف زميلته تحاجيها واجاني الجواب قبول بعد انتظار طال اول واحد كتله عمج ياسر وهسه انتي ورجلج
تعالي انفاتح الأهل بالموضوع

يتبع ..